ƆVI tete ne amuala, ɛnee menli bɔ afɔle anzɛɛ ye ndoboa boa nɔhalɛ ɛzonlenlɛ. Yizilayɛma vale nane bɔle afɔle, yɛɛ bɛze Kilisienema noko kpalɛ kɛ bɛbɔ “ayɛlɛyelɛ afɔle.” Noko, afɔlebɔlɛ gyɛne wɔ ɛkɛ mɔɔ Nyamenle anye die nwo a. (Hib. 13:15, 16) Kɛ mɔɔ neazo ɛhye mɔ kile la, afɔlebɔlɛ ɛhye mɔ maa bɛnyia anyelielɛ nee nyilalɛ.

Nyamenle tete sonvolɛ Hana ɛnee kulo kɛ ɔnyia ralɛ, noko ɛnee ɔnwo. Ɔbɔle Gyihova ɛwɔkɛ wɔ asɔneyɛlɛ nu kɛ saa ɔmaa ɔwo ralɛ nrenyia a, ‘ɔbadu ye nee ye ɛbɛlabɔlɛ muala yeamaa Gyihova.’ (1 Sa. 1:10, 11) Nzinlii, Hana nrenzɛle na ɔwole ralɛ nrenyia mɔɔ bɛfɛlɛ ye Samoɛle. Mɔɔ Hana pɛle Samoɛle nyɛfonlɛ la, ɔ nee ye hɔle ndanlɛ sua ne anu kɛ mɔɔ ye ɛwɔkɛ ne se la. Gyihova yilale Hana wɔ ye tunwomaa sunsum ne anwo. Ɔholale ɔwole mralɛ nnu bieko, na Samoɛle rayɛle ngapezonli nee Baebolo kɛlɛvolɛ.​—1 Sa. 2:21.

Kɛmɔ Hana nee Samoɛle yɛle la, Kilisienema noko ɛnyia nwolɛ adenle kɛ bɛbava bɛ ngoane bɛamaa bɛ Bɔvolɛ ne na bɛazonle ye. Eza kɛ mɔɔ Gyisɛse bɔle ɛwɔkɛ la, Gyihova bayila afɔle biala mɔɔ yɛbabɔ yɛazonle ye la azo.​—Maake 10:28-30.

Wɔ ɛvoyia mɔɔ limoa la anu, ɛnee bɛze Kilisienenli raalɛ Dɔkase kpalɛ kɛ “ɛnee gyima kpalɛ ɛyi ye tɛkɛɛ yɛɛ ɔboa ehyiavolɛma”​—ɔbɔle afɔle ɔboale awie mɔ. Noko, “ɔ nwo dole ye na ɔwule,” ɛhye maanle asafo ne lile nyane kpalɛ. Mɔɔ ɛdoavolɛma ne dele kɛ Pita ɛbikye ɛkɛ ne la, bɛbodole ye kɛ ɔrɛla ndɛndɛ. Nea kɛzi bɛ nye liele wɔ mekɛ mɔɔ Pita rale na ɔdwazole Dɔkase ɔvile ewule nu la​—ɔdaye a ɛzoanvolɛ bie limoa dwazole ye mɔɔ bɛyɛ nwolɛ kɛlɛtokɛ a! (Gyi. 9:36-41) Nyamenle arɛle anvi afɔle mɔɔ Dɔkase bɔle la. (Hib. 6:10) Bɛhɛlɛ ye nyeleyɛlɛ nwo neazo kɛnlɛma ne wɔ Nyamenle Edwɛkɛ ne anu kɛ yɛzukoa.

Ɛzoanvolɛ Pɔɔlo noko nyianle mekɛ maanle awie mɔ vale yɛle neazo kɛnlɛma. Pɔɔlo kɛlɛ ɔ mediema Kilisienema mɔɔ wɔ Kɔlente la, ɔhanle kɛ: “Mame, mebavi fɛlɛkolilɛ nu meava me nwo ninyɛne nee me nwo amuala meamaa bɛ.” (2 Kɔl. 12:15) Pɔɔlo mumua ne nwunle kɛ saa awie tu ɔ nwo maa boa awie mɔ a ɔmaa ɔ kunlu dwo ɔ nwo​—yɛɛ mɔɔ hyia kpalɛ la ɔmaa ɔnyia Gyihova nyilalɛ nee ɔ nyunlu ɛlolɛ.​—Gyi. 20:24, 35.

Ɔda ali kɛ, saa yɛfa yɛ mekɛ nee anwosesebɛ yɛboa Belemgbunlililɛ gyima ne nee yɛ mediema diedima a, ɔmaa Gyihova anye die. Noko, ndenle gyɛne wɔ ɛkɛ mɔɔ yɛbahola yɛalua zo yɛaboa Belemgbunlililɛ edwɛkɛhanlɛ gyima ne ɔ? Ɛhɛe! Saa yɛye ɛlɔlɛ mɔɔ yɛda ye ali la yɛsie ahane a, yɛbahola yɛali Gyihova eni ɔlua ndoboa ɛyelɛ zo. Bɛfa bɛboa ewiade amuala edwɛkɛhanlɛ gyima ne mɔɔ edwɛkpatɛlɛvolɛma nee dahuu ɛzonlenlɛ gyima titilima gyɛne noko boka nwo la. Bieko, ndoboa mɔɔ yɛfi yɛ ɛhulolɛ nu yɛye la di yɛ mbuluku nee vidio ne mɔ mɔɔ bɛkile ɔ bo la anwo gyima, bɛfa bɛboa wɔ esiane mekɛ nu yɛɛ eza bɛfa bɛsi Belemgbunlililɛ Asalo fofolɛ. Yɛkola yɛnyia anwodozo kɛ “sonla mɔɔ asa do la banyia nyilalɛ.” Bieko, saa yɛfa yɛ anwonyia yɛmaa Gyihova a, ɛnee yɛlɛdi ye eni.​—Mrɛ. 3:9; 22:9.