1. Mɔɔ ɔka ekyii ɛzoanvolɛ Pita wu la, nzɔne edwɛkɛ a Nyamenle maanle ɔhɛlɛle a?

 ƐNEE ɛzoanvolɛ Pita ze kɛ ɔnrɛhyɛ na ye ngoane ara awieleɛ. Wɔ ɛvolɛ dɔɔnwo mɔɔ ɔvale ɔzonlenle Gyihova nɔhalɛ nu la anu, ɔ nee Gyisɛse luale, ɔbɔle ɔ bo kɛ ɔdi menli mɔɔ bɛnle Dwuuma la daselɛ yɛɛ ɛnee ɔboka neazo eku ne anwo. Noko ɛnee Pita tɛdɛ gyima dɔɔnwo. Wɔ kɛyɛ ɛvolɛ 62-64 Y.M., Nyamenle maanle ɔhɛlɛle ngɛlata nwiɔ—bɛmɛ a le Pita mɔɔ limoa nee mɔɔ tɔ zo nwiɔ la. Ɛnee Pita lɛ anyelazo kɛ, wɔ ye ewule nzi bɔbɔ ngɛlata ɛhye mɔ baboa Kilisienema.—2 Pita 1:​12-15.

2. Duzu ati a ɛnee bɛhyia Pita ngɛlata ne mɔɔ ɔhɛlɛle la anwo a?

² Pita hɛlɛle ye ngɛlata ne mɔ wɔ mekɛ mɔɔ ɛnee ‘sɔnea ngakyile ɛmaa ɔ gɔnwo mɔ diedima arɛle ɛbɔ la.’ (1 Pita 1:6) Ɛnee amumuyɛma ɛlɛbɔ mɔdenle kɛ bɛfa adalɛ ngilehilelɛ nee ɛbɛla ɛtane bɛara asafo ne anu. (2 Pita 2:​1, 2, 14) Ɔnrɛhyɛ, Kilisienema mɔɔ de Gyɛlusalɛm la banwu “ninyɛne kɔsɔɔti awieleɛ”—Wulomu sogyama bazɛkye suakpole ne nee ye ɛzonlenlɛsua ne. (1 Pita 4:7) Nɔhalɛ nu, Pita ngɛlata ne mɔ boale Kilisienema ɔmaanle bɛnwunle mɔɔ bɛbahola bɛayɛ bɛagyinla sɔnea mɔɔ bɛlɛyia nee mɔɔ bɛbayia ye kenle bie anloa la. b

3. Duzu ati a ɔwɔ kɛ yɛsuzu Pita ngɛlata ne mɔ anwo a?

 ³ Pita hɛlɛle ye ngɛlata ne hɔmaanle alimoa Kilisienema ɛdeɛ, noko Gyihova maanle bɛvale bɛbokale Ye Edwɛkɛ ne anwo. Ɔti zɔhane ngɛlata ne mɔ bahola aboa yɛ ɛnɛ. (Wlo. 15:4) Kɛ mɔɔ ɛnee bɛde ewiade mɔɔ ɛbɛlatane ɛbu zo wɔ nu la anu la, yɛdayɛ noko yɛyia sɔnea mɔɔ maa ɔyɛ se kɛ yɛbazonle Gyihova a. Eza yɛbayia anwongyelelɛ mɔɔ le kpole tɛla mɔɔ Dwuuma ne yiale wɔ mekɛ mɔɔ bɛzɛkyele Gyɛlusalɛm nee ye ɛzonlenlɛsua ne la. Yɛnwu ngakyelɛ bie mɔ mɔɔ anwo hyia la wɔ Pita ngɛlata nwiɔ ne anu. Bɛbaboa yɛ bɛamaa yɛ nye ahɔ zo ala Gyihova kenle ne, yɛali sonla nwo ɛzulolɛ zo na yɛanyia ɛlɔlɛ mɔɔ anu yɛ se la yɛamaa yɛ nwo. Eza ngakyelɛ zɛhae mɔ baboa mgbanyima yeamaa bɛanwu kɛzi bɛbali mboane ne ngyianlɛ nwo gyima kpalɛ la.

4. Kɛ mɔɔ 2 Pita 3:​3, 4 kile la, duzu a bahola amaa yɛ diedi ne aha aze a?

⁴ Menli mɔɔ ɛnlie Baebolo ngapezo ɛnli la a ɛbɔ yɛ ɛyia a. Bie a dwazotiama bagolo yɛ nwo ɔluakɛ yɛnlea awieleɛ ne ade ɛsesebɛ wɔ ɛvolɛ dɔɔnwo anu. Tendɛtiama bie mɔ se awieleɛ ne ɛnrɛra ɛlɛ. (Kenga 2 Pita 3:​3, 4.) Saa yɛte edwɛkɛ zɛhae yɛfi suamenle bie, yɛ gɔnwo gyimayɛvo bie anzɛɛ yɛ busuanli bie ɛkɛ a, ɔbahola yeamaa yɛ diedi ne aha aze. Pita hilele debie mɔɔ bahola aboa yɛ la.

5. Duzu a baboa yɛ yeamaa yɛanyia ewiade ɛhye awieleɛ ne anwo adwenle mɔɔ fɛta la a? (2 Pita 3:​8, 9)

⁵ Bie mɔ adwenle yɛ bɛ kɛ Gyihova ɛlɛkyɛ ewiade ɛhye ɛzɛkyelɛ nwo. Pita edwɛkɛ ne bahola aboa yɛ ɔluakɛ bɛkakye yɛ kɛ kɛzi Gyihova bu mekɛ la le ngakyile bɔkɔɔ fi kɛzi alesama bu mekɛ la anwo. (Kenga 2 Pita 3:​8, 9.) Wɔ Gyihova anye zo, ɛvolɛ apenle ko le kɛ kenle ko. Gyihova lɛ abotane, ɔngulo kɛ bɛsɛkye awie biala. Noko saa ye kenle ne dwu a, ewiade ɛhye bahɔ ye awieleɛ. Nea nwolɛ adenle mɔɔ yɛnyia kɛ yɛbava mekɛ mɔɔ ɛha la yɛali menli mɔɔ wɔ ewiade amuala la daselɛ a.

6. Kɛ ɔkɛyɛ na ‘yɛamaa Gyihova kenle ne adɛnla yɛ adwenle nu kpalɛ’ ɛ? (2 Pita 3:​11, 12)

⁶ Pita maanle yɛ anwosesebɛ kɛ ‘yɛmaa Gyihova kenle ne ɛdɛnla yɛ adwenle nu kpalɛ.’ (Kenga 2 Pita 3:​11, 12.) Kɛzi yɛbayɛ ye ɛ? Yɛbahola yɛadwenledwenle—saa ɔbayɛ boɛ a, kenle ko biala—nyilalɛ mɔɔ yɛbanyia ye wɔ ewiade fofolɛ ne anu la anwo. Pɛ ye nvoninli kɛ ɛlɛdie anwoma kpalɛ bie, ɛlɛdi aleɛ mɔɔ maa anwosesebɛ, ɛlɛyɛ wɔ alɔvolɛ mɔɔ bɛdwazo bɛ la atuu yɛɛ ɛlɛkilehile menli mɔɔ wule la ɛhyɛ kpalɛ la kɛzi Baebolo ngapezo rale nu la. Saa ɛdwenledwenle ninyɛne ɛhye mɔ anwo a, ɔbaboa wɔ yeamaa wɔahɔ zo wɔahendɛ na wɔanwu kɛ yɛde awieleɛ mekɛ nu. Kɛmɔ yɛze kenle bie nwo edwɛkɛ “ɛhye dɛba la ati,” adalɛ kilehilevolɛma ‘ɛnrɛbɛlɛbɛla’ yɛ.—2 Pita 3:17.

7. Kɛzi sonla nwo ɛzulolɛ bahola aha yɛ ɛ?

⁷ Kɛmɔ Gyihova kenle ne wɔ yɛ adwenle nu kpalɛ la ati, ɔbaha yɛ yeamaa yɛabɔ edwɛkpa ne nolo yɛahile awie mɔ. Noko wɔ tɛnlabelɛ bie mɔ anu, bie a yɛnrɛnyia akɛnrasesebɛ yɛnrɛdendɛ. Duzu ati ɔ? Sonla nwo ɛzulolɛ bahola aha yɛ. Ɛhye bie a dole Pita la. Nɔe ne mɔɔ bɛlɛdi Gyisɛse edwɛkɛ la, Pita angola anla ɔ nwo ali kɛ ɔle Gyisɛse ɛdoavolɛ, na ɔhanle ye fane dɔɔnwo bɔbɔ kɛ ɔnze ye. (Mat. 26:​69-75) Noko nzinlii, ɛzoanvolɛ ko ye ala vale anwodozo hanle kɛ: “Bɛmmasulo mɔɔ bɛsulo ye la anzɛɛ bɛmmamaa bɛ ahonle tu.” (1 Pita 3:14) Pita edwɛkɛ ne maa yɛnyia anwodozo kɛ yɛbahola yɛali sonla nwo ɛzulolɛ zo.

8. Duzu a bahola aboa yɛ yeamaa yɛali sonla nwo ɛzulolɛ zo a? (1 Pita 3:15)

 ⁸ Duzu a bahola aboa yɛ yeamaa yɛali sonla nwo ɛzulolɛ zo a? Pita hanle hilele yɛ kɛ: “Bɛde Kelaese anwo kɛ Awulae wɔ bɛ ahonle nu.” (Kenga 1 Pita 3:15.) Ɛhye kile kɛ yɛbadwenledwenle gyinlabelɛ nee tumi mɔɔ yɛ Awulae nee yɛ Belemgbunli Kelaese Gyisɛse lɛ la anwo. Saa ɛnyia nwolɛ adenle kɛ ɔwɔ kɛ ɛka edwɛkpa ne ɛkile awie mɔ na wɔ ahonle tu anzɛɛ ɛzulolɛ ka wɔ a, kakye yɛ Belemgbunli ne. Pɛ ye nvoninli wɔ wɔ adwenle nu kɛ ɔlɛdi tumi wɔ anwuma na anwumabɔvolɛma mgbe dɔɔnwo ɛbɔ ye ɛyia. Kakye kɛ ‘tumi muala mɔɔ wɔ anwuma nee azɛlɛ ye azo’ la le ye ɛdeɛ na ɔ ‘nee wɔ balua dahuu kɔkpula mekɛ ɛhye awieleɛ.’ (Mat. 28:​18-20) Pita maanle yɛ anwosesebɛ kɛ, ‘yɛziezie yɛ nwo mekɛ biala’ kɛ yɛbahilehile yɛ diedi ne anu. Ɛkulo kɛ ɛdi daselɛ wɔ gyima nu, sukulu anzɛɛ ɛleka gyɛne ɔ? Dimoa dwenle ɛleka mɔɔ ɛbanyia nwolɛ adenle wɔayɛ ɛhye la anwo, akee sukoa edwɛkɛ mɔɔ ɛbaha la. Sɛlɛ Gyihova kɛ ɔmaa wɔ akɛnrazilɛ, na nyia anwodozo kɛ ɔbaboa wɔ yeamaa wɔali wɔ ɛzulolɛ zo.—Gyi. 4:29.

9. Kɛzi Pita angola anla ɛlɔlɛ ali wɔ mekɛ bie anu ɛ? (Eza nea nvoninli ne.)

⁹ Pita zukoale kɛzi ɔbala ɛlɔlɛ ali la. Mɔɔ Gyisɛse hanle kɛ: “Melɛmaa bɛ mɛla fofolɛ kɛ  bɛhulo bɛ nwo ngoko; kɛ mɔɔ mehulo bɛ la, bɛdabɛ noko bɛhulo bɛ nwo ngoko” la, ɛnee ɔwɔ ɛkɛ ne bie. (Dwɔn 13:34) Ɛhye bɔbɔ anzi, ɛzulolɛ maanle Pita gyakyile kɛ ɔ nee mediema mɔɔ bɛnle Dwuuma la bali aleɛ. Pɔɔlo hanle kɛ mɔɔ Pita yɛle la le “nabalaba nyɛleɛ.” (Gal. 2:​11-14) Pita liele zɔhane ɛdenrɛdenrɛlɛ ne dole nu na ɔzukoale debie ɔvile nu. Wɔ ye ngɛlata nwiɔ ne anu, ɔzile zo kɛ ɔnle kɛ yɛte nganeɛ kɛ yɛkulo yɛ mediema ala, emomu eza ɔwɔ kɛ yɛda zɔhane ɛlɔlɛ ne ali.

10. Duzu a ma yɛnyia “mediema ɛlɔlɛ mɔɔ nabalaba ɛnle nu la” a? Kilehile nu. (1 Pita 1:22)

¹⁰ Pita hanle kɛ ɔwɔ kɛ yɛnyia “mediema ɛlɔlɛ mɔɔ nabalaba ɛnle nu la” yɛmaa yɛ nwo. (Kenga 1 Pita 1:22.) Kɛmɔ ‘yɛdie nɔhalɛ ne’ la ati a yɛda zɔhane ɛlɔlɛ ne ali a. Nɔhalɛ ɛhye bie a le kɛ “Nyamenle ɛnnea sonla nyunlu.” (Gyi. 10:​34, 35) Saa yɛda ɛlɔlɛ ali yɛkile asafo ne anu amra bie mɔ na yɛanla ye ali yɛangile bie mɔ a, yɛnrɛhola yɛnrɛli Gyisɛse mɛla mɔɔ fale ɛlɔlɛ nwo la azo. Nɔhalɛ nu, yɛbahola yɛabikye mediema bie mɔ yɛadɛla bie mɔ kɛ mɔɔ Gyisɛse yɛle la. (Dwɔn 13:23; 20:2) Noko Pita hakyele yɛ kɛ ɔwɔ kɛ yɛbɔ mɔdenle kɛ yɛbanyia “mediema ɛlɔlɛ”—ɛlɔlɛ mɔɔ ka abusua bɔ nu la—yɛamaa yɛ mediema kɔsɔɔti.—1 Pita 2:17.

11. Duzu a kile kɛ ‘yɛlɛfi yɛ ahonle nu yɛahulo yɛ nwo ngoko kpalɛ’ a?

¹¹ Pita hanle hilele yɛ kɛ, “bɛvi ahonle nu bɛhulo bɛ nwo ngoko kpalɛ.” Wɔ edwɛkɛ ɛhye anu, ‘bɛhulo bɛ nwo kpalɛ’ kile kɛ yɛkulo awie, saa bɔbɔ ɔyɛ se kɛ yɛbala ɛlɔlɛ ali yɛahile ye a. Kɛ neazo la, saa adiema bie ka yɛ ɛya anzɛɛ yɛ debie mɔɔ gyegye yɛ la a, duzu a yɛbayɛ a? Bie a mɔlebɛbo ne yɛbade nganeɛ kɛ ɔwɔ kɛ yɛdi nzenralɛ na ɔnle kɛ yɛda ɛlɔlɛ ali yɛkile ye. Noko Pita zukoale debie vile Gyisɛse ɛkɛ ne kɛ Nyamenle anye ɛnlie nzenralɛlilɛ nwo. (Dwɔn 18:​10, 11) Pita hɛlɛle kɛ: “Bɛmmafa ɛtane bɛtua ɛtane kakɛ anzɛɛ aholoba bɛtua aholoba kakɛ. Emomu, bɛva nyilalɛ bɛdua ɛtane kakɛ.” (1 Pita 3:9) Saa ɛlɛ ɛlɔlɛ mɔɔ anu yɛ se la a, ɔbaha wɔ yeamaa wɔala atiakunlukɛnlɛma ali wɔahile bɛdabɛ bɔbɔ mɔɔ bie a bɛyɛ debie bɛmaa yegyegye wɔ la.

12. (a) Duzu a ɛlɔlɛ mɔɔ anu yɛ se la baha yɛ yeamaa yɛayɛ a? (b) Kɛ mɔɔ yɛnwu ye wɔ Bɔ Koyɛlɛ Mɔɔ Wɔ Yɛ Nu La Anwo Bane vidio ne anu la, duzu a ɛkulo kɛ ɛbɔ mɔdenle kɛ ɛbayɛ a?

¹² Wɔ Pita kɛlata mɔɔ limoa la anu, ɔvale edwɛkɛ, “ɛlɔlɛ mɔɔ anu yɛ se la” ɔlile gyima. Tɛ ɛtane ekyi bie a ɛlɔlɛ ɛhye keda zo a, emomu ɔkeda “ɛtane dɔɔnwo azo.” (1 Pita 4:8) Ɔbayɛ kɛ Pita hakyele ɛtanefakyɛ nwo ɛzukoalɛdeɛ ne mɔɔ Gyisɛse hilehilele ye mekɛ bie la. Zɔhane mekɛ ne, ɛnee Pita die di kɛ ɔlɛda atiakunlukɛnlɛma ali wɔ mekɛ mɔɔ ɔhanle kɛ ɔbava ɔ diema ɛtane yeahyɛ ye yeahɔdwu “fane nsuu” la. Noko Gyisɛse hilehilele Pita—nee yɛdayɛ—kɛ yɛva yɛhyɛ “ɔhɔdwu fane 77,” mɔɔ kile kɛ ɔnlɛ ye awieleɛ. (Mat. 18:​21, 22) Saa ɔyɛ se ɔmaa wɔ kɛ ɛbava folɛdulɛ ɛhye wɔali gyima a, mmamaa ɛ sa nu to! Ɔyɛ a ɔyɛ se ɔmaa Gyihova azonvolɛ mɔɔ bɛnli munli la kɔsɔɔti kɛ bɛbava ɛtane bɛahyɛ. Mɔɔ hyia kpalɛ kɛkala la a le kɛ ɛbava ɛ diema ɛtane wɔahyɛ ye na ɛ nee ye adɛnla anzodwolɛ nu. c

13. Duzu a bahola amaa yeayɛ se kɛ mgbanyima banyia mekɛ amaa bɛ mediema anwosesebɛ a?

¹³ Ye biala anu, Pita arɛle ɛnrɛvi edwɛkɛ ɛhye mɔɔ Gyisɛse hanle hilele ye wɔ ye ewudwazo ne anzi la ɛlɛ: “Nea me mboane ngyikyi ne.” (Dwɔn 21:16) Saa ɛle asafo nu kpanyinli a, ɛze kɛ adehilelɛ ɛhye mɔ fale ɛdawɔ  noko ɛ nwo. Noko ɔyɛ a ɔbahola yeayɛ se kɛ kpanyinli bie banyia mekɛ ayɛ gyima ɛhye mɔɔ anwo hyia la. Ɔwɔ kɛ mgbanyima dimoa di bɛ mbusua ne mɔ nwonane afoa nu ngyianlɛ nwo gyima, bɛmaa bɛnwu kɛ bɛkulo bɛ na bɛboa bɛ wɔ sunsum nu. Eza bɛdi edwɛkɛhanlɛ gyima ne anyunlu, yɛɛ bɛsiezie gyimalilɛ mɔɔ bɛlɛ wɔ debiezukoalɛ nee nyianu ngakyile bo la. Bie mɔ noko boa Asopiti Ngitanwolilɛ Kɔmatii ne anzɛɛ Local Design/Construction Department ne. Nɔhalɛ nu, mgbanyima ɛnlɛ alagye fee!

14. Duzu a bahola amaa mgbanyima anwosesebɛ yeamaa bɛanlea mboane ne a? (1 Pita 5:​1-4)

¹⁴ Pita maanle ɔ gɔnwo mɔ mgbanyima anwosesebɛ kɛ, “bɛnlea Nyamenle mboane ne.” (Kenga 1 Pita 5:​1-4.) Saa ɛle kpanyinli a, yɛze kɛ ɛkulo ɛ mediema na ɛkulo kɛ ɛnea bɛ. Noko ɔdwu mekɛ ne bie a ɛbade nganeɛ kɛ ɛnlɛ alagye fee anzɛɛ wɔvɛ somaa ɔti ɛnrɛhola ɛnrɛyɛ zɔhane gyima ne. Duzu a ɛbahola wɔayɛ a? Ka wɔ ngyegyelɛ ne amuala kile Gyihova. Pita hɛlɛle kɛ: “Saa awie sonle a bɛmaa ɔgyinla anwosesebɛ ne mɔɔ Nyamenle fa maa la azo ɔyɛ zɔ.” (1 Pita 4:11) Bie a ɛ mediema ɛlɛyia ngyegyelɛ mɔɔ bɛnrɛnyia ye sɔbelɛ bɔkɔɔ wɔ ewiade ɛhye anu la. Noko kakye kɛ, Gyisɛse Kelaese, “mboaneneavolɛ kpanyinli ne” bahola aboa bɛ adɛla wɔ. Ɔbahola yeaboa bɛ ɛnɛ na eza yeaboa bɛ wɔ ewiade fofolɛ ne anu. Mɔɔ Nyamenle kulo kɛ mgbanyima yɛ la a le kɛ ɔwɔ kɛ bɛkulo bɛ mediema, bɛnea bɛ na “bɛyɛ neazo bɛmaa mboane ne.”

15. Adenle boni a kpanyinli ko dua zo nea mboane ne a? (Eza nea nvoninli ne.)

¹⁵ William mɔɔ ɛyɛ asafo nu kpanyinli ɛhyɛ la ɛnwu kɛzi mboanekpɔlalɛ gyima ne anwo hyia la. Mɔɔ COVID-19 ewulenzane ne bɔle ɔ bo la, ɔ nee ɔ gɔnwo mɔ mgbanyima vale ziele bɛ nye zo kɛ bɛ nee mediema mɔɔ wɔ daselɛlilɛ ekpunli ne mɔ anu la bali adwelie dapɛne biala. Ɔhilehilele deɛmɔti bɛyɛle ye zɔ la anu kɛ: “Ɛnee yɛ mediema ne mɔ dɔɔnwo angomekye a de a, na bɛbahola bɛanyia adwenle mɔɔ ɛndenrɛ la ndɛndɛ.” Saa adiema bie ɛlɛyia ngyegyelɛ a, William tie ye kpalɛ na ɔnwu deɛ holɛ ko mɔɔ ɛlɛgyegye ye nee mɔɔ ɔhyia nwo la. Akee ɔkpondɛ mbuluku anzɛɛ vidio mɔɔ ɔbava yeaboa ɔ diema ne la wɔ yɛ wɛbsaete ne azo. Ɔhanle kɛ: “Mboanekpɔlalɛ nwo hyia kpalɛ kɛkala tɛla mekɛ biala. Yɛbɔ mɔdenle ɛsesebɛ kɛ yɛbaboa awie mɔ  yɛamaa bɛazukoa Gyihova anwo debie; zɔhane ala a ɔwɔ kɛ yɛbɔ mɔdenle yɛnea Gyihova mboane ne na yɛboa bɛ yɛmaa bɛkɔ zo bɛtɛnla nɔhalɛ ne anu a.”

16. Kɛzi yɛbahola yɛava ɛzukoalɛdeɛ mɔɔ wɔ Pita ngɛlata ne mɔ anu la yɛali gyima ɛ?

¹⁶ Pita ngɛlata nwiɔ ne mɔɔ Nyamenle maanle ɔhɛlɛle la anu ɛzukoalɛdeɛ ekyi bie a yɛzuzu nwo a. Bie a wɔnwu ninyɛne bie mɔ mɔɔ ɛkulo kɛ ɛnyia anyuhɔlɛ wɔ nu la. Kɛ neazo la, ɛkulo kɛ ɛta ɛdwenledwenle nyilalɛ mɔɔ yɛbanyia ye wɔ ewiade fofolɛ ne anu la anwo ɔ? Wɔva wɔyɛ wɔ bodane kɛ ɛbali daselɛ wɔ gyima nu, sukulu anzɛɛ ɛleka gyɛne ɔ? Wɔnwu ndenle mɔɔ ɛbahola wɔalua zo wɔala ɛlɔlɛ mɔɔ anu yɛ se la ali wɔahile ɛ mediema la kpalɛ ɔ? Mgbanyima, bɛbɔ kpɔkɛ kɛ bɛbavi bɛ ɛhulolɛ nu bɛanlea Gyihova mboane ne kpalɛ ɔ? Saa ɛneɛnlea wɔ nu kpalɛ a, bie a ɛbanwu kɛ ɛtɔ sinli wɔ ɛleka bie mɔ, noko mmamaa ɛ sa nu to. “Awulae le atiakunlukɛnlɛma” na ɔbaboa wɔ yeamaa wɔanyia anyuhɔlɛ. (1 Pita 2:3) Pita maa yɛnyia anwodozo kɛ: “Nyamenle . . . mumua ne bawie bɛ ndetelɛ ne. Ɔbamaa bɛazi pi, ɔbamaa bɛayɛ se, ɔbamaa bɛagyinla kpundii.”—1 Pita 5:10.

17. Saa yɛammaa yɛ sa nu ando na yɛmaa Gyihova tete yɛ a, duzu a bavi nu ara a?

¹⁷ Mekɛ bie, Pita dele nganeɛ kɛ ɔnle kɛ ɔbikye Nyamenle Ara ne. (Luku 5:8) Noko ɔlua Gyihova nee Gyisɛse moalɛ zo, Pita bɔle mɔdenle lile Kelaese anzi. Ɔlua ɛhye ati, Pita ‘bɛanyia adenle ahɔ yɛ Awulae nee yɛ Ngoanedievolɛ Gyisɛse Kelaese dahuu Belemgbunlililɛ ne anu.’ (2 Pita 1:11) Ɛhye le ahatualɛ mɔɔ yɛ nwanwane! Saa ɛbɔ ɛ nwo mɔdenle kɛ mɔɔ Pita yɛle la na ɛmaa Gyihova tete wɔ a, ɛdawɔ noko ɛbanyia dahuu ngoane ahatualɛ ne. Ɛ sa baha ‘wɔ diedi nwo bodane ne mɔɔ le wɔ ngoanelielɛ la.’—1 Pita 1:9.