Bɛwole me wɔ 1983. Me ngakula nu, ɛnee mete kpɔkɛ bɔkɔɔ, noko menlile ɛvolɛ bulu la ɛnee akee me nwo fofo me kpalɛ. Kɛyɛ ɛvolɛ nwiɔ anzi, kenle ko nwonlomɔ mɔɔ mendunwuele la, ɛnee akee mengola me nwo ka. Membɔle mɔdenle biala kɛ memaa me gyakɛ zo, noko yeanyɛ boɛ. Ɔvi kenle zɔhane, metɛkolale metɛtiale bieko. Eza me anwodolɛ ne ammaa meangola nyi. Badwu ɛnɛ, ɛnwu me a ɛbaha kɛ kakula.

Mɔɔ mengale sua nu mekɛ ekyi la, Gyihova Alasevolɛ mraalɛ nwiɔ rale me ɛkɛ. Saa nyɛvolɛ ba sua nu ɛkɛ a memmaa bɛnnwu me, noko kenle zɔhane, mendiele bɛ edwɛkɛ. Mekɛ mɔɔ bɛlɛka Paladaese nwo edwɛkɛ la, ɔmaanle mengakyele edwɛkɛ bie mɔɔ mendele wɔ mekɛ mɔɔ ɛnee meli ɛvolɛ kɛyɛ nnu la. Zɔhane mekɛ ne, ɛnee edwɛkpatɛlɛvolɛ bie mɔɔ bɛfɛlɛ ye Jethro la de Suriname. Ɛnee ɔba namule ne azo kokye siane biala na ɔ nee me papa basukoa Baebolo ne. Ɛnee Jethro anye die me nwo. Ɔti ɛnee medame noko mekulo ye edwɛkɛ kpalɛ. Ɛnee me nenyia mɔ noko fa me kɔ Alasevolɛ ne mɔ debiezukoalɛ mɔɔ bɛyɛ ye wɔ namule ne azo la bie. Ɔti mekɛ mɔɔ mraalɛ ne mɔ ko mɔɔ bɛfɛlɛ ye Florence bizale me kɛ mekulo kɛ mesukoa ninyɛne dɔɔnwo la, mengale kɛ ɛhɛe.

Florence nee ɔ hu Justus ziale rale, na bɛbɔle ɔ bo kɛ bɛ nee me sukoa Baebolo ne. Mɔɔ bɛnwunle kɛ menze kenga la, bɛboale me bɛmaanle menwunle kenga. Kenle ko, agyalɛma ne hanle hilele me kɛ bɛse bɛhɔbɔ edwɛkpa ne nolo wɔ Suriname. Ɔyɛ alɔbɔlɛ kɛ, ɛnee awie biala ɛnle Orealla mɔɔ bahola ɔ nee me adoa Baebolo ɛzukoalɛ ne azo a. Noko, mɔɔ ɔyɛ anyelielɛ la a le kɛ, Gyihova ammaa ɔ rɛle anvi me.

Yeangyɛ, adekpakyelɛnli bie mɔɔ bɛfɛlɛ ye Floyd la rale Orealla, na mɔɔ ɔlɛdi daselɛ wɔ azua nu la ɔradole me. Mɔɔ ɔhanle kɛ ɔkulo kɛ ɔ nee me sukoa Baebolo ne la, menzelele. Ɔbizale me kɛ, “Duzu ati a ɛlɛsele a?” Menganle mengilele ye kɛ mezukoa Duzu A Nyamenle Kpondɛ Avi Yɛ Ɛkɛ Ne A? brohyua ne mewie na mebɔ ɔ bo melɛsukoa Knowledge That Leads to Everlasting Life buluku ne. * Memaanle ɔnwunle deɛmɔti debiezukoalɛ ne ɛdɔ nzule nu la. Floyd nee me zukoale Knowledge buluku ne mɔɔ ɛha la, na bɛyele ɔdaye noko bɛvile ɛkɛ. Yemɔti ɛnee menlɛ awie bieko mɔɔ ɔ nee bazukoa Baebolo ne a.

 Noko wɔ 2004, bɛmaanle adekpakyelɛ titilima nwiɔ, Granville nee Joshua rale Orealla. Mɔɔ bɛlɛdi daselɛ wɔ azua nu la, bɛradole me. Mɔɔ bɛbizale me kɛ mekulo kɛ mesukoa Baebolo ne la, menzelele. Menganle mengilele bɛ kɛ bɛmaa yɛbɔ ɔ bo yɛzukoa Knowledge buluku ne. Ɛnee mekulo kɛ menwu ye saa mɔɔ bɛbaha la nee mɔɔ mezukoa ye dɛba la le ko a. Granville hanle hilele me kɛ bɛyɛ debiezukoalɛ wɔ namule ne azo. Kɛyɛ ɛvolɛ bulu ɛnee metɛfindele alienwo, noko ɛnee mekulo kɛ mekɔ bie. Yemɔti Granville ravale me wɔ sua nu, ɔvale me ɔdɛnlanle abuburama ebia nu na ɔpianle me ɔhɔle Belemgbunlililɛ Asalo.

Nzinlii, Granville maanle me anwosesebɛ kɛ menva me nwo menwula Teokelase Ɛzonlenlɛ Sukulu ne anu. Ɔhanle kɛ: “Ɛngola tia, noko ɛkola tendɛ. Kenle ko dedee ɛbamaa bagua nu ɛdendɛlɛ. Ɔbara nu.” Ye edwɛkɛ ne maanle me anwosesebɛ kpalɛ.

Membɔle ɔ bo kɛ me nee Granville kɔ daselɛlilɛ. Noko kɛ mɔɔ ɛnee namule ne adenle ne azo le ahuma la ati, ɛnee abuburama ebia ne ɛngola ɛnva zo. Yemɔti mengale mengilele Granville kɛ ɔva me ɔdɛnla wheelbarrow nu na ɔpia me ɔmaa yɛhɔ. Yemɔ boale kpalɛ. Bɛzɔnenle me wɔ April 2005. Yeangyɛ, mediema ne mɔ tetele me maanle meneanle asafo mbuluku nee milahyinli mɔɔ bɛfa bɛbɔ edwɛne wɔ Belemgbunlililɛ Asalo ɛkɛ la azo.

Noko alɔbɔlɛ edwɛkɛ a le kɛ, wɔ 2007 me papa dɔle azule nu bodale na ɔwule. Ɔgyegyele yɛ abusua ne kpalɛ. Granville nee yɛ yɛle asɔne na ɔgengale Baebolo ne anu edwɛkɛ bie mɔ ɔkyekyele yɛ rɛle. Ɛvolɛ nwiɔ anzi, alɔbɔlɛ edwɛkɛ bieko zile​—Granville noko wule wɔ azule nu.

Ɛnee asafo nu kpanyinli biala ɛnle yɛ asafo ne mɔɔ ɛlɛdi nyane la anu, ɛnee asafo nu sonvolɛ ko pɛ a wɔ ɛkɛ a. Me gɔnwo kpalɛ Granville ewule ne maanle menlile nyane kpole. Ɔboale me kpalɛ wɔ sunsum nu na ɔmaanle me sa hanle nwonane afoa nu ninyɛne mɔɔ mehyia nwo la. Wɔ dapɛne ne mɔɔ ɔwule la anu debiezukoalɛ mɔɔ yɛhɔle la, ɛnee medame a mekenga Ɛzinzalɛ Arane ne a. Mengengale ɛdendɛkpunli nwiɔ ne mɔɔ limoa la, noko meangola nuhua sɔ na menzunle. Ɛnee ɔwɔ kɛ mefi bama ne azo.

Mɔɔ mediema bie vi asafo gyɛne nu raboale yɛ wɔ Orealla la, akee me nwo gyinlanle me. Eza Bɛtɛle maanle adekpakyelɛ titilinli bie mɔɔ bɛfɛlɛ ye Kojo la rale yɛ asafo ne anu. Me nye liele ɔluakɛ me mame nee me diema nrenyia kakula ne zukoale Baebolo ne na bɛliele ɛzɔnenlɛ. Akee wɔ March 2015, bɛkpale me kɛ asafo nu sonvolɛ. Nzinlii, memaanle me bagua nu ɛdendɛlɛ mɔɔ limoa. Kenle zɔhane, mengakyele edwɛkɛ mɔɔ me gɔnwo Granville hanle hilele me mekɛ bie la. Ɔhanle kɛ: “Kenle ko dedee ɛbamaa bɛagua nu ɛdendɛlɛ. Ɔbara nu.” Ɛhye maanle me nye liele na menzunle.

JW Broadcasting^® gyimalilɛ ne mɔ ɛmaa menwu mediema gyɛne mɔɔ bɛ tɛnlabelɛ ne le kɛ me ɛdeɛ ne la. Ɔnva nwo kɛ bɛle wuliravolɛma la, bɛkola bɛyɛ dɔɔnwo wɔ Gyihova ɛzonlenlɛ nu yɛɛ bɛ nye die kpalɛ. Medame noko mekola meyɛ ninyɛne bie mɔ. Ɛnee mekulo kɛ meyɛ biala mɔɔ mebahola la memaa Gyihova, ɔti menvale me nwo menwulale dahuu adekpakyelɛ gyima ne anu. Wɔ September 2019, mendele azibɛnwo edwɛkɛ bie! Bɛkpale me kɛ asafo nu kpanyinli wɔ yɛ asafo ne mɔɔ nolobɔlɛma kɛyɛ 40 a wɔ nu la anu.

Meyɛ mediema mrenyia nee mraalɛ mɔɔ nee zukoale Baebolo ne na bɛboale me bɛmaanle menyɛle me ɛzonlenlɛ gyima ne la mo. Mɔɔ tɛla ɔ muala la, ɔyɛ me fɛ kpole kɛ Gyihova arɛle anvi me la.