1. Kpɔkɛ mɔɔ nwolɛ hyia la boni a ɔwɔ kɛ alesama kɔsɔɔti si a?

 ƐNƐ, ɔwɔ kɛ menli si kpɔkɛ bie mɔɔ anwo hyia la. Asoo bɛbagyinla Gyihova Nyamenle anzi kɛ ɔdaye a ɔfɛta kɛ ɔdi anwuma nee aze azo tumi a, anzɛɛ bɛbagyinla ye kpɔvolɛ atisesebɛ ne, Seetan Abɔnsam anzi? Ɛnrɛhola ɛnrɛgyinla avinli. Kpɔkɛ mɔɔ bɛbazi la a bahile kɛ bɛbadɛnla aze dahuu anzɛɛ bɛbawu a. (Mat. 25:31-33, 46) Wɔ “anwongyelelɛ kpole” ne anu, bɛbayɛ bɛ nzonlɛ kɛ bɛbanyia bɛ ti anzɛɛ bɛbazɛkye bɛ.​—Yek. 7:14; 14:9-11; Yiz. 9:4, 6.

2. (a) Duzu a Hibuluma 10:35-39 maa yɛ anwosesebɛ kɛ yɛyɛ a? (b) Kɛzi Yekile buluku ne bahola aboa yɛ ɛ?

² Kenga Hibuluma 10:35-39. Saa wɔkpa kɛ ɛbagyinla Gyihova tumililɛ ne anzi a, ɛnee wɔzi kpɔkɛ kpalɛ. Kɛkala, ɛkulo kɛ ɛboa awie mɔ ɛmaa bɛsi kpɔkɛ kpalɛ. Ɛhye ati, ɛbahola wɔava edwɛkɛ mɔɔ wɔ Yekile buluku ne anu la wɔaboa bɛ. Buluku kɛnlɛma zɔhane maa yɛnwu mɔɔ ɔbado bɛdabɛ mɔɔ bɛdwazo bɛtia Gyihova la, noko eza ɔka nyilalɛ mɔɔ bɛdabɛ mɔɔ bɛfa nɔhalɛlilɛ bɛgyinla ye tumililɛ ne anzi la banyia la anwo edwɛkɛ. Ɔwɔ kɛ yɛsukoa nɔhalɛ edwɛkɛ ɛhye mɔ mɔɔ anwo hyia la. Saa yɛyɛ zɔ a, ɔbamaa kpɔkɛ mɔɔ yɛzi kɛ yɛkɔ zo yɛazonle Gyihova la anu amia. Eza ɔbamaa yɛava mɔɔ yɛzukoa la yɛaboa awie mɔ amaa bɛazi kpɔkɛ kpalɛ na bɛahɔ zo bɛazonle Gyihova.

3. Duzu a yɛbazuzu nwo wɔ edwɛkɛ ɛhye anu a?

³ Wɔ edwɛkɛ ɛhye anu, yɛbazuzu kpuya ɛhye mɔ anwo: Duzu a bɛdabɛ mɔɔ bɛgyinla Nyamenle tumililɛ ne anzi la banyia a? Noko duzu a bado bɛdabɛ mɔɔ bɛkpa kɛ bɛbagyinla nane kɔkɔlɛ anwo ɛzulolɛ ne mɔɔ bɛha ɔ nwo edwɛkɛ wɔ Yekile buluku ne anu la anzi la a?

4. Ekpunli boni a ɛzoanvolɛ Dwɔn nwunle kɛ bɛboka Gyisɛse anwo wɔ anwuma a?

⁴ Wɔ ɛnyelɛzodeɛnwunlɛ nu, ɛzoanvolɛ Dwɔn nwunle ekpunli nwiɔ mɔɔ bɛgyinlanle Nyamenle tumililɛ ne anzi na bɛnyianle dahuu ngoane la. Ekpunli mɔɔ limoa la dodo le 144,000. (Yek. 7:4) Bɛyele bɛ bɛvile azɛlɛ ye azo kɛ bɛfa bɛ bɛaboka Gyisɛse anwo bɛahyehyɛ arane anzɛɛ Belemgbunlililɛ wɔ anwuma. Bɛ nee ye banlea azɛlɛ ye azo. (Yek. 5:9, 10; 14:3, 4) Dwɔn nwunle ye wɔ ɛnyelɛzodeɛnwunlɛ ne anu kɛ bɛ nee Gyisɛse gyi Zayɔn Boka ne azo wɔ anwuma.​—Yek. 14:1.

5. Duzu a ɔnrɛhyɛ ɔbado menli 144,000 mɔhama ne a?

⁵ Ɔvi ɛzoanvolɛma ne mekɛ zo too badwu ɛnɛ, bɛkpa menli dɔɔnwo kɛ bɛboka menli 144,000 ne anwo. (Luku 12:32; Wlo. 8:17) Noko bɛhanle bɛhilele Dwɔn kɛ bɛ nuhua ekyi bie ala a baha azɛlɛ ye azo wɔ awieleɛ mekɛ ye anu a. Menli ɛhye mɔ “mɔɔ ɛha” la banyia bɛ “nzonlɛyɛlɛdeɛ” mɔɔ li awieleɛ mɔɔ ɔkile kɛ Gyihova ɛlie bɛ ɛdo nu la kolaa na anwongyelelɛ kpole ne abɔ ɔ bo. (Yek. 7:2, 3; 12:17) Akee wɔ anwongyelelɛ kpole ne anu, bɛbava mɔhama ɛhye bahɔboka menli 144,000 ne anu amra mɔɔ bɛlile nɔhalɛ bɛhɔle ewule nu na bɛwɔ anwuma nehane dɛba la anwo. Akee bɛ nee Gyisɛse babɔ nu ali tumi wɔ Nyamenle Belemgbunlililɛ ne anu.​—Mat. 24:31; Yek. 5:9, 10.

6-7. (a) Ekpunli bieko boni a Dwɔn nwunle ye a, na duzu a yɛze ye wɔ bɛ nwo a? (b) Duzu ati a ɔwɔ kɛ mɔhama ne nee “menli ekpunli kpole” ne anye die Yekile tile 7 ne anwo a?

⁶ Mɔɔ Dwɔn nwunle ekpunli ne mɔɔ wɔ anwuma la anzi, eza ɔnwunle “menli ekpunli kpole bie.” Ekpunli ɛhye ɛnle kɛ menli 144,000 ne la, bɛmɛ awie ɛngola bɛ tia. (Yek. 7:9, 10) Duzu a yɛze ye wɔ bɛ nwo a? Bɛhanle bɛhilele Dwɔn kɛ: “Menli ɛhye mɔ a ɛvi anwongyelelɛ kpole ne anu a, na bɛkpo bɛ adɛladeɛ ne mɔ nwohyee wɔ Boaneralɛ ne mogya ne anu.” (Yek. 7:14) Saa “menli ekpunli kpole” ɛhye nyia bɛ ti wɔ anwongyelelɛ kpole ne anu a, bɛbadɛnla azɛlɛ ye azo na bɛanyia nyilalɛ dɔɔnwo dahuu.​—Edw. 37:9-11, 27-29; Mrɛ. 2:21, 22; Yek. 7:16, 17.

⁷ Saa bɛkpa yɛ kɛ yɛhɔ anwuma anzɛɛ yɛhɔ zo yɛdɛnla azɛlɛ ye azo a, asoo yɛnwu yɛ nwo wɔ edwɛkɛ mɔɔ bɛha ye wɔ Yekile tile 7 ne la anu ɔ? Ɔwɔ kɛ yɛnwu yɛ nwo wɔ nu. Zɔhane mekɛ ne bayɛ anyelielɛ mekɛ amaa Nyamenle azonvolɛ ekpunli nwiɔ ɛhye mɔ! Yɛ nye balie kpole kɛ yɛkpale kɛ yɛbagyinla Gyihova tumililɛ ne anzi la. Duzu bieko a Yekile buluku ne ka ye wɔ anwongyelelɛ kpole ne anwo kile yɛ a?​—Mat. 24:21.

8. Kɛzi anwongyelelɛ kpole ne babɔ ɔ bo ɛ, na kɛzi ɔbaha menli dɔɔnwo ɛ?

⁸ Kɛ mɔɔ yɛnwunle ye wɔ edwɛkɛ mɔɔ ɔli ɛhye anyunlu la anu la, ɔnrɛhyɛ, ewiade ɛhye maanyɛlɛ ngyehyɛleɛ ne bateta Babelɔn Kpole ne, ewiade adalɛ ɛzonlenlɛ maanle ne. (Yek. 17:16, 17) Ɛhye a babɔ anwongyelelɛ kpole ne abo a. Asoo ɛhye bamaa menli dɔɔnwo apia bɛ nwo ara kɛ bɛba barazonle Gyihova ɔ? Kyɛkyɛ. Emomu, Yekile tile 6 maa yɛnwu kɛ wɔ mekɛ zɔhane, menli mɔɔ bɛnzonle Gyihova la bakpondɛ banebɔlɛ avi ewiade ɛhye maanyɛlɛ nee gualilɛ ngyehyɛleɛ ne mɔɔ bɛva bɛ bɛtoto awoka nwo la ɛkɛ. Kɛmɔ bɛnrɛgyinla Nyamenle Belemgbunlililɛ ne anzi la ati, Gyihova babu bɛ kɛ bɛdwazo bɛtia ye.​—Luku 11:23; Yek. 6:15-17.

9. Kɛzi Gyihova menli bayɛ ngakyile wɔ anwongyelelɛ kpole ne anu ɛ, na duzu a bavi nu ara a?

 ⁹ Nɔhalɛ nu, Gyihova azonvolɛ mɔɔ bɛdi nɔhalɛ la bayɛ ngakyile wɔ mekɛ mɔɔ menli nye zo ɛda bɛ wɔ anwongyelelɛ kpole ne anu la. Bɛdabɛ ala a bɛbayɛ menli ekpunli mɔɔ wɔ azɛlɛ ye azo mɔɔ bɛsonle Gyihova Nyamenle mɔɔ bɛbakpo kɛ bɛbagyinla “nane anwo ɛzulolɛ” ne anzi a. (Yek. 13:14-17) Kɛmɔ bɛbahɔ zo bɛali nɔhalɛ bɛamaa Gyihova la ati, ɔbaha bɛdabɛ mɔɔ bɛdwazo bɛtia ye la ɛya. Ɛhye bamaa maanle maanle mɔɔ bɛha bɛ nwo bɛbɔ nu la ateta Nyamenle menli ne wɔ azɛlɛ ye azo amuala. Baebolo ne fɛlɛ atisesebɛ ɛtetalɛ ɛhye Gɔgo mɔɔ vi Meegɔgo la ɛtetalɛ ne.​—Yiz. 38:14-16.

10. Kɛ mɔɔ Yekile 19:19-21 ka la, duzu a Gyihova bayɛ ye wɔ ye menli ne mɔɔ bɛbateta bɛ la anwo a?

¹⁰ Duzu a Gyihova bayɛ ye wɔ atisesebɛ ɛtetalɛ ɛhye anwo a? Ɔse: “Me ɛya kpole ne bazɔ.” (Yiz. 38:18, 21-23) Yekile tile 19 ka mɔɔ bazi bieko la anwo edwɛkɛ. Gyihova bazoa Ɔ Ra ne kɛ ɔhɔlie ye menli ne na ɔli bɛ agbɔvolɛ anwo zo konim. “Anwuma ɛlɔne”​—mɔɔ bɛmɛ a le anwumabɔvolɛ nɔhavoma nee menli 144,000 ne la​—bahɔboka Gyisɛse anwo wɔ konle ɛhye anu. (Yek. 17:14; 19:11-15) Duzu a bavi konle ɛhye anu ara a? Bɛbazɛkye alesama nee ahyehyɛdeɛ kɔsɔɔti mɔɔ bɛdwazo bɛtia Gyihova la bɔkɔɔ!​—Kenga Yekile 19:19-21.

11. Debie titili boni a zile wɔ Yekile buluku ne anu a?

¹¹ Wɔmɔ pɛ kɛzi bɛsɛkye Nyamenle agbɔvolɛ bɔkɔɔ a nɔhavoma mɔɔ baha wɔ azɛlɛ ne azo la anye balie la anwo nvoninli nea! Zɔhane mekɛ ne bayɛ anyelielɛ kpole! Saa bɛsɛkye Babelɔn Kpole ne a, anyelielɛ kpole bara anwuma ɛdeɛ, noko debie bieko wɔ ɛkɛ mɔɔ ɔbamaa bɛ nye alie kpole kpalɛ a. (Yek. 19:1-3) Nɔhalɛ nu, ɔle debie titili kpalɛ wɔ Yekile buluku ne anu​—“Boaneralɛ ne atɔfolɛlielɛ ne.”​—Yek. 19:6-9.

12. Kɛ mɔɔ bɛhile ye wɔ Yekile 21:1, 2 la, mekɛ boni a Boaneralɛ ne atɔfolɛlielɛ ne bahɔ zo a?

¹² Mekɛ boni a atɔfolɛlielɛ ne bahɔ zo a? Bɛbava menli 144,000 ne amuala bɛahɔ anwuma kolaa na Amagɛdɔn konle ne abɔ ɔ bo. Noko tɛ mekɛ zɔhane a Boaneralɛ ne atɔfolɛlielɛ ne bahɔ zo a. (Kenga Yekile 21:1, 2.) Saa bɛko Amagɛdɔn konle ne bɛwie na bɛsɛkye Nyamenle agbɔvolɛ kɔsɔɔti bɛwie a, yɛɛ Boaneralɛ ne atɔfolɛlielɛ ne bahɔ zo a.​—Edw. 45:3, 4, 13-17.

13. Duzu a Boaneralɛ ne atɔfolɛlielɛ ne bava ara a?

¹³ Duzu a Boaneralɛ ne atɔfolɛlielɛ ne bava ara a? Ɔyɛ, kɛ mɔɔ atɔfolɛlielɛ ka nrenyia nee raalɛ bɔ nu la, zɔhane ala a sɛkɛlɛneɛ adenle zo atɔfolɛlielɛ ɛhye baha Belemgbunli ne, Gyisɛse Kelaese nee ye “atɔfolɛ” ne, menli 144,000 ne abɔ nu a. Gyimalilɛ titili zɔhane bava arane fofolɛ ne mɔɔ bali azɛlɛ ne azo tumi ɛvolɛ 1,000 la azie ɛkɛ.​—Yek. 20:6.

14-15. Duzu a Yekile tile 21 fa menli 144,000 ne toto nwo a? (Nea ɔ nyunlu nvoninli ne.)

¹⁴ Eza Yekile tile 21 vale menli 144,000 ne totole suakpole bie mɔɔ le kɛnlɛma kpalɛ, mɔɔ bɛfɛlɛ ye “Gyɛlusalɛm Fofolɛ” la anwo. (Yek. 21:2, 9) Suakpole ɛhye lɛ adiabo awolɛ 12 mɔɔ bɛhɛlɛ “aluma 12 mɔɔ le Boaneralɛ ne ɛzoanvolɛma 12 ne aluma” la wɔ nwolɛ. Duzu ati a Dwɔn anye liele edwɛkɛ ɛhye anwo a? Ɔluakɛ ɔnwunle kɛ bɛhɛlɛ ye duma wɔ awolɛ ne mɔ ko anwo. Ɔle nwolɛ adenle kpole kpalɛ!​—Yek. 21:10-14; Ɛfɛ. 2:20.

¹⁵ Suakpole gyɛne biala nee sɛkɛlɛneɛ  adenle zo suakpole ɛhye ɛnzɛ. Ye awɔdenle ne mɔ le nvutuke tagyee, ɔlɛ avikpa nlenkɛ mgbole 12, bɛvale awolɛ mɔɔ sonle bolɛ la bɛdole ye bane ne nee ye adiabo ne mɔ, yɛɛ ye afoa nna ne amuala sɛ. (Yek. 21:15-21) Noko ɔzɔho kɛ yeha debie bie! Tie mɔɔ Dwɔn hanle la: “Meannwu ɛzonlenlɛsua wɔ ɛkɛ, ɔluakɛ Gyihova Nyamenle, Tumivolɛ Bedevinli ne nee Boaneralɛ ne a le ye ɛzonlenlɛsua a. Ɛnee suakpole ne ɛngyia sɛnzɛne anzɛɛ siane ne wienyi ne, ɔluakɛ Nyamenle anyunlunyia ta wɔ ɛkɛ, yɛɛ Boaneralɛ ne a le ye kɛnlaneɛ a.” (Yek. 21:22, 23) Bɛdabɛ mɔɔ bɛbayɛ Gyɛlusalɛm Fofolɛ ne la nee Gyihova mumua ne badɛnla. (Hib. 7:27; Yek. 22:3, 4) Ɔti Gyihova nee Gyisɛse a le zɔhane suakpole ne ɛzonlenlɛsua a.

16. Wɔ Nyamenle Belemgbunlililɛ ne Ɛvolɛ Apenle Ko Tumililɛ ne anu, duzu a alesama banyia a?

¹⁶ Menli mɔɔ bɛkpokpa bɛ la dwenledwenle suakpole ɛhye anwo a, bɛ nye die kpalɛ. Noko ɔwɔ kɛ bɛdabɛ mɔɔ bɛlɛ azɛlɛ ye azo anyelazo la noko anye die nwo. Wɔ Nyamenle Belemgbunlililɛ ne Ɛvolɛ Apenle Ko Tumililɛ ne anu, Gyɛlusalɛm Fofolɛ ne bamaa yɛanyia nyilalɛ dɔɔnwo. Dwɔn nwunle kɛ nyilalɛ ɛhye mɔ ɛlɛse kɛ “ngoane nzule azudenle” la. Na ɛnee “ngoane mbaka” mɔɔ bɛfa ye nya ne mɔ “bɛyɛ maanle maanle ne mɔ ayile” la gyigyi azudenle ne anloa nwiɔ ne. (Yek. 22:1, 2) Alesama kɔsɔɔti mɔɔ de aze wɔ zɔhane mekɛ ne la banyia ninyɛne mgbalɛ ɛhye mɔ bie. Ngyikyingyikyi, bɛbamaa alesama ali munli. Na anwodolɛ, nyane nee monle kɔsɔɔti bavi ɛkɛ.​—Yek. 21:3-5.

17. Kɛ mɔɔ Yekile tile 20:11-13 kile la, nwane mɔ a banyia Ɛvolɛ Apenle Ko Tumililɛ ne azo nvasoɛ a?

¹⁷ Nwane mɔ a banyia ninyɛne mgbalɛ ɛhye mɔ bie a? Mɔɔ limoa, menli ekpunli kpole ne mɔɔ bɛbanyia bɛ ti wɔ Amagɛdɔn konle ne anu yɛɛ ngakula mɔɔ bie a bɛbawo bɛ wɔ ewiade fofolɛ ne anu la. Noko eza Yekile tile 20 bɔ yɛ ɛwɔkɛ kɛ bɛbadwazo mowuamra. (Kenga Yekile 20:11-13.) “Tenlenema” mɔɔ bɛlile nɔhalɛ bɛhɔle ewule nu yɛɛ “bɛdabɛ mɔɔ bɛnle tenlenema”​—menli mɔɔ bɛannyia nwolɛ adenle bɛanzukoa Gyihova anwo debie la​—bara ngoane nu bieko wɔ azɛlɛ ye azo. (Gyi. 24:15; Dwɔn 5:28, 29) Asoo ɛhye kile kɛ bɛbadwazo awie biala bɛara ngoane nu wɔ azɛlɛ ye azo wɔ Ɛvolɛ Apenle Ko Tumililɛ ne anu ɔ? Kyɛkyɛ. Bɛnrɛdwazo  bɛdabɛ mɔɔ bɛ nye fuu bɛkpole nwolɛ adenle mɔɔ bɛnyianle kɛ bɛbazonle Gyihova kolaa na bɛawu la bieko. Bɛnyianle nwolɛ adenle, noko bɛlale ye ali kɛ bɛnfɛta kɛ bɛtɛnla Paladaese azɛlɛ ne azo.​—Mat. 25:46; 2 Tɛs. 1:9; Yek. 17:8; 20:15.

18. Wɔ ɛvolɛ 1,000 ne anzi, kɛzi asetɛnla ne bayɛ ɛ?

¹⁸ Ɔkadwu ɛvolɛ 1,000 ne awieleɛ la, ɛnee bɛdabɛ mɔɔ bɛde azɛlɛ ne azo la amuala ɛli munli. Ɛtane mɔɔ yɛnyianle yɛvile Adam ɛkɛ ne la ɛnrɛgyegye yɛ bieko. (Wlo. 5:12) Bɛbaye amowa mɔɔ Adam ɛtane ne vale rale la bɛavi ɛkɛ ne bɔkɔɔ. Wɔ adenle ɛhye azo, bɛdabɛ mɔɔ bɛde azɛlɛ ne azo la ‘bara ngoane nu’ kɛ alesama mɔɔ bɛdi munli la wɔ ɛvolɛ 1,000 ne awieleɛ.​—Yek. 20:5.

19. Duzu ati a sɔnea mɔɔ li awieleɛ la anwo hyia a?

¹⁹ Yɛze kɛ Gyisɛse kpole mɔdenle mɔɔ Seetan bɔle kɛ ɔmaa yeayɛ ɛtane la. Ɔhɔle zo ɔlile nɔhalɛ wɔ sɔnea nu. Noko saa bɛmaa Seetan adenle kɛ ɔzɔ alesama mɔɔ di munli la ɔnlea a, asoo bɛ muala bɛbanyia ɛhulolɛ kɛ bɛbahɔ zo bɛali nɔhalɛ bɛamaa Gyihova ɔ? Saa bɛye Seetan bɛfi kuma kuloonwu ne anu wɔ ɛvolɛ 1,000 ne awieleɛ a, yɛɛ yɛ nuhua ko biala bahola abua kpuya ɛhye a. (Yek. 20:7) Bɛdabɛ mɔɔ bɛbali nɔhalɛ wɔ sɔnea ɛhye mɔɔ li awieleɛ anu la banyia dahuu ngoane nee nɔhalɛ fanwodi. (Wlo. 8:21) Bɛbazɛkye bɛdabɛ mɔɔ bɛbade atua la nee Abɔnsam yɛɛ ye sunsum ɛtane ne mɔ amuala bɔkɔɔ.​—Yek. 20:8-10.

20. Kɛzi ɛte nganeɛ wɔ ngapezo ngɛnlɛma mɔɔ wɔ Yekile buluku ne anu la anwo ɛ?

²⁰ Kɛzi ɛte nganeɛ wɔ Yekile buluku ne anu edwɛkɛ ekyi mɔɔ yɛzuzu nwo la anwo ɛ? Asoo ɔnyɛ wɔ anyelielɛ kɛ ɛnwu ɛ nwo wɔ ngapezo ɛhye mɔ mɔɔ yɛ nwanwane la anu ɔ? Asoo ɔmmaa ɛnnyia ɛhulolɛ kɛ ɛbado ɛsalɛ wɔavɛlɛ awie mɔ wɔamaa bɛaraboka yɛ nwo yɛazonle yɛ Nyamenle ne wɔ nɔhalɛ nu ɔ? (Yek. 22:17) Kɛmɔ anyelielɛ edwɛkɛ ɛhye mɔ mɔɔ basisi kenle bie la ɛmaa yɛ nye ɛlie kpole la ati, yɛkulo kɛ yɛka ɛzoanvolɛ Dwɔn edwɛkɛ ɛhye bie: “Amen! Awulae Gyisɛse, bɛla.”​—Yek. 22:20.