EDWƐKƐ 42
EDWƐNE 103 Neavolɛma Le Ahyɛlɛdeɛ
Kile Kɛ Ɛ Nye Sɔ ‘Menli Mɔɔ Bɛva Bɛ Bɛmaa Kɛ Ahyɛlɛdeɛ’ La
“Mekɛ mɔɔ ɔvole ɔhɔle anwuma la . . . , ɔvale menli ɔmaanle kɛ ahyɛlɛdeɛ.”—ƐFƐ. 4:8.
BODANE
Kɛzi asafo nu azonvolɛ, mgbanyima nee maangyebakyi zo neavolɛma boa yɛ, nee kɛzi yɛbahola yɛahile mɔɔ mrenyia nɔhavoma ɛhye mɔ yɛ la anwo anyezɔlɛ la.
1. Ahyɛlɛdeɛ mɔɔ yɛnyia yɛvi Gyisɛse ɛkɛ la bie mɔ a le boni?
SONLA dasanli biala ɛnle ɛkɛ mɔɔ ɔle atiakunlukɛnlɛma ɔtɛla Gyisɛse a. Mɔɔ ɔwɔ azɛlɛ ye azo la, ɔvile ye ɛhulolɛ nu ɔyɛle nwanwane ninyɛne ɔboale awie mɔ. (Luku 9:12-17) Ahyɛlɛdeɛ mɔɔ tɛla biala mɔɔ ɔvale ɔmaanle la a le ye ngoane ne mɔɔ ɔvale ɔbɔle afɔle ɔmaanle yɛ la. (Dwɔn 15:13) Ɔvi mekɛ mɔɔ bɛdwazole Gyisɛse la, yehɔ zo yela atiakunlukɛnlɛma ali. Ɔbɔle ɛwɔkɛ kɛ ɔbazɛlɛ Gyihova yeamaa yeava ye sunsum nwuanzanwuanza ne yeamaa yɛ amaa yeahilehile yɛ na yeakyekye yɛ rɛle, na amgba ɔyɛle ye zɔ. (Dwɔn 14:16, 17, ɔbdw.; 16:13) Eza Gyisɛse dua yɛ asafo debiezukoalɛ ne mɔ azo boa yɛ amaa yɛahola yɛayɛ menli ɛdoavolɛma wɔ azɛlɛ ye azo amuala.—Mat. 28:18-20.
2. ‘Menli mɔɔ bɛva bɛ bɛmaa kɛ ahyɛlɛdeɛ’ mɔɔ bɛha bɛ nwo edwɛkɛ wɔ Ɛfɛsɛsema 4:7, 8 la bie mɔ a le nwane mɔ?
2 Eza Gyisɛse ɛmaa yɛ ahyɛlɛdeɛ bieko. Ɛzoanvolɛ Pɔɔlo hɛlɛle kɛ, mekɛ mɔɔ Gyisɛse vole hɔle anwuma la, “ɔvale menli ɔmaanle kɛ ahyɛlɛdeɛ.” (Kenga Ɛfɛsɛsema 4:7, 8.) Pɔɔlo hilehilele nu kɛ Gyisɛse vale ahyɛlɛdeɛ ɛhye mɔ maanle amaa bɛaboa asafo ne wɔ ndenle ngakyile zo. (Ɛfɛ. 1:22, 23; 4:11-13) Ɛnɛ, ‘menli mɔɔ bɛva bɛ bɛmaa kɛ ahyɛlɛdeɛ’ la bie mɔ a le asafo nu azonvolɛ, mgbanyima nee maangyebakyi zo neavolɛma. a Nɔhalɛ nu, mrenyia ɛhye mɔ ɛnli munli ɔti bɛyɛ nvonleɛ. (Gye. 3:2) Noko yɛ Awulae Gyisɛse Kelaese dua bɛ nwo zo boa yɛ; bɛle ahyɛlɛdeɛ mɔɔ yeva yemaa yɛ a.
3. Yɛ ndonwo fa kile kɛzi yɛ muala yɛbahola yɛaboa gyima mɔɔ ‘menli mɔɔ bɛva bɛ bɛmaa kɛ ahyɛlɛdeɛ’ yɛ la anu.
3 Gyima mɔɔ Gyisɛse ɛva ɛmaa mrenyia ɛhye mɔ mɔɔ ɔvale “ɔmaanle kɛ ahyɛlɛdeɛ” la a le kɛ bɛbamaa asafo ne anwo ayɛ se. (Ɛfɛ. 4:12) Noko yɛdayɛ mɔɔ yɛha la bahola aboa bɛ yɛamaa bɛayɛ bɛ gyima ɛhye mɔɔ hyia la. Maa yɛyɛ ndonwo bie: Fa ye kɛ bɛlɛsi Belemgbunlililɛ Asalo bie la, yɛ nuhua bie mɔ boka nwo a bɛzile a. Noko awie mɔ gyɛne yɛle aleɛ, adendulɛ nee ninyɛne gyɛne nwo ngyehyɛleɛ vale boale gyima ne. Zɔhane ala a yɛ muala yɛbahola yɛalua mɔɔ yɛka nee mɔɔ yɛyɛ la azo yɛaboa mɔdenle mɔɔ asafo nu azonvolɛ, mgbanyima nee maangyebakyi zo neavolɛma ɛlɛbɔ la a. Maa yɛzuzu kɛzi yɛnyia gyima ɛsesebɛ mɔɔ bɛyɛ la azo nvasoɛ la anwo na yɛnlea kɛzi yɛbamaa bɛ nee Gyisɛse, mɔɔ vale “ahyɛlɛdeɛ” ɛhye mɔ maanle yɛ la anwu kɛ yɛ nye sɔ mɔɔ bɛyɛ la.
ASAFO NU AZONVOLƐ ‘BOA AWIE MƆ’
4. Ninyɛne mɔɔ asafo nu azonvolɛ yɛle ‘boale awie mɔ’ wɔ alimoa Kilisienema mekɛ zo la bie mɔ a le boni?
4 Wɔ alimoa Kilisienema mekɛ zo, bɛkpale mediema mrenyia bie mɔ kɛ asafo nu azonvolɛ. (1 Tim. 3:8) Ɔzɔho kɛ bɛdabɛ a Pɔɔlo hɛlɛle bɛ nwo edwɛkɛ kɛ ɛnee “bɛboa awie mɔ” la. (1 Kɔl. 12:28) Ɔti ɔbayɛ kɛ ɛnee asafo nu azonvolɛ yɛ gyima ngakyile mɔɔ hyia la amaa asafo nu mgbanyima ne mɔ ahola ava bɛ adwenle azie ngilehilelɛ nee mboanekpɔlalɛ gyima ne azo. Kɛ neazo la, bie a asafo nu azonvolɛ boale maanle bɛnleanle Ngɛlɛlera mɔɔ wɔ ɛkɛ la azo bɛhɛlɛle bie bɛdole ɛkɛ anzɛɛ bɛboale bɛmaanle bɛtotɔle ninyɛne mɔɔ bɛbahyia nwo bɛahɛlɛ bie la.
5. Ninyɛne mɔɔ azonvolɛ yɛ boa awie mɔ ɛnɛ la bie mɔ a le boni?
5 Suzu ninyɛne mɔɔ asafo nu azonvolɛ yɛ boa awie mɔ wɔ wɔ asafo ne anu la anwo. (1 Pita 4:10) Bie a bɛbamaa bɛ gyima kɛ bɛnlea asafo ne ezukoa anzɛɛ azɛlɛsinli ne mɔ azo, bɛhɛla mbuluku na bɛva bɛmaa nolobɔlɛma ne, bɛnlea vidio nee edwɛnebɔlɛ milahyinli ne azo, bɛlie nyɛvolɛ anzɛɛ bɛboa bɛmaa bɛziezie ninyɛne mɔɔ ɛlɛsɛkye wɔ Belemgbunlililɛ Asalo ɛkɛ ne la. Ɛhye mɔ amuala boa maa ninyɛne kɔ zo pɛpɛɛpɛ wɔ asafo ne anu. (1 Kɔl. 14:40) Eza azonvolɛ bie mɔ yɛ Yɛ Ɛbɛlabɔlɛ Nee Yɛ Ɛzonlenlɛ Nyianu ne anu gyimalilɛ ne mɔ bie na bɛmaa bagua nu ɛdendɛlɛ. Bɛkola bɛkpa sonvolɛ bie kɛ ɔboa ekpunli zo neavolɛ ne. Ɔyɛ a asafo nu azonvolɛ mɔɔ fɛta la nee mgbanyima ne mɔ kɔyɛ mboanekpɔlalɛ gyima ne bie.
6. Duzu ati a yɛ nye sɔ yɛ asafo nu azonvolɛ mɔɔ bɛyɛ gyima ɛsesebɛ la ɛ?
6 Kɛzi asafo nu azonvolɛ gyima ne boa asafo ne ɛ? Adiema raalɛ Beberly b mɔɔ wɔ Bolivia la hanle kɛ: “Ɔlua azonvolɛ ne mɔ ati, mekola menyia debiezukoalɛ ne mɔ azo nvasoɛ bɔkɔɔ. Ɔlua bɛ gyima ne ati, mekola meto edwɛne, memaa mualɛ, na mesukoa debie mefi vidio nee nvoninli ne mɔ anu. Bɛnea kɛ yɛba debiezukoalɛ a yɛbanyia banebɔlɛ yɛɛ bɛboa bɛdabɛ mɔɔ bɛdua videoconference zo bɛtie debiezukoalɛ ne la. Yɛkpɔne debiezukoalɛ a, bɛboa bɛmaa yɛsiezie Belemgbunlililɛ Asalo ɛkɛ, bɛyeye asafo ne ezukoa na bɛbu nwolɛ mgbonda, yɛɛ bɛnea kɛ yɛlɛ mbuluku mɔɔ yɛbahyia nwolɛ la. Ɔyɛ me fɛ kɛ bɛwɔ ɛkɛ ne la!” Leslie mɔɔ de Colombia na ɔ hu le asafo nu kpanyinli la hanle kɛ: “Me hu hyia azonvolɛ ne mɔ moalɛ amaa yeahola yeayɛ ye gyimalilɛ ngakyile ne mɔ. Saa bɛnle nu a, anrɛɛ ye gyima bazo kpalɛ, ɔti me nye sɔ bɛ mɔdenlebɔlɛ nee ɛhulolɛ mɔɔ bɛlɛ kɛ bɛbaboa la.” Zɔhane ala a yɛze kɛ ɛdawɔ noko ɛte nganeɛ a.—1 Tim. 3:13.
7. Kɛ ɔkɛyɛ na yɛahile kɛ yɛ nye sɔ asafo nu azonvolɛ ne mɔ ɛ? (Eza nea nvoninli ne.)
7 Bie a yɛbade nganeɛ kɛ yɛ nye sɔ gyima mɔɔ asafo nu azonvolɛ yɛ la ɛdeɛ, noko Baebolo ne maa yɛ anwosesebɛ kɛ: “Bɛhile anyezɔlɛ.” (Kɔl. 3:15) Krzysztof, asafo nu kpanyinli bie mɔɔ wɔ Finland la lale ye anyezɔlɛ ne ali zɛhae, “Mekɛlɛ ngɛlɛlera bie nee adenle fɔɔnwo mɔɔ asafo nu sonvolɛ ne luale zo maanle me anwosesebɛ anzɛɛ deɛmɔti me nye sɔ gyima mɔɔ ɔyɛ la wɔ kaade zo anzɛɛ tɛkese mɛsegye nu menwa ye.” Pascal nee Jael mɔɔ de New Caledonia la ta yɛ asɔne maa azonvolɛ ne mɔ. Pascal hanle kɛ, “Kenlensa ye, yɛ nzɛlɛlɛ, modolɛ nee moyɛlɛ asɔneyɛlɛ ne mɔ fale mediema mrenyia ɛhye mɔ mɔɔ bɛkpa bɛ wɔ asafo ne anu la anwo.” Gyihova tie asɔneyɛlɛ zɛhae mɔ yɛɛ asafo ne amuala nyia zolɛ nvasoɛ.—2 Kɔl. 1:11.
ASAFO NU MGBANYIMA ƐLƐYƐ “GYIMA ƐSESEBƐ WƆ BƐ AVINLI”
8. Duzu a maanle Pɔɔlo hɛlɛle kɛ ɛnee alimoa Kilisienema asafo ne anu mgbanyima ne mɔ ɛlɛyɛ “gyima ɛsesebɛ” a? (1 Tɛsalonaekama 5:12, 13)
8 Mgbanyima mɔɔ ɛnee wɔ alimoa Kilisienema asafo ne anu la yɛle gyima ɛsesebɛ boale asafo ne. (Kenga 1 Tɛsalonaekama 5:12, 13; 1 Tim. 5:17) Ɛnee “bɛnea” asafo ne azo—bɛyɛ debiezukoalɛ ngakyile na bɛbɔ nu kɛ mgbanyima eku la bɛsisi kpɔkɛ. Ɛnee bɛtu bɛ mediema mrenyia nee mraalɛ folɛ—bɛfi ɛlɔlɛ nu bɛfa folɛdulɛ fɔɔnwo bɛmaa amaa bɛabɔ asafo ne anwo bane. (1 Tɛs. 5:12, 13; 1 Tim. 5:17) Ɛnee eza mrenyia ɛhye mɔ yɛ gyima ɛsesebɛ amaa bɛanlea bɛ mbusua na bɛamia bɛ nee Gyihova agɔnwolɛvalɛ ne anu.—1 Tim. 3:2, 4; Tae. 1:6-9.
9. Gyima mɔɔ asafo nu mgbanyima yɛ ye ɛnɛ la bie mɔ a le boni?
9 Ɛnɛ, mgbanyima ne mɔ ɛnlɛ alagye fee. Bɛle edwɛkpakavolɛma. (2 Tim. 4:5) Bɛbɔ mɔdenle bɛdimoa ɛzonlenlɛ gyima ne anyunlu, bɛyɛ edwɛkɛhanlɛ gyima ne wɔ bɛ azɛlɛsinli ne anu anwo ngyehyɛleɛ na bɛtete yɛ bɛmaa yɛnwu edwɛkɛhanlɛ nee ngilehilelɛ gyima ne anye zo. Eza bɛsonle kɛ ndɛnebuavolɛma mɔɔ se anwunvɔne mɔɔ bɛnnea sonla nyunlu a. Saa Kilisienenli bie yɛ ɛtane kpole a, asafo nu mgbanyima ne mɔ bɔ mɔdenle kɛ bɛbaboa ye bɛamaa yeaziezie ɔ nee Gyihova avinli. Noko eza bɛnea boɛ kɛ bɛbamaa asafo ne anwo ade. (1 Kɔl. 5:12, 13; Gal. 6:1) Mɔɔ hyia kpalɛ la, bɛze mgbanyima kɛ bɛle mboaneneavolɛma. (1 Pita 5:1-3) Bɛmaa ɛdendɛlɛ mɔɔ bɛgyinla Baebolo ne azo bɛziezie ye kpalɛ la, bɛbɔ mɔdenle kɛ bɛbanwu awie biala mɔɔ wɔ asafo ne anu la na bɛkpɔlɔkpɔla mediema ne mɔ. Asafo nu mgbanyima bie mɔ boa wɔ Belemgbunlililɛ Asalo ɛsisilɛ nee bɛ boɛyɛlɛ nu, nyianu ngyehyɛleɛ ɛyɛlɛ nu, Asopiti Ngitanwolilɛ Kɔmatii nee Wuliravolɛ Ɛkpɔlalɛ Eku gyima ne anu yɛɛ gyimalilɛ gyɛne nu. Mgbanyima ne mɔ yɛ gyima ɛsesebɛ boa yɛ!
10. Deɛmɔti yɛ nye sɔ yɛ asafo nu mgbanyima mɔɔ yɛ gyima ɛsesebɛ la bie mɔ a le boni?
10 Gyihova hanle dole ɛkɛ ne kɛ mboaneneavolɛma banlea yɛ kpalɛ na ‘yɛnrɛzulo bieko anzɛɛ yɛ ahonle ɛnrɛdu.’ (Gyɛ. 23:4) Adiema raalɛ Johanna mɔɔ wɔ Finland la nwunle kɛ edwɛkɛ ɛhye le nɔhalɛ wɔ mekɛ mɔɔ ye mame anwo dole ye kpole bie la. Ɔhanle kɛ: “Ɛnee ɔyɛ se kɛ mebaha kɛzi mete nganeɛ la anwo edwɛkɛ meahile awie mɔ ɛdeɛ, noko asafo nu kpanyinli bie mɔɔ menze ye kpalɛ la nyianle me nwo abotane, ɔ nee me yɛle asɔne na ɔmaanle menwunle kɛ Gyihova kulo me. Mengakye edwɛkɛ mɔɔ ɔhanle la pɛpɛɛpɛ ɛdeɛ, noko mekakye kɛ ɔmaanle ɛzulolɛ vile me nu. Medie medi kɛ Gyihova a zoanle ye maanle ɔraboale me wɔ mekɛ kpalɛ nu a.” Kɛzi wɔ asafo nu mgbanyima ɛboa wɔ ɛ?
11. Kɛ ɔkɛyɛ na yɛahile mgbanyima ne mɔ anwo anyezɔlɛ ɛ? (Eza nea nvoninli ne.)
11 Gyihova kulo kɛ yɛfi yɛ ahonle muala anu yɛkile mgbanyima ne mɔ anwo anyezɔlɛ “ɔlua bɛ gyima ne mɔɔ bɛyɛ la ati.” (1 Tɛs. 5:12, 13) Henrietta mɔɔ ɔdaye noko ɔde Finland la hanle kɛ: “Mgbanyima fi bɛ ɛhulolɛ nu boa awie mɔ, noko yemɔ ɛngile kɛ bɛlɛ mekɛ nee anwosesebɛ dɔɔnwo anzɛɛ bɛnlɛ ngyegyelɛ biala wɔ bɛ ɛbɛlabɔlɛ nu. Ɔyɛ a meka mekile bɛ kɛ: ‘Ɛze debie ɔ? Ɛle asafo nu kpanyinli mɔɔ bɔ mɔdenle. Me kunlu anu a anrɛɛ ɛze ye zɔ.’” Adiema raalɛ bie mɔɔ wɔ Türkiye c mɔɔ bɛfɛlɛ ye Sera la hanle kɛ: “Mgbanyima hyia anwosesebɛmaanlɛ amaa bɛahola bɛahɔ zo bɛyɛ bɛ gyima ne. Ɔti yɛbahola yɛahɛlɛ edwɛkɛ wɔ kaade zo yɛamaa bɛ, yɛavɛlɛ bɛ wɔ yɛ sua nu yɛamaa bɛarali debie anzɛɛ yɛ nee bɛ abɔ nu ahɔ daselɛlilɛ.” Ɛze asafo nu kpanyinli bie mɔɔ ɛ nye die ye mɔdenlebɔlɛ ne anwo kpalɛ la ɔ? Kpondɛ ndenle dua zo ka kɛzi ɛ nye sɔ gyima mɔɔ ɔyɛ la anwo edwɛkɛ kile ye.—1 Kɔl. 16:18.
Ɛbahola wɔamaa mediema mrenyia mɔɔ bɛkpa bɛ la anwosesebɛ amaa bɛahɔ zo bɛayɛ bɛ gyima ne (Nea ɛdendɛkpunli 7, 11, 15)
MAANGYEBAKYI ZO NEAVOLƐMA MAA YƐ NWO YƐ SE
12. Ngyehyɛleɛ boni a maanle alimoa Kilisienema asafo ne mɔ anwo yɛle se a? (1 Tɛsalonaekama 2:7, 8)
12 Kelaese Gyisɛse vale mrenyia mɔɔ sonle wɔ adenle gyɛne zo la maanle asafo ne “kɛ ahyɛlɛdeɛ.” Gyisɛse hilele mgbanyima mɔɔ wɔ Gyɛlusalɛm la adenle ɔmaanle bɛzoanle Pɔɔlo, Baanabase nee mrenyia gyɛne kɛ neavolɛ adenduvoma. (Gyi. 11:22) Duzu ati ɔ? Bɛkayɛ gyima mɔɔ asafo nu azonvolɛ nee mgbanyima yɛ la ala bie: bɛkamaa asafo ne mɔ anwo ayɛ se. (Gyi. 15:40, 41) Mrenyia ɛhye mɔ vale asetɛnla kpalɛ mɔɔ bɛlɛ la bɔle afɔle na bɔbɔ bɛvale bɛ ngoane bɛdonle esiane nu amaa bɛahɔhilehile awie mɔ na bɛamaa bɛ anwosesebɛ.—Kenga 1 Tɛsalonaekama 2:7, 8.
13. Gyima mɔɔ maangyebakyi zo neavolɛma ne yɛ la bie mɔ a le boni?
13 Maangyebakyi zo neavolɛma ta tudu adenle. Bie mɔ vi asafo ko anu ɛlɛkɔ fofolɛ nu a bɛpɛ adenle tendenle kpalɛ, bie a kilomita ɛya dɔɔnwo. Dapɛne biala, maangyebakyi zo neavolɛ bie maa ɛdendɛlɛ ngakyile, ɔkɔkpɔlɔkpɔla mediema, na ɔyɛ adekpakyelɛma, mgbanyima nee daselɛlilɛ ayia ngakyile. Ɔsiezie ɛdendɛlɛ ngakyile na ɔyɛ maangyebakyi nee maanzinli nyianu nwo ngyehyɛleɛ. Ɔkilehile wɔ adekpakyelɛma sukulu nu, ɔyɛ ayia nwo ngyehyɛleɛ ɔmaa adekpakyelɛma mɔɔ wɔ maangyebakyi ne anu la, yɛɛ ɔdi gyimalilɛ gyɛne mɔɔ Bɛtɛle fa ye kɛ ɔyɛ la anwo gyima, bie bɔbɔ a deɛ ne hyia ndɛndɛ.
14. Deɛmɔti yɛ nye sɔ yɛ maangyebakyi zo neavolɛma ne mɔɔ yɛ gyima ɛsesebɛ la bie mɔ a le boni?
14 Kɛzi asafo ne mɔ nyia maangyebakyi zo neavolɛma gyima ne azo nvasoɛ ɛ? Adiema bie mɔɔ wɔ Türkiye la hanle neavolɛ adenduvoma ɛkpɔlalɛ ne anwo edwɛkɛ kɛ: “Mekɛ biala mɔɔ bɛbarakpɔla yɛ la, ɔboa me ɔmaa menwu kɛ ɔwɔ kɛ mefa mekɛ dɔɔnwo meboa me mediema mrenyia nee mraalɛ. Meyia maangyebakyi zo neavolɛma dɔɔnwo; noko bɛ nuhua biala subane ɛngile kɛ menrɛhola me nee ye ɛnrɛdendɛ anzɛɛ ɛtɛmaanle metɛtele nganeɛ kɛ ɔnlɛ alagye fee.” Johanna mɔɔ yɛlimoa yɛha ɔ nwo edwɛkɛ la nee maangyebakyi zo neavolɛ bie hɔle daselɛlilɛ noko bɛangɔndo awie biala wɔ sua nu. Johanna hanle kɛ, “Noko akee me rɛle ɛnrɛvi kenle zɔhane ɛlɛ. Ɛnee ɔtɛkyɛle biala yɛɛ me mediema mraalɛ nwiɔ ne dule vile ɛleka mɔɔ yɛde la a, ɔti ɛnee me nwo dɔ bɛ. Maangyebakyi zo neavolɛ ne maanle me anwosesebɛ na ɔboale me ɔmaanle menwunle kɛ ɛnɛ mɔɔ yɛnrɛhola yɛnrɛdɛnla yɛnrɛbikye yɛ mbusuafoɔ nee yɛ gɔnwo mɔ dahuu noko wɔ ewiade fofolɛ ne anu, yɛbanyia nwolɛ adenle dahuu yɛ nee bɛ abɔ nu ayɛ ninyɛne.” Yɛ nuhua dɔɔnwo ɛnyia anwubielɛ zɛhae bie wɔ yɛ maangyebakyi zo neavolɛma ne anwo.—Gyi. 20:37–21:1.
15. (a) Kɛ mɔɔ 3 Dwɔn 5-8 kile la, kɛ ɔkɛyɛ na yɛahile kɛ yɛ nye sɔ maangyebakyi zo neavolɛma ne gyima ne ɛ? (Eza nea nvoninli ne.) (b) Duzu ati a ɔwɔ kɛ yɛkile anyezɔlɛ yɛmaa mrenyia mɔɔ bɛkpa bɛ la aye mɔ a, na kɛ ɔkɛyɛ na yɛahola yɛayɛ zɔ ɛ? (Nea ɛlɛka, “ Bɛhakye Bɛ Ye Mɔ.”)
15 Ɛzoanvolɛ Dwɔn maanle Geeyɛse anwosesebɛ kɛ ɔlie mediema mɔɔ bakpɔla asafo ne la kɛnlɛma na ɔgyakyi “bɛ adenle kɛ mɔɔ ɔkɛzɔ Nyamenle anye la.” (Kenga 3 Dwɔn 5-8.) Adenle ko mɔɔ yɛbahola yɛalua zo yɛayɛ zɔ la a le kɛ yɛbado ɛsalɛ yɛavɛlɛ maangyebakyi zo neavolɛ ne wɔ yɛ sua nu yɛamaa yearali debie. Adenle bieko a le kɛ yɛbava yɛ nwo yɛawula daselɛlilɛ ngyehyɛleɛ mɔɔ ɔbayɛ yeamaa dapɛne ne mɔɔ ɔbara la anu. Leslie mɔɔ yɛlimoa yɛha ɔ nwo edwɛkɛ la dua ndenle gyɛne zo da ye anyezɔlɛ ne ali. Ɔhanle kɛ: “Meyɛ asɔne kɛ Gyihova ɛmaa bɛ sa ɛha mɔɔ bɛhyia nwo la. Me nee me hu noko kɛlɛ ngɛlata kɔmaa bɛ, na yɛka kɛzi bɛ ɛkpɔlalɛ ne mɔ boa yɛ la yɛkile bɛ.” Kakye kɛ maangyebakyi zo neavolɛma noko yia tɛnlabelɛ mɔɔ anu yɛ se. Ɔdwu mekɛ ne bie a bɛ nwo to bɛ, adwenleadwenle tɔ bɛ nwo yɛɛ bɛ sa nu kola to bɔbɔ. Bie a wɔ edwɛkɛ kɛnlɛma anzɛɛ ahyɛlɛdeɛ ekyi mɔɔ ɛbava wɔamaa wɔ maangyebakyi zo neavolɛ ne la bayɛ ye asɔneyɛlɛ ne anwo mualɛ!—Mrɛ. 12:25.
YƐHYIA ‘MENLI MƆƆ BƐVA BƐ BƐMAA KƐ AHYƐLƐDEƐ’ LA ANWO
16. Kɛ mɔɔ edwɛkɛ mɔɔ wɔ Mrɛlɛbulɛ 3:27 kile la, kpuya boni mɔ a mediema mrenyia bahola abiza bɛ nwo a?
16 Yɛhyia mediema mrenyia dɔɔnwo mɔɔ bɛbazonle asafo ne mɔ “kɛ ahyɛlɛdeɛ” la anwo wɔ ewiade amuala. Saa ɛle adiema nrenyia mɔɔ bɛzɔne wɔ a, “ɛlɛ tumi ɛkola ɛboa” ɔ? (Kenga Mrɛlɛbulɛ 3:27.) Ɛlɛ ɛhulolɛ kɛ ɛbabɔ mɔdenle amaa wɔahola wɔayɛ asafo nu sonvolɛ ɔ? Saa ɛle asafo nu sonvolɛ a, ɛlɛbɔ mɔdenle kɛ ɛbafɛta kɛ asafo nu kpanyinli ɔ? d Ɛbahola wɔayɛ nzenzaleɛ wɔ wɔ ɛbɛlabɔlɛ nu amaa wɔahola wɔahɔ Belemgbunlililɛ Edwɛkpakavolɛma Sukulu ne bie ɔ? Sukulu zɔhane batete wɔ kpalɛ amaa Gyisɛse ava wɔ ali gyima kpalɛ. Saa ɛte nganeɛ kɛ ɛnrɛhola ɛnrɛyɛ ninyɛne ɛhye mɔ bie a, ka kile Gyihova wɔ asɔneyɛlɛ nu. Sɛlɛ ye kɛ ɔva ye sunsum nwuanzanwuanza ne ɔboa wɔ ɔmaa ɛhola ɛyɛ gyimalilɛ biala mɔɔ bɛbava bɛamaa wɔ la kpalɛ.—Luku 11:13; Gyi. 20:28.
17. Duzu a mrenyia mɔɔ ‘bɛva bɛ bɛmaa kɛ ahyɛlɛdeɛ’ la maa yɛnwu ye wɔ yɛ Belemgbunli, Kelaese Gyisɛse anwo a?
17 Mediema mrenyia mɔɔ Gyisɛse ɛva bɛ ‘ɛmaa kɛ ahyɛlɛdeɛ’ la di daselɛ kɛ ɔlɛkile yɛ adenle wɔ awieleɛ mekɛ ɛhye anu. (Mat. 28:20) Asoo ɔnyɛ wɔ fɛ kɛ yɛlɛ Belemgbunli mɔɔ lɛ ɛlɔlɛ, ɔyɛ nyele na ɔ nye wɔ yɛ nwo na eza ɔmaa yɛ mediema mrenyia mɔɔ fɛta la ɔmaa bɛnea yɛ la ɔ? Ɔti kpondɛ nwolɛ adenle dua zo da kɛzi ɛ nye sɔ mrenyia ɛhye mɔ mɔɔ yɛ gyima ɛsesebɛ la ali. Na mmamaa ɛ rɛle fi kɛ ɛbayɛ Gyihova mɔɔ ɔdaye a ɔmaa yɛ sa ka “ahyɛlɛdeɛ kpalɛ biala nee ɛlolɛdeɛ biala mɔɔ di munli la” mo.—Gye. 1:17.
EDWƐNE 99 Mediema Mgbe Dɔɔnwo
a Mgbanyima mɔɔ sonle kɛ Neazo Eku ne anu amra, Neazo Eku ne boavolɛma, Ɔfese Kɔmatii ne anu amra yɛɛ bɛdabɛ mɔɔ bɛyɛ gyimalilɛ ngakyile la noko boka ‘menli mɔɔ bɛva bɛ bɛmaa kɛ ahyɛlɛdeɛ’ la anwo.
b Bɛhakyi aluma bie mɔ.
c Dɛba ne ɛnee bɛfɛlɛ ye Turkey.
d Saa ɛkpondɛ kɛzi ɛbahola wɔafɛta kɛ asafo nu sonvolɛ anzɛɛ asafo nu kpanyinli la anwo edwɛkɛ dɔɔnwo a, nea edwɛkɛ ɛhye mɔ, “Mediema Mrenyia—Bɛlɛbɔ Mɔdenle Kɛ Bɛbayɛ Asafo Nu Azonvolɛ Ɔ?” yɛɛ “Mediema Mrenyia—Bɛlɛbɔ Mɔdenle Kɛ Bɛbayɛ Asafo Nu Mgbanyima Ɔ?” wɔ November 2024, Ɛzinzalɛ Arane ne anu.
