1. Anyelazo boni a Gyihova ɛmaa yɛnyia a?

 GYIHOVA ɛmaa yɛnyia anyelazo kɛnlɛma, yemɔ a le dahuu ngoane. Bie mɔ lɛ anyelazo kɛ bɛbadɛnla anwuma dahuu kɛ sunsum nu abɔdeɛ mɔɔ ɛnwu ɛlɛ. (1 Kɔl. 15:50, 53) Noko menli dɔɔnwo lɛ anyelazo kɛ bɛbadɛnla azɛlɛ ye azo na bɛanyia kpɔkɛdelɛ mɔɔ di munli nee anyelielɛ dahuu. (Yek. 21:3, 4) Saa yɛbanyia dahuu ngoane wɔ anwuma anzɛɛ azɛlɛ ye azo bɔbɔ a, yɛ anyelazo ne sonle bolɛ maa yɛ.

2. Duzu a yɛ anyelazo ne gyi zo a, na duzu ati a yɛkola yɛka ye zɔ a?

² Edwɛkɛkpɔkɛ “anyelazo” mɔɔ bɛva bɛli gyima wɔ Baebolo ne anu la kola kile kɛ “ɛ nye la kɛ ninyɛne mgbalɛ basisi.” Yɛdie yɛdi bɔkɔɔ kɛ, kenle bie nwo anyelazo mɔɔ yɛlɛ la bara nu ɔluakɛ ɔvi Gyihova ɛkɛ. (Wlo. 15:13) Yɛze ɛwɔkɛ mɔɔ yebɔ a, yɛɛ yɛze kɛ ɔdi ye ɛwɔkɛ zo dahuu. (Nɔm. 23:19) Yɛdie yɛdi bɔkɔɔ kɛ Gyihova lɛ ɛhulolɛ nee tumi mɔɔ ɔbava yeayɛ debie biala mɔɔ yeha kɛ ɔbayɛ la. Ɔti yɛ anyelazo ne ɛnle ɛlalɛ anzɛɛ adwenle nzuzulɛ bie ala, emomu ɔgyi daselɛ nee edwɛkɛ mɔɔ le nɔhalɛ la azo.

3. Duzu a yɛbazuzu nwo wɔ edwɛkɛ ɛhye anu a? (Edwɛne 27:14)

³ Yɛ anwuma Selɛ ne kulo yɛ, na ɔkulo kɛ yɛnyia ye nu anwodozo. (Kenga Edwɛne 27:14.) Saa anyelazo mɔɔ yɛlɛ wɔ Gyihova anu la anu yɛ se a, yɛbahola yɛagyinla kpundii wɔ sɔnea nu na yɛava akɛnrasesebɛ nee anyelielɛ yɛagyinla mɔɔ bazi kenle bie la anloa. Maa yɛzuzu kɛzi yɛ anyelazo ne bɔ yɛ nwo bane la anwo. Yɛbalimoa yɛazuzu kɛzi yɛ anyelazo ne le kɛ sɛkɛ nee bulalɛ kyɛlɛ la anwo. Akee yɛbazuzu kɛzi yɛbahola yɛamia yɛ anyelazo ne anu la anwo.

4. Kɛzi anyelazo le kɛ sɛkɛ ɛ? (Hibuluma 6:19)

⁴ Wɔ ɛzoanvolɛ Pɔɔlo kɛlata ne mɔɔ ɔhɛlɛle ɔhɔmaanle Hibuluma ne la anu, ɔvale yɛ anyelazo ne ɔtotole sɛkɛ nwo. (Kenga Hibuluma 6:19.) Ɛnee Pɔɔlo tafa nyevile zo tu adenle, ɔti ɛnee ɔze kɛ sɛkɛ boa meli maa ɔgyinla kpundii amaa yeambutu. Kenle ko bie, ɛnee ɔwɔ meli nu wɔ mekɛ mɔɔ ahumu kpole bie dule la. Wɔ zɔhane mekɛ ne, ɔnwunle kɛ meli kavolɛma ɛlɛfuandi sɛkɛ agua nyevile ne anu, amaa ahumu ne ampia meli ne angɔzi awolɛ mgbole nu. (Gyi. 27:29, 39-41) Kɛ mɔɔ sɛkɛ maa meli gyinla ɛleka ko la, yɛ anyelazo ne maa yɛgyinla yɛ gyakɛ azo wɔ ngyegyelɛ mekɛ nu amaa yɛanvi Gyihova anwo. Yɛ anyelazo ne mɔɔ gyi ye kpundii la maa yɛgyinla yɛ gyakɛ azo wɔ sɔnea ngakyile mɔɔ le kɛ ahumu la anu, ɔluakɛ yɛze ye bɔkɔɔ kɛ, mekɛ kpalɛ la yɛ nyunlu. Kakye kɛ, Gyisɛse bɔle yɛ kɔkɔ kɛ bɛbayɛ yɛ kpɔdekpɔde. (Dwɔn 15:20) Ɔti saa yɛdwenledwenle ninyɛne mɔɔ Gyihova ɛbɔ yɛ ɛwɔkɛ kɛ yɛbanyia ye kenle bie la anwo a, ɔboa yɛ ɔmaa yɛkɔ zo yɛsonle ye.

5. Kɛzi anyelazo boale Gyisɛse maanle ɔgyinlanle ewule nloa ɛ?

⁵ Suzu kɛzi anyelazo boale Gyisɛse maanle ɔgyinlanle kpundii ɔnva nwo kɛ ɛnee ɔze kɛ ɔbawu nyane ewule la anwo. Wɔ ɛvolɛ 33 Y.M. Pɛntekɔso kenle ne, ɛzoanvolɛ Pita hwenle adwenle hɔle ngapezo bie mɔɔ wɔ Edwɛne buluku ne anu la azo. Ngapezo ne hanle kɛzi Gyisɛse ziele ɔ nwo dii na ɔlɛ anwodozo la anwo edwɛkɛ kɛnlɛma kɛ: “Mebadɛnla aze wɔ anyelazo nu; ɔluakɛ ɛnrɛgyakyi me wɔ Nla ne anu anzɛɛ ɛnrɛmaa wɔ nɔhavo ne nwonane ɛnrɛkpɔlɔ. . . . Ɛbamaa meali fɛlɛko kpole wɔ ɛ nyunlu.” (Gyi. 2:25-28; Edw. 16:8-11) Ɛnee Gyisɛse ze kɛ ɔbawu ɛdeɛ, noko ɛnee ɔlɛ anyelazo kɛ Nyamenle badwazo ye na ɔ nee ɔ Ze abɔ nu adɛnla bieko wɔ anwuma.​—Hib. 12:2, 3.

6. Duzu a adiema nrenyia bie hanle wɔ anyelazo nwo a?

⁶ Yɛ Kilisiene anyelazo ne ɛboa yɛ mediema dɔɔnwo ɛmaa bɛgyinla kpundii. Suzu Leonard Chinn, adiema nrenyia nɔhavo bie mɔɔ ɛnee de England la neazo ne anwo. Wɔ Ewiade Konle I la anu, bɛdole ye efiade ɔluakɛ ɔkpole kɛ ɔbahɔ sogya. Bɛvale ɔ ngomekye bɛveale sua bie anu siane nwiɔ, na nzinlii bɛmaanle ɔyɛle gyima ɛsesebɛ. Nzinlii ɔhɛlɛle kɛ: “Me anwubielɛ ne maanle menwunle kɛ, yɛhyia anyelazo amaa yɛahola yɛagyinla kpundii. Yɛlɛ neazo mɔɔ Gyisɛse, ɛzoanvolɛma ne, nee ngapezoma ne yɛle la, yɛɛ yɛlɛ Baebolo ne anu ɛwɔkɛ ngɛnlɛma ne mɔ noko. Ɛhye mɔ amuala maa yɛnyia kenle bie nwo anyelazo kpole na ɔmaa yɛ anwosesebɛ ɔmaa yɛgyinla kpundii.” Anyelazo yɛle kɛ sɛkɛ maanle Leonard, na ɔbahola yeayɛ kɛ sɛkɛ yeamaa ɛdawɔ noko.

7. Kɛzi sɔnea maa yɛ anyelazo nu mia ɛ? (Wulomuma 5:3-5; Gyemise 1:12)

⁷ Saa yɛgyinla kpundii wɔ sɔnea nu na yɛnwu kɛzi Gyihova ɛboa yɛ na yɛnyia ɔ nyunlu ɛlolɛ la a, yɛ anyelazo ne anu yɛ se. (Kenga Wulomuma 5:3-5; Gyemise 1:12.) Ɔti kɛkala, yɛ anyelazo ne anu ɛyɛ se ɛdɛla mekɛ mɔɔ limoa mɔɔ yɛdele edwɛkpa ne la. Seetan kulo kɛ yɛ sɔnea ne mɔ bo yɛ nwo zo, noko ɔlua Gyihova moalɛ zo yɛbahola yɛagyinla ko biala anloa.

8. Kɛzi yɛ anyelazo ne le kɛ bulalɛ kyɛlɛ ɛ? (1 Tɛsalonaekama 5:8)

⁸ Eza Baebolo ne fa yɛ anyelazo ne toto bulalɛ kyɛlɛ nwo. (Kenga 1 Tɛsalonaekama 5:8.) Sogyanli wula bulalɛ kyɛlɛ fa bɔ ɔ ti nwo bane fi ɛda mbaka mɔɔ ye agbɔvolɛ babɔ mɔdenle kɛ bɛtoto bɛawɔ ye la anwo. Wɔ  yɛ sunsum nu konle ne anu, ɔhyia kɛ yɛbɔ yɛ adwenle ne anwo bane yɛfi Seetan ɛtetalɛ nwo. Ɔdua ninyɛne ngakyile dɔɔnwo azo kɛ ɔfa yeazɔ yɛ yeanlea amaa yeazɛkye yɛ adwenle. Kɛ mɔɔ sogyanli bie bulalɛ kyɛlɛ bɔ ɔ ti nwo bane la, zɔhane ala a yɛ anyelazo ne bɔ yɛ adwenle nwo bane amaa yɛahɔ zo yɛali nɔhalɛ yɛamaa Gyihova a.

9. Saa menli ɛnlɛ anyelazo a, duzu a to bɛ a?

⁹ Yɛ dahuu ngoane nwo anyelazo ne baboa yɛ yeamaa yɛala nrɛlɛbɛ nee nwunu ali. Noko saa yɛ anyelazo ne ka aze na yɛbɔ ɔ bo kɛ yɛkɔ zo yɛadwenle nwonane nu ninyɛne nwo a, ɔbamaa dahuu ngoane nwo anyelazo ne mɔɔ yɛlɛ la aminli. Suzu Kilisienema bie mɔɔ ɛnee de tete Kɔlente la anwo nea. Diedi mɔɔ bɛlɛ wɔ Nyamenle ɛwɔkɛ titili bie, mɔɔ le ewudwazo nwo anyelazo ne anu la minlinle. (1 Kɔl. 15:12) Pɔɔlo hanle kɛ bɛdabɛ mɔɔ bɛnlɛ dahuu ngoane nwo anyelazo la tɛnla aze maa ɛnɛ ala. (1 Kɔl. 15:32) Ɛnɛ, menli dɔɔnwo mɔɔ bɛnlɛ anyelazo wɔ Nyamenle ɛwɔkɛ ne mɔ anu la adwenle wɔ mɔɔ bɛbanyia ye kɛkala azo, bɛyɛ debie biala mɔɔ bamaa bɛ nye alie kɛkala la bie. Noko yɛmɛ yɛfa yɛ nwo yɛto kenle bie nwo ɛwɔkɛ mɔɔ Nyamenle ɛbɔ yɛ la azo. Yɛ anyelazo ne le kɛ sɛkɛlɛneɛ adenle zo bulalɛ kyɛlɛ mɔɔ bɔ yɛ adwenle nwo bane na ɔboa yɛ ɔmaa yɛkpo ɛbɛlabɔlɛ adenle mɔɔ ɔbazɛkye yɛ nee Gyihova agɔnwolɛvalɛ ne la.​—1 Kɔl. 15:33, 34.

10. Kɛzi anyelazo kola bɔ yɛ nwo bane fi nzuzulɛ mɔɔ ɛndenrɛ la anwo ɛ?

¹⁰ Eza yɛ anyelazo ne mɔɔ le kɛ bulalɛ kyɛlɛ la bɔ yɛ nwo bane amaa yɛannyia adwenle kɛ nvasoɛ ɛnle zo kɛ yɛbabɔ mɔdenle yɛayɛ mɔɔ sɔ Gyihova anye la. Kɛ neazo la, wɔannea a bie mɔ banyia adwenle kɛ: ‘Menrɛhola menrɛboka bɛdabɛ mɔɔ bɛbadɛnla aze dahuu la anwo ɛlɛ. Menfɛta fee. Menrɛhola menrɛli Nyamenle ngyinlazo ne mɔ azo ɛlɛ.’ Kakye kɛ Dwobu arɛlekyekyevolɛ adalɛ ne mɔɔ bɛfɛlɛ ye Ɛlaefaze la hanle edwɛkɛ ko ne ala bie hilele Dwobu. Ɛlaefaze hanle kɛ: “Sonla dasanli le duzu mɔɔ ɔwɔ kɛ ɔ nwo te a?” Eza ɔhanle wɔ Nyamenle anwo kɛ: “Nea! Ɔnlɛ ye nwuanzanwuanzama ne anu diedi, yɛɛ anwuma bɔbɔ anwo ɛnde wɔ ɔ nye zo.” (Dwobu 15:14, 15) Adalɛ edwɛkɛ boni ɛne! Kakye kɛ Seetan a gyi adalɛ ɛhye anzi a. Ɔze kɛ saa ɛkɔ zo ɛnyia adwenle zɛhae a, wɔ anyelazo ne baminli. Ɔti kpo adalɛ edwɛkɛ ɛhye mɔ na fa wɔ adwenle sie Gyihova ɛwɔkɛ ne mɔ azo. Mmamaa wɔ adwenle nu yɛ wɔ kesee ɛlɛ kɛ ɔkulo kɛ ɛnyia dahuu ngoane yɛɛ ɔbaboa wɔ yeamaa wɔadwu bodane ɛhye anwo.​—1 Tim. 2:3, 4.

11. Duzu ati a ɔwɔ kɛ yɛnyia abotane wɔ mekɛ mɔɔ yɛlɛkendɛ kɛ yɛ anyelazo ne bara nu la ɛ?

¹¹ Tɛ dahuu a ɔla aze kɛ yɛbamaa yɛ anyelazo ne anu ayɛ se a. Bie a ɔbayɛ se kɛ yɛbanyia abotane yɛahendɛ Nyamenle kɛ ɔbali ye ɛwɔkɛ zo. Noko Gyihova wɔ ɛkɛ dahuu yɛɛ kɛzi ɔtia ye mekɛ la le ngakyile fi yɛ ɛdeɛ ne anwo. (2 Pita 3:8, 9) Ɔbalua adenle kpalɛ zo yeamaa ye bodane ara nu, noko bie a ɔnrɛyɛ ye wɔ mekɛ mɔɔ yɛdayɛ yɛ nye la kɛ ɔbayɛ ye la. Duzu a baboa yɛ yeamaa yɛ anyelazo ne anu ayɛ se wɔ mekɛ mɔɔ yɛlɛfa abotane yɛahendɛ kɛ Nyamenle bali ye ɛwɔkɛ ne mɔ azo la ɛ?​—Gye. 5:7, 8.

12. Kɛ mɔɔ Hibuluma 11:1, 6 kile la, kɛzi anyelazo nee diedi lua adenle ko azo ɛ?

¹² Saa yɛkɔ zo yɛbikye Gyihova, ahenle mɔɔ bamaa yɛ anyelazo ne ara nu la a, ɔbamaa yɛ anyelazo ne anu ayɛ se. Baebolo ne ka kɛ, saa yɛbanyia anyelazo a, ɔwɔ kɛ yɛnyia diedi kɛ Gyihova wɔ ɛkɛ na “ɔmaa bɛdabɛ mɔɔ bɛ nye ɛbolo bɛlɛkpondɛ ye la ahatualɛ.” (Kenga Hibuluma 11:1, 6.) Saa yɛnwu Gyihova kɛ ɔle awie mɔɔ wɔ ɛkɛ ne amgba a, ɔbamaa anwodozo  mɔɔ yɛlɛ kɛ ɔbali ye ɛwɔkɛ kɔsɔɔti azo la ayɛ kpole. Maa yɛnlea ninyɛne mɔɔ yɛbahola yɛayɛ amaa yɛamia yɛ nee Gyihova agɔnwolɛvalɛ ne anu na yɛ anyelazo ne anu ayɛ se la.

13. Kɛ ɔkɛyɛ na yɛahola yɛabikye Nyamenle ɛ?

¹³ Yɛ asɔne na kenga Gyihova Edwɛkɛ ne. Yɛngola yɛnnwu Gyihova ɛdeɛ, noko yɛbahola yɛabikye ye. Yɛbahola yɛ nee ye adendɛ wɔ asɔneyɛlɛ nu yɛɛ yɛlɛ anwodozo kɛ ɔbadie yɛ. (Gyɛ. 29:11, 12) Yɛbahola yɛadie Nyamenle ɔlua ye Edwɛkɛ ne mɔɔ yɛbagenga na yɛadwenledwenle nwo la azo. Mekɛ mɔɔ yɛlɛkenga kɛzi Gyihova nleanle bɛdabɛ mɔɔ bɛlile nɔhalɛ bɛmaanle ye wɔ tete ne la anwo edwɛkɛ la, ɔbamaa yɛ anyelazo ne anu ayɛ se kpalɛ. Debie biala mɔɔ bɛhɛlɛ wɔ Nyamenle Edwɛkɛ ne anu la “bɛhɛlɛ bɛmaa yɛ ɛhilehilelɛ, amaa yɛalua yɛ kpundiigyinlanlɛ nee Ngɛlɛlera ne anu arɛlekyekyelɛ zo yɛanyia anyelazo.”​—Wlo. 15:4.

14. Duzu ati a ɔwɔ kɛ yɛdwenledwenle mɔɔ Gyihova ɛyɛ ɛmaa awie mɔ la anwo a?

¹⁴ Dwenledwenle kɛzi Gyihova ɛli ye ɛwɔkɛ ngakyile zo la anwo. Suzu mɔɔ Nyamenle yɛle maanle Ebileham nee Sɛla la anwo. Ɛnee bɛyɛ mgbanyinli somaa mɔɔ bɛnrɛhola bɛnrɛwo a. Noko Nyamenle bɔle bɛ ɛwɔkɛ kɛ bɛbawo. (Gyn. 18:10) Duzu a Ebileham yɛle a? Baebolo ne ka kɛ: “Ɔliele ɔlile kɛ ɔbayɛ maanle maanle dɔɔnwo bɛ ze.” (Wlo. 4:18) Wɔ sonla nye zo ɛnee ɔzɔho kɛ anyelazo biala ɛnle ɛkɛ, noko ɛnee Ebileham ze kɛ Gyihova bali Ye ɛwɔkɛ zo. Na nrenyia nɔhavo zɔhane asa anzi aze. (Wlo. 4:19-21) Edwɛkɛ zɛhae mɔ kilehile yɛ kɛ, yɛbahola yɛalie yɛali kɛ Gyihova bali ye ɛwɔkɛ ne mɔ azo, ɔnva nwo kɛ wɔ yɛ nye zo ɔzɔho kɛ ɔnrɛyɛ boɛ la.

15. Duzu ati a ɔwɔ kɛ yɛdwenledwenle mɔɔ Nyamenle ɛyɛ ɛmaa yɛ la anwo a?

¹⁵ Dwenledwenle mɔɔ Gyihova ɛyɛ ɛmaa wɔ la anwo. Dwenle kɛzi ɛdawɔ mumua ne wɔnyia ɛwɔkɛ mɔɔ wɔ Nyamenle Edwɛkɛ ne anu mɔɔ  ɛra nu la azo nvasoɛ la anwo. Kɛ neazo la, Gyisɛse bɔle ɛwɔkɛ kɛ ɔ Ze bamaa ɛ sa aha ninyɛne mɔɔ ɛhyia nwo wɔ ɛbɛlabɔlɛ nu la. (Mat. 6:32, 33) Eza Gyisɛse maanle yɛnyianle anwodozo kɛ saa yɛsɛlɛ Gyihova kɛ ɔva ye sunsum nwuanzanwuanza ne ɔmaa yɛ a, ɔbava yeamaa yɛ. (Luku 11:13) Gyihova ɛli ye ɛwɔkɛ zɔhane mɔ azo. Bie a ɛbahola wɔadwenle ɛwɔkɛ gyɛne mɔɔ yeli zo mɔɔ ɛboa ɛdawɔ mumua ne la anwo. Kɛ neazo la, yebɔ ɛwɔkɛ kɛ ɔbava wɔ ɛtane yeahyɛ wɔ, ɔbakyekye ɛ rɛle na yeamaa wɔ sunsum nu aleɛ. (Mat. 6:14; 24:45; 2 Kɔl. 1:3) Saa ɛdwenledwenle mɔɔ Nyamenle ɛyɛ ɛmaa wɔ dɛba la anwo a, ɔbamaa anyelazo mɔɔ ɛlɛ wɔ mɔɔ ɔbayɛ yeamaa wɔ kenle bie anu la anu ayɛ se.

16. Duzu ati a anyelazo le ahyɛlɛdeɛ mɔɔ sonle bolɛ a?

¹⁶ Dahuu ngoane nwo anyelazo ne mɔɔ yɛlɛ la le ahyɛlɛdeɛ mɔɔ sonle bolɛ mɔɔ vi Nyamenle ɛkɛ a. Yɛ nye la kenle bie mɔɔ yɛ anyelielɛ la ade na yɛze kɛ ye biala anu ɔbara nu. Ɔle kɛ yɛ sɛkɛ la, ɔmaa yɛgyinla yɛ gyakɛ azo amaa yɛahola yɛagyinla sɔnea, kpɔdekpɔdeyɛlɛ yɛɛ ewule bɔbɔ nloa. Ɔle kɛ yɛ bulalɛ kyɛlɛ la, ɔbɔ yɛ adwenle nwo bane amaa yɛakpo mɔɔ le ɛtane na yɛabeta mɔɔ le kpalɛ la anwo. Yɛ anyelazo ne mɔɔ gyi Baebolo ne azo la maa yɛbikye Nyamenle na ɔmaa yɛnwu kɛzi ɔkulo yɛ kpole la. Saa yɛmaa yɛ anyelazo ne anu yɛ se a, ɔboa yɛ kpole.

17. Duzu ati a yɛ anyelazo ne maa yɛdi fɛlɛko a?

¹⁷ Ɛzoanvolɛ Pɔɔlo maanle yɛ anwosesebɛ wɔ kɛlata mɔɔ ɔhɛlɛle ɔhɔmaanle Wulomuma la anu kɛ, “bɛli fɛlɛko wɔ anyelazo ne anu.” (Wlo. 12:12) Ɛnee Pɔɔlo bahola ali fɛlɛko ɔluakɛ ɛnee ɔze ye wienyi kɛ, saa ɔkɔ zo ɔdi nɔhalɛ a ɔbanyia dahuu ngoane wɔ anwuma. Yɛdayɛ noko yɛbahola yɛali fɛlɛko wɔ anyelazo ne anu ɔluakɛ yɛze ye wienyi kɛ Gyihova bali ye ɛwɔkɛ ne mɔ azo. Edwɛndolɛnli ne hɛlɛle kɛ: “Anyelielɛ a le sonla ne mɔɔ . . . ye anyelazo a le Gyihova ye Nyamenle ne, . . . Ahenle mɔɔ di nɔhalɛ dahuu” la.​—Edw. 146:5, 6.