1-2. (a) Nolobɔlɛ boni a maanle maanle ne bava ado gua kenle nsa ye a? (b) Kpuya boni mɔ a ɔwɔ kɛ yɛbua a?

PƐ YE nvoninli kɛ maanle maanle ne mɔ ɛbɔ “anzodwolɛ nee banebɔlɛ” nwo nolo ne mɔɔ yɛva mekɛ dɔɔnwo yɛhendɛ la. Bie a bɛbava bɛadu bɛ nloa anu kɛ bɛnyia banebɔlɛ wɔ ewiade bɛdɛla mekɛ biala. Maanle maanle ne bamaa menli anyia adwenle kɛ bɛhola bɛli ewiade ngyegyelɛ nwo gyima. Noko bɛnrɛhola bɛnrɛyɛ mɔɔ ɛlɛba arazi la anwo ɛhwee! Duzu ati ɔ? Baebolo ngapezo maa yɛnwu kɛ, “arɛlevilɛ nu ala ɛzɛkyelɛ bara bɛ nwo zo, . . . na bɛnrɛhola nriandi wɔ adenle biala azo.”​—1 Tɛs. 5:3.

² Kpuya bie mɔ wɔ ɛkɛ ne mɔɔ ɔwɔ kɛ yɛnyia nwolɛ mualɛ a: Duzu a bazi wɔ “anwongyelelɛ kpole” ne anu a? Duzu a Gyihova anye la kɛ yɛbayɛ ye wɔ mekɛ zɔhane a? Na kɛ ɔkɛyɛ na yɛaziezie yɛ nwo ɛnɛ kɛ yɛbali nɔhalɛ wɔ “anwongyelelɛ kpole” ne anu ɛ?​—Mat. 24:21.

3. Kɛ mɔɔ Yekile 17:5, 15-18 maa yɛnwu ye la, kɛzi Nyamenle bazɛkye “Babelɔn Kpole” ne ɛ?

³ Kenga Yekile 17:5, 15-18. Bɛbazɛkye “Babelɔn Kpole” ne! Kɛ mɔɔ yɛlimoa yɛha la, maanle maanle ne ɛnrɛhola ɛnrɛyɛ mɔɔ bazi la anwo ɛhwee. Duzu ati ɔ? Ɔluakɛ ‘Nyamenle bava awula bɛ ahonle nu kɛ bɛmaa ye nzuzulɛ ɛrɛla nu.’ Duzu nzuzulɛ ɔ? Kɛ, bɛzɛkye adalɛ ɛzonlenlɛ kɔsɔɔti mɔɔ Kilisienemaanle * ne boka nwo la. Nyamenle  bava ye nzuzulɛ awula “nane kɔkɔlɛ anwo ɛzulolɛ” ne “mɛne bulu” ne ahonle nu. Mɛne bulu ne gyi ɛkɛ ne maa arane ngakyile mɔɔ bɛlɛboa “nane” ne mɔɔ le Maamgbole Koyɛlɛ Eku ne la. (Yek. 17:3, 11-13; 18:8) Saa arane zɔhane mɔ kakyi bɛ nye kɔ adalɛ ɛzonlenlɛ nwo zo a, yemɔ bayɛ anwongyelelɛ kpole ne mɔlebɛbo. Ɔbayɛ arɛlevilɛ nu edwɛkɛ mɔɔ yɛ azibɛnwo, ɔbaha awie biala mɔɔ wɔ azɛlɛ ye azo la.

4. (a) Duzu a maanle maanle ne bahola agyinla zo ateta adalɛ ɛzonlenlɛ a? (b) Duzu a menli mɔɔ ɛnee wɔ ɛzonlenlɛ zɔhane mɔ anu la bayɛ a?

⁴ Yɛnze mɔɔ maanle maanle ne bagyinla zo ateta Babelɔn Kpole ne la. Bie a bɛbaha kɛ, ewiade ɛzonlenlɛ ngakyile ne mɔ ɛnva anzodwolɛ ɛmba, na bɛfa bɛ nwo bɛwulowula maanyɛlɛma nu. Anzɛɛ bie a bɛbaha kɛ, ɛzonlenlɛ eku ngakyile ne mɔ ɛnyia bɛ nwo somaa. (Yek. 18:3, 7) Ɛtetalɛ ɛhye ɛngile kɛ bɛbahu menli mɔɔ wɔ ɛzonlenlɛ eku ne mɔ anu la amuala. Emomu, ɔzɔho kɛ maanle maanle ne baye ɛzonlenlɛ eku ɛhye mɔ avi ɛkɛ. Saa eku ɛhye mɔ fi ɛkɛ ne a, menli mɔɔ ɛnee wɔ nu la banwu kɛ, ɛzonlenlɛ nu adekilevoma ne mɔ ɛbɛlɛbɛla bɛ, na yemɔti bɛbabɔ ɔ bo kɛ bɛtwe bɛ nwo bɛavi ɛzonlenlɛ zɔhane mɔ anwo.

5. Ɛwɔkɛ boni a Gyihova ɛbɔ ye wɔ anwongyelelɛ kpole ne anwo a, na duzu ati ɔ?

⁵ Baebolo ne ɛnga mekɛ tendenle mɔɔ bɛbava bɛazɛkye adalɛ ɛzonlenlɛ la, noko yɛze kɛ ɔnrɛlie mekɛ tendenle. (Yek. 18:10, 21) Gyihova ɛbɔ ɛwɔkɛ kɛ, “bɛdabɛ mɔɔ yekpa bɛ” yɛɛ nɔhalɛ ɛzonlenlɛ ti, “[ɔbapɛ] mekɛ ne azo.” (Maake 13:19, 20) Noko duzu a Gyihova anye la kɛ yɛbayɛ ɔvi anwongyelelɛ kpole ne mɔlebɛbo kɔdwu Amagɛdɔn konle ne anu a?

6. Duzu ati a saa yɛfi adalɛ ɛzonlenlɛ nu a, ɛnee ɔtɛwiele a?

⁶ Kɛ mɔɔ yɛhanle ye wɔ edwɛkɛ mɔɔ li ɛhye anyunlu anu la, Gyihova anye la kɛ ye azonvolɛ bahwe bɛ nwo avi Babelɔn Kpole ne anwo. Noko saa yɛfi adalɛ  ɛzonlenlɛ nu a, ɛnee ɔtɛwiele. Ɔwɔ kɛ yɛbɔ mɔdenle yɛgyinla nɔhalɛ ɛzonlenlɛ nzi na yɛsonle Gyihova angomekye. Suzu ndenle nwiɔ mɔɔ yɛbahola yɛalua zo yɛayɛ zɔ la anwo.

7. (a) Kɛ ɔkɛyɛ na yɛahola yɛagyinla Gyihova tenlene ngyinlazo ne mɔ anzi dahuu ɛ? (b) Kɛzi Hibuluma 10:24, 25 si zo kɛ ɔhyia kɛ yɛbɔ nu yɛsonle, titili ɛnɛ ɛ?

⁷ Mɔɔ limoa, ɔwɔ kɛ yɛbɔ kpɔkɛ kɛ yɛbagyinla Gyihova ɛbɛlabɔlɛ nwo ngyinlazo mɔɔ tenrɛ la anzi. Yɛngulo kɛ yɛdie ewiade ne adwenle nee ye ngyinlazo yɛto nu. Kɛ neazo la, yɛnlie nla nu ɛbɛlatane biala mɔɔ menli mɔɔ bɛ awodeɛ le ko agyalɛ boka nwo la yɛndo nu. (Mat. 19:4, 5; Wlo. 1:26, 27) Mɔɔ tɔ zo nwiɔ, ɔwɔ kɛ yɛkɔ zo yɛ nee yɛ mediema Kilisienema bɔ nu sonle. Yɛyɛ ɛhye wɔ ɛleka biala, wɔ Belemgbunlililɛ Asalo anzɛɛ saa nwolɛ hyia a, mediema azua nu anzɛɛ wɔ fealera nu. Ɔnva nwo biala mɔɔ bazi la, yɛngulo kɛ yɛgyakyi kɛ yɛ nee yɛ mediema babɔ nu azonle. Nɔhalɛ nu, ɔwɔ kɛ yɛkɔ yɛ ayia ne mɔ dahuu, “titili wɔ mekɛ mɔɔ [yɛkɛnwu] kɛ kenle ne ɛlɛbikye la.”​—Kenga Hibuluma 10:24, 25.

8. Kenle bie, kɛzi yɛ nolobɔlɛ ne bahakyi ɛ?

⁸ Wɔ anwongyelelɛ kpole ne anu, bie a edwɛkɛ mɔɔ yɛbɔ ye nolo la bahakyi. Kɛkala, yɛlɛbɔ Belemgbunlililɛ edwɛkpa ne nolo na yɛayɛ menli ɛdoavolɛma. Noko wɔ mekɛ zɔhane, yɛ edwɛkɛ ne anloa bayɛ se kɛ ezuawolɛ. (Yek. 16:21) Bie a yɛbabɔ nolo kɛ, ɔnrɛhyɛ bɛbazɛkye Seetan ewiade ne. Nzinlii, yɛbanwu edwɛkɛ holɛ ko mɔɔ yɛbaha nee kɛzi yɛbaha ye la. Asoo yɛbalua ndenle mɔɔ yɛluale zo yɛhanle edwɛkɛ ne wɔ ɛvolɛ dɔɔnwo anu la azo a yɛaha a? Anzɛɛ yɛbalua ndenle fofolɛ zo. Bɛmaa yɛhendɛ na yɛbanwu ye. Noko wɔ ye biala anu, ɔzɔho kɛ yɛbanyia nwolɛ adenle yɛava akɛnrasesebɛ yɛabɔ Gyihova ndɛnebualɛ ne nolo.​—Yiz. 2:3-5.

9. Kɛzi maanle maanle ne bayɛ bɛ nyɛleɛ wɔ yɛ edwɛkɛ ne anwo ɛ, noko anwodozo boni a yɛbahola yɛanyia a?

⁹ Ɔzɔho kɛ yɛ edwɛkɛ ne baha maanle maanle ne mɔ ɛya na bɛabɔ mɔdenle kɛ bɛtu yɛ bo bɔkɔɔ. Kɛ mɔɔ yɛfa yɛ nwo yɛto Gyihova anwo zo wɔ yɛ ɛzonlenlɛ gyima ne anu kɛkala la, yɛbahyia ye moalɛ wɔ mekɛ zɔhane. Yɛbahola yɛanyia anwodozo kɛ, yɛ Nyamenle ne bamaa yɛanyia anwosesebɛ yɛayɛ ye ɛhulolɛdeɛ.​—Maeka 3:8.

10. Kɛ mɔɔ ngapezo mɔɔ wɔ Luku 21:25-28 kile la, kɛzi menli dɔɔnwo bayɛ bɛ nyɛleɛ wɔ anwongyelelɛ kpole ne anu ɛ?

¹⁰ Kenga Luku 21:25-28. Wɔ anwongyelelɛ kpole ne anu, ɔbayɛ menli azibɛnwo kɛ debie biala mɔɔ ɛnee bɛsuzu kɛ ɔbagyinla ɛkɛ wɔ ewiade ɛhye anu ɛlɛsɛkye la. Ɔbayɛ “amaneɛnwunlɛ . . . kenle,” na ɛzulolɛ baha bɛ wɔ mekɛ mɔɔ alesama ɛlɛyia tɛnlabelɛ mɔɔ anu yɛ se kpalɛ la. (Zɛf. 1:14, 15) Wɔ mekɛ zɔhane, ninyɛne nu bayɛ se kpalɛ amaa Gyihova menli bɔbɔ. Ɔluakɛ yɛnle ewiade ne afoa la ati, yɛ nwo bahyele yɛ. Yɛnrɛnyia ninyɛne bie mɔ anwo adenle bɔbɔ.

11. (a) Duzu ati a maanle maanle ne adwenle bara Gyihova Alasevolɛ anwo zo a? (b) Duzu ati a ɔnle kɛ yɛsulo anwongyelelɛ kpole ne a?

¹¹ Ɔbadwu mekɛ bie la, menli mɔɔ bɛzɛkye bɛ ɛzonlenlɛ la bava ɛya kɛ Gyihova Alasevolɛ ɛlɛkɔ zo azonle la. Yɛbahola yɛava yɛ adwenle yɛabu kɛzi menli ne bayɛ bɛ nyɛleɛ wɔ ɛhye anwo, bɔbɔ wɔ  yintanɛte ne azo la. Maanle maanle ne mɔ nee bɛ belemgbunli Seetan bakpɔ yɛ kɛ yɛ ɛzonlenlɛ ne ala a ɛha la. Adwenle mɔɔ bɛnyianle kɛ bɛye ɛzonlenlɛ biala bavi azɛlɛ ye azo la amba nu. Yemɔti, bɛ adwenle bara yɛ nwo zo kpalɛ. Mekɛ ɛhye anu, maanle maanle ne mɔ bamaa mɔɔ bɛha bɛvale Gɔɔgo mɔɔ vi Meegɔɔgo * anwo la ara nu. Bɛbaha bɛabɔ nu kɛ bɛteta Gyihova menli. (Yiz. 38:2, 14-16) Mɔɔ bazi wɔ anwongyelelɛ kpole ne anu la bahola aha yɛ ɛzulolɛ, ɔluakɛ yɛnze kɛzi ninyɛne bahɔ ye pɛpɛɛpɛ la. Noko, yɛze debie ko: Ɔnle kɛ yɛsulo anwongyelelɛ kpole ne. Gyihova bamaa yɛ adehilelɛ mɔɔ bamaa yɛanyia yɛ ti la. (Edw. 34:19) Yɛbahola ‘yɛadwazo yɛagyinla na yɛamaa yɛ ti zo ɔluakɛ ɛnee yɛ ɛlielɛ ɛlɛbikye.’ *

12. Kɛzi “akɛlɛ nɔhavo nee badwema ne” ɛlɛsiezie yɛ amaa mɔɔ bazi kenle bie la ɛ?

¹² “Akɛlɛ nɔhavo nee badwema ne” ɛlɛsiezie yɛ, amaa yɛali nɔhalɛ wɔ anwongyelelɛ kpole ne anu. (Mat. 24:45) Bɛdua ndenle ngakyile zo a bɛyɛ ɛhye a. Fa nyianu mɔɔ yɛyɛle ye ɔvi 2016 kɔdwu 2018 la kɛ neazo. Wɔ nyianu ngyehyɛleɛ zɔhane mɔ anu, bɛmaanle yɛnwunle subane bie mɔ mɔɔ ɔwɔ kɛ yɛnyia bɛ wɔ mekɛ mɔɔ Gyihova kenle ne ɛlɛbikye la. Bɛmaa yɛva mekɛ ekyi yɛzuzu subane zɔhane mɔ anwo.

13. Kɛ ɔkɛyɛ na yɛamia nɔhalɛ mɔɔ yɛdi yɛamaa Gyihova la anu ɛ, na duzu ati a ɔwɔ kɛ yɛyɛ zɔ ɛnɛ a?

¹³ Nɔhalɛlilɛ: Nyianu mɔɔ yɛyɛle ye wɔ 2016 la edwɛkɛtile ne se, “Di Nɔhalɛ Maa Gyihova!” Nyianu zɔhane boale yɛ ɔmaanle yɛnwunle kɛ, saa yɛ nee Gyihova lɛ agɔnwolɛvalɛ kpalɛ a, yɛbali nɔhalɛ yɛamaa ye. Bɛhakyele yɛ kɛ, yɛbahola yɛalua asɔneyɛlɛ, bɛtianwo debiezukoalɛ nee nwolɛ ɛdwenledwenlenlɛ zo yɛabikye Gyihova. Saa yɛyɛ zɔ a, ɔmaa yɛnyia anwosesebɛ yɛgyinla ngyegyelɛ mɔɔ anu yɛ se kpalɛ bɔbɔ la anloa. Mekɛ mɔɔ Seetan ngyehyɛleɛ ne ɛlɛba ye awieleɛ la, bɛbazɔ nɔhalɛ mɔɔ yɛdi yɛamaa Nyamenle nee ye Belemgbunlililɛ ne la bɛanlea kpalɛ. Bie a bɛbahɔ zo bɛagolo yɛ nwo. (2 Pita 3:3, 4) Bɛbayɛ ɛhye kpalɛ, ɔlua afoa biala mɔɔ yɛngyinla la ati. Ɔwɔ kɛ yɛmia nɔhalɛ mɔɔ yɛdi yɛamaa Gyihova la anu ɛnɛ amaa yɛahola yɛali nɔhalɛ wɔ anwongyelelɛ kpole ne anu.

14. (a) Nzenzaleɛ boni a bara wɔ menli mɔɔ li ahyehyɛdeɛ ne anyunlu wɔ azɛlɛ ye azo la anu a? (b) Duzu ati a nɔhalɛlilɛ nwo bahyia wɔ mekɛ zɔhane a?

¹⁴ Wɔ anwongyelelɛ kpole ne anu, nzenzaleɛ bara wɔ menli mɔɔ li ahyehyɛdeɛ ne anyunlu wɔ azɛlɛ ye azo la anu. Ɔbadwu mekɛ bie la, ɛnee bɛva menli mɔɔ bɛkpokpa bɛ mɔɔ bɛha wɔ azɛlɛ ye azo la bɛhɔ anwuma amaa baboka nwo baho Amagɛdɔn konle ne. (Mat. 24:31; Yek. 2:26, 27) Ɛhye kile kɛ, Neazo Eku ne ɛnrɛboka yɛ nwo wɔ azɛlɛ ye azo bieko. Noko eku kpole ne anu amra bahɔ zo ava ngyehyɛleɛ ayɛ gyima. Mediema mrenyia mɔɔ fɛta mɔɔ bɛboka ekpunli kpole ne anwo  la bali ahyehyɛdeɛ ne anyunlu. Ɔwɔ kɛ yɛkile kɛ yɛdi nɔhalɛ ɔlua adehilelɛ mɔɔ vi Nyamenle ɛkɛ mɔɔ mediema ɛhye mɔ bava amaa yɛ mɔɔ yɛbali zo la azo. Saa yɛbanyia ngoane a, ɔgyi adehilelɛ zɔhane mɔ mɔɔ yɛbadie la azo!

15. Kɛ ɔkɛyɛ na yɛamia yɛ kpundiigyinlanlɛ ne anu ɛ, na duzu ati a ɔwɔ kɛ yɛyɛ zɔ kɛkala ɛ?

¹⁵ Kpundiigyinlanlɛ: Nyianu mɔɔ yɛyɛle ye wɔ 2017 la edwɛkɛtile ne se, “Gyinla Kpundii!” Nyianu zɔhane boale yɛ ɔmaanle yɛnwunle kɛzi yɛbagyinla sɔnea nloa la. Yɛnwunle kɛ, saa ninyɛne ɛngɔ ye boɛ ɛmmaa yɛ bɔbɔ a, yɛbahola yɛagyinla kpundii. Yɛbahola yɛamia yɛ kpundiigyinlanlɛ ne anu ɔlua Gyihova mɔɔ yɛbava yɛ nwo yɛado ɔ nwo zo la azo. (Wlo. 12:12) Ɔnle kɛ yɛmaa yɛ rɛle fi ɛwɔkɛ mɔɔ Gyisɛse bɔle yɛ la ɛlɛ. Ɔse: “Mɔɔ kɛgyinla nu kɛhɔ awieleɛ la bɛbalie ye ngoane.” (Mat. 24:13) Ɛwɔkɛ ɛhye maa yɛnwu kɛ ɔwɔ kɛ yɛkɔ zo yɛdi nɔhalɛ ɔnva nwo ngyegyelɛ biala mɔɔ yɛbayia la. Saa yɛgyinla sɔnea nloa ɛnɛ a, ɔbamaa yɛ nwo ayɛ se kolaa na anwongyelelɛ kpole ne abɔ ɔ bo.

16. Duzu a kile kɛ awie lɛ akɛnrasesebɛ a, na kɛ ɔkɛyɛ na yɛanyia akɛnrasesebɛ kpole ɛnɛ ɛ?

¹⁶ Akɛnrasesebɛ: Nyianu mɔɔ yɛyɛle ye wɔ 2018 la edwɛkɛtile ne se, “Nyia Akɛnrasesebɛ!” Nyianu zɔhane hakyele yɛ kɛ, akɛnrasesebɛ mɔɔ yɛlɛ la ɛngyi yɛ mɔdenlebɔlɛ zo. Kɛ mɔɔ kpundiigyinlanlɛ de la, saa yɛbanyia akɛnrasesebɛ a, kyesɛ yɛfa yɛ nwo yɛto Gyihova anwo zo. Kɛ ɔkɛyɛ na yɛayɛ zɔ ɛ? Saa yɛkenga Gyihova Edwɛkɛ ne na yɛdwenledwenle kɛzi ɔliele ye azonvolɛ mɔɔ dɛnlanle aze wɔ tete ne la anwo a, yɛ anwodozo bayɛ kpole. (Edw. 68:20; 2 Pita 2:9) Wɔ anwongyelelɛ kpole ne anu, saa maanle maanle ne teta yɛ a, akɛnrasesebɛ yɛɛ Gyihova anu anwodozo nwo bahyia adɛla mekɛ biala. (Edw. 112:7, 8; Hib. 13:6) Saa yɛfa yɛ nwo yɛto Gyihova anwo zo kɛkala a, yɛbanyia akɛnrasesebɛ yɛagyinla Gɔɔgo ɛtetalɛ ne anloa. *

17. Duzu ati a ɔnle kɛ yɛsulo Amagɛdɔn a? (Nea ɔ nyunlu nvoninli ne.)

¹⁷ Kɛ mɔɔ yɛnwunle ye wɔ edwɛkɛ mɔɔ  limoa anu la, bɛwole yɛ nuhua dɔɔnwo wɔ awieleɛ mekɛ ɛhye anu. Noko eza yɛ nye la kɛ yɛbahola yɛapɛ anwongyelelɛ kpole ne. Amagɛdɔn konle ne a bava ngyehyɛleɛ ɛtane ɛhye ara awieleɛ bɔkɔɔ a. Noko ɔnle kɛ yɛsulo. Duzu ati ɔ? Ɔluakɛ Nyamenle a baho konle ɛhye a. (Mrɛ. 1:33; Yiz. 38:18-20; Zɛk. 14:3) Saa mekɛ ne dwu a, Gyihova bamaa Gyisɛse Kelaese ali anwuma ɛlɔnema ne anyunlu wɔ konle ne anu. Ɔ nee menli mɔɔ bɛkpokpa bɛ mɔɔ bɛdwazo bɛ yɛɛ anwumabɔvolɛma pemgbenleamgbe ne babɔ nu na bɛ nee Seetan, ye sunsum ɛtane ne mɔ yɛɛ azɛlɛ ye azo tumivolɛma azie ye zo.​—Dan. 12:1; Yek. 6:2; 17:14.

18. (a) Ɛwɔkɛ boni a Gyihova ɛbɔ yɛ a? (b) Kɛzi Yekile 7:9, 13-17 maa ɛnyia anwodozo kpole wɔ mɔɔ bazi kenle bie la anwo ɛ?

¹⁸ Gyihova ɛbɔ ɛwɔkɛ kɛ: “Akodeɛ biala mɔɔ bɛbayɛ bɛatia wɔ la ɛnrɛyɛ kpalɛ.” (Aye. 54:17) Gyihova nɔhalɛ azonvolɛ mɔɔ bɛle “ekpunli kpole” ne anu amra la “[bavi] anwongyelelɛ kpole ne anu.” Bɛbahɔ zo bɛava ɛzonlenlɛ nwuanzanwuanza bɛamaa ye. (Kenga Yekile 7:9, 13-17.) Nea kɛzi Baebolo ne maa yɛnyia kenle bie anu anwodozo a! Yɛze kɛ, “Gyihova bɔ nɔhavoma anwo bane.” (Edw. 31:23) Awie biala mɔɔ kulo Gyihova na ɔye ye ayɛlɛ la anye balie kɛ ɔlɛte ye duma ne anwo la.​—Yiz. 38:23.

19. Duzu a yɛ nye la ye ade kenle bie a?

¹⁹ Dwenle kɛzi bɛbaha edwɛkɛ mɔɔ wɔ 2 Timote 3:2-5 bɛavale menli mɔɔ badɛnla ewiade fofolɛ ne anu anwo la anwo. (Nea ɛlɛka “ Subane Mɔɔ Menli Bala Ye Ali Wɔ Mekɛ Zɔhane La.”) Adiema George Gangas * mɔɔ zonlenle wɔ Neazo Eku ne anu la hanle nwolɛ edwɛkɛ kɛ: “Nea kɛzi ewiade ne anu bayɛ wɔ mekɛ mɔɔ menli kɔsɔɔti le mediema la! Ɔnrɛhyɛ, ɛbanyia nwolɛ adenle wɔadɛnla ewiade fofolɛ ne anu. Ɛbadɛnla aze wɔahyɛ kɛ Gyihova la. Yɛbadɛnla aze dahuu.” Anyelazo kɛnlɛma boni ɛne!