“ƆMƆ.” Ɔyɛ a kɛ Gyisɛse fɛlɛ mraalɛ bie mɔ la ɛne. Edwɛkɛkpɔkɛ mɔɔ bɛvale bɛlile gyima wɔ aneɛ mɔɔ bɛlimoale bɛvale bɛhɛlɛle Baebolo ne la kile “raalɛ ye.” Kɛ neazo la, mɔɔ ɔyɛ raalɛ bie mɔɔ yekpo ɛvolɛ 18 ayile la, ɔhanle kɛ: “Ɔmɔ, bɛye wɔ bɛvi wɔ anwonyane ne anu!” (Luku 13:10-13) Gyisɛse bɔbɔ vɛlɛle ye mame zɔhane ala, na ɛnee bɛbu ye kɛ enililɛ wɔ nu wɔ Baebolo mekɛ zo. (Dwɔn 19:26; 20:13) Noko ɛnee edwɛkɛkpɔkɛ gyɛne wɔ ɛkɛ mɔɔ enililɛ wɔ nu kpalɛ a.

“Me ra raalɛ.” Baebolo ne fa edwɛkɛkpɔkɛ ɛhye mɔɔ da atiakunlukɛnlɛma nee ahunlunyele ali la di gyima wɔ mekɛ mɔɔ ɔlɛka mraalɛ bie mɔ anwo edwɛkɛ la. Gyisɛse vale lile gyima wɔ mekɛ mɔɔ ɔtendɛ yeahile raalɛ ne mɔɔ ɔdudule mogya too ɛvolɛ 12 la. Mekɛ mɔɔ ɔhɔle Gyisɛse anwo ɛkɛ ne la, ɛnee ye tɛnlabelɛ ne ati ɔ nwo ɛnde kɛ mɔɔ Nyamenle Mɛla ne kile la. Ye tɛnlabelɛ ne ati, ɛnee ɔnle kɛ ɔkɔ menli nu fee. (Sɛl. 15:19-27) Noko ɛnee ɔ nwo ɛhyele ye kpalɛ. Ɛnee ‘yenwu amaneɛ dɔɔnwo wɔ ayileyɛlɛma asa anu. Ɔ nwo ezukoa muala ɛwie, noko ɔnde kpɔkɛ; ye ewule ne, ɔ nyunlu ala a ɔkɔ a.’​—Maake 5:25, 26.

Raalɛ ne yɛle nyaa luale menli ne anu, ɔragyinlanle Gyisɛse anzi na ɔvale ɔ sa ɔhanle ye tɛladeɛ ne anloa. Ɛkɛ ne ala mogya ne pɛle! Ɛnee raalɛ ne dwenle kɛ awie ɛnrɛnwu ye, noko Gyisɛse bizale kɛ: “Nwane a ɛva ɔ sa ɛha me la?” (Luku 8:45-47) Raalɛ ne vale ɛzulolɛ nee anwowozolɛ rahotole Gyisɛse anyunlu ɛkɛ, “na ɔhanle ye edwɛkɛ nɔhalɛ nu ɔhilele ye.”​—Maake 5:33.

Amaa raalɛ ne arɛle ambɔ la, Gyisɛse vile atiakunlukɛnlɛma nu hanle kɛ: “Ralɛ raalɛ, maa ɛ rɛle ɛdɔ wɔ azule nu.” (Mat. 9:22) Baebolo nwo mbɔlɔba ka kɛ, bɛkola bɛfa Hibulu nee Giliki edwɛkɛ agbɔkɛ mɔɔ bɛhile ɔ bo “ralɛ raalɛ” la bɛdi gyima bɛfa bɛda “atiakunlukɛnlɛma nee ahunlunyele” ali. Ɛnee Gyisɛse kpondɛ kɛ ye ahonle tɔ ye azule nu yemɔti ɔhanle kɛ: ‘Wɔ diedi ɛlie wɔ ngoane. Fa anzodwolɛ kɔ na wɔ ewule ne ɛhɔ bɔkɔɔ.’​—Maake 5:34.

Edwɛkɛkpɔkɛ ɛhye a Yizilayɛnli sukoavolɛ Bowaze vale vɛlɛle Mowabenli Wulutu a. Ɛnee ɔdaye noko ɔnze mɔɔ ɔbado ye a, ɔluakɛ ɛnee ɔlɛsesa baale ma bo zo wɔ nrenyia ne mɔɔ ɔnze ye la ɛya nu. Bowaze hanle kɛ: “Me ra raalɛ, tie.” Akee ɔzele Wulutu kɛ ɔhɔ zo ɔsesa ma ne bie wɔ ye ɛya ne anu. Wulutu dule dɔle Bowaze agyakɛ anu na ɔbizale ye deɛmɔti yela ahunlunyele kpole ali yehile ɔdaye mɔɔ ɔle ɛyɛvolɛ la. Bowaze buale ye kɛ: “Mɔɔ wɔyɛ wɔmaa ɛ hu ɔ nli, [kunlavolɛ raalɛ Nawome la,] . . . bɛha ye kɔsɔɔti bɛhile me. . . . [Gyihova] ɛyila wɔ wɔ mɔɔ wɔyɛ la anwo.”​—Wut. 2:8-12.

Nea kɛzi Gyisɛse nee Bowaze yɛle neazo kɛnlɛma maanle Asafo nu mgbanyima a! Ɔyɛ a asafo nu mgbanyima nwiɔ yia adiema raalɛ bie mɔɔ ɔwɔ kɛ bɛdua Ngɛlɛlera na azo bɛmaa ye anwosesebɛ la. Saa mgbanyima ne mɔ dimoa yɛ asɔne na bɛtie mɔɔ adiema raalɛ ne baha la kpalɛ a, bɛbahola bɛalua Baebolo ne azo bɛakyekye ɔ rɛle na bɛamaa ye ahonle adɔ ye azule nu.​—Wlo. 15:4.