Mɔɔ Baboa Wɔ Yeamaa Wɔazukoa Debie Dapɛne Biala La
ƆYƐ se ɔmaa wɔ kɛ ɛbayɛ ɛ ti anwo Baebolo ɛzukoalɛ dapɛne biala na ɛ nye alie nwo ɔ? Ɔyɛ a debie zɛhae to yɛ muala. Noko fa ninyɛne gyɛne mɔɔ yɛyɛ ye dahuu, mɔɔ bie a le yɛ nwo ɛbialɛ la kɛ neazo. Ɔdie mekɛ nee mɔdenlebɔlɛ na yɛahola yɛabia, noko saa yɛwie a, nea kɛzi ɔmaa yɛ nwo yɛ yɛ fɔɔnwo a! Baebolo ne ɛzukoalɛ noko kola yɛ kɛ asɛɛ ‘bɛlua edwɛkɛ ne azo bɛva nzule bɛnrinzi yɛ nwo’ bɛmaa yɛ nwo ɛyɛ yɛ fɔɔnwo la. (Ɛfɛ. 5:26) Nea nzuzulɛ bie mɔ mɔɔ bahola aboa wɔ la:
Yɛ nwolɛ ngyehyɛleɛ to ɛkɛ. Bɛtianwo Baebolo ɛzukoalɛ boka “ninyɛne mɔɔ hyia kpalɛ” mɔɔ ɔnle kɛ Kilisienenli biala bu ɔ nye gua zo la anwo. (Fel. 1:10) Amaa wɔali ngyehyɛleɛ mɔɔ wɔyɛ la azo la, fa beta ɛleka mɔɔ ɔnrɛyɛ se kɛ ɛbanwu ye, le kɛ bane nwo anzɛɛ felegye ne anlenkɛ ne anwo. Anzɛɛ ɛbahola wɔasɛte alarm wɔ wɔ fonu ne azo amaa ɔka ekyii mekɛ ne dwu a, yeazu yeahakye wɔ.
Kpa mekɛ nee adenle mɔɔ ɔbaboa wɔ la. Asoo ɛkola ɛsukoa debie ɛkyɛ anzɛɛ kyesɛ ɛbubu nuhua ngyikyi ngyikyi na ɛfa mekɛ nzinrenzinra ɛsukoa ɔ? Ɛdawɔ a ɛze kɛzi ɛde la kpalɛ a. Ɔti gyinla yemɔ azo yɛ wɔ ngyehyɛleɛ ne. Saa mekɛ mɔɔ wɔbɔ kpɔkɛ kɛ ɛbava wɔazukoa debie la dwu na ɔyɛ se ɔmaa wɔ kɛ ɛbayɛ ye zɔ a, wɔmɔ bɔ mɔdenle fa mitini bulu ala sukoa. Mitini ezinraa zɔhane bɔbɔ bamaa wɔanwu ninyɛne dɔɔnwo tɛla kɛ ɛnrɛzukoa ye fee la. Na bie a ɛbɔ ɔ bo kɛ ɛsukoa a, mɔɔ ɛbanwu ye la bamaa wɔanyia ɛhulolɛ kɛ ɛbadoa zo wɔazukoa dɔɔnwo.—Fel. 1:10.
Dimoa kpa edwɛkɛtile mɔɔ ɛbazukoa la to ɛkɛ. Saa wɔ debiezukoalɛ mekɛ ne dwu na akee bɔ zo mɔɔ ɛlɛdwenle mɔɔ ɛbazukoa la anwo a, bie a ɔnrɛmaa ‘ɛnrɛva wɔ mekɛ ɛnrɛli gyima kpalɛ.’ (Ɛfɛ. 5:16) Duzu ati ɛngɛlɛ edwɛkɛ adile mɔɔ ɛbahulo kɛ ɛsukoa nwolɛ debie la ɛndo ɛkɛ a? Saa kpuya bie ba wɔ adwenle nu na ɛkulo kɛ ɛnwu nwolɛ mualɛ ne a, kɛlɛ boka mɔɔ wɔhɛlɛ ye dɛba la anwo. Yɛɛ saa ɛsukoa debie ɛwie biala a, ɛbahola wɔahɛlɛ ninyɛne gyɛne mɔɔ ɛbahulo kɛ ɛyɛ nwolɛ neɛnleanu dɔɔnwo la wɔado ɛkɛ.
Saa ɔhyia kɛ ɛyɛ nzenzaleɛ a, yɛ ye zɔ. Bɔ mɔdenle kɛ ɛbayɛ nzenzaleɛ wɔ wɔ debiezukoalɛ ngyehyɛleɛ ne anu. Bie a le mekɛ tendenle mɔɔ ɛfa ɛsukoa debie anzɛɛ edwɛkɛ adile mɔɔ ɛkulo kɛ ɛsukoa nwolɛ debie la. Mɔɔ hyia kpalɛ la a le kɛ ɛbazukoa ye dapɛne biala, na tɛ kenle mɔɔ ɛfa ɛsukoa, mekɛ tendenle mɔɔ ɛfa ɛsukoa anzɛɛ edwɛkɛtile mɔɔ ɛsukoa nwolɛ debie la ɔ.
Nɔhalɛ nu, saa yɛyɛ bɛtianwo debiezukoalɛ dapɛne biala a, yɛnyia zolɛ nvasoɛ. Ɔmaa yɛbikye Gyihova, yɛsukoa kɛ yɛbabɔ yɛ ɛbɛla nrɛlɛbɛ nu na yɛ nwo tɔ yɛ.—Dwɔh. 1:8.
