1. Duzu ati a yɛ muala yɛhyia nrɛlɛbɛ mɔɔ vi Nyamenle ɛkɛ la ɛ? (Mrɛlɛbulɛ 4:7)

 SAA ɛnee ɔwɔ kɛ ɛsi kpɔkɛ bie mɔɔ nwolɛ hyia la mekɛ bie a, ye biala anu ɛyɛle asɔne ɛkpondɛle nrɛlɛbɛ ɔluakɛ ɛze kɛ ɛhyia nwolɛ. (Gye. 1:5) Belemgbunli Sɔlɔmɔn hɛlɛle kɛ: “Nrɛlɛbɛ a nwolɛ hyia kpalɛ a.” (Kenga Mrɛlɛbulɛ 4:7.) Nɔhalɛ nu, tɛ nrɛlɛbɛ gyɛne bie ala a ɛnee Sɔlɔmɔn ɛlɛka nwolɛ edwɛkɛ a. Ɛnee ɔlɛka nrɛlɛbɛ ne mɔɔ vi Gyihova Nyamenle ɛkɛ la anwo edwɛkɛ. (Mrɛ. 2:6) Noko asoo nrɛlɛbɛ ne mɔɔ vi Gyihova ɛkɛ la bahola aboa yɛ yeamaa yɛagyinla ngyegyelɛ ngakyile mɔɔ yɛyia ye ɛnɛ la anloa ɔ? Ɛhɛe, kɛ mɔɔ yɛbanwu ye wɔ edwɛkɛ ɛhye anu la.

2. Adenle ko boni a yɛbahola yɛalua zo yɛanwu nrɛlɛbɛ kpalɛ a?

² Adenle ko mɔɔ yɛbahola yɛalua zo yɛanwu nrɛlɛbɛ kpalɛ la a le kɛ yɛbazukoa mrenyia nwiɔ mɔɔ ɛnee bɛze nrɛlɛbɛ kpole na bɛbu bɛ la ngilehilelɛ ne na yɛava yɛali gyima. Mɔɔ limoa, yɛbazuzu Sɔlɔmɔn anwo. Baebolo ne ka kɛ: “Nyamenle maanle Sɔlɔmɔn nrɛlɛbɛ nee ndelebɛbo kpole kpalɛ.” (1 Arl. 4:29) Mɔɔ tɔ zo nwiɔ, yɛbazuzu Gyisɛse mɔɔ dasanli biala nrɛlɛbɛ ɛndwu ye ɛdeɛ ne la anwo. (Mat. 12:42) Bɛhanle Gyisɛse anwo ngapezo kɛ: “Gyihova sunsum ne bara ɔ nwo zo, nrɛlɛbɛ nee ndelebɛbo sunsum.”​—Aye. 11:2.

3. Duzu a yɛbazuzu nwo wɔ edwɛkɛ ɛhye anu a?

³ Kɛmɔ Nyamenle maanle Gyisɛse nee Sɔlɔmɔn nrɛlɛbɛ kpole la ati, bɛvale ninyɛne mɔɔ nwolɛ hyia mɔɔ ɔbaboa yɛ muala la anwo folɛdulɛ bɛmaanle yɛ. Yɛbazuzu nuhua nsa anwo wɔ  edwɛkɛ ɛhye anu: Kɛzi yɛbanyia ezukoa, gyima nee yɛ nwo adwenle mɔɔ fɛta la.

4. Ngakyile boni a ɛnee wɔ Sɔlɔmɔn nee Gyisɛse ezukoa gyinlabelɛ nu a?

⁴ Ɛnee Sɔlɔmɔn ɛnyia ɔ nwo kpole kpalɛ, yɛɛ ɔde sua kɛnlɛma mɔɔ debie biala wɔ nu na ɔ nwo tɔ ye la anu. (1 Arl. 10:7, 14, 15) Noko ɛnee Gyisɛse ɛnlɛ ninyɛne dɔɔnwo yɛɛ ɔnlɛ ɔ ti anwo sua. (Mat. 8:20) Noko bɛ mu nwiɔ bɛnyianle nwonane afoa nu ninyɛne nwo adwenle mɔɔ fɛta ɔluakɛ bɛ nrɛlɛbɛ ne vi ɛleka ko​—Gyihova Nyamenle ɛkɛ.

5. Ezukoa nwo adwenle mɔɔ fɛta la boni a Sɔlɔmɔn nyianle a?

⁵ Sɔlɔmɔn hanle kɛ ezukoa “bɔ bɛ nwo bane.” (Nol. 7:12) Saa yɛlɛ ezukoa a, yɛkola yɛtoto ninyɛne mɔɔ yɛhyia nwo la nee bie a ninyɛne mɔɔ yɛkpondɛ la bie mɔ. Noko ɔnva nwo kɛ ɛnee Sɔlɔmɔn ɛnyia ɔ nwo kpole la, ɔnwunle kɛ ninyɛne bie wɔ ɛkɛ ne mɔɔ nwolɛ hyia kpole kpalɛ tɛla ezukoa a. Kɛ neazo la, ɔhɛlɛle kɛ: “Ɔwɔ kɛ ɛkpa duma kpalɛ [anzɛɛ, “dumamɔlɛ kpalɛ,” ɔbd.] na tɛ anwonyia kpole.” (Mrɛ. 22:1) Eza Sɔlɔmɔn nwunle kɛ bɛdabɛ mɔɔ bɛ nye bolo ezukoa la akunlu ɛndwo mɔɔ bɛlɛ la anwo. (Nol. 5:10, 12) Yɛɛ ɔbɔle yɛ kɔkɔ kɛ yɛmmafa yɛ rɛle yɛwula ezukoa nu ɔluakɛ ezukoa dodo biala mɔɔ yɛlɛ la bahola avi yɛ sa ndɛndɛ.​—Mrɛ. 23:4, 5.

6. Nwonane afoa nu ninyɛne nwo adwenle mɔɔ fɛta la boni a ɛnee Gyisɛse lɛ a? (Mateyu 6:31-33)

⁶ Gyisɛse nyianle nwonane afoa nu ninyɛne nwo adwenle mɔɔ fɛta. Ɔlile aleɛ kpalɛ yɛɛ ɔnlonle nza. (Luku 19:2, 6, 7) Mekɛ bie, ɔyɛle nwanye kpalɛ​—yemɔ a le ye nwanwane ninyɛne mɔɔ limoa a. (Dwɔn 2:10, 11) Yɛɛ kenle mɔɔ ɔwule la, ɛnee ɔwula tɛladeɛ mɔɔ ye bolɛ yɛ se kpalɛ la. (Dwɔn 19:23, 24) Noko Gyisɛse ammaa nwonane afoa nu ninyɛne anyɛ debie mɔɔ nwolɛ hyia ye kpalɛ wɔ ɛbɛlabɔlɛ nu a. Ɔhanle ɔhilele ye ɛdoavolɛma ne kɛ: “Awie biala ɛnrɛhola ɛnrɛzonle menlenlɛ nwiɔ . . . Bɛnrɛhola bɛnrɛzonle Nyamenle nee Anwonyia.” (Mat. 6:24) Gyisɛse hilele kɛ saa yɛdimoa yɛkpondɛ Belemgbunlililɛ ne a, ye biala  anu Gyihova bamaa yɛ sa aha mɔɔ yɛhyia nwo la.​—Kenga Mateyu 6:31-33.

7. Mɔɔ adiema nrenyia bie nyianle ezukoa nwo adwenle mɔɔ fɛta la, kɛzi ɔboale ye ɛ?

⁷ Mediema dɔɔnwo ɛva folɛ mɔɔ Gyihova tu yɛ wɔ ezukoa nwo la ɛli gyima na yeboa bɛ. Suzu adiema nrenyia bie mɔɔ bɛfɛlɛ ye Daniel mɔɔ ɔtɛgyale la neazo ne anwo. Ɔhanle kɛ: “Mɔɔ mele kakula kpavolɛ la, menzile kpɔkɛ kɛ mebamaa sunsum nu ninyɛne nwo ahyia me kpalɛ wɔ me ɛbɛlabɔlɛ nu.” Kɛmɔ Daniel maanle ye ɛbɛlabɔlɛ yɛle sikalɛ la ati, yehola yeva ye mekɛ nee ninyɛne mɔɔ ɔkola ye yɛ la yeboa wɔ teokelase gyimalilɛ ngakyile nu. Ɔhanle ɔzɔle zo kɛ: “Mebahola meaha ye nɔhalɛ nu kɛ, metɛnunle me nwo wɔ kpɔkɛ ɛhye mɔɔ menzile la anwo. Nɔhalɛ nu, saa memaanle ezukoa nwo hyianle me kpalɛ wɔ me ɛbɛlabɔlɛ nu a, bie a anrɛɛ mebanyia ezukoa dɔɔnwo. Noko anrɛɛ menrɛnyia agɔnwolɛma kpalɛ mɔɔ melɛ bɛ kɛkala la? Saa menvale me adwenle menziele ezukoa zo a, asoo anrɛɛ me nye balie kɛ kɛkala mɔɔ meva Belemgbunlililɛ ne melimoa me ɛbɛlabɔlɛ nu la ɔ? Ezukoa biala ɛnle ɛkɛ ne mɔɔ anrɛɛ ɔ nee nyilalɛ mɔɔ Gyihova ɛva ɛmaa me la bazɛ a.” Ɔda ali wienyi kɛ, saa yɛfa yɛ adwenle yɛsie sunsum nu ninyɛne zo a, yɛɛ ɔmaa yɛ nye die a, na tɛ ezukoa ɔ.

8. Kɛzi yɛkola yɛnwu kɛ ɛnee Sɔlɔmɔn lɛ gyima nwo adwenle mɔɔ fɛta ɛ? (Nolobɔvo 5:18, 19)

⁸ Sɔlɔmɔn hanle kɛ anyelielɛ mɔɔ awie nyia fi ye gyima nu la le “Nyamenle ahyɛlɛdeɛ.” (Kenga Nolobɔvo 5:18, 19.) Ɔhɛlɛle kɛ: “Gyima ɛsesebɛ biala azo lɛ nvasoɛ.” (Mrɛ. 14:23) Ɛnee Sɔlɔmɔn ze mɔɔ ɔlɛka a. Ɛnee ɔyɛ gyima ɛsesebɛ kpalɛ! Ɔsisile azua, ɔyɛle vanye egyinli nee tola yɛɛ ɔdule bula ngakyile. Eza ɔkyekyele azuamgbole. (1 Arl. 9:19; Nol. 2:4-6) Ɛnee ɛhye le gyima ɛsesebɛ na ye biala anu ɔmaanle ɔ nye liele kpalɛ. Noko Sɔlɔmɔn nwunle kɛ tɛ ninyɛne ɛhye angomekye a bamaa ɔ nye alie a. Ɔyɛle sunsum nu ninyɛne ngakyile. Kɛ neazo la, ɔnleanle ɔmaanle bɛzile ɛzonlenlɛsua kɛnlɛma ne mɔɔ bɛsonle Gyihova wɔ ɛkɛ​—mɔɔ bɛvale ɛvolɛ nsuu a bɛzile la! (1 Arl. 6:38; 9:1) Mɔɔ Sɔlɔmɔn yɛle nwonane nu nee sunsum nu ninyɛne ɛhye mɔ amuala wiele la, ɔnwunle kɛ sunsum nu ninyɛne ɛdeɛ ne anwo hyia kpalɛ tɛla nwonane nu ɛdeɛ ne. Ɔhɛlɛle kɛ: “Edwɛkɛ ne adwulaleɛ, debie biala mɔɔ yɛde la a le kɛ: Sulo nɔhalɛ Nyamenle ne na di ye mɛla ne mɔ azo.”​—Nol. 12:13.

9. Kɛzi Gyisɛse hilele kɛ tɛ gyima a hyia ye kpalɛ wɔ ye ɛbɛlabɔlɛ nu ɛ?

⁹ Ɛnee Gyisɛse yɛ gyima ɛsesebɛ. Ɔbɔle kapenta gyimayɛlɛ bo wɔ ye ngakula nu. (Maake 6:3) Ye biala anu, ye awovolɛ anye liele gyima mɔɔ ɔyɛle ɔboale bɛ la anwo ɔluakɛ ɛnee ɔwɔ kɛ bɛbɔ mɔdenle na bɛahola bɛanlea bɛ abusua kpole ne. Na kɛmɔ ɛnee Gyisɛse di munli na ye gyima noko di munli la ati, ɔbayɛ kɛ ɛnee menli dɔɔnwo kpondɛ kɛ ɔyɛ bɛ gyima ɔmaa bɛ! Ɔbayɛ kɛ ɛnee Gyisɛse anye die ye gyima nwo kpalɛ. Noko mekɛ mɔɔ ɛnee Gyisɛse ɛlɛyɛ ye kapenta gyima ne bɔbɔ la, ɔyele mekɛ ɔziele ahane ɔyɛle sunsum nu ninyɛne. (Dwɔn 7:15) Nzinlii mɔɔ ɔbɔle dahuu ɛzonlenlɛ gyima ne abo la, ɔdule ye tievolɛma ne folɛ kɛ: “Bɛmmayɛ aleɛ mɔɔ sɛkye la anwo gyima, emomu bɛyɛ aleɛ mɔɔ ɛnzɛkye na ɔmaa dahuu ngoane . . . la anwo gyima.” (Dwɔn 6:27) Yɛɛ wɔ Gyisɛse Boka Zo Ɛdendɛlɛ ne anu, ɔhanle kɛ: “Bɛkpondɛ bɛ anwonyia bɛzie anwuma.”​—Mat. 6:20.

10. Ngyegyelɛ boni a bie mɔ yia wɔ bɛ gyima nu a?

¹⁰ Nrɛlɛbɛ mɔɔ vi Nyamenle ɛkɛ la boa yɛ maa yɛnyia yɛ gyima nwo adwenle mɔɔ fɛta.  Kɛ Kilisienema la, bɛhilehile yɛ kɛ yɛyɛ “gyima ɛsesebɛ, . . .  gyima kpalɛ.” (Ɛfɛ. 4:28) Yɛ gyimamenlema ta nwu yɛ nɔhalɛlilɛ nee yɛ gyima ɛsesebɛ, na bie a bɛbaha bɛahile yɛ kɛ bɛ nye die kɛzi yɛyɛ yɛ gyima la anwo. Ɛhye bahola amaa yɛanyia adwenle kɛ yɛfa dɔnehwele dɔɔnwo yɛayɛ gyima amaa yɛ gyimamenle ne anyia Gyihova Alasevolɛ anwo adwenle kpalɛ. Noko saa yɛyɛ ye zɔhane a, bie a ɔnrɛmaa yɛnrɛnyia mekɛ dɔɔnwo yɛnrɛmaa yɛ abusua ne anzɛɛ yɛnrɛyɛ sunsum nu ninyɛne. Ɔwɔ kɛ yɛyɛ nzenzaleɛ amaa yɛanyia mekɛ dɔɔnwo yɛayɛ ninyɛne mɔɔ hyia kpalɛ la.

11. Duzu a adiema nrenyia bie nwunle ye wɔ gyima nwo adwenle mɔɔ fɛta mɔɔ yɛbanyia la anwo a?

¹¹ Adiema kpavolɛ bie mɔɔ bɛfɛlɛ ye William la mumua ne ɛnwu kɛzi nvasoɛ wɔ zo kɛ yɛnrɛmaa gyima ɛnrɛyɛ debie mɔɔ hyia yɛ kpalɛ wɔ yɛ ɛbɛlabɔlɛ nu la. William hanle asafo nu kpanyinli bie mɔɔ vale ye gyima nu mekɛ bie la anwo edwɛkɛ kɛ: “[Adiema ɛhye] le awie mɔɔ lɛ gyima nwo adwenle mɔɔ fɛta la anwo neazo kɛnlɛma kpalɛ. Ɔyɛ gyima ɛsesebɛ, yɛɛ ɔ nee menli mɔɔ bɛmaa ɔyɛ bɛ gyima ɔmaa bɛ la avinli sɛ ɔluakɛ ye gyima nwo te. Noko saa ɔkpɔne gyima a, ɔfi gyima nu na ɔfa mekɛ mɔɔ ɛha la ɔmaa ye abusua ne nee Gyihova. Na ɛze ɔ? Ɔle menli mɔɔ meze kɛ bɛ nye die kpalɛ la anu ko!” *

12. Kɛzi Sɔlɔmɔn hilele kɛ ɔlɛ ɔ nwo adwenle mɔɔ fɛta ɛ, noko duzu a maanle ye subane zɔhane minlinle a?

¹² Mɔɔ Sɔlɔmɔn le Gyihova sonvolɛ mɔɔ ɔdi nɔhalɛ la, ɛnee ɔlɛ ɔ nwo adwenle mɔɔ fɛta. Mɔɔ ɔle kpavolɛ la, ɔbɛlɛle ɔ nwo aze na ɔliele ɔdole nu kɛ ninyɛne bie wɔ ɛkɛ mɔɔ ɔngola ɔnyɛ a, ɔti ɔkpondɛle adehilelɛ ɔvile Gyihova ɛkɛ. (1 Arl. 3:7-9) Wɔ Sɔlɔmɔn tumililɛ ne mɔlebɛbo, ɛnee ɔze kɛ esiane kpole wɔ nu kɛ ɔbayɛ anwomemaazo. Ɔhɛlɛle kɛ: “Anwomemaazo kɔwie ɛzɛkyelɛ nu, yɛɛ adubɛnwo sunsum kɔwie azedɔlɛ nu.” (Mrɛ. 16:18) Ɔyɛ alɔbɔlɛ kɛ Sɔlɔmɔn anva ye folɛdulɛ ne anli gyima la. Mɔɔ ɔrayɛle belemgbunli la anzi mekɛ bie,  ɔyɛle anwomemaazo na yeanva Nyamenle folɛdulɛ yeanli gyima. Kɛ neazo la, mɛla ne ko hanle kɛ ɔnle kɛ Hibulu belemgbunli ‘gya mraalɛ dɔɔnwo, amaa ye ahonle anvi me nwo.’ (Dit. 17:17) Sɔlɔmɔn bule ɔ nye guale mɛla zɔhane azo na ɔgyale mraalɛ 700, yɛɛ ɔnyianle nwewe 300, na bɛ nuhua dɔɔnwo sonle awozonle. (1 Arl. 11:1-3) Bie a Sɔlɔmɔn nyianle adwenle kɛ “edwɛkɛ biala ɛnrɛzi.” Kɛzi ɔde ye biala la, nzinlii, Sɔlɔmɔn nwunle Gyihova anwo anzosesebɛ mɔɔ ɔyɛle la anwo amaneɛ.​—1 Arl. 11:9-13.

13. Saa yɛdwenledwenle Gyisɛse mɛlɛbɛnwoaze subane ne anwo a, kɛzi ɔbaboa yɛ ɛ?

¹³ Gyisɛse hɔle zo bɛlɛle ɔ nwo aze na ɔnyianle ɔ nwo adwenle mɔɔ fɛta. Kolaa na Gyisɛse ara azɛlɛ ye azo la, ɔyɛle ninyɛne mɔɔ ɔyɛ nwanwane la dɔɔnwo wɔ Gyihova ɛzonlenlɛ nu. Bɛluale Gyisɛse anwo zo a “bɛbɔle debie biala mɔɔ wɔ anwuma nee azɛlɛ ye azo a.” (Kɔl. 1:16) Mɔɔ bɛzɔnenle Gyisɛse la, bie a ɔhakyele ninyɛne mɔɔ ɔyɛle wɔ mekɛ mɔɔ ɔwɔ ɔ Ze anwo ɛkɛ la. (Mat. 3:16; Dwɔn 17:5) Noko yemɔ ammaa Gyisɛse anyɛ anwomemaazo. Eza yeanyɛ ninyɛne mɔɔ kile kɛ ɔle kpalɛ ɔtɛla awie biala la ɛlɛ. Ɔhanle ɔhilele ye ɛdoavolɛma ne kɛ, yeamba kɛ bɛzonle ye, “emomu ɔrale kɛ ɔbazonle na yeava ye ngoane yeayɛ ɛkpɔnedeɛ yealie menli dɔɔnwo.” (Mat. 20:28) Eza ɔbɛlɛle ɔ nwo aze ɔliele ɔdole nu kɛ ɔnrɛhola ɔnrɛbɔ ɔ ti anu ɔnrɛyɛ debie biala. (Dwɔn 5:19) Ɛnee Gyisɛse le bɛlɛvo kpalɛ! Ɔyɛle neazo kɛnlɛma ɔmaanle yɛ kɛ yɛli ɔ nzi.

14. Kɛzi yɛbanyia yɛ nwo adwenle mɔɔ fɛta la anwo debie boni a yɛsukoa yɛfi Gyisɛse ɛkɛ a?

¹⁴ Gyisɛse hilehilele ye ɛdoavolɛma kɛ ɔwɔ kɛ bɛnyia bɛ nwo adwenle mɔɔ fɛta la. Mekɛ bie Gyisɛse maanle bɛnwunle kɛ: “Bɛ ti zo enrinli bɔbɔ bɛdia ɔ muala.” (Mat. 10:30) Zɔhane edwɛkɛ ne kyekye yɛ rɛle kpalɛ, titili saa yɛnlɛ yɛ nwo adwenle mɔɔ fɛta la a. Ɔkile kɛ yɛ anwuma Selɛ ne anye die yɛ nwo kpalɛ​—yɛsonle bolɛ wɔ ɔ nye zo. Saa Gyihova ɛmaa yɛ adenle kɛ yɛzonle ye na ɔdie ɔto nu kɛ yɛfɛta kɛ yɛnyia dahuu ngoane wɔ ye ewiade fofolɛ ne anu a, ɔnle kɛ yɛnyia adwenle kɛ ɔnrɛyɛ boɛ ɛlɛ.

15. (a) Yɛ nwo adwenle mɔɔ fɛta la boni a Ɛzinzalɛ Arane ne hanle kɛ ɔwɔ kɛ yɛnyia a? (b) Kɛ mɔɔ yɛnwu ye wɔ nvoninli mɔɔ wɔ mukelɛ 24 anu la, saa yɛfa yɛ adwenle yɛsie yɛ nwo zo somaa a, nyilalɛ boni mɔ a babɔ yɛ a?

 ¹⁵ Kɛyɛ ɛvolɛ 15 mɔɔ ɛze ɛhɔ la, Ɛzinzalɛ Arane ne hanle kɛ ɔwɔ kɛ yɛnyia yɛ nwo adwenle mɔɔ fɛta la, ɔse: “Nɔhalɛ nu, yɛngulo kɛ yɛdwenle kɛ yɛ nwo hyia somaa too yɛyɛ anwomemaazo; yɛɛ yɛngulo kɛ yɛnyia adwenle kɛ nvasoɛ biala ɛnle yɛ nwo zo. Emomu, ɔwɔ kɛ yɛbɔ mɔdenle kɛ yɛbanyia yɛ nwo adwenle mɔɔ tenrɛ, mɔɔ kile kɛ, ɔwɔ kɛ yɛte ɔ bo kɛ yɛlɛ ninyɛne mɔɔ yɛbɔ nwolɛ mɔdenle nee ninyɛne mɔɔ yɛmbɔ nwolɛ mɔdenle. Adiema raalɛ bie hanle ye zɛhae: ‘Menle sonlatane; yɛɛ eza menle kpalɛ mendɛla awie mɔ. Melɛ ninyɛne mɔɔ mebɔ nwolɛ mɔdenle nee ninyɛne mɔɔ membɔ nwolɛ mɔdenle a, na zɔhane ala a awie biala noko de a.’” * Wɔnwu kɛzi nvasoɛ wɔ zo kɛ yɛbanyia yɛ nwo adwenle mɔɔ fɛta la ɔ?

16. Duzu ati a Gyihova tu yɛ folɛ mɔɔ nrɛlɛbɛ wɔ nu a?

¹⁶ Gyihova dua ye Edwɛkɛ ne azo tu yɛ folɛ mɔɔ nrɛlɛbɛ wɔ nu. Ɔkulo yɛ na ɔkpondɛ kɛ yɛ nye die. (Aye. 48:17, 18) Kpɔkɛzilɛ mɔɔ nrɛlɛbɛ wɔ nu mɔɔ ɔbamaa yɛ nye alie kpalɛ la a le kɛ yɛbava Gyihova ɛzonlenlɛ yɛalimoa yɛ ɛbɛlabɔlɛ nu. Saa yɛyɛ zɔ a, ɔnrɛmaa yɛnrɛyia ngyegyelɛ mɔɔ bɛdabɛ mɔɔ bɛfa bɛ adwenle bɛsie ezukoa, gyima anzɛɛ bɛ nwo zo somaa la yia la bie. Ɔrɛla ye kɛ yɛ nuhua ko biala bazi kpɔkɛ kɛ ɔbanwu nrɛlɛbɛ na yeamaa Gyihova ahonle ali fɛlɛko!​—Mrɛ. 23:15.