1. Kɛzi menli dɔɔnwo yɛ bɛ nyɛleɛ wɔ nrɛlɛbɛ edwɛkɛ nwo ɛnɛ ɛ? (Mrɛlɛbulɛ 1:20, 21)

 WƆ MAANLE dɔɔnwo anu, ɔnyɛ se kɛ ɛbanwu Belemgbunlililɛ nolobɔlɛma kɛ bɛlɛfa anyelielɛ bɛava yɛ mbuluku ne mɔ bɛamaa menli mɔɔ ɛlɛpɛ nu wɔ awɔdenle ne mɔ azo la. Asoo wɔyɛ daselɛlilɛ gyima ne foa ɛhye mɔɔ yɛ anyelielɛ la bie ɛlɛ ɔ? Saa wɔyɛ bie ɛlɛ a, bie a wɔdwenle ndonwo mɔɔ wɔ Mrɛlɛbulɛ buluku ne anu mɔɔ se, nrɛlɛbɛ ɛlɛtea nu avɛlɛ menli wɔ awɔdenle ne mɔ azo kɛ bɛradie ye folɛdulɛ la anwo. (Kenga Mrɛlɛbulɛ 1:20, 21.) “Nɔhalɛ nrɛlɛbɛ,” mɔɔ yemɔ a le Gyihova nrɛlɛbɛ ne la, wɔ Baebolo ne nee yɛ mbuluku ne mɔ anu. Ɛhye a le edwɛkɛ mɔɔ menli hyia nwo amaa bɛahola bɛabɔ bɛ ngoane adendulɛ ne abo a. Saa awie die yɛ mbuluku ne mɔ bie a yɛ nye die. Noko tɛ awie biala a die bie a. Bie mɔ ɛngulo kɛ bɛsukoa mɔɔ Baebolo ne ka la. Bie mɔ noko sele yɛ. Bɛlɛ adwenle kɛ Baebolo ne ɛkpa nwo. Yɛɛ bie mɔ tendɛ tia mɔɔ Baebolo ne ka ye wɔ ɛbɛlabɔlɛ kpalɛ nwo la, na bɛka kɛ bɛdabɛ mɔɔ bɛdi zo la le kyengye yɛɛ bɛbu bɛ nwo tenlenema. Noko Gyihova fi ɛlɔlɛ nu kɔ zo maa menli kɔsɔɔti nwolɛ adenle kɛ bɛbanyia nɔhalɛ nrɛlɛbɛ. Ndenle boni mɔ azo?

2. Nienwu a yɛbanyia nɔhalɛ nrɛlɛbɛ ɛnɛ a, na duzu a menli dɔɔnwo ɛkpa kɛ bɛbayɛ a?

² Adenle ko mɔɔ Gyihova dua zo maa yɛ sa ka nɔhalɛ nrɛlɛbɛ la a le ye Edwɛkɛ Baebolo ne. Asɛɛ awie biala lɛ buluku zɔhane bie. Na yɛ mbuluku ne mɔ noko ɛ? Ɔlua Gyihova moalɛ zo, bɛhile ɔ bo bɛhɔ aneɛ mɔɔ bo 1,000 la anu. Menli mɔɔ tie,  kile kɛ, menli mɔɔ kenga na bɛfa bɛbɔ bɛ ɛbɛla la banyia zolɛ nvasoɛ. Noko menli dɔɔnwo ɛkpa kɛ bɛnrɛdie nɔhalɛ nrɛlɛbɛ edwɛkɛ. Saa ɔwɔ kɛ bɛsisi kpɔkɛ bie mɔ a, bɛkulo kɛ bɛfa bɛ nwo bɛto bɛ nwo zo anzɛɛ bɛtie bɛ gɔnwo mɔ sonla edwɛkɛ. Kɛmɔ yɛdi mɔɔ Baebolo ne ka la azo la ati, bie a bɛnrɛbu yɛ bie bɔbɔ. Edwɛkɛ ɛhye bahilehile deɛmɔti menli yɛ bɛ nyɛleɛ zɔ la anu. Noko mɔɔ limoa, maa yɛzuzu kɛzi yɛbahola yɛazukoa nrɛlɛbɛ yɛavi Gyihova ɛkɛ ne la anwo.

3. Duzu a yɛyɛ a yɛbanyia nɔhalɛ nrɛlɛbɛ a?

³ Nrɛlɛbɛ kile kɛzi yɛkola yɛfa mɔɔ yɛze ye la yɛsisi kpɔkɛ kpalɛ la. Noko nɔhalɛ nrɛlɛbɛ kɔ moa tɛla ɛhye. Baebolo ne ka kɛ: “Gyihova ɛzulolɛ le nrɛlɛbɛ mɔlebɛbo, yɛɛ Nwuanzanwuanza Ko ne ɛnwunlɛ le ndelebɛbo.” (Mrɛ. 9:10) Ɔti saa yɛkulo kɛ yɛsi kpɔkɛ bie mɔɔ anwo hyia la a, ɔwɔ kɛ yɛgyinla adwenle mɔɔ Gyihova lɛ wɔ edwɛkɛ ne anwo, mɔɔ le “Nwuanzanwuanza Ko ne ɛnwunlɛ” la azo a yɛsi a. Yɛsukoa Baebolo ne nee yɛ mbuluku ne mɔ a, yɛbahola yɛayɛ ɛhye. Saa yɛyɛ ye zɔ a, ɛnee yɛlɛda nɔhalɛ nrɛlɛbɛ ali.​—Mrɛ. 2:5-7.

4. Duzu ati a Gyihova ala a bahola amaa yɛ nɔhalɛ nrɛlɛbɛ a?

⁴ Gyihova ala a kola maa yɛ nɔhalɛ nrɛlɛbɛ a. (Wlo. 16:27) Duzu ati a ɔdaye a nrɛlɛbɛ vi ye ɛkɛ a? Mɔɔ limoa, kɛmɔ ɔdaye a ɔle Bɔvolɛ ne la ati, ɔze ye abɔdeɛ anwo edwɛkɛ biala. (Edw. 104:24) Mɔɔ tɔ zo nwiɔ, debie biala mɔɔ Gyihova yɛ la da ye ali kɛ ɔze nrɛlɛbɛ. (Wlo. 11:33) Mɔɔ tɔ zo nsa, menli mɔɔ fa Gyihova folɛdulɛ mɔɔ nrɛlɛbɛ wɔ nu la di gyima la nyia zolɛ nvasoɛ dahuu. (Mrɛ. 2:10-12) Saa yɛbanyia nɔhalɛ nrɛlɛbɛ a, ɔwɔ kɛ yɛdie nɔhalɛ edwɛkɛ ɛhye mɔ yɛto nu na yɛmaa bɛkile yɛ adenle wɔ yɛ kpɔkɛzilɛ nee yɛ nyɛleɛ nu.

5. Saa menli annwu Gyihova kɛ ɔdaye a nɔhalɛ nrɛlɛbɛ vi ye ɛkɛ a, duzu a vi nu ba a?

⁵ Menli dɔɔnwo mɔɔ yɛyia bɛ wɔ daselɛlilɛ nu la die to nu kɛ abɔdeɛ yɛ nwanwane; noko bɛnlie bɛnli kɛ Bɔvolɛ bie wɔ ɛkɛ na bɛka kɛ abɔdeɛ vi ngakyihakyililɛ nu a rale a. Bie mɔ noko se bɛdie Nyamenle bɛdi, noko bɛnwu Baebolo nu ngyinlazo ne mɔ kɛ yekpa nwo na bɛyɛ mɔɔ bɛdabɛ bɛkulo la. Duzu a ɛvi nu ɛra a? Kɛmɔ menli ɛnva bɛ nwo ɛndo Nyamenle nrɛlɛbɛ ne azo emomu bɛdabɛ bɛ nrɛlɛbɛ zo la ati, asoo yemaa ewiade ne ɛyɛ kpalɛ ɔ? Asoo bɛnyia nɔhalɛ anyelielɛ anzɛɛ kenle bie nwo anyelazo mɔɔ gyi ye kpundii? Mɔɔ ɛlɛsisi ɛnɛ la maa yɛnwu nɔhalɛ mɔɔ wɔ edwɛkɛ ɛhye anu la: “Nrɛlɛbɛ nee adwenlenunwunlɛ yɛɛ folɛdulɛ biala ɛnle ɛkɛ mɔɔ kola dwazo tia Gyihova a.” (Mrɛ. 21:30) Nea kɛzi ɛhye ka yɛ maa yɛkɔ zo yɛsɛlɛ Gyihova kɛ ɔmaa yɛ nɔhalɛ nrɛlɛbɛ a! Mɔɔ yɛ alɔbɔlɛ la a le kɛ, menli dɔɔnwo ɛnyɛ ye zɔ. Duzu ati ɔ?

6. Kɛ mɔɔ Mrɛlɛbulɛ 1:22-25 kile la, nwane mɔ a tuodua bɛ nzo wɔ nɔhalɛ nrɛlɛbɛ nwo a?

⁶ Saa nɔhalɛ nrɛlɛbɛ “ɛlɛtea nu kpole wɔ awɔdenle ne mɔ azo” a, menli dɔɔnwo tuodua bɛ nzo. Baebolo ne maa yɛnwu kɛ, menli ekpunli nsa bie wɔ ɛkɛ mɔɔ bɛndie nrɛlɛbɛ a. Bɛmɛ a le ‘bɛdabɛ mɔɔ bɛnlɛ anwubielɛ,’ “agolobɛnwoma” yɛɛ “ahoasea.” (Kenga Mrɛlɛbulɛ 1:22-25.) Maa yɛzuzu subane ne mɔ mɔɔ maa menli zɔhane mɔ kpo anwuma nrɛlɛbɛ nee kɛ ɔkɛyɛ na yɛanyɛ kɛ bɛdabɛ la anwo.

7. Duzu ati a ‘bɛdabɛ mɔɔ bɛnlɛ anwubielɛ’ la bie mɔ ɛnyɛ nzenzaleɛ a?

⁷ ‘Bɛdabɛ mɔɔ bɛnlɛ anwubielɛ’ la a le bɛdabɛ  mɔɔ bɛ adwenle ɛtɛtinli, bɛkola bɛdi bɛ adwenle anzɛɛ bɛbɛlɛbɛla bɛ ndɛndɛ la. (Mrɛ. 14:15, ɔbd.) Yɛta yɛyia menli zɛhae mɔ bie wɔ daselɛlilɛ nu. Kɛ neazo la, dwenle menli mgbe dɔɔnwo mɔɔ ɛzonlenlɛ anzɛɛ maanyɛlɛ nu mgbanyima ɛlɛbɛlɛbɛla bɛ la anwo. Saa bie mɔ nwu ye kɛ mgbanyima ɛhye mɔ ɛbɛlɛbɛla bɛ a, ɔsi bɛ nwo. Noko bɛdabɛ mɔɔ bɛnlɛ anwubielɛ mɔɔ bɛha bɛ nwo edwɛkɛ wɔ Mrɛlɛbulɛ 1:22 la kpa kɛ bɛnrɛyɛ nzenzaleɛ ɔluakɛ bɛkulo ye zɔ. (Gyɛ. 5:31) Bɛ nye die nwo kɛ bɛbayɛ mɔɔ bɛdabɛ bɛkulo la na bɛngulo kɛ bɛyɛ mɔɔ Baebolo ne ka la anzɛɛ bɛbava ye ngyinlazo ne mɔ bɛabɔ bɛ ɛbɛla. Bɛ nuhua dɔɔnwo te nganeɛ kɛ raalɛ bie mɔɔ wɔ Quebec, Canada, mɔɔ ɔ nye die Nyamenlezonlenlɛ nwo la. Ɔhanle ɔhilele adiema bie mɔɔ hɔle ye ɛkɛ ne la kɛ, “Saa yɛ ɛsɔfo ne ɛbɛlɛbɛla yɛ a, ɔle ɔdaye ye nvonleɛ, tɛ yɛdayɛ ɔ!” Yɛngulo kɛ yɛyɛ kɛ menli mɔɔ bɛyɛ bɛ adwenle kɛ bɛnrɛzukoa ɛhwee la!​—Mrɛ. 1:32; 27:12.

8. Duzu a baboa yɛ yeamaa yɛanyia anwubielɛ kpalɛ a?

⁸ Debie kpalɛ bie ati, Baebolo ne maa yɛ anwosesebɛ kɛ yɛmmayɛ menli mɔɔ yɛnlɛ anwubielɛ la dahuu, emomu, ‘yɛdwenle kɛ mgbanyinli la.’ (1 Kɔl. 14:20) Saa yɛfa Baebolo nu ngyinlazo yɛbɔ yɛ ɛbɛla a, yɛbanyia anwubielɛ kpalɛ. Ngyikyingyikyi, yɛbanwu kɛzi ngyinlazo zɔhane mɔ boa yɛ maa yɛkoati ngyegyelɛ na yɛsisi kpɔkɛ mɔɔ nrɛlɛbɛ wɔ nu la. Ɔle kpalɛ kɛ yɛbanlea anyuhɔlɛ mɔɔ yɛnyia wɔ ɛhye anu la. Saa yɛbɔle ɔ bo kɛ yɛsukoa Baebolo ne na yɛahɔ debiezukoalɛ la ɛhyɛ ekyii a, yɛbahola yɛabiza yɛ nwo deɛmɔti yɛtɛyilale yɛ nwo zo yɛtɛmaanle Gyihova na yɛtɛmaanle bɛtɛsɔnenle yɛ la. Saa bɛzɔne yɛ a, asoo yɛlɛnyia anyuhɔlɛ kɛ edwɛkpa ne nolobɔlɛma nee kilehilevolɛma ɔ? Asoo kpɔkɛ mɔɔ yɛsisi la kile kɛ yɛfa Baebolo nu ngyinlazo yɛbɔ yɛ ɛbɛla ɔ? Asoo yɛda Kilisiene subane ali wɔ kɛzi yɛ nee awie mɔ di la anu ɔ? Saa yɛnwu kɛ ɔwɔ kɛ yɛyɛ nzenzaleɛ bie a, bɛmaa yɛzuzu Gyihova ngakyelɛ ne mɔ mɔɔ maa “mɔɔ ɛnlɛ anwubielɛ la nwu nrɛlɛbɛ” la anwo kpalɛ.​—Edw. 19:7.

9. Kɛzi “agolobɛnwoma” da ye ali kɛ bɛngulo nrɛlɛbɛ ɛ?

⁹ Ekpunli mɔɔ tɔ zo nwiɔ mɔɔ kpo anwuma nrɛlɛbɛ la a le “agolobɛnwoma.” Ɔdwu mekɛ ne bie a yɛyia menli ɛhye mɔ bie wɔ yɛ daselɛlilɛ gyima ne anu. Bɛ nye die nwo kɛ bɛbagolo awie mɔ anwo. (Edw. 123:4) Baebolo ne bɔ yɛ kɔkɔ kɛ wɔ awieleɛ mekɛ ne anu, agolobɛnwoma dɔɔnwo bara. (2 Pita 3:3, 4) Ɛnɛ, menli bie mɔ ɛndie Nyamenle kɔkɔbɔlɛ ne mɔ kɛ mɔɔ tenlenenli Lɔɔto ase ne mɔ yɛle la. (Gyn. 19:14) Menli dɔɔnwo sele bɛdabɛ mɔɔ bɛfa Baebolo nu ngyinlazo bɛbɔ bɛ ɛbɛla la. Agolobɛnwoma “atiakunluwɔzo ɛtane” ne a ka bɛ maa bɛyɛ zɔ a. (Dwu. 7, 17, 18) Nea kɛzi mɔɔ Baebolo ne ka ye wɔ agolobɛnwoma anwo la fɛta kpɔkyevolɛma nee bɛdabɛ mɔɔ bɛkpo Gyihova la!

10. Kɛ mɔɔ Edwɛne 1:1 kile la, kɛ ɔkɛyɛ na yɛanyɛ kɛ agolobɛnwoma la ɛ?

¹⁰ Kɛ ɔkɛyɛ na yɛanyɛ yɛ nyɛleɛ kɛ agolobɛnwoma la ɛ? Adenle ko a le kɛ yɛ nee menli mɔɔ tendɛ bɛ nzo abo la ɛnrɛdu. (Kenga Edwɛne 1:1.) Ɛhye kile kɛ yɛnrɛdie kpɔkyevolɛma edwɛkɛ anzɛɛ yɛnrɛgenga bɛ debie biala. Yɛnwu ye kɛ saa yɛannea boɛ a, yɛbabɔ ɔ bo yɛadendɛ yɛ nzo abo na yɛamaa yɛ adwenle nu ayɛ yɛ kesee wɔ Gyihova nee adehilelɛ mɔɔ yɛnyia yɛfi ye ahyehyɛdeɛ ne ɛkɛ la anwo. Amaa yɛahoati ɛhye la, ɔwɔ kɛ yɛbiza yɛ nwo kɛ: ‘Saa bɛfa adehilelɛ anzɛɛ ngilenu fofolɛ bie bɛba a, asoo dahuu melɛ nwolɛ edwɛkɛ ɛtane meka ɔ? Asoo dahuu menwu nvonleɛ wɔ menli mɔɔ li yɛ nyunlu la anwo ɔ?’ Saa yɛyɛ nzenzaleɛ ndɛndɛ a,  Gyihova anye balie yɛ nwo kpalɛ.​—Mrɛ. 3:34, 35.

11. Kɛzi “ahoasea” bu Gyihova ɛbɛlabɔlɛ nwo ngyinlazo ne mɔ ɛ?

¹¹ Ekpunli mɔɔ tɔ zo nsa mɔɔ ɛndie nrɛlɛbɛ edwɛkɛ la a le “ahoasea.” Bɛle ahoasea ɔluakɛ bɛnva Nyamenle ɛbɛlabɔlɛ nwo mɛla ne mɔ bɛnyɛ gyima. Bɛyɛ mɔɔ tenrɛ wɔ bɛdabɛ mumua ne bɛ nye zo la. (Mrɛ. 12:15) Menli ɛhye mɔ kpo Gyihova, ahenle mɔɔ nrɛlɛbɛ vi ye ɛkɛ ne la. (Edw. 53:1) Saa yɛyia bɛ wɔ daselɛlilɛ nu a, bɛta bɛtendɛ bɛtia yɛ ndɛndɛ kɛ yɛfa Baebolo nu ngyinlazo yɛbɔ yɛ ɛbɛla la. Noko bɛnlɛ debie kpalɛ biala bɛmmaa yɛ. Baebolo ne ka kɛ: “Ɔyɛ se kɛ koasea kɛnwu nɔhalɛ nrɛlɛbɛ; ɔnlɛ edwɛkɛ biala ɔnga ye wɔ suakpole ne anlenkɛ kpole ne anloa.” (Mrɛ. 24:7) Sonla mɔɔ le koasea la ɛnlɛ nɔhalɛ nrɛlɛbɛ edwɛkɛ biala ɛnga. Ɔnyɛ nwanwane kɛ Gyihova bɔ yɛ kɔkɔ kɛ ‘yɛhwe yɛ nwo yɛvi koasea nwo’ la!​—Mrɛ. 14:7.

12. Duzu a baboa yɛ amaa yɛanyɛ yɛ nyɛleɛ kɛ ahoasea la ɛ?

¹² Yɛnle kɛ menli mɔɔ kyi Nyamenle folɛdulɛ la, emomu yɛsukoa kɛ yɛ nye balie ye ndenle ne mɔ anwo, mɔɔ bie a le ye ɛbɛlabɔlɛ nwo ngyinlazo ne mɔ la. Saa yɛ nye balie Nyamenle ndenle mɔ anwo kpalɛ a, ɔwɔ kɛ yɛfa mɔɔ fi tieyɛ nu ba la yɛtoto mɔɔ fi anzosesebɛyɛlɛ nu ba la anwo. Nea ngyegyelɛ ngakyile mɔɔ bɛdabɛ mɔɔ bɛyɛ ahoasea na bɛkpo Gyihova folɛdulɛ mɔɔ nrɛlɛbɛ wɔ nu la yia la. Akee suzu kɛzi wɔ ɛbɛlabɔlɛ ɛyɛ kpalɛ ɔluakɛ ɛtie Nyamenle la anwo nea.​—Edw. 32:8, 10.

13. Asoo Gyihova tinlitinli yɛ nwo zo kɛ yɛli ye folɛdulɛ mɔɔ nrɛlɛbɛ wɔ nu la azo ɔ?

¹³ Gyihova ɛmaa yɛ nuhua ko biala nwolɛ adenle kɛ ɔzukoa ye nrɛlɛbɛ ne, noko ɔntinlitinli awie biala anwo zo kɛ ɔli zo. Noko akee yɛha mɔɔ bado bɛdabɛ mɔɔ bɛndie nrɛlɛbɛ edwɛkɛ la. (Mrɛ. 1:29-32) Menli mɔɔ kpa kɛ bɛnrɛdie Gyihova la banwu “bɛ ndenle ne mɔ anwo amaneɛ.” Nzinlii, ɛbɛla mɔɔ bɛbɔ la bamaa bɛayia ngyegyelɛ na bɛali nyane na awieleɛ bɔkɔɔ ne, Gyihova bazɛkye bɛ. Noko bɛbɔ bɛdabɛ mɔɔ bɛtie Gyihova folɛdulɛ na bɛdi zo la ɛwɔkɛ kɛ: “Mɔɔ tie me la badɛnla anzodwolɛ nu, na ɔ nwo adɔ ye mɔɔ ɔnrɛzulo munzule biala a.”​—Mrɛ. 1:33.

14-15. Duzu a yɛsukoa yɛfi Mrɛlɛbulɛ 4:23 anu a?

¹⁴ Saa yɛfa Nyamenle nrɛlɛbɛ ne yɛbɔ yɛ ɛbɛla a, ɔboa yɛ dahuu. Kɛ mɔɔ yɛnwu ye la, Gyihova ɛmmaa ɔnyɛ se kɛ yɛbanyia ye folɛdulɛ ne mɔɔ nrɛlɛbɛ wɔ nu la. Kɛ neazo la, Gyihova maa yɛ folɛdulɛ kpalɛ mɔɔ yɛbahola yɛava yɛali gyima dahuu la wɔ Mrɛlɛbulɛ buluku ne anu. Maa yɛzuzu folɛdulɛ ɛhye mɔɔ nrɛlɛbɛ wɔ nu la anu nna anwo.

¹⁵ Bɔ wɔ sɛkɛlɛneɛ adenle zo ahonle ne anwo bane. Baebolo ne ka kɛ: “Bɔ wɔ ahonle nwo bane tɛla debie biala mɔɔ ɛbɔ nwolɛ bane la, ɔluakɛ nuhua a ngoane vi a.” (Mrɛ. 4:23)  Wɔmɔ dwenle mɔɔ ɔhyia kɛ yɛyɛ amaa yɛahola yɛabɔ yɛ ahonle ne anwo bane la anwo nea. Ɔwɔ kɛ yɛdi aleɛ kpalɛ, yɛkpundikpundi yɛ agbɔkɛ nu na yɛkpo subane ɛtane. Debie zɔhane a ɔwɔ kɛ yɛyɛ amaa yɛahola yɛabɔ yɛ sɛkɛlɛneɛ adenle zo ahonle ne anwo bane a. Yɛsukoa Nyamenle Edwɛkɛ ne alehyenlɛ biala. Yɛsiezie yɛ nwo yɛmaa yɛ debiezukoalɛ ne mɔ, yɛkɔ ɔ bo na yɛmaa mualɛ. Yɛkɔ daselɛlilɛ dahuu amaa yɛ nwo ayɛ se wɔ sunsum nu. Yɛɛ amaa yɛannyia subane ɛtane la, yɛtwe yɛ nwo yɛfi debie biala mɔɔ bahola agua yɛ nzuzulɛ nwo evinli, mɔɔ bie a le anyelielɛ ninyɛne mɔɔ ɛnle kpalɛ nee agɔnwolɛma ɛtane la anwo.

16. Duzu ati a yɛbahola yɛava edwɛkɛ mɔɔ wɔ Mrɛlɛbulɛ 23:4, 5 la yɛali gyima ɛnɛ a?

¹⁶ Maa ɛ kunlu ɛdwo mɔɔ ɛlɛ la anwo. Baebolo ne tu yɛ folɛ kɛ: “Mmaku ɛ nwo ɛvɛlɛ kɛ ɛkɛnyia ɛ nwo. . . . Saa ɛfa ɛ nye ɛto zo a, ɔnle ɛkɛ, ɔluakɛ ɔbafifi ndɛbalɛ kɛ kɔleɛ na yeadu yeahɔ anwomanyunlu.” (Mrɛ. 23:4, 5) Nwonane afoa nu ninyɛne ɛngyɛ na yeaminli. Noko ɛnɛ, sukoavolɛma nee ehyiavolɛma amuala anye ɛbolo kɛ bɛkpondɛ ezukoa dɔɔnwo. Adwenle ɛhye ati a dahuu bɛyɛ ninyɛne mɔɔ sɛkye bɛ duma, agɔnwolɛvalɛ mɔɔ bɛ nee awie mɔ lɛ, yɛɛ bɛ kpɔkɛdelɛ bɔbɔ la. (Mrɛ. 28:20; 1 Tim. 6:9, 10) Noko nrɛlɛbɛ boa yɛ maa yɛnyia ezukoa nwo adwenle kpalɛ. Ɛhye ɛmmaa yɛnyɛ anyebolo, emomu ɔmaa yɛ kunlu dwo yɛ nwo na yɛ nye die.​—Nol. 7:12.

17. Kɛ ɔkɛyɛ na yɛanyia “nrɛlɛbɛvolɛ atafinlima” mɔɔ bɛha nwolɛ edwɛkɛ wɔ Mrɛlɛbulɛ 12:18 la bie ɛ?

¹⁷ Dwenle kolaa na wɔadendɛ. Saa yɛannea boɛ a, yɛ ɛdendɛlɛ bahola aboda awie mɔ kpalɛ. Baebolo ne ka kɛ: “Ɛdendɛlɛ mgbane mgbane le kɛ konle dadeɛ mɔɔ wowɔ la, noko nrɛlɛbɛvolɛ atafinlima yɛ ayile.” (Mrɛ. 12:18) Saa yɛanye awie mɔ nvonleɛ nwo ndɛne a, ɔbaboa yɛ yeamaa yɛ nee bɛ ahɔ zo adɛnla anzodwolɛ nu. (Mrɛ. 20:19) Amaa yɛ ɛdendɛlɛ amboda awie mɔ emomu yeayɛ bɛ ayile la, ɔwɔ kɛ yɛkenga Nyamenle Edwɛkɛ ne dahuu na yɛdwenledwenle nwolɛ. (Luku 6:45) Saa yɛdwenledwenle mɔɔ Baebolo ne ka la anwo a, ɔbamaa yɛ edwɛkɛ ayɛ kɛ “nrɛlɛbɛ  nzubula” mɔɔ maa awie mɔ anwo tɔ bɛ la.​—Mrɛ. 18:4.

18. Saa yɛfa Mrɛlɛbulɛ 24:6 yɛdi gyima a, kɛzi ɔbaboa yɛ wɔ daselɛlilɛ nu ɛ?

¹⁸ Di adehilelɛ zo. Baebolo ne fa folɛdulɛ ɛhye mɔɔ baboa yɛ la maa yɛ: “Dua adehilelɛ kpalɛ zo ko wɔ konle, na folɛdulɛma dɔɔnwo maa ɔwie boɛ.” (Mrɛ. 24:6, ɔbdw.) Suzu kɛzi ngyinlazo ɛhye boa wɔ yɛ edwɛkɛhanlɛ nee yɛ ngilehilelɛ gyima ne anu la anwo. Kɛ anrɛɛ yɛbayɛ yɛ daselɛlilɛ gyima ne kɛ mɔɔ yɛdayɛ yɛkulo la, yɛbɔ mɔdenle kɛ yɛbava nzuzulɛ mɔɔ bɛfa bɛmaa wɔ nwolɛ la yɛali gyima. Yɛnyia adehilelɛ kpalɛ wɔ yɛ debiezukoalɛ ne mɔ abo; wɔ ɛkɛ, folɛdulɛma mɔɔ lɛ anwubielɛ la maa ɛdendɛlɛ yɛɛ bɛyɛ yɛkile mɔɔ gyi Baebolo ne azo la bɛfa bɛtete yɛ. Eza Gyihova ahyehyɛdeɛ ne maa yɛ mbuluku nee vidio mɔɔ kola boa awie mɔ ɔmaa bɛte Baebolo ne abo la. Ɛlɛsukoa kɛzi ɛbava ninyɛne ɛhye mɔ wɔali gyima kpalɛ la ɔ?

19. Kɛzi ɛte nganeɛ wɔ nrɛlɛbɛ ne mɔɔ Gyihova fa maa yɛ la anwo ɛ? (Mrɛlɛbulɛ 3:13-18)

¹⁹ Kenga Mrɛlɛbulɛ 3:13-18. Yɛ nye sɔ folɛdulɛ kpalɛ mɔɔ wɔ Nyamenle Edwɛkɛ ne anu la! Saa ɔnle nu a, anrɛɛ yɛwɔ ni? Wɔ edwɛkɛ ɛhye anu, yɛzuzu folɛdulɛ kpalɛ mɔɔ wɔ Mrɛlɛbulɛ buluku ne anu la bie mɔ anwo. Nɔhalɛ nu, Gyihova ɛmaa yɛ nrɛlɛbɛ edwɛkɛ dɔɔnwo wɔ Ngɛlɛlera ne anu. Bɛmaa yɛbɔ kpɔkɛ kɛ yɛbava folɛdulɛ mɔɔ nrɛlɛbɛ wɔ nu mɔɔ Gyihova fa maa yɛ la yɛali gyima dahuu. Kɛzi ewiade ne bu nrɛlɛbɛ ɛhye la anwo ɛngyia yɛ; na yɛdie yɛdi bɔkɔɔ kɛ “bɛdabɛ mɔɔ bɛsɔ nu kpundii la, bɛbavɛlɛ bɛ anyelielɛ.”