1-2. (a) Kpuya boni mɔ a yɛbazuzu nwo a? (b) Duzu a kile kɛ Gyihova lɛ ɛhulolɛ kpole kɛ ɔbaboa yɛ a?

 GYIHOVA bahola aboa yɛ yeamaa yɛagyinla ngyegyelɛ mɔɔ yɛlɛyia wɔ ɛbɛlabɔlɛ nu la anloa na yɛ nye alie wɔ ye ɛzonlenlɛ nu. Ndenle boni mɔ a ɔdua zo ɔboa yɛ a? Yɛɛ kɛ ɔkɛyɛ na yɛanyia moalɛ mɔɔ Gyihova fa maa la azo nvasoɛ bɔkɔɔ ɛ? Bɛbabua kpuya ɛhye mɔ wɔ edwɛkɛ ɛhye anu. Noko kolaa na yɛanwu mualɛ ne mɔ la, maa yɛnlea kpuya ɛhye noko: Asoo amgba Gyihova lɛ ɛhulolɛ kɛ ɔbaboa yɛ?

² Edwɛkɛkpɔkɛ bie mɔɔ ɛzoanvolɛ Pɔɔlo vale lile gyima wɔ mekɛ mɔɔ ɔlɛkɛlɛ Hibuluma kɛlata ne la bahola aboa yɛ yeamaa yɛanwu mualɛ ne. Pɔɔlo hɛlɛle kɛ: “Gyihova le me boavolɛ; menrɛzulo. Duzu a sonla kɛhola kɛyɛ me a?” (Hib. 13:6) Baebolo nwo buluku bie hanle kɛ, edwɛkɛkpɔkɛ “boavolɛ” mɔɔ bɛva bɛli gyima wɔ ngyɛnu ɛhye anu la abo kile sonla mɔɔ nriandi kɔboa awie mɔɔ ɔlɛsu yeakpondɛ moalɛ la. Pɛ Gyihova mɔɔ ɔlɛyɛ ye ndɛ yeaboa awie mɔɔ ɔlɛnwu amaneɛ la anwo nvoninli. Ɛbalie wɔali bɔkɔɔ kɛ, neazo ɛhye maa yɛnwu kɛ, Gyihova lɛ ɛhulolɛ kpole kɛ ɔbaboa yɛ. Kɛmɔ Gyihova boka yɛ nwo la ati, yɛbahola yɛava anyelielɛ yɛagyinla yɛ sɔnea ne mɔ anloa.

3. Ndenle nsa boni mɔ a Gyihova dua zo boa yɛ ɔmaa yɛfa anyelielɛ yɛgyinla yɛ sɔnea ne mɔ anloa a?

 ³ Ndenle boni mɔ a Gyihova dua zo boa yɛ ɔmaa yɛfa anyelielɛ yɛgyinla yɛ sɔnea ne mɔ anloa a? Amaa yɛabua la, maa yɛhɔ Ayezaya buluku ne anu. Duzu ati ɔ? Ɔluakɛ ngapezo mɔɔ Gyihova maanle Ayezaya hɛlɛle la anu dɔɔnwo fale Nyamenle azonvolɛ anwo ɛnɛ. Eza Ayezaya fa edwɛkɛ agbɔkɛ mɔɔ yɛbade ɔ bo ndɛndɛ la ka Gyihova anwo edwɛkɛ. Fa Ayezaya tile 30 kɛ neazo. Wɔ tile zɔhane anu, Ayezaya vale ndonwo kɛnlɛma hanle kɛzi Gyihova boa ye menli la anwo edwɛkɛ. Ɔhɛlɛle kɛ Gyihova boa yɛ ɔlua (1) yɛ asɔneyɛlɛ mɔɔ ɔtie ye kpalɛ na ɔdi nwolɛ gyima ɔmaa yɛ, (2) adehilelɛ mɔɔ ɔfa ɔmaa yɛ, yɛɛ (3) nyilalɛ mɔɔ ɔfa ɔmaa yɛ kɛkala nee kenle bie la azo. Maa yɛzuzu ndenle nsa ɛhye mɔ mɔɔ Gyihova dua zo boa yɛ la anwo kpalɛ.

4. (a) Kɛzi Gyihova hanle Dwuuma mɔɔ ɛnee wɔ Ayezaya mekɛ zo la anwo edwɛkɛ ɛ, na duzu a akee ɔmaanle ɔzile a? (b) Anyelazo boni a Gyihova maanle bɛdabɛ mɔɔ bɛdi nɔhalɛ la nyianle a? (Ayezaya 30:18, 19)

⁴ Wɔ Ayezaya tile 30 mɔlebɛbo ne, Gyihova hanle Dwuuma anwo edwɛkɛ kɛ bɛle “anzosesebɛ mralɛ” mɔɔ ‘bɛfa ɛtane bɛboka ɛtane nwo’ a. Ɔvale ɔdoale zo kɛ: “Bɛle atuadelɛ menli, . . . mɔɔ bɛngulo kɛ bɛtie Gyihova mɛla” a. (Aye. 30:1, 9) Kɛmɔ menli ne andie Gyihova la ati, Ayezaya hanle kɛ Gyihova bamaa munzule ado bɛ. (Aye. 30:5, 17; Gyɛ. 25:8-11) Na amgba noko Babelɔnoma vale bɛ hɔle akɛlɛzonlenlɛ nu. Noko ɛnee Dwuuma ne bie di nɔhalɛ, na ɛnee ɔwɔ kɛ Ayezaya ka anyelazo edwɛkɛ bie kile bɛ. Ɔhanle ɔhilele bɛ kɛ kenle ko dedee Gyihova baze bɛ anwunvɔne. (Kenga Ayezaya 30:18, 19.) Na zɔhane pɛpɛɛpɛ a ɔzile a. Gyihova liele bɛ vile Babelɔn akɛlɛzonlenlɛ nu. Noko tɛ ɛkɛ ne ala a Gyihova liele bɛ a. Edwɛkɛ, “Gyihova ɛlɛfa abotane ahendɛ kɛ ɔboa bɛ,” kile kɛ mekɛ bie bapɛ nu kolaa na bɛalie nɔhavoma ne. Nɔhalɛ nu, Yizilayɛma lile ɛvolɛ 70 wɔ Babelɔn akɛlɛzonlenlɛ nu kolaa na bie mɔ azia ahɔ Gyɛlusalɛm. (Aye. 10:21; Gyɛ. 29:10) Mɔɔ bɛziale bɛhɔle bɛ sua zo la, alɔbɔlɛ ɛzunlɛ mɔɔ bɛzunle wɔ akɛlɛzonlenlɛ nu la hakyile yɛle anyelielɛ ɛzunlɛ.

5. Anwodozo boni a Ayezaya 30:19 maa yɛnyia a?

⁵ Ɛnɛ, edwɛkɛ ɛhye bahola akyekye yɛ rɛle: “Saa ɔte kɛ bɛlɛsu bɛakpondɛ moalɛ a, ɔbaze bɛ anwunvɔne.” (Aye. 30:19) Ayezaya maa yɛnyia anwodozo kɛ, saa yɛsu yɛfɛlɛ Gyihova a, ɔbadie yɛ kpalɛ, yɛɛ ɔbayɛ ye ndɛ yeabua yɛ modolɛ asɔneyɛlɛ ne mɔ. Ayezaya vale zɔle zolɛ kɛ: “Saa ɔte bɛ ne ala a, ɔbalie bɛ zo.” Edwɛkɛ ɛhye mɔ mɔɔ maa yɛnyia anwodozo la kakye yɛ kɛ, yɛ Ze ne lɛ ɛhulolɛ​​—ɛhɛe, ɛhulolɛ kpole kɛ ɔbaboa bɛdabɛ mɔɔ bɛkpondɛ moalɛ bɛfi ye ɛkɛ la. Saa yɛnwu ɛhye a, ɔboa yɛ ɔmaa yɛfa anyelielɛ yɛgyinla kpundii.

6. Kɛzi Ayezaya edwɛkɛ ne kile kɛ Gyihova tie ye sonvolɛ ko biala asɔneyɛlɛ ɛ?

⁶ Anwodozo boni bieko a ngyɛnu ɛhye maa yɛnyia wɔ yɛ asɔneyɛlɛ nwo a? Gyihova tie yɛ nuhua ko biala asɔneyɛlɛ kpalɛ. Duzu ati a yɛkola yɛka ye zɔ a? Wɔ Ayezaya tile 30 ne foa mɔɔ limoa la anu, Gyihova vale dumagya “bɛ” a lile gyima a, ɔluakɛ ɛnee ɔlɛtendɛ yeahile ye menli ne kɛ ekpunli. Noko wɔ aneɛ mɔɔ bɛlimoale bɛvale bɛhɛlɛle Baebolo ne la anu, ɛnee bɛlɛka sonla ko anwo edwɛkɛ wɔ ngyɛnu 19 ne. Ayezaya hɛlɛle kɛ: “Ɛnrɛzu bieko”; “ɔbaze wɔ anwunvɔne”; “ɔbalie wɔ zo.” Kɛmɔ Gyihova le Selɛ mɔɔ lɛ ɛlɔlɛ la ati, ɔnga ɔngile ɔ ra bie mɔɔ ɔ rɛle ɛbɔ la kɛ, “Ɔwɔ kɛ ɛmaa ɛ nwo yɛ se kɛ ɛ diema ne la.” Emomu, ɔdwenle yɛ nuhua ko biala anwo, yɛɛ ɔdaye mumua ne ɔtie yɛ asɔneyɛlɛ.​​—Edw. 116:1; Aye. 57:15.

7. Kɛzi Ayezaya nee Gyisɛse maa yɛnwu kɛ ɔhyia kɛ yɛkɔ zo yɛyɛ asɔne ɛ?

⁷ Saa yɛfa yɛ edwɛkɛ yɛto Nyamenle  anyunlu wɔ asɔneyɛlɛ nu a, bie a Gyihova balimoa amaa yɛ anwosesebɛ mɔɔ yɛbava yɛagyinla tɛnlabelɛ ne anloa la. Na saa yɛ sɔnea ne abo ampɛ ɛkɛ ne ala kɛ mɔɔ yɛ nye la la a, bie a ɔbahyia kɛ yɛsɛlɛ Gyihova fane dɔɔnwo kɛ ɔmaa yɛ anwosesebɛ ɔmaa yɛhola yɛgyinla ɔ nloa. Ɔse yɛyɛ ye zɔ. Tie edwɛkɛ ɛhye mɔɔ Ayezaya hanle la: “Bɛmmamaa [Gyihova tɛnla] ɛkɛ koonwu.” (Aye. 62:7) Duzu a ɛhye kile a? Ɔwɔ kɛ yɛkɔ zo yɛyɛ asɔne yɛmaa ɔyɛ kɛ asɛɛ yɛngulo kɛ yɛmaa Gyihova die ɔ menle la. Ayezaya edwɛkɛ ne maa yɛkakye ndonwo mɔɔ Gyisɛse yɛle wɔ asɔneyɛlɛ nwo mɔɔ wɔ Luku 11:8-10, 13 la. Gyisɛse maanle yɛ anwosesebɛ wɔ ɛkɛ ne kɛ ɔwɔ kɛ yɛmaa ‘yɛ nye bolo’ yɛyɛ asɔne na ‘yɛkɔ zo yɛbiza’ sunsum nwuanzanwuanza ne. Eza yɛbahola yɛazɛlɛ Gyihova kɛ ɔva adehilelɛ mɔɔ yɛhyia nwo amaa yɛazi kpɔkɛ kpalɛ la ɔmaa yɛ.

8. Kɛzi edwɛkɛ mɔɔ wɔ Ayezaya 30:20, 21 la rale nu wɔ tete ne ɛ?

⁸ Kenga Ayezaya 30:20, 21. Mɔɔ Babelɔn ɛlɔnema bɛngale Gyɛlusalɛm yiale too ɛvolɛ ko nee foa la, anwongyelelɛ mɔɔ menli ne hɔle nu la yɛle kɛ asɛɛ aleɛ nee nzule maanle bɛ. Noko kɛ mɔɔ ngyehyɛnu 20 nee 21 ne kile la, Gyihova bɔle Dwuuma ne ɛwɔkɛ kɛ, saa bɛnu bɛ nwo na bɛkakyi bɛ subane a, ɔbalie bɛ. Mɔɔ Ayezaya ka Gyihova anwo edwɛkɛ kɛ ɔle bɛ “Kilehilevolɛ Kpole Kpalɛ” la, ɔbɔle menli ne ɛwɔkɛ kɛ Gyihova bahile bɛ adenle kpalɛ mɔɔ bɛbalua zo bɛazonle Ye la. Zɔhane edwɛkɛ ne rale nu wɔ mekɛ mɔɔ bɛliele Dwuuma ne bɛvile akɛlɛzonlenlɛ nu la. Gyihova maanle bɛnwunle kɛ, ɔdaye a ɔle bɛ Kilehilevolɛ Kpole Kpalɛ ne a, na adehilelɛ mɔɔ ɔvale ɔmaanle ye menli ne la maanle bɛholale bɛvale nɔhalɛ ɛzonlenlɛ bɛziele ɛkɛ ne bieko. Yɛ nye die kɛ Gyihova le yɛ Kilehilevolɛ Kpole Kpalɛ ɛnɛ la.

9. Adenle ko mɔɔ yɛdua zo yɛnyia Gyihova adehilelɛ ɛnɛ la a le boni?

⁹ Wɔ ngyehyɛnu zɔhane mɔ anu, Ayezaya hanle kɛ yɛle kɛ sukoavoma mɔɔ Gyihova kilehile yɛ wɔ ndenle nwiɔ azo a. Mɔɔ limoa, Ayezaya hanle kɛ: “Bɛbava bɛ nye bɛanwu bɛ Kilehilevolɛ Kpole Kpalɛ ne.” Wɔ ndonwo ɛhye anu, Ayezaya hanle kɛ Kilehilevolɛ ne gyi ye sukoavoma ne anyunlu. Yɛnyia nwolɛ adenle kpole kɛ Gyihova kilehile yɛ ɛnɛ la. Kɛzi ɔyɛ ye ɛ? Ɔdua ye ahyehyɛdeɛ ne azo. Yɛyɛ Gyihova mo wɔ adehilelɛ mɔɔ nuhua la ɛkɛ mɔɔ yɛnyia yɛfi ye ahyehyɛdeɛ ne ɛkɛ la anwo! Adehilelɛ mɔɔ bɛdua debiezukoalɛ, nyianu, mbuluku, JW Broadcasting® nee ndenle gyɛne zo bɛfa bɛmaa yɛ la boa yɛ wɔ mekɛ mɔɔ yɛlɛyia  ngyegyelɛ la ɔmaa yɛfa anyelielɛ yɛgyinla ɔ nloa.

10. Adenle boni azo a ‘yɛte edwɛkɛ bie wɔ yɛ nzi’ a?

¹⁰ Ayezaya hanle adenle bieko mɔɔ Gyihova dua zo kilehile yɛ la anwo edwɛkɛ kɛ: “Bɛ nzo bade edwɛkɛ bie wɔ bɛ nzi.” Ngapezonli ne hanle Gyihova anwo edwɛkɛ wɔ ɛke kɛ, ɔle kɛ kilehilevolɛ mɔɔ ɔ nye wɔ ye sukoavoma anwo na ɔli bɛ nzi ɔlɛkile bɛ adenle mɔɔ ɔwɔ kɛ bɛdua nu la. Ɛnɛ, yɛte Nyamenle ane wɔ yɛ nzi. Adenle boni azo? Bɛhɛlɛle Nyamenle edwɛkɛ ne wɔ mekɛ tendenle mɔɔ ɛze ɛhɔ la, ɛnee bɛtɛnyianle bɛtɛwole yɛ bɔbɔ. Ɔti saa yɛkenga Baebolo ne a, ɔle kɛ asɛɛ yɛte Nyamenle ane wɔ yɛ nzi la.​​—Aye. 51:4.

11. Amaa yɛava anyelielɛ yɛagyinla kpundii la, duzu a ɔwɔ kɛ yɛyɛ a, na duzu ati ɔ?

¹¹ Kɛ ɔkɛyɛ na yɛanyia adehilelɛ mɔɔ Gyihova dua ye ahyehyɛdeɛ ne nee ye Edwɛkɛ ne azo fa maa yɛ la azo nvasoɛ bɔkɔɔ ɛ? Yɛ ye nzonle kɛ Ayezaya hanle ninyɛne nwiɔ anwo edwɛkɛ. Mɔɔ limoa, “adenle ne ɛne.” Mɔɔ tɔ zo nwiɔ, “bɛlua nu.” (Aye. 30:21) Saa yɛnwu “adenle ne” a, ɛnee ɔtɛwiele. Eza ɔhyia kɛ ‘yɛdua nu.’ Gyihova dua ye Edwɛkɛ ne mɔɔ ye ahyehyɛdeɛ ne kilehile nu kile yɛ la azo ɔmaa yɛnwu mɔɔ ɔkpondɛ kɛ yɛyɛ la. Eza yɛnwu kɛzi yɛbava mɔɔ yɛsukoa la yɛali gyima la. Amaa yɛava anyelielɛ yɛagyinla kpundii wɔ Gyihova ɛzonlenlɛ nu la, ɔwɔ kɛ yɛyɛ ɔ mu nwiɔ. Saa yɛsukoa Gyihova anwo debie na yɛfa yɛyɛ gyima a, yɛɛ yɛbahola yɛanyia anwodozo kɛ ɔbayila yɛ a.

12. Kɛ mɔɔ Ayezaya 30:23-26 kile la, kɛzi Gyihova yilale ye menli ne ɛ?

¹² Kenga Ayezaya 30:23-26. Kɛzi ngapezo ɛhye rale nu maanle Dwuuma mɔɔ vile Babelɔn akɛlɛzonlenlɛ nu ziale hɔle Yizilayɛ azɛlɛ zo la ɛ? Bɛnyianle nyilalɛ dɔɔnwo​—nwonane nu nee sunsum nu. Gyihova maanle ye menli ne nyianle aleɛ dɔɔnwo. Noko mɔɔ hyia kpalɛ la, ɔmaanle bɛ sunsum nu aleɛ dɔɔnwo wɔ mekɛ mɔɔ bɛlɛyɛ ye ngyikyingyikyi bɛava nɔhalɛ ɛzonlenlɛ bɛazie ɛkɛ ne bieko la. Sunsum nu nyilalɛ mɔɔ Nyamenle menli ne nyianle wɔ mekɛ zɔhane la bo debie biala mɔɔ bɛlimoale bɛnyianle la azo. Ngyɛnu 26 ne maa yɛnwu kɛ, Gyihova maanle bɛ sunsum nu kɛnlaneɛ ne dale kpole. (Aye. 60:2) Gyihova nyilalɛ boale ye azonvolɛ maanle bɛhɔle zo bɛvale anyelielɛ nee kpundiigyinlanlɛ bɛzonlenle ye ɔluakɛ ɛnee bɛlɛ “ahonle kpalɛ.”​​—Aye. 65:14.

13. Kɛzi ngapezo mɔɔ fale nɔhalɛ ɛzonlenlɛ mɔɔ bɛbava bɛazie ɛkɛ ne bieko anwo la ɛra nu wɔ yɛ mekɛ ye azo ɛ?

¹³ Asoo ngapezo mɔɔ fale nɔhalɛ ɛzonlenlɛ mɔɔ bɛbava bɛazie ɛkɛ ne bieko anwo la fale yɛ nwo ɛnɛ ɔ? Ɛhɛe! Wɔ adenle boni azo? Ɔvi  1919 Y.M., menli mgbe dɔɔnwo ɛlie bɛ nwo ɛvi Babelɔn Kpole ne, ewiade amuala adalɛ ɛzonlenlɛ maanle ne akɛlɛzonlenlɛ bo. Bɛva bɛ bɛhɔ ɛleka mɔɔ le kpalɛ bɔkɔɔ tɛla Yizilayɛma Ɛwɔkɛ Azɛlɛ ne la. Bɛva bɛ bɛra sunsum nu paladaese. (Aye. 51:3; 66:8) Duzu a le zɔhane sunsum nu paladaese ne?

14. Duzu a le sunsum nu paladaese ne, na nwane mɔ a de ɛkɛ ne ɛnɛ a? (Nea Edwɛkɛ Mɔɔ Bɛhilehile Nu.)

¹⁴ Ɔvi 1919 Y.M. mɔɔ ba la, menli mɔɔ bɛkpokpa bɛ la ɛva anyelielɛ ɛdɛnla sunsum nu paladaese ne anu. b Mekɛ ɛlɛkɔ la, “mboane gyɛne” ne, bɛdabɛ mɔɔ bɛlɛ azɛlɛ ye azo anyelazo la noko ɛdɛnla azɛlɛ ɛhye azo na bɛnyia Gyihova nyilalɛ dɔɔnwo ne bie.​​—Dwɔn 10:16; Aye. 25:6; 65:13.

15. Nienwu a sunsum nu paladaese ne wɔ a?

¹⁵ Nienwu a yɛbanwu sunsum nu azɛlɛ anzɛɛ paladaese ne ɛnɛ a? Gyihova azonvolɛ wɔ ewiade anu ɛleka biala. Ɔti sunsum nu paladaese ne mɔɔ bɛde nu la wɔ ewiade ɛleka biala. Yemɔti ɛnɛ, ɔnva nwo ɛleka biala mɔɔ yɛde wɔ azɛlɛ ye azo la, saa yɛbɔ mɔdenle yɛboa nɔhalɛ ɛzonlenlɛ a, yɛbahola yɛaboka sunsum nu paladaese ne anwo.

16. Kɛ ɔkɛyɛ na yɛahɔ zo yɛanwu kɛzi sunsum nu paladaese ne kɛnlɛma de la ɛ?

¹⁶ Amaa yɛahɔ zo yɛadɛnla sunsum nu paladaese ne anu la, ɔwɔ kɛ yɛnyia anyezɔlɛ kpole yɛmaa asafo ngakyile mɔɔ wɔ ewiade amuala la. Kɛzi yɛbahola yɛayɛ ɛhye ɛ? Ɔwɔ kɛ yɛfa yɛ adwenle yɛsie ye kɛnlɛma ne azo na tɛ menli mɔɔ wɔ nu la sinlidɔlɛ zo ɔ. (Dwɔn 17:20, 21) Duzu ati a ɛhye anwo hyia a? Dwenle ndotonwo ɛhye anwo. Saa yɛlɛkɔ tola bie anu a, yɛ nye la kɛ yɛbanwu mbaka ngakyile. Zɔhane ala a menli ngakyile mɔɔ bɛva bɛ bɛtoto mbaka nwo la wɔ yɛ sunsum nu paladaese ne mɔɔ wɔ asafo ne mɔ anu ɛnɛ la anu a. (Aye. 44:4; 61:3) Ɔwɔ kɛ yɛfa yɛ adwenle yɛsie kɛzi “ɛhoayelɛ” ne kɛnlɛma de la azo na tɛ nvonleɛ mɔɔ wɔ “mbaka” mɔɔ bikye yɛ anwo la azo. Ɔnle kɛ yɛmaa yɛdayɛ mumua ne yɛ sinlidɔlɛ anzɛɛ menli mɔɔ wɔ asafo ne anu la ɛdeɛ maa yɛ adwenle fi koyɛlɛ kɛnlɛma mɔɔ wɔ yɛ Kilisiene asafo ne anu la azo.

17. Duzu a yɛ nuhua ko biala bahola ayɛ amaa koyɛlɛ adɛnla asafo ne anu a?

 ¹⁷ Duzu a yɛ nuhua ko biala bahola ayɛ amaa koyɛlɛ adɛnla asafo ne anu a? Ɔwɔ kɛ yɛyɛ menli mɔɔ yɛkpondɛ anzodwolɛ. (Mat. 5:9; Wlo. 12:18) Mekɛ biala mɔɔ yɛbabɔ mɔdenle kɛ yɛmaa anzodwolɛ adɛnla yɛ nee awie mɔ avinli wɔ asafo ne anu la, ɛnee yɛlɛmaa sunsum nu paladaese ne ayɛ kɛnlɛma. Yɛkakye kɛ Gyihova a ɛhwe awie ko biala mɔɔ wɔ sunsum nu paladaese ne anu la ɛra nɔhalɛ ɛzonlenlɛ nu a. (Dwɔn 6:44) Saa Gyihova nwu kɛ yɛlɛbɔ mɔdenle yɛamaa anzodwolɛ nee koyɛlɛ adɛnla bɛdabɛ mɔɔ bɛsonle bolɛ​​—ye azonvolɛ avinli a, nea kɛzi ɔ nye die a!​​—Aye. 26:3; Hagae 2:7.

18. Duzu a ɔwɔ kɛ yɛta yɛdwenledwenle nwo a, na nzɔne ati ɔ?

¹⁸ Kɛ ɔkɛyɛ na yɛanyia nyilalɛ mɔɔ Nyamenle fa maa yɛ kɛ ye azonvolɛ la azo nvasoɛ bɔkɔɔ ɛ? Yɛbahola yɛadwenledwenle mɔɔ yɛsukoa yɛfi Nyamenle Edwɛkɛ ne nee yɛ mbuluku ne mɔ anu la anwo yɛahɔ moa. Saa yɛsukoa debie na yɛdwenledwenle nwolɛ wɔ adenle ɛhye azo a, ɔbaboa yɛ yeamaa yɛanyia Kilisiene subane mɔɔ baha yɛ yeamaa ‘yɛava mediema ɛlɔlɛ yɛahulo yɛ nwo ngoko’ wɔ asafo ne anu la. (Wlo. 12:10) Mekɛ mɔɔ yɛlɛdwenledwenle nyilalɛ mɔɔ yɛnyia ye kɛkala anwo la, ɛnee yɛlɛmia yɛ nee Gyihova agɔnwolɛvalɛ ne anu. Yɛɛ saa yɛdwenledwenle nyilalɛ mɔɔ Gyihova bava amaa yɛ kenle bie la anwo a, ɔbamaa anyelazo mɔɔ yɛlɛ kɛ yɛbazonle ye dahuu la ayɛ kpole. Ɛhye mɔ amuala baboa yɛ yeamaa yɛava anyelielɛ yɛazonle Gyihova kɛkala.

19. (a) Kɛ mɔɔ Ayezaya 30:18 kile la, duzu a yɛbahola yɛalie yɛali a? (b) Nzɔne a baboa yɛ yeamaa yɛava anyelielɛ yɛagyinla kpundii a?

¹⁹ Gyihova ‘bamaa ɔ nwo zo’ alie yɛ wɔ mekɛ mɔɔ ɔlɛsɛkye ɛtane ewiade ɛhye la. (Aye. 30:18) Yɛlɛ anwodozo kɛ Gyihova​​—“pɛlepɛle Nyamenle” ne​​—ɛnrɛmaa Seetan ewiade ne ɛnrɛli kenle ko bɔbɔ ɛnrɛboka kenle mɔɔ ɔfa yeazɛkye ye la anwo. (Aye. 25:9) Yɛ nee Gyihova ɛlɛfa abotane ahendɛ kɛ ngoanelielɛ kenle zɔhane badwu. Noko kɔkpula kɛ mekɛ zɔhane badwu la, yɛbɔ kpɔkɛ kɛ yɛbahɔ zo yɛabu nwolɛ adenle mɔɔ yɛlɛ yɛyɛ asɔne la kɛ ɔsonle bolɛ, yɛbazukoa Nyamenle Edwɛkɛ ne na yɛava yɛabɔ yɛ ɛbɛla yɛɛ yɛbadwenledwenle yɛ nyilalɛ ne mɔ anwo. Saa yɛyɛ zɔ a, Gyihova baboa yɛ yeamaa yɛava anyelielɛ yɛagyinla kpundii yɛazonle ye.