KƐMƆ yɛde ewiade mɔɔ ngyegyelɛ wɔ nu la ati, ɔwɔ kɛ yɛbɔ mɔdenle amaa yɛanyia anzodwolɛ. Noko, saa yɛlɛ anzodwolɛ ekyi bɔbɔ a, ɔyɛ a yɛbɔ mɔdenle kɛ yɛbɔ nwolɛ bane. Duzu a Nyamenle Edwɛkɛ ne ka mɔɔ baboa yɛ amaa yɛanyia nɔhalɛ anzodwolɛ dahuu a? Na kɛ ɔkɛyɛ na yɛaboa awie mɔ yɛamaa bɛayɛ zɔ ɛ?

Saa yɛlɛ banebɔlɛ yɛɛ yɛ ahonle ɛndu a, ɔkile kɛ yɛlɛ nɔhalɛ anzodwolɛ. Eza ɔwɔ kɛ yɛ nee awie mɔ nyia agɔnwolɛvalɛ kpalɛ. Mɔɔ hyia kpalɛ la, ɔwɔ kɛ yɛ nee Nyamenle nyia agɔnwolɛvalɛ kpalɛ, amaa yɛanyia anzodwolɛ dahuu. Kɛzi yɛbayɛ ɛhye ɛ?

Saa yɛdi Gyihova tenlene mɛla nee ye ngyinlazo ne mɔ azo a, ɛnee yɛlɛkile kɛ yɛlɛ ye nu anwodozo yɛɛ yɛkulo kɛ yɛ nee ye nyia agɔnwolɛvalɛ kpalɛ. (Gyɛ. 17:7, 8; Gye. 2:22, 23) Yɛyɛ ɛhye a, ɔbabikye yɛ na yeamaa yɛanyia anzodwolɛ. Ayezaya 32:17 ka kɛ: “Ɔlua tenleneyɛlɛ ne azo, anzonudwolɛ bara; tenleneyɛlɛ ne bava anzonudwolɛ nee anwondɔlɛ ara dahuu.” Amaa yɛanyia nɔhalɛ anzodwolɛ la, ɔwɔ kɛ yɛfi yɛ ahonle nu yɛtie Gyihova.​—Aye. 48:18, 19.

Eza yɛ anwuma Selɛ ne fa ye sunsum nwuanzanwuanza ahyɛlɛdeɛ ne mɔɔ sonle bolɛ la boa yɛ maa yɛnyia anzodwolɛ dahuu.​—Gyi. 9:31.

Ɛzoanvolɛ Pɔɔlo hanle kɛ anzodwolɛ a le “sunsum ne ma” mɔɔ tɔ zo nsa a. (Gal. 5:22, 23) Kɛmɔ Nyamenle sunsum ne a maa bɛnyia Nyamenle anzodwolɛ la ati, ɔwɔ kɛ yɛmaa sunsum nwuanzanwuanza ne kile yɛ adenle amaa yɛanyia nɔhalɛ anzodwolɛ. Bɛmaa yɛzuzu ndenle nwiɔ mɔɔ Nyamenle sunsum ne kolaa boa yɛ maa yɛnyia anzodwolɛ la anwo.

 Mɔɔ limoa, Nyamenle Edwɛkɛ ne mɔɔ yɛkenga ye dahuu la maa yɛnyia anzodwolɛ. (Edw. 1:2, 3) Saa yɛdwenledwenle Nyamenle edwɛkɛ ne anwo a, Nyamenle sunsum ne baboa yɛ yeamaa yɛanyia Gyihova adwenle wɔ ninyɛne nwo. Kɛ neazo la, yɛnwu kɛzi ɔlɛ anzodwolɛ yɛɛ deɛmɔti anzodwolɛ nwo hyia ye la. Saa yɛfa mɔɔ yɛsukoa ye wɔ Nyamenle Edwɛkɛ ne anu la yɛyɛ gyima a, yɛbanyia anzodwolɛ kpole wɔ yɛ ɛbɛlabɔlɛ nu.​—Mrɛ. 3:1, 2.

Mɔɔ tɔ zo nwiɔ, ɔwɔ kɛ yɛsɛlɛ Nyamenle sunsum nwuanzanwuanza ne. (Luku 11:13) Gyihova ɛbɔ ɛwɔkɛ kɛ, saa yɛsɛlɛ ye moalɛ a, “Nyamenle anzodwolɛ ne mɔɔ bo ndelebɛbo muala azo la balua Kelaese Gyisɛse anwo zo abɔ [yɛ] ahonle nee [yɛ] adwenle nzuzulɛ nwo bane.” (Fel. 4:6, 7) Saa yɛsɛlɛ Gyihova sunsum ne a, yɛ Nyamenle ne bamaa yɛanyia anzodwolɛ mɔɔ ɔfa ɔmaa bɛdabɛ mɔɔ bɛ nee ye lɛ agɔnwolɛvalɛ kpalɛ la.​—Wlo. 15:13.

Kɛzi bie mɔ ɛva Ngɛlɛlera nu folɛdulɛ ɛhye ɛli gyima na bɛyɛ nzenzaleɛ mɔɔ fɛta la amaa anzodwolɛ adɛnla bɛ nee Gyihova nee awie mɔ avinli dahuu ɛ?

Ɛnɛ, yɛlɛ menli mɔɔ ‘ɛnee ɛngyɛ na bɛava ɛya’ noko kɛkala bɛdwenle awie mɔ anwo, bɛle atiakunlukɛnlɛma, bɛlɛ abotane yɛɛ bɛ nee awie mɔ tɛnla anzodwolɛ nu la wɔ Kilisiene asafo ne anu. * (Mrɛ. 29:22) Nea kɛzi Belemgbunlililɛ nolobɔlɛma nwiɔ holale lile ɛya zo na bɛ nee awie mɔ dɛnlanle anzodwolɛ nu la.

David subane ɛtane ne hanle ye ɛdendɛlɛ. Kolaa na yeayila ɔ nwo zo yeamaa Nyamenle la, ɛnee ɔta ɔtendɛ ɔtia awie mɔ yɛɛ ɔndendɛ kɛnlɛma ɔngile ye abusua ne. Nzinlii, David nwunle kɛ ɔwɔ kɛ ɔyɛ nzenzaleɛ na ɔ nee awie mɔ tɛnla anzodwolɛ nu. Kɛzi ɔnyianle anzodwolɛ ɛ? Ɔka kɛ, “Membɔle ɔ bo kɛ mefa Baebolo ngyinlazo meali gyima, ɛhye maanle yɛbule yɛ nwo kpalɛ wɔ abusua ne anu.”

Kɛzi bɛtetele Rachel la hanle ye subane. Ɔka kɛ, “Kɛkala bɔbɔ, ɔyɛ se kɛ mebali me ɛya zo, ɔluakɛ bɛtetele me wɔ awuke mɔɔ bɛfa ɛya  la anu.” Duzu a ɛboa ye ɛmaa ɔ nee awie mɔ ɛdɛnla anzodwolɛ nu a? Ɔka kɛ, “Mesɛlɛ Gyihova kɛ ɔboa me.”

David nee Rachel neazo ne maa yɛnwu kɛ saa yɛfa Baebolo ngyinlazo yɛdi gyima na yɛsɛlɛ Nyamenle sunsum ne moalɛ a, yɛbanyia anzodwolɛ. Ɔda ali kɛ, ɔnva nwo kɛ yɛde basabasayɛlɛ ewiade nu la, yɛbahola yɛanyia anzodwolɛ mɔɔ bamaa koyɛlɛ ara yɛ mbusua nee yɛ mediema Kilisienema avinli la. Noko, Gyihova tu yɛ folɛ kɛ yɛ “nee menli kɔsɔɔti ɛdɛnla anzodwolɛ nu.” (Wlo. 12:18) Ɛhye bahola ayɛ boɛ ɔ, na nvasoɛ boni a vi mɔdenle mɔɔ yɛbɔ kɛ yɛkpondɛ anzodwolɛ la anu bara a?

Ɔlua yɛ daselɛlilɛ ne azo, yɛto ɛsalɛ yɛfɛlɛ menli amaa bɛanyia yɛ anzodwolɛ edwɛkɛ mɔɔ fale Nyamenle Belemgbunlililɛ ne anwo la azo nvasoɛ. (Aye. 9:6, 7; Mat. 24:14) Ɔyɛ anyelielɛ kɛ menli dɔɔnwo ɛlie zo la. Ɛhye ati, bɛ sa nu ɛndo anzɛɛ bɛnva ɛya wɔ mɔɔ ɔlɛkɔ zo wɔ bɛ kpalɛ ne mɔ azo la anwo. Emomu, kɛkala bɛlɛ kenle bie anyelazo kpalɛ, ɛhye maa ‘bɛkpondɛ anzodwolɛ na bɛdi ɔ nzi.’​—Edw. 34:14.

Noko, tɛ awie biala a tie yɛ edwɛkɛ ne wɔ mekɛ mɔɔ limoa la. (Dwɔn 3:19) Yemɔ bɔbɔ, Nyamenle sunsum ne boa yɛ maa yɛbɔ edwɛkpa ne nolo yɛkile bɛ wɔ anzodwolɛ nee ɛbulɛ adenle zo. Ɛhye maa yɛdi ɛzonlenlɛ gyima ne anwo adehilelɛ mɔɔ wɔ Mateyu 10:11-13 la azo. Gyisɛse hanle kɛ: “Saa bɛwolo awuke ne anu a, bɛbiza awuke ne anu amra ahye. Saa awuke ne fɛta a, bɛmaa anzodwolɛ mɔɔ bɛkulo kɛ ɔnyia la ɛha ɛkɛ; noko saa ɔnfɛta a, bɛmaa bɛ anzodwolɛ ne ɛzia ɛrɛla bɛ ɛkɛ.” Saa yɛdi Gyisɛse folɛdulɛ ne azo a, yɛbavi ɛkɛ ne anzodwolɛ nu na yɛanyia anyelazo kɛ kenle bie yɛbahola yɛaboa ahenle.

Eza saa yɛkɔ arane mgbanyima nee bɛdabɛ mɔɔ bɛdwazo bɛtia yɛ gyima ne la anyunlu wɔ ɛbulɛ nu a, ɛnee yɛlɛkpondɛ anzodwolɛ. Kɛ neazo la, Afrika maanle ye anu arane bie nyianle yɛ nwo adwenle ɛtane, ɔti ɛnee ɔngulo kɛ ɔdie ademizalɛ bie ɔto nu amaa yɛazi Belemgbunli Asalo. Kɛmɔ adiema nrenyia bie mɔɔ ɛnee le edwɛkpatɛlɛvolɛ wɔ zɔhane maanle ne anu lɛ anyelazo kɛ ɔbahola yɛali tɛnlabelɛ ne anwo gyima wɔ anzodwolɛ nu la ati, bɛzoanle ye kɛ ɔhɔnwu zɔhane maanle ne Agyakɛ Anu Gyinlavolɛ Kpanyinli ne mɔɔ wɔ London, England la. Ɛnee ɔwɔ kɛ ɔka anzodwolɛ gyima mɔɔ Gyihova Alasevolɛ ɛlɛyɛ wɔ ye maanle nu la ɔkile ye. Duzu a vile ɛkpɔlalɛ zɔhane anu rale a?

Ɔka kɛ, “Mɔɔ mendwule ɛleka mɔɔ bɛdie nyɛvolɛ la, ahenle mɔɔ de ɛkɛ la anwoziezielɛ ne maanle menganle kɛ ɔboka menli mɔɔ mezukoa bɛ aneɛ ne la anwo. Ɔti, membizale ye ahye wɔ ye aneɛ nu. Ɔzinle ɔ nwo, ɔti ɔbizale me kɛ, ‘Duzu ati a wɔra ɛke a?’ Menvile ɛbulɛ nu menzele ye kɛ mekulo kɛ menwu maanle ne Agyakɛ Anu Gyinlavolɛ Kpanyinli ne. Ɔvɛlɛle kpanyinli ne, ɔrayiale me na ɔbizale me ahye wɔ bɛ aneɛ nu. Yemɔ anzi, ɔdiele me kpalɛ wɔ mekɛ mɔɔ ɛnee melɛkilehile anzodwolɛ gyima mɔɔ Alasevolɛ ne mɔ yɛ anu meahile ye la.”

Ɛbulɛ nu mɔɔ adiema ne vi hilehilele ninyɛne nu la maanle menli nwo adwenle ɛtane mɔɔ ɛndenrɛ mɔɔ maanle kpanyinli ne lɛ ye wɔ yɛ gyima ne anwo la dɔɔnwo vile ɛkɛ. Mekɛ ekyi guale nu la, arane zɔhane yele ɔ sa mɔɔ ɛnee yeva yedo suazilɛ gyima ne azo la ɔvile ɛkɛ. Nea kɛzi anzodwolɛ mɔɔ vi nu rale la maanle mediema ne mɔ anye liele a! Nɔhalɛ nu, saa yɛbu awie mɔ a, nvasoɛ dɔɔnwo fi nu ba​—mɔɔ anzodwolɛ boka nwo.

Ɛnɛ, Gyihova menli de sunsum nu paladaese mɔɔ anzodwolɛ dɔɔnwo wɔ nu la anu. Mekɛ mɔɔ ɛlɛbɔ mɔdenle wɔala sunsum ne ma ɛhye ali la, ɛbaboa wɔamaa anzodwolɛ adɛnla ɛkɛ. Mɔɔ hyia kpalɛ la, Gyihova anye balie ɛ nwo na wɔanyia anzodwolɛ dahuu wɔ Nyamenle ewiade fofolɛ ne anu.​—2 Pita 3:13, 14.