Nea kɛzi Baebolo ne bua kpuya ɛhye mɔ la.

Gyima ne 24:15 ka kile yɛ kɛ, “bɛbadwazo tenlenema nee bɛdabɛ mɔɔ bɛnle tenlenema la bɛavi ewule nu.” Tenlenema ne a le bɛdabɛ mɔɔ ɛnee bɛdi Nyamenle mɛla zo kolaa na bɛawu la, ɔti bɛhɛlɛ bɛ aluma wɔ ngoane buluku ne anu. (Mal. 3:16) Bɛdabɛ mɔɔ bɛnle tenlenema la bie a le menli mɔɔ bɛannyia nwolɛ adenle dɔɔnwo bɛanzukoa Gyihova anwo debie kolaa na bɛawu la, ɔti bɛangɛlɛ bɛ aluma wɔ ngoane buluku ne anu.

Dwɔn 5:28, 29 ka ekpunli nwiɔ ko ne ala mɔɔ bɛhanle bɛ nwo edwɛkɛ wɔ Gyima ne 24:15 la anwo edwɛkɛ. Gyisɛse hanle kɛ, “bɛdabɛ mɔɔ bɛyɛle ninyɛne mgbalɛ la, bɛbadwazo bɛ bɛara ngoane nu, na bɛdabɛ mɔɔ bɛyɛle ninyɛndane la, bɛbadwazo bɛ na bɛabua bɛ ndɛne.” Tenlenema ne yɛle ninyɛne mgbalɛ kolaa na bɛawu. Bɛbadwazo bɛ na bɛanyia ngoane ɔluakɛ bɛ aluma tɛbɔ ngoane buluku ne anu. Noko bɛdabɛ mɔɔ bɛnle tenlenema la yɛle ninyɛndane kolaa na bɛawu. Bɛbadwazo bɛ na bɛabua bɛ ndɛne. Bɛ aluma ɛnle ngoane buluku ne anu ɔti bɛbamaa bɛ mekɛ bɛava bɛanlea ɛbɛla mɔɔ bɛbabɔ la amaa bɛagyinla zo bɛabua bɛ ndɛne. Wɔ mekɛ zɔhane anu, bɛbanyia nwolɛ adenle bɛazukoa Gyihova anwo debie na bɛahɛlɛ bɛ aluma wɔ ngoane buluku ne anu.

Yekile 20:12, 13 kilehile nu kɛ, ɔwɔ kɛ bɛdabɛ mɔɔ bɛbadwazo bɛ la amuala di edwɛkɛ mɔɔ “bɛhɛlɛ ye wɔ nwomamobɔleɛ ne,” mɔɔ le mɛla fofolɛ mɔɔ bɛbava bɛamaa wɔ ewiade fofolɛ ne anu la azo. Bɛbazɛkye bɛdabɛ mɔɔ bɛnrɛli zo la.​—Aye. 65:20.

Daneɛle 12:2 hanle kɛ bɛdabɛ mɔɔ bɛdeda wɔ ewule nu la bie mɔ badwazo na “banyia dahuu ngoane na bie mɔ abɔ anyiemgba na bɛayɛ kyibadeɛ dahuu.” Ngyɛnu ɛhye ka bɛdabɛ mɔɔ bɛdwazo bɛ la ndɛnebualɛ mɔɔ li awieleɛ la anwo edwɛkɛ​—kɛ bɛbanyia “dahuu ngoane” anzɛɛ bɛbayɛ “kyibadeɛ dahuu.” Ɔti wɔ ɛvolɛ 1,000 ne awieleɛ, menli bie mɔ banyia dahuu ngoane yɛɛ bɛbazɛkye bie mɔ bɔkɔɔ.​—Yek. 20:15; 21:3, 4.

Maa yɛyɛ ndonwo bie. Yɛbahola yɛava ekpunli nwiɔ ne mɔɔ bɛbadwazo bɛ la tɛnlabelɛ ne yɛatoto nyɛvolɛ mɔɔ bɛkulo kɛ bɛtɛnla maanle gyɛne zo la anwo. Tenlenema ne le kɛ bɛdabɛ mɔɔ bɛbamaa bɛ ngɛlata kɛ bɛkola bɛyɛ gyima anzɛɛ bɛtɛnla maanle ne anu la, ɔti bɛdie bɛ bɛto nuhua yɛɛ bɛlɛ fanwodi ekyi. Noko bɛdabɛ mɔɔ bɛnle tenlenema la le kɛ nyɛvolɛ mɔɔ bɛbamaa bɛ ngɛlata kɛ bɛkola bɛtɛnla maanle ne anu ekyi anzɛɛ bɛkola bɛkɔkpɔla maanle ne anu ala bɛsia la. Ɔwɔ kɛ nyɛvolɛ ɛhye mɔ yɛ ninyɛne bie mɔ kolaa na bɛamaa bɛ adenle kɛ bɛhɔ zo bɛdɛnla maanle fofolɛ ne anu. Zɔhane ala a ɔwɔ kɛ bɛdabɛ mɔɔ bɛnle tenlenema mɔɔ bɛbadwazo bɛ la di Gyihova mɛla zo na bɛbɔ tenlene ɛbɛla amaa bɛahɔ zo bɛadɛnla Paladaese a. Na ɔnva nwo ngɛlata mɔɔ bɛbalimoa bɛava bɛamaa nyɛvolɛ kɛ bɛhɔ maanle gyɛne nu la, awieleɛ bɔkɔɔ ne, bie a bɛbamaa bie mɔ ahɔ zo adɛnla ɛkɛ yɛɛ bɛbaziane bie mɔ. Ɛbɛla mɔɔ bɛbabɔ ye wɔ maanle fofolɛ ne anu la a bahile kɛ ɔwɔ kɛ bɛkɔ zo bɛtɛnla ɛkɛ anzɛɛ ɔwɔ kɛ bɛsiane bɛ a. Ɔti zɔhane ala a bɛbagyinla bɛdabɛ mɔɔ bɛbadwazo bɛ la nɔhalɛlilɛ nee ɛbɛla mɔɔ bɛbabɔ ye wɔ ewiade fofolɛ ne anu la azo a bɛabua bɛ ndɛne mɔɔ li awieleɛ a.

Gyihova ɛnle ahunluyelɛyelalɛ Nyamenle ala, eza ɔle pɛlepɛlelilɛ Nyamenle. (Dit. 32:4; Edw. 33:5) Ɔbadwazo bɛdabɛ mɔɔ bɛle tenlenema nee bɛdabɛ mɔɔ bɛnle tenlenema la yeava yeala ye ɛlɔlɛ ne ali. Noko ɔ nye la kɛ bɛbali ye ngyinlazo ne mɔ mɔɔ fale kpalɛ nee ɛtane nwo la azo. Menli mɔɔ bɛbahulo ye na bɛava ye ngyinlazo ne mɔ bɛabɔ bɛ ɛbɛla la ala a bɛbamaa bɛ adenle bɛamaa bɛahɔ zo bɛadɛnla ewiade fofolɛ ne anu a.