1-2. “Gyima kpalɛ” boni a asafo nu kpanyinli yɛ a?

 SAA wɔva mekɛ bie wɔzonle kɛ asafo nu sonvolɛ a, ɔkile kɛ ɛlɛbɔ mɔdenle kɛ ɛbahola wɔafɛta kɛ asafo nu kpanyinli. Ɛkulo kɛ ɛyɛ zɔhane “gyima kpalɛ” ne bie ɔ?—1 Tim. 3:1.

² Gyima boni a asafo nu kpanyinli yɛ a? Ɔdi edwɛkɛhanlɛ gyima ne anyunlu, ɔyɛ gyima ɛsesebɛ wɔ mboanekpɔlalɛ nee ngilehilelɛ nu yɛɛ ɔdua ye neazo zo ɔmaa asafo ne anwosesebɛ. Ɛhye ati a Baebolo ne ka mgbanyima mɔɔ bɛyɛ gyima ɛsesebɛ la anwo edwɛkɛ kɛ ‘bɛvale bɛ bɛmaanle kɛ ahyɛlɛdeɛ’ la.—Ɛfɛ. 4:8.

3. Kɛ ɔkɛyɛ na adiema nrenyia bie afɛta kɛ asafo nu kpanyinli ɛ? (1 Timote 3:​1-7; Taetɛse 1:​5-9)

³ Kɛ ɔkɛyɛ na wɔafɛta kɛ asafo nu kpanyinli ɛ? Ninyɛne mɔɔ awie yɛ a ɔbafɛta kɛ asafo nu kpanyinli la nee mɔɔ awie yɛ a bɛbahola bɛava ye wɔ gyima bie anu la ɛnle ko. Fane dɔɔnwo ne ala, saa ɛze gyima bie anye zo na zɔhane a gyimamenle ne kpondɛ a, ɔbahola yeava wɔ gyima nu. Noko saa ɛkulo kɛ bɛkpa wɔ kɛ asafo nu kpanyinli a, tɛ kɛzi ɛkola ɛyɛ daselɛlilɛ gyima ne nee kɛzi ɛkilehile la angomekye a hyia a. Ɔwɔ kɛ ɛnyia subane mɔɔ Ngɛlɛlera ne ka kɛ ɔwɔ kɛ mgbanyima nyia mɔɔ bɛhile ye wɔ 1 Timote 3:​1-7; Taetɛse 1:​5-9 la. (Kenga.) Edwɛkɛ  ɛhye bahilehile ninyɛne mɔɔ bɛha nwolɛ edwɛkɛ wɔ ngyehyɛnu ɛhye mɔ anu la anu titili nsa anu: ɔwɔ kɛ menli mɔɔ bɛwɔ asafo ne anu nee bɛdabɛ mɔɔ bɛnle nu la bɔ ye duma kpalɛ, ɔyɛ neazo kpalɛ kɛ abusua tile, yɛɛ ɔwɔ kɛ ɔnyia ɛhulolɛ kɛ ɔbazonle asafo ne.

ƆWƆ KƐ ƐNYIA DUMA KPALƐ

4. Saa bɛka kɛ ɛle ‘awie mɔɔ edwɛkɛ ɛnle ɛ nwo’ a, ɔkile duzu?

⁴ Amaa wɔafɛta kɛ asafo nu kpanyinli la, ɔwɔ kɛ ɛyɛ ‘awie mɔɔ edwɛkɛ ɛnle ɛ nwo,’ kile kɛ ɛbanyia duma kpalɛ wɔ asafo ne anu ɔluakɛ bɛnnyia wɔ subane nwo edwɛkɛ ɛtane bɛnga. Eza ɔwɔ kɛ ‘menli mɔɔ ɛnle asafo ne anu la ka ɛ nwo edwɛkɛ kpalɛ.’ Bie a menli mɔɔ ɛnle asafo ne anu la badendɛ atia wɔ diedi ne, noko ɔnle kɛ ɛyɛ debie ɛmaa bɛnyia wɔ nɔhalɛlilɛ anzɛɛ wɔ subane nwo edwɛkɛ bɛka. (Dan. 6:​4, 5) Biza ɛ nwo kɛ, ‘Asoo menli mɔɔ wɔ asafo ne anu nee menli mɔɔ bɛnle nu la bɔ me duma kpalɛ ɔ?’

5. Kɛ ɔkɛyɛ na wɔahile kɛ ‘ɛkulo kpalɛyɛlɛ’ ɛ?

⁵ Saa ‘ɛkulo kpalɛyɛlɛ’ a, ɔkile kɛ ɛkpondɛ kpalɛ mɔɔ wɔ awie mɔ anu la na ɛkanvo bɛ wɔ bɛ subane ngɛnlɛma ne mɔ anwo. Eza ɛ nye die nwo kɛ ɛbayɛ ninyɛne mgbalɛ wɔamaa awie mɔ, bie bɔbɔ a ɛyɛ ninyɛne mɔɔ bɛanzuzu kɛ ɛbayɛ la. (1 Tɛs. 2:8.) Duzu ati a ɔhyia kɛ mgbanyima ‘kulo kpalɛyɛlɛ’ a? Ɔluakɛ bɛfa bɛ mekɛ ne dɔɔnwo bɛkpɔlɔkpɔla mboane ne mɔ na bɛyɛ gyimalilɛ ngakyile. (1 Pita 5:​1-3) Noko saa bɛyɛ ninyɛne bɛboa awie mɔ a ɔmaa bɛ nye die tɛla afɔle biala mɔɔ bɛbɔ la.—Gyi. 20:35.

6. Saa bɛka kɛ awie ‘die nyɛvolɛ’ a, ɔkile duzu? (Hibuluma 13:​2, 16; eza nea nvoninli ne.)

⁶ Saa ɛyɛ ninyɛne mgbalɛ ɛmaa awie mɔ, bɔbɔ bɛdabɛ mɔɔ bɛnle ɛ gɔnwo mɔ la a, ɛnee ɛlɛda ye ali kɛ ‘ɛdie nyɛvolɛ.’ (1 Pita 4:9) Buluku bie hanle awie mɔɔ die nyɛvolɛ la anwo edwɛkɛ kɛ: “Ɔwɔ kɛ ɔbuke ye sua ne anlenkɛ yɛɛ ye ahonle ne anlenkɛ ɔmaa nyɛvolɛ.” Biza ɛ nwo kɛ, ‘Saa ɔba ye wɔ nyɛvolɛlielɛ nu a, kɛzi menli ze me ɛ?’ (Kenga Hibuluma 13:​2, 16.) Awie mɔɔ die nyɛvolɛ la nee awie mɔ kyɛ mɔɔ ɔlɛ la. Menli ɛhye mɔ bie a le ehyiavolɛma, maangyebakyi zo neavolɛma yɛɛ mediema mɔɔ fi asafo gyɛne nu bamaa ɛdendɛlɛ la.—Gyn. 18:​2-8; Mrɛ. 3:27; Luku 14:​13, 14; Gyi. 16:15; Wlo. 12:13.

7. Kɛ ɔkɛyɛ na kpanyinli bie ahile kɛ “ɔ nye ɛmbolo ezukoa” ɛ?

 ⁷ “Ɔ nye ɛmbolo ezukoa.” Ɛhye kile kɛ tɛ nwonane afoa nu ninyɛne a gyi ɛ nye zo a. Saa ɛle sukoavolɛ anzɛɛ ehyianli bɔbɔ a, ɛfa Belemgbunlililɛ ne ɛdimoa wɔ ɛbɛlabɔlɛ afoa biala anu. (Mat. 6:33) Ɛfa wɔ mekɛ, wɔ anwosesebɛ nee ninyɛne gyɛne mɔɔ ɛlɛ la ɛsonle Gyihova, ɛnea wɔ abusua ne na ɛsonle asafo ne. (Mat. 6:24; 1 Dwɔn 2:​15-17) Biza ɛ nwo kɛ: ‘Kɛzi mebu ezukoa ɛ? Asoo me kunlu dwo ninyɛne mɔɔ mehyia amaa meadɛnla ngoane nu mɔɔ melɛ la anwo ɔ? Anzɛɛ ezukoa nee nwonane afoa nu ninyɛne dɔɔnwo mɔɔ mekpondɛ la a gyi me nye zo a?’—1 Tim. 6:​6, 17-19.

8. Kɛzi ɛbahile kɛ ‘ɛ nye gyi ɛ ti anwo’ yɛɛ ‘ɛkomo ɛ nwo zo’ ɛ?

⁸ Saa ‘ɛ nye gyi ɛ ti anwo’ yɛɛ ‘ɛkomo ɛ nwo zo’ a, ɔkile kɛ ɛda ndelebɛbo ali wɔ wɔ ɛbɛlabɔlɛ afoa biala anu. Kɛ neazo la, ɛnli aleɛ anzɛɛ ɛnno nza ɛmmaa ɔmbo ɛ nwo zo, ɛsiezie ɛ nwo kɛ mɔɔ ɔfɛta la yɛɛ ɛnea ninyɛne mɔɔ ɛfa ɛdielie ɛ nye la boɛ. Ɛnzukoa ninyɛne mɔɔ ɛnle kpalɛ mɔɔ ewiade ne yɛ la. (Luku 21:34; Gye. 4:4) Saa awie mɔ ka wɔ ɛya bɔbɔ a, ɛsie ɛ nwo dii. ‘Ɛnle nzanli’; anzɛɛ ɛtɛdiele duma kɛ ɛkola nza no. Biza ɛ nwo kɛ, ‘Asoo kɛzi mebɔ me ɛbɛla la kile kɛ me nye gyi me ti anwo yɛɛ mekomo me nwo zo ɔ?’

9. Saa bɛka kɛ awie “adwenle nu la ɛkɛ” yɛɛ “ɔyɛ ye ninyɛne pɛpɛɛpɛ” a, ɔkile duzu?

⁹ Saa wɔ “adwenle nu la ɛkɛ” a, ɛgyinla Baebolo ngyinlazo zo ɛsuzu ninyɛne nwo kpalɛ. Ɛdwenle ngyinlazo ɛhye mɔ anwo ɛkɔ moa, na yemɔ ɛmaa wɔnyia nwunu nee ndelebɛbo. Ɛmpele ɛ nwo ɛnzi kpɔkɛ. Emomu, ɛnea kɛ ɛbanwu edwɛkɛ ne akunlu nee ɔ nzi na wɔagyinla zo wɔazi kpɔkɛ. (Mrɛ. 18:13) Ɛhye ati, ɛsi kpɔkɛ kpalɛ mɔɔ nee adwenle mɔɔ Gyihova lɛ la yɛ ko la. Saa ‘ɛyɛ wɔ ninyɛne pɛpɛɛpɛ’ a, ɔkile kɛ ɛtoto wɔ ninyɛne boɛ yɛɛ ɛdi mekɛ zo. Bɛze wɔ kɛ bɛkola bɛfa bɛ nwo bɛto ɛ nwo zo yɛɛ ɛdi adehilelɛ zo. Subane ɛhye mɔ bamaa bɛabɔ wɔ duma kpalɛ. Akee maa yɛzuzu kɛzi ɛbanyia subane mɔɔ Ngɛlɛlera ne se ɔwɔ kɛ ɛnyia amaa wɔayɛ neazo kpalɛ kɛ abusua tile la anwo.

YƐ NEAZO KPALƐ KƐ ABUSUA TILE

10. Duzu a nrenyia bie yɛ a ɔkile kɛ ‘ɔnea ye sua nu amra kpalɛ’ a?

¹⁰ Saa ɛle kunli na ɛkulo kɛ ɛfɛta kɛ asafo nu kpanyinli a, kɛzi bɛbɔ wɔ abusua ne duma la baha wɔ. Ɛhye ati, ɔwɔ kɛ ‘ɛnea wɔ sua nu amra kpalɛ.’ Ɔwɔ kɛ ɛnyia duma kɛ ɛle abusua tile mɔɔ ɛlɛ ɛlɔlɛ yɛɛ ɛdi wɔ ɛzonlelilɛ nwo gyima. Ɛhye kile kɛ ɛbali bɛ nyunlu wɔ yɛ ɛzonlenlɛ ne afoa ngakyile ne mɔ amuala anu. Duzu ati a ɛhye anwo hyia kpalɛ a? Ɛzoanvolɛ Pɔɔlo hanle kɛ: “Saa awie ɛngola ɛnnea ye sua nu amra kpalɛ a, kɛ ɔkɛyɛ na yeahola yeanlea Nyamenle asafo ne azo ɛ?”—1 Tim. 3:5.

11-12. Kɛzi subane mɔɔ nrenyia bie abusua ne lɛ la ka kɛzi ɔbafɛta la ɛ? (Eza nea nvoninli ne.)

¹¹ Saa ɛle selɛ a, ɔwɔ kɛ ɛ mra ngyikyi “fa enililɛ bɛlɛ bɛ nwo aze maa” wɔ. Ɔwɔ kɛ ɛfi ɛlɔlɛ nu ɛkilehile bɛ na ɛtete bɛ. Nɔhalɛ nu ɛkulo kɛ bɛ nye die, bɛsele na bɛdi nwɔhoa kɛ mɔɔ kakula biala yɛ ye la. Noko kɛmɔ ɛtete bɛ kpalɛ la ati, bɛbayɛ tieyɛ, bɛabu debie na bɛala nyɛleɛ kpalɛ ali. Eza ɔwɔ kɛ ɛyɛ biala mɔɔ ɛbahola la ɛboa ɛ mra ne mɔ ɛmaa bɛ nee Gyihova nyia agɔnwolɛvalɛ kpalɛ, bɛfa Baebolo ngyinlazo bɛbɔ bɛ ɛbɛla na bɛfa bɛyɛ bɛ bodane kɛ bɛbamaa bɛazɔne bɛ.

¹² “Ɔ mra le diedima mɔɔ bɛnga bɛ nwo edwɛkɛ kɛ bɛyɛ mgbane mgbane anzɛɛ bɛte atua.” Saa kakula bie mɔɔ le diedinli wɔ abusua ne anu la yɛ ɛtane kpole a, kɛzi ɛhye baha ye papa ɛ? Saa papa ne ɛbu ɔ nye ɛgua bɛ ɛtetelɛ  zo yɛɛ ɔndea bɛ a, bie a ɔnrɛfɛta kɛ asafo nu kpanyinli.—Nea October 15, 1996, The Watchtower ne m. 21, ɛden. 6-7.

SONLE ASAFO NE

13. Kɛ ɔkɛyɛ na wɔahile kɛ ‘ɛte edwɛkɛ bo’ yɛɛ ‘ɛnli ɛ ti anwo’ ɛ?

¹³ Mediema mrenyia mɔɔ da subane kpalɛ ali la boa asafo ne. Sonla mɔɔ “ɔte edwɛkɛ bo” la nea maa anzodwolɛ ba. Saa ɛkulo kɛ bɛnwu wɔ kɛ ɛte edwɛkɛ bo a, tie awie mɔ na nwu adwenle mɔɔ bɛlɛ la. Saa bɛkɔ ayia bie a, asoo ɛbanyia ɛhulolɛ kɛ ɛbalie kpɔkɛzilɛ mɔɔ menli dɔɔnwo die to nu la wɔado nu wɔ mekɛ mɔɔ ɔntia Baebolo ngyinlazo biala la ɔ? ‘Ɛnli ɛ ti anwo’ a ɔkile kɛ tɛ mɔɔ wɔ wɔ adwenle nu kɛ ɛyɛ la ala a ɛkulo kɛ awie mɔ noko die to nu a. Ɛnwu ye kɛ saa ɛtie menli dɔɔnwo nzuzulɛ a ɔboa. (Gyn. 13:​8, 9; Mrɛ. 15:22) ‘Ɛngulo butule’ anzɛɛ ‘ɛnva ɛya ndɛndɛ.’ Kɛ anrɛɛ ɛbayɛ kyengye anzɛɛ awie mɔɔ ɛnde edwɛkɛ bo la, ɛbɛlɛ ɛ nwo aze yɛ ɛbu awie mɔ. Kɛmɔ ɛkulo anzodwolɛ la ati, ɛdimoa ɛtudu agyakɛ kɛ ɛ nee awie mɔ baziezie bɛ avinli, saa bɔbɔ tɛnlabelɛ ne anu yɛ se a. (Gye. 3:​17, 18) Kɛzi ɛtendɛ kɛnlɛma la kola maa awie mɔ, bɔbɔ dwazotiama, kakyi bɛ subane.—Ndɛ. 8:​1-3; Mrɛ. 20:3; 25:15; Mat. 5:​23, 24.

14. Saa bɛka kɛ “ɔnle kɛ ɔyɛ diedinli fofolɛ” yɛɛ “ɔle nɔhavo” a, ɔkile duzu?

¹⁴ Saa adiema nrenyia bie bafɛta kɛ asafo nu kpanyinli a, ɔnle kɛ ɔyɛ “diedinli fofolɛ.” Ɔnle kɛ ɛyɛ awie mɔɔ bɛzɔnenle wɔ la ɛhyɛ kpalɛ ɛdeɛ, noko ɛhyia mekɛ amaa wɔanyi sunsum nu. Kolaa na bɛakpa wɔ kɛ kpanyinli la, ɔwɔ kɛ ɛmaa ɔda ali kɛ ɛle kɛ Gyisɛse la, ɛbɛlɛ ɛ nwo aze yɛɛ ɛkulo kɛ ɛkendɛ too Gyihova mumua ne maa wɔ gyimalilɛ. (Mat. 20:23; Fel. 2:​5-8) Saa ɛbeta Gyihova, ɛfa ye tenlene ngyinlazo ne mɔ ɛbɔ wɔ ɛbɛla na ɛfa adehilelɛ mɔɔ ye ahyehyɛdeɛ ne fa maa la ɛdi gyima a, ɛbahola wɔahile kɛ ‘ɛle nɔhavo.’—1 Tim. 4:15.

15. Asoo ɔwɔ kɛ kpanyinli bie yɛ awie mɔɔ ɔze tendɛ kpalɛ wɔ bagua nu ɔ? Kilehile nu.

¹⁵ Ngɛlɛlera ne ka ye wienyi kɛ ɔwɔ kɛ asafo nu mgbanyima ‘kola kilehile.’ Asoo ɛhye kile  kɛ ɔwɔ kɛ ɛyɛ awie mɔɔ ɛze tendɛ kpalɛ wɔ bagua nu ɔ? Kyɛkyɛ. Mgbanyima dɔɔnwo mɔɔ bɛbɔ mɔdenle la ɛnze bagua nu ɛdendɛlɛ nye zo kpalɛ ɛdeɛ, noko saa bɛlua daselɛlilɛ nu anzɛɛ bɛkɔkpɔla mboane ne mɔ bie a, bɛkilehile kpalɛ. (Fa toto 1 Kɔlentema 12:​28, 29 nee Ɛfɛsɛsema 4:11 anwo.) Ɔngyia kɛ ɛbayɛ awie mɔɔ wɔbe wɔ bagua nu ɛdendɛlɛ nu ɛdeɛ, noko ɔwɔ kɛ ɛbɔ mɔdenle kɛ ɛbanwu kilehile kpalɛ. Kɛ ɔkɛyɛ na wɔayɛ kilehilevolɛ kpalɛ ɛ?

16. Kɛ ɔkɛyɛ na wɔayɛ kilehilevolɛ kpalɛ ɛ? (Eza nea nvoninli ne.)

¹⁶ “Kɛzi ɔkilehile la gyi nɔhalɛ edwɛkɛ ne azo kpundii.” Amaa wɔayɛ kilehilevolɛ kpalɛ la, maa wɔ ngilehilelɛ wɔ bagua nu nee wɔ folɛdulɛ ɛgyinla Nyamenle Edwɛkɛ ne azo. Sukoa Baebolo ne nee yɛ mbuluku ne mɔ kpalɛ. (Mrɛ. 15:28; 16:23) Saa ɛlɛsukoa debie a, anrɛɛ yɛ kɛzi bɛhilehile Ngɛlɛlera ne anu nee kɛzi yɛbahola yɛava yɛali gyima la nzonlɛ kpalɛ. Yɛɛ saa ɛlɛkilehile a, bɔ mɔdenle ɛsesebɛ kɛ ɛbamaa edwɛkɛ ne aha wɔ tievolɛma ahonle. Saa ɛbiza mgbanyima mɔɔ bɛlɛ anwubielɛ la adwenle na ɛfa bɛ nzuzulɛ ne mɔ ɛdi gyima a, ɔbahola yeaboa wɔ yeamaa wɔanyia anyuhɔlɛ. (1 Tim. 5:17) Ɔwɔ kɛ mgbanyima ‘kola maa bɛ mediema anwosesebɛ’; noko ɔdwu mekɛ ne bie a ɔwɔ kɛ bɛtu bɛ mediema folɛ anzɛɛ ‘bɛtwi bɛ nyunlu’ bɔbɔ. Wɔ ɔ muala anu, ɔwɔ kɛ mgbanyima da atiakunlukɛnlɛma ali. Saa wɔanyɛ kyengye, ɛda ɛlɔlɛ ali na ɛmaa wɔ ngilehilelɛ ne gyinla Nyamenle Edwɛkɛ ne azo a, ɛbanwu kilehile kpalɛ ɔluakɛ ɛlɛsukoa Gyisɛse, Kilehilevolɛ Kpole ne.—Mat. 11:​28-30; 2 Tim. 2:24.

KƆ ZO YƐ NINYƐNE MƆƆ BAMAA WƆAFƐTA LA

17. (a) Duzu a baboa asafo nu azonvolɛ yeamaa bɛahɔ zo bɛabɔ mɔdenle kɛ bɛbafɛta kɛ mgbanyima a? (b) Saa mgbanyima ɛlɛsuzu awie anwo bɛamaa bɛakpa ye kɛ kpanyinli a, duzu a ɔwɔ kɛ bɛkakye a? (Nea ɛlɛka, “ Saa Bɛlɛsuzu Awie Mɔ Anwo A, Bɛla Ndelebɛbo Ali.”)

¹⁷ Saa azonvolɛ bie mɔ nea subane ngakyile mɔɔ ɔwɔ kɛ awie nyia na yeafɛta kɛ kpanyinli  la a, bie a bɛbade nganeɛ kɛ bɛnrɛfɛta ɛlɛ. Noko kakye kɛ Gyihova nee ye ahyehyɛdeɛ ne anye ɛnla kɛ ɛbanyia subane ɛhye mɔ amuala pɛpɛɛpɛ. (1 Pita 2:21) Yɛɛ Gyihova sunsum ne mɔɔ tumi kpole wɔ nu la a baboa wɔ yeamaa wɔanyia subane ɛhye mɔ a. (Fel. 2:13) Subane fɔɔnwo bie wɔ ɛkɛ mɔɔ ɛkulo kɛ ɛnyia anyuhɔlɛ wɔ nu ɔ? Fa nwolɛ asɔneyɛlɛ to Gyihova anyunlu. Yɛ zɔhane subane ne anwo neɛnleanu, na biza mgbanyima ne mɔ bie ninyɛne mɔɔ ɛyɛ a ɛbanyia anyuhɔlɛ la.

18. Duzu a bɛmaa asafo nu azonvolɛ kɔsɔɔti anwosesebɛ kɛ bɛyɛ a?

¹⁸ Ɔrɛla ye kɛ mediema mrenyia kɔsɔɔti, mɔɔ mgbanyima ne mɔ boka nwo la bahɔ zo anyia subane ɛhye mɔ mɔɔ bɛha nwolɛ edwɛkɛ wɔ debiezukoalɛ ɛhye anu la. (Fel. 3:16) Ɛle sonvolɛ ɔ? Kɔ zo yɛ ninyɛne mɔɔ bamaa wɔafɛta kɛ kpanyinli la! Sɛlɛ Gyihova kɛ ɔtete wɔ ɔmaa ɛhola ɛzonle ye na ɛboa asafo ne. (Aye. 64:8) Gyihova ɛyila wɔ wɔ mɔdenle mɔɔ ɛlɛbɔ kɛ ɛbafɛta kɛ kpanyinli la azo.