Mɔɔ 1940 pɛle nu la, ɔ nzi mekɛ ekyii ɛnee me awovolɛ nee Gyihova Alasevolɛ sukoa Baebolo ne. Zɔhane Baebolo ɛzukoalɛ ne angɔ zo, noko ɛnee me mame ta nyia Watchtower nee Awake! magazine ne bie. Wɔ 1950, bɛyɛle maanle maanle avinli nyianu wɔ New York City, na me abusua ne hɔle bie.

Yemɔ anzi mekɛ ekyii, Adiema Lawrence Jeffries bɔle ɔ bo kɛ ɔba yɛ ɛkɛ. Ɔvale ɔziele ɔ nye zo kɛ ɔbaboa me yeamaa meazukoa nɔhalɛ ne. Mɔlebɛbo ne, ɛnee me nee ye ɛnyɛ adwenle fee kɛ Gyihova Alasevolɛ ɛnva bɛ nwo ɛnwula maanyɛlɛ nee sogyahɔlɛ nu la. Menganle mengilele ye kɛ, saa awie biala mɔɔ wɔ America la ka kɛ ɔnrɛhɔ konle a, yɛ agbɔvolɛ bara yɛ nwo zo na bɛava maanle ne amuala. Adiema Jeffries nyianle abotane ɔ nee me zuzule nwo kɛ: “Saa menli mɔɔ wɔ America la amuala ɛlɛsonle Gyihova Nyamenle na bɛ agbɔvolɛ ba bɛ nwo zo a, anrɛɛ duzu a ɛsuzu kɛ ɔbayɛ a?” Mɔɔ ɔhanle wɔ edwɛkɛ zɔhane nee edwɛkɛ gyɛne nwo la maanle menwunle kɛ me kpolerazulɛ ne ɛngyi kpɔkɛ zo. Yemɔ maanle me nye liele nwo kpole kɛ mebazukoa nɔhalɛ ne.

Menvale dɔnehwele dɔɔnwo mengengale The Watchtower nee Awake! magazine dɛba mɔɔ ɛnee me mame ɛva ɛzie yɛ azɛlɛ bo sua ne anu la. Yeangyɛ, menwunle kɛ nɔhalɛ ne ɛne, ɔti menganle mengilele Adiema Jeffries kɛ ɔ nee me ɛzukoa Baebolo ne. Eza membɔle ɔ bo kɛ mekɔ debiezukoalɛ dahuu. Me nye liele mɔɔ ɛnee melɛsukoa la anwo na membanyɛle nolobɔlɛnli. Mɔɔ mendele ɔ bo kɛ “Gyihova kenle kpole ne ɛbikye!” la, bodane mɔɔ gyi me nye zo la hakyile. (Zɛf. 1:14) Yunivɛsiti ɛhɔlɛ ne vile me nu, na ɛnee mekulo kɛ meboa awie mɔ memaa bɛsukoa Baebolo nu nɔhalɛ ne.

Menwiele sukunwiɔ wɔ June 13, 1956, na ye kenle nsa anzi, bɛzɔnenle me wɔ maangyebakyi nyianu  bie abo. Ɛnee menze kɛ Gyihova mɔɔ mendule me nwo memaanle ye kɛ mebazukoa ɔ nwo debie na meahilehile awie mɔ la bamaa meanyia nyilalɛ dɔɔnwo zɛhae.

Bɛzɔnenle me la anzi, ye siane nsia membanyɛle dahuu adekpakyelɛnli. Ɛnee edwɛkɛ mɔɔ se “Can You Serve Where the Need Is Great?” (Ɛbahola Wɔazonle Wɔ Ɛleka Mɔɔ Bɛhyia Moalɛ Kpole La Ɔ?) la wɔ December 1956 Kingdom Ministry ne anu. Ɛnee mebahola meayɛ ye zɔ. Ɛnee mekulo kɛ mekɔboa wɔ ɛleka mɔɔ menli ekyi bie a ɛlɛbɔ edwɛkpa ne nolo la.​—Mat. 24:14.

Mendule mengɔle Edgefield mɔɔ wɔ South Carolina la. Ɛnee nolobɔlɛma nna pɛ a wɔ asafo mɔɔ wɔ ɛkɛ la anu a. Mengɔmbokale bɛ memaanle yɛyɛle nnu. Yɛyɛle yɛ debiezukoalɛ ne wɔ adiema nrenyia bie sua nyunlu. Ɛnee siane biala, mefa dɔnehwele 100 mekɔ daselɛlilɛ. Menlɛ alagye fee ɔluakɛ ɛnee medi edwɛkɛhanlɛ gyima ne anyunlu yɛɛ meyɛ gyimalilɛ dɔɔnwo wɔ debiezukoalɛ bo. Mɔɔ yɛ anyelielɛ la a le kɛ, mekɛ mɔɔ melɛyɛ gyimalilɛ dɔɔnwo la ɛnee melɛsukoa Gyihova anwo ninyɛne dɔɔnwo.

Ɛnee raalɛ bie mɔɔ me nee ye sukoa Baebolo ne la siezie funli wɔ Johnston, ɔ nee ɛleka mɔɔ yɛwɔ la anwa. Ɔmaanle me gyima mɔɔ mekola mefa mekɛ ekyii meyɛ la wɔ ye ɛkɛ ne, yɛɛ ɔmaanle yɛvale ye sua ekyi ko yɛyɛle Belemgbunlililɛ Asalo.

Adiema ne mɔɔ nee me zukoale debie la ara, Jolly Jeffries dule vile Brooklyn, New York, rale ɛleka mɔɔ mewɔ la. Ɛnee ɔle adekpakyelɛnli ɔti yɛbɔle nu yɛyɛle gyima. Ɛnee yɛde adiema bie kale mɔɔ bɛyɛ ye sua mɔɔ ɔvale ɔmaanle yɛ la anu.

Wɔ ɛleka mɔɔ mewɔ la, ɛnee ɛyɛ gyima a bɛndua wɔ kakɛ kpalɛ. Ɛyɛ gyima kenle ko biala a, bɛtua wɔ dɔla nwiɔ anzɛɛ nsa pɛ. Kenle ko bie, menvale ezukoa mɔɔ ɛnee ɛha wɔ me nwo amuala la mengɔntotɔle aleɛ wɔ sotɔɔ. Mɔɔ mevi ɛkɛ ne menvindele la, menyiale nrenyia bie na ɔbizale me kɛ: “Ɛnyia gyima a ɛbayɛ ɔ? Dɔnehwele ko biala mebadua wɔ dɔla ko.” Ɔmaanle me kenle nsa gyima kɛ menziezie ɛleka bie mɔɔ bɛlɛsi sua la. Ɔlale ali wienyi kɛ ɛnee Gyihova ɛlɛboa me yeamaa meadɛnla Edgefield. Noko mengɔle maanle maanle avinli nyianu mɔɔ bɛyɛle ye wɔ 1958 wɔ New York City la bie.

Nyianu ne kenle mɔɔ tɔ zo nwiɔ la azo, debie titili bie zile. Menyiale Ruby Wadlington, dahuu adekpakyelɛnli bie mɔɔ ɛnee ɔwɔ Gallatin, Tennessee la. Kɛmɔ ɛnee yɛ mu nwiɔ yɛkulo kɛ yɛyɛ edwɛkpatɛlɛvolɛma la ati, yɛhɔle ayia mɔɔ bɛyɛle bɛmaanle menli mɔɔ anye die Geleade sukulu ne ɛhɔlɛ nwo la bie. Nzinlii, yɛbɔle ɔ bo kɛ yɛkɛlɛ yɛ nwo ngɛlata. Akee bɛdole ɛsalɛ bɛvɛlɛle me kɛ membamaa bagua nu ɛdendɛlɛ wɔ Gallatin. Menvale nwolɛ adenle ne menganle mengilele ye kɛ mekulo kɛ megya ye. Mendule mengɔle Ruby asafo nu, na wɔ 1959 yɛgyale.

Mɔɔ menlile ɛvolɛ 23 la, bɛkpale me kɛ asafo sonvolɛ (mɔɔ ɛnɛ bɛfɛlɛ ye mgbanyima avinli  ngitanwodivolɛ la) wɔ Gallatin. Mɔɔ Charles Thompson rayɛle maangyebakyi zo neavolɛ la, yɛ asafo ne a ɔlimoale ɔrazonlenle yɛ a. Ɛnee ɔlɛ anwubielɛ kpalɛ; noko ɔbizale me adwenle wɔ ninyɛne mɔɔ mediema ne mɔ hyia nwo nee kɛzi maangyebakyi zo neavolɛma gyɛne lile ɛhye mɔ anwo gyima la. Menzukoale menvile ye ɛkɛ ne kɛ ɔle kpalɛ kɛ ɛbabiza kpuya wɔanwu edwɛkɛ bie akunlu nee ɔ nzi kolaa na wɔali nwolɛ gyima.

Wɔ May 1964, bɛhanle kɛ mengɔ Belemgbunlililɛ Gyima Sukulu mɔɔ bɛbayɛ ye siane ko wɔ South Lansing, New York la bie. Mediema mɔɔ nleanle sukulu ɛhye azo la maanle menyianle ɛhulolɛ kpole kɛ mebazukoa dɔɔnwo na meanyi sunsum nu.

Wɔ January 1965, bɛhanle kɛ me nee Ruby ɛhɔyɛ maangyebakyi zo neavolɛ gyima. Ɛnee yɛ maangyebakyi ne le kpole, ɔbɔ ɔ bo wɔ Knoxville, Tennessee too ɔkɔdwu asɛɛ Richmond, Virginia. Ɛnee asafo mɔɔ wɔ North Carolina, Kentucky, yɛɛ West Virginia la boka nwo. Menzonlenle asafo mɔɔ abibile ala a wɔ nu la, ɔluakɛ wɔ zɔhane mekɛ ne ɛnee mɛla ɛmmaa adenle kɛ alɔfolɛ nee abibile babɔ nu ayia wɔ United States nyiakɛ. Ɛnee mediema ne mɔ le ehyiavolɛma, na yɛzukoale kɛ yɛbava mɔɔ yɛlɛ la bie yɛamaa bɛdabɛ mɔɔ bɛwɔ ngyianlɛ nu la. Maangyebakyi zo neavolɛ bie mɔɔ ɛyɛ gyima ne ɛhyɛ la maanle menzukoale debie titili bie, ɔhanle kɛ: “Maa bɛnwu kɛ ɛle bɛ diema. Saa ɛkɔ asafo bie anu a, mmayɛ ɛ nwo kɛ ɛdawɔ a ɛle kpanyinli wɔ ɛkɛ a. Saa bɛnwu wɔ kɛ ɛle bɛ diema a yɛɛ ɛbahola wɔaboa bɛ a.”

Mɔɔ yɛhɔkpɔlale asafo ekyi bie la, Ruby bɔle ɔ bo kɛ ɔ nee bɛlɛra bie mɔɔ lɛ ɔ ra raalɛ mɔɔ ɛli ɛvolɛ ko la sukoa debie. Ɛnee awie biala ɛnle asafo ne anu mɔɔ ɔ nee ye badoa ye debiezukoalɛ ne azo a, ɔti ɛnee Ruby dua ngɛlata ɛhɛlɛlɛ zo ɔ nee ye sukoa. Mɔɔ yɛhɔkpɔlale asafo ne bieko la, bɛlɛra ne rale debiezukoalɛ ne amuala bie. Mɔɔ mediema mraalɛ adekpakyelɛ titilima nwiɔ rale asafo ne anu la, bɛ nee ye doale ye debiezukoalɛ ne azo na yeangyɛ, bɛzɔnenle ye. Wɔ ɛvolɛ 30 anzi wɔ 1995, wɔ Patterson Bɛtɛle, bɛlɛra bie nee Ruby dendɛle. Bɛlɛra ne mɔɔ Ruby nee ye zukoale debie la ara raalɛ ne ɔ. Ɛnee ɔ nee ɔ hu boka Geleade Sukulu mɔɔ tɔ zo 100 la sukoavoma ne anwo.

Maangyebakyi mɔɔ tɔ zo nwiɔ mɔɔ yɛhɔzonlenle wɔ ɛkɛ la wɔ central Florida. Mekɛ ɛhye ɛnee yɛhyia kale nwo, ɔti yɛdɔle bie mɔɔ ye bolɛ ka aze la. Noko wɔ dapɛne mɔɔ limoa la anu, debie zɛkyele wɔ ye engine ne anu. Ɛnee yɛnlɛ ezukoa mɔɔ yɛbava yɛayɛ ye boɛ a. Menvɛlɛle adiema nrenyia bie mɔɔ ɛnee mesuzu kɛ ɔbahola yeaboa yɛ la. Ɔmaanle ye gyimayɛvoma ne ko yɛle yɛ kale ne boɛ, noko yeanlie ɛhwee. Ɔhanle ye sikalɛ kɛ, “Yɛli nwolɛ gyima yɛwie.” Ɔdaye mumua ne ɔhyɛle yɛ ezukoa bɔbɔ! Ɛhye le kɛzi Gyihova nea ye azonvolɛ la anwo neazo kɛnlɛma. Ɔhakyele yɛ kɛ ɔwɔ kɛ yɛyɛ nyele yɛmaa awie mɔ.

Yɛkɔkpɔla asafo biala a, yɛtɛnla mediema azua nu. Ɛhye maanle yɛnyianle agɔnwolɛma kpalɛ dɔɔnwo. Kenle ko bie, ɛnee melɛkɛlɛ asafo bie anwo amaneɛbɔlɛ, noko meanwie ɔti mengyakyile ye wɔ milahyinli ne anu. Ye nɔsolɛ nu mɔɔ menziale membale sua nu la, menwunle kɛ abusua ne ara nrenyia mɔɔ ɛli ɛvolɛ nsa la ɛmiemia milahyinli ne azo ɛhɛlɛ bie ɛboka nwo. Menvale mengolole ɔ nwo wɔ ɛvolɛ dɔɔnwo anu.

Wɔ 1971, menyianle kɛlata kɛ mengɔnyɛ maangyeba zo neavolɛ wɔ New York City. Ɔzinle yɛ nwo! Mɔɔ yɛhɔle ɛkɛ ne la, ɛnee meli ɛvolɛ 34 pɛ. Mediema ne mɔ liele bɛ maangyeba zo neavolɛ mɔɔ limoa mɔɔ le bibinli la kɛnlɛma.

Mɔɔ membanyɛle maangyeba zo neavolɛ la, ɛnee me nye die nwo kɛ mebahilehile awie mɔ dapɛne awieleɛ biala wɔ maangyebakyi nyianu bo. Ɛnee maangyebakyi zo neavolɛma ne anu dɔɔnwo lɛ anwubielɛ tɛla me. Bɛ nuhua ko bɔbɔ a maanle me ɛzɔnenlɛ ɛdendɛlɛ ne a. Nzinlii, bɛ nuhua ko mɔɔ bɛfɛlɛ ye Theodore Jaracz la rabokale Neazo Eku ne anwo. Eza ɛnee mediema mrenyia dɔɔnwo mɔɔ lɛ anwubielɛ la yɛ gyima wɔ Brooklyn Bɛtɛle. Ɔyɛ me fɛ kɛ bɛ nee Bɛtɛlema ne ammaa me ahonle andu la. Ɛhye maanle menwunle kɛ mboaneneavolɛma ɛhye mɔ mɔɔ lɛ ɛlɔlɛ la fa bɛ nwo to Baebolo ne azo yɛɛ bɛfa nɔhalɛlilɛ bɛboa ahyehyɛdeɛ ne. Bɛ mɛlɛbɛnwoaze ne ammaa me maangyeba zo neavolɛ gyima ne anyɛ se fee.

Wɔ 1974, Neazo Eku ne maanle maangyebakyi zo neavolɛma ekpunli bie hɔyɛle maangyeba zo neavolɛ gyima ne na bɛmaanle menziale mengɔnyɛle maangyebakyi zo neavolɛ​—mekɛ ɛhye, yemɔ mengɔle South Carolina. Mekɛ zɔhane, ɛnee abibile nee alɔfolɛ mɔɔ wɔ asafo ne mɔ nee maangyebakyi ne mɔ anu la kola bɔ nu yia na ɔmaanle mediema ne mɔ anye liele kpalɛ.

Mɔɔ 1976 ɛlɛkɔ awieleɛ la, bɛmaanle mengɔnyɛle gyima wɔ Georgia maangyebakyi mɔɔ wɔ Atlanta nee Columbus avinli la. Menli bie hɔdole senle wɔ abibile abusua bie sua nu hunle ngakula nnu, na mekakye mekɛ mɔɔ mengɔmaanle bɛ ɛzɛne ɛdendɛlɛ ne la kpalɛ. Bɛ mame bodale, ɔti bɛvale ye bɛhɔdole asopiti. Gyihova Alasevolɛ mɔɔ bɛle abibile nee alɔfolɛ la dɔɔnwo rale asopiti ɛkɛ rakyekyele awovolɛ ne mɔ arɛle. Menwunle kɛ mediema ne mɔ lɛ ɛlɔlɛ kpole. Ahunluyelɛyelalɛ ɛhye kola boa Nyamenle azonvolɛ ɔmaa bɛgyinla tɛnlabelɛ mɔɔ anu yɛ se kpalɛ la anloa.

Wɔ 1977, bɛhanle kɛ yɛrɛla Brooklyn Bɛtɛle na yɛva siane ekyii yɛboa yɛmaa bɛyɛ gyima bie. Mɔɔ ɔka ekyii yɛwie gyima ne la, Neazo Eku ne anu amra nwiɔ yiale me na bɛbizale me saa me nee Ruby lɛ ɛhulolɛ kɛ yɛbaha Bɛtɛle ɛkɛ yɛayɛ gyima a. Yɛliele yɛdole nuhua.

Menvale ɛvolɛ 24 menyɛle gyima wɔ Ɛzonlenlɛ Nwo Gyimalilɛleka ne, ɛleka mɔɔ mediema ne mɔ ta bua kpuya ngakyile mɔɔ kye adwenle la. Wɔ ɛvolɛ dɔɔnwo anu, Neazo Eku ne fa adehilelɛ mɔɔ gyi Baebolo ne azo la maa yɛ. Adehilelɛ ɛhye mɔ a yɛgyinla zo yɛbua kpuya ngakyile a, noko eza yɛgyinla zo yɛtete maangyebakyi zo neavolɛma, mgbanyima nee dahuu adekpakyelɛma. Ndetelɛ ɛhye ɛboa menli dɔɔnwo yemaa bɛnyi sunsum nu. Na yemɔ ɛmaa Gyihova ahyehyɛdeɛ ne ɛgyinla ɔ gyakɛ azo.

Ɔvi 1995 kɔdwu 2018, mengɔmkpɔlɔkpɔlale Bɛtɛle ngakyile kɛ ewiade amuala gyima ne ati agyakɛnugyinlavolɛ. Me nee Ɔfese Kɔmatii ne mɔ, Bɛtɛlema, yɛɛ edwɛkpatɛlɛvolɛma yia memaa bɛ anwosesebɛ na meboa bɛ wɔ ngyegyelɛ biala mɔɔ bɛlɛyia la anwo. Na mediema ne mɔ mɔɔ yɛkɔkpɔla bɛ la anwubielɛ ne mɔ maa me nee Ruby noko anwosesebɛ. Kɛ neazo la, yɛhɔle Rwanda wɔ ɛvolɛ 2000 ne anu. Mɔɔ yɛdele kɛzi Bɛtɛle abusua ne nee mediema ne mɔ gyinlanle menli ɛhuhunlɛ mɔɔ hɔle zolɛ wɔ 1994 anloa la, ɔhanle yɛ kpole. Menli dɔɔnwo alɔvolɛ wule. Ɔnva nwo mɔɔ dole mediema ne mɔ la, bɛlale ye ali kɛ bɛlɛ diedi, anyelazo yɛɛ bɛ nye die.

Kɛkala yɛbo ɛvolɛ 80. Wɔ ɛvolɛ 20 mɔɔ ɛpɛ nu la, membambokale United States Ɔfese Kɔmatii ne anwo. Meangɔ yunivɛsiti ɛlɛ, noko Gyihova nee ye ahyehyɛdeɛ ne ɛmaa me ndetelɛ mɔɔ tɛla biala. Ɛhye ɛboa me ɛmaa mefɛta kɛ mebahilehile awie mɔ Baebolo nu nɔhalɛ ne mɔɔ bahola aboa bɛ dahuu la. (2 Kɔl. 3:5; 2 Tim. 2:2) Menwu kɛzi Baebolo nu edwɛkɛ ne ɛboa menli yemaa bɛ ɛbɛlabɔlɛ ɛyɛ kpalɛ na yemaa bɛ nee bɛ Bɔvolɛ ne ɛnyia agɔnwolɛvalɛ kpalɛ la. (Gye. 4:8) Mekɛ biala mɔɔ me nee Ruby yɛbahola la, yɛkɔ zo yɛmaa awie mɔ anwosesebɛ kɛ bɛmaa bɛ nye ɛzɔ nwolɛ adenle mɔɔ bɛnyia kɛ bɛbazukoa Gyihova anwo debie na bɛahilehile awie mɔ Baebolo nu nɔhalɛ ne la​—ɔle nwolɛ adenle mɔɔ tɛla biala mɔɔ Gyihova sonvolɛ bie bahola anyia a!