1. Duzu a Baebolo ne ka ye wɔ nɔhalɛ ɛhulolɛ nwo a?

 ƐHULOLƐ “senle ne sɔ kpole, Gyaa sendɔlɔra. Azule mɔɔ ɛlɛtu la ɛngola ɛnnua ɛhulolɛ, yɛɛ azule ɛngola ɛnva ye ɛngɔ.” b (Sɔl. 8:6, 7) Nɔhalɛ ɛhulolɛ nwo edwɛkɛ kɛnlɛma boni ɛne! Nɔhalɛ edwɛkɛ bie mɔɔ maa anwosesebɛ la wɔ edwɛkɛ ɛhye anu maa agyalɛma: Bɛbahola bɛanyia ɛhulolɛ mɔɔ anu yɛ se la bɛamaa bɛ nwo.

2. Duzu a ɔwɔ kɛ agyalɛma yɛ amaa bɛ ɛhulolɛ ne anga aze a?

² Saa agyalɛma banyia ɛhulolɛ mɔɔ anu yɛ se la amaa bɛ nwo dahuu a, ɔgyi bɛ nwo zo. Kɛ neazo la, saa senle bie bahɔ zo azɔ a, ɔwɔ kɛ bɛkɔ zo bɛfa ɛyɛne bɛwula nu. Saa bɛammaa bɛ nye angɔ nwo a, ɔbanlu. Zɔhane ala a ɛhulolɛ mɔɔ wɔ nrenyia nee ɔ ye avinli la anu bahola ayɛ se dahuu a​—noko kyesɛ bɛmia bɛ agɔnwolɛvalɛ ne anu. Ɔdwu mekɛ ne bie a, agyalɛma bie mɔ bahola ade nganeɛ kɛ bɛ ɛhulolɛ ne ɛlɛka aze, titili saa bɛlɛyia ezukoa, kpɔkɛdelɛ anzɛɛ ngakula ɛtetelɛ nwo ngyegyelɛ a. Ɔti saa wɔgya a, kɛ ɔkɛyɛ na wɔamaa “Gyaa sendɔlɔra” ne ahɔ zo azɔ wɔ wɔ agyalɛ ne anu ɛ? Wɔ edwɛkɛ ɛhye anu, yɛbazuzu ndenle nsa mɔɔ baboa bɛ yeamaa bɛ agɔnwolɛvalɛ  ne anu amia na bɛ nye alie wɔ bɛ agyalɛ ne anu la anwo. c

3. Saa agyalɛma nee Gyihova lɛ agɔnwolɛvalɛ mɔɔ anu yɛ se a, kɛzi ɔbaboa bɛ yeamaa bɛ ɛhulolɛ ne ahɔ zo azɔ ɛ? (Nolobɔvo 4:12) (Eza nea nvoninli ne.)

³ Amaa “Gyaa sendɔlɔra” ne ahɔ zo azɔ la, ɔwɔ kɛ agyalɛma ne anu biala bɔ mɔdenle kɛ ɔ nee Gyihova agɔnwolɛvalɛ ne anu bamia. Kɛzi ɛhye baboa bɛ agyalɛ ne ɛ? Saa agyalɛma maa bɛ nee bɛ anwuma Selɛ ne agɔnwolɛvalɛ ne kyia bɛ a, ɔbamaa bɛava ye folɛdulɛ bɛali gyima ndɛndɛ na ɛhye bamaa bɛahoati ngyegyelɛ biala mɔɔ bamaa bɛ ɛhulolɛ ne aha aze la, yɛɛ saa bie ba a, ɔbamaa bɛali zo. (Kenga Nolobɔvo 4:12.) Eza menli mɔɔ nee Gyihova lɛ agɔnwolɛvalɛ kpalɛ la bɔ mɔdenle kɛ bɛbazukoa ye na bɛanyia ye subane mɔɔ le kɛ atiakunlukɛnlɛma, abotane yɛɛ ɛtanefakyɛ la bie. (Ɛfɛ. 4:32–5:1) Saa agyalɛma da subane ɛhye mɔ bie ali a, ɔnrɛyɛ se kɛ bɛ ɛhulolɛ ne bayɛ kpole. Adiema raalɛ Lena mɔɔ ɛgya ɛvolɛ mɔɔ bo 25 la hanle kɛ, “Ɔnyɛ se kɛ ɛbahulo awie mɔɔ nee Gyihova lɛ agɔnwolɛvalɛ kpalɛ la na wɔabu ye.”

4. Duzu ati a Gyihova kpale Dwosefi nee Mɛle kɛ bɛyɛ kenle bie Mɛzaya ne awovolɛ a?

⁴ Nea Baebolo nu neazo bie. Mɔɔ ɛnee ɔwɔ kɛ Gyihova kpa agyalɛma mɔɔ bɛbayɛ kenle bie Mɛzaya ne awovolɛ la, Dwosefi nee Mɛle a ɔkpale bɛ ɔvile Devidi abozoamra dɔɔnwo ne anu a. Duzu ati ɔ? Ɛnee bɛ nuhua ko biala nee Gyihova lɛ agɔnwolɛvalɛ kpalɛ yɛɛ ɛnee Gyihova ze kɛ bɛbamaa ɛlɔlɛ mɔɔ bɛlɛ bɛmaa ye la aboa bɛ wɔ bɛ agyalɛ ne anu. Agyalɛma, duzu a bɛbahola bɛazukoa bɛavi Dwosefi nee Mɛle ɛkɛ a?

5. Duzu a kunlima bahola azukoa avi Dwosefi ɛkɛ a?

⁵ Dwosefi vale Gyihova adehilelɛ lile gyima ndɛndɛ na yemɔ maanle ɔyɛle kunli kpalɛ. Yeanyɛ boɛ fee la, wɔ tɛnlabelɛ ngakyile nsa anu, Nyamenle vale adehilelɛ mɔɔ fale ye abusua ne anwo la maanle ye. Wɔ biala anu, ɔyɛle tieyɛ ndɛndɛ, saa bɔbɔ ɛnee ɔwɔ kɛ ɔyɛ nzenzaleɛ mgbole a. (Mat. 1:20, 24; 2:13-15, 19-21) Kɛmɔ Dwosefi lile Nyamenle adehilelɛ zo la ati, ɔbɔle Mɛle anwo bane, ɔboale ye yɛɛ ɔnleanle ye. Nea kɛzi ɔbayɛ kɛ mɔɔ Dwosefi yɛle la maanle Mɛle hulole ye kpole na ɔbule ye kpalɛ a! Kunlima, saa bɛkpondɛ kɛzi bɛbanlea bɛ abusua ne la anwo folɛdulɛ bɛfi Baebolo ne anu a, ɛnee bɛlɛsukoa Dwosefi. d Saa ɛfa folɛdulɛ ɛhye ɛdi gyima, wɔ mekɛ bɔbɔ mɔɔ ɔwɔ kɛ ɛyɛ nzenzaleɛ la a, ɛbahile kɛ ɛkulo ɛ ye na yemɔ bamaa bɛ agyalɛ ne anu amia. Adiema raalɛ bie mɔɔ wɔ Vanuatu mɔɔ ɛgya  ɛvolɛ mɔɔ bo 20 la hanle kɛ: “Saa me hu kpondɛ Gyihova adehilelɛ na ɔfa ɔdi gyima a, ɔmaa mebu ye kpole. Mete nganeɛ kɛ melɛ anwobanebɔlɛ yɛɛ menyia anwodozo wɔ ye kpɔkɛzilɛ ne mɔ anu.”

6. Duzu a yelɛma bahola azukoa avi Mɛle ɛkɛ a?

⁶ Mɛle mumua ne nee Gyihova lɛ agɔnwolɛvalɛ; ɛnee ye diedi ne ɛngyi mɔɔ Dwosefi yɛle la azo. Ɛnee ɔze Ngɛlɛlera ne anu edwɛkɛ kpalɛ. e Eza ɔnyianle mekɛ ɔdwenledwenlenle ninyɛne nwo. (Luku 2:19, 51) Nɔhalɛ nu, Mɛle sunsum nu gyinlabelɛ ne a maanle ɔyɛle yelɛ kpalɛ a. Ɛnɛ, yelɛma dɔɔnwo bɔ mɔdenle kɛ bɛbayɛ mɔɔ Melɛ yɛle la bie. Kɛ neazo la, adiema raalɛ Emiko hanle kɛ: “Mɔɔ metɛgyale la, ɛnee melɛ ngyehyɛleɛ mɔɔ mefa meyɛ sunsum nu ninyɛne a. Noko mɔɔ bɛgyale me la, membanwunle kɛ kɛ mɔɔ me hu a yɛ asɔne na ɔdi yɛ nyunlu wɔ yɛ ɛzonlenlɛ nu la ati, ɛnee dahuu me nye la kɛ ɔbayɛ ninyɛne ɛhye mɔ yeamaa me. Membanwunle kɛ ɔwɔ kɛ medame a memia me nee Gyihova agɔnwolɛvalɛ ne anu a. Ɔti kɛkala, meye mekɛ mesie ahane na me ngomekye meyɛ asɔne, mekenga Ngɛlɛlera ne na medwenledwenle adwenle mɔɔ me Nyamenle ne lɛ wɔ ninyɛne nwo la anwo.” (Gal. 6:5) Yelɛma, saa bɛkɔ zo bɛmia bɛ nee Gyihova agɔnwolɛvalɛ ne anu a, bɛ hu mɔ banyia ninyɛne dɔɔnwo agyinla zo aye bɛ ayɛlɛ na bɛahulo bɛ.​—Mrɛ. 31:30.

7. Duzu a kunli nee yelɛ bahola azukoa avi Dwosefi nee Mɛle ɛkɛ wɔ Gyihova mɔɔ bɛbɔ nu bɛazonle ye la anwo a?

⁷ Dwosefi nee Mɛle noko bɔle nu mianle bɛ nee Gyihova agɔnwolɛvalɛ ne anu. Bɛnwunle kɛzi ɔhyia kɛ bɛbabɔ nu bɛazonle Gyihova kɛ abusua la. (Luku 2:22-24, 41; 4:16) Ɔbayɛ kɛ ɛnee ɔnla aze kɛ bɛbayɛ ye zɔ, titili wɔ mekɛ mɔɔ ɛnee abusua ne ɛlɛyɛ kpole la, noko bɛbɔle bɛ nwo mɔdenle. Ɛhye le neazo kɛnlɛma kpalɛ maa agyalɛma ɛnɛ! Saa bɛlɛ ngakula kɛ Dwosefi nee Mɛle la a, bie a ɔyɛ se kɛ bɛbahɔ debiezukoalɛ anzɛɛ bɛbayɛ ngyehyɛleɛ bɛayɛ abusua ɛzonlenlɛ. Bie noko a ɔbayɛ se kɛ bɛbanyia mekɛ bɛabɔ nu bɛazukoa debie anzɛɛ bɛayɛ asɔne kɛ agyalɛma. Noko bɛhakye kɛ saa bɛbɔ nu bɛsonle Gyihova a, ɔmaa bɛbikye ye yɛɛ bɛdabɛ noko bɛbikye bɛ nwo. Ɔti bɛva Gyihova ɛzonlenlɛ bɛlimoa.

8. Duzu a agyalɛma mɔɔ ɛlɛyia ngyegyelɛ la bahola ayɛ amaa bɛanyia bɛ abusua ɛzonlenlɛ ne azo nvasoɛ kpalɛ a?

⁸ Na saa bɛlɛyia ngyegyelɛ wɔ bɛ agyalɛ ne anu noko ɛ? Bie a bɛ nye ɛnrɛlie nwo kɛ bɛbabɔ nu bɛayɛ abusua ɛzonlenlɛ. Saa ɔle zɔ a, bɛbɔ ɔ bo bɛzuzu debie ekyi bie mɔɔ bɛ mu nwiɔ bɛ nye balie nwo la anwo. Ɛhye bahola amaa bɛ agyalɛ ne anu amia na bɛanyia ɛhulolɛ kɛ bɛbabɔ nu bɛazonle Gyihova kɛ agyalɛma.

9. Duzu ati a ɔwɔ kɛ kunli nee yelɛ nyia mekɛ maa bɛ nwo a?

⁹ Agyalɛma, saa bɛnyia mekɛ bɛmaa bɛ nwo a, bɛ ɛhulolɛ ne bayɛ kpole. Saa bɛyɛ ye zɔ a, ɔbaboa bɛ yeamaa bɛanwu mɔɔ bɛ hu anzɛɛ bɛ ye ɛlɛdwenle nwo nee kɛzi ɔte nganeɛ la. (Gyn. 2:24) Lilia nee Ruslan gyale la, yebo ɛvolɛ 15, noko yɛ mɔɔ bɛnwunle ye wɔ mekɛ mɔɔ bɛgyale ala la nzonlɛ. Lilia hanle kɛ: “Yɛnwunle kɛ yɛnrɛnyia mekɛ dɔɔnwo yɛnrɛmaa yɛ nwo kɛ mɔɔ ɛnee yɛ adwenle yɛ yɛ la. Yɛ nwonane afoa nu gyima, sua nu gyima yɛɛ akee nzinlii, ngakula ne mɔ liele yɛ mekɛ ne amuala. Yɛranwunle kɛ, saa yɛannyia mekɛ yɛammaa yɛ nwo a, yɛnrɛhola yɛnrɛbikye yɛ nwo.”

10. Kɛ ɔkɛyɛ na agyalɛma ava ngyinlazo mɔɔ wɔ Ɛfɛsɛsema 5:15, 16 la ali gyima ɛ?

¹⁰ Duzu a agyalɛma bahola ayɛ amaa bɛanyia  mekɛ bɛamaa bɛ nwo a? Bɛbahola bɛaye mekɛ bɛazie ahane anzɛɛ bɛayɛ ngyehyɛleɛ mɔɔ bamaa bɛanyia mekɛ bɛamaa bɛ nwo la. (Kenga Ɛfɛsɛsema 5:15, 16.) Adiema nrenyia Uzondu mɔɔ wɔ Nigeria la hanle kɛ: “Saa melɛyɛ ninyɛne mɔɔ mebayɛ la anwo ngyehyɛleɛ a, mefa mekɛ mɔɔ yɛbanyia yɛamaa yɛ nwo la meboka nwo, na memaa mekɛ ɛhye anwo kyia me kpalɛ.” (Fel. 1:10) Nea kɛzi Anastasia mɔɔ le maangyebakyi zo neavolɛ bie mɔɔ wɔ Moldova la aye la fa ye mekɛ di gyima kpalɛ la. Ɔhanle kɛ: “Mebɔ mɔdenle meyɛ ninyɛne mɔɔ ɔhyia kɛ meyɛ la wɔ mekɛ mɔɔ me hu noko anye ɛbolo ɔlɛdi ye ɛzonlelilɛ ne mɔ anwo gyima la. Ɛhye maa yɛnyia mekɛ yɛmaa yɛ nwo nzinlii.” Na saa bɛ ngyehyɛleɛ ne mɔ maa ɔyɛ se kɛ bɛbanyia mekɛ bɛamaa bɛ nwo noko ɛ?

11. Ninyɛne boni mɔ a Akoyela nee Pelesela bɔle nu yɛle a?

¹¹ Agyalɛma bahola azukoa Akoyela nee Pelesela, agyalɛma mɔɔ ɛnee alimoa Kilisienema kulo bɛ edwɛkɛ kpalɛ la neazo ne. (Wlo. 16:3, 4) Baebolo ne ɛnga bɛ agyalɛ ne anwo edwɛkɛ dɔɔnwo, noko ɔmaa yɛnwu ye kɛ bɛbɔle nu bɛyɛle gyima, bɛhanle edwɛkɛ ne na bɛboale awie mɔ. (Gyi. 18:2, 3, 24-26) Nɔhalɛ nu, mekɛ biala mɔɔ Baebolo ne babɔ Akoyela nee Pelesela duma la, ɔmbɔ ko ɔngyakyi ko.

12. Duzu a kunli nee yelɛ bahola ayɛ amaa bɛanyia mekɛ dɔɔnwo bɛamaa bɛ nwo a? (Eza nea nvoninli ne.)

¹² Kɛ ɔkɛyɛ na agyalɛma azukoa Akoyela nee Pelesela ɛ? Dwenle ninyɛne dɔɔnwo mɔɔ ɔhyia kɛ ɛ nee ɛ hu anzɛɛ ɛ ye yɛ la anwo. Kɛ anrɛɛ bɛ nuhua ko biala bayɛ ye gyima ɛdeɛ la, bɛbahola bɛabɔ nu bɛayɛ ɔ? Kɛ neazo la, Akoyela nee Pelesela bɔle nu hanle edwɛkɛ ne. Bɛta bɛyɛ ngyehyɛleɛ bɛyɛ ɛhye bie ɔ? Eza Akoyela nee Pelesela bɔle nu yɛle gyima. Bie a ɛ nee ɛ hu anzɛɛ ɛ ye ɛnyɛ gyima ko, noko asoo bɛbahola bɛabɔ nu bɛayɛ sua nu gyima ɔ? (Nol. 4:9) Saa ko biala boa ɔ gɔnwo wɔ ye gyimayɛlɛ nu a, ɔmaa bɛte nganeɛ kɛ bɛbikye bɛ nwo na bɛnyia nwolɛ adenle bɛbɔ adawu. Robert nee Linda gyale la yebo ɛvolɛ 50. Robert hanle kɛ: “Nɔhalɛ nu, yɛnnyia mekɛ dɔɔnwo yɛmmaa yɛ nwo yɛnva yɛnlie yɛ menle. Noko saa mekpuda ahyɛnze ne na ɔkyikyi nwolɛ anzɛɛ saa melɛbɔ ndile wɔ alienwo na ɔbaboa me a, me nye die kpole. Saa yɛbɔ nu yɛyɛ ninyɛne a, ɔmaa yɛbikye yɛ nwo. Yɛ ɛhulolɛ ne kɔ zo yɛ kpole.”

13. Amaa agyalɛma ayɛ ko la, duzu a ɔwɔ kɛ bɛyɛ a?

¹³ Noko bɛhakye kɛ saa agyalɛma bɔ nu yɛ ninyɛne a, yemɔ angomekye ɛngile kɛ bɛbayɛ ko. Yelɛ bie mɔɔ wɔ Brazil la hanle kɛ: “Awie biala ɛnlɛ alagye fee ɛnɛ, na menwu ye kɛ kɛmɔ yɛde sua ko anu la ati, wɔannea a yɛbanyia adwenle kɛ yɛnyia mekɛ yɛmaa yɛ nwo. Menwu ye kɛ saa yɛnyia mekɛ yɛmaa yɛ nwo a, ɛnee ɔtɛwiele. Bieko mɔɔ boka nwo la a le kɛ mebadie me hu kpalɛ.” Tie mɔɔ Bruno nee ɔ ye Tays yɛ amaa biala adie ɔ gɔnwo kpalɛ  la. Bruno hanle kɛ: “Wɔ mekɛ mɔɔ yɛfa yɛdie yɛ menle la anu, yɛfa yɛ fonu ne mɔ yɛgua ɛleka bie amaa yɛanyia mekɛ kpalɛ yɛamaa yɛ nwo.”

14. Saa agyalɛma ɛngulo kɛ bɛbɔ nu bɛyɛ ninyɛne a, duzu a bɛbahola bɛayɛ a?

¹⁴ Na saa ɛ nee ɛ hu anzɛɛ ɛ ye ɛngulo kɛ bɛbɔ nu bɛyɛ ninyɛne noko ɛ? Bie a bɛ nye ɛnlie debie ko ne ala anwo anzɛɛ bɛ nuhua biala ka ɔ gɔnwo ɛya. Duzu a bɛbahola bɛayɛ a? Suzu senle ne mɔɔ yɛhanle nwolɛ edwɛkɛ la anwo. Bɛwuda ye ɛkɛ ne ala a, ɔnzɔ kpole. Ɔhyia kɛ ɛkɔ zo ɛfa ɛyɛne mgbole ɛwula nuhua ngyikyingyikyi. Zɔhane ala a bɛdabɛ noko bɛbahola bɛabɔ ɔ bo bɛanyia mekɛ ekyii bɛamaa bɛ nwo kenle ko biala a. Bɛbɔ mɔdenle bɛyɛ ninyɛne mɔɔ bɛ mu nwiɔ bɛ nye die nwolɛ la, tɛ debie mɔɔ ɔbava kpolerazulɛ yeara la. (Gye. 3:18) Saa bɛbɔ ɔ bo ngyikyingyikyi a, bie a bɛ ɛhulolɛ ne bayɛ kpole bieko.

15. Duzu ati a ɛbulɛ nwo hyia amaa agyalɛma ahɔ zo ahulo bɛ nwo a?

¹⁵ Ɛbulɛ hyia kpalɛ wɔ agyalɛ nu. Ɔle kɛ anwoma mɔɔ bɔ senle nu ɔmaa ɔsɔ kpole la. Saa anwoma ambɔ nu a, ɔbanlu ndɛndɛ. Zɔhane ala a saa ɛbulɛ ɛnle agyalɛ ne anu a, bɛ ɛhulolɛ ne bahola aha aze ndɛndɛ a. Noko agyalɛma mɔɔ bɔ mɔdenle kɛ bɛbala ɛbulɛ ali bɛahile bɛ nwo la ɛlɛkile kɛ bɛkulo kɛ bɛmaa bɛ ɛhulolɛ ne kɔ zo yɛ kpole. Noko kakye kɛ, tɛ edwɛkɛ ne a le kɛ ɛbanyia adwenle kɛ ɛbu ɛ ye anzɛɛ ɛ hu, emomu ɔwɔ kɛ ɔte nganeɛ kɛ ɛbu ye. Penny nee Aret gyale la yebo ɛvolɛ 25. Penny hanle kɛ: “Kɛmɔ awie biala bu ɔ gɔnwo la ati, dahuu ɛhulolɛ wɔ sua nu ɛke. Yɛnzulo kɛ yɛbahile yɛ adwenle ɔluakɛ awie biala bu ɔ gɔnwo nzuzulɛ kɛ nwolɛ hyia.” Ɔti duzu a ɛbahola wɔayɛ amaa wɔaboa ɛ hu anzɛɛ ɛ ye wɔamaa yeade nganeɛ kɛ amgba ɛbu ye a? Suzu Ebileham nee Sɛla neazo ne anwo.

16. Duzu a kunlima bahola azukoa avi Ebileham neazo ne anu a? (1 Pita 3:7) (Eza nea nvoninli ne.)

¹⁶ Ɛnee Ebileham bu Sɛla. Ɔdiele Sɛla nzuzulɛ na ɔdwenlenle ye nganeɛdelɛ nwo. Kenle ko bie, ɛnee Sɛla arɛle ɛbɔ kpalɛ na ɔvale ɔguale Ebileham anwo zo na ɔbɔle ye somolɛ bɔbɔ kɛ ngyegyelɛ ne vi ye. Asoo Ebileham noko vale ɛya na ɔhehanle bie ɔhilele ye ɔ? Kyɛkyɛ. Ɛnee ɔze kɛ Sɛla le yelɛ mɔɔ bɛlɛ ɔ nwo aze yɛɛ ɔboa ye dahuu. Ebileham diele ye edwɛkɛ na ɔbɔle mɔdenle kɛ ɔbali ngyegyelɛ ne anwo gyima. (Gyn. 16:5, 6) Duzu a yɛsukoa yɛfi nu a? Kunlima, bɛlɛ tumi kɛ bɛbasisi kpɔkɛ bɛamaa bɛ abusua ne. (1 Kɔl. 11:3) Noko mɔɔ bahile kɛ ɛkulo ɛ ye la a le kɛ ɛbazuzu adwenle mɔɔ ɔlɛ la anwo kolaa na wɔazi kpɔkɛ ne, titili saa kpɔkɛzilɛ ne baha ye a. (1 Kɔl. 13:4, 5) Ɔdwu mekɛ ne bie a ninyɛne bagyegye ɛ ye na ɔbahulo kɛ ɔbaha kɛzi ɔte nganeɛ la anwo edwɛkɛ. Asoo ɛbadie ye edwɛkɛ ne kpalɛ wɔava wɔahile kɛ kɛzi ɔte nganeɛ  la hyia wɔ ɔ? (Kenga 1 Pita 3:7.) Angela nee Dmitry gyale la, asɛɛ yedwu ɛvolɛ 30. Ɔhilehilele kɛzi ɔ hu maa ɔte nganeɛ kɛ ɔbu ye la anu kɛ: “Mekɛ biala mɔɔ ninyɛne ɛlɛgyegye me mɔɔ mekulo kɛ meka nwolɛ edwɛkɛ mekile Dmitry anzɛɛ mekulo kɛ me nee ye tendɛ bɔbɔ ala la, ɔtie me. Saa melɛtendɛ ɛya zo bɔbɔ a, ɔnyia me nwo abotane.”

17. Duzu a yelɛma bahola azukoa avi Sɛla neazo ne anu a? (1 Pita 3:5, 6)

¹⁷ Sɛla liele Ebileham kpɔkɛzilɛ dole nu ɔvale ɔhilele kɛ ɔbu ye. (Gyn. 12:5) Kenle ko bie, Ebileham zile kpɔkɛ kɛ ɔbalie menli bie mɔɔ ɔnze bɛ la ɛyɛvolɛ. Ɔhanle ɔhilele Sɛla kɛ ɔgyakyi mɔɔ ɔlɛyɛ la na ɔdo paano dɔɔnwo bie ɔmaa bɛ. (Gyn. 18:6) Sɛla diele Ebileham na ɔyɛle mɔɔ ɔhanle la ndɛndɛ. Yelɛma, bɛbahola bɛalie bɛ hu mɔ kpɔkɛzilɛ bɛado nu bɛava bɛazukoa Sɛla. Saa bɛyɛ ye zɔ a, bɛbamaa bɛ agyalɛ ne anu amia. (Kenga 1 Pita 3:5, 6.) Dmitry mɔɔ yɛha ɔ nwo edwɛkɛ la hanle kɛzi ɔ ye maa ɔte nganeɛ kɛ ɔbu ye la anwo edwɛkɛ. Ɔhanle kɛ: “Me nye sɔ mɔdenle mɔɔ Angela bɔ ɔdie me kpɔkɛzilɛ ɔto nu la, saa bɔbɔ yɛ adwenle ɛnyia a. Saa mɔɔ bavi me kpɔkɛzilɛ ne anu ara la angɔ ye boɛ bɔbɔ a, ɔndendɛ ɔntia me.” Saa awie bu wɔ a, ɔnyɛ se fee kɛ ɛbahulo ye!

18. Saa agyalɛma bɔ mɔdenle kɛ bɛmaa bɛ ɛhulolɛ ne ayɛ kpole a, kɛzi ɔbaboa bɛ ɛ?

¹⁸ Ɛnɛ, Seetan kulo kɛ ɔnua ɛhulolɛ mɔɔ wɔ Kilisienema agyalɛ nu la. Ɔze kɛ saa agyalɛma ɛngulo bɛ nwo bieko a, bie a ɔbamaa bɛahwe bɛ nwo bɛavi Gyihova anwo. Noko bɛngola bɛnnua nɔhalɛ ɛhulolɛ! Ɔti bɛmaa ɛhulolɛ mɔɔ wɔ bɛ agyalɛ ne anu la ɛyɛ kɛ ɛhulolɛ mɔɔ bɛha nwolɛ edwɛkɛ wɔ Sɔlɔmɔn Edwɛne ne anu la. Bɛbɔ kpɔkɛ kɛ bɛbamaa Gyihova alimoa bɛ agyalɛ ne anu, bɛnyia mekɛ bɛmaa bɛ nwo, bɛde awie biala nganeɛdelɛ bo na bɛli ye ngyianlɛ nwo gyima. Saa bɛyɛ ye zɔ a, bɛ agyalɛ ne bawula Gyihova mɔɔ nɔhalɛ ɛhulolɛ vi ye ɛkɛ la anyunlunyia, na ɔbayɛ kɛ senle mɔɔ bɛ nye wɔ nwo la, ɔbahɔ zo yeazɔ dahuu.