Ɛkulo kɛ ɛnyia ɛ ti anwo debiezukoalɛ ne azo nvasoɛ kpole ɔ? Ɛfa nzuzulɛ ɛhye mɔ ɛdi gyima a ɔbaboa wɔ yeamaa wɔanyia ɛleka kpalɛ mɔɔ ɛbadɛnla wɔazukoa debie la:

• Kpondɛ ɛleka mɔɔ fɛta la. Saa ɔbayɛ boɛ a, kpondɛ ɛleka mɔɔ ninyɛne ɛngugua ɛkɛ ne basabasa na wienyi wɔ ɛkɛ mɔɔ ɛbahola wɔanwu mɔɔ ɛlɛkenga la anu la. Ɛbahola wɔadɛnla ebia zo wɔ ɛkponle nwo anzɛɛ ɛbahola wɔakpondɛ ɛleka wɔ alienwo mɔɔ ɛtɛnla a ɛ nwo badɔ wɔ la.

• Kpondɛ ɛleka ɛ ngomekye kɔvea. Gyisɛse kpale kɛ ɔbayɛ asɔne “nwonlomɔ mangyee ne” wɔ “ɛleka koonwu bie.” (Maake 1:35) Saa ɔnrɛyɛ boɛ kɛ ɛbanyia ɛleka mɔɔ ɔbaha ɛ ngome ala a, ɛbahola wɔamaa wɔ abusua ne anzɛɛ menli mɔɔ ɛ nee bɛ de sua ko anu la anwu mekɛ mɔɔ ɛfa ɛsukoa debie la na wɔazɛlɛ bɛ kɛ saa bɛbahwe bɛ nwo ekyii wɔ mekɛ mɔɔ ɛlɛsukoa debie la a.

• Fa wɔ adwenle sie mɔɔ ɛlɛsukoa la azo. Mmamaa ninyɛne twehwe wɔ adwenle. Saa ɛlɛfa wɔ fonu anzɛɛ wɔ tabelɛte ne a wɔazukoa debie a, fa to ɛleka mɔɔ ɔnrɛzu ɔnrɛyɛ dede anzɛɛ fa to ɛleka mɔɔ awie fɛlɛ a ɔnrɛra la amaa debie biala andwehwe wɔ adwenle. Na saa debie bie mɔɔ ɔhyia kɛ ɛyɛ la ba wɔ adwenle nu wɔ mekɛ zɔhane a, kɛlɛ to ɛkɛ na yɛ ye amozi. Saa ɔyɛ se kɛ ɛbava wɔ adwenle wɔazie mɔɔ ɛlɛsukoa la azo a, gyinla na fa mekɛ ekyii tiedia anzɛɛ tenrɛdenrɛ wɔ nu.