1. Duzu a Gyihova kulo kɛ ye azonvolɛ yɛ a? (Eza nea nvoninli ne.)

 SAA yɛhyia arɛlekyekyelɛ nee adehilelɛ a, nwane ɛkɛ a yɛbahola yɛahɔ a? Yɛze zɔhane kpuya ne anwo mualɛ ne. Yɛbahola yɛava yɛ asɔneyɛlɛ yɛadɔ Gyihova Nyamenle anyunlu. Zɔhane a Gyihova se yɛyɛ a. Ɔkulo kɛ yɛta yɛyɛ asɔne, ɔluakɛ Baebolo ne se ‘yɛhɔ zo yɛyɛ asɔne.’ (1 Tɛs. 5:17) Yɛbahola yɛava yɛ asɔneyɛlɛ yɛado ɔ nyunlu mekɛ biala yɛakpondɛ adehilelɛ mɔɔ baboa yɛ wɔ yɛ ɛbɛlabɔlɛ kɔsɔɔti anu la. (Mrɛ. 3:5, 6) Kɛmɔ Gyihova le ahunlunyele Nyamenle la ati, ɔtɛkilele yɛ fane dodo mɔɔ yɛbahola yɛayɛ asɔne la.

2. Duzu a yɛbazuzu nwo wɔ edwɛkɛ ɛhye anu a?

² Yɛ nye sɔ nwolɛ adenle mɔɔ yɛlɛ yɛyɛ asɔne la. Noko kɛmɔ yɛlɛ ninyɛne dɔɔnwo yɛyɛ la ati, bie a ɔbayɛ se kɛ yɛbanyia mekɛ yɛayɛ asɔne. Eza bie a yɛbade nganeɛ kɛ ɔhyia kɛ yɛnyia anyuhɔlɛ wɔ yɛ asɔneyɛlɛ nu. Mɔɔ yɛ anyelielɛ la a le kɛ, yɛbahola yɛanyia anwosesebɛmaanlɛ nee adehilelɛ dɔɔnwo yɛavi Ngɛlɛlera ne anu. Wɔ edwɛkɛ ɛhye anu, yɛbazuzu kɛzi Gyisɛse kpondɛle mekɛ yɛle asɔne nee kɛzi yɛdayɛ noko yɛbahola yɛayɛ zɔ la anwo. Eza yɛbazuzu ninyɛne nnu mɔɔ anwo hyia mɔɔ saa yɛfa yɛboka yɛ asɔneyɛlɛ nwo a ɔbamaa yɛanyia anyuhɔlɛ la anwo.

3. Duzu a ɛnee Gyisɛse ze wɔ asɔneyɛlɛ nwo a?

³ Ɛnee Gyisɛse ze kɛ yɛ asɔneyɛlɛ nwo hyia Gyihova kpalɛ. Kolaa na yeara azɛlɛ ye azo la, ɔnwunle kɛ ɔ Ze buale mrenyia  nee mraalɛ nɔhavoma asɔneyɛlɛ. Kɛ neazo la, ɛnee Gyisɛse wɔ ɔ Ze anwo ɛkɛ wɔ mekɛ mɔɔ ɔbuale Hana, Devidi, Yilaegya yɛɛ nɔhavoma dɔɔnwo asɔneyɛlɛ la. (1 Sa. 1:10, 11, 20; 1 Arl. 19:4-6; Edw. 32:5) Ɛhye ati a Gyisɛse hilehilele ye ɛdoavolɛma kɛ bɛda bɛva anwodozo bɛyɛ asɔne la!​—Mat. 7:7-11.

4. Duzu a yɛsukoa yɛfi Gyisɛse asɔneyɛlɛ ne mɔ anu a?

⁴ Gyisɛse luale asɔneyɛlɛ mɔɔ ɔdaye mumua ne ɔvale ɔdole Gyihova anyunlu la azo ɔyɛle neazo ɔmaanle ye ɛdoavolɛma kɛ bɛli ɔ nzi. Gyisɛse yɛle asɔne fane dɔɔnwo wɔ ye ɛzonlenlɛ gyima ne amuala anu. Ɛnee ɔwɔ kɛ ɔye mekɛ ɔsie ahane ɔyɛ asɔne ɔluakɛ ɛnee ɔnlɛ alagye yɛɛ menli dɔɔnwo ba ɔ nwo ɛkɛ. (Maake 6:31, 45, 46) Ɛnee ɔdwazo ndɛ amaa yeanyia mekɛ yeayɛ asɔne. (Maake 1:35) Kenle ko bie, ɔyɛle asɔne nɔe ne amuala amaa yeazi kpɔkɛ bie mɔɔ anwo hyia la. (Luku 6:12, 13) Yɛɛ Gyisɛse yɛle asɔne fane dɔɔnwo wɔ nɔe ne mɔɔ aleɛ kye a ɔbawu la amaa yeava ye adwenle yeazie ye azɛlɛ ye azo gyima mɔɔ yɛ se kpalɛ la azo.​—Mat. 26:39, 42, 44.

5. Kɛ ɔkɛyɛ na yɛazukoa Gyisɛse wɔ mekɛ mɔɔ yɛlɛyɛ asɔne la ɛ?

⁵ Gyisɛse neazo ne kilehile yɛ kɛ ɔnva nwo kɛzi yɛnlɛ alagye la, ɔhyia kɛ yɛye mekɛ yɛsie ahane yɛyɛ asɔne. Bie a ɔbahyia kɛ yɛye mekɛ yɛsie ahane yɛyɛ asɔne kɛ mɔɔ Gyisɛse yɛle la. Bie a ɔwɔ kɛ yɛdwazo ndɛ anzɛɛ yɛyɛ ye nɔsolɛ nu mɔɔ mekɛ ne ɛhɔ bie la. Saa yɛyɛ ye zɔ a ɛnee yɛlɛmaa Gyihova anwu ye kɛ yɛ nye sɔ ahyɛlɛdeɛ titili ɛhye. Adiema raalɛ Lynne kakye kɛzi ɔ nye liele wɔ mekɛ mɔɔ ɔlimoale ɔnwunle nwolɛ adenle mɔɔ yɛlɛ yɛyɛ asɔne la. Ɔhanle kɛ: “Mɔɔ menwunle kɛ mebahola me nee Gyihova adendɛ mekɛ biala la, ɔboale me ɔmaanle menwunle kɛ ɔle me gɔnwo mɔɔ bikye me na ɛnee mekulo kɛ menyia anyuhɔlɛ wɔ me asɔneyɛlɛ nu.” Yɛze kɛ kɛ yɛ nuhua dɔɔnwo te nganeɛ la ɛne. Ɔti maa yɛzuzu ninyɛne nnu mɔɔ anwo hyia mɔɔ yɛbahola yɛava yɛaboka yɛ asɔneyɛlɛ nwo la anwo.

6. Kɛ mɔɔ Yekile 4:10, 11 kile la, duzu a ɔfɛta kɛ Gyihova die a?

⁶ Ye Gyihova ayɛlɛ. Ɛzoanvolɛ Dwɔn nwunle mgbanyima 24 wɔ anwuma kɛ bɛlɛsonle Gyihova wɔ ɛnyelɛzodeɛnwunlɛ bie mɔɔ yɛ nwanwane la anu. Bɛyele Nyamenle ayɛlɛ na  bɛhanle kɛ ɔfɛta kɛ ɔdie “anyunlunyia nee enililɛ nee tumi.” (Kenga Yekile 4:10, 11.) Anwumabɔvolɛ nɔhavoma noko lɛ ninyɛne dɔɔnwo mɔɔ bɛgyinla zo bɛye Gyihova ayɛlɛ na bɛwula ye anyunlunyia a. Bɛ nee ye a wɔ anwuma nehane a yɛɛ bɛze ye kpalɛ. Ninyɛne mɔɔ ɔyɛ la maa bɛnwu ye subane ne mɔ. Saa bɛnwu kɛzi Gyihova yɛ ye ninyɛne la a, ɔka bɛ ɔmaa bɛye ye ayɛlɛ.​—Dwobu 38:4-7.

7. Duzu a yɛbahola yɛaye Gyihova ayɛlɛ wɔ nwo a?

⁷ Saa yɛdayɛ noko yɛlɛyɛ asɔne a, yɛbahola yɛaye Gyihova ayɛlɛ na yɛaha debie mɔɔ maa yɛkulo ye nee mɔɔ maa yɛ nye die ɔ nwo la. Saa ɛlɛsukoa Baebolo ne a, bɔ mɔdenle kɛ ɛbanwu Gyihova subane mɔɔ ɛ nye die nwo kpalɛ la. (Dwobu 37:23; Wlo. 11:33) Akee ka kɛzi ɛte nganeɛ wɔ ye subane zɔhane mɔ anwo la anwo edwɛkɛ kile ye. Eza yɛbahola yɛaye Gyihova ayɛlɛ kɛ ɔboa yɛdayɛ nee yɛ sunsum nu abusua ne amuala la. Dahuu ɔnea yɛ yɛɛ ɔbɔ yɛ nwo bane.​—1 Sa. 1:27; 2:1, 2.

8. Ninyɛne mɔɔ ɔti yɛyɛ Gyihova mo la bie mɔ a le boni? (1 Tɛsalonaekama 5:18)

⁸ Yɛ Gyihova mo. Yɛlɛ ninyɛne dɔɔnwo mɔɔ ɔti ɔwɔ kɛ yɛyɛ Gyihova mo wɔ yɛ asɔneyɛlɛ nu a. (Kenga 1 Tɛsalonaekama 5:18.) Yɛbahola yɛayɛ ye mo wɔ debie kpalɛ biala mɔɔ yɛlɛ la anwo ɔluakɛ ahyɛlɛdeɛ kpalɛ biala vi ye ɛkɛ. (Gye. 1:17) Kɛ neazo la, yɛbahola yɛayɛ ye mo wɔ yɛ azɛlɛ kɛnlɛma ye yɛɛ ninyɛne mɔɔ yɛ nwanwane mɔɔ yebɔ la anwo. Eza yɛbahola yɛayɛ ye mo wɔ yɛ ngoane, yɛ abusua, yɛ gɔnwo mɔ nee yɛ anyelazo ne anwo. Yɛɛ yɛkulo kɛ yɛyɛ Gyihova mo kɛ yemaa yɛ adenle yemaa yɛ nee ye ɛnyia agɔnwolɛvalɛ kpalɛ la.

9. Duzu ati a ɔhyia kɛ yɛkile ninyɛne mɔɔ Gyihova ɛyɛ ɛmaa yɛ la anwo anyezɔlɛ a?

⁹ Bie a ɔbahyia kɛ yɛbɔ mɔdenle kpalɛ yɛdwenledwenle deɛmɔti ɔwɔ kɛ yɛdayɛ mumua ne yɛkile mɔɔ Gyihova ɛyɛ ɛmaa yɛ la anwo anyezɔlɛ la anwo. Yɛde ewiade mɔɔ menli le boniayɛ la anu. Menli ta fa bɛ adwenle sie ninyɛne mɔɔ bɛkpondɛ la ala azo na bɛndwenle mɔɔ bɛbahola bɛayɛ bɛahile ninyɛne mɔɔ bɛ sa ka ye la anwo anyezɔlɛ la anwo. Saa yɛbɔ ɔ bo yɛsukoa subane zɔhane a, yɛ asɔneyɛlɛ bayɛ debie ɛbizalɛ ala. Amaa ɛhye bie ando yɛ la, ɔwɔ kɛ yɛkɔ zo yɛkile anyezɔlɛ wɔ mɔɔ Gyihova ɛyɛ ɛmaa yɛ la amuala anwo.​—Luku 6:45.

10. Kɛzi anyezɔlɛ mɔɔ adiema raalɛ bie lale ye ali la boale ye maanle ɔgyinlanle kpundii ɛ? (Eza nea nvoninli ne.)

¹⁰ Saa yɛda anyezɔlɛ ali a, ɔkola ɔboa yɛ ɔmaa yɛgyinla ngyegyelɛ nloa. Suzu adiema raalɛ Kyung-sook anwubielɛ ne mɔɔ wɔ January 15, 2015, Ɛzinzalɛ Arane ne anu la anwo. Bɛnwunle kɛ kansa ɛdidi ye ɛvovoa ne. Ɔhanle kɛ: “Anwodolɛ ɛhye hanle me kpalɛ. Mendele nganeɛ kɛ mewie bɔkɔɔ na me ahonle dule.” Duzu a boale ye ɔmaanle ɔgyinlanle ɔ nloa a? Ɔhanle kɛ nɔsolɛ biala kolaa na yeala la, ɔkɔ ye sua ne anwuma na ɔka ninyɛne nnu mɔɔ ɔ nye liele nwo wɔ kenle zɔhane la anwo edwɛkɛ wɔ ye asɔneyɛlɛ nu. Ɛhye  maanle ye adwenleadwenle zo dele na ɔlale ɛlɔlɛ mɔɔ ɔlɛ ɔmaa Gyihova la ali. Ɔnwunle kɛzi Gyihova maa ye azonvolɛ nɔhavoma anwosesebɛ wɔ tɛnlabelɛ mɔɔ anu yɛ se la anu la yɛɛ ɔranwunle kɛ yɛnyia nyilalɛ dɔɔnwo wɔ yɛ ɛbɛlabɔlɛ nu yɛtɛla sɔnea mɔɔ yɛyia la. Saa yɛlɛyia sɔnea bɔbɔ a, yɛlɛ ninyɛne dɔɔnwo mɔɔ yɛbahola yɛagyinla zo yɛayɛ Gyihova mo kɛ mɔɔ Kyung-sook yɛle la. Saa yɛmaa ɔnwu ye wɔ yɛ asɔneyɛlɛ nu kɛ yɛ nye sɔ mɔɔ ɔyɛ ɔmaa yɛ la a, ɔbahola yeaboa yɛ yeamaa yɛagyinla kpundii na yɛazie yɛ nwo dii.

11. Mɔɔ Gyisɛse ziale hɔle anwuma la, duzu ati a ɛnee ye ɛdoavolɛma ne hyia akɛnrasesebɛ a?

¹¹ Sɛlɛ Gyihova kɛ ɔmaa wɔ akɛnrasesebɛ wɔ ɛzonlenlɛ gyima ne anu. Mɔɔ ɔka ekyii Gyisɛse sia kɔ anwuma la, ɔhakyele ye ɛdoavolɛma ne gyima mɔɔ bɛvale bɛmaanle bɛ kɛ bɛli ɔ nwo daselɛ ‘wɔ Gyɛlusalɛm nee Dwudiya nee Samɛlea amuala, bɛhɔdwu azɛlɛ ye azo ɛleka biala’ la. (Gyi. 1:8; Luku 24:46-48) Noko yeangyɛ biala, Dwuu mgbanyima ne mɔ hyele ɛzoanvolɛ Pita nee Dwɔn hɔle Sanhedelin ne anyunlu na bɛhanle bɛhilele mrenyia nɔhavoma ɛhye mɔ kɛ bɛgyakyi edwɛkpa ne nolobɔlɛ, bɛnwunlonwunlanle bɛ bɔbɔ. (Gyi. 4:18, 21) Duzu a Pita nee Dwɔn yɛle a?

12. Kɛ mɔɔ Gyima ne 4:29, 31 kile la, duzu a ɛdoavolɛma ne yɛle a?

¹² Mɔɔ Pita nee Dwɔn bua Dwuu ɛzonlenlɛ nu mgbanyima ne mɔ wɔ bɛ ɛnwunlonwunlanlɛ ne anwo la, bɛhanle kɛ: “Saa ɔle kpalɛ wɔ Nyamenle anyunlu kɛ yɛkɛdie bɛ na tɛ Nyamenle a, ɛnee bɛdabɛ bɛbua. Na yɛmɛ, yɛnrɛhola yɛnrɛgyakyi ninyɛne mɔɔ yɛnwu ye nee mɔɔ yɛde la anwo edwɛkɛ ɛhanlɛ.” (Gyi. 4:19, 20) Mɔɔ bɛgyakyile Pita nee Dwɔn la, ɛzoanvolɛma ne maanle bɛ ne zo yɛle Gyihova ɛhulolɛdeɛ ɛyɛlɛ nwo asɔne. Bɛyɛle asɔne kɛ: “Maa wɔ ngɛkɛlɛ ɛhɔ zo ɛva akɛnrazilɛ ɛha wɔ edwɛkɛ ne.” Gyihova buale zɔhane asɔne ne mɔɔ bɛvile bɛ ahonle nu bɛyɛle la.​—Kenga Gyima ne 4:29, 31.

13. Duzu a yɛsukoa yɛfi Jin-hyuk neazo ne anu a?

¹³ Saa arane mgbanyima ka kɛ yɛgyakyi edwɛkɛhanlɛ gyima ne bɔbɔ na yɛkɔ zo yɛka a, ɛnee yɛlɛsukoa ɛdoavolɛma ne. Suzu adiema nrenyia Jin-hyuk mɔɔ kɛmɔ ɔngyinla afoa biala la ati bɛdole ye efiade la neazo ne anwo. Mɔɔ ɔla efiade la, bɛmaanle ɔnleanle pilizama bie mɔɔ bɛ ngomekye bɛla efiade sua ko anu la bie mɔ anwo zo, noko ninyɛne mɔɔ ɛnee bɛhyia nwolɛ la ala a bɛmaanle ye adenle kɛ ɔwɔ kɛ ɔ nee bɛ ka nwolɛ edwɛkɛ a na tɛ Baebolo ne ɔ. Ɔyɛle asɔne kɛ Gyihova ɛmaa ye akɛnrasesebɛ na ɔmaa ɔ nye ɛla ɛkɛ amaa ɔnyia nwolɛ adenle biala a yeahola yeaha nɔhalɛ ne anwo edwɛkɛ. (Gyi. 5:29) Ɔhanle kɛ: “Gyihova buale me asɔneyɛlɛ ne na ɔmaanle me akɛnrasesebɛ nee nrɛlɛbɛ ɔmaanle membɔle Baebolo ɛzukoalɛ mɔɔ mefa mitini nnu meyɛ la dɔɔnwo abo wɔ efiade nlenkɛ ne mɔ anloa. Akee ɔdwu nɔsolɛ a mekɛlɛ ngɛlata mɔɔ mebava meamaa menli mɔɔ gua efiade ɛkɛ ne la.” Yɛdayɛ noko yɛbahola yɛanyia anwodozo kɛ, Gyihova baboa yɛ yeamaa yɛawie yɛ ɛzonlenlɛ gyima ne. Kɛ mɔɔ Jin-hyuk yɛle la, yɛbahola yɛazɛlɛ Gyihova kɛ ɔmaa yɛ akɛnrasesebɛ nee nrɛlɛbɛ.

14. Saa yɛlɛyia ngyegyelɛ a, duzu a bahola aboa yɛ a? (Edwɛne 37:3, 5)

¹⁴ Sɛlɛ Gyihova kɛ ɔboa wɔ ɔmaa ɛgyinla ngyegyelɛ nloa. Ɔlua kpɔkɛdelɛ, nganeɛdelɛ nu ngyegyelɛ, yɛ kulovolɛ bie ewule, abusua tɛnlabelɛ bie mɔɔ anu yɛ se, kpɔdekpɔdeyɛlɛ anzɛɛ ngyegyelɛ gyɛne ti, yɛ nuhua dɔɔnwo nwu amaneɛ. Yɛɛ ninyɛne le kɛ ewulenzane nee konle konle maa ngyegyelɛ ɛhye mɔ anu  dɔɔnwo anloa ɛgyinlanlɛ yɛ se kpalɛ. Ka wɔ ahonle nu edwɛkɛ kile Gyihova. Ka wɔ tɛnlabelɛ ne anwo edwɛkɛ kile ye kɛ mɔɔ ɛka wɔahile ɛ gɔnwo kpalɛ bie a ɛbaha ye ala la. Nyia anwodozo kɛ Gyihova ‘bali amaa wɔ.’​—Kenga Edwɛne 37:3, 5.

15. Kɛzi asɔneyɛlɛ bahola aboa yɛ yeamaa ‘yɛagyinla kpundii wɔ anwongyelelɛ nu’ ɛ Maa neazo.

¹⁵ Saa yɛyɛ asɔne dahuu a, ɔbaboa yɛ yeamaa ‘yɛagyinla kpundii wɔ anwongyelelɛ nu.’ (Wlo. 12:12) Gyihova ze ngyegyelɛ mɔɔ ye azonvolɛ ɛlɛyia la​—“ɔtie bɛ ɛzunlɛ.” (Edw. 145:18, 19) Adekpakyelɛnli bie mɔɔ bɛfɛlɛ ye Kristie mɔɔ yeli ɛvolɛ 29 la nwunle kɛ ɛhye le nɔhalɛ. Arɛlevilɛ nu ala, ɔ nwo bɔle ɔ bo kɛ ɔtoto ye mgbole bie. Ɛhye maanle ɔnyianle adwenle nu ngyegyelɛ mɔɔ anloa yɛ se. Nzinlii ɔdele kɛ ye mame ɛnyia ewule bie mɔɔ bahola ahu ye la. Kristie hanle kɛ: “Menzɛlɛle Gyihova ɛsesebɛ kɛ ɔmaa me anwosesebɛ mɔɔ mehyia nwo kenle ko biala la. Membɔle mɔdenle kɛ mebayɛ sunsum nu ninyɛne mɔɔ meyɛ ye dahuu mɔɔ bie a le debiezukoalɛ ɛhɔlɛ nee me ti anwo debiezukoalɛ la.” Ɔdoale zolɛ kɛ: “Asɔneyɛlɛ boale me maanle mengyinlanle ngyegyelɛ ɛhye mɔ mɔɔ anu yɛ se la anloa. Ɛnee meze kɛ Gyihova baboa me dahuu, na adwenle ɛhye mɔɔ menyianle la kyekyele me rɛle kpalɛ. Me anwodolɛ ne angɔ ɛkɛ ne ala ɛdeɛ, noko Gyihova buale me asɔneyɛlɛ ne na ɔmaanle me kunlu dwole me nwo na menziele me nwo dii.” Bɛmmamaa yɛ rɛle fi ye ɛlɛ kɛ “Gyihova ze kɛzi ɔdie menli mɔɔ sonle ye la ɔfi sɔnea nu” la.​—2 Pita 2:9.

16. Duzu ati a yɛhyia Gyihova moalɛ amaa yɛaho yɛatia sɔnea ɛ?

¹⁶ Sɛlɛ Gyihova kɛ ɔboa wɔ ɔmaa ɛho ɛtia sɔnea. Kɛmɔ yɛnli munli la ati, ɔwɔ kɛ dahuu yɛko yɛtia sɔnea mɔɔ bamaa yɛayɛ ɛtane la. Seetan ɛlɛyɛ biala mɔɔ ɔbahola la kɛ ɔmaa konle zɔhane anu ayɛ se kpalɛ amaa yɛ. Adenle ko mɔɔ ɔdua zo kɛ ɔsɛkye yɛ adwenle la a le anyelielɛ ninyɛne mɔɔ ɛnle kpalɛ la. Anyelielɛ ninyɛne ɛhye mɔ bahola amaa yɛava ninyɛne  mɔɔ anwo ɛnde la yɛazie yɛ adwenle nu na ɔnrɛmaa yɛ nwo ɛnrɛde wɔ Gyihova anye zo yɛɛ ɔbahola yeamaa yɛayɛ ɛtane kpole.​—Maake 7:21-23; Gye. 1:14, 15.

17. Saa yɛyɛ asɔne kɛ Gyihova mmamaa yɛkɔ sɔnea nu a, duzu bieko a ɔwɔ kɛ yɛyɛ a? (Eza nea nvoninli ne.)

¹⁷ Amaa yɛali sɔnea mɔɔ ɔbahola yeamaa yɛayɛ ɛtane la azo la, yɛhyia Gyihova moalɛ. Gyisɛse vale nzɛlɛlɛ ɛhye mɔ bokale ye asɔneyɛlɛ nwo neazo ne anwo: “Mmafa yɛ ɛkɔ sɔnea nu, emomu die yɛ fi amumuyɛnli ne asa anu.” (Mat. 6:13) Gyihova kulo kɛ ɔboa yɛ noko ɔwɔ kɛ yɛsɛlɛ ye kɛ ɔboa yɛ. Eza ɔwɔ kɛ yɛyɛ ninyɛne mɔɔ ɔ nee yɛ asɔneyɛlɛ ne kɔ la. Ɔwɔ kɛ yɛbɔ mɔdenle yɛyɛ biala mɔɔ yɛbahola la kɛ yɛnrɛgenga anzɛɛ yɛnrɛdie debie mɔɔ bamaa yɛanyia adwenle mɔɔ ɛndenrɛ mɔɔ ɛbu wɔ Seetan ewiade ne anu la. (Edw. 97:10) Saa yɛsukoa Baebolo ne a, yɛbahola yɛava ninyɛne mɔɔ anwo te la yɛazie yɛ adwenle nu. Eza saa yɛkɔ debiezukoalɛ na yɛfa yɛ nwo yɛwula ɛzonlenlɛ gyima ne anu a, ɔbabɔ yɛ adwenle ne anwo bane. Gyihova noko ɛbɔ ɛwɔkɛ kɛ ɔnrɛmaa bɛnrɛzɔ yɛ bɛnrɛnlea bɛnrɛdɛla mɔɔ yɛkɛhola ɔ nloa gyinla la.​—1 Kɔl. 10:12, 13.

18. Mɔɔ fale asɔneyɛlɛ nwo la, duzu a ɔwɔ kɛ yɛ muala yɛyɛ a?

¹⁸ Mekɛ ɛhye a ɔwɔ kɛ yɛ nuhua ko biala yɛ asɔne dɔɔnwo kpalɛ a amaa yeahɔ zo yeali nɔhalɛ yeamaa Gyihova wɔ awieleɛ mekɛ ɛhye mɔɔ anu yɛ se la anu. Ye mekɛ sie ahane kenle ko biala fi wɔ ahonle nu yɛ asɔne. Ye Gyihova ayɛlɛ na yɛ ye mo wɔ mɔɔ ɔyɛ la amuala anwo. Gyihova kulo kɛ ‘yɛka yɛ ahonle nu edwɛkɛ yɛkile ye.’ (Edw. 62:8) Sɛlɛ ye kɛ ɔboa wɔ ɔmaa ɛnyia akɛnrasesebɛ ɛyɛ ye ɛzonlenlɛ gyima ne. Sɛlɛ ye kɛ ɔboa wɔ ɔmaa ɛgyinla ngyegyelɛ biala anloa na ɛho ɛtia sɔnea biala mɔɔ bie a ɛbayia la. Mmamaa debie anzɛɛ awie biala si wɔ adenle kɛ ɛbayɛ asɔne dahuu. Noko kɛzi Gyihova bua yɛ asɔneyɛlɛ ɛ? Yɛbazuzu kpuya ɛhye mɔɔ anwo hyia la anwo wɔ edwɛkɛ bieko anu.