ƐNEE edwɛne le debie titili wɔ tete Yizilayɛma amaamuo nu. Baebolo ne hanle menli mɔɔ bɛbɔle edwɛnedolɛ ninyɛne nee bɛdabɛ mɔɔ bɛdole edwɛne la anwo edwɛkɛ fane dɔɔnwo. Nɔhalɛ nu, saa ɛkyɛ Ngɛlɛlera ne amuala anu bulu a, nuhua kɛyɛ ko le edwɛne, nwolɛ neazo titili a le Edwɛne, Sɔlɔmɔn Edwɛne nee Awolɛyelɛ mbuluku ne mɔ. Music in Biblical Life buluku ne noko hanle kɛ Baebolo ne “maa ɔda ali wienyi kɛ Yizilayɛma vale edwɛne lile gyima wɔ ninyɛne dɔɔnwo mɔɔ ɛnee bɛyɛ wɔ bɛ ɛbɛlabɔlɛ nu la anu.”

Bɛvale bɛlile gyima kenle ko biala. Yizilayɛma bɔle edwɛne vale lale bɛ nganeɛdelɛ ali. (Aye. 30:29) Ɛnee saa bɛlɛsie belemgbunli bie ebia zo, bɛlɛdi ɛvoyia anzɛɛ sogyama kɔ konle na bɛdi konim a, mraalɛ ne mɔ bɔ akɛya, bɛfa anyelielɛ bɛto edwɛne na bɛsi agole. (Ndɛ. 11:34; 1 Sa. 18:​6, 7; 1 Arl. 1:​39, 40) Ɛnee eza saa awie wu wɔ Yizilayɛ na bɛlɛdi nyane a, bɛto ɛzɛne edwɛne. (2 Ek. 35:25) McClintock and Strong’s Cyclopedia ne hanle kɛ, nɔhalɛ nu, “ɔda ali wienyi kɛ ɛnee Yizilayɛma kulo edwɛne kpalɛ.”

Bɛdole edwɛne wɔ belemgbunli sua nu. Ɛnee Yizilayɛ arelemgbunli anye die edwɛne ɛdielɛ nwo. Belemgbunli Sɔɔlo vale Devidi rale ye belemgbunli sua nu ɛkɛ ne kɛ ɔrado edwɛne ɔmaa ye. (1 Sa. 16:​18, 23) Nzinlii mɔɔ Devidi mumua ne rayɛle belemgbunli la, ɔyɛle edwɛnebɔlɛ ninyɛne, ɔhɛlɛle edwɛne ngɛnlɛma mɔɔ yɛ fɛ la dɔɔnwo nee edwɛne mɔɔ ɛnee bɛto ye wɔ Gyihova ɛzonlenlɛsua ne anu la. (2 Ek. 7:6; Emɔso 6:5) Ɛnee Belemgbunli Sɔlɔmɔn lɛ mrenyia nee mraalɛ edwɛndolɛma dɔɔnwo wɔ ye sua nu ɛkɛ.—Nol. 2:8.

Yizilayɛma luale edwɛne zo zonlenle Gyihova. Mɔɔ hyia kpalɛ la, Yizilayɛma luale edwɛne zo zonlenle Gyihova. Nɔhalɛ nu, edwɛndolɛma 4,000 a ɛnee to edwɛne wɔ Gyɛlusalɛm ɛzonlenlɛsua ne anu a. (1 Ek. 23:5) Bɛbɔle mbulalɛ mɔɔ dielie, getaa, haape nee aweɛne ndendenle. (2 Ek. 5:12) Noko tɛ edwɛndolɛma ɛhye mɔ mɔɔ ze edwɛndolɛ nye zo la ala a luale edwɛne zo zonlenle Gyihova a. Ɔbayɛ kɛ ɛvolɛ biala saa Yizilayɛma ɛlɛkɔ ɛvoyialilɛ wɔ Gyɛlusalɛm a, bɛto Anwumavolɛ Edwɛne ne mɔ. (Edw. 120-134) Dwuuma mbuluku bie mɔ noko kile kɛ Yizilayɛma dole Hallel Edwɛne a ne mɔ wɔ Akpabɛnwo Ɛvoyia ne mɔ abo.

Ɛnɛ noko, edwɛne nwo hyia Nyamenle menli. (Gye. 5:13) Yɛto edwɛne ɔluakɛ ɔboka yɛ ɛzonlenlɛ nwo. (Ɛfɛ. 5:19) Edwɛne ka yɛ nee yɛ mediema Kilisienema bɔ nu. (Kɔl. 3:16) Yɛɛ saa yɛlɛyia ngyegyelɛ a ɔmaa yɛ anwosesebɛ. (Gyi. 16:25) Edwɛne le adenle kɛnlɛma mɔɔ yɛdua zo yɛda diedi mɔɔ yɛlɛ wɔ Gyihova anu nee ɛlɔlɛ mɔɔ yɛlɛ yɛmaa ye la ali a.