1-2. (a) Kɛ mɔɔ Mrɛlɛbulɛ 16:31 kile la, kɛzi ɔwɔ kɛ yɛbu nɔhavoma mɔɔ ɛyɛ mgbanyinli la ɛ? (b) Kpuya boni mɔ a yɛbabua wɔ edwɛkɛ ɛhye anu a?

 BIE a menli mɔɔ kɔneɛnlea paake bie mɔɔ wɔ Arkansas, U.S.A azo la banwu kɛ daemɔn gugua azɛlɛ ne anwo. Noko bie a bɛtɛyele zɔhane daemɔn ne mɔ anwo evinli, ɔti ɔnda. Ɛhye ati, menli dɔɔnwo mɔɔ nwu zɔhane daemɔn ne mɔ la ɛnnwu deɛ holɛ ko ɔti bɛpɛ nuhua bɛkɔ.

² Wɔ ndenle bie mɔ azo, yɛ mediema nɔhavoma mɔɔ ɛyɛ mgbanyinli la le kɛ zɔhane daemɔn ne mɔ la; bɛsonle bolɛ kpalɛ. Nyamenle Edwɛkɛ ne fa bɛ egyɛne ne toto abotile nwo. (Kenga Mrɛlɛbulɛ 16:31; 20:29) Noko ɔnyɛ se kɛ yɛbabu yɛ nye yɛagua mediema ɛhye mɔ mɔɔ sonle bolɛ la anwo zo. Ngakula mɔɔ bu mgbanyinli ɛhye mɔ kɛ bɛsonle bolɛ la nyia debie mɔɔ sonle bolɛ tɛla anwonyia la. Wɔ edwɛkɛ ɛhye anu, yɛbabua kpuya nsa ɛhye mɔ: Duzu ati a Gyihova bu nɔhavoma mɔɔ ɛyɛ mgbanyinli la kɛ bɛsonle bolɛ a? Gyinlabelɛ boni a Gyihova ɛva ɛmaa menli ɛhye mɔ wɔ ye ahyehyɛdeɛ ne anu a? Duzu a yɛyɛ a yɛbanyia bɛ neazo ne mɔ azo nvasoɛ kpalɛ a?

3. Kɛ mɔɔ Edwɛne 92:12-15 kile la, duzu ati a nɔhavoma mɔɔ ɛyɛ mgbanyinli la sonle bolɛ maa Gyihova a?

³ Nɔhavoma mɔɔ ɛyɛ mgbanyinli la sonle bolɛ maa Gyihova Nyamenle. Ɔze kɛzi bɛde la yɛɛ ɔ nye die bɛ subane ngɛnlɛma ne mɔ anwo. Saa bɛka anwubielɛ mɔɔ bɛnyia wɔ ɛvolɛ tendenle mɔɔ bɛva bɛzonle Gyihova nɔhalɛ nu la anwo edwɛkɛ bɛkile  ngakula a, Gyihova anye die nwo kpalɛ. (Dwobu 12:12; Mrɛ. 1:1-4) Eza Gyihova anye die bɛ kpundiigyinlanlɛ ne anwo. (Mal. 3:16) Bɛyiale ngyegyelɛ dɔɔnwo wɔ bɛ ɛbɛlabɔlɛ nu, noko bɛhɔle zo bɛzɔle diedi mɔɔ bɛlɛ wɔ Gyihova anu la anu kpundii. Kenle bie nwo anyelazo mɔɔ bɛlɛ la ɛyɛ kpole ɛdɛla mekɛ mɔɔ limoa mɔɔ bɛzukoale nɔhalɛ ne la. Yɛɛ Gyihova kulo bɛ ɔluakɛ bɛkɔ zo bɛbɔ ye duma ne nolo wɔ mekɛ mɔɔ “bɛyɛ mrelera bɔbɔ” la.—Kenga Edwɛne 92:12-15.

4. Duzu a bahola akyekye yɛ mediema mɔɔ ɛyɛ mgbanyinli la arɛle a?

⁴ Saa wɔ ɛvolɛ ɛlɛkɔ ɔ nyunlu a, nyia anwodozo kɛ Gyihova kakye gyima mɔɔ wɔyɛ ye dɛba la. (Hib. 6:10) Wɔbɔ mɔdenle wɔ edwɛkɛhanlɛ gyima ne anu na yɛ anwuma Selɛ ne anye die nwo kpalɛ. Wɔgyinla sɔnea dɔɔnwo mɔɔ bie mɔ bɔbɔ maanle ɛlile nyane kpole la anloa, ɛvale tenlene ngyinlazo mɔɔ wɔ Baebolo ne anu la ɛbɔle wɔ ɛbɛla, ɛyɛle gyima dɔɔnwo wɔ asafo ne anu na ɛtetele awie mɔ. Wɔyɛ biala mɔɔ ɛbahola la ɛ nee Gyihova ahyehyɛdeɛ ne mɔɔ ɛlɛnyia anyuhɔlɛ ndɛndɛ la ɛlɛtudu agyakɛ. Wɔboa menli mɔɔ ɛlɛyɛ dahuu ɛzonlenlɛ gyima ne bie la yɛɛ wɔmaa bɛ anwosesebɛ. Gyihova Nyamenle kulo wɔ kpole kpalɛ ɔluakɛ ɛlɛdi nɔhalɛ. Yebɔ ɛwɔkɛ kɛ “ɔnrɛkpo ye nɔhavoma”! (Edw. 37:28) Eza ɔlɛbɔ wɔ ɛwɔkɛ kɛ: “Kɔkpula kɛ [ɛ] ti zo bayɛ egyɛne la, mebahɔ zo meadwu [wɔ].” (Aye. 46:4) Ɔti mmanyia adwenle kɛ kɛmɔ ɛlɛyɛ kpanyinli la ati, ɛ nwo ɛngyia bieko wɔ Gyihova ahyehyɛdeɛ ne anu. Ɛ nwo hyia kpalɛ!  

5. Duzu a ɔwɔ kɛ mgbanyinli kakye a?

⁵ Mgbanyinli lɛ ninyɛne dɔɔnwo mɔɔ bɛbahola bɛayɛ a. Bie a bɛnlɛ anwosesebɛ kɛ dɛba ne la, noko bɛnyia anwubielɛ ngɛnlɛma wɔ ɛvolɛ dɔɔnwo anu. Gyihova bahola ahɔ zo ava bɛ ali gyima wɔ ndenle ngakyile zo, kɛ mɔɔ dɛba ne nee ɛnɛ neazo ɛhye mɔ bamaa yɛanwu ye la.

6-7. Maa neazo mɔɔ wɔ Baebolo ne anu mɔɔ fale mgbanyinli mɔɔ Gyihova yilale bɛ ɔluakɛ bɛzonlenle ye nɔhalɛ nu la ati anwo la.

⁶ Yɛbahola yɛanwu nɔhavoma mɔɔ bɔle mɔdenle zonlenle Gyihova too bɛyɛle mrelera  la anwo neazo ngɛnlɛma wɔ Baebolo ne anu. Kɛ neazo la, mɔɔ Mosisi rayɛle Gyihova ngapezonli nee Yizilayɛ maanle ne adekilevolɛ la, ɛnee yeli ɛvolɛ asɛɛ 80. Ɔbayɛ kɛ mɔɔ ɛnee Daneɛle ɛbo ɛvolɛ 90 la, ɛnee Gyihova tɛfa ye tɛdi gyima kɛ Ye ngapezonli. Yɛɛ ɔbayɛ kɛ ɛnee ɛzoanvolɛ Dwɔn noko ɛbo ɛvolɛ 90 wɔ mekɛ mɔɔ Nyamenle maanle ɔhɛlɛle Yekile buluku ne la.

⁷ Ɛnee nɔhavoma gyɛne dɔɔnwo ɛtɛdiele duma, ɔti ɛnee ɔnyɛ se kɛ menli babu bɛ nye agua bɛ nwo zo. Noko Gyihova nwunle bɛ na ɔyilale bɛ wɔ bɛ nɔhalɛlilɛ ne anwo. Kɛ neazo la, bɛha Semɛyɔn mɔɔ ɔle “tenlenenli yɛɛ ɔsulo Nyamenle” la anwo edwɛkɛ sikalɛ wɔ Baebolo ne anu, noko ɛnee Gyihova ze ye na ɔlile ye eni ɔmaanle ɔnwunle adɔma Gyisɛse na ɔhanle ngapezo mɔɔ fale kakula ne nee ye mame anwo la. (Luku 2:22, 25-35) Suzu ngapezonli raalɛ Ana mɔɔ ɔle kunlavolɛ la noko anwo. Ɛnee yeli ɛvolɛ 84 na “ɛnee dahuu ɔwɔ ɛzonlenlɛsua ne anu.” Kɛmɔ ɛnee ɔkɔ “debiezukoalɛ” dahuu la ati, Gyihova yilale ye ɔmaanle ɔdaye noko ɔnwunle adɔma Gyisɛse. Ɛnee Semɛyɔn nee Ana sonle bolɛ maa Gyihova.—Luku 2:36-38.

8-9. Moalɛ boni a ahunlanvolɛ kɔ zo fa maa a?

⁸ Wɔ yɛ mekɛ ye azo, nɔhavoma dɔɔnwo mɔɔ ɛyɛ mgbanyinli la yɛ neazo kɛnlɛma maa ngakula. Suzu adiema raalɛ Lois Didur anwubielɛ ne anwo. Mɔɔ ɔbɔle ɔ bo kɛ ɔyɛ adekpakyelɛ titili gyima ne wɔ Canada la ɛnee yeli ɛvolɛ 21 ala. Nzinlii, ɔ nee ɔ hu John yɛle neavolɛ adenduvoma gyima ne ɛvolɛ dɔɔnwo. Akee bɛvale ɛvolɛ mɔɔ bo 20 la bɛyɛle gyima wɔ Canada Bɛtɛle. Mɔɔ Lois lile ɛvolɛ 58 la, bɛhanle kɛ ɔ nee ɔ hu John ɛhɔyɛ gyima wɔ Ukraine. Duzu a bɛbayɛ a? Asoo bɛbaha kɛ bɛyɛ mgbanyinli somaa ɔti bɛnrɛhola bɛnrɛyɛ gyima wɔ maanle fofolɛ nu ɔ? Bɛliele bɛdole nu kɛ bɛbahɔ na bɛkpale John bɛbokale ɛkɛ ne Ɔfese Kɔmatii ne anwo. Mɔɔ bɛlile ɛvolɛ nsuu wɔ ɛkɛ ne la yɛɛ John wule a, noko Lois hanle kɛ ɔbadɛnla ɛkɛ. Kɛkala Lois ɛbo ɛvolɛ 80, noko ɔtɛyɛ gyima ɛsesebɛ wɔ Ukraine Bɛtɛle na mediema mɔɔ wɔ ɛkɛ ne la kulo ye edwɛkɛ kpalɛ.

⁹ Wɔannea a menli adwenle ɛnrɛhɔ ahunlanvolɛ mɔɔ le kɛ Lois la anwo zo kɛ mɔɔ ɛnee bɛ adwenle wɔ bɛ nwo zo wɔ mekɛ mɔɔ bɛ hu mɔ de aze la. Noko bɛtɛsonle bolɛ. Mediema mraalɛ mɔɔ boale bɛ hu mɔ wɔ ɛvolɛ dɔɔnwo anu na bɛlɛkɔ zo bɛagyinla kpundii la sonle bolɛ kpole maa Gyihova. (1 Tim. 5:3) Eza bɛmaa ngakula anwosesebɛ kpalɛ.

10. Neazo kɛnlɛma boni a Tony yɛle a?

¹⁰ Nɔhavoma dɔɔnwo mɔɔ ɛha sua nu la noko sonle bolɛ. Kɛ neazo la, kɛkala adiema nrenyia bie mɔɔ bɛfɛlɛ ye Tony la de ɛleka mɔɔ bɛnea mgbanyinli la. Mɔɔ ɔlile ɛvolɛ 20 la, bɛzɔnenle ye wɔ Pennsylvania, U.S.A. wɔ August 1942. Yeangyɛ, bɛhanle kɛ ɔhɔ sogya  na kɛmɔ yeangɔ la ati, bɛdole ye efiade ɛvolɛ nwiɔ nee foa. Ɔ nee ɔ ye Hilda wole ngakula nwiɔ na bɛtetele bɛ wɔ nɔhalɛ ne anu. Wɔ ɛvolɛ dɔɔnwo anu, Tony yɛle presiding overseer (PO, anzɛɛ mɔɔ kɛkala bɛfɛlɛ ye mgbanyima avinli ngitanwodivolɛ) wɔ asafo nsa anu yɛɛ maangyebakyi nyianu zo neavolɛ. Ɛnee ɔyɛ debiezukoalɛ wɔ efiade bie anu yɛɛ ɔ nee menli mɔɔ wɔ ɛkɛ la sukoa Baebolo ne. Tony ɛli ɛvolɛ 98 noko ɔngyakyi ɔ nwo fee. Ɔkɔ zo ɔyɛ biala mɔɔ ɔbahola la ɔsonle Gyihova yɛɛ ɔ nee asafo mɔɔ ɔwɔ nu la bɔ nu yɛ gyima!

11. Kɛ ɔkɛyɛ na yɛahile kɛ menli mɔɔ ɛha sua nu la sonle bolɛ maa yɛ ɛ?

¹¹ Kɛ ɔkɛyɛ na yɛali mgbanyinli mɔɔ ɛha sua nu la eni ɛ? Saa ɔbayɛ boɛ a, asafo nu mgbanyima bahola aboa bɛ bɛamaa bɛava bɛ nwo bɛawula asafo ne gyimalilɛ ngakyile nu. Yɛbahola yɛahɔkpɔla bɛ anzɛɛ yɛalua vidio zo yɛ nee bɛ ali adwelie yɛava yɛahile kɛ yɛdwenle bɛ nwo. Saa yɛammaa yɛ nye amba yɛ nwo zo a, yɛbahola yɛabu yɛ nye yɛagua mgbanyinli ɛhye mɔ anwo zo. Bie a ɔyɛ se ɔmaa bie mɔ kɛ bɛ nee yɛ badendɛ anzɛɛ bɛsuzu kɛ ɔngyia kɛ bɛbaha bɛ nwo edwɛkɛ bɛahile yɛ. Noko saa yɛnyia mekɛ yɛbiza bɛ edwɛkɛ na yɛtie bɛ wɔ mekɛ mɔɔ bɛlɛka anyelielɛ mɔɔ bɛnyia ye wɔ Gyihova ahyehyɛdeɛ ne anu anwo edwɛkɛ bɛahile yɛ la a, ɔbamaa yɛ anwosesebɛ kpalɛ.

12. Mediema boni mɔ zɛhae a yɛbahola yɛanwu bɛ wɔ yɛ asafo ne mɔ anu a?

¹² Saa yɛnwu kɛ nɔhavoma mɔɔ ɛyɛ mgbanyinli na bɛyɛ neazo kpalɛ la bie mɔ wɔ yɛ asafo ne anu a, wɔannea a ɔbazi yɛ nwo. Adiema raalɛ bie mɔɔ bɛfɛlɛ ye Harriette la vale ɛvolɛ dɔɔnwo zonlenle Gyihova nɔhalɛ nu wɔ ye asafo ne mɔɔ wɔ New Jersey, U.S.A. la anu. Akee ɔdule ɔhɔdɛnlanle ɔ ra raalɛ bie anwo. Mediema mɔɔ wɔ ye asafo fofolɛ ne anu la nyianle mekɛ maanle ye na bɛnwunle kɛ ɔ nwo hyia kpalɛ. Ɔhanle anwubielɛ mɔɔ ɔnyianle wɔ daselɛlilɛ nu wɔ mekɛ mɔɔ ɔnwunle nɔhalɛ ne wɔ 1925 la ɔhilele bɛ na ɔmaanle bɛ anwosesebɛ kpalɛ. Wɔ zɔhane mekɛ ne, ɛnee saa ɔlɛkɔ daselɛlilɛ biala a, ɔfa brush mɔɔ bɛfa bɛkpuda bɛ gye la ɔsia ɔ nwo ɔluakɛ bɛbahola bɛahye ye bɛado efiade mekɛ biala. Wɔ 1933, bɛdole ye efiade fane nwiɔ na biala ɔdi dapɛne ko wɔ ɛkɛ. Ɛnee ɔ hu ɛnle Dasevolɛ noko ɔboale ye kpalɛ. Mɔɔ bɛhyele ye bɛdole efiade la ɔnleanle bɛ mra ngyikyi nsa ne. Nɔhalɛ nu, ɔwɔ kɛ yɛmaa mediema mgbanyinli nɔhavoma mɔɔ le kɛ Harriette la anwo kyia yɛ kpalɛ!

13. Duzu a yɛzukoa ye wɔ gyinlabelɛ mɔɔ mgbanyinli lɛ wɔ Gyihova ahyehyɛdeɛ ne anu la anwo a?

¹³ Yɛ mediema mɔɔ ɛyɛ mgbanyinli la lɛ gyinlabelɛ mɔɔ anwo hyia la wɔ Gyihova ahyehyɛdeɛ ne anu. Bɛnwu kɛzi Gyihova ɛyila ye ahyehyɛdeɛ ne nee bɛdabɛ mumua ne wɔ ndenle ngakyile zo la. Bɛzukoa ninyɛne dɔɔnwo bɛvi nvonleɛ mɔɔ bɛyɛle la anu. Nwu bɛ kɛ bɛle “nrɛlɛbɛ nzubula” na sukoa debie fi bɛ ɛkɛ. (Mrɛ. 18:4) Saa ɛnyia mekɛ ɛmaa bɛ na ɛnwu bɛ kpalɛ a, wɔ diedi nu bayɛ se na wɔazukoa ninyɛne dɔɔnwo wɔavi bɛ ɛkɛ!

14. Duzu a Ditilɔnomi 32:7 maa ngakula anwosesebɛ kɛ bɛyɛ a?

¹⁴ Dimoa tudu agyakɛ ɛ nee mgbanyinli ɛdendɛ. (Kenga Ditilɔnomi 32:7.) Nɔhalɛ nu, bie a bɛnnwu debie kpalɛ, bɛtia bɛtɛɛ yɛɛ bɛtendɛ bɛtɛɛ, noko bɛngulo kɛ bɛto bɛ adwenle nu yɛɛ bɛnyia “duma kpalɛ” wɔ Gyihova anyunlu. (Nol. 7:1) Kakye deɛmɔti bɛsonle bolɛ bɛmaa Gyihova la. Kɔ zo di bɛ eni. Yɛ kɛ Yilaehya la. Yeanlie yeando nu kɛ ɔbavi  Yilaegya anwo wɔ kenle mɔɔ li awieleɛ mɔɔ ɛnee bɛ mu nwiɔ bɛde la. Yilaehya hanle ye fane nsa kɛ: “Menrɛgyakyi wɔ.”—2 Arl. 2:2, 4, 6.

15. Kpuya boni mɔ a yɛbahola yɛabiza mgbanyinli a?

¹⁵ Biza mgbanyinli kpuya fa kile kɛ ɛdwenle bɛ nwo. (Mrɛ. 1:5; 20:5; 1 Tim. 5:1, 2) Ɛbahola wɔabiza bɛ kɛ: “Mɔɔ ɛle kakula la, duzu a maanle ɛliele ɛlile kɛ wɔnwu nɔhalɛ ne a?” “Kɛzi ninyɛne mɔɔ sisile wɔ ɛbɛlabɔlɛ nu la ɛmaa wɔbikye Gyihova ɛ?” “Duzu a wɔnwu ye kɛ ɔmaa ɛ nye die dahuu wɔ Gyihova ɛzonlenlɛ nu a?” (1 Tim. 6:6-8) Akee tie bɛ wɔ mekɛ mɔɔ bɛlɛka nwolɛ edwɛkɛ bɛahile wɔ la.

16. Saa kpanyinli nee kakula di adwelie a, kɛzi ɔbaboa bɛ mu nwiɔ ɛ?

¹⁶ Saa kpanyinli nee kakula di adwelie a, ɔboa bɛ mu nwiɔ. (Wlo. 1:12) Ɔbamaa ngakula anyia anwodozo bɔkɔɔ kɛ Gyihova nea ye nɔhalɛ azonvolɛ yɛɛ kpanyinli ne noko bade nganeɛ kɛ wɔli ye eni. Ɔ nye balie nwo kɛ ɔbaha kɛzi Gyihova ɛyila ye la anwo edwɛkɛ yeahile wɔ.

17. Duzu ati a yɛkola yɛka kɛ mekɛ ɛlɛkɔ la ɛnee mgbanyinli anwo ɛlɛyɛ fɛ ɛ?

¹⁷ Awie ɛlɛyɛ kpanyinli a, ye anwofɛlɛko ne sɛkye, noko menli mɔɔ di nɔhalɛ maa Gyihova la anwo yɛ fɛ maa ye mekɛ biala. (1 Tɛs. 1:2, 3) Duzu ati a ɛhye le zɔ a? Ɔluakɛ bɛmaa Nyamenle sunsum ne ɛtete bɛ na yeboa bɛ yemaa bɛnyia subane ngɛnlɛma wɔ ɛvolɛ dɔɔnwo anu. Saa yɛnwu yɛ mediema mɔɔ ɛyɛ mgbanyinli la kpalɛ, yɛdi bɛ eni na yɛsukoa ninyɛne dɔɔnwo yɛfi bɛ ɛkɛ a, ɔbamaa yɛanwu kɛ bɛsonle bolɛ kpalɛ!

18. Duzu a yɛbazuzu nwo wɔ edwɛkɛ bieko anu a?

¹⁸ Saa asafo ne anwo bayɛ se a, ɔwɔ kɛ ngakula bu mgbanyinli kɛ bɛsonle bolɛ na mgbanyinli noko bu ngakula kɛ bɛsonle bolɛ. Wɔ edwɛkɛ bieko anu, yɛbazuzu kɛzi mgbanyinli bahile kɛ bɛbu ngakula mɔɔ wɔ asafo ne anu la kɛ bɛsonle bolɛ la anwo.