1. Kɛzi yɛkola yɛnwu kɛ Gyihova kulo kɛ ɔbikye yɛ ɛ?

 GYIHOVA se yɛbikye ye. (Gye. 4:8) Ɔkulo kɛ ɔyɛ yɛ Nyamenle, yɛ Ze yɛɛ yɛ Gɔnwo. Ɔbua yɛ asɔneyɛlɛ yɛɛ ɔboa yɛ wɔ ngyegyelɛ mekɛ nu. Eza ɔdua ye ahyehyɛdeɛ ne azo ɔbɔ yɛ nwo bane. Noko duzu a ɔwɔ kɛ yɛyɛ amaa yɛabikye Gyihova a?

2. Kɛ ɔkɛyɛ na yɛabikye Gyihova ɛ?

² Saa yɛfa yɛ asɔneyɛlɛ yɛto Gyihova anyunlu, yɛkenga ye Edwɛkɛ ne na yɛdwenledwenle nwo a, yɛbahola yɛabikye ye. Saa yɛyɛ ɛhye a, ɔmaa yɛnyia ɔ nwo ɛlɔlɛ kpole na yɛkile mɔɔ ɔyɛ la anwo anyezɔlɛ. Ɔka yɛ ɔmaa yɛyɛ tieyɛ na yɛfa ayɛlɛyelɛ mɔɔ fɛta ye la yɛmaa ye. (Yek. 4:11) Mekɛ mɔɔ yɛlɛnwu Gyihova kpalɛ la, ɛnee yɛlɛnyia ɔdaye nee ahyehyɛdeɛ ne mɔɔ yeva yɛmaa yɛ kɛ ɔboa yɛ la anu anwodozo kpole.

3. Kɛzi Abɔnsam bɔ mɔdenle kɛ ɔtwe yɛ yeavi Gyihova anwo ɛ, noko duzu a baboa yɛ amaa yɛamkpo yɛ Nyamenle ne nee ye ahyehyɛdeɛ ne ɛlɛ ɛ? (Edwɛne 31:13, 14)

³ Noko Abɔnsam bɔ mɔdenle kɛ ɔtwe yɛ yɛavi Gyihova anwo, titili wɔ mekɛ mɔɔ yɛlɛyia ngyegyelɛ la. Kɛzi ɔyɛ ye ɛ? Ɔbɔ mɔdenle kɛ ɔyɛ ye ngyikyingyikyi yeamaa anwodozo mɔɔ yɛlɛ wɔ Gyihova nee ye ahyehyɛdeɛ ne anu la azɛkye. Noko yɛbahola yɛaho yɛatia ye. Saa yɛ diedi nu yɛ se na yɛfa yɛ nwo yɛto Gyihova anwo zo bɔkɔɔ a, yɛnrɛkpo yɛ Nyamenle ne nee ye ahyehyɛdeɛ ne.​​—Kenga Edwɛne 31:13, 14.

4. Duzu a yɛbazuzu nwo wɔ edwɛkɛ ɛhye anu a?

 ⁴ Wɔ edwɛkɛ ɛhye anu, yɛbazuzu ngyegyelɛ nsa mɔɔ yɛbahola yɛayia yɛavi menli mɔɔ ɛnle asafo ne anu ɛkɛ la anwo; nuhua ko biala bahola azɛkye anwodozo mɔɔ yɛlɛ wɔ Gyihova nee ye ahyehyɛdeɛ ne anu la. Kɛzi bɛbahola bɛahwe yɛ bɛavi Gyihova anwo ɛ? Na duzu a yɛbahola yɛayɛ amaa yɛaho yɛatia Seetan a?

5. Saa ninyɛne nu yɛ se maa yɛ a, kɛzi ɔkola ɔsɛkye anwodozo mɔɔ yɛlɛ wɔ Gyihova nee ye ahyehyɛdeɛ ne anu la ɛ?

⁵ Ɔdwu mekɛ ne bie a ninyɛne nu yɛ se maa yɛ​​—yɛ mbusuafoɔ bahola adwazo atia yɛ anzɛɛ yɛ gyima bavi yɛ sa. Kɛzi tɛnlabelɛ ɛhye mɔ bahola azɛkye anwodozo mɔɔ yɛlɛ wɔ Gyihova ahyehyɛdeɛ ne anu la na yeahwe yɛ yeavi Gyihova anwo ɛ? Saa yɛnwu amaneɛ mekɛ tendenle a, bie a ɔbamaa yɛ anyelazo awie na yɛ rɛle abɔ. Wɔ mekɛ ɛhye mɔ anu, Seetan maa yɛnyia adwenle kɛ Gyihova ɛngulo yɛ. Abɔnsam kulo kɛ yɛnyia adwenle kɛ Gyihova anzɛɛ Ye ahyehyɛdeɛ ne a maa yɛnwu amaneɛ a. Edwɛkɛ ko ne ala bie dole Yizilayɛma bie wɔ Yigyibiti. Mɔlebɛbo ne, bɛliele bɛlile kɛ Gyihova a ɛkpa Mosisi nee Aalɔn kɛ bɛlie bɛ bɛvi akɛlɛzonlenlɛ nu a. (Ɛzɛ. 4:29-31) Noko nzinlii mɔɔ Falo maanle ɛbɛlabɔlɛ yɛle se maanle bɛ la, bɛbɔle Mosisi nee Aalɔn somolɛ na bɛhanle kɛ: “Bɛmaa Falo nee ye sonvolɛma ne mɔ ɛkpɔ yɛ na bɛva konle dadeɛ bɛwula bɛ sa nu kɛ bɛhu yɛ.” (Ɛzɛ. 5:19-21) Bɛbɔle Nyamenle azonvolɛ nɔhavoma ne somolɛ. Alɔbɔlɛ edwɛkɛ boni ɛne! Saa ninyɛne nu ɛyɛ se ɛmaa wɔ a, kɛ ɔkɛyɛ na wɔamaa anwodozo mɔɔ ɛlɛ wɔ Gyihova nee ye ahyehyɛdeɛ ne anu la ahɔ zo ayɛ kpole ɛ?

6. Kɛzi bɛgyinla ngyegyelɛ nloa la anwo debie boni a yɛsukoa yɛfi ngapezonli Habakɛke ɛkɛ a? (Habakɛke 3:17-19)

⁶ Ka wɔ ahonle nu edwɛkɛ kile Gyihova wɔ asɔneyɛlɛ nu na maa ɔboa wɔ. Ngapezonli Habakɛke yiale tɛnlabelɛ dɔɔnwo mɔɔ anu yɛ se. Ɔdwule mekɛ bie la, ɛnee ɔngola ɔnnwu ye saa Gyihova dwenle ɔ nwo a. Ɔti ɔhanle kɛzi ɔte nganeɛ la ɔhilele Gyihova wɔ asɔneyɛlɛ nu. Ɔhanle kɛ: “O Gyihova, menzu memkpondɛ moalɛ ɔhɔdwu kenlenzu na wɔadie me? . . . Duzu ati a ɛmaa nzisi nwo adenle a?” (Hab. 1:2, 3) Gyihova buale ye sonvolɛ nɔhavo ɛhye asɔne ne mɔɔ ɔvile ahonle nu ɔyɛle la. (Hab. 2:2, 3) Mɔɔ Habakɛke dwenlenle kɛzi Gyihova die ye menli anwo la, akee ɔ nye liele. Ɔnwunle ye wienyi kɛ Gyihova dwenle ɔ nwo na ɔbaboa ye yeamaa yeagyinla sɔnea biala anloa. (Kenga Habakɛke 3:17-19.) Duzu a yɛsukoa yɛfi nu a? Saa ninyɛne nu yɛ se maa wɔ a, yɛ asɔne na ka kɛzi ɛte nganeɛ la kile Gyihova. Akee maa ɔboa wɔ. Saa ɛyɛ ye zɔ a, ɛbahola wɔanyia anwodozo kɛ Gyihova bamaa wɔanyia anwosesebɛ mɔɔ ɛhyia nwo amaa wɔahola wɔagyinla kpundii la. Na saa ɛnwu kɛ ɔlɛboa wɔ a, wɔ diedi bayɛ kpole.

7. Duzu a Shirley busuanli bie bɔle mɔdenle kɛ ɔmaa yealie yeali a, na duzu a maanle ɔhɔle zo ɔnyianle Gyihova anu diedi a?

⁷ Mmagyakyi sunsum nu ninyɛne ɛyɛlɛ. Suzu kɛzi ɛhye boale adiema raalɛ Shirley mɔɔ wɔ Papua New Guinea wɔ mekɛ mɔɔ ninyɛne nu yɛle se maanle ye la. b Ɛnee Shirley abusua ne di ehyia na ɔdwu mekɛ ne bie a bɛnnyia aleɛ mɔɔ sa bɛ bɔbɔ la. Ye busuanli bie bɔle mɔdenle kɛ ɔsɛkye anwodozo mɔɔ ɔlɛ wɔ Gyihova anu la. Ɔhanle kɛ: “Ɛse Nyamenle sunsum nwuanzanwuanza ne  ɛlɛboa wɔ, noko moalɛ ne wɔ ni? Wɔ abusua ne tɛdi ehyia. Ɛfa edwɛkpa ne ɛhanlɛ ɛsɛkye wɔ mekɛ.” Shirley hanle kɛ: “Membizale me nwo kɛ: ‘Asoo Nyamenle dwenle yɛ nwo anzɛɛ ɔndwenle yɛ nwo?’ Ɔti ɛkɛ ne ala menyɛle asɔne na menganle mɔɔ wɔ me adwenle nu la amuala mengilele Gyihova. Mengɔle zo mengengale Baebolo ne nee yɛ mbuluku ne mɔ yɛɛ meangyakyi daselɛlilɛ nee debiezukoalɛ ɛhɔlɛ.” Yeangyɛ, ɔnwunle kɛ Gyihova ɛlɛnea ye abusua ne. Ɛhɔne angu ye abusua ne ɛlɛ na ɛnee bɛ nye die. Shirley hanle kɛ: “Menwunle kɛ Gyihova ɛlɛbua me asɔneyɛlɛ.” (1 Tim. 6:6-8) Saa ɛdawɔ noko ɛkɔ zo ɛyɛ sunsum nu ninyɛne a, ɛnrɛmaa ninyɛne nu mɔɔ ɛyɛ se anzɛɛ adwenle nu keseeyɛlɛ ɛnrɛhwe wɔ ɛnrɛvi Gyihova anwo.

8. Duzu a bahola ado mediema mɔɔ li yɛ nyunlu la a?

⁸ Yɛ agbɔvolɛ dua riledio, TV nee sohyia media ne azo fa yɛ mediema mrenyia mɔɔ li Gyihova ahyehyɛdeɛ ne anyunlu la anwo adalɛ edwɛkɛ salo. (Edw. 31:13) Bɛhye yɛ mediema mrenyia bie mɔ na bɛbɔ bɛ somolɛ kɛ bɛdi ɛtane. Alimoa Kilisienema yiale tɛnlabelɛ ko ne ala bie wɔ mekɛ mɔɔ bɛbɔle ɛzoanvolɛ Pɔɔlo somolɛ na bɛhyele ye la. Duzu a bɛyɛle a?

9. Mɔɔ bɛdole ɛzoanvolɛ Pɔɔlo efiade la, duzu a Kilisienema bie mɔ yɛle a?

⁹ Mɔɔ bɛdole ɛzoanvolɛ Pɔɔlo efiade wɔ Wulomu la, alimoa Kilisienema bie mɔ gyakyile kɛ bɛbaboa ye. (2 Tim. 1:8, 15) Duzu ati ɔ? Kɛmɔ ɛnee menli bu Pɔɔlo kɛ ɔdi ɛtane la ati, asoo ɛnee ɔyɛ bɛ nyiane ɔ? (2 Tim. 2:8, 9) Anzɛɛ asoo ɛnee bɛsulo kɛ bɛbayɛ bɛdabɛ noko kpɔdekpɔde ɔ? Ɔnva nwo adwenle biala mɔɔ ɛnee bɛlɛ la, nea kɛzi ɛhye bamaa Pɔɔlo ade nganeɛ la. Ɛnee yeyia tɛnlabelɛ dɔɔnwo mɔɔ anu yɛ se yɛɛ yeva ye ngoane bɔbɔ yedo esiane nu yemaa bɛ. (Gyi. 20:18-21; 2 Kɔl. 1:8) Bɛmmamaa yɛyɛ kɛ menli mɔɔ kpole Pɔɔlo wɔ mekɛ mɔɔ ɛnee ɔhyia bɛ nwo la ɛlɛ! Saa bɛlɛyɛ menli mɔɔ li yɛ nyunlu la kpɔdekpɔde a, duzu a ɔwɔ kɛ yɛkakye a?

10. Saa bɛlɛyɛ menli mɔɔ li yɛ nyunlu la kpɔdekpɔde a, duzu a ɔwɔ kɛ yɛkakye a, na duzu ati ɔ?

 ¹⁰ Kakye deɛmɔti bɛyɛ yɛ kpɔdekpɔde la nee ahenle mɔɔ fa ba la. Bɛha ye wɔ 2 Timote 3:12 kɛ: “Bɛdabɛ mɔɔ bɛkulo kɛ bɛfa nyamenlezonlenlɛ kpalɛ bɛbɔ bɛ ɛbɛla kɛ Kelaese Gyisɛse ɛdoavolɛma la amuala, bɛbayɛ bɛdabɛ noko kpɔdekpɔde.” Ɔti ɔnle kɛ ɔyɛ yɛ nwanwane kɛ Seetan ɛdu ɔ nye ɛzie mediema mɔɔ li yɛ nyunlu la anwo la. Ye adwenle a le kɛ ɛtetalɛ ɛhye baha yɛ ɛzulolɛ na yeamaa yɛagyakyi yɛ nɔhalɛlilɛ nu.​​—1 Pita 5:8.

11. Duzu a yɛsukoa yɛfi Onɛsefɔlɛse neazo ne anu a? (2 Timote 1:16-18)

¹¹ Kɔ zo boa ɛ mediema na mmatwe ɛ nwo ɛfi bɛ nwo. (Kenga 2 Timote 1:16-18.) Alimoa Kilisienenli bie mɔɔ bɛfɛlɛ ye Onɛsefɔlɛse la yɛle ye ninyɛne ngakyile wɔ mekɛ mɔɔ bɛdole Pɔɔlo efiade la. “Yeanyɛ ye nyiane kɛ [Pɔɔlo la] efiade la.” Emomu, ɔhɔkpondɛle Pɔɔlo, na mɔɔ ɔnwunle ye la, ɔkpondɛle ndenle ɔluale zo ɔboale Pɔɔlo. Mɔɔ Onɛsefɔlɛse yɛle la maanle ɔvale ɔdaye mumua ne ye ngoane ɔdole esiane nu. Duzu a yɛsukoa yɛfi nu a? Ɔnle kɛ yɛmaa sonla nwo ɛzulolɛ maa yɛ ahonle tu anzɛɛ si yɛ adenle kɛ yɛbaboa yɛ mediema wɔ mekɛ mɔɔ bɛlɛyɛ bɛ kpɔdekpɔde la. Emomu, bɛmaa yɛgyinla bɛ nzi na yɛboa bɛ. (Mrɛ. 17:17) Bɛhyia yɛ moalɛ.

12. Duzu a yɛsukoa yɛfi yɛ mediema mɔɔ wɔ Russia la ɛkɛ a?

¹² Suzu kɛzi yɛ mediema mɔɔ wɔ Russia la ɛlɛboa bɛ gɔnwo mɔ diedima mɔɔ bɛgua bɛ efiade la anwo nea. Saa bɛlɛdi bie mɔ edwɛkɛ a, mediema dɔɔnwo kɔ kɔɔto ɛkɛ kɔgyinla bɛ nzi. Duzu a yɛsukoa yɛfi nu a? Saa bɛsɛkye mediema mɔɔ li yɛ nyunlu la duma, bɛkye bɛ anzɛɛ bɛlɛyɛ bɛ kpɔdekpɔde a, mmamaa wɔ ahonle tu. Yɛ asɔne maa bɛ, nea bɛ mbusuafoɔ na kpondɛ ndenle dua zo boa bɛ.​​—Gyi. 12:5; 2 Kɔl. 1:10, 11.

13. Kɛzi agolobɛnwo kola sɛkye anwodozo mɔɔ yɛlɛ wɔ Gyihova nee ye ahyehyɛdeɛ ne anu la ɛ?

¹³ Ɔlua yɛ edwɛkɛhanlɛ gyima ne anzɛɛ Gyihova ɛbɛlabɔlɛ nwo ngyinlazo ne mɔɔ yɛfa yɛbɔ yɛ ɛbɛla la ati, bie a yɛ mbusuafoɔ mɔɔ bɛnle diedima, yɛ gɔnwo mɔ gyimayɛvoma anzɛɛ sukuluma bɛagolo yɛ nwo. (1 Pita 4:4) Bie a bɛbaha kɛ: “Mekulo wɔ edwɛkɛ noko wɔ ɛzonlenlɛ ne fa mɛla kyekye bɛ nwo somaa yɛɛ bɛnnwu kɛ ewiade ne ɛhakyi.” Bie a bɛbadendɛ bɛatia kɛzi yɛ nee menli mɔɔ bɛdu bɛ la di la na bɛaha kɛ: “Kɛzi ɛkola ɛka kɛ ɛlɛ ɛlɔlɛ ɛ?” Edwɛkɛ zɛhae mɔ kola maa yɛ adwenle nu yɛ yɛ kesee. Bie a yɛbabɔ ɔ bo yɛanyia adwenle kɛ: ‘Asoo mɔɔ Gyihova kpondɛ kɛ meyɛ la bo me nwo zo ɔ? Ye ahyehyɛdeɛ ne le kyengye somaa ɔ?’ Saa ɛlɛyia tɛnlabelɛ zɛhae bie a, kɛ ɔkɛyɛ na wɔahɔ zo wɔabikye Gyihova nee ye ahyehyɛdeɛ ne ɛ?

14. Saa awie mɔ golo yɛ nwo wɔ Gyihova ngyinlazo mɔɔ yɛfa yɛdi gyima la anwo a, kɛzi ɔwɔ kɛ yɛyɛ yɛ nyɛleɛ ɛ? (Edwɛne 119:50-52)

¹⁴ Bɔ kpɔkɛ kɛ ɛbali Gyihova ngyinlazo zo. Dwobu le awie mɔɔ lile Gyihova ngyinlazo zo ɔnva nwo kɛ bɛgolole ɔ nwo la. Menli mɔɔ bɛse bɛle Dwobu agɔnwo mɔ la bɔbɔ bɔle mɔdenle kɛ bɛmaa yealie yeali kɛ, saa ɔdi Nyamenle ngyinlazo zo o, yeanli zo o, ɔnvale Nyamenle anwo. (Dwobu 4:17, 18; 22:3) Noko Dwobu anlie zɔhane adalɛ edwɛkɛ ne anli. Ɛnee ɔze kɛ Gyihova ngyinlazo mɔɔ fale kpalɛ nee ɛtane nwo la le kpalɛ na ɔbɔle kpɔkɛ kɛ ɔbali zo. Yeammaa awie mɔ anzi ye adenle kɛ ɔbali nɔhalɛ. (Dwobu 27:5, 6) Duzu a yɛsukoa yɛfi nu a? Mmamaa agolobɛnwo si wɔ adenle kɛ ɛbali Gyihova ngyinlazo zo. Suzu mɔɔ ɛzi wɔ ɛbɛlabɔlɛ nu la anwo. Asoo ɛtɛnwunle ye fane dɔɔnwo kɛ Gyihova  ngyinlazo ne mɔ tenrɛ na bɛboa ɛdawɔ mumua ne ɔ? Bɔ kpɔkɛ kɛ ɛbagyinla ahyehyɛdeɛ ɛhye mɔɔ fa ngyinlazo ɛhye mɔ di gyima la anzi. Na agolobɛnwo biala ɛnle ɛkɛ mɔɔ ɔbahola yeahwe wɔ yeavi Gyihova anwo a.​​—Kenga Edwɛne 119:50-52.

15. Duzu ati a bɛgolole Brizit anwo a?

¹⁵ Suzu adiema raalɛ Brizit mɔɔ wɔ India la edwɛkɛ ne anwo. Ɔlua ye diedi ti ye mbusuafoɔ golole ɔ nwo. Mɔɔ bɛzɔnenle ye wɔ 1997 la, yeangyɛ, ɔ hu mɔɔ ɔnle diedinli la gyima vile ɔ sa. Ɔti ɔzile kpɔkɛ ɔ nee Brizit nee bɛ mra mraalɛ ne mɔ bɛadu ahɔdɛnla ye awovolɛ mɔɔ bɛwɔ sua gyɛne zo la anwo ɛkɛ. Noko bɔ zo mɔɔ Brizit bayia ngyegyelɛ kpole a. Kɛmɔ ɛnee ɔ hu ɛnyɛ gyima la ati, ɔdaye a ɛnee ɔwɔ kɛ ɔyɛ gyima dahuu ɔnea ye abusua ne a. Eza ɔvi ɛleka mɔɔ ɔde mɔɔ kɔ asafo mɔɔ bikye ye anu la le kɛyɛ kilomita 350 (mayɛlɛ 220). Mɔɔ yɛ alɔbɔlɛ la a le kɛ, ɔlua ye diedi ne ati ɔ hu mbusuafoɔ dwazole tiale ye. Dwazotia ne akee bole zo ɔti ɛnee ɔwɔ kɛ Brizit nee ye abusua ne tu bieko. Akee ɔ hu wule arɛlevilɛ nu. Nzinlii, kansa hunle ɔ ra raalɛ mɔɔ ɛli ɛvolɛ 12 ala la. Mɔɔ zɛkyele edwɛkɛ ne bɔkɔɔ la a le kɛ, ye mbusuafoɔ bɔle ye somolɛ kɛ ɔdaye a ɔlɛmaa edwɛkɛ ɛhye mɔ asisi a. Bɛhanle kɛ saa yeanyɛ Gyihova Dasevolɛ a anrɛɛ anwubɛnyunlu ɛhye mɔ biala ɛnrɛdo ye. Noko ɔhɔle zo ɔvale ɔ nwo ɔdole Gyihova anwo zo na yeanvi ye ahyehyɛdeɛ ne anu ɛlɛ.

16. Kɛmɔ Brizit andwe ɔ nwo anvi Gyihova nee ye ahyehyɛdeɛ ne anwo la ati, nyilalɛ boni a ɔnyianle a?

¹⁶ Kɛmɔ ɛleka mɔɔ Brizit de nee asafo mɔɔ bikye ye la anu wale la ati, maangyebakyi zo neavolɛ ne hanle hilele ye kɛ ɔyɛ daselɛlilɛ gyima ne wɔ ɛleka mɔɔ ɔde la na ɔnlea ɔmaa bɛyɛ debiezukoalɛ ne wɔ ye sua nu ɛkɛ. Mɔlebɛbo ne, ɔdele nganeɛ kɛ ɔnrɛhola ye yɛ. Noko ɔlile adehilelɛ ne azo. Ɔhanle edwɛkpa ne ɔhilele awie mɔ, ɔmaanle bɛyɛle debiezukoalɛ wɔ ye sua nu ɛkɛ yɛɛ ɔkpale mekɛ ɔ nee ɔ mra mraalɛ ne mɔ yɛle abusua ɛzonlenlɛ. Duzu a vi nu rale a? Brizit holale nee menli dɔɔnwo zukoale Baebolo ne na bɛzɔnenle ye  Baebolo sukoavoma dɔɔnwo. Ɔbɔle adekpakyelɛ gyima ne abo wɔ 2005. Ɔnyianle ɔ nwo mɔɔ ɔvale ɔdole Gyihova anwo zo nee nɔhalɛ mɔɔ ɔlile ɔmaanle ye ahyehyɛdeɛ ne la anwo ahatualɛ. Ɔ mra mraalɛ ne mɔ ɛlɛfa nɔhalɛlilɛ azonle Gyihova, na kɛkala asafo nwiɔ a wɔ ɛleka zɔhane a! Brizit ɛnwu ye kɛ Gyihova a maanle ye anwosesebɛ maanle ɔholale ɔgyinlanle tɛnlabelɛ mɔɔ anu yɛ se nee ye mbusuafoɔ agolobɛnwo ne anloa a.

17. Duzu a ɔwɔ kɛ yɛsi kpɔkɛ kɛ yɛbayɛ a?

¹⁷ Seetan kulo kɛ yɛdie yɛdi kɛ saa yɛkɔ ngyegyelɛ nu a Gyihova bakpo yɛ yɛɛ yɛgyinla Gyihova ahyehyɛdeɛ ne anzi a, ɛbɛlabɔlɛ bayɛ se amaa yɛ. Seetan kulo kɛ ɛzulolɛ ka yɛ wɔ mekɛ mɔɔ bɛbado mediema mɔɔ li yɛ nyunlu la ɛzonle, bɛbayɛ bɛ kpɔdekpɔde anzɛɛ bɛbagua bɛ efiade la. Yɛɛ ɔkulo kɛ ɔdua agolobɛnwo zo ɔsɛkye anwodozo mɔɔ yɛlɛ wɔ Gyihova ngyinlazo ne mɔ nee Ye ahyehyɛdeɛ ne anu la. Noko yɛze ye adwenle ɛtane ne mɔ na yɛmmaa ɔmbɛlɛbɛla yɛ. (2 Kɔl. 2:11) Bɔ kpɔkɛ kɛ ɛbahɔ zo wɔakpo Seetan adalɛ edwɛkɛ ne na wɔahɔ zo wɔali nɔhalɛ wɔamaa Gyihova nee Ye ahyehyɛdeɛ ne. Kakye kɛ Gyihova ɛnrɛkpo wɔ ɛlɛ. (Edw. 28:7) Ɔti mmamaa debie biala twe wɔ fi Gyihova anwo!​​—Wlo. 8:35-39.

18. Duzu a yɛbazuzu nwo wɔ edwɛkɛ bieko anu a?

¹⁸ Wɔ edwɛkɛ ɛhye anu, yɛzuzu ngyegyelɛ mɔɔ bɛdabɛ mɔɔ bɛnle asafo ne anu la bahola ava ara yɛ nwo zo la anwo. Noko ngyegyelɛ mɔɔ yɛyia wɔ asafo ne anu la noko bahola azɔ anwodozo mɔɔ yɛlɛ wɔ Gyihova nee ye ahyehyɛdeɛ ne anu la anlea. Noko kɛ ɔkɛyɛ na yɛahola yɛali ngyegyelɛ ɛhye mɔ azo ɛ? Yɛbazuzu ɛhye anwo wɔ edwɛkɛ bieko anu.