1. Duzu a edwɛne ɛdolɛ maa yɛkola yɛyɛ a?

EDWƐNE kɛlɛvo bie mɔɔ yelie duma la hanle kɛ: “Saa ɛte edwɛkɛ agbɔkɛ ne a, ɔmaa ɛdwenle. Ɛte edwɛne a, ɔmaa ɛnyia nganeɛdelɛ bie. Noko saa ɛto edwɛne a, edwɛkɛ agbɔkɛ ne mɔ ka wɔ ahonle.” Yɛ edwɛne ne mɔ maa yɛye yɛ anwuma Selɛ, Gyihova ayɛlɛ na yɛkile kɛ yɛkulo ye. Bɛmaa yɛte nganeɛ kɛ yɛbikye ye kpalɛ. Ɔnyɛ nwanwane kɛ edwɛne ɛdolɛ le debie titili wɔ nɔhalɛ ɛzonlenlɛ nu la, saa bɔbɔ yɛ ngome anzɛɛ yɛ nee Nyamenle menli mɔɔ wɔ asafo ne anu la ɛlɛbɔ nu ado a.

2, 3. (a) Kɛzi bie mɔ bahola ade nganeɛ wɔ edwɛne mɔɔ bɛ nee asafo ne bɔ nu ado ye kpole la anwo ɛ? (b) Kpuya boni mɔ a yɛbazuzu nwo a?

² Noko, kɛzi ɛte nganeɛ wɔ asafo ne mɔɔ ɛ nee ye bɔ nu ado edwɛne kpole la anwo ɛ? Ɔyɛ wɔ nyiane ɔ? Wɔ maanle bie mɔ anu, ɔyɛ se ɔmaa mrenyia bie mɔ kɛ bɛbado edwɛne wɔ bagua nu. Adwenle zɛhae bahola aha asafo ne anu amra amuala, titili saa menli mɔɔ li yɛ nyunlu la fa debie ye bɛ nloa anzɛɛ yɛ ninyɛne gyɛne wɔ mekɛ mɔɔ asafo ne anu amra mɔɔ ɛha la ɛlɛbɔ nu ado edwɛne la.​—Edw. 30:12.

³ Saa amgba yɛbu edwɛne ɛdolɛ kɛ ɔboka yɛ ɛzonlenlɛ nwo a, yɛnrɛvinde anzɛɛ yɛnrɛyɛ debie gyɛne wɔ mekɛ mɔɔ bɛlɛto edwɛne la. Ɛhye ati, ɔwɔ kɛ yɛ nuhua ko biala biza ɔ nwo kɛ: ‘Kɛzi mebu edwɛne mɔɔ bɛto ye wɔ yɛ ayia ne mɔ abo la ɛ? Kɛ ɔkɛyɛ  na meahola meali ngyegyelɛ mɔɔ ɔmmaa menva anyelielɛ mendo edwɛne la azo ɛ? Na duzu a mebahola meayɛ meala nganeɛdelɛ mɔɔ wɔ edwɛne mɔɔ yɛto anu la ali ɛ?’

4, 5. Edwɛne ɛdolɛ nwo ngyehyɛleɛ kpalɛ boni a bɛyɛle ye wɔ ɛzonlenlɛ sua ne anu wɔ tete Yizilayɛ a?

⁴ Ɔvi tete ne, Gyihova nɔhalɛ azonvolɛ ɛlua edwɛne ɛdolɛ zo ɛye Gyihova ayɛlɛ. Mɔɔ tete Yizilayɛma ɛlɛsonle Gyihova wɔ nɔhalɛ nu la, ɛnee edwɛne ɛdolɛ le debie titili wɔ bɛ ɛzonlenlɛ nu. Kɛ neazo la, Belemgbunli Devidi hyehyɛle Livaema 4,000 maanle bɛdole ayɛlɛyelɛ edwɛne wɔ ɛzonlenlɛ sua ne anu. Ɛnee bɛ nuhua 288 ‘ze edwɛne ɛdolɛ nye zo kpalɛ.’​—1 Ek. 23:5; 25:7.

⁵ Mɔɔ bɛyila ɛzonlenlɛ sua ne azo la, bɛvale edwɛne ɛdolɛ bɛbokale ngyehyɛleɛ ne anwo. Kɛlɛtokɛ ne ka kɛ: ‘Mɔɔ sɔnwosɔnwobɔlɛ ne, nee ninyɛne mɔɔ ɛha la nee edwɛndolɛ ne ɛlɛkɔ zolɛ pɛpɛ, na bɛlɛye Gyihova ayɛlɛ la, amungu nwohyee rayile sua ne na ɔmaanle Gyihova anyunlunyia dale hilele kɛ Gyihova wɔ ɛkɛ.’ Nea kɛzi mɔɔ hɔle zo la maanle bɛ diedi nu mianle a!​—2 Ek. 5:13, 14; 7:6.

6. Kilehile edwɛne ɛdolɛ nwo ngyehyɛleɛ titili mɔɔ bɛyɛle wɔ mekɛ mɔɔ Nihɛmaya le amɛnlado wɔ Gyɛlusalɛm la anu.

⁶ Mɔɔ Nihɛmaya lile Yizilayɛma mɔɔ di nɔhalɛ anyunlu maanle bɛdole Gyɛlusalɛm bane ne bieko la, ɔdaye noko ɔyɛle ngyehyɛleɛ ɔmaanle Livae edwɛndolɛma ne vale ninyɛne ngakyile bɔle edwɛne. Mɔɔ bɛyila bane ne mɔɔ bɛdole ye bieko azo la, edwɛne ɛdolɛ nwo ngyehyɛlɛ titili ne mɔɔ bɛyɛle la maanle bɛ nye liele kpalɛ. Mekɛ ɛhye, ‘edwɛndolɛma ekpunli mgbole nwiɔ dole ayɛlɛyelɛ edwɛne.’ Ekpunli nwiɔ ne vi bane ne bɛne nee fema rayiale wɔ bane ne ɛleka mɔɔ bikye ɛzonlenlɛ sua ne la, na bɛdole edwɛne ne bɛmaanle ɔkpudwule na ye nganeɛ dwule moa. (Nih. 12:27, 28, 31, 38, 40, 43) Nɔhalɛ nu, Gyihova anye liele kɛ ɔdele kɛ ye azonvolɛ ɛlɛfa anyelielɛ ado edwɛne aye ye ayɛlɛ la.

7. Kɛzi Gyisɛse zile zolɛ kɛ edwɛne ɛdolɛ nwo hyia wɔ Kilisiene ɛzonlenlɛ nu ɛ?

⁷ Ɔvi mekɛ mɔɔ bɛdele Kilisiene asafo ne la, edwɛne ɛdolɛ ɛyɛ debie titili wɔ nɔhalɛ ɛzonlenlɛ nu. Dwenle nɔe ne mɔɔ anwo hyia kpalɛ wɔ alesama tetedwɛkɛ nu la anwo nea. Mɔɔ Gyisɛse nee ye ɛdoavolɛma ne lile Awulae Nɔsolɛ Aleɛ ne wiele la, bɛ muala bɛdole edwɛne bɛyele Gyihova ayɛlɛ.​—Kenga Mateyu 26:30.

8. Kɛzi ɛvoya mɔɔ limoa Kilisienema yɛle edwɛne mɔɔ yɛto ye wɔ ɛzonlenlɛ nu la anwo neazo ɛ?

⁸ Ɛvoya mɔɔ limoa Kilisienema bɔle nu dole edwɛne yele Nyamenle ayɛlɛ vale yɛle neazo. Ɔnva nwo kɛ ɛnee bɛta bɛyia wɔ awie mɔ azua nu la, ɛleka mɔɔ ɛnee bɛyia bɛsonle la ammaa ɛhulolɛ mɔɔ bɛlɛ kɛ bɛbado edwɛne bɛaye Gyihova ayɛlɛ la anga aze. Sunsum ne maanle ɛzoanvolɛ Pɔɔlo hɛlɛle ɔ mediema Kilisienema kɛ: “Bɛhɔ zo bɛva edwɛne, ayɛlɛyelɛ, nee sunsum nu moyɛlɛ edwɛne bɛhilehile bɛ nwo na bɛmaa bɛ nwo anwosesebɛ, na bɛdo edwɛne wɔ bɛ ahonle nu bɛmaa Gyihova.” (Kɔl. 3:16) Yɛ edwɛne buluku ne anu edwɛne ne mɔ le “sunsum nu moyɛlɛ edwɛne” mɔɔ ɔwɔ kɛ yɛfa anyelielɛ yɛto a. Bɛboka sunsum nu aleɛ mɔɔ “akɛlɛ nɔhavo nee nrɛlɛbɛvolɛ ne” fa maa yɛ la anwo.​—Mat. 24:45.

9. (a) Duzu a ɛmmaa bie mɔ ɛnva anyelielɛ ɛndo edwɛne wɔ yɛ ayia ngakyile ne mɔ abo ɛ? (b) Kɛzi ɔwɔ kɛ yɛto ayɛlɛyelɛ edwɛne yɛmaa Gyihova ɛ? Nwane mɔ a ɔwɔ kɛ bɛdi ɔ nyunlu a? (Nea mɔlebɛbo nvoninli ne.)

⁹ Na saa bɛnda bɛndo edwɛne wɔ wɔ  abusua ne anu, amaamuo anzɛɛ ɛleka mɔɔ ɛde la noko ɛ? Ɔlua ɛlɛtɔlɔnek ninyɛne mɔɔ ɛbu la ati, bie a ɔmaa ɛ nye die kɛ ɛbadie edwɛndolɛma mɔɔ yɛ deɛ la. Bie a saa ɛfa ɛ ne ɛtoto bɛdabɛ mɔɔ bɛze edwɛne to wɔ ewiade ne anu la edwɛne nwo a, ɔyɛ wɔ nyiane anzɛɛ ɔmaa ɛ sa nu to. Noko, ɔnle kɛ ɛmaa yemɔ si wɔ adenle kɛ ɛbado edwɛne wɔaye Gyihova ayɛlɛ. Emomu, ma wɔ edwɛne buluku ne zo kɔ anwuma, kpogya ɛ ti zo na fi wɔ ahonle nu to edwɛne ne! (Ɛzela 3:11; kenga Edwɛndolɛ 147:1.) Ɛnɛ, wɔ Belemgbunlililɛ Asalo dɔɔnwo anu, yɛnwu edwɛne ne anu edwɛkɛ agbɔkɛ ne mɔ wɔ screen zo, na ɛhye boa yɛ maa yɛto edwɛne ne kpole. Ɔyɛ anyelielɛ kɛ bɛva Belemgbunlililɛ edwɛne ɛdolɛ bɛboka Belemgbunlililɛ Gyima Sukulu ngyehyɛleɛ ne mɔɔ bɛyɛ bɛmaa mgbanyima anwo la. Ɛhye kile kɛ ɔwɔ kɛ mgbanyima di asafo ne anyunlu wɔ edwɛne ɛdolɛ nu.

10. Saa ɛzulolɛ ti yɛndo edwɛne kpole a, duzu a ɔwɔ kɛ yɛkakye a?

¹⁰ Debie ko mɔɔ ɔti menli dɔɔnwo ɛnva ɛnelɛ kpole ɛndo edwɛne la a le kɛ bɛsulo. Bie a bɛsulo kɛ bɛ ngome ala a bɛbade bɛ ne a anzɛɛ awie mɔ baha kɛ bɛ ne ɛnyɛ fɛ. Noko, ɔwɔ kɛ yɛkakye kɛ saa yɛlɛtendɛ a, “yɛ muala yɛfo fane dɔɔnwo.” (Gye. 3:2) Noko, ɛhye ɛnzi yɛ adenle kɛ yɛbadendɛ. Ɔti, duzu ati a ɔwɔ kɛ yɛmaa yɛ ne mɔɔ ɛnyɛ fɛ la si yɛ adenle kɛ yɛbado edwɛne yɛaye Gyihova ayɛlɛ ɛ?

11, 12. Kɛ ɔkɛyɛ na yɛanyia anyuhɔlɛ wɔ yɛ edwɛne ɛdolɛ nu ɛ?

¹¹ Bie a yɛsulo kɛ yɛbado edwɛne ɔluakɛ yɛnze kɛzi yɛto ye a. Noko, saa yɛfa nzuzulɛ ɛhye mɔ yɛdi gyima a yɛbahola yɛanyia anyuhɔlɛ wɔ edwɛne ɛdolɛ nu. *

¹² Saa ɛdie ɛnwomenle kpalɛ a, ɛbahola wɔava ɛnelɛ kpole wɔado edwɛne. Kɛmɔ  laete maa bɔlobo sɔ la, zɔhane ala a ɛnwomenlelielɛ maa ɛfa ɛnelɛ kpole ɛtendɛ anzɛɛ ɛto edwɛne a. Ɔwɔ kɛ ɛfa ɛnelɛ kpole ɛto edwɛne kɛmɔ ɛlɛtendɛ a ɛyɛ la anzɛɛ maa ɔdɛla zɔhane bɔbɔ. (Nea nzuzulɛ mɔɔ wɔ Nyia Teokelase Ɛzonlenlɛ Sukulu Ndetelɛ Zo Nvasoɛ buluku ne mukelɛ 181 kɔdwu 184, mɔɔ wɔ edwɛkɛtile, “Die Ɛnwomenle Kpalɛ” abo la.) Nɔhalɛ nu, Ngɛlɛlera ne ka kile Gyihova azonvolɛ kɛ, bɛlɛto edwɛne a, “bɛdeɛdea nu anyelielɛ nu.”​—Edw. 33:1-3.

13. Kilehile kɛzi yɛbahola yɛava anwodozo yɛado edwɛne la anu.

¹³ Saa bɛlɛyɛ abusua ɛzonlenlɛ anzɛɛ ɛ ti anwo debiezukoalɛ a, sɔ ɛhye mɔ nea: Kpa edwɛne mɔɔ ɛ nye die nwo la ko wɔ yɛ edwɛne buluku ne anu. Fa ɛnelɛ kpole kenga nuhua edwɛkɛ ne. Bieko, die ɛnwomenle kpole na fa ɛnelɛ ko ne ala kenga edwɛne ne ɛdendɛsinli ko. Akee fa ɛnelɛ ko ne ala to zɔhane ɛdendɛsinli ne. (Aye. 24:14) Ɛnelɛ mɔɔ ɛfa ɛto edwɛne la bavinde, na yemɔ le debie kpalɛ. Mmamaa ɔka wɔ ɛzulolɛ anzɛɛ ɔyɛ wɔ nyiane!

14. (a) Kɛzi yɛ nloa mɔɔ yɛbabuke ye kpole la baboa wɔ edwɛne ɛdolɛ nu ɛ? (Nea ɛlɛka “ Kɛ Ɔkɛyɛ Na Wɔahola Wɔado Edwɛne Kpalɛ La.”) (b) Ɛnelɛ nwo ngyegyelɛ nzuzulɛ boni mɔ a wɔnwu kɛ ɔbaboa wɔ a?

¹⁴ Saa wɔambuke ɛ nloa kpalɛ a, ɛnrɛhola ɛnrɛva ɛnelɛ kpole ɛnrɛdo edwɛne. Ɔti, nzuzulɛ bieko a le kɛ, buke ɛ nloa kpole tɛla kɛzi ɛlɛtendɛ a ɛyɛ ye la. Saa ɛte nganeɛ kɛ ɛ ne ɛnle kpole anzɛɛ ɔwɔ anwuma somaa a, duzu a ɔwɔ kɛ ɛyɛ a? Ɛbahola wɔanyia ngyegyelɛ ɛhye mɔ anwo nzuzulɛ kpalɛ wɔ Nyia Teokelase Ɛzonlenlɛ Sukulu Ndetelɛ Zo Nvasoɛ buluku ne mukelɛ 184, mɔɔ wɔ ɛlɛka “Kɛzi Ɛbali Ngyegyelɛ Bie Mɔ Azo La” abo.

15. (a) Amaneɛbɔlɛ boni a bɛvale bɛdole gua wɔ 2016 ɛvolɛ ayia ne abo a? (b) Duzu ati a bɛyɛle edwɛne buluku ne fofolɛ a?

¹⁵ Mɔɔ Adiema Stephen Lett mɔɔ boka Neazo Eku ne anwo vale dole gua wɔ Watch Tower Bible and Tract Society of Pennsylvania 2016 ɛvolɛ ayia ne abo kɛ bɛyɛ edwɛne buluku fofolɛ mɔɔ ɔ ti ne se,  ‘Fa Anyelielɛ To Edwɛne’ Maa Gyihova, na ɔnrɛhyɛ yɛbava yɛali gyima wɔ yɛ ayia ne mɔ abo la, ayiama ne anye liele kpalɛ. Adiema Lett hilehilele nu kɛ bodane ko mɔɔ ɔti bɛyɛ edwɛne buluku ne fofolɛ la a le kɛ bɛkpondɛ kɛ bɛmaa nuhua edwɛkɛ ne nee New World Translation of the Holy Scriptures ne mɔɔ bɛyɛ ye fofolɛ la yɛ ko. Ɛhye kile kɛ ɔwɔ kɛ bɛye anzɛɛ bɛkakyi edwɛkɛ agbɔkɛ bie mɔ mɔɔ ɛnle New World Translation fofolɛ ne mɔɔ bɛyɛle ye 2013 anu la. Bieko, bɛva edwɛne fofolɛ mɔɔ fale yɛ daselɛlilɛ gyima ne nee edwɛne mɔɔ maa yɛnyia ɛkpɔnedeɛ ne anwo anyezɔlɛ la bɛboka nwo. Eza kɛmɔ edwɛne ɛdolɛ nwo hyia wɔ yɛ ɛzonlenlɛ nu la ati, ɛnee Neazo Eku ne kpondɛ kɛ ɔyɛ buluku mɔɔ ɔbahyɛ na ɔ nzi ne nee New World Translation ne mɔɔ bɛyɛ ye fofolɛ le ko la.

16, 17. Nzenzaleɛ boni mɔ a bɛyɛ ye wɔ edwɛne buluku fofolɛ ne anu a?

¹⁶ Amaa yɛanyɛ se kɛ yɛbava ‘Fa Anyelielɛ To Edwɛne’ Maa Gyihova buluku ne yɛali gyima la, bɛhyehyɛ edwɛne ne mɔ ekpunli ekpunli. Kɛ neazo la, edwɛne 12 mɔɔ limoa la fale Gyihova anwo yɛɛ 8 mɔɔ doa zo la fale Gyisɛse nee ɛkpɔnedeɛ ne anwo nee mɔɔ bokɛboka nwo la. Eza yɛlɛ edwɛkɛtile mɔɔ bɛhyehyɛ mɔɔ baboa, titili saa yɛkpondɛ kɛ yɛkpa edwɛne bie mɔɔ yɛbava yɛabuke bagua nu ɛdendɛlɛ bie a.

¹⁷ Amaa awie biala ahola avi ye ahonle nu ado edwɛne ne la, bɛhakyi edwɛkɛ agbɔkɛ bie mɔ amaa nuhua ala ɛkɛ, eza bɛye edwɛkɛ agbɔkɛ mɔɔ ɛnɛ yɛnva yɛnli gyima la bɛvi nu. Ɔle kpalɛ kɛ bɛhakyi edwɛkɛtile “Bɔ Wɔ Ahonle Nwo Bane” bɛyɛ ye “Yɛbɔ Yɛ Ahonle Nwo Bane” la. Duzu ati ɔ? Ɔluakɛ, alimoa ne, saa awie ɛlɛto edwɛne ɛhye a, ɛnee ɔlɛkile awie mɔ mɔɔ ɔwɔ kɛ bɛyɛ la. Ɛhye bahola agyegye menli mɔɔ bɛle fofolɛ, anyelielɛma, ngakula, nee mediema mraalɛ mɔɔ bɛba yɛ debiezukoalɛ nee nyianu ngakyile ne mɔ abo la. Ɔti bɛhakyile edwɛkɛtile ne nee nuhua edwɛkɛ ne.

18. Duzu ati a ɔwɔ kɛ yɛnwu edwɛne mɔɔ wɔ yɛ edwɛne buluku fofolɛ ne anu la to kpalɛ ɛ? (Nea ɔ bo ɛkɛ edwɛkɛ ne.)

¹⁸ Edwɛne mɔɔ wɔ ‘Fa Anyelielɛ To Edwɛne’ Maa Gyihova anu la dɔɔnwo le kɛ asɔneyɛlɛ la. Edwɛne ɛhye mɔ bahola amaa wɔala wɔ nganeɛdelɛ ali wɔahile Gyihova. Edwɛne gyɛne bie mɔ baboa yɛ ‘amaa yɛazuzu yɛ nwo ngoko, yɛamaa yɛ nwo anwosesebɛ yɛahɔ ɛlɔlɛ nee gyima kpalɛ ɛyɛlɛ nu.’ (Hib. 10:24) Nɔhalɛ nu, ɔwɔ kɛ yɛnwu ɛnelɛ mɔɔ bɛfa bɛfɛlɛ edwɛne ne, ɛleka mɔɔ ɔwɔ kɛ ɔkɔ anwuma nee aze yɛɛ nuhua edwɛkɛ agbɔkɛ ne mɔ kpalɛ. Saa ɛtie mɔɔ bɛdo mɔɔ wɔ jw.org azo la a ɛbanwu ye to. Saa ɛsukoa edwɛne ne mɔ wɔ sua nu a, ɔbamaa wɔahola wɔavi wɔ ahonle nu wɔado ye kpole. *

19. Kɛzi yɛ muala mɔɔ yɛwɔ asafo ne anu la bahola azonle Gyihova ɛ?

¹⁹ Kakye kɛ, edwɛne ɛdolɛ nwo hyia wɔ yɛ ɛzonlenlɛ nu. Ɔle adenle titili mɔɔ yɛdua zo yɛkile kɛ yɛkulo Gyihova na yɛ nye sɔ ye a. (Kenga Ayezaya 12:5.) Saa ɛfa anyelielɛ ɛto edwɛne a, ɛbamaa awie mɔ noko ava anwodozo ado bie. Nɔhalɛ nu, yɛ muala mɔɔ yɛwɔ asafo ne anu​—ngakula, mgbanyinli nee anyelielɛma bahola abɔ nu azonle Gyihova wɔ adenle ɛhye azo. Ɔti, mmamaa debie si wɔ adenle kɛ ɛbado edwɛne. Emomu, tie mɔɔ sunsum ne maanle edwɛndolɛnli ne hɛlɛle la: “Bɛdo edwɛne bɛmaa [Gyihova]!” Ɛhɛe, fa anyelielɛ to edwɛne!​—Edw. 96:1.