1, 2. (a) Nwane mɔ a ɛnee Gyisɛse edwɛkɛ mɔɔ wɔ Mateyu 24:12 la fale bɛ nwo a? (b) Kɛzi Ɛzoanvolɛma Gyima buluku ne maa yɛnwu kɛ alimoa Kilisienema dɔɔnwo lale ɛlɔlɛ ali ɛ? (Nea mɔlebɛbo nvoninli ne.)

NINYƐNE mɔɔ Gyisɛse hanle kɛ ɔbayɛ “mekɛ ɛhye awieleɛ ne anwo sɛkɛlɛneɛ” la anu ko a le kɛ, “menli dɔɔnwo ɛlɔlɛ baha aze.” (Mat. 24:3, 12) Ɛnee ɛvoya mɔɔ limoa la anu Dwuuma se bɛle Nyamenle menli, noko bɛmaanle ɛlɔlɛ mɔɔ bɛlɛ bɛmaa Nyamenle la hanle aze.

² Noko, zɔhane mekɛ ne, Kilisienema dɔɔnwo bɔle mɔdenle hanle “Kelaese Gyisɛse anwo edwɛkpa ne,” bɛhulole Nyamenle, bɛ mediema Kilisienema nee menli mɔɔ bɛnle diedima la. (Gyi. 2:44-47; 5:42) Noko, wɔ ɛvoya mɔɔ limoa la anu, Gyisɛse ɛdoavolɛma bie mɔ maanle bɛ ɛlɔlɛ hanle aze.

3. Duzu a maanle Kilisienema bie mɔ ɛlɔlɛ hanle aze a?

³ Mɔɔ Gyisɛse Kelaese ka ɛvoya mɔɔ limoa Ɛfɛsɛse Kilisienema anwo edwɛkɛ la, ɔhanle kɛ: “Melɛ ɛhye metia wɔ, kɛ wɔgyakyi ɛlɔlɛ mɔɔ ɛnee ɛlɛ ye alimoa ne la.” (Yek. 2:4) Duzu a vale ɛhye rale a? Bie a Kelaese alimoa ɛdoavolɛma ɛhye mɔ maanle ewiade adwenle nyianle bɛ nwo zo tumi. (Ɛfɛ. 2:2, 3) Ɛnee  ɛbɛlatane ɛbu zo wɔ ɛvoya mɔɔ limoa Ɛfɛsɛse, kɛmɔ ɔde wɔ azuamgbole dɔɔnwo azo ɛnɛ la. Ɛnee ɔle suakpole kɛnlɛma mɔɔ bɛdi boɛ wɔ zo na menli mɔɔ wɔ ɛkɛ la kulo kɛ bɛ nwo tɔ bɛ, na bɛ nye die dahuu. Anyelielɛ ninyɛne zɛkyele bɛ ɛlɔlɛ mɔɔ nabalaba ɛnle nu la. Bieko, ɛnee ɛbɛlatane mɔɔ bɛnze nwolɛ nyiane, nee nla nu ɛbɛlatane ɛbu zo.

4. (a) Ndenle boni mɔ azo a menli ɛlɔlɛ ɛha aze wɔ yɛ mekɛ ye azo a? (b) Ninyɛne nsa boni mɔ a ɔwɔ kɛ yɛnyia ɛlɔlɛ kpole yɛmaa bɛ a?

⁴ Menli ɛlɔlɛ mɔɔ Gyisɛse hanle kɛ ɔbaha aze la fale yɛ mekɛ ye noko anwo. Ɛnɛ, ɛlɔlɛ mɔɔ menli lɛ maa Nyamenle la ɛha aze. Menli mgbe dɔɔnwo ɛkpo ye, na bɛ nye la kɛ sonla ngyehyɛleɛ bali alesama ngyegyelɛ nwo gyima. Ɛhye ati, menli mɔɔ bɛnzonle Gyihova Nyamenle la ɛlɔlɛ ɛlɛka aze. Noko, mɔɔ hɔle zo wɔ ɛvoya mɔɔ limoa Ɛfɛsɛse asafo ne anu la maa yɛnwu kɛ, ɛnɛ noko, nɔhalɛ Kilisienema bahola ado bɛ adwenle nu na bɛamaa bɛ ɛlɔlɛ aha aze. Yemɔti bɛmaa yɛzuzu kɛzi ɔwɔ kɛ yɛnyia ɛlɔlɛ kpole yɛmaa, (1) Gyihova (2) Baebolo nu nɔhalɛ ne, yɛɛ (3) yɛ mediema la anwo.

5. Duzu ati a ɔwɔ kɛ yɛkulo Nyamenle a?

⁵ Kenle zɔhane mɔɔ Gyisɛse hanle kɛ menli ɛlɔlɛ baha aze la, ɔlimoale ɔhilele awie mɔɔ ɔwɔ kɛ yɛkulo ye kpalɛ la. Ɔhanle kɛ: “‘Fa wɔ ahonle muala nee wɔ ɛkɛla muala nee wɔ adwenle muala kulo Gyihova wɔ Nyamenle ne.’ Ɛhye a le mɛla kpole kpalɛ nee mɔɔ limoa a.” (Mat. 22:37, 38) Saa yɛkulo Nyamenle kpalɛ a, ɔbamaa yɛali ye mɛla zo, yɛagyinla yɛ munlililɛ nu, na yɛahyi ɛtane. (Kenga Edwɛndolɛ 97:10.) Noko, Seetan nee ye ewiade ne maa ɔyɛ se kɛ yɛbahulo Nyamenle.

6. Duzu a ɛvi Nyamenle anwo ɛlɔlɛ mɔɔ ɛha aze la anu ɛra a?

⁶ Ewiade ne lɛ adwenle ngakyile wɔ ɛlɔlɛ nwo. ‘Menli le angomedi,’ bɛngulo Bɔvolɛ ne. (2 Tim. 3:2) Bɛfa bɛ adwenle bɛsie “nwonane nu atiakunluwɔzo nee ɛnyelɛzo atiakunluwɔzo nee ɛbɛlabɔlɛ nu ninyɛne mɔɔ awie fa tu ɔ nwo la” azo. (1 Dwɔn 2:16) Ɛzoanvolɛ Pɔɔlo bɔle ɔ mediema Kilisienema kɔkɔ kɛ: “Adwenle mɔɔ gyi nwonane nu ninyɛne zo la wie ewule . . . ɔluakɛ adwenle mɔɔ gyi nwonane nu ninyɛne zo la le Nyamenle kpɔvolɛ.” (Wlo. 8:6, 7) Nɔhalɛ nu, menli mɔɔ fa bɛ ngoane mekɛ di nwonane afoa nu ninyɛne nzi anzɛɛ nla nwo atiakunluwɔzo nzi la arɛle bɔ na bɛdi nyane.​—1 Kɔl. 6:18; 1 Tim. 6:9, 10.

7. Esiane boni mɔ a Kelaese ɛdoavolɛma yia ye ɛnɛ a?

⁷ Wɔ maanle bie mɔ azo, menli mɔɔ bɛnlie Nyamenle bɛnli, bɛngola bɛnwu ye kɛ Nyamenle wɔ ɛkɛ, yɛɛ menli mɔɔ die ngakyihakyililɛ di la edwɛkɛhanlɛ ɛmmaa menli ɛngulo Nyamenle yɛɛ eza bɛnlie ye bɛnli. Bɛmaa menli dɔɔnwo ɛlie ɛli kɛ sonla mɔɔ ye adwenle ɛtɛtinli anzɛɛ ɔnze nwoma la a die di kɛ Bɔvolɛ bie wɔ ɛkɛ a. Mekɛ ko ne ala, bɛyeyɛ abɔdeɛ nrɛlɛbɛvolɛma, na ɛhye ɛmaa menli ɛye bɛ adwenle ɛvi yɛ Bɔvolɛ ne anwo. (Wlo. 1:25) Saa yɛtie ngilehilelɛ zɛhae a, yɛbahwe yɛ nwo yɛavi Gyihova anwo, na ɛlɔlɛ mɔɔ yɛlɛ la baha aze.​—Hib. 3:12.

8. (a) Tɛnlabelɛ mɔɔ maa bɛ sa nu to la boni a Gyihova menli yia a? (b) Arɛlekyekyelɛ edwɛkɛ boni a wɔ Edwɛndolɛ 136 a?

⁸ Saa yɛmaa yɛ sa nu to a, ɔbamaa yɛ diedi aha aze, na Nyamenle anwo ɛlɔlɛ mɔɔ yɛlɛ la noko baha aze. Wɔ Seetan ɛtane ewiade ɛhye anu, ɔyɛ a yɛ muala yɛyia tɛnlabelɛ mɔɔ ɔmaa yɛ sa nu to a. (1 Dwɔn 5:19) Bie a kɛkala kpanyinliyɛlɛ,  anwodolɛ, anzɛɛ ezukoa anwongyelelɛ ɛmaa yɛ nwo ɛhyele yɛ. Anzɛɛ bie a yɛte nganeɛ kɛ yɛnfɛta, yɛ anyelazo ɛtɛbale nu anzɛɛ yɛ sinlidɔlɛ gyegye yɛ. Noko, ɔnle kɛ yɛmaa tɛnlabelɛ anzɛɛ nganeɛdelɛ ɛhye mɔ maa yɛnyia adwenle kɛ Gyihova ɛkpo yɛ. Emomu, ɔwɔ kɛ yɛdwenledwenle edwɛkɛ mɔɔ kile kɛ Gyihova lɛ ɛhulolɛ kpundii maa yɛ la anwo. Edwɛkɛ ɛhye bie wɔ Edwɛndolɛ 136:23 mɔɔ ka kɛ: “Yɛ nwo hyelele yɛ la ɔhakyele yɛ; ɔluakɛ ye ɛhulolɛ kpundii ne wɔ ɛkɛ dahuu.” Nɔhalɛ nu, ɛhulolɛ kpundii mɔɔ Gyihova lɛ maa ye azonvolɛ la wɔ ɛkɛ dahuu. Ɛhye ati, yɛbahola yɛanyia anwodozo kɛ ɔbade yɛ “modolɛ nzɛlɛlɛ” ne na yeayɛ nwolɛ debie.​—Edw. 116:1; 136:24-26.

9. Duzu a boale Pɔɔlo maanle ɔnyianle Nyamenle anwo ɛlɔlɛ kpole a?

⁹ Ɛzoanvolɛ Pɔɔlo dwenledwenlenle kɛzi Gyihova boale ye la anwo, na ɛhye maanle ɔnyianle anwosesebɛ. Pɔɔlo hɛlɛle kɛ: “Gyihova le me boavolɛ; menrɛzulo. Duzu a sonla kɛhola kɛyɛ me a?” (Hib. 13:6) Anwodozo zɔhane mɔɔ Pɔɔlo nyianle kɛ Gyihova baboa ye la, maanle ɔgyinlanle ngyegyelɛ mɔɔ ɔyiale ye wɔ ɛbɛlabɔlɛ nu la anloa. Yeammaa tɛnlabelɛ mɔɔ anu yɛ se la ando ɔ sa nu. Nɔhalɛ nu, mekɛ mɔɔ Pɔɔlo la efiade la, ɔhɛlɛle ngɛlata dɔɔnwo mɔɔ maa anwosesebɛ. (Ɛfɛ. 4:1; Fel. 1:7; Fae. 1) Pɔɔlo ammaa Nyamenle anwo ɛlɔlɛ mɔɔ ɔlɛ la anga aze, ɔnva nwo ngyegyelɛ biala mɔɔ ɔyiale la. Duzu a maanle ɔnyianle anwosesebɛ ɔyɛle zɔ a? Ɔvale ɔ rɛle ɔwulale “Nyamenle ne, mɔɔ kyekye yɛ rɛle wɔ yɛ sɔnea kɔsɔɔti anu” la anu. (2 Kɔl. 1:3, 4) Kɛzi yɛbahola yɛazukoa Pɔɔlo neazo ne na yɛamaa ɛlɔlɛ mɔɔ yɛlɛ yɛmaa Gyihova la ayɛ kpole ɛ?

10. Kɛ ɔkɛyɛ na yɛanyia Gyihova anwo ɛlɔlɛ kpole ɛ?

¹⁰ Pɔɔlo mumua ne hanle debie mɔɔ bamaa yɛanyia Gyihova anwo ɛlɔlɛ kpole la. Ɔhɛlɛle ɔ mediema diedima kɛ: “Bɛyɛ asɔne dahuu.” Nzinlii ɔhɛlɛle kɛ: “Bɛhɔ zo bɛyɛ asɔne.” (1 Tɛs. 5:17; Wlo. 12:12) Yɛyɛ asɔne dahuu a, ɔbamaa yɛ nee Nyamenle anyia agɔnwolɛvalɛ kpalɛ. (Edw. 86:3) Saa yɛnyia mekɛ yɛka yɛ ahonle nu edwɛkɛ nee kɛzi yɛte nganeɛ la yɛkile Gyihova a, ɔbamaa yɛabikye yɛ anwuma Selɛ ne mɔɔ tie “yɛ nzɛlɛlɛ la.” (Edw. 65:2) Bieko, saa yɛnwu kɛ Gyihova ɛbua yɛ asɔneyɛlɛ a, ɔmaa ɛlɔlɛ mɔɔ yɛlɛ yɛmaa ye la yɛ kpole. Ɔmaa yɛnwu ye kɛ amgba, ‘Gyihova bikye bɛdabɛ mɔɔ bɛfɛlɛ ye la amuala.’ (Edw. 145:18) Anwodozo zɛhae mɔɔ yɛlɛ kɛ Gyihova baboa yɛ la maa yɛgyinla diedi nwo sɔnea mɔɔ yɛyia ye la anloa.

11, 12. Kɛ ɔkɛyɛ na yɛanyia ɛlɔlɛ kpole yɛamaa Baebolo nu nɔhalɛ ne ɛ?

¹¹ Kɛ Kilisienema la, yɛ nye die nɔhalɛ ne anwo, yɛɛ yɛdie yɛto nu. Nɔhalɛ ne wɔ Nyamenle Edwɛkɛ ne anu. Mɔɔ Gyisɛse sɛlɛ ɔ Ze la, ɔhanle kɛ: “Wɔ edwɛkɛ le nɔhalɛ.” (Dwɔn 17:17) Ɛhye ati, saa yɛnyia Nyamenle Edwɛkɛ ne anu ndelebɛbo a, ɔbamaa yɛahulo nɔhalɛ ne. (Kɔl. 1:10) Noko, saa yɛsukoa debie na yɛnyia ndelebɛbo a, ɛnee ɔtɛwiele. Nea kɛzi Edwɛndolɛ 119 kɛlɛvo ne boa yɛ ɔmaa yɛte kɛzi Baebolo nu nɔhalɛ ne mɔɔ yɛbahulo abo kile la. (Kenga Edwɛndolɛ 119:97-100.) Yɛnyia mekɛ yɛsuzu anzɛɛ yɛdwenledwenle Baebolo nu edwɛkɛ bie anwo wɔ alehyenlɛ ne anu ɔ? Saa yɛnyia mekɛ yɛdwenledwenle kɛzi yɛfa Baebolo nu edwɛkɛ yɛdi gyima a ɔboa yɛ la anwo a, ɔbamaa anyezɔlɛ mɔɔ yɛlɛ yɛmaa Baebolo nu nɔhalɛ ne la ayɛ kpole.

¹² Edwɛndolɛnli ne eza hanle kɛ: “Wɔ  edwɛkɛ ne yɛ me fɛ somaa, ɔyɛ fɛ ɔtɛla wolɛ.” (Edw. 119:103) Mbuluku mɔɔ Nyamenle ahyehyɛdeɛ ne yɛ la le kɛ aleɛ mɔɔ ɔyɛ fɛ la. Ɔwɔ kɛ yɛmaa ɔka yɛ ahonle, amaa yɛahakye nɔhalɛ “edwɛkɛ agbɔkɛ mɔɔ yɛ fɛ” mɔɔ yɛbahola yɛava yɛaboa awie mɔ la.​—Nol. 12:10.

13. Duzu a maanle Gyɛlɛmaya anye liele Ngɛlɛlera ne anu nɔhalɛ ne anwo a, na kɛzi ɔhanle ye ɛ?

¹³ Ɛnee ngapezonli Gyɛlɛmaya anye die Ngɛlɛlera ne anu nɔhalɛ ne anwo. Nea kɛzi Nyamenle edwɛkɛ ne hanle ye ahonle la. Ɔse: “O [Gyihova], Tumivolɛ Nyamenle, ɛdendɛle ɛhilele me, na mendiele. Wɔ edwɛkɛ ne maanle me nye liele na menlile fɛlɛko; ɔlua zolɛ bɛfa wɔ duma a bɛfɛlɛ me a.” (Gyɛ. 15:16) Gyɛlɛmaya dwenledwenlenle Nyamenle edwɛkɛ ne mɔɔ sonle bolɛ la anwo, na ɔmaanle ɔ nye liele nwo. Ɛhye maanle ɔhilele nwolɛ adenle mɔɔ yenyia kɛ Nyamenle duma la ɔ nwo zo la anwo anyezɔlɛ. Saa yɛkulo nɔhalɛ ne a, yɛbanwu kɛ ɔle nwolɛ adenle kpole mɔɔ yɛnyia kɛ Nyamenle duma la yɛ nwo zo a, na ɔwɔ kɛ yɛbɔ Belemgbunlililɛ edwɛkpa ne nolo wɔ awieleɛ mekɛ ɛhye anu.

14. Kɛ ɔkɛyɛ na yɛanyia Baebolo nu nɔhalɛ ne anwo ɛlɔlɛ kpole ɛ?

¹⁴ Saa yɛye Baebolo ne nee yɛ mbuluku ne mɔ mɔɔ yɛkenga la yɛsie ahane a, kɛzi yɛbahola yɛanyia ɛlɔlɛ kpole yɛamaa Baebolo nu nɔhalɛ ne ɛ? Ɔlua debiezukoalɛ mɔɔ yɛbahɔ ye dahuu la azo. Baebolo ne mɔɔ yɛdua Ɛzinzalɛ Arane ne azo yɛsukoa ye dapɛne biala la a le adenle titili mɔɔ bɛdua zo bɛkilehile yɛ a. Saa yɛkpondɛ kɛ yɛnyia Ɛzinzalɛ Arane Debiezukoalɛ biala azo nvasoɛ kpalɛ a, ɔwɔ kɛ yɛdimoa yɛsiezie yɛ nwo. Adenle titili ko a le kɛ yɛbagenga Baebolo tɛkese biala mɔɔ bɛhwe adwenle bɛhɔ zo la. Kenle nsa ye, yɛkola yɛtwe Ɛzinzalɛ Arane ne bie yɛfi jw.org wɛbsaete anzɛɛ JW Library app ne azo, wɔ aneɛ dɔɔnwo anu. Ɛzinzalɛ Arane ne mɔɔ yɛhwe la maa yɛkola yɛkenga Baebolo tɛkese mɔɔ bɛhwe adwenle bɛhɔ zo la ndɛndɛ. Noko, ɔnva nwo kɛzi yɛbazukoa Ɛzinzalɛ Arane ne biala la, saa yɛkenga tɛkese  ne mɔ kpalɛ na yɛdwenledwenle nwo a, ɔmaa yɛnyia Baebolo nu nɔhalɛ ne anwo ɛlɔlɛ kpole.​—Kenga Edwɛndolɛ 1:2.

15, 16. (a) Mɛla boni a bɛva bɛmaa yɛ wɔ Dwɔn 13:34, 35 a? (b) Kɛzi bɛva ɛlɔlɛ mɔɔ yɛlɛ yɛmaa yɛ mediema la bɛtoto ɛlɔlɛ mɔɔ yɛlɛ yɛmaa Nyamenle nee Baebolo ne la anwo ɛ?

¹⁵ Nɔe ne mɔɔ aleɛ kye a Gyisɛse bawu la, ɔzele ye ɛdoavolɛma ne kɛ: “Memaa bɛ mɛla fofolɛ kɛ bɛhulo bɛ nwo ngoko; kɛ mɔɔ mehulo bɛ la, bɛdabɛ noko bɛhulo bɛ nwo ngoko. Saa bɛkulo bɛ nwo a​—menli kɔsɔɔti banwu kɛ bɛle me ɛdoavolɛma.”​—Dwɔn 13:34, 35.

¹⁶ Bɛva ɛlɔlɛ mɔɔ yɛlɛ yɛmaa yɛ mediema la bɛtoto ɛlɔlɛ mɔɔ yɛlɛ yɛmaa Gyihova la anwo. Nɔhalɛ nu, yɛnrɛhola yɛnrɛhulo ko yɛnrɛgyakyi ko. Ɛzoanvolɛ Dwɔn hɛlɛle kɛ: “Awie mɔɔ ɛngulo ɔ diema mɔɔ ɔnwu ye la ɛnrɛhola ɛnrɛhulo Nyamenle mɔɔ ɔnnwu ye la.” (1 Dwɔn 4:20) Bieko, bɛva ɛlɔlɛ mɔɔ yɛlɛ yɛmaa yɛ mediema nee Gyihova la bɛtoto ɛlɔlɛ mɔɔ yɛlɛ yɛmaa Baebolo ne la anwo. Duzu ati ɔ? Ɔluakɛ saa yɛkulo Baebolo nu nɔhalɛ ne a, ɔbaha yɛ yeamaa yɛali Ngɛlɛlera ne anu mɛla mɔɔ se yɛhulo Nyamenle nee yɛ mediema la azo.​—1 Pita 1:22; 1 Dwɔn 4:21.

17. Ndenle boni mɔ azo a yɛbahola yɛalua yɛala ɛlɔlɛ ali a?

¹⁷ Kenga 1 Tɛsalonaekama 4:9, 10. Ndenle titili boni mɔ azo a yɛbahola yɛalua yɛala ɛlɔlɛ ali wɔ yɛ asafo ne mɔ anu ɛ? Bie a ɔwɔ kɛ yɛboa adiema nrenyia anzɛɛ raalɛ bie mɔɔ ɛyɛ kpanyinli la na yeahola yeahɔ debiezukoalɛ. Kunlavolɛ bie noko bahyia awie mɔɔ bayɛ gyima bie wɔ ye sua nu la. (Gye. 1:27) Yɛ mediema ngakula anzɛɛ mgbanyinli, mrenyia anzɛɛ mraalɛ mɔɔ bɛ rɛle ɛbɔ anzɛɛ bɛ sa nu ɛdo anzɛɛ bɛlɛyia sɔnea bie la bahyia yɛ mekɛ, anwosesebɛmaanlɛ nee arɛlekyekyelɛ. (Mrɛ. 12:25; Kɔl. 4:11) Saa yɛdua yɛ edwɛkɛhanlɛ nee yɛ nyɛleɛ zo yɛkile kɛ yɛdwenle yɛ mediema “mɔɔ yɛ nee bɛ lɛ diedi ko la” anwo a, ɔkile kɛ amgba yɛkulo bɛ.​—Gal. 6:10.

18. Duzu a baboa yɛ amaa yɛaziezie akɛsakɛsa mɔɔ bara yɛ nee yɛ mediema diedima avinli la a?

¹⁸ Baebolo ne hanle kɛ, wɔ ɛtane ewiade ɛhye “mekɛ mɔɔ li awieleɛ la anu” menli bala angomedi nee anyebolo subane ali. (2 Tim. 3:1, 2) Kɛ Kilisienema la, ɔwɔ kɛ yɛbɔ mɔdenle kɛ yɛbanyia ɛlɔlɛ kpole yɛamaa Nyamenle, Baebolo nu nɔhalɛ ne nee yɛ nwo ngoko. Nɔhalɛ nu, ɔdwu mekɛ ne bie a akɛsakɛsa bara yɛ nee yɛ mediema diedima avinli. Noko, kɛmɔ yɛkulo yɛ nwo ngoko la ati, bɛmaa yɛbɔ mɔdenle yɛziezie akɛsakɛsa biala mɔɔ bara yɛ nee yɛ mediema avinli la wɔ ɛlɔlɛ adenle zo. (Ɛfɛ. 4:32; Kɔl. 3:14) Ɔnle kɛ yɛmaa yɛ ɛlɔlɛ ka aze ɛlɛ! Bɛmaa yɛnyia ɛlɔlɛ kpole yɛmaa Gyihova, ye Edwɛkɛ ne nee yɛ mediema.