1, 2. (a) Gyima mɔɔ anwo hyia la boni a bɛhanle kɛ Sɔlɔmɔn ɛyɛ a? (b) Duzu ati a, ɛnee Devidi dwenle Sɔlɔmɔn anwo a?

BƐZELE Sɔlɔmɔn kɛ ɔnlea ɔmaa bɛzi Gyɛlusalɛm ɛzonlenlɛ sua ne mɔɔ anwo hyia la azo. Ɛnee ɔwɔ kɛ sua ne yɛ “kpole, ɔyɛ kɛnlɛma mɔɔ awie biala kanvo ye a.” Mɔɔ hyia kpalɛ la, sua ne bayɛ “[Gyihova] Nyamenle ne Ɛzonlenlɛ Sua.” Gyihova hanle kɛ Sɔlɔmɔn a banlea gyima ɛhye azo a.—1 Ek. 22:1, 5, 9-11.

² Ɛnee Belemgbunli Devidi lɛ anwodozo kɛ Nyamenle baboa Sɔlɔmɔn mɔɔ ɛnee le kakula na “ɔ ti ɛtɛtinle” la. Asoo ɔbanyia akɛnrasesebɛ yeazi ɛzonlenlɛ sua ne ɔ? Kɛmɔ ɔle kakula na ɔnlɛ anwubielɛ la ati, ɛnee ɔnrɛhola ye si ɔ? Amaa Sɔlɔmɔn ahola azi sua ne la ɛnee ɔwɔ kɛ ɔsi ye ahonle na ɔbɔ gyima ne abo.

3. Akɛnrasesebɛ nwo debie boni a Sɔlɔmɔn zukoale vile ye papa ɛkɛ a?

³ Ɔbayɛ kɛ Sɔlɔmɔn zukoale akɛnrasesebɛ nwo debie dɔɔnwo vile ye papa ɛkɛ. Mɔɔ Devidi le kakula la, ɔ nee nane mɔɔ anwo yɛ ɛzulolɛ mɔɔ bɛhyele ɔ ze mboane ne mɔ bie la honle. (1 Sa. 17:34, 35) Ɔlale akɛnrasesebɛ kpole ali na ɔ nee kakanyinli ne honle. Nyamenle boale Devidi maanle ɔvale bozane ko ɔhunle Golayate.—1 Sa. 17:45, 49, 50.

4. Duzu ati a ɛnee ɔwɔ kɛ Sɔlɔmɔn nyia akɛnrasesebɛ ɛ?

 ⁴ Ɛnee ɔfɛta kɛ, Devidi zele Sɔlɔmɔn kɛ ɔzi ye ahonle na ɔbɔ ɛzonlenlɛ sua ne ɛzilɛ bo la! (Kenga 1 Edwɛkɛsisilɛ 28:20.) Saa Sɔlɔmɔn anla akɛnrasesebɛ ali a, anrɛɛ ɛzulolɛ bamaa ɔ sa nu ado na ɔnrɛhola ɔnrɛbɔ gyima ne abo.

5. Duzu ati a yɛhyia akɛnrasesebɛ ɛ?

⁵ Kɛmɔ Gyihova boale Sɔlɔmɔn la, yɛdayɛ noko yɛhyia ye moalɛ amaa yɛanyia akɛnrasesebɛ yɛawie gyima ne. Ɔti, yɛbazuzu tete amra mɔɔ bɛlale akɛnrasesebɛ ali la bie mɔ neazo ne anwo. Akee yɛbazuzu kɛzi yɛbala akɛnrasesebɛ ali, amaa yɛawie yɛ gyima ne la anwo.

6. Duzu a ɛ nye die nwo wɔ Dwosefi akɛnrasesebɛ ne anwo a?

⁶ Suzu akɛnrasesebɛ mɔɔ Dwosefi lale ye ali wɔ mekɛ mɔɔ Pɔtefaa aye ne zele ye kɛ ɔ nee ye ɛla la anwo. Ɛnee ɔze kɛ saa yeanyɛ a, ɔbamaa bɛahwe ɔ nzo kpole kpalɛ. Kɛ anrɛɛ ɔbalie yeado nu la, ɔlale akɛnrasesebɛ ali na ɔyɛle nwolɛ debie ndɛndɛ.—Mɔl. 39:10, 12.

7. Ka kɛzi Releehabe lale akɛnrasesebɛ ali la. (Nea mɔlebɛbo nvoninli ne.)

⁷ Releehabe noko lale akɛnrasesebɛ ali. Mɔɔ Yizilayɛ busiama nwiɔ ne hɔle ye sua nu wɔ Gyɛleko la, anrɛɛ ɛzulolɛ ti ɔbaziane bɛ. Noko ɔnyianle Gyihova anu anwodozo, ɔlale akɛnrasesebɛ ali ɔvale bɛ ɔveale na ɔboale bɛ ɔmaanle bɛhɔle mɔɔ ɛhwee anyɛ bɛ a. (Dwɔh. 2:4, 5, 9, 12-16) Releehabe liele lile kɛ Gyihova a le nɔhalɛ Nyamenle ne a, na ɔbava azɛlɛ ne yeamaa Yizilayɛma. Yeammaa awie mɔ, bɔbɔ Gyɛleko belemgbunli ne nee ye soanvolɛma ne anwo ɛzulolɛ anga ye. Emomu ɔlale akɛnrasesebɛ ali ɔliele ɔ nee ye sua nu amra ngoane.—Dwɔh. 6:22, 23.

8. Kɛzi akɛnrasesebɛ mɔɔ Gyisɛse lale ye ali la boale ye ɛzoanvolɛ ne mɔ ɛ?

⁸ Gyisɛse ɛzoanvolɛ nɔhavoma ne noko yɛle akɛnrasesebɛ nwo neazo kpalɛ. Bɛnwunle akɛnrasesebɛ mɔɔ Gyisɛse lale ye ali la. (Mat. 8:28-32; Dwɔn 2:13-17; 18:3-5) Zɔhane neazo ne maanle bɛnyianle akɛnrasesebɛ. Mɔɔ Sadusiima ne dwazole tiale ɛzoanvolɛma ne kɛ bɛmmakilehile wɔ Gyisɛse duma nu bieko la, bɛandie.—Gyi. 5:17, 18, 27-29.

9. Kɛmɔ 2 Timote 1:7 ka la, nienwu a yɛbanyia akɛnrasesebɛ yɛavi a?

⁹ Akɛnrasesebɛ mɔɔ Dwosefi, Releehabe, Gyisɛse nee ɛzoanvolɛ ne mɔ nyianle la maanle bɛyɛle gyima kpalɛ. Bɛ akɛnrasesebɛ ne ɛngile kɛ bɛdie bɛ nwo bɛdi somaa. Bɛnyianle anwodozo wɔ Gyihova anu la ati ɔ. Ɔdwu mekɛ ne bie na ɔwɔ kɛ yɛda akɛnrasesebɛ ali a, ɔwɔ kɛ yɛfa yɛ nwo yɛto Gyihova anwo zo, na tɛ yɛdayɛ mumua ne. (Kenga 2 Timote 1:7.) Bɛmaa yɛzuzu ɛleka nwiɔ mɔɔ yɛhyia akɛnrasesebɛ nwo la: wɔ yɛ abusua nee asafo ne anu.

10. Duzu ati a Kilisiene ngakula hyia akɛnrasesebɛ ɛ?

¹⁰ Kilisiene ngakula yia tɛnlabelɛ dɔɔnwo mɔɔ ɔwɔ kɛ bɛda akɛnrasesebɛ ali a, amaa bɛazonle Gyihova. Bɛbahola bɛazukoa debie bɛavi kɛzi Sɔlɔmɔn lale akɛnrasesebɛ ali zile kpɔkɛ kpalɛ amaa yeawie ɛzonlenlɛ sua ne si la anu. Ɔwɔ kɛ Kilisiene ngakula maa bɛ awovolɛ tu bɛ folɛ, noko bɛdabɛ mumua ne a ɔwɔ kɛ bɛsi kpɔkɛ mɔɔ anwo hyia a. (Mrɛ. 27:11) Ɔhyia akɛnrasesebɛ na bɛahola bɛakpa agɔnwolɛ kpalɛ, anyelielɛ ninyɛne mɔɔ fɛta, bɛabɔ ɛbɛla mɔɔ anwo te na bɛamaa bɛazɔne bɛ. Ngakula ɛhye mɔ hyia akɛnrasesebɛ, ɔluakɛ Seetan mɔɔ tendɛtia Nyamenle la anye ɛnlie mɔɔ bɛlɛyɛ la anwo.

11, 12. (a) Kɛzi Mosisi yɛle akɛnrasesebɛ nwo neazo kpalɛ ɛ? (b) Kɛzi ngakula bahola azukoa Mosisi neazo ne ɛ?

 ¹¹ Ɔwɔ kɛ ngakula si bodane mɔɔ bɛbava bɛazie bɛ nye zo la anwo kpɔkɛ. Wɔ maanle bie mɔ azo, bɛtinlitinli ngakula kɛ bɛva nwomazukoalɛ kpole nee gyima mɔɔ bɛtua kakɛ kpalɛ la bɛzie bɛ nye zo. Wɔ maanle mɔɔ ezukoa gyinlabelɛ ne ɛnle kpalɛ la azo, ngakula bie mɔ fa sie bɛ nye zo kɛ bɛkpondɛ nwonane afoa nu ninyɛne bɛaboa bɛ mbusua. Saa ɛlɛyia ngyegyelɛ zɛhae bie a, suzu Mosisi neazo ne anwo. Falo ara raalɛ a tetele Mosisi a, yemɔti anrɛɛ ɔbahola yeava duma ɛlielɛ nee anwonyia ɛkpondɛlɛ yeayɛ ye bodane. Nea kɛzi ye abusua ne mɔɔ ɛnee wɔ Yigyibiti, kilehilevolɛma nee folɛtuvolɛma ne tinlitinlinle ɔ nwo zo a! Mosisi ammaa bɛanyia ɔ nwo zo tumi, emomu ɔlale akɛnrasesebɛ ali ɔgyinlanle nɔhalɛ ɛzonlenlɛ nzi. Mosisi vale ɔ nwo dole Gyihova anwo zo na ɔkpole Yigyibiti anwonyia. (Hib. 11:24-26) Ɔti ɔmaanle Gyihova yilale Mosisi kpalɛ, na ɔbanyia nyilalɛ dɔɔnwo kenle bie.

¹² Saa ngakula nyia akɛnrasesebɛ, bɛfa sunsum nu bodane bɛsie bɛ nye zo na bɛfa Belemgbunlililɛ ne bɛdimoa bɛ ɛbɛlabɔlɛ nu a, Gyihova yila bɛ. Ɔbaboa bɛ yeamaa bɛanlea bɛ mbusua. Wɔ ɛvoya mɔɔ limoa la anu, kpavolɛ Timote vale sunsum nu bodane ziele ɔ nye zo, na ɛdawɔ noko ɛbahola wɔayɛ bie. *—Kenga Felepaema 2:19-22.

13. Kɛzi akɛnrasesebɛ boale adiema raalɛ ko maanle ɔdwule ye bodane nwo ɛ?

¹³ Ɛnee ɔwɔ kɛ adiema raalɛ bie mɔɔ wɔ Alabama, U.S.A., la nyia akɛnrasesebɛ na yeava sunsum nu bodane yeazie ɔ nye zo. Ɔhɛlɛle kɛ: “Melɛnyi la ɛnee mese nyiane kpalɛ. Ɛnee ɔyɛ se kɛ me nee mediema badendɛ wɔ Belemgbunlililɛ Asalo, na menli mɔɔ menze bɛ fee mɔɔ mebɔ bɛ anlenkɛ nu la ɛdeɛ bɛnga.” Ɔlua ye awovolɛ nee asafo ne anu amra bie mɔ moalɛ zo, adiema raalɛ ɛhye holale dwule dahuu adekpakyelɛ mɔɔ ɛnee le ye bodane la anwo. Ɔka kɛ: “Seetan ewiade ne se, nwomazukoalɛ kpole, dumalielɛ, ezukoa, nee nwonane afoa nu ninyɛne dɔɔnwo mɔɔ awie banyia la le bodane kpalɛ. Bɛ sa ɛnda ɛnga ninyɛne ɛhye mɔ, na ɔmaa adwenleadwenle tɔ bɛ nwo na bɛ rɛle bɔ. Noko Gyihova ɛzonlenlɛ ɛmaa menyia anyelielɛ nee ahunlundwolɛ.”

14. Tɛnlabelɛ boni mɔ anu a ɔwɔ kɛ Kilisiene awovolɛ nyia akɛnrasesebɛ a?

¹⁴ Kilisiene awovolɛ noko hyia akɛnrasesebɛ. Kɛ neazo la, bie a bɛ gyimamenlema ka kile bɛ dahuu kɛ bɛkpɔne a bɛhɔ zo bɛyɛ gyima wɔ mekɛ mɔɔ bɛfa bɛyɛ abusua ɛzonlenlɛ, bɛkɔ daselɛlilɛ nee debiezukoalɛ la. Ɔhyia akɛnrasesebɛ na bɛahola bɛakpo ninyɛne ɛhye mɔ amaa bɛayɛ neazo kpalɛ bɛamaa bɛ mra. Anzɛɛ bie a awovolɛ bie mɔ mɔɔ wɔ asafo ne anu la maa bɛ mra yɛ ninyɛne mɔɔ ɛngulo kɛ ɛ ra yɛ bie la. Bie a awovolɛ zɔhane mɔ babiza wɔ deɛmɔti ɛ ra ne ɛnyɛ bie la. Asoo ɛbanyia akɛnrasesebɛ na wɔalua nrɛlɛbɛ adenle zo wɔahilehile wɔ kpɔkɛzilɛ ne anu wɔahile bɛ?

15. Kɛzi Edwɛndolɛ 37:25 nee Hibuluma 13:5 baboa awovolɛ ɛ?

¹⁵ Saa yɛboa yɛ mra yɛmaa bɛfa sunsum nu bodane bɛsie bɛ nye zo na bɛdwu nwo a, ɔkile kɛ yɛlɛ akɛnrasesebɛ. Kɛ neazo la, awovolɛ bie mɔ twehwe bɛ bo aze kɛ bɛbamaa bɛ mra ahɔyɛ adekpakyelɛma, bɛahɔzonle wɔ ɛleka mɔɔ bɛhyia moalɛ dɔɔnwo, bɛahɔ Bɛtɛle anzɛɛ bɛayɛ teokelase suazilɛ gyima ne bie. Bie a awovolɛ ne mɔ sulo kɛ saa bɛyɛ mgbanyinli a, bɛ mra ne mɔ ɛnrɛhola bɛ nea. Noko, awovolɛ mɔɔ ze nrɛlɛbɛ la, da akɛnrasesebɛ ali na  bɛnyia Gyihova ɛwɔkɛ ne mɔ anu diedi. (Kenga Edwɛndolɛ 37:25; Hibuluma 13:5.) Adenle bieko mɔɔ ɛbalua zo wɔahile kɛ ɛlɛ akɛnrasesebɛ na wɔva ɛ nwo wɔdo Gyihova anwo zo la a le kɛ ɛbaboa ɛ mra wɔamaa bɛayɛ zɔ.—1 Sa. 1:27, 28; 2 Tim. 3:14, 15.

16. Kɛzi awovolɛ bie mɔ ɛboa bɛ mra bɛmaa bɛva sunsum nu bodane bɛzie bɛ nye zo ɛ? Kɛzi ɛhye ɛboa bɛ ɛ?

¹⁶ Agyalɛma bie mɔɔ bɛwɔ United States la boale bɛ mra maanle bɛvale sunsum nu bodane bɛziele bɛ nye zo. Kunli ne ka kɛ: “Kolaa na yɛ mra ne mɔ adia na bɛanwu tendɛ la ɛnee yɛka anyelielɛ mɔɔ wɔ adekpakyelɛ gyima ne nee asafo ne mɔɔ yɛsonle wɔ nu la anwo edwɛkɛ yɛkile bɛ. Kɛkala ɛhye a le bɛ bodane a. Ɔtoa zo kɛ, sunsum nu bodane mɔɔ yɛ mra ne mɔ vale ziele bɛ nye zo na bɛdwule nwo la maa bɛko bɛtia sɔnea mɔɔ wɔ Seetan ewiade ne anu la na bɛva bɛ adwenle bɛzie Gyihova ɛzonlenlɛ zo.” Adiema nrenyia ko mɔɔ lɛ ngakula nwiɔ la hɛlɛle kɛ: “Awovolɛ dɔɔnwo fa bɛ anwosesebɛ nee ezukoa boa bɛ mra amaa bɛahola bɛadwu bodane mɔɔ bɛlɛ wɔ nwɔhoalilɛ, anyelielɛ ninyɛne nee nwoma ɛzukoalɛ nu la anwo. Ɔti, nrɛlɛbɛ kpole wɔ nu kɛ yɛbava yɛ anwosesebɛ nee ezukoa yɛaboa yɛ mra amaa bɛadwu bodane mɔɔ bamaa bɛ nee Gyihova anyia agɔnwolɛvalɛ kpalɛ la anwo. Ɔyɛ ahunlundwolɛ kpole kɛ yɛ mra ne mɔ mɔɔ yɛboale bɛ la holale dwule sunsum nu bodane mɔɔ bɛvale bɛziele bɛ nye zo la anwo.” Ɛbahola wɔanyia anwodozo kɛ Nyamenle bayila awovolɛ mɔɔ bɛboa bɛ mra bɛmaa bɛfa sunsum nu bodane bɛsie bɛ nye zo na bɛkola bɛdwu nwo la.

17. Ka ninyɛne mɔɔ ɔhyia akɛnrasesebɛ na yɛahola yɛayɛ ye wɔ asafo ne anu la bie mɔ.

¹⁷ Eza ɔwɔ kɛ yɛda akɛnrasesebɛ ali wɔ asafo ne anu. Kɛ neazo la, asafo nu mgbanyima hyia akɛnrasesebɛ wɔ mekɛ mɔɔ ɔwɔ kɛ bɛdi edwɛkɛ bie anzɛɛ mekɛ mɔɔ bɛlɛboa awie mɔɔ ye anwodolɛ nu ɛyɛ se la. Mgbanyima bie mɔ nee anyelielɛma mɔɔ bɛgua efiade la sukoa debie yɛɛ  bɛyɛ debiezukoalɛ wɔ ɛkɛ. Na mediema mraalɛ mɔɔ bɛtɛgyale la noko ɛ? Nwolɛ adenle dɔɔnwo ɛbuke ɛnɛ ɛmaa bɛ wɔ adekpakyelɛ gyima ne anu, ɛleka mɔɔ bɛhyia moalɛ dɔɔnwo mɔɔ bɛbahɔzonle, suazilɛ gyima ɛyɛlɛ yɛɛ Belemgbunlililɛ Edwɛkpakavolɛma Sukulu ne mɔɔ bɛbahɔ bie la. Bie mɔ bahola ahɔ Geleade Sukulu ne bie.

18. Kɛzi mraalɛ mgbanyinli bahola ala akɛnrasesebɛ ali ɛ?

¹⁸ Mraalɛ mgbanyinli le nyilalɛ maa asafo ne. Nea kɛzi yɛ nye die mediema mraalɛ ɛhye mɔ anwo a! Bie mɔ ɛnrɛhola ɛnrɛyɛ dɔɔnwo kɛmɔ mekɛ bie bɛyɛle ye la, noko bɛkola bɛda akɛnrasesebɛ ali. (Kenga Taetɛse 2:3-5.) Kɛ neazo la, ɔbahyia kɛ raalɛ kpanyinli bie da akɛnrasesebɛ ali saa mgbanyima ne mɔ ka kile ye kɛ ɔha anwoziezielɛ kpalɛ nwo edwɛkɛ ɔhile adiema raalɛ kakula bie a. Ɔnrɛdea adiema raalɛ ne wɔ ye anwoziezielɛ ne anwo, noko ɔbahola yeamaa ye anwosesebɛ kɛ ɔzuzu kɛzi ye anwoziezielɛ bahola agyegye awie mɔ la anwo. (1 Tim. 2:9, 10) Ɛlɔlɛ nu mɔɔ ɔbavi yeayɛ ɛhye la baboa kpalɛ.

19. (a) Kɛzi mrenyia mɔɔ bɛzɔne bɛ la bahola ala akɛnrasesebɛ ali ɛ? (b) Kɛzi Felepaema 2:13 nee 4:13 kola boa mediema mrenyia ɔmaa bɛnyia akɛnrasesebɛ ɛ?

¹⁹ Ɔwɔ kɛ mediema mrenyia mɔɔ bɛzɔne bɛ la noko da akɛnrasesebɛ ali na bɛyɛ gyima. Mrenyia mɔɔ lɛ akɛnrasesebɛ mɔɔ bɛkulo kɛ bɛyɛ gyima dɔɔnwo la le nyilalɛ maa asafo ne. (1 Tim. 3:1) Noko, bie mɔ anye ɛmbolo kɛ bɛbayɛ gyima. Bie a adiema nrenyia bie yɛle ɛtane mekɛ bie, ɔti kɛkala ɔte nganeɛ kɛ ɔnfɛta kɛ ɔbayɛ asafo nu sonvolɛ anzɛɛ kpanyinli. Adiema bie noko te nganeɛ kɛ ɔnrɛhola ɔnrɛyɛ gyima mɔɔ bɛbava bɛamaa ye la. Saa zɔhane a ɛte nganeɛ a, Gyihova baboa wɔ yeamaa wɔanyia akɛnrasesebɛ. (Kenga Felepaema 2:13; 4:13.) Kakye kɛ, mekɛ bie, Mosisi dele nganeɛ kɛ ɔnrɛhola gyima bie yɛ. (Ade. 3:11) Noko nzinlii, Gyihova maanle Mosisi akɛnrasesebɛ maanle ɔwiele ye gyima ne. Adiema nrenyia mɔɔ bɛzɔne ye la noko bahola alua asɔneyɛlɛ nee Baebolo ne mɔɔ ɔbagenga ye dahuu la azo anyia akɛnrasesebɛ. Menli mɔɔ yɛle akɛnrasesebɛ nwo neazo kpalɛ mɔɔ ɔbadwenledwenle nwo la noko baboa. Ɔbahola yeamaa mgbanyima ne mɔ atete ye na yeadu ɔ nwo yeaboa wɔ ɛleka mɔɔ bɛhyia moalɛ la. Yɛmaa mediema mrenyia mɔɔ bɛzɔne bɛ la kɔsɔɔti anwosesebɛ kɛ bɛla akɛnrasesebɛ ali na bɛyɛ gyima dɔɔnwo wɔ asafo ne anu!

20, 21. (a) Kɛzi Devidi maanle Sɔlɔmɔn anwosesebɛ ɛ? (b) Anwodozo boni a yɛbahola yɛanyia a?

²⁰ Belemgbunli Devidi zele Sɔlɔmɔn kɛ Gyihova nee ye balua kɔkpula kɛ ɔbazi ɛzonlenlɛ sua ne yeawie la. (1 Ek. 28:20) Kɛmɔ Sɔlɔmɔn hakyele ye papa edwɛkɛ ne la ati, yeammaa kakula mɔɔ ɔle nee anwubielɛ mɔɔ ɔnlɛ la anzi ye adenle. Ɔlale akɛnrasesebɛ kpole ali, ɔbɔle gyima ne abo, na ɔlua Gyihova moalɛ zo ɔwiele ɛzonlenlɛ sua ne si wɔ ɛvolɛ nsuu nee foa anu.

²¹ Gyihova baboa yɛ amaa yɛayɛ yɛ gyima wɔ yɛ abusua nee asafo ne anu, kɛmɔ ɔboale Sɔlɔmɔn la. (Aye. 41:10, 13) Saa yɛda akɛnrasesebɛ ali wɔ Gyihova ɛzonlenlɛ nu a, yɛbahola yɛanyia anwodozo kɛ ɔbayila yɛ ɛnɛ nee kenle bie. Ɛhye ati, ‘si wɔ ahonle na bɔ gyima ne abo.’