1. Yɛ “sunsum nu ngyianlɛ” ne a le boni, na kɛzi ɔmaa yɛ nye die ɛ?

 NƆHALƐ anyelielɛ ɛnle anyelielɛ mɔɔ ɔba ɔkɔ ala. Emomu, ɔkola ɔmaa awie anye die wɔ ye ɛbɛlabɔlɛ kɔsɔɔti anu. Adenle boni azo? Gyisɛse hilehilele nu wɔ ye Boka Zo Ɛdendɛlɛ ne anu kɛ: “Anyelielɛ a le bɛdabɛ mɔɔ bɛze bɛ sunsum nu ngyianlɛ la.” (Mat. 5:3) Ɛnee Gyisɛse ze kɛ bɛbɔle alesama mɔɔ yɛlɛ ɛhulolɛ kpole kɛ yɛbanwu yɛ Bɔvolɛ, Gyihova Nyamenle ne na yɛazonle ye a. Yemɔ a le yɛ “sunsum nu ngyianlɛ” ne a. Na kɛmɔ Gyihova le “anyelielɛ Nyamenle” la ati, bɛdabɛ mɔɔ bɛsonle ye la noko anye bahola alie.​—1 Tim. 1:11.

2-3. (a) Kɛ mɔɔ Gyisɛse hanle la, nwane mɔ bieko a bɛ nye bahola alie a? (b) Duzu a yɛbazuzu nwo wɔ edwɛkɛ ɛhye anu a, na duzu ati a nwolɛ hyia a?

² Asoo ɔwɔ kɛ yɛyɛ menli mɔɔ yɛnlɛ ngyegyelɛ kolaa na yɛ nye alie ɔ? Kyɛkyɛ. Gyisɛse hanle edwɛkɛ bie mɔɔ yɛ azibɛnwo la wɔ ye ɛdendɛlɛ ne anu. “Bɛdabɛ mɔɔ bɛdi nyane la”​—bie a bɛ ɛtane anzɛɛ ngyegyelɛ bie mɔɔ bɛlɛyia ye wɔ bɛ ɛbɛlabɔlɛ nu la ɛlɛmaa bɛali nyane bɔbɔ la​—anye bahola alie. Gyisɛse hanle edwɛkɛ ko ne ala wɔ bɛdabɛ mɔɔ “tenleneyɛlɛ ti bɛyɛ bɛ kpɔdekpɔde” anzɛɛ bɛle Kelaese ɛdoavolɛ la ati ‘bɛbɔ bɛ aholoba’ la anwo. (Mat. 5:4, 10, 11) Noko kɛzi ɛbahola wɔanyia nɔhalɛ anyelielɛ wɔ tɛnlabelɛ zɛhae mɔ anu ɛ?

³ Ɛnee Gyisɛse ɛlɛkilehile kɛ, tɛ mɔɔ bamaa yɛ nye alie la a le kɛ yɛnlɛ ngyegyelɛ biala wɔ yɛ ɛbɛlabɔlɛ nu, emomu, saa yɛdi yɛ sunsum nu ngyianlɛ nwo gyima na yɛbikye Nyamenle kpalɛ a yɛɛ yɛ nye balie a. (Gye. 4:8) Kɛ ɔkɛyɛ na yɛahola yɛayɛ  zɔ ɛ? Wɔ edwɛkɛ ɛhye anu, yɛbazuzu ninyɛne nsa mɔɔ bamaa yɛanyia nɔhalɛ anyelielɛ la anwo.

4. Debie mɔɔ limoa mɔɔ yɛyɛ a yɛbanyia nɔhalɛ anyelielɛ la a le boni? (Edwɛne 1:1-3)

⁴ MƆƆ LIMOA: Yɛbanyia nɔhalɛ anyelielɛ a, ɔwɔ kɛ yɛdi sunsum nu aleɛ. Menli nee nane hyia aleɛ kpalɛ na bɛahola bɛadɛnla ngoane nu. Noko menli ala a di sunsum nu aleɛ a. Na yɛhyia nwolɛ. Ɛhye ati a Gyisɛse hanle kɛ: “Tɛ paano angome a maa sonla tɛnla ngoane nu a, emomu edwɛkɛ biala mɔɔ vi Gyihova anloa anu la noko.” (Mat. 4:4) Ɔti, ɔnle kɛ yɛmaa kenle ko bɔbɔ pɛ nu mɔɔ yɛnli sunsum nu aleɛ mɔɔ gyi Nyamenle Edwɛkɛ Baebolo ne mɔɔ sonle bolɛ la azo a. Edwɛndolɛnli ne hanle kɛ: ‘Anyelielɛ a le sonla ne mɔɔ ɔ nye die Gyihova mɛla ne anwo na ɔkenga ye alehyenlɛ nee aledwolɛ la.’​—Kenga Edwɛne 1:1-3.

5-6. (a) Duzu a yɛbahola yɛazukoa yɛavi Baebolo ne anu a? (b) Saa yɛkenga a, kɛzi ɔbaboa yɛ ɛ?

⁵ Kɛmɔ Gyihova kulo yɛ la ati, yehile yɛ mɔɔ yɛyɛ a yɛ nye balie la wɔ Baebolo ne anu. Yɛnwu bodane mɔɔ ɔlɛ ɔmaa yɛ wɔ ɛbɛlabɔlɛ nu la. Yɛnwu kɛzi yɛbahola yɛabikye ye na yɛanyia ɛtanefakyɛ la. Yɛɛ yɛnwu anyelazo kɛnlɛma mɔɔ yebɔ yɛ ɛwɔkɛ kɛ yɛbanyia ye kenle bie la. (Gyɛ. 29:11) Nɔhalɛ ɛhye mɔ mɔɔ yɛzukoa ye wɔ Baebolo ne anu la ɛmaa fɛlɛkolilɛ ɛyi yɛ ahonle!

⁶ Kɛ mɔɔ yɛze ye la, eza folɛdulɛ mɔɔ yɛbahola yɛava yɛabɔ yɛ ɛbɛla alehyenlɛ biala la ɛyi Baebolo ne anu. Saa yɛfa folɛdulɛ ɛhye mɔ yɛdi gyima a, yɛbahola yɛanyia anyelielɛ. Saa ngyegyelɛ mɔɔ ɛlɛyia wɔ ɛbɛlabɔlɛ nu la  ɛlɛmaa ɛ sa nu ado a, nyia mekɛ dɔɔnwo kenga Gyihova Edwɛkɛ ne na dwenledwenle nwolɛ. Gyisɛse hanle kɛ: “Anyelielɛ a le bɛdabɛ mɔɔ bɛtie Nyamenle edwɛkɛ ne na bɛdi zo la!”​—Luku 11:28.

7. Kɛ ɔkɛyɛ na wɔanyia mekɛ mɔɔ ɛfa ɛkenga Nyamenle Edwɛkɛ ne la azo nvasoɛ kpole ɛ?

⁷ Saa ɛlɛkenga Nyamenle Edwɛkɛ ne a, tɔ alagye amaa ɛ nye alie mɔɔ ɛlɛkenga la anwo. Kɛ neazo la, asoo ɛhye bie ɛdo wɔ ɛlɛ ɔ? Awie donle aleɛ bie mɔɔ ɛ nye die nwolɛ kpalɛ la. Noko bie a kɛmɔ ɛkpondɛ ye ndɛ anzɛɛ wɔ adwenle wɔ debie bie azo la ati, ɛlile aleɛ ne ndɛndɛ. Mɔɔ ɛwiele la, ɛnwunle kɛ aleɛ ne andɔ ɛ kunlu na ɛ kunlu anu a anrɛɛ ɛzile abotane ekyi. Zɔhane ala a Baebolo ɛgengalɛ noko bahola ayɛ a. Bie a ɛbagenga ye ndɛndɛ ɔti nuhua edwɛkɛ ne ɛnrɛyɛ wɔ fɛ kpalɛ. Tɔ alagye kenga Nyamenle Edwɛkɛ ne; pɛ mɔɔ ɛlɛkɔ zo la anwo nvoninli, fa ye kɛ ɛte menli mɔɔ ɛlɛtendɛ la ane na dwenle mɔɔ wɔgenga la anwo. Saa ɛyɛ ɛhye mɔ amuala a, ɔbamaa ɛ nye alie kpalɛ.

8. Kɛzi “akɛlɛ nɔhavo nee badwema ne” ɛlɛdi ye ɛzonlelilɛ nwo gyima ɛ? (Eza nea ɔbodwɛkɛ ne.)

⁸ Gyisɛse kpale “akɛlɛ nɔhavo nee badwema ne” kɛ bɛmaa yɛ sunsum nu aleɛ wɔ mekɛ kpalɛ nu, na amgba, yɛ ko yi kpalɛ. * (Mat. 24:45) Ngɛlɛlera ne mɔɔ bɛvale sunsum ne a bɛhɛlɛle la a le debie titili mɔɔ akɛlɛ nɔhavo ne gyinla zo yɛ debie biala a. (1 Tɛs. 2:13) Ɔti zɔhane sunsum nu aleɛ ne boa yɛ maa yɛnwu adwenle mɔɔ Gyihova lɛ wɔ ninyɛne nwo mɔɔ yela ye ali wɔ Baebolo ne anu la. Ɛhye ati a yɛkenga Ɛzinzalɛ Arane nee Awake! magazine ne mɔ yɛɛ edwɛkɛ mɔɔ wɔ jw.org azo la. Yɛsiezie yɛ nwo yɛmaa dapɛne avinli nee dapɛne awieleɛ debiezukoalɛ ne mɔ. Yɛɛ saa yɛnyia JW Broadcasting^® gyimalilɛ ne mɔɔ ba siane biala la a, yɛnea. Saa yɛdi sunsum nu aleɛ dɔɔnwo a, ɔbaboa yɛ yemaa yɛayɛ debie mɔɔ tɔ zo nwiɔ mɔɔ maa yɛnyia nɔhalɛ anyelielɛ la.

9. Debie mɔɔ tɔ zo nwiɔ mɔɔ maa yɛnyia nɔhalɛ anyelielɛ la a le boni?

⁹ MƆƆ TƆ ZO NWIƆ: Yɛbanyia nɔhalɛ anyelielɛ a, ɔwɔ kɛ yɛfa Nyamenle ngyinlazo ne mɔ yɛbɔ yɛ ɛbɛla. Edwɛndolɛnli ne hɛlɛle kɛ: “Anyelielɛ a le awie biala mɔɔ sulo Gyihova, na ɔdua Ye ndenle ne mɔ anu la.” (Edw. 128:1) Saa yɛsulo Gyihova a, ɔkile kɛ yɛbu ye kpole kpalɛ na yɛnrɛhulo kɛ yɛbayɛ debie biala mɔɔ ɔ nye ɛnrɛlie nwolɛ la. (Mrɛ. 16:6) Ɔti, yɛbɔ mɔdenle dahuu kɛ yɛbava Nyamenle ngyinlazo mɔɔ fale kpalɛ nee ɛtane nwo mɔɔ yehilehile nu wɔ Baebolo ne anu la yɛabɔ yɛ ɛbɛla. (2 Kɔl. 7:1) Saa yɛyɛ ninyɛne mɔɔ Gyihova kulo na yɛkyi ninyɛne mɔɔ ɔkyi la a, yɛ nye bahola alie.​—Edw. 37:27; 97:10; Wlo. 12:9.

10. Kɛ mɔɔ Wulomuma 12:2 kile la, yɛ ɛzonlelilɛ a le boni?

¹⁰ Kenga Wulomuma 12:2. Bie a awie ze kɛ Gyihova lɛ tumi kile yɛ mɔɔ le kpalɛ nee mɔɔ le ɛtane la, noko ɔwɔ kɛ ɔdaye mumua ne ɔdi Nyamenle ngyinlazo ne mɔ azo. Kɛ neazo la, bie a awie ze kɛ arane ne lɛ adenle kile speed mɔɔ ɔwɔ kɛ delavama kɔ wɔ adenle zo la. Noko bie a ɔdaye mumua ne ɔngulo kɛ ɔdi zɔhane edwɛkɛ ne azo. Ɔti ɔkɔ speed ɔtɛla mɔɔ bɛhile la. Yɛfa yɛ ɛbɛlabɔlɛ yɛkile kɛ amgba yɛdie yɛdi kɛ Gyihova ngyinlazo ne mɔ mɔɔ yɛbali zo la a le debie kpalɛ wɔ ɛbɛlabɔlɛ nu a. (Mrɛ. 12:28) Zɔhane ala a Devidi dele nganeɛ a, ɔluakɛ ɔhanle ye wɔ Gyihova anwo kɛ: “Ɛmaa menwu ngoane adenle ne. Anyelielɛ ngome wɔ ɛ nyunlu; fɛlɛkolilɛ wɔ ɛ sa fema zo dahuu.”​—Edw. 16:11.

11-12. (a) Saa adwenleadwenle tɔ yɛ nwo anzɛɛ yɛ sa nu to a, duzu a ɔwɔ kɛ yɛnea boɛ wɔ nwo a? (b) Kɛzi edwɛkɛ mɔɔ wɔ Felepaema 4:8 la baboa yɛ wɔ mekɛ mɔɔ yɛlɛkpa anyelielɛ ninyɛne la ɛ?

 ¹¹ Saa adwenleadwenle tɔ yɛ nwo anzɛɛ yɛ sa nu to a, bie a yɛbade nganeɛ kɛ ɔwɔ kɛ yɛyɛ ninyɛne bie mɔ amaa yɛaye yɛ adwenle yɛavi yɛ ngyegyelɛ ne mɔ azo. Ndelebɛbo wɔ ɛhye anu, noko ɔwɔ kɛ yɛnea boɛ na ɛhye ammaa yɛanyɛ debie mɔɔ Gyihova kyi la.​—Ɛfɛ. 5:10-12, 15-17.

¹² Wɔ kɛlata mɔɔ ɛzoanvolɛ Pɔɔlo hɛlɛle hɔmaanle Felepaema la anu, ɔhanle ɔhilele Kilisienema kɛ bɛhɔ zo bɛzuzu debie biala mɔɔ le ‘tenlene, nwolɛ te, mɔɔ maa bɛnyia ɛlɔlɛ, [nee] ɛbɛla kpalɛ biala anwo.’ (Kenga Felepaema 4:8.) Ɛnee tɛ anyelielɛ ninyɛne nwo edwɛkɛ a Pɔɔlo ɛlɛkɛlɛ ɛdeɛ, noko ɔwɔ kɛ yɛmaa mɔɔ ɔhɛlɛle la boa yɛ wɔ mekɛ mɔɔ yɛlɛkpa ninyɛne mɔɔ yɛbava yɛalielie yɛ nye la. Sɔ ɛhye nea: Ɛlɛkenga ngyɛnu ne a, ɛleka biala mɔɔ ɛbanwu edwɛkɛ, “debie biala” la, fa edwɛkɛ agbɔkɛ ɛhye mɔ wulowula nuhua, “edwɛne,” “vidio,” “mbuluku” anzɛɛ “vidio game.” Saa ɛyɛ ɛhye a, ɔbaboa wɔ yeamaa wɔanwu mɔɔ le kpalɛ wɔ Nyamenle anye zo nee mɔɔ ɛnle kpalɛ la. Yɛkulo kɛ yɛfa Gyihova ngyinlazo ne mɔ mɔɔ kpogya la yɛbɔ yɛ ɛbɛla. (Edw. 119:1-3) Akee yɛbanyia adwenle mɔɔ anu te na yɛayɛ debie mɔɔ tɔ zo nsa mɔɔ maa yɛnyia nɔhalɛ anyelielɛ la.​—Gyi. 23:1.

13. Debie mɔɔ tɔ zo nsa mɔɔ maa yɛnyia nɔhalɛ anyelielɛ la a le boni? (Dwɔn 4:23, 24)

¹³ MƆƆ TƆ ZO NSA: Nea kɛ ɛbava Gyihova ɛzonlenlɛ wɔalimoa wɔ ɛbɛlabɔlɛ nu. Kɛmɔ Gyihova a le yɛ Bɔvolɛ la ati, ɔwɔ kɛ yɛsonle ye. (Yek. 4:11; 14:6, 7) Ɔti, debie mɔɔ ɔwɔ kɛ ɔkyia yɛ kpalɛ la a le kɛ yɛbazonle ye wɔ adenle mɔɔ ɔdie ɔto nu la azo, “wɔ sunsum nu nee nɔhalɛ nu.” (Kenga Dwɔn 4:23, 24.) Yɛkulo kɛ Nyamenle sunsum nwuanzanwuanza ne kile yɛ kɛzi ɔwɔ kɛ yɛsonle ye la amaa ɔ nee nɔhalɛ ne mɔɔ wɔ ye Edwɛkɛ ne anu la ayɛ ko. Saa yɛde maanle mɔɔ bɛmmaa yɛnyɛ yɛ ɛzonlenlɛ gyima ne afoa bie mɔ anzɛɛ bɛva bɛ sa bɛdo zo la anu bɔbɔ a, ɔwɔ kɛ yɛ ɛzonlenlɛ ne a dimoa a. Kɛkala, yɛ mediema mɔɔ bo 100 la gua efiade ɔluakɛ bɛle Gyihova Alasevolɛ la ati. * Wɔ ɛhye mɔ amuala anu bɔbɔ, bɛfa anyelielɛ bɛyɛ biala mɔɔ bɛbahola la bɛyɛ asɔne, bɛsukoa debie na bɛka Nyamenle nee ye Belemgbunlililɛ ne anwo edwɛkɛ bɛkile awie mɔ! Saa bɛbɔ yɛ aholoba anzɛɛ bɛyɛ yɛ kpɔdekpɔde a, yɛ nye bahola alie ɔluakɛ yɛze kɛ Gyihova nee yɛ lua yɛɛ ɔbamaa yɛ nwolɛ ahatualɛ.​—Gye. 1:12; 1 Pita 4:14.

14. Duzu a dole adiema kpavolɛ bie mɔɔ wɔ Tajikistan la a, na duzu ati ɔ?

¹⁴ Awie mɔ ɛbɛlabɔlɛ nu edwɛkɛ si zo kɛ ninyɛne nsa ne mɔɔ yɛzuzu nwolɛ kɛkala la amgba maa yɛnyia nɔhalɛ anyelielɛ ɔnva nwo tɛnlabelɛ biala mɔɔ yɛwɔ nu la. Suzu mɔɔ dole Jovidon Bobojonov mɔɔ yeli ɛvolɛ 19 mɔɔ vi Tajikistan mɔɔ ɔkpole kɛ ɔbahɔ sogya la anwo. Wɔ October 4, 2019, bɛhɔhwenle ye bɛvile ye sua nu, bɛdole ye efiade siane dɔɔnwo na bɛ nee ye lile kɛ awie mɔɔ ɛhɔli ɛtane bie la. Bɛhanle nzisi ɛbɛla ɛhye anwo edwɛkɛ wɔ riledio nee TV zo wɔ maanle dɔɔnwo anu. Bɛhanle ye wɔ amaneɛbɔlɛ nu kɛ, kɛmɔ ɛnee bɛkulo kɛ bɛtinlitinli ɔ nwo zo bɛmaa ɔka ndane kɛ ɔbahɔ sogya na yeawula sogya tɛladeɛ la ati, bɛbole ye. Yemɔ anzi, kɔɔto ne buale ye fɔlɛ na ɔvale ye ɔhɔdole efiade kɛ ɔyɛ gyima ɛsesebɛ hɔkpulale kɛ maanle kpanyinli ne zele ye anwunvɔne na ɔhanle kɛ bɛye ye la. Wɔ ɛhye  mɔ amuala anu, Jovidon hɔle zo lile nɔhalɛ na ɔ nye liele dahuu. Wɔ adenle boni azo? Yemɔ a le kɛ ɛnee dahuu ɔze ye sunsum nu ngyianlɛ.

15. Kɛzi Jovidon lile sunsum nu aleɛ wɔ mekɛ mɔɔ ɔla efiade la ɛ?

¹⁵ Mɔɔ Jovidon la efiade la, ɔhɔle zo ɔlile sunsum nu aleɛ ɔnva nwo kɛ ɛnee ɔnlɛ Baebolo anzɛɛ yɛ mbuluku ne mɔ bie la. Kɛzi ɛhye yɛle boɛ ɛ? Ɛnee mediema mɔɔ wɔ asafo ne anu la fa aleɛ kɔmaa ye, na ɛnee bɛkɛlɛ alehyenlɛ ne anu tɛkese ne bɛgua baage ne mɔɔ aleɛ ne wɔ nu la anwo. Ɔti ɛnee ɔkola ɔkenga Baebolo ne kenle ko biala na ɔdwenledwenle nwolɛ. Mɔɔ bɛyele ye bɛvile efiade la, ɔdule bɛdabɛ mɔɔ bɛtɛnyianle bɛtɛyiale sɔnea mɔɔ anu yɛ se la folɛ kɛ: “Ɔhyia kɛ ɛbava fanwodi mɔɔ ɛlɛ ye kɛkala la wɔagenga Gyihova Edwɛkɛ ne na wɔazukoa yɛ mbuluku ne mɔ kpalɛ amaa wɔanyia Gyihova anwo nrɛlɛbɛ kpole.”

16. Duzu a Jovidon vale ye adwenle ziele zo a?

¹⁶ Yɛ diema ne vale Gyihova ngyinlazo ne mɔ bɔle ye ɛbɛla. Yeanva ye adwenle yeanzie atiakunluwɔzo ɛtane zo yɛɛ yeanva ɔ nwo yeanwula ɛbɛlatane biala anu, emomu, ɔvale ye adwenle ɔziele Gyihova, yɛɛ ninyɛne mɔɔ Gyihova bu ye kɛ ɔhyia la azo. Jovidon nwunle kɛzi ninyɛne ngɛnlɛma mɔɔ Nyamenle bɔle la yɛ nwanwane la. Nwonlomɔ biala ɔte nloma  mɔɔ ɛlɛsu la ane. Ɔdwu nɔsolɛ a, ɔnea siane ne nee nwɔlɔra ne mɔ. Ɔhanle kɛ: “Gyihova ahyɛlɛdeɛ ɛhye mɔ maanle me nye liele na ɔmaanle me anwosesebɛ.” Saa yɛmaa yɛ nye sɔ sunsum nu nee nwonane nu ninyɛne mɔɔ Gyihova fa maa yɛ la a, ɔmaa yɛdi fɛlɛko, na zɔhane fɛlɛkolilɛ ne maa yɛ anwosesebɛ ɔmaa yɛgyinla kpundii.

17. Saa awie wɔ Jovidon tɛnlabelɛ ne bie anu a, kɛzi edwɛkɛ mɔɔ wɔ 1 Pita 1:6, 7 la bahola aboa ye ɛ?

¹⁷ Eza Jovidon vale Gyihova ɛzonlenlɛ limoale. Ɛnee ɔze kɛzi ɔhyia kɛ ɔbahɔ zo yeali nɔhalɛ yeamaa nɔhalɛ Nyamenle ne la. Gyisɛse hanle kɛ: “Gyihova wɔ Nyamenle ne a ɔwɔ kɛ ɛsonle ye a, na ɔ ngome ala a ɔwɔ kɛ ɛkoto ye a.” (Luku 4:8) Ɛnee sogya mgbanyima nee sogyama kulo kɛ Jovidon ka kɛ ɔnle Gyihova Dasevolɛ bieko. Noko Jovidon yɛle asɔne alehyenlɛ nee aledwolɛ biala na ɔzɛlɛle Gyihova kɛ ɔboa ye amaa ɔ sa nu ando na yeamkpo ye diedi ne. Ɔnva nwo kɛ bɛ nee Jovidon anli ye boɛ la, yeamkpo ye diedi ne ɛlɛ. Ɛhye ati, kɛkala ɔbahola yeali fɛlɛko kpole kɛ yenyia debie mɔɔ ɛnee ɔnlɛ bie kolaa na bɛahwe ye bɛavi ye sua nu, bɛabo ye na bɛado ye efiade la bie​—yemɔ a le diedi mɔɔ bɛzɔ bɛnlea la.​—Kenga 1 Pita 1:6, 7.

18. Kɛ ɔkɛyɛ na yɛ nye ahɔ zo alie ɛ?

¹⁸ Gyihova ze mɔɔ yɛhyia nwo amaa yɛ nye alie nɔhalɛ nu la. Saa ɛfa ninyɛne nsa ne mɔɔ maa bɛnyia nɔhalɛ anyelielɛ la ɛdi gyima na ɛlɛyia ngyegyelɛ mɔɔ anu yɛ se bɔbɔ la a, ɛ nye bahɔ zo alie. Na ɛdawɔ noko ɛbahola wɔaha kɛ: “Anyelielɛ a le menli mɔɔ bɛ Nyamenle a le Gyihova la!”​—Edw. 144:15.