1, 2. (a) Kɛzi ɛnee Gyisɛse te nganeɛ wɔ Nyamenle Mɛla ne anwo ɛ? (b) Kɛzi mɛla kilehilevolɛma nee Falasiima vale Mɛla ne lile gyima ɛ?

ƐNEE Gyisɛse anye die Mosisi Mɛla ne anwo. Ɛhye ɛnyɛ nwanwane! Ɛnee Gyisɛse kulo ɔ Ze Gyihova mɔɔ vale Mɛla zɔhane maanle la kpalɛ. Edwɛndolɛ 40:8 maa yɛnwu kɛzi ɛnee Gyisɛse anye die Nyamenle mɛla ne anwo la, ɔka kɛ: “O me Nyamenle, mekulo kɛ meyɛ wɔ ɛhulolɛdeɛ; wɔ mɛla ne wɔ me ahonle nu.” Gyisɛse luale ye edwɛkɛhanlɛ nee ye nyɛleɛ zo hilele kɛ Nyamenle Mɛla ne di munli, nvasoɛ wɔ zo yɛɛ ɔbara nu.​—Mat. 5:17-19.

² Nea kɛzi ɔyɛle Gyisɛse nyane wɔ mekɛ mɔɔ ɔnwunle kɛ mɛla kilehilevolɛma nee Falasiima ɛlɛfa ɔ Ze Mɛla ne ali gyima amaa yeayɛ kɛ asɛɛ ndelebɛbo biala ɛnle nu la! Ɔzele bɛ kɛ: “Bɛkyɛ mente nee dele yɛɛ kumin ne mɔ anu bulu bɛfa ko bɛmaa.” Ɔti, ɛnee bɛ ngyegyelɛ a le boni? Ɔdoale zo kɛ: “Bɛbu bɛ nye bɛgua Mɛla ne anu ninyɛne mɔɔ hyia kpalɛ, mɔɔ le kɛ pɛlepɛlelilɛ nee anwunvɔnezelɛ yɛɛ nɔhalɛlilɛ la azo.” (Mat. 23:23) Gyisɛse anyɛ kɛ zɔhane Falasiima ne mɔɔ bɛbu bɛ nwo tenlene la, Gyisɛse nwunle ngyinlazo mɔɔ wɔ Mɛla ne anu la, yɛɛ kɛzi mɛla ko biala maa bɛnwu Nyamenle subane ne mɔ la.

3. Kpuya boni mɔ a edwɛkɛ ɛhye babua a?

³ Kɛ Kilisienema la, yɛnle Mɛla ngyekyeleɛ ne abo. (Wlo. 7:6)  Noko, Gyihova ɛmaa bɛhɛlɛ Mɛla ne wɔ ye Edwɛkɛ Baebolo ne anu bɛmaa yɛ. Ɔkpondɛ kɛ yɛte Mɛla ne abo na yɛfa nuhua “ninyɛne mɔɔ hyia kpalɛ” anzɛɛ ngyinlazo ne mɔ yɛdi gyima. Kɛ neazo la, duzu a yɛsukoa yɛfi ɛvealeka azuamgbole nwo ngyehyɛleɛ ne anu a? Edwɛkɛ mɔɔ li ɛhye anyunlu la maanle yɛnwunle mɔɔ yɛsukoa yɛfi mɔɔ ɔwɔ kɛ ahenle mɔɔ tɛ ɔ nye fuu a ɔhunle ɔ gɔnwo yɛ anu la. Noko yɛkola yɛsukoa Gyihova nee kɛzi yɛbahola yɛala ye subane ne mɔ ali la anwo debie yɛfi ɛvealeka azuamgbole nwo ngyehyɛleɛ ne anu. Ɛhye ati, edwɛkɛ ɛhye babua kpuya nsa: Kɛzi ɛvealeka azuamgbole ne mɔ lale Gyihova anwunvɔnezelɛ ne ali ɛ? Duzu a bɛmaa yɛnwu ye wɔ kɛzi ɔbu ngoane la anwo ɛ? Kɛzi bɛmaa yɛnwu kɛ ɔdi pɛlepɛle bɔkɔɔ ɛ? Wɔ biala anu, nea kɛzi ɛbahola wɔazukoa wɔ anwuma Selɛ ne la.​—Kenga Ɛfɛsɛsema 5:1.

4, 5. (a) Kɛzi ɛnee ndenle mɔɔ kɔ ɛvealeka azuamgbole ne mɔ azo la de ɛ? Duzu ati ɔ? (b) Duzu a ɛhye maa yɛnwu ye wɔ Gyihova anwo a?

⁴ Ɛnee ɛvealeka azuamgbole nsia ne azo ɛhɔlɛ ɛnyɛ se fee. Gyihova zele Yizilayɛma kɛ bɛkpa azuamgbole nsa wɔ Azule Dwɔdan ne aduduleɛ nee adɔleɛ bɛva bɛyɛ ɛvealeka. Duzu ati ɔ? Amaa saa awie ku sonla a yeanriandi yeahɔ ɛkɛ ne ndɛndɛ mɔɔ ɔnvɛ a. (Ɛdi. 35:11-14) Ɛnee ɛvealeka azuamgbole ne mɔ lɛ ndenle mgbalɛ. (Mɛla 19:3) Dwuuma amaamuo bie kile kɛ sɛkɛlɛneɛ ngakyile wɔ adenle nu mɔɔ kile awie mɔɔ kɛhu sonla la adenle kɔ azuamgbole ne mɔ azo a. Kɛmɔ ɛvealeka azuamgbole wɔ ɛkɛ la ati, ɛnee ɔnle kɛ awie mɔɔ tɛ ɔ nye fuu a ɔhunle ɔ gɔnwo la nriandi kɔ maanle gyɛne zo, amaa yeanva ɔ nwo yeanwula awozonle ɛzonlenlɛ nu.

⁵ Dwenle nwolɛ nea: Gyihova, Ahenle ne mɔɔ hanle kɛ bɛhu menli mɔɔ bɛ nye fuu bɛkɛhu sonla la​—eza yɛle nziezielɛ mɔɔ bamaa bɛaze menli mɔɔ tɛ bɛ nye fuu a bɛhunle awie la anwunvɔne na bɛabɔ bɛ nwo bane! Amaneɛbɔvo bie hɛlɛle kɛ: “Ɛnee debie biala anu la ɛkɛ, ɔnle kpomgbondee yɛɛ ɔnyɛ se. Kɛ ɛnee Nyamenle anwunvɔnezelɛ ne de la ɛne.” Gyihova ɛnle ndɛnebuavolɛ mɔɔ ɔ ti yɛ se mɔɔ ɔkulo kɛ ɔtwe ye azonvolɛ anzo a. Emomu, ye “anwunvɔnezelɛ ne zonle.”​—Ɛfɛ. 2:4.

6. Kɛzi Falasiima ne vale bɛ nyɛleɛ hilele kɛ bɛanzukoa Gyihova anwunvɔnezelɛ ne ɛ?

⁶ Noko ɛnee Falasiima ne ɛngulo kɛ bɛse anwunvɔne. Kɛ neazo la, Dwuuma amaamuo kile kɛ ɛnee Falasiima ne ɛngulo kɛ bɛfa ɛtane ko ne ala mɔɔ awie bayɛ la bɛkyɛ ye fane mɔɔ bo nsa. Gyisɛse hanle kɛzi bɛyɛ bɛ  nyɛleɛ wɔ awie mɔɔ kɛvo bɛ anwo la wɔ ɛrɛlɛ bie mɔɔ ɔbule ɔvanenle Falasiinli bie mɔɔ ɛnee ɔlɛyɛ asɔne kɛ: “Nyamenle, meda wɔ ase kɛ menle kɛ menli mɔɔ ɛha​—nzisima, ɛtanevolɛma, agyalɛ ɛzɛkyelɛma​—anzɛɛ kɛ adwuledievolɛ ɛhye bɔbɔ la”​—ɛnee adwuledievolɛ ne ɛlɛsɛlɛ Nyamenle kɛ ɔze ye anwunvɔne. Duzu ati a ɛnee Falasiima ne ɛngulo kɛ bɛse anwunvɔne ɛ? Baebolo ne ka kɛ, ɛnee “bɛmbu awie mɔ.”​—Luku 18:9-14.

7, 8. (a) Saa awie fo wɔ a, kɛzi ɛbahola wɔazukoa Gyihova ɛ? (b) Kɛmɔti a ɔhyia mɛlɛbɛnwoaze na yɛava ɛtane yɛahyɛ ɛ?

⁷ Sukoa Gyihova, tɛ Falasiima ne. Da anwunvɔnezelɛ ali. (Kenga Kɔlɔsaema 3:13.) Adenle ko mɔɔ ɛbalua zo wɔayɛ ɛhye la a le kɛ ɛnrɛmaa ɔnrɛyɛ awie mɔ se kɛ bɛbazɛlɛ wɔ ɛkɛ ne ɛtanefakyɛ. (Luku 17:3, 4) Biza ɛ nwo kɛ: ‘Asoo mefa menli mɔɔ bɛvo me, bɔbɔ fane dɔɔnwo la ɛtane mekyɛ bɛ? Asoo mekulo kɛ anzodwolɛ tɛnla me nee awie mɔɔ ɛvo me anzɛɛ ɛgyegye me la avinli?’

⁸ Nɔhalɛ nu, ɔhyia mɛlɛbɛnwoaze na yɛahola yɛava ɛtane yɛahyɛ. Ɛnee Falasiima ne ɛmbu awie mɔ, ɔti ɛnee bɛngulo kɛ bɛfa ɛtane bɛkyɛ. Noko, kɛ Kilisienema la, ɔwɔ kɛ yɛfi mɛlɛbɛnwoaze nu ‘yɛbu yɛ gɔnwo mɔ yɛtɛla yɛ nwo’ na yɛfa bɛ ɛtane yɛkyɛ bɛ. (Fel. 2:3) Ɛbazukoa Gyihova anwunvɔnezelɛ ne na wɔava awie mɔ ɛtane wɔahyɛ bɛ ɔ? Mmamaa ɔyɛ se ɔmaa awie mɔ kɛ bɛbazɛlɛ wɔ ɛkɛ ne ɛtanefakyɛ. Se anwunvɔne, mmafa ɛya ndɛndɛ.​—Nol. 7:8, 9.

9. Kɛzi Gyihova maanle Yizilayɛma dele ɔ bo kɛ ngoane le nwuanzanwuanza ɛ?

⁹ Bɛkpale ɛvealeka azuamgbole ne mɔ kɛ, bɛfa bɛabɔ Yizilayɛma anwo bane amaa bɛanli mogya nwo fɔlɛ. (Mɛla 19:10) Gyihova bu ngoane, na ɔkyi sonla mɔɔ “di mogya nwo fɔlɛ la.” (Mrɛ. 6:16, 17, NW) Nyamenle di pɛlepɛle yɛɛ ɔle nwuanzanwuanza, ɔti ɔnrɛhola ɔnrɛbu ɔ nye ɔnrɛgua mogya mɔɔ tɛ bɛ nye fuu a bɛka bɛgua la azo. Nɔhalɛ nu, bɛzele awie mɔɔ tɛ ɔ nye fuu a ɔhunle ɔ gɔnwo la anwunvɔne. Noko, ɛnee ɔwɔ kɛ ɔka ye edwɛkɛ ne ɔkile mgbanyima ne mɔ, na saa bɛka kɛ tɛ ɔ nye fuu a yɛɛ ɔbadɛnla ɛvealeka suakpole ne azo kɔkpula kɛ ɛsɔfo kpanyinli ne kɛwu la. Ɛhye bahile kɛ ɔbadɛnla ɛkɛ ne ye ngoane mekɛ kɔsɔɔti. Ɛhye maanle Yizilayɛma kɔsɔɔti nwunle kɛ sonla ngoane le nwuanzanwuanza. Amaa bɛawula bɛ Ngoane-Maavolɛ ne anyunlunyia la, ɛnee ɔwɔ kɛ bɛkoati nyɛleɛ anzɛɛ debie biala mɔɔ bava bɛ gɔnwo ngoane ado esiane nu la.

10. Kɛzi Gyisɛse hilele kɛ ɛnee mɛla kilehilevolɛma nee Falasiima ne ɛmbu ngoane ɛ?

¹⁰ Gyihova bu ngoane, noko mɛla kilehilevolɛma nee Falasiima hilele kɛ bɛnlɛ ɛbulɛ biala bɛmmaa ngoane. Adenle boni azo? Gyisɛse zele bɛ kɛ: “Bɛye nrɛlɛbɛ sanvɛ ne bɛvea. Bɛdabɛ a bɛangɔ nu, yɛɛ bɛsi menli mɔɔ ɛlɛkɔ nu la adenle!” (Luku 11:52) Bɛdabɛ a ɛnee ɔwɔ kɛ bɛkilehile Nyamenle Edwɛkɛ ne anu na bɛboa awie mɔ bɛmaa bɛdua dahuu ngoane adenle ne  anu a. Noko, bɛhwenle menli adwenle bɛvile Gyisɛse, “ngoane Adekilevolɛ Kpanyinli ne” anwo bɛmaanle bɛvale adenle mɔɔ bamaa bɛazɛkye bɛ la azo. (Gyi. 3:15) Kɛmɔ ɛnee mɛla kilehilevolɛma nee Falasiima ne memaa bɛ nwo zo na bɛle angomedi la ati, bɛandwenle bɛ gɔnwo mɔ ngoane nee bɛ boɛlilɛ nwo. Nea kɛzi bɛ ti yɛle se na bɛanze anwunvɔne a!

11. (a) Kɛzi ɛzoanvolɛ Pɔɔlo hilele kɛ ɔlɛ Nyamenle adwenle ne bie wɔ ngoane nwo ɛ? (b) Duzu a baboa yɛ amaa yɛala Pɔɔlo subane ne bie ali wɔ daselɛlilɛ nu ɛ?

¹¹ Kɛ ɔkɛyɛ na yɛazukoa Gyihova na yɛanyɛ kɛ mɛla kilehilevolɛma nee Falasiima ne ɛ? Ɔwɔ kɛ yɛbu ngoane ahyɛlɛdeɛ ne. Ɛzoanvolɛ Pɔɔlo yɛle zɔ ɔlua daselɛ bɔkɔɔ mɔɔ ɔlile la azo. Ɔti, ɔholale ɔhanle kɛ: “Menli awie biala mogya nwo ɛzonle.” (Kenga Gyima ne 20:26, 27.) Noko, tɛ Pɔɔlo adwenle mɔɔ ɔbabua ye fɔlɛ anzɛɛ ɔwɔ kɛ ɔka edwɛkɛ ne la ati a ɔyɛle zɔ a. Emomu, ɔhulole menli yɛɛ ɛnee bɛ ngoane sonle bolɛ maa ye. (1 Kɔl. 9:19-23) Ɔwɔ kɛ yɛdayɛ noko yɛbɔ mɔdenle kɛ yɛbanyia adwenle zɛhae bie. Gyihova “[kulo] kɛ menli kɔsɔɔti nu bɛ nwo.” (2 Pita 3:9) Na ɛdawɔ ɛ? Bie a ɛbanwu ye kɛ saa ɛnyia anwunvɔnezelɛ subane a, ɔbamaa wɔayɛ dɔɔnwo wɔ daselɛlilɛ nu amaa ɛ nye alie kpalɛ.

12. Duzu ati a anwobanebɔlɛ nwo hyia Nyamenle menli ɛ?

¹² Saa yɛnyia subane kpalɛ wɔ anwobanebɔlɛ nwo a, ɔkile kɛ yɛlɛ Gyihova adwenle ne bie wɔ ngoane nwo. Saa yɛlɛka kale, yɛlɛsi anzɛɛ yɛlɛsiezie sua yɛɛ saa yɛlɛkɔ ɛleka mɔɔ yɛsonle la a, ɔwɔ kɛ yɛnea boɛ na yɛamboda. Mmamaa gyimayɛlɛ, ezukoa anzɛɛ ngyehyɛleɛ nwo kyia wɔ tɛla menli nwo banebɔlɛ yɛɛ bɛ kpɔkɛdelɛ. Yɛ pɛlepɛlelilɛ Nyamenle ne dahuu yɛ mɔɔ tenrɛ anzɛɛ mɔɔ fɛta la. Yɛkulo kɛ yɛsukoa ye. Ɔwɔ kɛ mgbanyima titili maa bɛdabɛ mumua ne nee menli mɔɔ bɛ nee bɛ ɛlɛyɛ gyima la anwobanebɔlɛ nwo kyia bɛ. (Mrɛ. 22:3) Saa kpanyinli bie fa anwobanebɔlɛ nwo adehilelɛ maa wɔ a, di zo. (Gal. 6:1) Bu ngoane kɛmɔ Gyihova bu ye la, amaa ‘wɔanli fɔlɛ kɛ wɔha mogya wɔgua.’

13, 14. Kɛ ɔkɛyɛ na Yizilayɛ mgbanyima ahola azukoa Gyihova pɛlepɛlelilɛ ne ɛ?

¹³ Gyihova zele Yizilayɛ mgbanyima kɛ bɛzukoa ye pɛlepɛlelilɛ nwo ngyinlazo mɔɔ kpogya la. Mɔɔ limoa, ɔwɔ kɛ mgbanyima ne mɔ nwu nɔhalɛ mɔɔ wɔ edwɛkɛ ne anu la. Eza ɔwɔ kɛ bɛnwu adwenle mɔɔ ahenle mɔɔ hunle ɔ gɔnwo ne lɛ, ye subane nee nyɛleɛ mɔɔ ɔlale ye ali la kolaa na bie a bɛaze ye anwunvɔne. Amaa bɛala pɛlepɛlelilɛ ali la, ɔwɔ kɛ bɛnwu kɛ, yeanva ‘ɛkpɔlɛ yeando ye kɛlɛ kɛ ɔku ye,’ yɛɛ ‘ɔtɛsiale ye kɛ ɔfuandi debie yeabɔ ye yeahu ye.’ (Kenga Ɛdianlɛ 35:20-24.) Yeanyɛ boɛ fee la, kyesɛ menli nwiɔ di daselɛ na bɛabua ye fɔlɛ kɛ ɔ nye fuu a ɔhunle ye a.​—Ɛdi. 35:30.

¹⁴ Saa bɛnwu nɔhalɛ mɔɔ wɔ edwɛkɛ ne anu la a, ɔwɔ kɛ mgbanyima ne mɔ nea ahenle mumua ne, tɛ ye nyɛleɛ ne ala. Bɛhyia nwunu mɔɔ bamaa bɛanwu edwɛkɛ ne anu kpalɛ la. Mɔɔ hyia kpalɛ la, bɛbahyia Gyihova sunsum nwuanzanwuanza ne mɔɔ bamaa bala ye nwunu, anwunvɔnezelɛ nee pɛlepɛlelilɛ ne bie ali la.​—Ade. 34:6, 7.

15. Ngakyile boni a wɔ kɛzi ɛnee Gyisɛse nee Falasiima ne bu ɛtanevolɛma la anu ɛ?

¹⁵ Kɛ anrɛɛ Falasiima ne bava bɛ adwenle azie kɛzi ɛtanevolɛ mumua ne de azo la, bɛvale bɛ adwenle bɛziele mɔɔ ɔyɛle la ala azo. Mɔɔ Falasiima ne nwunle kɛ Gyisɛse ɛhɔ ɛkponledolɛ bie abo wɔ Mateyu sua nu la, bɛbizale ye ɛdoavolɛma ne kɛ: “Duzu ati a bɛ kilehilevolɛ ne nee adwuledievolɛma nee ɛtanevolɛma di aleɛ a?” Gyisɛse buale bɛ kɛ: “Menli mɔɔ te kpɔkɛ la ɛngyia ayileyɛvolɛ nwo, emomu menli mɔɔ ɛnde kpɔkɛ la a hyia  bie a. Akee bɛhɔ, na bɛhɔzukoa mɔɔ ɛhye kile la: ‘Mekulo anwunvɔnezelɛ, na tɛ afɔlebɔlɛ ɔ.’ Ɔluakɛ membale kɛ mebavɛlɛ ɛtanevolɛma na tɛ tenlenema ɔ.” (Mat. 9:9-13) Asoo ɛnee Gyisɛse dielie ɛtanevolɛma zo ɔ? Kyɛkyɛ. Ɛnee ɔkulo kɛ bɛnu bɛ nwo. Ye ngilehilelɛ ne foa mɔɔ anwo hyia kpalɛ la ɛne. (Mat. 4:17) Gyisɛse nwunle kɛ yeanyɛ boɛ fee la, ɛnee “adwuledievolɛma nee ɛtanevolɛma” kulo kɛ bɛkakyi. Bɛangɔ Mateyu sua nu ɛkɛ ne kɛ bɛkali aleɛ ala. Emomu, ɛnee ‘bɛ nwo zonle a bɛdoa Gyisɛse a.’ (Maake 2:15) Ɔyɛ alɔbɔlɛ kɛ Falasiima dɔɔnwo ne ala annwu mɔɔ Gyisɛse nwunle ye wɔ menli ɛhye mɔ anu la. Nyamenle di pɛlepɛle yɛɛ ɔse anwunvɔne, noko Falasiima mɔɔ ɛnee bɛse bɛsonle ye la bule bɛ gɔnwo mɔ kɛ bɛle ɛtanevolɛma na nvasoɛ ɛnle bɛ nwo zo.

16. Saa mgbanyima ɛlɛdi edwɛkɛ a, duzu a bɛbɔ mɔdenle kɛ bɛbanwu ye a?

¹⁶ Ɔwɔ kɛ mgbanyima mɔɔ bɛwɔ ɛkɛ ɛnɛ la sukoa Gyihova mɔɔ “kulo pɛlepɛlelilɛ” la. (Edw. 37:28) Mɔɔ limoa la, ɔwɔ kɛ “bɛbiza nu kpalɛ, [bɛfedevede] nuhua gyɛlɛɛnye” bɛnwu ye kɛ saa awie ɛyɛ ɛtane bie a. Saa ɔle zɔ a, akee bɛbali edwɛkɛ ne kɛmɔ Ngɛlɛlera ne kile la. (Mɛla 13:12-14) Saa bɛlɛdi edwɛkɛ a, ɔwɔ kɛ bɛbɔ mɔdenle bɛnea kɛ Kilisienenli ne mɔɔ yɛle ɛtane kpole ne la ɛnlu ɔ nwo a. Ɔnla aze kɛ ɛbanwu kɛ awie ɛnlu ɔ nwo anzɛɛ ɔtɛnunle ɔ nwo. Kɛzi ɛtanevolɛ ne nwu mɔɔ yeyɛ, ye subane nee mɔɔ wɔ ye ahonle nu la a bahile kɛ yenlu ɔ nwo a. (Yek. 3:3) Kyesɛ ɛtanevolɛ ne nu ɔ nwo kolaa na bɛaze ye anwunvɔne. *

17, 18. Kɛ ɔkɛyɛ na mgbanyima anwu kɛ awie ɛnlu ɔ nwo nɔhalɛ nu ɛ? (Nea mɔlebɛbo nvoninli ne.)

¹⁷ Mgbanyima ne mɔ ɛngola ɛnnwu awie ahonle nu kɛ Gyihova nee Gyisɛse la. Saa ɛle asafo nu kpanyinli a, kɛ ɔkɛyɛ na wɔanwu kɛ awie ɛnlu ɔ nwo nɔhalɛ nu ɛ? Mɔɔ limoa, sɛlɛ nrɛlɛbɛ nee nwunu. (1 Arl. 3:9) Mɔɔ tɔ zo nwiɔ, neɛnlea Nyamenle Edwɛkɛ ne nee mbuluku mɔɔ akɛlɛ nɔhavo ne ɛyɛ mɔɔ baboa yeamaa wɔanwu “ewiade arɛlebɔlɛ” nee “bɛ rɛle mɔɔ [bɔ] wɔ adenle mɔɔ sɔ Nyamenle anye” mɔɔ kile nɔhalɛ anlubɛnwo la. (2 Kɔl. 7:10, 11) Nea kɛzi Ngɛlɛlera ne maa yɛnwu awie mɔɔ ɛnlu ɔ nwo nee mɔɔ ɔtɛnunle ɔ nwo la. Kɛzi Baebolo ne ka bɛ nganeɛdelɛ, bɛ subane nee bɛ nyɛleɛ nwo edwɛkɛ ɛ?

¹⁸ Mɔɔ li awieleɛ, bɔ mɔdenle kɛ ɛbanwu ahenle mumua ne. Suzu abusua mɔɔ ɛtanevolɛ ne vi nu, ye adwenle nee ye sinlidɔlɛ nwo. Baebolo ne hanle Gyisɛse, mɔɔ le Kilisiene asafo ne ati la anwo edwɛkɛ kɛ: “Ɔnrɛbua ndɛne ɛnyelɛzo, yɛɛ ɔnrɛhyea ɔ nzo ɔnrɛbua ndɛne. Ɔbabua ehyianvolɛma ndɛne pɛlepɛle nu, na yeabua awienvolɛma ndɛne pɛpɛ.” (Aye. 11:3, 4) Bɛmɛ mgbanyima, bɛle mboaneneavolɛma wɔ Gyisɛse adehilelɛ bo, na ɔbaboa bɛ yeamaa bɛabua ndɛne kɛ ɔdaye la. (Mat. 18:18-20) Asoo ɔnyɛ yɛ anyelielɛ kɛ yɛlɛ mgbanyima mɔɔ bɔ mɔdenle kɛ bɛbayɛ zɔ la ɔ? Nea kɛzi yɛ nye sɔ mɔdenle mɔɔ bɛbɔ kɛ bɛbamaa anwunvɔnezelɛ nee pɛlepɛlelilɛ ayɛ gyima wɔ yɛ asafo ne mɔ anu a!

19. Duzu a ɛkulo kɛ ɛsukoa ɛfi ɛvealeka azuamgbole nwo ngyehyɛleɛ ne mɔ anu a?

¹⁹ Mosisi Mɛla ne maanle “Mɛla ne anu ninyɛne titili ne nee nɔhalɛ ne” mɔɔ fale Gyihova nee ye tenlene ngyinlazo ne mɔ anwo la lale ali. (Wlo. 2:20) Kɛ neazo la, ɛvealeka azuamgbole ne mɔ maa mgbanyima nwu kɛzi “bɛbua ndɛne nɔhalɛ nu,” eza bɛmaa yɛnwu kɛ ɔwɔ kɛ ‘yɛyɛ ahunlunyele na yɛse yɛ nwo anwunvɔne ngoko ngoko.’ (Zɛk. 7:9) Yɛnle Mɛla ne abo bieko. Noko, Gyihova ɛngakyi yɛɛ pɛlepɛlelilɛ nee anwunvɔnezelɛ nwo tɛkyia ye kpalɛ. Ɔle nwolɛ adenle kpole kɛ yɛlɛsonle Nyamenle zɛhae la. Bɛmaa yɛzukoa ye subane ngɛnlɛma ne mɔ, amaa yɛanyia anwobanebɔlɛ yɛavi ye ɛkɛ!