ALLEN * ka kɛ: “Mɔɔ meba ɛke la ɛnee mesulo, ɛnee mengola menwu ye saa mebahola meanyia agɔnwolɛma anzɛɛ bɛ nye balie me nwo a.” Ɔvi Allen sua nu mɔɔ kɔ ɛleka mɔɔ ye asafo fofolɛ ne wɔ la bayɛ mayɛlɛ 900 (km mɔɔ bo 1,400), na ɔ nye ɛlɛdie ɛkɛ.

Saa wɔhɔ asafo fofolɛ nu a, bie a ɛdawɔ noko ɛzulolɛ baha wɔ. Duzu a baboa wɔ amaa wɔahola wɔadɛnla a? Saa nzenzaleɛ mɔɔ ɔwɔ kɛ ɛyɛ la yɛ se tɛla mɔɔ ɛnee ɛsuzu la a, duzu a ɛbahola wɔayɛ a? Noko saa ɛde ɛkɛ ne a, kɛ ɔkɛyɛ na wɔamaa menli mɔɔ ɛdu ɛra la ahola adɛnla ɛ?

Suzu neazo ɛhye anwo: Saa bɛtu mbaka bɛkɔdua ɛleka fofolɛ a, bɛ nwo kyele bɛ. Saa bɛlɛtu baka bie a, ye ndinli ne dɔɔnwo ka azɛlɛ ne anu, amaa bɛahola bɛava bɛahɔ. Noko saa bɛkɔdua ye wɔ ɛleka fofolɛ a, ɔwɔ kɛ ɔnyia ndinli fofolɛ ndɛndɛ. Zɔhane ala a saa ɛtu ɛkɔ asafo fofolɛ nu a, ɔbamaa ɛ nwo ahyele wɔ ekyi a. Wɔ wɔ asafo dɛba ne anu, ɛnyianle “ndinli” wɔ mekɛ mɔɔ ɛnyianle agɔnwolɛma kpalɛ na ɛhɔle zo ɛlile wɔ sunsum nu ngyehyɛleɛ nzi la. Kɛkala, ɔwɔ kɛ ɛnyia ndinli fofolɛ amaa wɔanyia anyuhɔlɛ wɔ ɛleka mɔɔ wɔhɔ la. Duzu a baboa wɔ a? Fa Baebolo ngyinlazo yɛ gyima. Maa yɛzuzu bie mɔ anwo.

Sonla mɔɔ kenga Nyamenle Edwɛkɛ ne dahuu la le “kɛ azule nloa baka, mɔɔ so ma wɔ ye ɛlobɔ nloa, ye nya ɛmkpolo ɛlɛ, yɛɛ ɔkpazi debie biala anu.”​—Edw. 1:1-3.

Kɛ mɔɔ ɔwɔ kɛ baka nyia nzule dahuu na ɔ nwo ayɛ se la, zɔhane ala a ɔwɔ kɛ Kilisienenli kenga Nyamenle Edwɛkɛ ne dahuu amaa ɔ nee Nyamenle anyia agɔnwolɛvalɛ kpalɛ a. Ɔti, kenga Baebolo ne na kɔ debiezukoalɛ dahuu. Yɛ abusua ɛzonlenlɛ nee bɛtianwo debiezukoalɛ dahuu. Debie biala mɔɔ ɛyɛle amaa ɛ nee Gyihova agɔnwolɛvalɛ ne anu amia la, ɔwɔ kɛ ɛkɔ zo ɛyɛ.

“Mɔɔ yɛ ahunlunyele la, bɛnwu ye anwunvɔne.”​—Mrɛ. 11:25.

Saa ɛyɛ dɔɔnwo wɔ daselɛlilɛ nu a, ɛbanyia anwosesebɛ na ɛ nye alie ndɛndɛ. Kevin, mɔɔ le asafo nu kpanyinli la hanle kɛ: “Debie mɔɔ boale me nee me ye la a le kɛ, yɛhɔle yɛ asafo fofolɛ ne anu la, yeangyɛ yɛyɛle adekpakyelɛ boavolɛ gyima ne bie. Yɛnwunle mediema ne mɔ, adekpakyelɛma ne yɛɛ azɛlɛsinli ne anu.” Roger mɔɔ dule hɔle ɛleka mɔɔ ye tendenle bo mayɛlɛ 1,000 (km mɔɔ bo 1,600) la ka kɛ: “Saa ɛkulo kɛ ɛ nye die wɔ wɔ asafo fofolɛ ne anu a, kɔ daselɛlilɛ dahuu. Eza maa mgbanyima ne mɔ ɛnwu ye kɛ ɛkulo kɛ ɛboa, le kɛ Belemgbunlililɛ Asalo ɛkɛ ɛziezielɛ, awie gyimalilɛ mɔɔ yeamba a ɛbayɛ anzɛɛ ɛbamaa awie avo wɔ kale ne bie ahɔ yɛ ayia ne mɔ la. Saa mediema ne mɔ nwu sonla fofolɛ mɔɔ ɔlɛ tunwomaa sunsum a, bɛ nye die ɔ nwo kpole.”

“Bɛbuke bɛ ahonle nu.”​—2 Kɔl. 6:13.

Tɛlɛ wɔ mediema ɛlɔlɛ ne anu. Mɔɔ Melissa nee ye abusua ne hɔle asafo fofolɛ nu la, bɛyɛle bɛ adwenle kɛ bɛkpondɛ agɔnwolɛma fofolɛ. Ɔka kɛ: “Yɛkɔ debiezukoalɛ ndɛ yɛsoma mediema ne mɔ yɛɛ yɛkpɔne noko a yɛyɛ zɔ. Ɛhye maa yɛnyia adenle yɛbɔ adawu, tɛ ahyebizalɛ ala.” Ɛhye noko  boale abusua ne maanle yɛnwunle mediema ne mɔ aluma ndɛndɛ. Bieko, bɛliele nyɛvolɛ na ɛhye maanle bɛ agɔnwolɛvalɛ ne anu mianle. Ɔtoa zo kɛ: “Yɛliele bɛ fonu nɔma yɛɛ yɛvale yɛ ɛdeɛ yɛmaanle bɛ, ɛhye maa yɛkola yɛfɛlɛ yɛ nwo wɔ mekɛ mɔɔ bɛkulo kɛ yɛbɔ nu yɛyɛ ɛzonlenlɛ gyima ne nee ninyɛne gyɛne la.”

Saa ɛse nyiane a, ɛbahola wɔayɛ debie zɛhae. Kɛ neazo la, yɛ ɛ nloa anwo monvoo​—saa bɔbɔ ɛnde nganeɛ kɛ ɛbayɛ zɔ a. Ɛhye bamaa awie mɔ abikye wɔ. Ɔluakɛ, “fɛlɛkolilɛ maa sonla nyunlu yɛ ɛzelekɛzelekɛ.” (Mrɛ. 15:30) Rachel mɔɔ dule vile ye sua zo hɔle moa la ka kɛ: “Mese nyiane kpalɛ, ɔyɛ a, ɔwɔ kɛ mebɔ mɔdenle kɛ me nee mediema mɔɔ wɔ me asafo fofolɛ ne anu la badendɛ. Mekpondɛ awie mɔɔ ɔ ngomekye ɔde Belemgbunlililɛ Asalo ɛkɛ ne koonwu la. Bie a ahenle se nyiane kɛ medame la.” Duzu ati a ɛnva ɛnyɛ wɔ bodane kɛ saa ɛkɔ debiezukoalɛ biala a, ɛ nee awie mɔɔ ɛnze ye la badendɛ kolaa na bɛabɔ debiezukoalɛ ne abo anzɛɛ mekɛ mɔɔ bɛkpɔne la ɛ?

Wɔ adenle fofolɛ zo, bie a ɛ nye balie kɛ ɛbayia menli fofolɛ wɔ dapɛne ekyi mɔɔ limoa la anu. Noko, mekɛ ɛlɛkɔ la bɛnrɛyɛ “nyɛvolɛ” bieko. Ɔba ye zɔ a, ɔwɔ kɛ ɛdawɔ mumua ne ɛbɔ mɔdenle ɛkɔ zo ɛkpondɛ agɔnwolɛma fofolɛ.

Saa bɛkɔdua mbaka bie mɔ wɔ ɛleka fofolɛ a, ɔkyɛ na bɛasosɔ ndinli kpalɛ. Zɔhane ala a, tɛ awie biala a ɔkɔ asafo fofolɛ nu a ɔ nye die ndɛndɛ a. Saa ɛdule ɛhɔle la yehyɛ, noko ninyɛne ɛngɔ ye boɛ a, Baebolo ngyinlazo ɛhye mɔ mɔɔ ɛbava wɔali gyima la baboa wɔ:

“Bɛmmamaa yɛgyakyi kpalɛyɛlɛ, ɔluakɛ saa yɛangyakyi a, yɛbanyia zolɛ nvasoɛ wɔ mekɛ kpalɛ nu.”​—Gal. 6:9.

Nyia mekɛ dɔɔnwo fa yɛ nzenzaleɛ tɛla kɛzi ɛnee ɛsuzu la. Kɛ neazo la, saa bɛmaa edwɛkpatɛlɛvolɛma dɔɔnwo mɔɔ bɛwie Geleade Sukulu ne la gyimalilɛ wɔ maanle gyɛne zo a, bɛtɛnla ɛkɛ ne ɛvolɛ dɔɔnwo kolaa na bɛazia bɛahɔ bɛ sua zo. Ɛhye boa bɛ ɔmaa bɛ nee mediema ne mɔ nyia agɔnwolɛvalɛ kpalɛ eza bɛnwu ɛkɛ ne amaamuo ne anye zo.

Alejandro mɔɔ ɛdu ɛhɔ asafo ngakyile nu la ɛnwu ye kɛ ɔdie mekɛ na awie anye alie. Ɔka kɛ: “Mekɛ mɔɔ li amozi mɔɔ yɛdule la, me ye hanle kɛ, ‘Me gɔnwo mɔ amuala wɔ yɛ asafo dɛba ne anu!’” Ɔhakyele ɔ ye kɛ ɛvolɛ nwiɔ mɔɔ ɛpɛ nu la, ɔhanle edwɛkɛ ko ne ala. Noko zɔhane ɛvolɛ nwiɔ ne anu, ɔhilele awie mɔ nee nyɛvolɛ nwo anyelielɛ na bɛrayɛle agɔnwolɛma kpalɛ.

“Mmabiza kɛ, ‘Duzu ati a mekɛ mɔɔ ɛze ɛhɔ la le kpalɛ tɛla adwuleso mekɛ ye ɛ?’ Ɔluakɛ nrɛlɛbɛ biala ɛnle nu kɛ ɛkɛbiza ɛhye.”​—Nol. 7:10.

Mmafa wɔ asafo fofolɛ ne ɛtoto dɛba ne anwo. Kɛ neazo la, bie a mediema mɔɔ wɔ wɔ asafo fofolɛ ne anu la ɛngulo ɛdendɛlɛ anzɛɛ bɛkulo ɛdendɛlɛ bɛtɛla wɔ asafo dɛba ne anu amra. Fa wɔ adwenle sie bɛ subane mgbalɛ ne mɔ azo kɛ mɔɔ ɛkulo kɛ bɛdabɛ noko bɛyɛ la. Mediema bie mɔ ɛnwu kɛ bɛdule bɛhɔle asafo fofolɛ nu la ɔmaanle bɛbizale bɛ nwo kɛ, ‘Asoo mekulo “mediema muala” anzɛɛ “mediemayɛlɛ ne”?’​—1 Pita 2:17.

 “Bɛhɔ zo bɛbiza, na bɛ sa baha ye.”—Luku 11:9.

Yɛ asɔne kpondɛ moalɛ dahuu. David mɔɔ le asafo nu kpanyinli la ka kɛ: “Ɛyɛ asɔne ko ala a ɛnee ɔtɛwiele, ninyɛne dɔɔnwo wɔ ɛkɛ mɔɔ tɛ Gyihova moalɛ zo a anrɛɛ yɛngola ye yɛ. Yɛ nwolɛ asɔne!” Rachel mɔɔ yɛlimoa yɛha ɔ nwo edwɛkɛ la ɛnwu ye zɔ. Ɔka kɛ: “Saa me nee me hu te nganeɛ kɛ yɛ nee asafo ne avinli kpondɛ ade a, yɛsɛlɛ Gyihova kɛ, ‘Yɛsɛlɛ wɔ saa yɛyɛ debie mɔɔ ɔmaa ɔyɛ se kɛ awie mɔ babikye yɛ a, maa yɛnwu ye.’ Akee yɛbɔ mɔdenle kɛ yɛbanyia mekɛ dɔɔnwo yɛamaa mediema ne mɔ.”

Awovolɛ, saa ɔyɛ se kɛ bɛ mra anye balie a, bɛ nee bɛ ɛyɛ nwolɛ asɔne. Boa bɛ maa bɛnyia agɔnwolɛma fofolɛ na bɛyɛ ngyehyɛleɛ mɔɔ bamaa bɛanyia adenle bɛ nee mediema adu na bɛanyia anwosesebɛ la.

Duzu a ɛbahola wɔayɛ wɔaboa bɛdabɛ mɔɔ bɛra wɔ asafo ne anu la ɛ? Bɔ mɔdenle kɛ mɔlebɛbo ne ala ɛbayɛ agɔnwolɛ kpalɛ. Amaa wɔayɛ zɔ la, bɔ mɔdenle kɛ ɛbadwenle ninyɛne mɔɔ saa wɔdu wɔhɔ ɛleka fofolɛ a anrɛɛ ɛbahyia nwo la na yɛ zɔ. (Mat. 7:12) Ɛbahola wɔamaa menli mɔɔ ɛra fofolɛ la aboka wɔ abusua ɛzonlenlɛ ne anwo anzɛɛ bɛanlea JW Broadcasting gyimalilɛ ne siane biala ɔ? Ɛbahola ɛ nee bɛ ahɔ daselɛlilɛ ɔ? Saa ɛdie bɛ ɛyɛvolɛ a ɔbamaa bɛahakye wɔ kpalɛ. Duzu moalɛ bieko a ɛbahola wɔava wɔamaa menli mɔɔ bɛdu bɛra la ɛ?

Carlos adiema raalɛ bie ka kɛ, “mɔɔ yɛhɔle yɛ asafo fofolɛ ne anu la, adiema raalɛ bie vale sotɔɔ ngakyile mɔɔ bɛ ninyɛne awolɛ ɛnyɛ se la aluma maanle yɛ. Ɛhye boale kpalɛ.” Bɛdabɛ mɔɔ bɛvi maanle mɔɔ ɛkɛ ne tɛnlabelɛ le ngakyile la anye balie kɛ bɛbanwu adɛladeɛ mɔɔ ɔwɔ kɛ bɛwula wɔ ɛleka mɔɔ ɔle wuluwulu, weɛlɛkɔkɔ anzɛɛ ezule ta tɔ la. Eza ɛbahola wɔaboa bɛ wɔamaa bɛanyia anyuhɔlɛ wɔ daselɛlilɛ nu ɔlua ɛkɛ ne tetedwɛkɛ anzɛɛ diedi mɔɔ bɛlɛ anwo edwɛkɛ mɔɔ ɛbaha wɔahile bɛ la azo.

Allen, mɔɔ yɛlimoa yɛha ɔ nwo edwɛkɛ la ɛdɛnla ye asafo fofolɛ ne anu ɛvolɛ mɔɔ bo ko. Ɔka kɛ: “Ɛnee ɔwɔ kɛ mebɔ mɔdenle kɛ mebanwu mediema ne mɔ kpalɛ. Noko kɛkala bɛte nganeɛ kɛ yɛle abusua, na me nye die kpalɛ.” Allen ɛnwu kɛ asafo fofolɛ mɔɔ ɔhɔle nu la ammaa yeaminli agɔnwolɛma. Emomu, yenyia agɔnwolɛma fofolɛ, mɔɔ bie a bɛbayɛ ɔ gɔnwo mɔ dahuu a.