1-2. (a) Duzu ati a ɔwɔ kɛ bɛdabɛ mɔɔ bɛgya fofolɛ la fa bɛ nwo to Gyihova anwo zo a? (Edwɛne 37:3, 4) (b) Duzu a yɛbazuzu nwo wɔ edwɛkɛ ɛhye anu a?

ƆKA ekyi ɛgya anzɛɛ wɔgya fofolɛ ɔ? Saa ɔle zɔ a, ɔkile kɛ ɛ nye la kɛ ɛ nee ahenle mɔɔ ɛkulo ye kpalɛ la anye balie. Nɔhalɛ nu, agyalɛ lɛ ye ngyegyelɛ, yɛɛ bɛdabɛ mɔɔ bɛgya fofolɛ la lɛ ninyɛne bie mɔ mɔɔ hyia mɔɔ ɔwɔ kɛ bɛsisi nwolɛ kpɔkɛ a. Kɛzi bɛbali ngyegyelɛ zɔhane mɔ anwo gyima nee kpɔkɛ mɔɔ bɛbasisi la bahola aha kɛzi bɛ nye balie la wɔ ɛvolɛ dɔɔnwo anu. Saa bɛfa bɛ nwo bɛto Gyihova anwo zo a bɛbasisi kpɔkɛ mɔɔ nrɛlɛbɛ wɔ nu, bɛ agyalɛ ne anu bamia yɛɛ bɛ nye balie kpole. Saa bɛanva Nyamenle folɛdulɛ bɛanli gyima a, ɔbava ngyegyelɛ yeara bɛ agyalɛ ne anu na yemɔ ɛnrɛmaa bɛ nye ɛnrɛlie.​—Kenga Edwɛne 37:3, 4.

² Bɛhɛlɛ edwɛkɛ ɛhye bɛmaa bɛdabɛ mɔɔ bɛgya fofolɛ la ɛdeɛ, noko ɔka ngyegyelɛ mɔɔ agyalɛma kɔsɔɔti bahola ayia bie la anwo edwɛkɛ. Ɔka mɔɔ yɛbahola yɛazukoa yɛavi neazo mɔɔ mrenyia nee mraalɛ nɔhavoma mɔɔ wɔ Baebolo ne anu la yɛle la anu la. Baebolo nu neazo ɛhye mɔ maa yɛnyia ɛzukoalɛdeɛ mɔɔ yɛbahola yɛava yɛali gyima wɔ yɛ ɛbɛlabɔlɛ nu nee yɛ agyalɛ nu a. Eza yɛbanwu mɔɔ yɛbahola yɛazukoa yɛavi ɛnɛ mekɛ ye agyalɛma bie mɔ anwubielɛ ne anu la.

3-4. Ngyegyelɛ boni mɔ a bɛdabɛ mɔɔ bɛgya fofolɛ la bahola ayia a?

³ Wɔannea a menli bie mɔ bamaa bɛdabɛ mɔɔ bɛgya fofolɛ la anwosesebɛ kɛ bɛbɔ bɛ ɛbɛla kɛ mɔɔ menli gyɛne dɔɔnwo bɔ bɛ ɛbɛla ɛnɛ la. Kɛ neazo la, bie a agyalɛma ne awovolɛ nee bɛ mbusuafoɔ gyɛne batinlitinli bɛ kɛ bɛbɔ ɔ bo bɛwo. Anzɛɛ bie a bɛ gɔnwo mɔ nee bɛ mbusuafoɔ mɔɔ bɛdwenle bɛ nwo la bɛaha kɛ bɛzi sua na bɛtotɔ ninyɛne ngɛnlɛma bɛziezie nuhua.

⁴ Saa agyalɛma ne annea ye boɛ a, bɛbasisi kpɔkɛ mɔɔ ɔbahwe kakɛ kpole yeado bɛ nwo a. Saa ɔba ye zɔ a, bie a ɔbamaa agyalɛma ne amunwiɔ ava dɔnehwele dɔɔnwo ayɛ gyima amaa bɛahola bɛaduodua bɛ nwo kakɛ. Ɔbamaa bɛayɛ gyima too mɔɔ bɛnrɛnyia mekɛ bɛnrɛyɛ bɛtianwo Baebolo ɛzukoalɛ, abusua ɛzonlenlɛ nee daselɛlilɛ gyima ne a. Bie bɔbɔ a agyalɛma ne bɛatoto debiezukoalɛ ɛhɔlɛ nu amaa bɛayɛ gyima bɛanyia ezukoa dɔɔnwo anzɛɛ amaa bɛanye bɛ ali wɔ gyima nu. Saa ɔba ye zɔ a, ɔnrɛmaa bɛnrɛnyia adenle bɛnrɛyɛ dɔɔnwo wɔ Gyihova ɛzonlenlɛ nu.

5. Duzu a ɛsukoa ɛfi Klaus nee Marisa neazo ne anu a?

⁵ Neazo dɔɔnwo maa yɛnwu kɛ saa yɛfa yɛ adwenle yɛsie nwonane afoa nu ninyɛne dɔɔnwo ɛkpondɛlɛ zo a, yɛ nye ɛnrɛlie. Suzu mɔɔ dole Klaus nee Marisa mɔɔ bɛle agyalɛma la anwo nea. * Mɔɔ bɛgyale la, bɛvale mekɛ dɔɔnwo bɛyɛle gyima amaa bɛanyia asetɛnla kpalɛ. Noko wɔ bɛ ahonle nu ɛnee bɛ nye ɛnlie. Klaus hanle kɛ: “Ɛnee nwonane afoa nu ninyɛne mɔɔ yɛlɛ la bɔbɔ bo yɛ nwo zo, noko ɛnee yɛnlɛ sunsum nu bodane biala. Nɔhalɛ nu, ɛbɛlabɔlɛ ne yɛle kpomgbondee maanle yɛ yɛɛ ɛnee ɛvɛlɛ ngome.” Bie a ɛdawɔ noko wɔnwu kɛ, nwonane afoa nu ninyɛne dɔɔnwo mɔɔ ɛlɛkpondɛ la ɛtɛmaanle ɛ kunlu ɛtɛdwole ɛ nwo. Saa zɔhane a ɔde a, mmamaa ɛ sa nu to. Saa ɛsuzu neazo kpalɛ mɔɔ awie mɔ yɛle la anwo a, ɔbahola yeaboa wɔ yeamaa wɔayɛ nzenzaleɛ. Mɔɔ limoa, maa yɛzuzu mɔɔ kunlima bahola azukoa avi Belemgbunli Gyɛhɔhyafate neazo ne anu la anwo.

6. Mɔɔ Belemgbunli Gyɛhɔhyafate yiale ngyegyelɛ kpole bie la, kɛzi ɔvale edwɛkɛ mɔɔ wɔ Mrɛlɛbulɛ 3:5, 6 la ɔlile gyima ɛ?

⁶ Kunlima, ɔyɛ a bɛte nganeɛ kɛ ɛzonlelilɛ mɔɔ bɛlɛ la ɛlɛbu bɛ kɔme ɔ? Saa zɔhane a ɔde a, Belemgbunli Gyɛhɔhyafate neazo ne bahola aboa bɛ. Kɛ mɔɔ ɔdaye a ɔle belemgbunli la ati, ɛnee ɔwɔ kɛ ɔbɔ maanle ne amuala anwo bane! Kɛzi ɔlile ɛzonlelilɛ kpole ɛhye anwo gyima ɛ? Gyɛhɔhyafate yɛle biala mɔɔ ɔbahola la kɛ ɔbɔ ye menli ne anwo bane. Ɔliele Dwuda azuamgbole ne mɔ anwo bane na ɔboɔboale sogyama mɔɔ bo 1,160,000 la anloa. (2 Ek. 17:12-19) Nzinlii, Gyɛhɔhyafate yiale ngyegyelɛ kpole bie. Amɔnoma, Mowabema nee menli mɔɔ de Siyɛ awoka ne mɔ azo la ɛlɔne kpole bie nwunlonwunlanle ye, ye  abusua ne nee ye menli ne. (2 Ek. 20:1, 2) Duzu a Gyɛhɔhyafate yɛle a? Ɔzɛlɛle Gyihova kɛ ɔboa ye na ɔmaa ye anwosesebɛ. Ɛhye nee folɛdulɛ mɔɔ nrɛlɛbɛ wɔ nu mɔɔ wɔ Mrɛlɛbulɛ 3:5, 6 la yia. (Kenga.) Asɔne mɔɔ Gyɛhɔhyafate vile mɛlɛbɛnwoaze nu yɛle mɔɔ wɔ 2 Edwɛkɛsisilɛ 20:5-12 la, maa yɛnwu kɛzi ɛnee ɔfa ɔ nwo ɔto ye anwuma Selɛ ne mɔɔ lɛ ɛlɔlɛ la anwo zo la. Duzu a Gyihova yɛle ye wɔ Gyɛhɔhyafate asɔneyɛlɛ ne anwo a?

7. Duzu a Gyihova yɛle ye wɔ Gyɛhɔhyafate asɔneyɛlɛ ne anwo a?

⁷ Gyihova luale Livaenli bie mɔɔ bɛfɛlɛ ye Gyaheezayɛle la anwo zo dendɛle hilele Gyɛhɔhyafate. Gyihova hanle kɛ: “Bɛgyinla bɛ bo zo ne, bɛmmatu bɛ bo, na bɛnlea kɛzi Gyihova balie bɛ ngoane la.” (2 Ek. 20:13-17) Tɛ adenle mɔɔ ɛnee bɛta bɛdua zo bɛko konle la ɛne! Noko akee ɛnee adehilelɛ ɛhye ɛnvi sonla ɛkɛ; ɛnee ɔvi Gyihova ɛkɛ. Gyɛhɔhyafate nyianle ye Nyamenle ne anu anwodozo bɔkɔɔ na ɔyɛle mɔɔ ɔhanle la. Mɔɔ ɔ nee ye menli ne hɔyiale bɛ agbɔvolɛ la, tɛ sogyama mɔɔ bɛze konle nye zo kpalɛ la a ɔvale bɛ ɔlile ye ɛlɔne ne anyunlu a, emomu ɔvale edwɛndolɛma mɔɔ bɛnlɛ akodeɛ biala la a ɔlile bɛ nyunlu a. Gyihova anye Gyɛhɔhyafate arɛle ando ɔ sa nu; Ɔlile ye agbɔvolɛ mɔɔ le ɛlɔne kpole la anwo zo konim.​—2 Ek. 20:18-23.

8. Duzu a kunlima bahola azukoa avi Gyɛhɔhyafate neazo ne anu a?

⁸ Kunlima, bɛbahola bɛazukoa debie bɛavi Gyɛhɔhyafate neazo ne anu. Ɔle bɛ ɛzonlelilɛ kɛ bɛbanlea bɛ abusua ne, ɔti bɛbɔ mɔdenle kpalɛ bɛbɔ bɛ abusua ne anwo bane na bɛboa bɛ. Saa bɛyia ngyegyelɛ a, bie a bɛbade nganeɛ kɛ bɛdabɛ mumua ne bɛbahola bɛali nwolɛ gyima. Noko bɛmmafa bɛ nwo bɛto bɛ ngomekye bɛ anwosesebɛ zo. Emomu, bɛ ngomekye bɛyɛ asɔne bɛzɛlɛ Gyihova moalɛ. Eza bɛ nee bɛ ye mɔ ɛbɔ nu ɛyɛ asɔne. Bɛzukoa Baebolo ne nee mbuluku mɔɔ Gyihova ahyehyɛdeɛ ne ɛyɛ la bɛva bɛkpondɛ Gyihova adehilelɛ na bɛva folɛdulɛ mɔɔ bɛbanyia ye wɔ nu la bɛli gyima. Menli bie mɔ nee wɔ ɛnrɛyɛ adwenle wɔ kpɔkɛ mɔɔ ɛbagyinla Baebolo ne azo wɔasisi la anwo, na bie bɔbɔ a bɛbaha kɛ ɛlɛyɛ koasea. Bie a bɛbaha kɛ ezukoa yɛɛ nwonane afoa nu ninyɛne a bahola abɔ wɔ abusua ne anwo bane kpalɛ a. Noko kakye Gyɛhɔhyafate neazo ne. Ɔvale ye nyɛleɛ ɔhilele kɛ ɔfa ɔ nwo ɔto Gyihova anwo zo. Gyihova amkpo nrenyia ɛhye mɔɔ di nɔhalɛ la, na ɔnrɛkpo ɛdawɔ noko. (Edw. 37:28; Hib. 13:5) Duzu bieko a agyalɛma bahola ayɛ amaa bɛ mu nwiɔ bɛ nye alie a?

9. Duzu a yɛbahola yɛaha ye wɔ ngapezonli Ayezaya nee ɔ ye anwo a?

⁹ Debie mɔɔ ɛnee hyia ngapezonli Ayezaya nee ɔ ye la a le kɛ bɛbazonle Gyihova. Ɛnee Ayezaya le ngapezonli na ɔbayɛ kɛ ɛnee ɔ ye noko lɛ ye ngapezo gyima ɛdeɛ ɔluakɛ ɛnee bɛfɛlɛ ye “ngapezonli raalɛ.” (Aye. 8:1-4) Ɔda ali kɛ Ayezaya nee ɔ ye vale Gyihova ɛzonlenlɛ limoale bɛ ɛbɛlabɔlɛ nu. Bɛyɛle neazo kɛnlɛma mɔɔ agyalɛma bahola azukoa ye ɛnɛ a!

10. Saa agyalɛma sukoa ngapezo mɔɔ wɔ Baebolo ne anu la a, kɛzi ɔbaboa bɛ yeamaa bɛayɛ dɔɔnwo bɛamaa Gyihova ɛ?

¹⁰ Ɛnɛ, saa agyalɛma fa bɛ adwenle sie Gyihova ɛzonlenlɛ zo a ɔbamaa bɛayɛ biala mɔɔ bɛbahola la wɔ ye ɛzonlenlɛ nu. Saa bɛbɔ nu bɛsukoa ngapezo mɔɔ wɔ Baebolo ne anu na bɛnwu kɛzi ɔba nu dahuu la a, ɔbamaa anwodozo mɔɔ bɛlɛ wɔ Gyihova anu la ayɛ kpole. *  (Tae. 1:2) Bɛbahola bɛadwenle ninyɛne bie mɔ mɔɔ bɛbahola bɛayɛ bɛamaa Baebolo ngapezo bie mɔ ara nu la anwo. Kɛ neazo la, bɛbahola bɛaboa bɛamaa Gyisɛse ngapezo mɔɔ se bɛbabɔ edwɛkpa ne nolo wɔ azɛlɛ ye azo amuala kolaa na awieleɛ ne ara la ara nu. (Mat. 24:14) Saa agyalɛma bie nwu kɛ Baebolo ngapezo ɛlɛba nu a, ɔbamaa bɛamia bɛ nwo bɛayɛ biala mɔɔ bɛbahola la bɛamaa Gyihova.

11. Duzu a Pelesela nee Akoyela holale yɛle a, na kɛ ɔyɛle mɔɔ ɔrale ye zɔ ɛ?

¹¹ Mgbavolɛ nee mbɛlɛra mɔɔ bɛgya la bahola azukoa debie avi Pelesela nee Akoyela, agyalɛma bie mɔɔ bɛle Dwuuma mɔɔ ɛnee bɛde Wulomu la ɛkɛ. Ɛnee bɛde Gyisɛse anwo edwɛkpa ne na bɛrayɛ Kilisienema. Ɔda ali kɛ ɛnee bɛ kunlu dwo bɛ nwo. Noko bɛ asetɛnla hakyile arɛlevilɛ nu wɔ mekɛ mɔɔ Maanle Maanle Belemgbunli Kolɔdeɛse hanle kɛ Dwuuma amuala ɛvi Wulomu la. Suzu kɛzi ɛhye hanle Pelesela nee Akoyela la anwo. Ɛnee ɔwɔ kɛ bɛfi ɛleka mɔɔ bɛdɛnla ye mekɛ tendenle la bɛkɔtɛnla ɛleka fofolɛ na bɛbɔ bɛ ɛdanlɛsua ɛnwolɛ gyima ne abo bieko wɔ ɛleka fofolɛ. Asoo tɛnlabelɛ ɛhye mɔɔ bɛhɔle nu la maanle bɛzuhunle Gyihova ɛzonlenlɛ bɛziele ahane ɔ? Ɔbayɛ kɛ ɛze kpuya zɔhane mualɛ. Mɔɔ Akoyela nee Pelesela dule hɔdɛnlanle Kɔlente la, bɛbɔle ɔ bo kɛ bɛboa asafo mɔɔ wɔ ɛkɛ ne la na bɛ nee ɛzoanvolɛ Pɔɔlo bɔle nu yɛle gyima maanle mediema mɔɔ wɔ ɛkɛ ne la anwosesebɛ. Nzinlii, bɛdule bɛhɔle azua gyɛne mɔɔ bɛhyia menli dɔɔnwo mɔɔ bɛbabɔ edwɛkpa ne nolo wɔ ɛkɛ la azo. (Gyi. 18:18-21; Wlo. 16:3-5) Ɛnee bɛnlɛ alagye fee noko nea kɛzi ɔbayɛ kɛ bɛ nye liele a!

12. Duzu ati a ɔwɔ kɛ agyalɛma fa sunsum nu bodane sie bɛ nye zo a?

¹² Agyalɛma mɔɔ wɔ ɛkɛ ne ɛnɛ la bahola ava Belemgbunlililɛ ne alimoa bɛava bɛazukoa Pelesela nee Akoyela. Kolaa na bɛagya la a le mekɛ kpalɛ mɔɔ ɔwɔ kɛ bɛfa bɛsuzu bodane mɔɔ bɛfa bɛazie bɛ nye zo la anwo a. Saa agyalɛma ne bɔ nu si mɔɔ bɛkulo kɛ bɛyɛ ye  wɔ Gyihova ɛzonlenlɛ nu la anwo kpɔkɛ na bɛbɔ mɔdenle bɛyɛ a, ɔbamaa bɛanwu kɛzi Gyihova ɛlɛboa bɛ wɔ bɛ ɛbɛlabɔlɛ nu la. (Nol. 4:9, 12) Suzu mɔɔ Russell nee Elizabeth yɛle la anwo nea. Russell hanle kɛ, “Kolaa na yɛagya la, yɛzuzule bodane fɔɔnwo mɔɔ gyi yɛ nye zo wɔ sunsum nu la anwo.” Elizabeth hanle kɛ, “Yɛzuzule ɛhye anwo amaa saa nzinlii ɔwɔ kɛ yɛsisi kpɔkɛ ngakyile a, yemɔ anzi bodane mɔɔ ɔgyi yɛ nye zo la adenle.” Russell nee Elizabeth tɛnlabelɛ ne maanle bɛholale bɛdule bɛhɔle Micronesia bɛhɔzonlenle wɔ ɛleka mɔɔ bɛhyia nolobɔlɛma dɔɔnwo la.

13. Kɛ mɔɔ Edwɛne 28:7 kile la, saa yɛfa yɛ nwo yɛto Gyihova anwo zo a, duzu a bavi nu ara a?

¹³ Kɛ mɔɔ Russell nee Elizabeth yɛle la, agyalɛma dɔɔnwo ɛzi kpɔkɛ kɛ bɛbava ninyɛne bɛabɔ afɔle na bɛava bɛ mekɛ dɔɔnwo bɛayɛ edwɛkɛhanlɛ nee ngilehilelɛ gyima ne bie. Saa agyalɛma fa bodane mɔɔ bɛbahola bɛadwu nwo wɔ Gyihova ɛzonlenlɛ nu la sie bɛ nye zo na bɛbɔ mɔdenle bɛdwu nwo a, ninyɛne mgbalɛ vi nu bara. Bɛbanwu kɛzi Gyihova dwenle bɛ nwo la, anwodozo mɔɔ bɛlɛ ye wɔ ye nu la bayɛ kpole, na bɛ nye alie kpalɛ.​—Kenga Edwɛne 28:7.

14. Kɛzi ɛzoanvolɛ Pita nee ɔ ye hilele kɛ bɛdie ɛwɔkɛ mɔɔ wɔ Mateyu 6:25, 31-34 la bɛdi ɛ?

¹⁴ Eza agyalɛma bahola azukoa debie avi neazo mɔɔ ɛzoanvolɛ Pita nee ɔ ye yɛle la anu. Mɔɔ ɛzoanvolɛ Pita limoa yiale Gyisɛse la anzi siane nsia kɔdwu ɛvolɛ ko anu, ɛnee ɔwɔ kɛ ɔsi kpɔkɛ bie mɔɔ anwo hyia la. Ɛnee fɛlɛhyelɛ gyima a Pita yɛ nea ye abusua ne a. Ɔti mɔɔ Gyisɛse hanle kɛ Pita ɛgyakyi debie biala na ɔrali ɔ nzi la, ɛnee ɔwɔ kɛ Pita dwenle ye abusua ne anwo. (Luku 5:1-11) Pita kpale kɛ ɔ nee Gyisɛse bahɔyɛ edwɛkɛhanlɛ gyima ne. Ɔzile kpɔkɛ kpalɛ! Na yɛbahola yɛalie yɛali bɔkɔɔ kɛ Pita aye ne liele ye kpɔkɛzilɛ ne dole nu. Baebolo ne kile kɛ mɔɔ bɛdwazole Gyisɛse la anzi, Pita nee ɔ ye dule adenle hɔle ɛleka bie mɔ wɔ mekɛ bie mɔ anu. (1 Kɔl. 9:5) Nɔhalɛ nu, kɛmɔ ɛnee Pita aye ne yɛ neazo kpalɛ la ati, ɔmaanle Pita nyianle akɛnrazilɛ dule Kilisiene kunlima nee yelɛma folɛ. (1 Pita 3:1-7) Ɔda ali wienyi kɛ, Pita nee ɔ ye liele ɛwɔkɛ mɔɔ Gyihova ɛbɔ kɛ saa yɛfa Belemgbunlililɛ ne yɛdimoa yɛ ɛbɛlabɔlɛ nu a, ɔbamaa yɛ sa aha debie biala mɔɔ yɛhyia la lile.​—Kenga Mateyu 6:25, 31-34.

15. Duzu a ɛsukoa ɛfi Tiago nee Esther anwubielɛ ne anu a?

¹⁵ Saa bɛgyale la ɛhyɛ ekyi a, kɛ ɔkɛyɛ na bɛahɔ zo bɛayɛ dɔɔnwo wɔ Gyihova ɛzonlenlɛ nu ɛ? Adenle ko a le kɛ bɛbazukoa mɔɔ agyalɛma gyɛne yɛle la. Kɛ neazo la, bɛbahola bɛagenga edwɛkɛ mɔɔ ba toɔdoa zo mɔɔ ɔ ti ne se “Bɛdule Bɛ Nwo Bɛmaanle” la. Edwɛkɛ ɛhye mɔ boale Tiago nee Esther, agyalɛma bie mɔɔ bɛvi Brazil la ɔmaanle bɛnyianle ɛhulolɛ kpole kɛ bɛbahɔzonle wɔ ɛleka mɔɔ bɛhyia moalɛ kpole la. Tiago hanle kɛ: “Mekɛ mɔɔ yɛgengale kɛzi Gyihova ɛboa ye azonvolɛ wɔ yɛ mekɛ ye azo anwo edwɛkɛ la, ɛnee yɛdayɛ noko yɛkulo kɛ yɛnwu kɛzi Gyihova bahile yɛ adenle na yeanlea yɛ la.” Nzinlii, bɛdule bɛhɔle Paraguay wɔ 2014 na bɛlɛboa menli mɔɔ ka Portuguese aneɛ la. Esther hanle kɛ: “Ngɛlɛlera ko mɔɔ yɛ mu nwiɔ yɛ nye die nwo kpalɛ la a le Ɛfɛsɛsema 3:20. Yɛnwu kɛ zɔhane edwɛkɛ ne ɛra nu fane dɔɔnwo wɔ yɛ ɛzonlenlɛ gyima ye anu.” Pɔɔlo bɔle ɛwɔkɛ wɔ zɔhane kɛlata ne mɔɔ ɔhɛlɛle ɔhɔmaanle Ɛfɛsɛsema ne la anu kɛ, Gyihova bahola ayɛ dɔɔnwo amaa yɛ adɛla mɔɔ yɛbiza la. Ɛwɔkɛ zɔhane le nɔhalɛ bɔkɔɔ!

16. Saa mgbavolɛ nee mbɛlɛra mɔɔ bɛgya la ɛlɛsuzu bodane mɔɔ bɛfa bɛazie bɛ nye zo la anwo a, nwane mɔ a bɛbahola bɛakpondɛ folɛdulɛ bɛavi bɛ ɛkɛ a?

 ¹⁶ Menli mɔɔ bɛzukoale kɛ bɛbava bɛ nwo bɛado Gyihova anwo zo la anwubielɛ ne bahola aboa mgbavolɛ nee mbɛlɛra mɔɔ bɛgya la ɛnɛ. Bie a agyalɛma bie mɔ ɛva ɛvolɛ dɔɔnwo ɛyɛ dahuu ɛzonlenlɛ gyima ne bie. Saa bɛlɛsuzu bodane mɔɔ bɛfa bɛazie bɛ nye zo la anwo a, bɛbahola bɛakpondɛ folɛdulɛ bɛavi bɛ ɛkɛ ɔ? Ɛhye le adenle bieko mɔɔ bɛbahola bɛalua zo bɛahile kɛ bɛfa bɛ nwo bɛto Gyihova anwo zo a. (Mrɛ. 22:17, 19) Asafo nu mgbanyima noko bɛahola aboa mgbavolɛ nee mbɛlɛra mɔɔ bɛgya la bɛamaa bɛava sunsum nu bodane bɛazie bɛ nye zo na bɛadwu nwolɛ.

17. Duzu a dole Klaus nee Marisa a, na duzu a yɛsukoa yɛfi bɛ anwubielɛ ne anu a?

¹⁷ Noko ɔdwu mekɛ ne bie a, bie a kpɔkɛ mɔɔ yɛzi kɛ yɛkpondɛ kɛ yɛtɛlɛ yɛ ɛzonlenlɛ gyima ne anu la ɛnrɛyɛ kɛ mɔɔ yɛ nye la la. Ɛhye bie a dole Klaus nee Marisa mɔɔ yɛlimoa yɛha bɛ nwo edwɛkɛ la a. Mɔɔ bɛgyale la, ye ɛvolɛ nsa anzi, bɛdule bɛvile sua nu kɛ bɛkaboa suazilɛ gyima ne mɔɔ bɛlɛyɛ wɔ Finland ɔfese ɛkɛ ne la. Noko bɛhanle bɛhilele bɛ kɛ bɛbahola bɛadɛnla ɛkɛ ne siane nsia ala. Mɔlebɛbo ne bɛ rɛle bɔle. Noko yemɔ anzi mekɛ ekyi, bɛdole ɛsalɛ bɛvɛlɛle bɛ kɛ bɛhɔboka mediema bie mɔ mɔɔ bɛlɛkile bɛ Arabic la anwo, na kɛkala bɛlɛfa anyelielɛ bɛaha edwɛkɛ ne wɔ maanle gyɛne mɔɔ bɛka Arabic wɔ nu la anu. Marisa dwenlenle mɔɔ zile la anwo na ɔhanle kɛ: “Kɛmɔ ɛnee ɔwɔ kɛ meyɛ debie mɔɔ metɛyɛle bie ɛlɛ la ati me ahonle dule, ɔti ɛnee ɔwɔ kɛ mefa me nwo meto Gyihova anwo zo. Noko menwunle kɛzi Gyihova boale yɛ dahuu wɔ ndenle mɔɔ yɛ nye ɛnla la azo la. Mɔɔ dole yɛ la ɛmaa anwodozo mɔɔ melɛ ye wɔ Gyihova anu la ɛyɛ kpole kpalɛ.” Kɛ mɔɔ neazo ɛhye kile la, yɛbahola yɛalie yɛali kɛ saa yɛfa yɛ nwo yɛto Gyihova anwo zo bɔkɔɔ a ɔbayila yɛ dahuu.

18. Duzu a agyalɛma bahola ayɛ amaa bɛahɔ zo bɛava bɛ nwo bɛado Gyihova anwo zo a?

¹⁸ Agyalɛ le ahyɛlɛdeɛ mɔɔ vi Gyihova ɛkɛ. (Mat. 19:5, 6) Ɔkulo kɛ agyalɛma anye die zɔhane ahyɛlɛdeɛ ne anwo. (Mrɛ. 5:18) Mgbavolɛ nee mbɛlɛra mɔɔ bɛgya la, bɛbahola bɛazuzu ninyɛne mɔɔ bɛlɛfa bɛ ɛbɛlabɔlɛ bɛayɛ la anwo ɔ? Bɛlɛyɛ biala mɔɔ bɛbahola la bɛamaa Gyihova anwu kɛ bɛ nye sɔ ahyɛlɛdeɛ ngakyile mɔɔ yeva yemaa bɛ la ɔ? Bɛha bɛhile Gyihova wɔ asɔneyɛlɛ nu. Bɛnleɛnlea ye Edwɛkɛ ne anu bɛkpondɛ ngyinlazo mɔɔ fale bɛ tɛnlabelɛ ne anwo la. Akee bɛva folɛdulɛ mɔɔ Gyihova bava amaa bɛ la bɛli gyima. Bɛbahola bɛanyia anwodozo kɛ saa bɛfa Gyihova bɛdimoa bɛ agyalɛ ne anu a, bɛbanyia anyelielɛ nee nyilalɛ wɔ bɛ ɛbɛlabɔlɛ nu!