1. Duzu a Gyihova nwu ye wɔ ye azonvolɛ anwo a?

 SAA Gyihova nea ye azonvolɛ mɔɔ wɔ azɛlɛ ye azo la a, duzu a ɔnwu ye a? Ɔnwu mekɛ mɔɔ yɛlɛdi fɛlɛko nee mekɛ mɔɔ yɛlɛdi nyane la. (Edw. 37:18) Saa ɔnwu kɛ yɛlɛyɛ biala mɔɔ yɛbahola la yɛazonle ye ɔnva nwo nyanelilɛ mɔɔ yɛwɔ nu la a, nea kɛzi ɔ nye die a! Mɔɔ tɛla biala la, ɔlɛ ɛhulolɛ kɛ ɔbaboa yɛ na yeakyekye yɛ rɛle.

2. Duzu a Gyihova yɛ maa bɛdabɛ mɔɔ bɛ ahonle ɛbubu la ɛ, na kɛ ɔkɛyɛ na yɛanyia kɛzi ɔnea yɛ la azo nvasoɛ ɛ?

² Edwɛne 147:3 ka kɛ Gyihova ‘kyekye bɛdabɛ mɔɔ bɛ ahonle ɛbubu la nganlɛ ne mɔ.’ Bɛha Gyihova anwo edwɛkɛ wɔ ɛke kɛ asɛɛ ɔlɛnea awie mɔɔ ɔ rɛle ɛbɔ la kɛnlɛma. Duzu a ɔwɔ kɛ yɛyɛ amaa yɛanyia kɛzi Gyihova nea yɛ la azo nvasoɛ ɛ? Maa yɛyɛ ndonwo bie. Dɔketa mɔɔ ze ye gyima nye zo la kola yɛ ninyɛne dɔɔnwo kɛ ɔboa awie mɔɔ ɛboda la yeamaa yeade kpɔkɛ. Noko saa ahenle mɔɔ ɛboda la banyia ayileyɛlɛ ne azo nvasoɛ a, ɔwɔ kɛ ɔdi dɔketa ne adehilelɛ zo. Wɔ edwɛkɛ ɛhye anu, yɛbanwu mɔɔ Gyihova ɛlɛka wɔ ye Edwɛkɛ ne anu ahile bɛdabɛ mɔɔ bɛlɛdi nyane na eza yɛazuzu kɛzi yɛbava ye folɛdulɛ ne mɔɔ kile ɛlɔlɛ la yɛali gyima la anwo.

GYIHOVA MAA YƐNWU KƐ YƐSONLE BOLƐ

3. Duzu ati a bie mɔ te nganeɛ kɛ nvasoɛ ɛnle bɛ nwo zo a?

³ Yɛde ewiade mɔɔ menli ɛnlɛ ɛlɔlɛ la anu, yɛɛ mɔɔ yɛ alɔbɔlɛ la a le kɛ bɛmaa menli dɔɔnwo ɛde nganeɛ kɛ bɛ nwo ɛngyia. Adiema raalɛ Helen a hanle kɛ: “Awovolɛ mɔɔ ɛnee bɛnlɛ ɛlɔlɛ la a tetele me a. Ɛnee me papa kulo basabasayɛlɛ yɛɛ ɔka ɔkile me nee me mediema ne mɔ dahuu kɛ nvasoɛ biala ɛnle yɛ nwo  zo.” Kɛ mɔɔ ɔdole Helen la, bie a ɛdawɔ noko awie ɛhile wɔ ateetee, ɔbɔle wɔ aholoba dahuu anzɛɛ ɔmaanle ɛdele nganeɛ kɛ awie ɛngulo wɔ edwɛkɛ. Saa zɔhane a ɔde a, bie a ɔyɛ se ɔmaa wɔ kɛ ɛbalie wɔali kɛ amgba awie dwenle ɛ nwo.

4. Kɛ mɔɔ Edwɛne 34:18 kile la, anwodozo boni a Gyihova maa yɛnyia a?

⁴ Saa awie mɔ nee wɔ anli ye boɛ bɔbɔ a, ɛbahola wɔanyia anwodozo kɛ Gyihova kulo wɔ yɛɛ ɔnwu wɔ kɛ ɛsonle bolɛ. “Gyihova bikye bɛdabɛ mɔɔ bɛ ahonle ɛbubu la.” (Kenga Edwɛne 34:18.) Saa ‘ɛ sa nu ɛdo’ a, kakye kɛ Gyihova nwunle ninyɛne mgbalɛ wɔ wɔ ahonle nu yɛɛ ɔdaye mumua ne a ɔhwenle wɔ ɔbikyele ɔ nwo a. (Dwɔn 6:44) Yeziezie ɔ nwo dahuu kɛ ɔboa wɔ ɔluakɛ ɛsonle bolɛ ɛmaa ye.

5. Duzu a yɛsukoa yɛfi kɛzi Gyisɛse nee menli mɔɔ awie mɔ ɛmbu bɛ la lile la anu a?

⁵ Saa yɛsuzu Gyisɛse neazo ne anwo a, ɔbamaa yɛanwu kɛzi Gyihova te nganeɛ la. Mɔɔ Gyisɛse ɛlɛyɛ ye ɛzonlenlɛ gyima ne wɔ azɛlɛ ye azo la, ɔmaanle ye adwenle hɔle bɛdabɛ mɔɔ menli ɛmbu bɛ la anwo zo na ɔlale ahunluyelɛyelalɛ ali ɔhilele bɛ. (Mat. 9:​9-12) Mɔɔ raalɛ bie mɔɔ ɛnee ɛlɛkpondɛ ye ewule ɛzulolɛ bie anwo ayileyɛlɛ la razɔle Gyisɛse tɛladeɛ ne anu la, Gyisɛse kyekyele ɔ rɛle na ɔhanvole ye wɔ ye diedi ne anwo. (Maake 5:​25-34) Gyisɛse lale ɔ Ze subane ne bie ali pɛpɛɛpɛ. (Dwɔn 14:9) Ɔti ɛbahola wɔanyia anwodozo kɛ ɛsonle bolɛ ɛmaa Gyihova na ɔnwu wɔ subane mgbalɛ ne mɔ, mɔɔ bie a le wɔ diedi nee ɛlɔlɛ mɔɔ ɛlɛ ɛmaa ye la.

6. Saa awie te nganeɛ kɛ ɔ nwo ɛngyia a, duzu a ɔbahola yeayɛ a?

⁶ Saa dahuu ɛte nganeɛ kɛ nvasoɛ ɛnle ɛ nwo zo a, duzu a ɛbahola wɔayɛ a? Kenga Baebolo ngyehyɛnu mɔɔ maa ɛnwu kɛ ɛsonle bolɛ ɛmaa Gyihova la na dwenledwenle nwolɛ. b  (Edw. 94:19) Saa wɔangola wɔandwu wɔ bodane nwo anzɛɛ ɛ sa nu ɛdo ɔluakɛ ɛngola ɛnyɛ dɔɔnwo kɛ mɔɔ awie mɔ gyɛne kola yɛ la a, mmabua ɛ nwo fɔlɛ. Gyihova anye ɛnla kɛ ɛbayɛ ninyɛne mɔɔ ɛnrɛhola ye yɛ la. (Edw. 103:​13, 14) Saa awie yɛle wɔ basabasa wɔ mekɛ bie mɔɔ ɛraze la a, mmabɔ ɛ nwo somolɛ wɔ mɔɔ ahenle yɛle la anwo. Anrɛɛ ɔnle kɛ ɔyɛ wɔ zɔ! Kakye kɛ Gyihova bamaa ɛtanevolɛ ne a abu mɔɔ zile la anwo mgbonda a, tɛ ahenle mɔɔ bɛyɛle ye ɛtane ne la ɔ. (1 Pita 3:12) Sandra mɔɔ bɛyɛle ye basabasa wɔ ye ngakula nu la hanle kɛ: “Dahuu meyɛ asɔne kɛ Gyihova ɛboa me ɛmaa menwu subane mgbalɛ mɔɔ melɛ mɔɔ ɔdaye noko ɔnwu ye la.”

7. Kɛ ɔkɛyɛ na yɛava anwubielɛ mɔɔ yɛnyia wɔ ɛbɛlabɔlɛ nu la yɛali gyima kpalɛ wɔ Gyihova ɛzonlenlɛ nu ɛ?

⁷ Mmamaa ɛ rɛle fi kɛ Gyihova bahola alua ɛ nwo zo aboa awie mɔ. Yeli wɔ eni yeyɛ wɔ ɔ gɔnwo gyimayɛvo wɔ Kilisiene ɛzonlenlɛ gyima ne anu. (1 Kɔl. 3:9) Ɔbayɛ kɛ ninyɛne mɔɔ sisile wɔ ɛbɛlabɔlɛ nu la maa ɛte awie mɔ nyane nee kɛzi bɛte nganeɛ la abo. Ɛbahola wɔayɛ ninyɛne dɔɔnwo wɔaboa bɛ. Helen mɔɔ yɛlimoa yɛha ɔ nwo edwɛkɛ la nyianle moalɛ na kɛkala ɔdaye noko ɔkola ɔboa awie mɔ. Ɔhanle kɛ: “Gyihova ɛmaa medame mɔɔ ɛnee menzɔho ɛhwee la merayɛ awie mɔɔ mete nganeɛ kɛ menli kulo me edwɛkɛ yɛɛ nvasoɛ wɔ me nwo zo la.” Helen ɛlɛfa anyelielɛ ayɛ dahuu adekpakyelɛ gyima ne bie.

GYIHOVA KULO KƐ YƐDIE YE ƐTANEFAKYƐ NE YƐTO NU

8. Anwodozo edwɛkɛ boni a wɔ Ayezaya 1:18 a?

⁸ Gyihova azonvolɛ bie mɔ di nyane kpole wɔ ɛtane dɛba mɔɔ bɛyɛle kolaa na bɛazɔne bɛ anzɛɛ wɔ bɛ ɛzɔnenlɛ ne anzi la anwo. Noko ɔhyia kɛ yɛkakye kɛ, kɛmɔ Gyihova kulo yɛ kpole kpalɛ la ati a ɔvale ɛkpɔnedeɛ ne ɔmaanle yɛ a. Nɔhalɛ nu, ɔkulo kɛ yɛdie ye ahyɛlɛdeɛ ɛhye yɛto nuhua. Gyihova maa yɛnyia anwodozo kɛ, saa yɛ nee ye ‘siezie yɛ avinli’ c a, ɔbava yɛ ɛtane yeahyɛ yɛ bɔkɔɔ. (Kenga Ayezaya 1:18.) Nea kɛzi ɔyɛ yɛ fɛ kɛ Gyihova ɛngakye yɛ ɛtane mɔɔ yɛyɛle ye dɛba la! Noko akee ɔ rɛle ɛnvi kpalɛ mɔɔ yɛyɛle la ɛlɛ.—Edw. 103:​9, 12; Hib. 6:10.

9. Duzu ati a ɔle kpalɛ kɛ yɛbava yɛ adwenle yɛazie mɔɔ yɛlɛyɛ ye kɛkala nee mɔɔ yɛbahola yɛayɛ ye kenle bie la azo na tɛ mɔɔ ɛze la azo a?

⁹ Saa wɔ adwenle ɛlɛbua wɔ fɔlɛ wɔ ninyɛne mɔɔ ɛyɛle ye dɛba la anwo a, bɔ mɔdenle kɛ ɛbava wɔ adwenle wɔazie mɔɔ ɛlɛyɛ ye ɛnɛ nee mɔɔ ɛbahola wɔayɛ ye kenle bie la azo na tɛ mɔɔ ɛze ɛhɔ la azo ɔ. Suzu ɛzoanvolɛ Pɔɔlo neazo ne anwo. Ɔlile nyane kɛ ɔyɛle Kilisienema kpɔdekpɔde mekɛ bie la, noko ɛnee ɔze kɛ Gyihova ɛva ye ɛtane ɛhyɛ ye. (1 Tim. 1:​12-15) Asoo ɔhɔle zo ɔlile ye ɛtane dɛba ne mɔ anwo nyane? Kyɛkyɛ, kɛ mɔɔ yeangɔ zo yeandwenledwenle ninyɛne mɔɔ ɔholale ɔyɛle wɔ Dwuuma ɛzonlenlɛ nu wɔ dɛba ne la anwo la, zɔhane ala a yeangɔ zo yeanli ye ɛtane dɛba ne mɔ anwo nyane a. (Fel. 3:​4-8, 13-15) Emomu, Pɔɔlo hɔle zo yɛle biala mɔɔ ɔbahola la wɔ ye ɛzonlenlɛ gyima ne anu na ɔvale ye adwenle ɔzɔle mɔɔ ɔbazi kenle bie la. Ɛdawɔ noko ɛnrɛhola ɛnrɛhakyi mɔɔ zile dɛba ne la kɛ mɔɔ ɔdole Pɔɔlo la. Noko ɛbahola wɔaye Gyihova ayɛlɛ wɔ tɛnlabelɛ mɔɔ ɛwɔ nu kɛkala la anu na wɔamaa ɛ nye ala ninyɛne mɔɔ yeva yebɔ wɔ ɛwɔkɛ kenle bie la ade.

10. Saa yɛ nyɛleɛ bie gyegyele awie mɔ a, duzu a yɛbahola yɛayɛ a?

¹⁰ Bie a ninyɛne mɔɔ ɛyɛle ye dɛba ne mɔɔ bodale awie mɔ la ɛlɛgyegye wɔ. Duzu a bahola aboa wɔ a? Yɛ biala mɔɔ ɛbahola la di ngyegyelɛ ne anwo gyima, bie a le kɛ ɛbavi wɔ  ahonle nu wɔakpa kyɛlɛ. (2 Kɔl. 7:11) Sɛlɛ Gyihova kɛ ɔboa menli mɔɔ wɔ nyɛleɛ ne gyegyele bɛ la. Ɔbahola yeaboa ɛdawɔ mumua ne nee menli mɔɔ wɔgyegye bɛ la yeamaa bɛagyinla kpundii na bɛanyia anzodwolɛ bieko.

11. Duzu a yɛbahola yɛazukoa yɛavi ngapezonli Dwona neazo ne anu a? (Eza nea nvoninli ne.)

¹¹ Sukoa debie fi nvonleɛ mɔɔ ɛyɛle ye dɛba la anu na nyia ɛhulolɛ kɛ ɛbamaa Gyihova ava wɔ ali gyima wɔ adenle mɔɔ ɔkulo kɛ ɔfa wɔ ɔdi gyima la azo. Nea Dwona neazo ne. Kɛ anrɛɛ Dwona bahɔ ɛleka mɔɔ Nyamenle hilele ye kɛ ɔhɔ wɔ Nenɛvɛ la, ɔbɔle ɔ ti wɔ ɛlɛka gyɛne. Gyihova denrɛle Dwona na ɔzukoale debie ɔvile ye nvonleɛ ne anu. (Dwona 1:​1-4, 15-17; 2:​7-10) Gyihova anye ɔ nye anvi Dwona anwo. Nyamenle maanle ye nwolɛ adenle bieko kɛ ɔhɔ Nenɛvɛ, na mekɛ ɛhye ɛdeɛ Dwona angyilegyinla nwolɛ fee. Ɔnlunle ɔ nwo wɔ nvonleɛ mɔɔ ɔyɛle la anwo ɛdeɛ, noko yeammaa yemɔ anzi ye adenle kɛ ɔbalie gyimalilɛ mɔɔ Gyihova ɛlɛfa amaa ye la yeado nu.—Dwona 3:​1-3.

GYIHOVA DUA SUNSUM NWUANZANWUANZA NE AZO KYEKYE YƐ RƐLE

12. Saa esiane bie to yɛ a, kɛ ɔkɛyɛ na Gyihova amaa yɛ anzodwolɛ ɛ? (Felepaema 4:​6, 7)

¹² Saa esiane bie to yɛ a, Gyihova dua ye sunsum nwuanzanwuanza ne azo kyekye yɛ rɛle. Suzu Ron nee Carol anwubielɛ ne anwo. Alɔbɔlɛ edwɛkɛ ne a le kɛ, bɛ ra nrenyia hunle ɔ nwo. Bɛhanle kɛ: “Yɛgyinla sɔnea ngakyile mɔɔ anu yɛ se la anloa ɛlɛ, noko ɛhye tɛla bɛ muala. Yɛsolole nafelɛ fane dɔɔnwo ɔti ɛnee yɛyɛ asɔne, na amgba yɛnyianle anzodwolɛ ne mɔɔ bɛha nwolɛ edwɛkɛ wɔ Felepaema 4:​6, 7 la bie.” (Kenga.) Saa ɛgyi sɔnea mɔɔ anu yɛ se la anloa a, ɛbahola wɔava mekɛ tendenle biala mɔɔ ɛkulo la wɔaha wɔ ahonle nu edwɛkɛ kɔsɔɔti wɔahile Gyihova fane dɔɔnwo. (Edw. 86:3; 88:1) Sɛlɛ Gyihova fane dɔɔnwo kɛ ɔva ye sunsum nwuanzanwuanza ne ɔmaa wɔ. Ɔnrɛbu ɔ nye ɔnrɛgua wɔ nzɛlɛlɛ ne azo ɛlɛ.—Luku 11:​9-13.

13. Kɛzi sunsum nwuanzanwuanza ne bahola aboa yɛ yeamaa yɛahɔ zo yɛazonle Gyihova nɔhalɛ nu ɛ? (Ɛfɛsɛsema 3:16)

¹³ Asoo sɔnea bie mɔɔ dole wɔ la ɛmaa wɔyɛ bɛtɛɛ ɔ? Sunsum nwuanzanwuanza ne bahola amaa wɔ anwosesebɛ yeamaa wɔahɔ zo wɔava nɔhalɛlilɛ wɔazonle Gyihova. (Kenga Ɛfɛsɛsema 3:16.) Tie adiema raalɛ bie mɔɔ bɛfɛlɛ ye Flora la anwubielɛ ne. Ɛnee ɔ nee ɔ hu le edwɛkpatɛlɛvolɛma noko ɔ hu zɛkyele agyalɛ, ɔti bɛbɔle ewole. Ɔhanle kɛ: “Nyane mɔɔ ɛnee melɛdi wɔ mɔɔ ɔyɛle la anwo la bole me nwo zo. Menzɛlɛle Gyihova kɛ ɔva ye sunsum nwuanzanwuanza ne ɔmaa me amaa meahola ɔ nloa gyinla. Gyihova kyekyele me rɛle na ɔboale me ɔmaanle mengyinlanle debie mɔɔ alimoa ne ɛnee ɔzɔho kɛ menrɛhola ɔ nloa gyinla la anloa.” Flora te nganeɛ kɛ Nyamenle ɛboa ye ɛmaa yenyia ye nu anwodozo kpole, na ɔdie ɔdi kɛ ɔbaboa ye wɔ ye sɔnea kɔsɔɔti anu. Ɔvale ɔzɔle zo kɛ: “Edwɛkɛ mɔɔ wɔ Edwɛne 119:32 la fale me nwo, ‘Mebakpondɛ wɔ mɛla ne mɔ ɛsesebɛ ɔluakɛ ɛbuke me ahonle nu ɛmaa bɛ.’”

14. Kɛ ɔkɛyɛ na wɔamaa Nyamenle sunsum ne aboa wɔ ɛ?

¹⁴ Saa ɛsɛlɛ Gyihova kɛ ɔmaa wɔ sunsum nwuanzanwuanza a, duzu a ɔwɔ kɛ ɛyɛ a? Yɛ ninyɛne mɔɔ bamaa sunsum ne aboa wɔ kpalɛ la. Ninyɛne ɛhye mɔ bie a le debiezukoalɛ nee daselɛlilɛ ɛhɔlɛ. Kenga Gyihova Edwɛkɛ ne dahuu na ɛhye bamaa wɔanyia ye adwenle ne bie. (Fel. 4:​8, 9) Saa ɛlɛkenga a, nea menli mɔɔ wɔ Baebolo ne anu mɔɔ bɛyiale sɔnea la na dwenledwenle kɛzi Gyihova boale bɛ ɔmaanle bɛgyinlanle ɔ nloa la anwo. Sandra mɔɔ yɛhanle ɔ nwo edwɛkɛ la yiale ngyegyelɛ  mɔɔ anu yɛ se la dɔɔnwo. Ɔhanle kɛ: “Dwosefi edwɛkɛ ne mɔɔ wɔ Baebolo ne anu la maanle me anwosesebɛ kpalɛ. Yeammaa sɔnea nee nzisi mɔɔ ɔyiale la anzɛkye ɔ nee Gyihova agɔnwolɛvalɛ ne.”—Gyn. 39:​21-23.

GYIHOVA DUA YƐ MEDIEMA DIEDIMA ANWO ZO ƆKYEKYE YƐ RƐLE

15. Nwane mɔ a bahola akyekye yɛ rɛle a, na kɛ ɔkɛyɛ na bɛahola bɛaboa yɛ ɛ? (Eza nea nvoninli ne.)

¹⁵ Saa yɛlɛnwu amaneɛ a, yɛ mediema diedima bahola akyekye yɛ “rɛle kpole kpalɛ.” (Kɔl. 4:11) Gyihova dua yɛ mediema mrenyia nee mraalɛ nwo zo ɔmaa yɛnwu kɛ ɔkulo yɛ. Saa yɛlɛtendɛ na bɛtie yɛ edwɛkɛ ne kpalɛ anzɛɛ bɛnyia mekɛ bɛmaa yɛ a, ɔbamaa bɛahola bɛakyekye yɛ rɛle. Bie a bɛbagenga Baebolo ngyɛnu bie mɔɔ maa anwosesebɛ la bɛahile yɛ anzɛɛ bɛ nee yɛ bayɛ asɔne. d (Wlo. 15:4) Ɔdwu mekɛ ne bie a adiema nrenyia anzɛɛ raalɛ bie bahola ahakye yɛ kɛzi Gyihova nwu ninyɛne la na ɛhye baboa yɛ yeamaa yɛahɔ zo yɛazie yɛ nwo dii. Eza yɛ mediema diedima bahola aboa yɛ wɔ ndenle bie mɔ azo, bie a bɛbado aleɛ bɛamaa yɛ wɔ mekɛ mɔɔ yɛwɔ ngyegyelɛ nu la.

16. Duzu a bie a ɔbahyia kɛ yɛyɛ amaa awie mɔ aboa yɛ a?

¹⁶ Amaa awie mɔ ahola aboa yɛ la, bie a ɔwɔ kɛ yɛbiza bɛ. Yɛ mediema kulo yɛ yɛɛ bɛkulo kɛ bɛboa yɛ. (Mrɛ. 17:17) Noko bie a bɛnze  kɛzi yɛte nganeɛ anzɛɛ ninyɛne mɔɔ yɛhyia nwo la. (Mrɛ. 14:10) Saa ɛlɛyia ngyegyelɛ a, ɛbahola wɔaha kɛzi ɛte nganeɛ la wɔahile ɛ gɔnwo mɔ mɔɔ bɛnyi sunsum nu la. Ka debie mɔɔ ɛhyia nwolɛ la kile bɛ. Ɛbahola wɔaha wɔ edwɛkɛ wɔahile asafo nu kpanyinli ko anzɛɛ mgbanyima nwiɔ mɔɔ ɛnea a ɛkola ɛbikye bɛ la. Mediema mraalɛ bie mɔ ɛnwu kɛ saa bɛka bɛ edwɛkɛ bɛkile mediema mraalɛ gyɛne mɔɔ bɛnyi sunsum nu la a, ɔmaa bɛ rɛle kyekye.

17. Ninyɛne boni mɔ a bie a ɔnrɛmaa yɛnrɛnyia anwosesebɛmaanlɛ mɔɔ yɛhyia la a, na kɛ ɔkɛyɛ na yɛali nwolɛ gyima ɛ?

¹⁷ Nea kɛ ɛnrɛde ɛ nwo. Bie a kɛmɔ awie mɔ yɛle wɔ debie ɔmaanle ɛlile nyane la ati, ɔmmaa ɛ nye ɛnlie nwo kɛ ɛbabikye menli. Bie a ɛ mediema mrenyia nee mraalɛ ɛnrɛde wɔ edwɛkɛ bo anzɛɛ bɛbaha edwɛkɛ mɔɔ bamaa wɔali nyane la. (Gye. 3:2) Mmaka kɛ ninyɛne ɛhye mɔ ati ɛnrɛbikye bɛ, bɛbahola bɛamaa wɔ anwosesebɛ. Asafo nu kpanyinli bie mɔɔ bɛfɛlɛ ye Gavin mɔɔ ɔlɛ adwenle nu ngyegyelɛ la hanle kɛ: “Fane dɔɔnwo ne ala mengulo kɛ mebabikye me gɔnwo mɔ anzɛɛ me nee bɛ badendɛ.” Noko Gavin bɔ mɔdenle bikye mediema na ɛhye boa ye kpalɛ. Adiema raalɛ bie mɔɔ bɛfɛlɛ ye Amy la hanle kɛ: “Ɔlua mɔɔ menwu ye dɛba la ati, ɔyɛ se kɛ mebalie menli meali. Noko melɛbɔ mɔdenle meazukoa kɛ mebahulo me mediema mrenyia nee mraalɛ na mealie bɛ meali kɛ mɔɔ Gyihova yɛ ye la. Meze kɛ saa meyɛ ye zɔ a ɔmaa Gyihova anye die yɛɛ ɔmaa medame noko me nye die.”

MAA ƐWƆKƐ MƆƆ GYIHOVA ƐBƆ KƐ ƆBAYƐ YƐ AYILE LA ƐKYEKYE Ɛ RƐLE

18. Duzu a yɛbahola yɛamaa yɛ nye ala ye kenle bie a, na duzu a yɛbahola yɛayɛ ye ɛnɛ a?

¹⁸ Yɛbahola yɛava anwodozo yɛanlea kenle bie ade, ɔluakɛ yɛze kɛ ɔnrɛhyɛ Gyihova baye debie biala mɔɔ maa yɛnwu amaneɛ nee nyane biala mɔɔ yɛlɛdi la yeavi ɛkɛ. (Yek. 21:​3, 4) Mekɛ zɔhane nyane mɔɔ yɛlile la ɛnrɛra “ahonle nu bieko.” (Aye. 65:17) Kɛ mɔɔ yɛnwu ye la, ɛnɛ bɔbɔ Gyihova ‘kyekye yɛ nganlɛ ne mɔ.’ Fa nziezielɛ mɔɔ Gyihova ɛlɛdua zo akyekye ɛ rɛle na yeaboa wɔ la di gyima. Mmamaa wɔ adwenle nu yɛ wɔ kesee ko bɔbɔ ɛlɛ kɛ ‘ɔdwenle ɛ nwo.’—1 Pita 5:7.