1-2. (a) Ninyɛne mɔɔ maa Gyihova azonvolɛ adwenle nu yɛ bɛ kesee la bie mɔ a le boni? (b) Duzu a yɛbazuzu nwo wɔ edwɛkɛ ɛhye anu a?

 SAA yɛle ngakula o anzɛɛ mgbanyinli o, ɔyɛ a yɛ muala yɛ adwenle nu yɛ yɛ kesee. a Kɛ neazo la, dasevolɛ kpavolɛ bie adwenle nu ɛyɛ ye kesee kɛ saa Gyihova anye die ɔ nwo a. Ɔlua ɛhye ati ɔngola ɔnnwu ye saa ɔmaa bɛzɔne ye o. Anzɛɛ suzu adiema nrenyia bie mɔɔ ye ngakula nu ɔkpale kɛ ɔbava Belemgbunlililɛ ne yelimoa ye ɛbɛlabɔlɛ nu tɛla kɛ ɔbayɛ gyima mɔɔ ɔbamaa yeanyia ezukoa dɔɔnwo la anwo. Kɛkala mɔɔ yeyɛ kpanyinli la, ezukoa mɔɔ ɔbava yeadua ninyɛne mɔɔ ye abusua ne hyia la anwo kakɛ la ala a ɔlɛ ye a. Ɔti bie a ye adwenle nu bayɛ ye kesee kɛ saa ɔzile kpɔkɛ kpalɛ wɔ ye ngakula nu a. Pɛ adiema raalɛ kpanyinli bie mɔɔ ɔnlɛ anwosesebɛ dɔɔnwo la anwo nvoninli. Kɛmɔ ɔngola ɔnyɛ ninyɛne mɔɔ ɛnee ɔyɛ ye dɛba ne la bieko la ati, bie a ɔ sa nu ɛdo. Wɔbiza ɛ nwo kpuya le kɛ ɛhye mɔ la bie ɛlɛ ɔ? ‘Asoo amgba Gyihova nwu me? Asoo nvasoɛ wɔ afɔle ngakyile mɔɔ mebɔ memaa Gyihova la azo? Asoo me nwo tɛkyia Gyihova?’

² Saa yɛamkpondɛ kpuya le kɛ ɛhye mɔ la anwo mualɛ a, bie a ɔbaha ɛzonlenlɛ mɔɔ yɛfa yɛmaa Gyihova la. Wɔ edwɛkɛ ɛhye anu, yɛbazuzu kɛzi yɛfa yɛ adwenle yɛsie Baebolo ngyinlazo  zo a ɔbaboa yɛ wɔ mekɛ mɔɔ yɛ adwenle nu bayɛ yɛ kesee kɛ (1) saa Gyihova anye die yɛ nwo a, (2) saa nrɛlɛbɛ wɔ kpɔkɛ mɔɔ yɛsisile ye dɛba la anu a, anzɛɛ (3) saa yɛ nwo tɛkyia Gyihova a.

KƐZI ƐBAYE ADWENLE NU KESEEYƐLƐ WƆAVI Ɛ TI ANU LA

3. Adenle ko mɔɔ yɛbahola yɛalua zo yɛaye adwenle nu keseeyɛlɛ yɛavi yɛ ti anu la a le boni?

³ Adenle ko mɔɔ yɛbahola yɛalua zo yɛaye adwenle nu keseeyɛlɛ yɛavi yɛ ti anu la a le kɛ yɛbakpondɛ yɛ kpuya ne mɔ anwo mualɛ yɛavi Nyamenle Edwɛkɛ ne anu. Saa yɛyɛ zɔ a, ɔbamaa yɛ nwo ayɛ se, yɛanyi sunsum nu na yɛahola ‘yɛagyinla kpundii wɔ diedi ne anu.’—1 Kɔl. 16:13.

4. Kɛzi ‘yɛsɔ ninyɛne kɔsɔɔti yɛnea’ ɛ? (1 Tɛsalonaekama 5:21)

⁴ Kenga 1 Tɛsalonaekama 5:21. Yɛ ye nzonlɛ kɛ Baebolo ne maa yɛ anwosesebɛ kɛ ‘yɛzɔ ninyɛne kɔsɔɔti yɛnlea.’ Kɛ ɔkɛyɛ na yɛahola yɛayɛ ɛhye ɛ? Yɛbahola yɛava mɔɔ yɛdie yɛdi la yɛatoto mɔɔ Baebolo ne ka la anwo yɛava yɛazɔ yɛanlea kɛ ɔle nɔhalɛ a. Fa kpavolɛ ne mɔɔ ye adwenle nu yɛ ye kesee kɛ saa Nyamenle anye die ɔ nwo la kɛ neazo. Asoo ɔwɔ kɛ ɔfa adwenle zɔhane kɛ ɔle nɔhalɛ? Kyɛkyɛ, ɔwɔ kɛ ɔnwu Nyamenle adwenle wɔ edwɛkɛ ne anwo ɔfa ‘ɔsɔ ninyɛne kɔsɔɔti ɔnlea.’

5. Kɛ ɔkɛyɛ na yɛanwu kɛ Gyihova ɛbua yɛ kpuya ne mɔ ɛ?

⁵ Saa yɛlɛkenga Nyamenle Edwɛkɛ ne a, ‘yɛte’ kɛ Gyihova ɛlɛtendɛ ahile yɛ. Noko amaa yɛanwu adwenle mɔɔ ɔlɛ wɔ kpuya fɔɔnwo bie mɔɔ yɛlɛ la anwo la, ɔwɔ kɛ yɛdayɛ mumua yɛbɔ mɔdenle yɛsukoa ninyɛne dɔɔnwo. Saa yɛlɛkenga Baebolo ne a, mɔɔ ɔhyia kɛ yɛfa yɛ adwenle yɛsie zolɛ kpalɛ la a le debie mɔɔ gyegye yɛ la. Yɛbahola yɛalua yɛ mbuluku ne mɔ mɔɔ Gyihova ahyehyɛdeɛ ne ɛyɛ la azo yɛayɛ nwolɛ neɛnleanu. (Mrɛ. 2:​3-6) Yɛbahola yɛayɛ asɔne kɛ Gyihova ɛhile yɛ adenle wɔ yɛ neɛnleanuyɛlɛ ne anu na ɔboa yɛ ɔmaa yɛnwu ye adwenle wɔ yɛ kpuya ne anwo. Akee yɛbakpondɛ Baebolo nu ngyinlazo nee edwɛkɛ mɔɔ ɔfale yɛ tɛnlabelɛ ne anwo la. Eza yɛbahola yɛazuzu bɛdabɛ mɔɔ bɛyiale tɛnlabelɛ zɔhane ala bie mɔɔ bɛ nwo edwɛkɛ wɔ Baebolo ne anu la anwo.

6. Kɛzi debiezukoalɛ ne mɔ boa yɛ maa yɛdi adwenle nu keseeyɛlɛ zo ɛ?

⁶ Eza “yɛte” kɛ Gyihova ɛlɛtendɛ ahile yɛ wɔ yɛ debiezukoalɛ ne mɔ abo. Saa yɛkɔ debiezukoalɛ dahuu a, bie a yɛbade edwɛkɛ bie wɔ ɛdendɛlɛ anzɛɛ mualɛ bie mɔɔ awie bamaa la anu na bie a yemɔ baboa yɛ yeamaa yɛali yɛ adwenle nu mɔɔ ɛyɛ yɛ kesee la azo. (Mrɛ. 27:17) Maa yɛzuzu kɛzi yɛbaye adwenle nu keseeyɛlɛ fɔɔnwo bie mɔ yɛavi yɛ ti anu la anwo.

SAA WƆ ADWENLE NU YƐ WƆ KESEE KƐ GYIHOVA ANYE DIE Ɛ NWO A

7. Kpuya boni a bie a yɛbabiza yɛ nwo a?

⁷ Asoo wɔbiza ɛ nwo ɛlɛ kɛ, ‘Asoo amgba Gyihova nwu me?’ Saa ɛte nganeɛ kɛ ɛ nwo ɛngyia a, ɛbanyia adwenle kɛ ɛnrɛhola ɛ nee aleɛabo amuala Bɔvolɛ ne ɛnrɛva agɔnwolɛ ɛlɛ. Bie a Belemgbunli Devidi nyianle adwenle zɔhane bie. Ɔzinle ɔ nwo kɛ Gyihova nwu alesama bɔbɔ la, na ɔbizale kɛ: “O Gyihova, dasanli le duzu mɔɔ ɔwɔ kɛ ɛmaa ɛ nye kɔ ɔ nwo a, sonla ra le duzu mɔɔ ɔwɔ kɛ ɛtie ye a?” (Edw. 144:3) Nienwu a ɛbanyia kpuya ɛhye anwo mualɛ a?

8. Kɛ mɔɔ 1 Samoɛle 16:​6, 7, 10-12 kile la, duzu a Gyihova nwu ye wɔ menli nwo a?

⁸ Yɛnwu ye wɔ Baebolo ne anu kɛ Gyihova nwu bɛdabɛ mɔɔ awie mɔ ɛmbu bɛ kɛ bɛ nwo hyia la. Kɛ neazo la, Gyihova zoanle Samoɛle  wɔ Gyɛsi sua nu ɛkɛ ne kɛ ɔhɔkpokpa ɔ mra mrenyia ne mɔ ko kɛ ɔbayɛ Yizilayɛ belemgbunli kenle bie. Gyɛsi vɛlɛle ɔ mra mrenyia mɔtwɛ ne anu nsuu rɛlɛle Samoɛle noko yeanvɛlɛ Devidi mɔɔ le bɛ nuhua kakula kpalɛ la. b Noko Devidi a Gyihova kpale ye a. (Kenga 1 Samoɛle 16:​6, 7, 10-12.) Gyihova nwunle sonla holɛ mɔɔ ɛnee Devidi de wɔ ye ahonle nu la—ɛnee ɔle kpavolɛ mɔɔ ɔkulo Gyihova kpalɛ.

9. Duzu ati a ɛbahola wɔalie wɔali kɛ Gyihova anye die ɛ nwo a? (Eza nea nvoninli ne.)

⁹ Dwenle kɛzi Gyihova ɛla ye ali ɛhile wɔ dɛba kɛ ɔnwu wɔ la anwo. Yebɔ wɔ ɛwɔkɛ kɛ ɔbadu wɔ folɛ kpalɛ wɔ tɛnlabelɛ fɔɔnwo mɔɔ ɛwɔ nu la anwo. (Edw. 32:8) Saa ɔnze wɔ kpalɛ a, kɛ ɔkɛyɛ na yeahola yeayɛ ye zɔ ɛ? (Edw. 139:1) Saa ɛfa Gyihova folɛdulɛ ne ɛdi gyima na ɛnwu kɛzi yeboa wɔ la a, ɛbahola wɔanyia anwodozo kɛ Gyihova anye die ɛ nwo. (1 Ek. 28:9; Gyi. 17:​26, 27) Gyihova nwu mɔdenle biala mɔɔ ɛbɔ la. Ɔnwu subane mgbalɛ mɔɔ wɔ wɔ nu la na ɔka ye ɔmaa ɔnyia ɛhulolɛ kɛ ɔbayɛ ɛ Gɔnwo. (Gyɛ. 17:10) Na saa ɛnyia ɛhulolɛ kɛ ɛbayɛ ɔ gɔnwo a, ɔ nye balie.—1 Dwɔn 4:19

SAA WƆ ADWENLE NU YƐ WƆ KESEE KƐ WƆANZI KPƆKƐ KPALƐ WƆ DƐBA NE A

10. Saa yɛdwenle kpɔkɛ mɔɔ yɛsisile ye dɛba la anwo a, kpuya boni mɔ a bie a yɛbabiza a?

¹⁰ Ɔyɛ a bie mɔ dwenle kpɔkɛ mɔɔ bɛsisile ye dɛba la anwo, na bɛngola bɛnnwu ye saa ɔle kpɔkɛzilɛ kpalɛ a. Bie a bɛzile kpɔkɛ kɛ bɛbagyakyi gyima kpalɛ bie mɔɔ ɔmaa bɛnyia ezukoa dɔɔnwo la amaa bɛava bɛ mekɛ dɔɔnwo bɛazonle Gyihova. Kɛkala mekɛ ɛgua nu,  ɔbayɛ kɛ ɛvolɛ dɔɔnwo bɔbɔ. Bie a bɛnwu bɛ gɔnwo mɔ mɔɔ bɛyɛle gyima mgbole na kɛkala ɔzɔho kɛ bɛnyia bɛ nwo kpalɛ la. Ɛhye ati bie a bɛbabiza bɛ nwo kɛ: ‘Asoo nvasoɛ wɔ afɔle ngakyile mɔɔ membɔle memaanle Gyihova la azo? Anzɛɛ bɛmaa nwolɛ adenle gyɛne mɔɔ anrɛɛ mebanyia la ɛkpa me ti?’

11. Duzu a gyegyele Edwɛne 73 kɛlɛvolɛ ne a?

¹¹ Saa kpuya zɔhane mɔ bie gyegye wɔ a, suzu kɛzi Edwɛne 73 kɛlɛvolɛ ne dele nganeɛ la anwo. Ɔnwunle menli mɔɔ bɛnzonle Gyihova noko bɛte kpɔkɛ, bɛnyia bɛ nwo yɛɛ ɔzɔho kɛ bɛnlɛ ngyegyelɛ biala la. (Edw. 73:​3-5, 12) Mekɛ mɔɔ ɔnwunle bɛ nee kɛzi bɛdi boɛ la, ɔdele nganeɛ kɛ nvasoɛ biala ɛnle mɔdenle mɔɔ ɔlɛbɔ yeazonle Gyihova la azo. Adwenle ɛhye ‘gyegyele ye dahuu.’ (Edw. 73:​13, 14) Kɛzi ɔlile ye ngyegyelɛ zɔhane anwo gyima ɛ?

12. Kɛ mɔɔ Edwɛne 73:​16-18 kile la, kɛzi kɛlɛvolɛ ne lile ye ngyegyelɛ ne anwo gyima ɛ?

¹² Kenga Edwɛne 73:​16-18. Edwɛndolɛnli ne hɔle Gyihova ɛzonlenlɛsua ne anu. Wɔ ɛkɛ ne, ɔholale ɔdwenlenle ninyɛne nwo kpalɛ. Ɔdele ɔ bo kɛ ɔwɔ nu kɛ menli bie mɔ lɛ asetɛnla kpalɛ mɔɔ anwodɔlɛ wɔ nu la ɛdeɛ, noko bɛnlɛ kenle bie nwo anyelazo biala. Mɔɔ ɔnwunle ɛhye la, ɔmaanle ɔ nzo nu dwole ye, ɔluakɛ ɛnee ɔze kɛ bɛdabɛ mɔɔ bɛkpa kɛ bɛbazonle Gyihova la ɛzi kpɔkɛ kpalɛ mɔɔ tɛla biala. Ɛhye ati ɔzile kpɔkɛ kyengye kɛ ɔbahɔ zo yeazonle Gyihova.—Edw. 73:​23-28.

13. Saa wɔ adwenle nu yɛ wɔ kesee wɔ kpɔkɛ mɔɔ ɛsisile ye dɛba la anwo a, kɛ ɔkɛyɛ na wɔanyia anzodwolɛ ɛ? (Eza nea nvoninli ne.)

¹³ Nyamenle Edwɛkɛ ne bahola aboa wɔ yeamaa wɔanyia anzodwolɛ zɛhae bie. Wɔ adenle boni azo? Dwenledwenle ninyɛne mgbalɛ mɔɔ ɛlɛ, mɔɔ bie a le anwonyia mɔɔ  ɛlɛ wɔ anwuma la anwo na fa toto mɔɔ bado bɛdabɛ mɔɔ ewiade ye anu ninyɛne ala a bɛlɛ la anwo. Bie a bɛbava bɛ nwo bɛado mɔɔ bɛbanyia ye ɛnɛ la ala azo ɔluakɛ bɛ nye ɛnla debie biala ade kenle bie. Noko wɔ wɔ afoa nu, Gyihova ɛbɔ wɔ ɛwɔkɛ kɛ ɔbayila wɔ ɛnɛ nee kenle bie. (Edw. 145:16) Eza suzu kpuya ɛhye anwo: Saa yɛsisile kpɔkɛ ngakyile a, asoo anrɛɛ yɛze kɛzi yɛ ɛbɛlabɔlɛ ɛwie yɛ kɛkala la ɔ? Noko yɛze wienyi kɛ: Bɛdabɛ mɔɔ bɛ kpɔkɛzilɛ gyi Nyamenle nee bɛ gɔnwo mɔ anwo ɛlɔlɛ zo la, debie kpalɛ biala ɛngyia bɛ.

SAA WƆ ADWENLE NU YƐ WƆ KESEE KƐ SAA Ɛ NWO TƐKYIA GYIHOVA A

14. Duzu ati a bie mɔ ɛnlɛ anwodozo a, na kpuya boni a bie a bɛbiza bɛ nwo a?

¹⁴ Gyihova azonvolɛ bie mɔɔ ɛyɛ mrelera, bɛnde kpɔkɛ kpalɛ anzɛɛ bɛli dɛne bie. Yemɔ bahola amaa bɛade nganeɛ kɛ wɔ Gyihova anye zo bɛ nwo ɛngyia. Bie a bɛbabiza kɛ, ‘Asoo me nwo tɛkyia Gyihova?’

15. Anwodozo boni a Edwɛne 71 kɛlɛvolɛ ne nyianle a?

¹⁵ Ɛnee Edwɛne 71 kɛlɛvolɛ ne lɛ ngyegyelɛ zɔhane bie. Ɔyɛle asɔne kɛ: “Saa me anwosesebɛ wie a, mmakpo me.” (Edw. 71:​9, 18) Noko edwɛndolɛnli ne nyianle anwodozo dahuu kɛ, saa ɔsonle Gyihova nɔhalɛ nu a, ɔbahile ye adenle na yeagyinla ɔ nzi. Kɛ mɔɔ edwɛndolɛnli ne nwunle ye la, Gyihova anye die bɛdabɛ mɔɔ bɛyɛ biala mɔɔ bɛbahola la bɛsonle Ye ɔnva nwo bɛ sinlidɔlɛ ne mɔ la.—Edw. 37:​23-25.

16. Kɛzi mgbanyinli anwo hyia Gyihova ɛ? (Edwɛne 92:​12-15)

¹⁶ Mediema mgbanyinli, bɛnwu bɛ nwo kɛ mɔ Gyihova nwu bɛ la. Bɛnlɛ anwosesebɛ dɔɔnwo bɔbɔ ɛdeɛ, noko ɔbahola yeaboa bɛ yeamaa bɛanyia anyuhɔlɛ wɔ sunsum nu. (Kenga Edwɛne 92:​12-15.) Bɛmmafa bɛ adwenle bɛsie ninyɛne mɔɔ bɛngola bɛnyɛ ye  bieko la azo, emomu bɛva bɛzie mɔɔ bɛkola ye yɛ la azo. Kɛ neazo la, bɛbahola bɛalua bɛ neazo kpalɛ nee menli nwo anyelielɛ mɔɔ bɛbahile la azo bɛamaa awie mɔ anwosesebɛ. Bɛbahola bɛaha kɛzi Gyihova ɛboa bɛ wɔ ɛvolɛ dɔɔnwo anu nee kɛzi bɛ nye la kɛ ye ɛwɔkɛ ne mɔ bara nu kenle bie la anwo edwɛkɛ bɛahile awie mɔ. Eza bɛmmabu kɛzi bɛ asɔneyɛlɛ baboa awie mɔ la debie ekyi. (1 Pita 3:12) Ɔnva nwo tɛnlabelɛ biala mɔɔ yɛwɔ nu la, yɛ muala yɛbahola yɛayɛ debie yɛamaa Gyihova nee awie mɔ.

17. Duzu ati a ɔnle kɛ yɛfa yɛ nwo yɛtoto awie mɔ anwo ɛ?

¹⁷ Saa wɔ adwenle ɛdu ɛfonyia ɔluakɛ ɛngola ɛnyɛ dɔɔnwo wɔ Gyihova ɛzonlenlɛ nu a, nyia anwodozo kɛ ɔ nye sɔ biala mɔɔ ɛkola ɛyɛ la. Bie a ɛbabɔ mɔdenle kɛ ɛfa mɔɔ ɛkola ɛyɛ la wɔatoto mɔɔ awie mɔ kola yɛ la anwo. Noko mmayɛ zɔ ɛlɛ! Duzu ati ɔ? Ɔluakɛ Gyihova ɛnyɛ ye zɔ. (Gal. 6:4) Kɛ neazo la, Mɛle vale nwole evuanlɛ bie hyɛle Gyisɛse. (Dwɔn 12:​3-5) Noko kunlavolɛ raalɛ ehyianli ne vale ngapɛlɛ nwiɔ mɔɔ ɔnzonle bolɛ kpole biala la yele ndoboa wɔ ɛzonlenlɛsua ne anu. (Luku 21:​1-4) Noko akee Gyisɛse nwunle mraalɛ nwiɔ ne anu biala kɛ ɔlɛ diedi. Zɔhane ala a ɔ Ze Gyihova bu debie biala mɔɔ diedi nee ɔ nwo ɛlɔlɛ ti ɛyɛ la kɛ ɔsonle bolɛ a, ɔnva nwo kɛzi ɛsuzu kɛ ɔle ekyi la.

18. Duzu a baboa yɛ yeamaa yɛali adwenle nu keseeyɛlɛ zo a? (Eza nea ɛlɛka, “ Baebolo Ne Baboa Wɔ Yeamaa Wɔali Adwenle Nu Keseeyɛlɛ Zo.”)

¹⁸ Ɔyɛ a yɛ muala yɛ adwenle nu yɛ yɛ kesee. Noko kɛ mɔɔ yɛnwu ye la, Nyamenle Edwɛkɛ ne mɔɔ le nɔhalɛ la, Baebolo ne, bahola aboa yɛ yeamaa yɛaho yɛatia adwenle nu keseeyɛlɛ. Ɔti bɔ mɔdenle ye adwenle nu keseeyɛlɛ fi ɛ ti anu, nyia anwodozo na mmasulo. Gyihova nwu ɛdawɔ mumua ne. Ɔ nye sɔ ninyɛne mɔɔ ɛfa ɛbɔ afɔle la na ɔbamaa wɔ ahatualɛ. Nyia anwodozo kɛ Gyihova bu ye azonvolɛ nɔhavoma kɔsɔɔti kɛ bɛsonle bolɛ yɛɛ ɔkulo bɛ.