1-2. Debie ko mɔɔ ɔti ɔwɔ kɛ yɛmaa yɛ nye die Yekile buluku ne anwo la a le boni?

 WƆNLEA awie gyɛne album mɔɔ nvoninli wɔ nu la ɛlɛ ɔ? Mɔɔ ɛlɛnea nvoninli ne mɔ la, ɛnwunle kɛ menli dɔɔnwo wɔ nu mɔɔ ɛnze bɛ. Noko ɛ nye bɔle nvoninli ko bie azo, na ɛgyinlanle ɛnleanle ye kpalɛ. Duzu ati ɔ? Ɔluakɛ ɛboka zɔhane nvoninli ne anwo. Mɔɔ ɛlɛnea la, ɛbɔ mɔdenle kɛ ɛbahakye mekɛ mɔɔ bɛpɛle nvoninli ne nee ɛleka mɔɔ bɛpɛle ye la. Eza ɛbɔ mɔdenle kɛ ɛbanwu awie biala mɔɔ wɔ nvoninli ne anu la. Zɔhane nvoninli ko ne anwo hyia wɔ kpalɛ.

² Yekile buluku ne le kɛ zɔhane nvoninli ne la. Duzu ati ɔ? Yeanyɛ boɛ fee la, ninyɛne nwiɔ bie ati ɔ. Mɔɔ limoa, bɛhɛlɛle Baebolo buluku ɛhye bɛmaanle yɛ. Yɛkenga ye wɔ ngyɛnu mɔɔ limoa la anu kɛ: “Gyisɛse Kelaese yekile mɔɔ Nyamenle vale maanle ye kɛ ɔva ɔhile ye ngɛkɛlɛ ninyɛne mɔɔ ɔnrɛhyɛ na yeazi la.” (Yek. 1:1) Ɔti tɛ alesama mɔɔ wɔ ewiade la kɔsɔɔti ati a bɛhɛlɛle a, emomu bɛhɛlɛle bɛmaanle yɛdayɛ, Nyamenle azonvolɛ mɔɔ yɛyila yɛ nwo zo la. Kɛ Nyamenle menli la, saa yɛnwu kɛ yɛ nwo wɔ ngapezo mɔɔ wɔ buluku ɛhye mɔɔ yɛ anyelielɛ mɔɔ ɔlɛba nu la anu a, ɔnzi yɛ nwo. Wɔ adenle fofolɛ zo, yɛnwu yɛ nwo wɔ “nvoninli ne” anu.

3-4. Kɛ mɔɔ Yekile buluku ne kile la, mekɛ boni a ye ngapezo ne mɔ bara nu a, na kɛzi ɔwɔ kɛ ɛhye mɔ ka yɛ nuhua ko biala ɛ?

³ Debie mɔɔ tɔ zo nwiɔ la noko fale mekɛ mɔɔ ngapezo ɛhye mɔ bara nu la anwo. Ɛzoanvolɛ Dwɔn mɔɔ ɛnee yeyɛ kpanyinli  la hanle mekɛ mɔɔ ɛhye mɔ basisi la anwo edwɛkɛ kɛ: “Ɔlua sunsum ne azo membale Awulae kenle ne anu.” (Yek. 1:10) Mɔɔ Dwɔn hɛlɛle zɔhane edwɛkɛ ne wɔ kɛyɛ ɛvolɛ 96 Y.M. anu la, ɛnee “Awulae kenle ne” ɛtɛdwule fee. (Mat. 25:14, 19; Luku 19:12) Noko kɛ mɔɔ Baebolo ngapezo kile la, zɔhane kenle ne bɔle ɔ bo wɔ 1914 wɔ mekɛ mɔɔ bɛziele Gyisɛse Kelaese Belemgbunli wɔ anwuma la. Ɔvi zɔhane ɛvolɛ ne mɔɔ ba la, ngapezo mɔɔ wɔ Yekile ne anu mɔɔ fale Nyamenle menli nwo la bɔle ɔ bo kɛ ɔba nu. Amgba, kɛkala yɛde “Awulae kenle ne” anu!

⁴ Kɛmɔ yɛde anyelielɛ mekɛ ɛhye anu la ati, yɛdayɛ a ɔwɔ kɛ yɛtie folɛdulɛ mɔɔ ɛlɔlɛ wɔ nu mɔɔ wɔ Yekile 1:3 la kpalɛ a. Ɔse: “Anyelielɛ a le awie mɔɔ kenga ngapezo edwɛkɛ ɛhye kpole nee bɛdabɛ mɔɔ bɛtie na bɛdi ninyɛne mɔɔ bɛhɛlɛ ye wɔ nu la azo la, ɔluakɛ mekɛ ne ɛbikye.” Nɔhalɛ nu, ɔwɔ kɛ ‘yɛkenga ngapezo edwɛkɛ ɛhye kpole, yɛtie na yɛdi zo.’ Edwɛkɛ mɔɔ ɔwɔ kɛ yɛdi zo la bie a le boni mɔ?

5. Kɛzi Yekile buluku ne maa yɛnwu deɛmɔti ɔhyia kɛ yɛbayɛ ninyɛne mɔɔ ɔbamaa Gyihova alie yɛ ɛzonlenlɛ ado nu la ɛ?

⁵ Wɔ Yekile tile mɔɔ limoa la ala anu, yɛnwu ye kɛ Gyisɛse ze debie biala mɔɔ ɔlɛkɔ zo wɔ asafo ne mɔ anu la kpalɛ. (Yek. 1:12-16, 20; 2:1) Gyisɛse luale edwɛkɛ mɔɔ ɔmaanle bɛhɛlɛle bɛhɔmaanle asafo nsuu mɔɔ bɛwɔ Ehyea Ekyi anu la azo ɔhilele kɛ ɔze mɔɔ ɔlɛkɔ zo la. Wɔ zɔhane edwɛkɛ ne mɔ anu, ɔvale adehilelɛ fɔɔnwo mɔɔ ɔbaboa ɛvoya mɔɔ limoa la anu Kilisienema yeamaa bɛayɛ ninyɛne mɔɔ ɔbamaa Gyihova alie bɛ ɛzonlenlɛ ado nu la ɔmaanle bɛ. Noko edwɛkɛ mɔɔ ɔhanle ye wɔ nu la fale Nyamenle menli kɔsɔɔti anwo ɛnɛ. Duzu a yɛsukoa yɛfi nu a? Yɛ Adekilevolɛ ne, Kelaese Gyisɛse, ze yɛ sunsum nu gyinlabelɛ kpalɛ. Ɔdaye a ɔnea yɛ nwo zo na ɔbɔ yɛ nwo bane a; ɔze debie biala mɔɔ ɔlɛkɔ zo la. Ɔze mɔɔ yɛyɛ a Gyihova bahɔ zo alie yɛ ado nu la. Adehilelɛ boni a ɔvale ɔmaanle mɔɔ ɔwɔ kɛ yɛdi zo ɛnɛ a?

6. (a) Kɛ mɔɔ Yekile 2:3, 4 kile la, ngyegyelɛ titili boni a Gyisɛse edwɛkɛ mɔɔ ɔvale ɔhɔmaanle Ɛfɛsɛse asafo ne la lale ye ali a? (b) Duzu a yɛsukoa yɛfi edwɛkɛ ɛhye anu a?

⁶ Kenga Yekile 2:3, 4. Ɔnle kɛ yɛgyakyi Gyihova anwo ɛlɔlɛ mɔɔ ɛnee yɛlɛ ye alimoa ne la. Edwɛkɛ mɔɔ Gyisɛse vale hɔmaanle Ɛfɛsɛse asafo ne anu amra la maanle ɔlale ali kɛ bɛgyinlanle kpundii na bɛhɔle zo bɛzonlenle Gyihova ɔnva nwo kɛ bɛyiale ngyegyelɛ dɔɔnwo la. Noko bɛgyakyile ɛlɔlɛ mɔɔ ɛnee bɛlɛ ye alimoa ne la. Saa bɛannyia zɔhane ɛlɔlɛ ne bieko a, Gyihova ɛnrɛlie bɛ ɛzonlenlɛ ɛnrɛdo nu. Ɛnɛ noko, ɔnle kɛ yɛgyinla kpundii ala. Ɔwɔ kɛ yɛnwu deɛmɔti yɛlɛgyinla kpundii la. Tɛ mɔɔ yɛyɛ la angomekye a hyia yɛ Nyamenle ne a, eza deɛmɔti yɛyɛ la noko hyia ye. Adwenle mɔɔ yɛfa yɛyɛ ninyɛne la hyia ye ɔluakɛ ɔkulo kɛ yɛ ɛzonlenlɛ ne gyinla ɔ nwo ɛlɔlɛ kpole mɔɔ yɛlɛ nee anyezɔlɛ mɔɔ yɛlɛ yɛmaa ye la azo.​—Mrɛ. 16:2; Maake 12:29, 30.

7. (a) Kɛ mɔɔ Yekile 3:1-3 kile la, ngyegyelɛ boni a Gyisɛse nwunle kɛ Saadese asafo ne lɛ a? (b) Duzu a ɔhyia kɛ yɛyɛ a?

⁷ Kenga Yekile 3:1-3. Ɔwɔ kɛ yɛkɔ zo yɛsinza na yɛmaa yɛ nye da ɛkɛ. Ɛnee menli mɔɔ wɔ Saadese asafo ne anu la lɛ ngyegyelɛ ngakyile. Dɛba ne ɛnee bɛbɔ mɔdenle wɔ sunsum nu ɛdeɛ, noko ɛnee bɛlɛto bɛ adwenle nu wɔ ɛzonlenlɛ mɔɔ bɛfa bɛmaa Nyamenle la anwo. Ɔti Gyisɛse hanle hilele bɛ kɛ ‘bɛzinza.’ Duzu a yɛsukoa yɛfi kɔkɔbɔlɛ ɛhye  anu a? Nɔhalɛ nu, Gyihova arɛle ɛnrɛvi gyima mɔɔ yɛyɛ la. (Hib. 6:10) Noko yɛnrɛhola yɛnrɛha kɛ yɛyɛ bie wɔ Gyihova ɛzonlenlɛ nu dɛba ɔti yemɔ ala ɛne. Bie a kɛkala yɛngola yɛnyɛ dɔɔnwo kɛ dɛba ne la ɛdeɛ, noko ɔwɔ kɛ yɛbɔ yɛ nwo mɔdenle wɔ “Awulae gyima ne anu,” yɛkɔ zo yɛsinza na yɛmaa yɛ nye da ɛkɛ too yɛkɔdwu awieleɛ.​—1 Kɔl. 15:58; Mat. 24:13; Maake 13:33.

8. Duzu a yɛsukoa yɛfi edwɛkɛ mɔɔ bɛhanle bɛhilele Lawɔdesiama mɔɔ wɔ Yekile 3:15-17 la anu a?

⁸ Kenga Yekile 3:15-17. Ɔwɔ kɛ yɛbɔ mɔdenle wɔ yɛ ɛzonlenlɛ nu na yɛfi yɛ ahonle muala anu yɛyɛ zɔ. Edwɛkɛ mɔɔ Gyisɛse hanle hilele Lawɔdesiama la maanle bɛnwunle ngyegyelɛ gyɛne bie. Ɛnee bɛle “adodɔlera” wɔ bɛ ɛzonlenlɛ nu. Kɛmɔ ɛnee bɛle anyetele la ati, Gyisɛse hanle hilele bɛ kɛ bɛ nwo yɛ “anwunvɔne” yɛɛ bɛ nwo yɛ “alɔbɔlɛ.” Ɛnee ɔwɔ kɛ bɛbɔ mɔdenle kpalɛ wɔ Gyihova ɛzonlenlɛ nu. (Yek. 3:19) Duzu a yɛsukoa yɛfi nu a? Saa yɛ mɔdenlebɔlɛ ne ɛha aze a, ɔwɔ kɛ yɛmaa anyezɔlɛ mɔɔ yɛlɛ yɛmaa sunsum nu ninyɛne la yɛ kpole. (Yek. 3:18) Ɔnle kɛ yɛmaa asetɛnla kpalɛ mɔɔ yɛkpondɛ la twehwe yɛ adwenle ɛlɛ na ɔmaa yɛpia sunsum nu ninyɛne yɛsie ahane.

9. Kɛ mɔɔ yɛnwu ye wɔ edwɛkɛ mɔɔ Gyisɛse hanle hilele Pɛgamɛm nee Tayataela Kilisienema ne anu la, esiane boni a ɔwɔ kɛ yɛkoati a?

⁹ Ɔwɔ kɛ yɛkpo kpɔkyevolɛma ngilehilelɛ. Gyisɛse hwile Pɛgamɛmma bie mɔ anyunlu kɛ bɛlɛfa mgbakyemgbakyenu bɛara la. (Yek. 2:14-16) Ɔhanvole Tayataelama kɛ bɛhwenle bɛ nwo bɛvile “Seetan ninyɛne mɔɔ anu le kuloonwu” la anwo la na ɔmaanle bɛ anwosesebɛ kɛ “bɛzɔ” nɔhalɛ ne anu kpalɛ. (Yek. 2:24-26) Ɛnee ɔwɔ kɛ Kilisienema mɔɔ bɛyɛle bɛtɛɛ na bɛdiele adalɛ ngilehilelɛ la nu bɛ nwo. Na yɛdayɛ noko ɛ? Ɔwɔ kɛ yɛkpo ngilehilelɛ biala mɔɔ ɔ nee Gyihova adwenle ɛnyia la. Bie a kpɔkyevolɛma ɛyɛ bɛ nwo kɛ “bɛzɔ nyamenlezonlenlɛ nu noko bɛnva nuhua tumi ne bɛmbɔ bɛ ɛbɛla.” (2 Tim. 3:5) Saa yɛsukoa Nyamenle Edwɛkɛ ne kpalɛ a, ɔnrɛyɛ se kɛ yɛbanwu adalɛ ngilehilelɛ ɛhye mɔ na yɛahwe yɛ nwo yɛavi nwo.​—2 Tim. 3:14-17; Dwu. 3, 4.

10. Duzu bieko a yɛsukoa yɛfi edwɛkɛ mɔɔ Gyisɛse hanle hilele Pɛgamɛm nee Tayataela asafo ne mɔ la anu a?

¹⁰ Ɔnle kɛ yɛfa yɛ nwo yɛwula ɛbɛlatane biala anu anzɛɛ yɛsosɔ zolɛ. Ɛnee mediema mɔɔ wɔ Pɛgamɛm nee Tayataela la lɛ ngyegyelɛ bieko. Gyisɛse dendɛle tiale asafo ne anu amra bie mɔ kɛ bɛamkpo ɛbɛlatane la. (Yek. 2:14, 20) Duzu a yɛsukoa yɛfi nu a? Saa yɛva  ɛvolɛ dɔɔnwo yɛzonle Gyihova yɛɛ yɛlɛ nwolɛ adenle dɔɔnwo kɛkala bɔbɔ a, ɔnle kɛ yɛnyia adwenle kɛ saa yɛfa yɛ nwo yɛwula ɛbɛlatane nu a Gyihova babu ɔ nye agua zo. (1 Sa. 15:22; 1 Pita 2:16) Ɔwɔ kɛ yɛfa ye ɛbɛlabɔlɛ nwo ngyinlazo mɔɔ kpogya la yɛbɔ yɛ ɛbɛla ɔnva nwo kɛzi ewiade ne ngyinlazo ɛlɛsɛkye la.​—Ɛfɛ. 6:11-13.

11. Badwu ɛke, duzu a yɛzukoa a? (Eza nea ɛlɛka “ Mɔɔ Yɛsukoa Yɛfi Nu Ɛnɛ La.”)

¹¹ Badwu ɛke, duzu a yɛzukoa a? Yɛnwu kɛ ɔhyia kɛ yɛyɛ ninyɛne mɔɔ ɔbamaa Gyihova alie yɛ ɛzonlenlɛ ado nu la. Saa yɛlɛyɛ debie mɔɔ ɔnrɛmaa Gyihova ɛnrɛlie yɛ ɛzonlenlɛ ɛnrɛdo nu a, ɔhyia kɛ yɛyɛ nwolɛ debie ndɛndɛ. (Yek. 2:5, 16; 3:3, 16) Noko Gyisɛse hanle debie gyɛne nwo edwɛkɛ wɔ edwɛkɛ mɔɔ ɔhanle ɔhilele asafo ne mɔ la anu. Duzu debie ɔ?

12. Duzu a yɛbahola yɛazukoa yɛavi edwɛkɛ mɔɔ Gyisɛse hanle hilele mediema mɔɔ wɔ Semɛna nee Feladɛlefea la anu a? (Yekile 2:10)

¹² Akee bɛmaa yɛzuzu edwɛkɛ mɔɔ Gyisɛse hanle hilele mediema mɔɔ wɔ Semɛna nee Feladɛlefea la anwo. Ɔhanle ɔhilele Kilisienema mɔɔ wɔ ɛkɛ ne la kɛ bɛmmasulo kɛ bɛbagyinla kpɔdekpɔdeyɛlɛ nloa ɔluakɛ bɛbayila bɛ wɔ bɛ nɔhalɛlilɛ nwo. (Kenga Yekile 2:10; 3:10) Duzu a yɛsukoa yɛfi nu ɛnɛ a? Ɔwɔ kɛ yɛmaa yɛ nye da kɛ bɛbayɛ yɛ kpɔdekpɔde na yɛnyia ɛhulolɛ kɛ yɛbagyinla ɔ nloa. (Mat. 24:9, 13; 2 Kɔl. 12:10) Duzu ati a ngakyelɛ ɛhye anwo hyia a?

13-14. Kɛzi ninyɛne mɔɔ bɛha nwolɛ edwɛkɛ wɔ Yekile tile 12 la ka Nyamenle menli ɛnɛ ɛ?

¹³ Yekile buluku ne bɔ yɛ amaneɛ kɛ bɛbakpɔ Nyamenle menli wɔ yɛ mekɛ ye​—“Awulae kenle ne” anu. Yekile tile 12 ne hanle kɛ mɔɔ bɛwole Nyamenle Belemgbunlililɛ ne la, yeangyɛ konle zile anwuma. Maekeɛle​—Gyisɛse Kelaese mɔɔ bɛwula ye anyunlunyia la​—nee ye ɛlɔnema nee Seetan nee ye mbɔnsam ne mɔ honle. (Yek. 12:7, 8) Na bɛlile Nyamenle agbɔvolɛ ne mɔ anwo zo konim na bɛdule bɛ bɛguale azɛlɛ ne azo, na ɛhye ɛmaa azɛlɛ ne nee menli mɔɔ de zo la ɛlɛnwu amaneɛ dɔɔnwo. (Yek. 12:9, 12) Noko kɛzi edwɛkɛ ɛhye ɛha Nyamenle menli ɛ?

¹⁴ Yekile buluku ne hanle mɔɔ Seetan yɛle ye bieko la anwo edwɛkɛ. Kɛkala ɔngola ɔngɔ anwuma nehane bieko, ɔti yeva ye ɛya ne yegua mɔhama ne mɔɔ bɛgyi Nyamenle Belemgbunlililɛ ne agyakɛ anu wɔ azɛlɛ ye azo na “bɛlɛyɛ Gyisɛse anwo daselɛlilɛ gyima ne la” anwo zo. (Yek. 12:17; 2 Kɔl. 5:20; Ɛfɛ. 6:19, 20) Kɛzi ngapezo ɛhye ɛra nu ɛ?

15. “Alasevolɛ nwiɔ ne” mɔɔ bɛha bɛ nwo edwɛkɛ wɔ Yekile tile 11 la gyi ɛkɛ maa nwane mɔ, na duzu a dole bɛ a?

¹⁵ Seetan maanle bɛtetale mediema mɔɔ  bɛkpokpa bɛ mɔɔ ɛnee bɛli Belemgbunlililɛ edwɛkɛhanlɛ gyima ne anyunlu la. Bɛ nuhua titili ne mɔ a le sɛkɛlɛneɛ adenle zo “Alasevolɛ nwiɔ ne” mɔɔ bɛhanle kɛ bɛhunle bɛ la. * (Yek. 11:3, 7-11) Wɔ 1918, bɛbɔle mediema mɔɔ bɛli gyima ne anyunlu la anu mɔtwɛ somolɛ, na bɛhanle kɛ bɛgua bɛ efiade mekɛ tendenle. Wɔ sonla nye zo, ɛnee ɔzɔho kɛ “bɛhu” menli ɛhye mɔɔ bɛkpokpa bɛ la gyima ne.

16. Azibɛnwo edwɛkɛ boni a zile wɔ 1919 a, noko boni a Seetan ɛhɔ zo ɛyɛ ɔvi zɔhane mekɛ ne a?

¹⁶ Eza ngapezo mɔɔ wɔ Yekile tile 11 la hanle kɛ “Alasevolɛ nwiɔ ne” bara ngoane nu bieko wɔ mekɛ ekyi anzi. Mɔɔ bɛguale bɛ efiade la, yeandwu ɛvolɛ ko, debie mɔɔ yɛ nwanwane la zile na ɔmaanle ngapezo ɛhye rale nu. Wɔ March 1919, bɛyele mediema ɛhye mɔ mɔɔ bɛkpokpa bɛ la bɛvile efiade na nzinlii bɛpɛle bɛ edwɛkɛ ne anu. Ndɛndɛ ne ala mediema ne mɔ ziale hɔdoale Belemgbunlililɛ gyima ne azo. Noko yemɔ ammaa Seetan angyakyi kɛ ɔbateta Nyamenle menli ne. Ɔvi zɔhane mekɛ ne Seetan ɛva kpɔdekpɔdeyɛlɛ mɔɔ ɔle kɛ “azudenle” la ɛra Nyamenle menli kɔsɔɔti anwo zo. (Yek. 12:15) Nɔhalɛ nu, “ɛke a kpundiigyinlanlɛ nee diedi nwo hyia” wɔ yɛ nuhua ko biala afoa nu a.​—Yek. 13:10.

17. Ɔnva nwo kɛ Seetan teta Nyamenle menli ne la, moalɛ mɔɔ bɛ nye ɛnla la boni a bɛnyia a?

¹⁷ Yekile tile 12 ne hanle kɛ Nyamenle menli ne banyia moalɛ avi ɛleka mɔɔ bɛ nye ɛnla la. Ɔbayɛ kɛ asɛɛ “azɛlɛ ne” bameme kpɔdekpɔdeyɛlɛ ne mɔɔ ɔle kɛ “azudenle” la. (Yek. 12:16) Ɛhye pɛpɛɛpɛ a ɛlɛsi a. Ɔdwu mekɛ ne bie a, Seetan ewiade ngyehyɛleɛ, le kɛ edwɛkɛlilɛ ngyehyɛleɛ bie mɔ, da ndelebɛbo ali na bɛdie Nyamenle menli ne. Gyihova azonvolɛ ɛli konim wɔ kɔɔto edwɛkɛ dɔɔnwo anu na yemaa bɛnyia fanwodi bie mɔ. Kɛzi bɛlɛfa zɔhane fanwodi ne bɛali gyima ɛ? Bɛlɛfa nwolɛ adenle ɛhye bɛali gyima kpalɛ bɛayɛ gyima mɔɔ Gyihova ɛva ɛmaa bɛ la. (1 Kɔl. 16:9) Gyima ɛhye bie a le boni?

18. Yɛ gyima titili wɔ awieleɛ mekɛ ɛhye anu a le boni?

¹⁸ Gyisɛse hanle dole ɛkɛ ne kɛ ye menli ne babɔ ‘Nyamenle Belemgbunlililɛ ne anwo edwɛkpa ne’ nolo wɔ azɛlɛ ye azo amuala kolaa na awieleɛ ne ara. (Mat. 24:14) Saa bɛlɛyɛ  bɛ gyima ne a, bɛnyia moalɛ bɛfi anwumabɔvolɛ bie anzɛɛ anwumabɔvolɛma ekpunli bie mɔɔ bɛha bɛ nwo edwɛkɛ kɛ bɛlɛ ‘dahuu edwɛkpa ne kɛ bɛkabɔ ye nolo bɛahile bɛdabɛ mɔɔ bɛde azɛlɛ ye azo la, maanle nee mbusua nee aneɛ nee menli kɔsɔɔti’ la ɛkɛ.​—Yek. 14:6.

19. Edwɛkɛ gyɛne boni a ɔwɔ kɛ bɛdabɛ mɔɔ bɛkulo Gyihova la bɔ ye nolo a?

¹⁹ Tɛ Belemgbunlililɛ ne anwo edwɛkpa ne angomekye a ɔwɔ kɛ Nyamenle menli ne bɔ ye nolo a. Eza ɔwɔ kɛ bɛboa gyima mɔɔ anwumabɔvolɛma ne ɛlɛyɛ mɔɔ bɛha nwolɛ edwɛkɛ wɔ Yekile tile 8 kɔdwu 10 la. Anwumabɔvolɛma ɛhye mɔ hanle ngyegyelɛ ngakyile mɔɔ bara menli mɔɔ kpo Nyamenle Belemgbunlililɛ ne anwo zo la. Ɛhye ati Gyihova Alasevolɛ ɛlɛbɔ ndɛnebualɛ mɔɔ le kɛ ‘ezuawolɛ nee senle’ la nolo na bɛlɛmaa bɛanwu ndɛnebualɛ mɔɔ Nyamenle bɛava ara ngyehyɛleɛ ngakyile mɔɔ wɔ Seetan ɛtane ewiade ɛhye anu anwo zo la. (Yek. 8:7, 13) Ɔhyia kɛ menli nwu kɛ awieleɛ ne ɛbikye amaa bɛayɛ nzenzaleɛ mgbole wɔ bɛ ɛbɛlabɔlɛ nu na bɛanyia bɛ ti wɔ Gyihova ɛya kenle ne. (Zɛf. 2:2, 3) Noko tɛ awie biala a anye die edwɛkɛ ɛhye anwo a. Yɛhyia akɛnrasesebɛ na yɛahola yɛabɔ ye nolo. Wɔ anwongyelelɛ kpole ne anu, ndɛnebualɛ edwɛkɛ mɔɔ li awieleɛ la baha menli ɛya kpole.​—Yek. 16:21.

20. Duzu a yɛbazuzu nwo wɔ edwɛkɛ nwiɔ mɔɔ doa zo la anu a?

²⁰ Nɔhalɛ nu, ɔwɔ kɛ yɛdi “ngapezo edwɛkɛ” ne azo ɔluakɛ yɛ nwo wɔ edwɛkɛ mɔɔ yɛkenga ye wɔ Yekile buluku ne anu mɔɔ ɔlɛba nu la anu. (Yek. 1:3) Noko kɛ ɔkɛyɛ na yɛava nɔhalɛlilɛ yɛagyinla kpɔdekpɔdeyɛlɛ nloa na yɛahɔ zo yɛayɛ yɛ afoa nu ɛdeɛ yɛava akɛnrasesebɛ yɛabɔ edwɛkɛ ɛhye mɔ nolo ɛ? Ninyɛne nwiɔ ɛhye mɔ a bamaa yɛ anwosesebɛ a: mɔɔ limoa, mɔɔ Yekile buluku ne ka ye wɔ Nyamenle agbɔvolɛ nwo la, yɛɛ mɔɔ tɔ zo nwiɔ, saa yɛkɔ zo yɛdi nɔhalɛ a nyilalɛ mɔɔ yɛbanyia ye kenle bie la. Yɛbazuzu zɔhane edwɛkɛ ɛhye mɔ anwo wɔ edwɛkɛ nwiɔ mɔɔ doa zo la anu.