1-2. Kpuya boni a wɔannea a yɛbabiza yɛ nwo wɔ yɛ asɔneyɛlɛ nwo a?

 ASOO wɔbiza ɛ nwo ɛlɛ kɛ, Gyihova bua me asɔneyɛlɛ ɔ? Saa wɔbiza bie ɛlɛ a, ɛnee tɛ ɛ ngomekye ɔ. Mediema dɔɔnwo bizale kpuya ɛhye bie, titili wɔ mekɛ mɔɔ ɛnee bɛlɛyia ngyegyelɛ la. Saa yɛdayɛ noko yɛlɛyia ngyegyelɛ a, bie a ɔbayɛ se kɛ yɛbanwu kɛzi Gyihova ɛlɛbua yɛ asɔneyɛlɛ ne mɔ la.

² Maa yɛzuzu deɛmɔti yɛbahola yɛanyia anwodozo kɛ Gyihova bua ye azonvolɛ asɔneyɛlɛ la anwo. (1 Dwɔn 5:15) Eza yɛbazuzu kpuya ɛhye mɔ anwo: Duzu ati a ɔdwu mekɛ ne bie a ɛnee yeyɛ kɛ asɛɛ Gyihova ɛmbua yɛ asɔneyɛlɛ a? Ndenle boni mɔ a Gyihova dua zo bua asɔneyɛlɛ ɛnɛ a?

3. Duzu ati a Gyihova kulo kɛ yɛfa yɛ asɔneyɛlɛ yɛto ɔ nyunlu a?

³ Ngɛlɛlera ne maa yɛnyia anwodozo kɛ Gyihova kulo yɛ kpole kpalɛ yɛɛ yɛsonle bolɛ yɛmaa ye. (Hagae 2:7; 1 Dwɔn 4:10) Ɛhye ati a ɔse yɛyɛ asɔne yɛkpondɛ ye moalɛ la. (1 Pita 5:6, 7) Ɔkulo kɛ ɔboa yɛ ɔmaa yɛbikye ye kpalɛ na yɛgyinla ngyegyelɛ mɔɔ yɛlɛyia la anloa.

4. Kɛzi yɛkola yɛnwu kɛ Gyihova bua ye azonvolɛ asɔneyɛlɛ ɛ? (Eza nea nvoninli ne.)

⁴ Yɛta yɛkenga wɔ Baebolo ne anu kɛ Gyihova buale ye azonvolɛ asɔneyɛlɛ. Nwolɛ neazo bie ɛra wɔ adwenle nu ɔ? Neazo  ko a le Belemgbunli Devidi. Ɔyiale agbɔvolɛ dɔɔnwo mɔɔ bɛ nwo yɛ ɛzulolɛ la wɔ ye ɛbɛlabɔlɛ nu, na fane dɔɔnwo ne ala ɔyɛle asɔne ɔkpondɛle moalɛ ɔvile Gyihova ɛkɛ. Kenle ko bie ɔzɛlɛle Gyihova kɛ: “O Gyihova, tie me asɔneyɛlɛ; tie me modolɛ nzɛlɛlɛ. Bua me kɛ mɔɔ wɔ nɔhalɛlilɛ nee wɔ tenleneyɛlɛ ne de la.” (Edw. 143:1) Gyihova buale asɔne mɔɔ Devidi yɛle kɛ ɔlie ye la. (1 Sa. 19:10, 18-20; 2 Sa. 5:17-25) Ɔti Devidi vale anwodozo hanle kɛ: “Gyihova bikye bɛdabɛ mɔɔ bɛfɛlɛ ye la kɔsɔɔti.” Yɛdayɛ noko yɛbahola yɛanyia zɔhane anwodozo ne bie.​—Edw. 145:18.

5. Asoo dahuu a Gyihova tete azonvolɛ nyianle bɛ asɔneyɛlɛ ne mɔ anwo mualɛ kɛ mɔɔ ɛnee bɛ nye la la ɔ? Maa neazo. (Eza nea nvoninli ne.)

⁵ Bie a Gyihova ɛnrɛbua yɛ asɔneyɛlɛ ne kɛ mɔɔ ɛnee yɛ nye la la. Ɛhye bie a dole ɛzoanvolɛ Pɔɔlo la. Ɔzɛlɛle Nyamenle kɛ ɔye debie mɔɔ le kɛ ‘bowule mɔɔ bɛva bɛwula ɔ nwo nane nu’ la. Pɔɔlo yɛle ngyegyelɛ fɔɔnwo ɛhye mɔɔ anu yɛ se la anwo asɔne fane nsa. Asoo Gyihova buale ye? Ɛhɛe, noko tɛ kɛzi ɛnee Pɔɔlo anye la la ɔ. Gyihova anye ngyegyelɛ ne anvi ɛkɛ, emomu ɔmaanle ye tumi mɔɔ ɔhyia nwo amaa yeahɔ zo yeazonle Ye nɔhalɛ nu la.​—2 Kɔl. 12:7-10.

6. Duzu ati a ɔdwu mekɛ ne bie a ɔzɔho kɛ Gyihova ɛmbua yɛ asɔneyɛlɛ a?

⁶ Ɔdwu mekɛ ne bie a, yɛdayɛ noko yɛbanyia mualɛ mɔɔ le ngakyile la. Yɛbahola yɛanyia anwodozo kɛ Gyihova ze adenle kpalɛ mɔɔ ɔbalua zo yeaboa yɛ la. Ɔbahola yeayɛ mɔɔ “ɔtɛla mɔɔ yɛbiza nee mɔɔ yɛdwenle nwo” bɔbɔ la. (Ɛfɛ. 3:20) Ɛhye ati yɛ asɔneyɛlɛ ne mɔ anwo mualɛ ne bahola ara wɔ mekɛ anzɛɛ adenle mɔɔ yɛ nye ɛnla la azo.

7. Duzu ati a bie a ɔbahyia kɛ yɛkakyi debie mɔɔ yɛyɛ nwolɛ asɔne la ɛ? Maa neazo.

⁷ Mekɛ mɔɔ yɛlɛnwu Gyihova ɛhulolɛdeɛ ne kpalɛ la, bie a ɔbahyia kɛ yɛkakyi ninyɛne mɔɔ yɛyɛ nwolɛ asɔne la. Suzu Martin Poetzinger neazo ne anwo. Mɔɔ Adiema Poetzinger gyale la, yeangyɛ bɛhyele ye bɛhɔdole ye Nazi efiade. Mɔlebɛbo ne, ɔzɛlɛle Gyihova kɛ ɔye ye ɔvi efiade ɛkɛ amaa yeahola yeanlea ɔ ye na yeadoa ye edwɛkɛhanlɛ gyima ne azo. Noko wɔ dapɛne nwiɔ anzi, yeannwu debie biala mɔɔ kile kɛ Gyihova bamaa bɛaye ye a. Ɔti ɔbɔle ɔ bo ɔyɛle asɔne kɛ: “Gyihova mesɛlɛ wɔ, kile me mɔɔ ɛkulo kɛ meyɛ la.” Akee ɔbɔle ɔ bo kɛ ɔdwenledwenle mɔɔ mediema mɔɔ wɔ efiade ɛkɛ ne la ɛlɛkɔ nu la anwo. Bɛ nuhua dɔɔnwo arɛle bɔle kpalɛ ɔlua bɛ ye mɔ  nee bɛ mra ati. Akee Adiema Poetzinger yɛle asɔne kɛ: “Gyihova, meyɛ wɔ mo wɔ gyimalilɛ fofolɛ mɔɔ wɔva wɔmaa me la anwo. Boa me maa memaa me mediema ne mɔ anwosesebɛ.” Ɔlile ɛvolɛ ngɔnla wɔ efiade na ɔvale ɔmaanle ɔ mediema ne mɔ anwosesebɛ!

8. Saa yɛlɛyɛ asɔne a, debie mɔɔ anwo hyia la boni a ɔwɔ kɛ yɛkakye a?

⁸ Ɔwɔ kɛ yɛkakye kɛ Gyihova lɛ bodane, na ɔbamaa yeara nu wɔ ye mekɛ mɔɔ yehyehyɛ la anu a. Bodane ne bie a le ngyegyelɛ kɔsɔɔti mɔɔ maa alesama nwu amaneɛ ɛnɛ, mɔɔ bie a le esiane, anwodolɛ yɛɛ ewule mɔɔ ɔbaye yeavi ɛkɛ ne bɔkɔɔ la. Gyihova balua ye Belemgbunlililɛ ne azo amaa ye bodane ne ara nu. (Dan. 2:44; Yek. 21:3, 4) Noko kolaa na zɔhane mekɛ ne ara la, Gyihova ɛmaa Seetan adenle kɛ ɔnlea ewiade ne azo. b (Dwɔn 12:31; Yek. 12:9) Saa Gyihova di alesama ngyegyelɛ nwo gyima kɛkala a, ɔbamaa yeayɛ kɛ asɛɛ Seetan ɛlɛnea ewiade ne azo kpalɛ. Ɔti kɛmɔ ɔwɔ kɛ yɛkendɛ yemaa Gyihova di ye ɛwɔkɛ bie mɔ azo la ati, yemɔ ɛngile kɛ ɔnrɛboa yɛ. Maa yɛzuzu ndenle bie mɔ mɔɔ Gyihova dua zo boa yɛ la anwo.

9. Saa ɔhyia kɛ yɛsi kpɔkɛ bie a, kɛzi Gyihova bahola aboa yɛ ɛ? Maa neazo.

⁹ Ɔmaa yɛ nrɛlɛbɛ. Gyihova ɛbɔ ɛwɔkɛ kɛ ɔbamaa yɛ nrɛlɛbɛ mɔɔ yɛhyia amaa yɛahola yɛasisi kpɔkɛ kpalɛ la. Saa yɛlɛsi kpɔkɛ mɔɔ ɔbaha yɛ wɔ yɛ ɛbɛlabɔlɛ kɔsɔɔti anu, mɔɔ bie a le kɛ yɛbali belazinli anzɛɛ yɛbagya la a, yɛhyia nrɛlɛbɛ mɔɔ vi Nyamenle ɛkɛ la. (Gye. 1:5) Suzu adiema raalɛ Maria mɔɔ ɔtɛgyale la anwubielɛ ne anwo. c Ɛnee ɔlɛfa anyelielɛ yeayɛ dahuu adekpakyelɛ gyima ne yɛɛ ɔyiale adiema nrenyia bie a. Ɔhanle kɛ: “Mɔɔ yɛ agɔnwolɛvalɛ ne anu ɛlɛmia la, ɛnee yɛ nuhua biala anye ɛlɛdie ɔ gɔnwo anwo kpalɛ. Ɛnee meze kɛ ɔwɔ kɛ mesi kpɔkɛ. Menvale mekɛ tendenle menyɛle edwɛkɛ ne anwo asɔne ɛsesebɛ. Ɛnee mehyia Gyihova adehilelɛ noko ɛnee eza meze kɛ Gyihova ɛnrɛzi kpɔkɛ ne ɛnrɛmaa me.” Ɔte nganeɛ kɛ Gyihova buale asɔne mɔɔ ɔyɛle kɛ ɔmaa ye nrɛlɛbɛ la. Adenle boni azo? Mɔɔ ɔyɛle neɛnleanu wɔ yɛ mbuluku ne mɔ anu la, ɔnyianle edwɛkɛ ngakyile mɔɔ buale ye kpuya ne mɔ fɔɔnwo la. Eza ɔdiele folɛ mɔɔ nrɛlɛbɛ wɔ nu mɔɔ ye mame mɔɔ di nɔhalɛ la dule ye la. Zɔhane folɛdulɛ ne boale Maria maanle ɔdwenledwenlenle kɛzi ɛnee ɔte nganeɛ la anwo. Ɔti ɔholale ɔzile kpɔkɛ mɔɔ nrɛlɛbɛ wɔ nu la.

10. Kɛ mɔɔ Felepaema 4:13 kile la, duzu a Gyihova bayɛ aboa ye azonvolɛ a? Maa neazo. (Eza nea nvoninli ne.)

¹⁰ Ɔmaa yɛ tumi ɔmaa yɛgyinla kpundii. Gyihova bamaa yɛ tumi mɔɔ yɛhyia amaa yɛagyinla  yɛ sɔnea ne mɔ anloa la kɛ mɔɔ ɔyɛle ɔmaanle ɛzoanvolɛ Pɔɔlo la. (Kenga Felepaema 4:13.) Nea kɛzi Gyihova boale adiema Benjamin ɔmaanle ɔgyinlanle tɛnlabelɛ mɔɔ anu yɛ se la anloa la. Benjamin vale ye mgbavolɛ nu mekɛ ne dɔɔnwo ɔ nee ye abusua ne dɛnlanle tutanema azokoɛleɛ ngakyile wɔ Africa. Ɔhanle kɛ: “Menyɛle asɔne dahuu menzɛlɛle Gyihova kɛ ɔmaa me tumi ɔmaa menyɛ mɔɔ sɔ ɔ nye la. Gyihova buale me asɔneyɛlɛ ne ɔlua me nzo nu mɔɔ ɔmaanle ɔdwole me, akɛnrasesebɛ mɔɔ menyianle mengɔle zo menganle edwɛkɛ ne nee yɛ mbuluku ne mɔ mɔɔ ɔmaanle me nwo yɛle se wɔ sunsum nu la azo.” Eza ɔhanle kɛ: “Mediema gyɛne anwubielɛ mɔɔ mengengale na menwunle kɛzi Gyihova boale bɛ ɔmaanle bɛgyinlanle kpundii la maanle membɔle kpɔkɛ ɛsesebɛ kɛ mebahɔ zo meali nɔhalɛ.”

11-12. Kɛzi Gyihova bahola alua yɛ sunsum nu abusua ne anwo zo abua yɛ asɔneyɛlɛ ɛ? (Eza nea nvoninli ne.)

¹¹ Ɔdua yɛ sunsum nu abusua ne anwo zo. Nɔe ne mɔɔ aleɛ kye a Gyisɛse bava ye ngoane abɔ afɔle la, ɔyɛle asɔne ɛsesebɛ. Ɔzɛlɛle Gyihova kɛ ɔmmamaa awie mɔ bu ye kɛ ɔka munzule edwɛkɛ na bɛtendɛ bɛtia ye wɔ nwolɛ. Gyihova anyɛ ye zɔ, emomu ɔboale Gyisɛse ɔlua ɔ mediema anwumabɔvolɛ ne mɔ ko mɔɔ ɔzoanle ye ɔmaanle ɔramaanle ye anwosesebɛ la azo. (Luku 22:42, 43) Eza Gyihova bahola amaa yɛ mediema ne mɔ bie avɛlɛ yɛ anzɛɛ arakpɔla yɛ amaa yɛ anwosesebɛ. Yɛ muala yɛbahola yɛakpondɛ adenle yɛalua zo yɛaha “edwɛkɛ kpalɛ” yɛahile yɛ mediema diedima.​—Mrɛ. 12:25.

¹² Suzu adiema raalɛ Miriam anwubielɛ ne anwo. Mɔɔ ɔ hu wule la, yeangyɛ ɔ nwo yɛle ye koonwu. Ɔdele nganeɛ kɛ ɔnlɛ anyelazo biala yɛɛ adwenleadwenle dɔle ɔ nwo. Ɛzulɛ ala a ɛnee ɔsu a, na ɛnee ɔhyia awie mɔɔ ɔ nee ye badendɛ a. Ɔhanle kɛ: “Mennyia anwosesebɛ meanvɛlɛ awie biala ɔti menyɛle asɔne. Mɔɔ megua zo melɛsu melɛyɛ asɔne la, awie vɛlɛle me fonu ne azo. Me gɔnwo asafo nu kpanyinli bie ɔ.” Zɔhane asafo nu kpanyinli ne nee ɔ ye kyekyele Miriam arɛle. Ɔdie ɔdi kɛ Gyihova a hanle adiema ɛhye ɔmaanle ɔvɛlɛle a.

13. Maa neazo mɔɔ kile kɛzi Gyihova dua bɛdabɛ mɔɔ bɛnzonle ye la anwo zo bua yɛ asɔneyɛlɛ la.

 ¹³ Bie a ɔbalua bɛdabɛ mɔɔ bɛnzonle ye la anwo zo. (Mrɛ. 21:1) Ɔdwu mekɛ ne bie a, Gyihova maa bɛdabɛ mɔɔ bɛnzonle ye la boa ye menli ne ɔfa ɔbua bɛ asɔneyɛlɛ. Kɛ neazo la, ɔmaanle Belemgbunli Atazɛzɛse maanle Nihɛmaya adenle kɛ ɔzia ɔhɔ Gyɛlusalɛm amaa yeaboa yeamaa bɛakyekye suakpole ne bieko. (Nih. 2:3-6) Ɛnɛ noko saa yɛhyia moalɛ a, Gyihova bahola aha menli mɔɔ bɛnzonle ye bɔbɔ la yeamaa bɛaboa yɛ.

14. Duzu a ɛ nye liele nwo wɔ Soo Hing anwubielɛ ne anwo a? (Eza nea nvoninli ne.)

¹⁴ Adiema raalɛ Soo Hing dele nganeɛ kɛ Gyihova luale ye dɔketa ne anwo zo boale ye. Ɔ ra nrenyia nyianle adwenle nu ngyegyelɛ ngakyile. Mɔɔ ɔ ra nrenyia ne yiale esiane kpole bie la, ɛnee ɔwɔ kɛ Soo Hing nee ɔ hu gyakyi bɛ gyima na bɛnea ye. Ɛhye maanle bɛ nwo hyelele bɛ wɔ ezukoa afoa nu. Soo Hing hanle kɛ ɔdele nganeɛ kɛ ɔnrɛhola ngyegyelɛ ne anloa gyinla bieko. Ɔhanle ye ahonle nu edwɛkɛ ɔhilele Gyihova na ɔzɛlɛle ye kɛ ɔboa ye. Dɔketa ne zile kpɔkɛ kɛ ɔbakpondɛ adenle yealua zo yeaboa Soo Hing nee ye abusua ne. Ɛhye maanle bɛnyianle moalɛ bɛvile arane ne ɛkɛ na bɛnyianle sua mɔɔ ye bolɛ ɛnyɛ se la bɛdɛnlanle nuhua. Ɛhye anzi Soo Hing hanle kɛ: “Yɛnwunle Gyihova asa wɔ edwɛkɛ ɛhye anu. Amgba ɔle ‘asɔneyɛlɛ Tievolɛ.’”​—Edw. 65:2.

15. Duzu a boale adiema raalɛ bie ɔmaanle ɔnwunle kɛ Gyihova ɛlɛbua ye asɔneyɛlɛ ne a?

¹⁵ Gyihova ɛnda ɛmbua yɛ asɔneyɛlɛ ne wɔ nwanwane adenle bie azo. Noko mualɛ mɔɔ yɛnyia la a le mɔɔ yɛhyia nwo amaa yɛahɔ zo yɛali nɔhalɛ yɛamaa yɛ anwuma Selɛ ne a. Ɔti anrɛɛ nea ndenle mɔɔ Gyihova dua zo bua wɔ asɔneyɛlɛ ne mɔ la. Adiema raalɛ Yoko dele nganeɛ kɛ Gyihova ɛmbua ye asɔneyɛlɛ, noko akee ɔbɔle ɔ bo kɛ ɔkɛlɛ ninyɛne mɔɔ ɔzɛlɛle Gyihova la. Mekɛ bie anzi, ɔhɔnleanle ye buluku ne anu, na ɔnwunle kɛ Gyihova ɛbua ye asɔneyɛlɛ ne mɔ dɔɔnwo, ɛnee ɔ rɛle ɛvi bie mɔ bɔbɔ. Ɔyɛ a ɔwɔ kɛ yɛgyinla na yɛdwenledwenle kɛzi Gyihova ɛlɛbua yɛ asɔneyɛlɛ ne mɔ la anwo.​—Edw. 66:19, 20.

16. Mɔɔ fale yɛ asɔneyɛlɛ nwo la, kɛ ɔkɛyɛ na yɛahile kɛ yɛlɛ diedi ɛ? (Hibuluma 11:6)

¹⁶ Tɛ mekɛ mɔɔ yɛlɛyɛ asɔne la angomekye a kile kɛ yɛlɛ diedi a, emomu saa yɛdie adenle  biala mɔɔ Gyihova dua zo bua yɛ asɔneyɛlɛ la yɛto nu a. (Kenga Hibuluma 11:6.) Fa Mike nee ɔ ye Chrissy kɛ neazo. Ɛnee ɔle bɛ bodane kɛ bɛbayɛ gyima wɔ Bɛtɛle. Mike hanle kɛ: “Kɛ agyalɛma la, yɛbɔle nu yɛbizale nwolɛ adenle ɛhye wɔ ɛvolɛ dɔɔnwo anu yɛɛ yɛyɛle nwolɛ asɔne fane dɔɔnwo noko bɛanvɛlɛ yɛ ɛlɛ.” Mike nee Chrissy hɔle zo nyianle anwodozo kɛ Gyihova a ze adenle kpalɛ mɔɔ ɔbalua zo yeava bɛ yeali gyima wɔ ye ɛzonlenlɛ nu a. Bɛhɔle zo bɛyɛle biala mɔɔ bɛbahola la, bɛyɛle dahuu adekpakyelɛ gyima ne wɔ ɛleka mɔɔ bɛhyia moalɛ kpole la na bɛboale teokelase azua ɛsisilɛ gyima ne. Ɛnɛ, bɛwɔ neavolɛ adenduvo gyima ne anu. Mike hanle kɛ: “Tɛ dahuu a Gyihova buale yɛ asɔneyɛlɛ ne mɔ kɛ mɔɔ ɛnee yɛkpondɛ la a, noko yebua ɔ muala yɛɛ ɔbua ye wɔ ndenle kpalɛ mɔɔ tɛla kɛzi yɛzuzule bɔbɔ la azo.”

17-18. Kɛ mɔɔ Edwɛne 86:6, 7 kile la, anwodozo boni a yɛbahola yɛanyia a?

¹⁷ Kenga Edwɛne 86:6, 7. Edwɛndolɛnli Devidi nyianle anwodozo kɛ Gyihova diele ye asɔneyɛlɛ yɛɛ ɔbuale. Ɛbahola wɔanyia anwodozo ko ne ala bie. Neazo ngakyile mɔɔ yɛzuzu nwo wɔ edwɛkɛ ɛhye anu la maa yɛnyia anwodozo kɛ, Gyihova bahola amaa yɛ nrɛlɛbɛ nee tumi mɔɔ yɛhyia nwo amaa yɛahola yɛagyinla kpundii la. Ɔbahola yealua yɛ sunsum nu abusua ne anzɛɛ bɛdabɛ mɔɔ bɛnzonle ye kɛkala la bɔbɔ anwo zo yeamaa bɛaboa yɛ wɔ adenle bie azo.

¹⁸ Bie a tɛ dahuu biala a Gyihova babua yɛ asɔneyɛlɛ ne mɔ kɛ mɔɔ yɛkpondɛ la a, noko yɛze ye wienyi kɛ ɔbabua. Ɔbava mɔɔ yɛhyia nwo la yeamaa yɛ wɔ mekɛ mɔɔ yɛhyia nwo la anu. Ɔti kɔ zo fa diedi yɛ asɔne, nyia anwodozo kɛ Gyihova banlea wɔ kɛkala na ‘ɔbamaa tease abɔdeɛ biala anyia mɔɔ ɔkulo la’ wɔ ewiade fofolɛ ne mɔɔ ɛlɛba la anu.​—Edw. 145:16.