1-2. Adenle kpalɛ mɔɔ tɛla biala mɔɔ ɛbahola wɔalua zo wɔagenga anzɛɛ wɔazukoa Baebolo ne la a le boni? Maa ndonwo.

 FA YE kɛ ɛkulo kɛ ɛtɔ sua bie. Kolaa na wɔazi kpɔkɛ kɛ ɛbadɔ la, duzu a ɛkulo kɛ ɛnwu ye wɔ sua ne anwo a? Asoo sua ne anyunlu ɛkɛ ne ala nvoninli? Kyɛkyɛ, ɛbahulo kɛ ɛdawɔ mumua ne ɛfa ɛ nye ɛkɔnea sua ne na ɛneɛnlea nwolɛ, ɛwolo nu ɛneɛnlea ekpumgbunli ne mɔ anu na ɛnwu debie biala mɔɔ wɔ sua ne anu la. Bie bɔbɔ a ɛ nye balie nwo kɛ ɛbanwu plan mɔɔ bɛvale bɛzile sua ne la amaa wɔanwu kɛzi bɛzile ye la. Ɔda ali kɛ, ɛbahulo kɛ ɛnwu sua ne mɔɔ ɛbadɛnla nu kenle bie la anwo debie biala.

² Saa yɛlɛkenga anzɛɛ yɛlɛsukoa Baebolo ne a, yɛbahola yɛayɛ deɛ ko ne ala bie. Abɔlɔba bie vale Baebolo ne anu edwɛkɛ totole “sua kpole tendenle bie mɔɔ bɛmaanle ye adiabo ne hɔle aze kpalɛ la” anwo. Ɔti kɛ ɔkɛyɛ na yɛanwu debie biala mɔɔ wɔ Baebolo ne anu la kpalɛ ɛ? Saa ɛkenga ye ndɛndɛ a, bie a nɔhalɛ edwɛkɛ ekyi bie, mɔɔ le “Nyamenle edwɛkɛ nwuanzanwuanza ne anu mɔlebɛbo ninyɛne ne” la ala a ɛbanwu ye a. (Hib. 5:12) Noko kɛ mɔɔ ɔde ye wɔ sua ne anwo la, “wolo nuhua” amaa wɔanwu ninyɛne ngɛnlɛma mɔɔ wɔ nu la kɔsɔɔti. Adenle kpalɛ mɔɔ ɛbahola wɔalua zo wɔazukoa Baebolo ne la a le kɛ ɛbanwu kɛzi Baebolo ne anu edwɛkɛ bie fale edwɛkɛ fofolɛ mɔɔ wɔ ɛleka gyɛne anwo la. Bɔ mɔdenle kɛ ɛbade Baebolo nu nɔhalɛ ne mɔ mɔɔ ɛdie ɛdi la abo nee deɛmɔti ɛdie ɛdi la noko abo.

3. Duzu a ɛzoanvolɛ Pɔɔlo maanle ɔ gɔnwo mɔ Kilisienema anwosesebɛ kɛ bɛyɛ a, na duzu ati ɔ? (Ɛfɛsɛsema 3:​14-19)

³ Amaa wɔade Nyamenle Edwɛkɛ ne afoa ngakyile ne kɔsɔɔti abo kpalɛ la, ɔwɔ kɛ ɛsukoa Baebolo nu nɔhalɛ mɔɔ anu pi la. Ɛzoanvolɛ Pɔɔlo maanle ɔ mediema anwosesebɛ kɛ bɛzukoa Nyamenle Edwɛkɛ ne anyebolo zo amaa bɛade nɔhalɛ ne “tɛtɛlɛ nee ye tendenle nee ye anwumahɔlɛ yɛɛ kɛzi ye kuma ne de la abo kpalɛ.” Ɛhye bamaa ‘bɛasosɔ ndinli na bɛagyinla kpundii’  wɔ bɛ diedi ne anu. (Kenga Ɛfɛsɛsema 3:​14-19.) Zɔhane a ɔwɔ kɛ yɛdayɛ noko yɛyɛ a. Maa yɛnlea kɛzi yɛbahola yɛavedevede Nyamenle Edwɛkɛ ne anu amaa yɛade nuhua edwɛkɛ ne abo kpalɛ la.

4. Duzu a yɛbahola yɛayɛ amaa yɛabikye Gyihova kpalɛ a? Maa neazo.

⁴ Kɛ Kilisienema, tɛ Baebolo nu mɔlebɛbo ngilehilelɛ ne ala a yɛkulo kɛ yɛte ɔ bo a. Nyamenle sunsum nwuanzanwuanza ne bahola aboa yɛ yeamaa yɛazukoa “Nyamenle ninyɛne mɔɔ anu le kuloonwu” bɔbɔ la. (1 Kɔl. 2:​9, 10) Duzu ati a ɛmbɔ ɔ bo kɛ ɛbayɛ ɛ ti anwo debiezukoalɛ bie mɔɔ ɔbamaa wɔabikye Gyihova kpalɛ la ɛ? Kɛ neazo la, ɛbahola wɔavedevede kɛzi ɔlale ɛlɔlɛ ali ɔhilele ye tete azonvolɛ nee kɛzi yemɔ da ye ali kɛ ɔkulo ɛdawɔ noko la anu. Ɛbahola wɔazukoa ɛzonlenlɛ nwo ngyehyɛleɛ mɔɔ Gyihova yɛle wɔ Yizilayɛ la anwo debie na wɔava wɔatoto mɔɔ Kilisienema yɛ ye ɛnɛ la anwo. Anzɛɛ bie a ɛbahola wɔazukoa ngapezo ngakyile mɔɔ Gyisɛse maanle ɔrale nu wɔ mekɛ mɔɔ ɔwɔ azɛlɛ ye azo nee mekɛ mɔɔ ɔlɛyɛ ye ɛzonlenlɛ gyima ne la anwo ninyɛne dɔɔnwo.

5. Edwɛkɛtile bie wɔ ɛkɛ mɔɔ ɛkulo kɛ ɛyɛ nwolɛ neɛnleanu wɔ ɛ ti anwo debiezukoalɛ nu ɔ?

⁵ Bɛbizale menli mɔɔ bɛ nye die Baebolo ne ɛzukoalɛ nwo la bie mɔ ninyɛne mɔɔ anu le kuloonwu mɔɔ bɛdabɛ mumua ne bɛkulo kɛ bɛsukoa ye wɔ Nyamenle Edwɛkɛ ne anu la. Mualɛ mɔɔ bɛvale bɛmaanle la bie wɔ ɛlɛka, “ Edwɛkɛtile Mɔɔ Ɛbahola Wɔava Wɔayɛ Ɛ Ti Anwo Debiezukoalɛ” la anu. Saa ɛfa Watch Tower Publications Index anzɛɛ Gyihova Alasevolɛ Neɛnleanu Buluku ne ɛyɛ neɛnleanu ɛhye mɔ a, ɛ nye balie kpalɛ. Saa ɛsukoa Baebolo nu ninyɛne mɔɔ anu le kuloonwu la a, wɔ diedi nu bayɛ se na yeaboa wɔ yeamaa “wɔanyia Nyamenle anwo nrɛlɛbɛ.” (Mrɛ. 2:​4, 5) Akee maa yɛva yɛ adwenle yɛzie Baebolo nu nɔhalɛ mɔɔ anu le kuloonwu mɔɔ yɛbahola yɛavedevede nu la bie mɔ azo.

6. (a) Ngakyile boni a wɔ adwenle ngyehyɛleɛ nee bodane nu a? (b) Duzu ati a yɛkola yɛka kɛ bodane mɔɔ Gyihova lɛ maa alesama nee azɛlɛ ne la “wɔ ɛkɛ dahuu” a? (Ɛfɛsɛsema 3:11)

⁶ Kɛ neazo la, suzu mɔɔ Baebolo ne ka ye wɔ Nyamenle bodane nwo la anwo. Adwenle  ngyehyɛleɛ le ngakyile fi bodane nwo. Adwenle ngyehyɛleɛ le kɛ adenle fɔɔnwo bie mɔɔ yemɔ ala a ɛbava zo amaa wɔadwu ɛleka mɔɔ ɛkɔ la. Saa adenle ne tua a, ɛnrɛhola kɔ. Bodane le kɛ ɛleka mumua ne mɔɔ ɛlɛkɔ la. Ɛze ɛleka fɔɔnwo mɔɔ ɛkulo kɛ ɛkɔ la, noko ɛbahola wɔalua ndenle ngakyile zo wɔahɔ. Saa adenle ne ko tua a, ɛbahola wɔava adenle fofolɛ zo wɔahɔ. Yɛyɛ Gyihova mo kɛ yela “ye bodane ne mɔɔ ɔwɔ ɛkɛ dahuu” mɔɔ wɔ Baebolo ne anu la ali yehile yɛ ngyikyingyikyi la. (Nea Ɛfɛsɛsema 3:11 study note ne.) Gyihova kola dua ndenle ngakyile zo maa ye bodane ba nu, ɔluakɛ “debie biala mɔɔ Gyihova ɛyɛ la di ye bodane nwo gyima.” (Mrɛ. 16:4) Bodane mɔɔ Nyamenle lɛ maa alesama nee azɛlɛ ne la ‘wɔ ɛkɛ dahuu’ ɔluakɛ debie biala mɔɔ bavi mɔɔ Gyihova bayɛ anu ara la badɛnla ɛkɛ dahuu. Gyihova bodane a le boni, na nzenzaleɛ boni a yeyɛ amaa yeadwu nwo a?

7. Mɔɔ alesama mɔɔ limoa la dele atua la, kɛzi Gyihova hakyile adenle mɔɔ ɔbalua zo yeali ye bodane nwo gyima la ɛ? (Mateyu 25:34)

⁷ Nyamenle hanle bodane mɔɔ ɔlɛ ɔmaa alesama mɔɔ limoa anzɛɛ asetɛnla mɔɔ ɛnee ɔkulo kɛ bɛnyia la ɔhilele bɛ. Ɔhanle kɛ “bɛwo bɛmaa bɛ nwo ɛzo, bɛyi azɛlɛ ne na bɛnlea zolɛ, na bɛnlea . . . abɔdeɛ biala mɔɔ wɔ azɛlɛ ne azo la anwo zo.” (Gyn. 1:28) Mɔɔ Adam nee Yive dele atua na bɛmaanle ɛtane hanle alesama abusua ne la, yemɔ anzɛkye Gyihova bodane ne. Ɔhakyile adenle mɔɔ ɔbalua zo yeadwu nwolɛ la. Yeangyɛ, Gyihova zile kpɔkɛ kɛ ɔbahyehyɛ Belemgbunlililɛ bie wɔ anwuma na yemɔ bamaa bodane mɔɔ ɔlɛ ɔmaa alesama nee azɛlɛ ne la ara nuhua. (Kenga Mateyu 25:34.) Wɔ Gyihova mekɛ kpalɛ nu, ɔvile ɛlɔlɛ nu ɔzoanle ye belamunli Ralɛ ne wɔ azɛlɛ ye azo kɛ ɔrahilehile menli Belemgbunlililɛ ne anwo debie na ɔva ye ngoane ɔyɛ ɛkpɔnedeɛ ɔlie yɛ ɔvi ɛtane nee ewule nu. Akee bɛdwazole Gyisɛse bɛhɔle anwuma bieko kɛ ɔhɔyɛ Nyamenle Belemgbunlililɛ ne azo Belemgbunli. Noko Nyamenle bodane ne anwo ninyɛne dɔɔnwo wɔ ɛkɛ mɔɔ yɛbahola yɛadwenledwenle nwolɛ yɛahɔ moa a.

8. (a) Baebolo ne anu edwɛkɛ titili a le boni? (b) Kɛ mɔɔ bɛhilehile nu wɔ Ɛfɛsɛsema 1:​8-11 la, Gyihova bodane titili a le boni? (Nea ɔ nyunlu nvoninli ne.)

⁸ Edwɛkɛ titili mɔɔ wɔ Baebolo ne anu la a le kɛ Gyihova balua ye Belemgbunlililɛ ne mɔɔ Kelaese le zolɛ Belemgbunli la azo amaa bodane mɔɔ ɔlɛ ɔmaa azɛlɛ ne la ara nu na yeamaa ye duma nwo ade. Gyihova bodane ɛnrɛhola ɛnrɛhakyi. Yebɔ ɛwɔkɛ kɛ ɔbamaa yeara nu bɔkɔɔ. (Aye. 46:​10, 11, ɔbdw.; Hib. 6:​17, 18) Akee azɛlɛ ne bayɛ paladaese, na Adam nee Yive abozoamra mɔɔ di munli na bɛyɛ mɔɔ tenrɛ la banyia “anyelielɛ nee ngoane dahuu.” (Edw. 22:26) Noko tɛ ninyɛne mɔɔ Gyihova bayɛ la amuala ɛne. Ye bodane titili a le kɛ ɔbaha abɔdeɛ mɔɔ ze nrɛlɛbɛ mɔɔ wɔ anwuma nee azɛlɛ ye azo la amuala yeabɔ nu. Akee menli mɔɔ de aze la kɔsɔɔti bava nɔhalɛlilɛ abɛlɛ bɛ nwo aze amaa Gyihova kɛ bɛ Tumivolɛ. (Kenga Ɛfɛsɛsema 1:​8-11.) Asoo ɛ nye ɛnlie adenle kɛnlɛma mɔɔ Gyihova balua zo amaa ye bodane ara nu la anwo ɔ?

9. Saa yɛkenga Baebolo ne a, boni a ɔmaa yɛnwu ye wɔ kenle bie anwo a?

⁹ Suzu ngapezo mɔɔ Gyihova hanle ye wɔ Yidɛn tola ne anu mɔɔ wɔ Gyɛnɛsese 3:15 la anwo. b Ɔhanle edwɛkɛ mɔɔ ɔbasisi amaa ye bodane ara nu la anwo edwɛkɛ, noko ɔbasisi wɔ ɛvolɛ apenle dɔɔnwo anzi. Edwɛkɛ ɛhye mɔ anu ko a le kɛ, raalɛ ne ara ne anu titili ne,  Kelaese ne, bavi Ebileham abozoamra anu a ara a. (Gyn. 22:​15-18) Akee wɔ ɛvolɛ 33 Y.M., bɛhale Gyisɛse agyakɛ anzi kɛ mɔɔ bɛhanle bɛdole ɛkɛ la. (Gyi. 3:​13-15) Yeha ɛvolɛ mɔɔ bo 1,000 la na zɔhane ngapezo ne foa mɔɔ li awieleɛ, mɔɔ yemɔ a le Seetan mɔɔ bɛbagelegele ɔ ti la ara nu. (Yek. 20:​7-10) Eza Baebolo ne ka mɔɔ bazi wɔ mekɛ mɔɔ ɛkpɔlɛ mɔɔ la Seetan ewiade ne nee Gyihova ahyehyɛdeɛ ne avinli ɛlɛba awieleɛ la anwo edwɛkɛ dɔɔnwo.

10. (a) Edwɛkɛ boni mɔ a ɔnrɛhyɛ ɔbasisi a? (b) Kɛ ɔkɛyɛ na yɛaziezie yɛ adwenle nee yɛ ahonle ɛ? (Nea ɔbodwɛkɛ ne.)

¹⁰ Dwenle edwɛkɛ ɛhye mɔ mɔɔ yɛ nwanwane mɔɔ Baebolo ne hanle dole ɛkɛ la anwo. Mɔɔ limoa, maanle maanle ne mɔ babɔ “anzodwolɛ nee banebɔlɛ!” nwo nolo. (1 Tɛs. 5:​2, 3) Saa maanle maanle ne mɔ teta adalɛ ɛzonlenlɛ kɔsɔɔti a, anwongyelelɛ kpole ne babɔ ɔ bo “arɛlevilɛ nu.” (Yek. 17:16) Yemɔ anzi, Nyamenle bamaa yɛanwu kɛ “sonla Ra ne lɛ tumi nee anyunlunyia kpole lua anwuma amungu nu ɔlɛba.” (Mat. 24:30) Gyisɛse babua alesama ndɛne, yeaye mboane ne mɔ yeavi mbɔnkye ne mɔ anu. (Mat. 25:​31-33, 46) Noko Seetan ɛnrɛdɛnla ɛkɛ ne mgbane. Kɛmɔ ɔkyi Gyihova azonvolɛ la ati, ɔbaha maanle maanle ne mɔ, mɔɔ Baebolo ne fɛlɛ bɛ Gɔgo mɔɔ vi Meegɔgo azɛlɛ zo la yeabɔ nu yeamaa bɛateta Gyihova azonvolɛ. (Yiz. 38:​2, 10, 11) Ɔbadwu mekɛ bie wɔ anwongyelelɛ kpole ne anu la, bɛbava menli mɔɔ bɛkpokpa bɛ la mɔhama ne bɛahɔ anwuma bɛahɔboka Kelaese nee ye anwuma ɛlɔne ne anwo bɛamaa bɛaho Amagɛdɔn konle ne mɔɔ ɔbava anwongyelelɛ kpole ne yeara awieleɛ la. c (Mat. 24:31; Yek. 16:​14, 16) Akee Kelaese Ɛvolɛ Apenle Ko Tumililɛ ne babɔ ɔ bo.—Yek. 20:6.

11. Duzu a dahuu ngoane mɔɔ yɛbanyia la bamaa wɔahola wɔayɛ a? (Eza nea nvoninli ne.)

¹¹ Akee dwenle asetɛnla mɔɔ ɛbanyia wɔ ɛvolɛ 1,000 ne anzi la anwo. Baebolo ne hanle kɛ yɛ Bɔvolɛ ne ‘ɛva mekɛ mɔɔ ɛnlɛ awieleɛ bɔbɔ la ɛwula yɛ ahonle nu.’ (Nol. 3:11) Dwenle kɛzi ɛhye baha ɛdawɔ nee ɛ nee Gyihova agɔnwolɛvalɛ ne la. Draw Close to Jehovah buluku ne mukelɛ 319 ka edwɛkɛ kɛnlɛma ɛhye:  “Saa yɛtɛnla aze ɛvolɛ ɛya, apenle, mgbe, bɔbɔ mgbe mgbe dɔɔnwo a, yɛbanwu Gyihova Nyamenle anwo ninyɛne dɔɔnwo yɛadɛla mɔɔ yɛze ye kɛkala la. Noko yɛbade nganeɛ kɛ ninyɛne dɔɔnwo wɔ ɛkɛ mɔɔ ɔwɔ kɛ yɛsukoa a. . . . Yɛnrɛhola yɛnrɛpɛ kɛzi asetɛnla bayɛ kɛnlɛma nee anyelielɛ wɔ paladaese la anwo nvoninli bɔbɔ. Noko debie mɔɔ bayɛ anyelielɛ kpalɛ la a le kɛ yɛbabikye Gyihova dahuu.” Noko mekɛ mɔɔ yɛlɛkɔ zo yɛazukoa Nyamenle Edwɛkɛ ne la, duzu bieko a yɛbahola yɛavedevede nuhua a?

12. Kɛ ɔkɛyɛ na yɛado yɛ nye yɛanlea anwuma lɔ ɛ? Maa neazo.

¹² Nyamenle Edwɛkɛ ne maa yɛnwu ɛleka mɔɔ Gyihova de wɔ “anwuma lɔ” la anwo edwɛkɛ ekyi. (Aye. 33:5) Baebolo ne ka Gyihova nee ye ahyehyɛdeɛ ne foa mɔɔ wɔ anwuma la anwo edwɛkɛ ngɛnlɛma dɔɔnwo. (Aye. 6:​1-4; Dan. 7:​9, 10; Yek. 4:​1-6) Kɛ neazo la, yɛbahola yɛagenga nwanwane ninyɛne mɔɔ Yizikeɛle nwunle ye wɔ mekɛ mɔɔ ‘anwuma bukele na ɔnyianle Nyamenle anwo ɛnyelɛzodeɛnwunlɛ’ la anwo debie.—Yiz. 1:1.

13. Kɛ mɔɔ bɛhilehile nu wɔ Hibuluma 4:​14-16 la, duzu a ɛ nye die nwo wɔ gyima mɔɔ Gyisɛse ɛlɛyɛ wɔ anwuma lɔ la anwo a?

¹³ Eza dwenle gyima mɔɔ Gyisɛse ɛlɛyɛ ye wɔ anwuma kɛ yɛ Belemgbunli nee yɛ Ɛsɔfo Kpanyinli mɔɔ se anwunvɔne la anwo. Yɛbahola yɛalua ɔ nwo zo yɛabikye Nyamenle “ɛlolɛ kpole belemgbunli ebia ne” wɔ asɔneyɛlɛ nu na yɛazɛlɛ ye anwunvɔnezelɛ nee ye moalɛ wɔ “mekɛ kpalɛ nu.” (Kenga Hibuluma 4:​14-16.) Bɛmmamaa yɛmaa kenle ko bɔbɔ pɛ nu mɔɔ yɛndwenledwenle mɔɔ Gyihova nee Gyisɛse ɛyɛ ɛmaa yɛ nee mɔɔ bɛlɛyɛ bɛamaa yɛ la anwo a. Ɔwɔ kɛ ɛlɔlɛ mɔɔ bɛlɛ bɛmaa yɛ la ka yɛ ahonle kpole na ɔmaa yɛbɔ mɔdenle yɛsonle Gyihova.—2 Kɔl. 5:​14, 15.

14. Debie kpalɛ ko mɔɔ yɛbahola yɛayɛ yɛahile kɛ yɛ nye sɔ mɔɔ Gyihova nee Gyisɛse ɛyɛ ɛmaa yɛ la a le boni? (Eza nea nvoninli ne mɔ.)

 ¹⁴ Adenle kpalɛ mɔɔ yɛbahola yɛalua zo yɛahile kɛ yɛ nye sɔ mɔɔ yɛ Nyamenle ne nee ɔ Ra ne ɛyɛ ɛmaa yɛ la anu ko a le kɛ yɛbabɔ mɔdenle yɛaboa awie mɔ yɛamaa bɛarayɛ Gyihova Alasevolɛ nee Gyisɛse ɛdoavolɛma. (Mat. 28:​19, 20) Ɛhye a ɛzoanvolɛ Pɔɔlo yɛle vale hilele kɛ ɔ nye sɔ mɔɔ Nyamenle nee Kelaese ɛyɛ la a. Ɛnee ɔze kɛ Gyihova ɛhulolɛdeɛ a le kɛ “ɔkulo kɛ ɔdie menli ngakyile kɔsɔɔti na bɛnyia nɔhalɛ ne anwo nɔhalɛ ndelebɛbo.” (1 Tim. 2:​3, 4) Ɔyɛle gyima ɛsesebɛ wɔ ye ɛzonlenlɛ gyima ne anu ɔboale menli dɔɔnwo amaa adenle biala azo ‘yealie bie mɔ ngoane.’—1 Kɔl. 9:​22, 23.

15. Kɛ mɔɔ Edwɛne 1:2 kile la, duzu a bamaa yɛ nye alie a?

¹⁵ Ɔle kpalɛ bɔkɔɔ kɛ edwɛndolɛnli ne hanle kɛ sonla mɔɔ “ɔ nye die Gyihova mɛla ne anwo,” na “ɔdwenledwenle nwolɛ alehyenlɛ nee aledwolɛ” la anye die la. (Edw. 1:​1-3) Baebolo edwɛbohilelɛnli Joseph Rotherham hɛlɛle ngɛlɛlera ɛhye anwo edwɛkɛ wɔ ye buluku, Studies in the Psalms ne anu kɛ, ɔwɔ kɛ awie “anye die Nyamenle adehilelɛ nwo kpole kpalɛ mɔɔ ɔbamaa yeakpondɛ, yeazukoa na yeava mekɛ dɔɔnwo yeadwenledwenle nwolɛ a.” Ɔvale ɔzɔle zolɛ kɛ “saa kenle ko bɔbɔ pɛ nu na awie angenga Baebolo ne a, ɛnee yezɛkye mekɛ.” Saa ɛsukoa ninyɛne ngɛnlɛma mɔɔ wɔ Baebolo ne anu la anu dɔɔnwo na ɛnwu kɛzi edwɛkɛ bie fale edwɛkɛ fofolɛ mɔɔ wɔ ɛleka gyɛne la anwo a, ɛ nye balie ye ɛzukoalɛ nwo. Nea kɛzi ɔyɛ anyelielɛ kɛ yɛbavedevede Nyamenle Edwɛkɛ ne afoa biala anu la!

16. Duzu a yɛbazuzu nwo wɔ edwɛkɛ bieko anu a?

¹⁶ Ɔnyɛ se fee kɛ yɛbade nɔhalɛ ne mɔɔ Gyihova kilehile yɛ wɔ ye Edwɛkɛ ne anu la abo. Wɔ edwɛkɛ bieko anu, yɛbazuzu nɔhalɛ mɔɔ anu le kuloonwu la anu ko anwo—Gyihova sunsum nu ɛzonlenlɛsua kpole ne mɔɔ Pɔɔlo hanle nwolɛ edwɛkɛ wɔ ye kɛlata ne mɔɔ ɔhɛlɛle ɔhɔmaanle Hibulu Kilisienema ne anu la. Ɔrɛla ye kɛ, zɔhane edwɛkɛ ne mɔɔ yɛbavedevede nu la bamaa ɛ nye alie kpole.