EDWƐKƐ 40
“Bɛfa Menli Dɔɔnwo Ne Bɛba Tenleneyɛlɛ Nu”
“Bɛdabɛ mɔɔ bɛfa menli dɔɔnwo ne bɛba tenleneyɛlɛ nu la, [bada] kɛ nwɔlɔra la dahuu.”—DAN. 12:3.
EDWƐNE 151 Ɔbavɛlɛ
MƆƆ YƐBAZUKOA *
1. Ninyɛne mɔɔ yɛ anyelielɛ la boni a basisi wɔ Ɛvolɛ Apenle Ko Tumililɛ ne anu a?
KENLE mɔɔ bɛbabɔ ɔ bo kɛ bɛdwazo menli bɛara azɛlɛ ye azo wɔ Kelaese Ɛvolɛ Apenle Ko Tumililɛ ne anu la, ɔbayɛ anyelielɛ kpalɛ! Menli mɔɔ bɛ alɔvolɛ ɛwu la kɔsɔɔti anye la kɛ bɛbanwu bɛ bieko. Zɔhane ala a Gyihova noko te nganeɛ a. (Dwobu 14:15) Saa bɛdwazo yɛ alɔvolɛ a, nea kɛzi awie biala anye balie a. Kɛ mɔɔ yɛnwunle ye wɔ edwɛkɛ mɔɔ li ɛhye anyunlu anu la, “tenlenema” mɔɔ bɛbahɛlɛ bɛ aluma wɔ ngoane buluku ne anu la badwazo ‘ara ngoane nu’ bieko. (Gyi. 24:15; Dwɔn 5:29) Wɔannea a yɛ alɔvolɛ dɔɔnwo baboka menli mɔɔ bɛbalimoa bɛadwazo bɛ wɔ azɛlɛ ye azo la anwo. * Eza “bɛdabɛ mɔɔ bɛnle tenlenema,” mɔɔ bie a le kɛ bɛdabɛ mɔɔ bɛannyia nwolɛ adenle dɔɔnwo bɛanzukoa Gyihova anwo debie anzɛɛ bɛanzonle ye nɔhalɛ nu kolaa na bɛawu la ‘badwazo na bɛabua bɛ ndɛne.’
2-3. (a) Kɛ mɔɔ Ayezaya 11:9, 10 kile la, ngilehilelɛ gyima mɔɔ tɛla biala la boni a bɛbayɛ a? (b) Duzu a yɛbazuzu nwo wɔ edwɛkɛ ɛhye anu a?
2 Ɔhyia kɛ bɛkilehile menli ɛhye mɔ mɔɔ bɛbadwazo bɛ la amuala. (Aye. 26:9; 61:11) Ɔti ɔwɔ kɛ bɛyɛ ngilehilelɛ gyima mɔɔ tɛla biala la. (Kenga Ayezaya 11:9, 10.) Duzu ati ɔ? Ɔluakɛ ɔbahyia kɛ bɛdabɛ mɔɔ bɛnle tenlenema mɔɔ bɛbadwazo bɛ la sukoa Gyisɛse Kelaese, Belemgbunlililɛ ngyehyɛleɛ ne, ɛkpɔnedeɛ ne yɛɛ edwɛkɛ mɔɔ rale Gyihova duma ne nee ye tumililɛ ne anwo la anwo debie. Ɔwɔ kɛ tenlenema ne bɔbɔ sukoa bodane mɔɔ Gyihova lɛ maa azɛlɛ ne la anwo ninyɛne mɔɔ ɔyɛle ye ngyikyingyikyi ɔhilehilele ye menli ne la anwo debie. Nɔhavoma ɛhye mɔ bie wule mekɛ tendenle kolaa na bɛahɛlɛ Baebolo ne bɛawie. Bɛdabɛ mɔɔ bɛnle tenlenema nee tenlenema ne amuala lɛ ninyɛne dɔɔnwo sukoa.
3 Wɔ edwɛkɛ ɛhye anu, yɛbazuzu kpuya ɛhye mɔ anwo: Kɛzi bɛbayɛ ngilehilelɛ gyima kpole ɛhye ɛ? Kɛzi mɔɔ menli bayɛ wɔ ngilehilelɛ gyima ɛhye anwo la bahile kɛ bɛbahɛlɛ bɛ aluma wɔ ngoane buluku ne anu bɔkɔɔ anzɛɛ bɛnrɛhɛlɛ ɛ? Ɔwɔ kɛ kpuya ɛhye mɔ anwo mualɛ ne kyia yɛ ɛnɛ. Kɛ mɔɔ yɛbanwu ye la, ngapezo ngɛnlɛma mɔɔ wɔ Daneɛle nee Yekile mbuluku ne mɔ anu la baboa yɛ yeamaa yɛade mɔɔ bazi wɔ mekɛ mɔɔ bɛbadwazo mowuamra la abo kpalɛ. Mɔɔ limoa, maa yɛzuzu ninyɛne mɔɔ yɛ anyelielɛ mɔɔ bɛha nwolɛ edwɛkɛ wɔ ngapezo mɔɔ wɔ Daneɛle 12:1, 2 la anwo.
“MENLI . . . MƆƆ BƐDEDA WƆ AZƐLƐ NE ANU LA BADWAZO”
4-5. Duzu a Daneɛle 12:1 ka ye wɔ awieleɛ mekɛ ne anwo a?
4 Kenga Daneɛle 12:1. Daneɛle buluku ne ka ninyɛne mɔɔ yɛ anyelielɛ mɔɔ basisi wɔ awieleɛ mekɛ ne anu la anwo edwɛkɛ. Kɛ neazo la, Daneɛle 12:1 ka kɛ Maekeɛle, mɔɔ le Gyisɛse Kelaese la, “gyi [Nyamenle] menli ne anzi.” Ngapezo ne foa zɔhane bɔle ɔ bo kɛ ɔba nu wɔ 1914 wɔ mekɛ mɔɔ bɛyɛle Gyisɛse Nyamenle anwuma Belemgbunlililɛ ne azo Belemgbunli la.
5 Noko eza bɛhanle bɛhilele Daneɛle kɛ Gyisɛse “badwazo agyinla” wɔ “anwongyelelɛ mekɛ mɔɔ bie ɛtɛbale ɛlɛ ɔvi mekɛ mɔɔ bɛhyehyɛle maanle mɔɔ limoa kɔkpula mekɛ zɔhane la” anu. “Anwongyelelɛ mekɛ” ɛhye a le “anwongyelelɛ kpole” ne mɔɔ bɛha nwolɛ edwɛkɛ wɔ Mateyu 24:21 la. Gyisɛse badwazo agyinla anzɛɛ balie Nyamenle menli ne wɔ anwongyelelɛ mekɛ zɔhane awieleɛ, mɔɔ le Amagɛdɔn ne la anu. Yekile buluku ne ka menli ɛhye mɔ anwo edwɛkɛ kɛ ‘menli ekpunli kpole bie mɔɔ ɛvi anwongyelelɛ kpole ne anu la.’—Yek. 7:9, 14.
6. Saa menli ekpunli kpole ne pɛ anwongyelelɛ kpole ne wie a, duzu a bazi a? Kilehile nu. (Eza nea “Kpuya Mɔɔ Vi Kengavolɛma Ɛkɛ” mɔɔ wɔ magazine ɛhye anu mɔɔ fale bɛdabɛ mɔɔ bɛbadwazo bɛ bɛara azɛlɛ ye azo anwo la.)
6 Kenga Daneɛle 12:2. Saa menli ekpunli kpole ne pɛ anwongyelelɛ mekɛ ne wie a, duzu a bazi a? Ngapezo ɛhye ɛnvale sɛkɛlɛneɛ adenle zo ewudwazo bie, mɔɔ kile Nyamenle menli ne mɔɔ bɛbara ngoane nu wɔ sunsum nu, mɔɔ bahɔ zo wɔ awieleɛ mekɛ ne anu la anwo, kɛ mɔɔ ɛnee yɛte ɔ bo wɔ dɛba ne la. * Emomu, edwɛkɛ ne fale menli mɔɔ bɛbadwazo bɛ wɔ ewiade fofolɛ ne mɔɔ ɛlɛba la anu la anwo. Kɛzi yɛkola yɛka ye zɔ ɛ? Edwɛkɛ mɔɔ bɛhile ɔ bo “azɛlɛ ne” wɔ Daneɛle 12:2 la ala a bɛhile ɔ bo “ndɛtɛlɛ” wɔ Dwobu 17:16 la, na ɔkile “Nla.” Ɛhye maa yɛnwu kɛ edwɛkɛ mɔɔ wɔ Daneɛle 12:2 la fale ewudwazo mɔɔ bahɔ zo wɔ mekɛ mɔɔ awieleɛ mekɛ ne ɛra ye awieleɛ na Amagɛdɔn konle ne ɛgua la.
7. (a) Adenle boni azo a bɛbadwazo bie mɔ bɛamaa bɛanyia “dahuu ngoane” ɛ? (b) Duzu ati a ɛhye le “ewudwazo kpalɛ” a?
7 Noko mɔɔ Daneɛle 12:2 hanle kɛ bɛbadwazo bie mɔ bɛamaa bɛanyia “dahuu ngoane” la, duzu a ɛnee ɔlɛkile a? Ɔkile kɛ bɛdabɛ mɔɔ bɛbadwazo bɛ mɔɔ bɛbanwu anzɛɛ bɛbahɔ zo bɛanwu Gyihova nee Gyisɛse wɔ ɛvolɛ 1,000 ne anu, na bɛadie bɛ la bɛanyia dahuu ngoane. (Dwɔn 17:3) Ɛhye bayɛ “ewudwazo kpalɛ” adɛla alesama bie mɔ mɔɔ bɛdwazole bɛ wɔ tete ne la ɛdeɛ ne. (Hib. 11:35) Duzu ati ɔ? Ɔluakɛ menli ɛhye mɔ mɔɔ bɛnli munli la wule bieko.
8. Kɛzi bɛbadwazo bie mɔ bɛamaa bɛabɔ “anyiemgba na bɛayɛ kyibadeɛ dahuu” ɛ?
8 Noko tɛ menli mɔɔ bɛbadwazo bɛ la amuala a bɛbahulo kɛ Gyihova bahilehile bɛ a. Daneɛle ngapezo ne hanle kɛ bɛbadwazo bie mɔ bɛamaa bɛabɔ “anyiemgba na bɛayɛ kyibadeɛ dahuu.” Kɛmɔ bɛbade atua la ati, bɛnrɛhɛlɛ bɛ aluma wɔ ngoane buluku ne anu yɛɛ bɛnrɛnyia dahuu ngoane. Emomu, bɛbayɛ “kyibadeɛ dahuu” anzɛɛ bɛbazɛkye bɛ. Ɔti Daneɛle 12:2 ɛlɛka mɔɔ bado bɛdabɛ mɔɔ bɛbadwazo bɛ la amuala wɔ mɔɔ bɛbayɛ wɔ bɛ ewudwazo ne anzi la anwo edwɛkɛ. * (Yek. 20:12) Bie mɔ banyia dahuu ngoane; bie mɔ noko ɛnrɛyia dahuu ngoane.
“BƐFA MENLI DƆƆNWO NE BƐBA TENLENEYƐLƐ NU”
9-10. Duzu bieko a bazi wɔ anwongyelelɛ kpole ne anzi a, na nwane mɔ a “bada kpalɛ kɛ anwomanyunlu la” a?
9 Kenga Daneɛle 12:3. Duzu bieko a bazi wɔ “anwongyelelɛ mekɛ” ne mɔɔ ɛlɛba la anzi a? Ɛye mɔɔ Daneɛle 12:2 hanle la ɛsie ahane a, ngyɛnu 3 ne hanle debie mɔɔ bazi wɔ anwongyelelɛ kpole ne anzi la anwo edwɛkɛ.
10 Nwane mɔ a “bada kpalɛ kɛ anwomanyunlu la” a? Edwɛkɛ mɔɔ wɔ Mateyu 13:43 la boa yɛ maa yɛte edwɛkɛ ɛhye abo: “Mekɛ zɔhane, tenlenema bada wienyi kɛ sɛnzɛne la wɔ bɛ Ze Belemgbunlililɛ ne anu.” Wɔ ɛke, ɛnee Gyisɛse ɛlɛka “Belemgbunlililɛ ne amra,” ɔ mediema mɔɔ bɛkpokpa bɛ mɔɔ ɔ nee ɛ bali tumi wɔ anwuma Belemgbunlililɛ ne anu la anwo edwɛkɛ. (Mat. 13:38) Ɔti ɔbayɛ kɛ ɛnee Daneɛle 12:3 ɛlɛka menli mɔɔ bɛkpokpa bɛ nee gyima mɔɔ bɛbayɛ wɔ Ɛvolɛ Apenle Ko Tumililɛ ne anu la anwo edwɛkɛ.
Menli 144,000 ne nee Gyisɛse babɔ nu ayɛ gyima na bɛahile ngilehilelɛ gyima mɔɔ bɛbayɛ wɔ ɛvolɛ 1,000 ne anu la adenle (Nea ɛdendɛkpunli 11)
11-12. Duzu gyima a menli 144,000 ne bayɛ wɔ ɛvolɛ 1,000 ne anu a?
11 Kɛzi menli mɔɔ bɛkpokpa bɛ la bɛava ‘menli dɔɔnwo ne ara tenleneyɛlɛ nu’ ɛ? Menli mɔɔ bɛkpokpa bɛ la nee Gyisɛse Kelaese babɔ nu ayɛ gyima na bɛanlea ngilehilelɛ gyima mɔɔ bɛbayɛ wɔ azɛlɛ ye azo wɔ ɛvolɛ 1,000 ne anu la azo. Menli 144,000 ne bayɛ arelemgbunli na eza bɛayɛ ɛsɔfoma. (Yek. 1:6; 5:10; 20:6) Ɔti bɛbaboa bɛamaa bɛayɛ “maanle maanle ne mɔ ayile”—ngyikyigyikyi bɛbaboa alesama bɛamaa bɛali munli bieko. (Yek. 22:1, 2; Yiz. 47:12) Nea kɛzi ɛhye bamaa menli mɔɔ bɛkpokpa bɛ la anye alie a!
12 Nwane mɔ a bɛbaboka “menli dɔɔnwo ne” mɔɔ bɛbava bɛ bɛara tenleneyɛlɛ nu la anwo a? Bɛdabɛ mɔɔ bɛbadwazo bɛ nee bɛdabɛ mɔɔ bɛbapɛ Amagɛdɔn ne yɛɛ bie a ngakula mɔɔ bɛbawo bɛ wɔ ewiade fofolɛ ne anu la ɔ. Ɔkadwu ɛvolɛ 1,000 ne awieleɛ la, ɛnee awie biala mɔɔ de azɛlɛ ne azo la ɛli munli. Ɔti mekɛ boni a bɛbava pɛne bɛahɛlɛ bɛ aluma bɔkɔɔ wɔ ngoane buluku ne anu a?
SƆNEA MƆƆ LI AWIELEƐ
13-14. Duzu a ɔwɔ kɛ bɛdabɛ mɔɔ bɛli munli mɔɔ bɛwɔ azɛlɛ ne azo la amuala yɛ kolaa na bɛanyia dahuu ngoane a?
13 Ɔwɔ kɛ yɛkakye kɛ, saa awie di munli a, yemɔ ɛngile kɛ ye biala anu ɔbanyia dahuu ngoane. Nea mɔɔ dole Adam nee Yive la. Ɛnee bɛdi munli, noko ɛnee ɔwɔ kɛ bɛmaa Gyihova Nyamenle nwu kɛ bɛyɛ tieyɛ kolaa na yeamaa bɛ dahuu ngoane. Noko mɔɔ yɛ alɔbɔlɛ la a le kɛ bɛandie ye.—Wlo. 5:12.
14 Ɔkadwu ɛvolɛ 1,000 ne awieleɛ la, ɛnee kɛzi bɛdabɛ mɔɔ bɛwɔ azɛlɛ ye azo la tɛnlabelɛ ɛyɛ ɛ? Ɛnee bɛ muala bɛli munli. Asoo bɛdabɛ mɔɔ bɛli munli la amuala bɛagyinla Gyihova tumililɛ ne anzi bɔkɔɔ dahuu ɔ? Anzɛɛ bɛ nuhua bie mɔ bayɛ kɛ Adam nee Yive mɔɔ ɛnee bɛdi munli noko bɛandie ye la ɔ? Ɔwɔ kɛ yɛnyia kpuya ɛhye mɔ anwo mualɛ, noko wɔ adenle boni azo?
15-16. (a) Mekɛ boni a alesama kɔsɔɔti bɛanyia nwolɛ adenle ahile kɛ bɛdi nɔhalɛ bɛmaa Gyihova a? (b) Duzu a bavi sɔnea mɔɔ li awieleɛ la anu ara a?
15 Bɛbado Seetan efiade ɛvolɛ 1,000. Zɔhane mekɛ ne, ɔnrɛhola ɔnrɛbɛlɛbɛla awie biala. Noko ɛvolɛ 1,000 ne awieleɛ, bɛbaye Seetan bɛavi efiade. Akee ɔbabɔ mɔdenle kɛ ɔbɛlɛbɛla alesama mɔɔ ɛli munli la. Wɔ zɔhane mekɛ ne, alesama mɔɔ ɛli munli mɔɔ wɔ azɛlɛ ye azo la banyia nwolɛ adenle ahile ɛleka mɔɔ bɛgyi wɔ edwɛkɛ mɔɔ rale Nyamenle duma ne nee ye tumililɛ ne anwo la wienyi. (Yek. 20:7-10) Mɔɔ awie biala bayɛ wɔ Seetan mɛlɛbɛla ne anwo la a bahile kɛ ɔwɔ kɛ bɛkɛlɛ ye duma bɔkɔɔ wɔ ngoane buluku ne anu a.
16 Menli bie mɔɔ yɛnze bɛ dodo la bayɛ kɛ Adam nee Yive la, bɛbakpo Gyihova tumililɛ ne. Duzu a bado bɛ a? Yekile 20:15 ka kɛ: “Bɛvuandinle awie biala mɔɔ bɛangɛlɛ ye duma wɔ ngoane buluku ne anu la bɛdole senle tandane ne anu.” Bɛbazɛkye atuadelɛma ɛhye mɔ bɔkɔɔ. Noko alesama dɔɔnwo bali konim wɔ sɔnea ɛhye mɔɔ li awieleɛ la anu. Bɛbahɛlɛ bɛ aluma bɔkɔɔ wɔ ngoane buluku ne anu.
WƆ “AWIELEƐ MEKƐ NE ANU”
17. Duzu a bɛhanle bɛhilele Daneɛle kɛ ɔbazi wɔ yɛ mekɛ ye anu a? (Daneɛle 12:4, 8-10)
17 Saa yɛdwenle ninyɛne mɔɔ basisi kenle bie la anwo a, ɔmaa yɛ nye die! Noko eza anwumabɔvolɛ bie hanle yɛ mekɛ ye, mɔɔ le “awieleɛ mekɛ ne,” anwo edwɛkɛ bie mɔɔ hyia la hilele Daneɛle. (Kenga Daneɛle 12:4, 8-10; 2 Tim. 3:1-5) Anwumabɔvolɛ ne hanle hilele Daneɛle kɛ: “Nɔhalɛ ndelebɛbo babu.” Nyamenle menli ne bade ngapezo edwɛkɛ mɔɔ wɔ ye buluku ne anu la abo bɔkɔɔ. Anwumabɔvolɛ ne vale zɔle zolɛ kɛ, wɔ mekɛ ɛhye anu “amumuyɛma bɛahɔ zo ayɛ amumuyɛ, na amumuyɛnli biala ɛnrɛde ɔ bo.”
18. Duzu a ɔnrɛhyɛ ɔbado amumuyɛma a?
18 Ɛnɛ, ɔzɔho kɛ amumuyɛma fa bɛ nwo dwɔɔ wɔ bɛ amumuyɛ ɛbɛla ne mɔ anwo. (Mal. 3:14, 15) Noko ɔnrɛhyɛ, Gyisɛse babua bɛdabɛ mɔɔ bɛle kɛ mbɔnkye la ndɛne na yeaye bɛ yeavi menli mɔɔ bɛle kɛ mboane la anwo. (Mat. 25:31-33) Amumuyɛma ɛhye mɔ ɛnrɛnyia ngoane wɔ anwongyelelɛ kpole ne anu, yɛɛ bɛnrɛdwazo bɛ bɛnrɛra ewiade fofolɛ ne anu. Bɛnrɛhɛlɛ bɛ aluma wɔ “ngakyelɛ buluku” ne mɔɔ bɛha nwolɛ edwɛkɛ wɔ Malakae 3:16 la anu.
19. Duzu a ɔwɔ kɛ yɛyɛ ye ɛnɛ a, na duzu ati ɔ? (Malakae 3:16-18)
19 Ɛnɛ a ɔwɔ kɛ yɛda ye ali kɛ yɛmboka amumuyɛma ne anwo a. (Kenga Malakae 3:16-18.) Gyihova ɛlɛboɔboa bɛdabɛ mɔɔ ɔbu bɛ kɛ bɛle “agyapadeɛ titili” anzɛɛ bɛsonle bolɛ bɛmaa ye la anloa. Nɔhalɛ nu, yɛkulo kɛ ɔfa yɛ ɔboka nwo.
Nea kɛzi ɔbayɛ anyelielɛ kɛ yɛbanwu Daneɛle, yɛ alɔvolɛ yɛɛ menli gyɛne dɔɔnwo kɛ bɛbadwazo na bɛanyia bɛ kyɛfoa wɔ ewiade fofolɛ ne anu a! (Nea ɛdendɛkpunli 20)
20. Ɛwɔkɛ mɔɔ li awieleɛ la boni a bɛbɔle Daneɛle a, na duzu ati a ɛ nye la kɛ zɔhane ɛwɔkɛ ne bara nu a?
20 Nɔhalɛ nu, yɛde mekɛ mɔɔ yɛ anyelielɛ la anu. Noko ɔka ekyii ninyɛne mɔɔ yɛ anyelielɛ kpalɛ la sisi. Ɔnrɛhyɛ, yɛbanwu kɛzi bɛbazɛkye amumuyɛma amuala la. Yemɔ anzi, yɛbanwu kɛ ɛwɔkɛ mɔɔ bɛbɔle Daneɛle la ɛra nu: “Ɛbadwazo na wɔanyia wɔ kyɛfoa wɔ mekɛ mɔɔ li awieleɛ la anu.” (Dan. 12:13) Ɛ nye la mekɛ mɔɔ Daneɛle nee wɔ alɔvolɛ ‘badwazo’ bieko la ɔ? Saa zɔhane a ɔde a, ɛnee yɛ biala mɔɔ ɛbahola la di nɔhalɛ kɛkala na ɛbahola wɔanyia anwodozo kɛ, wɔ duma baha Gyihova ngoane buluku ne anu.
EDWƐNE 80 ‘Bɛzɔ Gyihova Bɛnlea Na Ɔle Kpalɛ’
^ Edwɛkɛ ɛhye bahilehile ndelebɛbo fofolɛ mɔɔ yɛnyia wɔ ngilehilelɛ gyima kpole mɔɔ bɛha nwolɛ edwɛkɛ wɔ Daneɛle 12:2, 3 la anu. Yɛbazuzu mekɛ mɔɔ ɛhye bazi nee menli mɔɔ bɛbayɛ gyima ɛhye la anwo. Eza yɛbanwu kɛzi ngilehilelɛ gyima ɛhye baziezie bɛdabɛ mɔɔ bɛwɔ azɛlɛ ne azo yeamaa sɔnea mɔɔ li awieleɛ mɔɔ bara wɔ Kelaese Ɛvolɛ Apenle Ko Tumililɛ ne awieleɛ la.
^ Bie a bɛbalimoa bɛadwazo awolɛndoazo mɔɔ bɛali nɔhalɛ ahɔ ewule nu wɔ awieleɛ mekɛ ne anu la na akee yeadoɔdoa zo yeahɔ. Saa ɔba ye zɔhane a, ɔbamaa awolɛndoazo biala anyia nwolɛ adenle anwu bɛdabɛ mɔɔ ɛnee bɛze bɛ la. Kɛzi ɔde ye biala la, Ngɛlɛlera ne hanle kɛ bɛbadwazo bɛdabɛ mɔɔ bɛbahɔ anwuma la “wɔ ye mekɛ nloa,” na yɛbahola yɛaha kɛ zɔhane ala a bɛdabɛ mɔɔ bɛbadwazo bɛ wɔ azɛlɛ ye azo la ɛdeɛ ne noko bayɛ a.—1 Kɔl. 14:33; 15:23.
^ Ngilenu ɛhye le ndelebɛbo fofolɛ mɔɔ yɛnyia wɔ edwɛkɛ mɔɔ wɔ Pay Attention to Daniel’s Prophecy! buluku ne tile 17, yɛɛ July 1, 1987, The Watchtower ne m. 21-25 anwo la.
^ Noko edwɛkɛ “tenlenema” nee “bɛdabɛ mɔɔ bɛnle tenlenema” mɔɔ wɔ Gyima ne 24:15 yɛɛ edwɛkɛ “bɛdabɛ mɔɔ bɛyɛle ninyɛne mgbalɛ” nee “bɛdabɛ mɔɔ bɛyɛle ninyɛndane” mɔɔ wɔ Dwɔn 5:29 la fale ɛbɛla mɔɔ bɛdabɛ mɔɔ bɛbadwazo bɛ la bɔle kolaa na bɛawu la anwo.
