1. Tɛnlabelɛ ɛsesebɛ boni a Gyɛhowahye, Yuzaya nee Dwosaya yiale a?

 FA YE kɛ ɛle kakula ekyi anzɛɛ ɛle kakula kpavolɛ na bɛzie wɔ belemgbunli wɔ Nyamenle menli ne anwo zo! Kɛzi ɛbava wɔ tumi ne wɔali gyima ɛ? Baebolo ne ka ngakula ngakyile mɔɔ rayɛle Dwuda arelemgbunli la anwo edwɛkɛ. Kɛ neazo la, ɛnee Gyɛhowahye ɛli ɛvolɛ 7, Yuzaya ɛli ɛvolɛ 16 yɛɛ Dwosaya ɛli ɛvolɛ 8 ala. Nea kɛzi ɛnee ɔnla aze ɔmmaa bɛ la! Ɔnva nwo kɛ ɛnee bɛ tɛnlabelɛ ne anu yɛ se la, bɛ muala bɛnyianle moalɛ mɔɔ bɛhyia la bɛlile ngyegyelɛ ngakyile zo na bɛbɔle ɛbɛla kpalɛ.

2. Duzu ati a ɔwɔ kɛ yɛdwenle neazo mɔɔ Gyɛhowahye, Yuzaya nee Dwosaya yɛle la anwo a?

² Yɛnle arelemgbunli mrenyia nee mraalɛ, noko yɛbahola yɛanyia ɛzukoalɛdeɛ ngɛnlɛma yɛavi menli nsa ɛhye mɔ mɔɔ bɛ nwo edwɛkɛ wɔ Baebolo ne anu la ɛkɛ. Bɛsisile kpɔkɛ kpalɛ ɛdeɛ, noko eza bɛsisile kpɔkɛ ɛtane. Bɛ neazo ne mɔ bamaa yɛanwu deɛmɔti ɔhyia kɛ yɛkpa agɔnwolɛma kpalɛ, yɛbɛlɛ yɛ nwo aze dahuu na yɛkɔ zo yɛkpondɛ Gyihova la.

3. Kɛzi Belemgbunli Gyɛhowahye yɛle ye nyɛleɛ wɔ Ɛsɔfo Kpanyinli Gyɛhɔyada ngilehilelɛ nwo ɛ?

³ Sukoa kpɔkɛ kpalɛ mɔɔ Gyɛhowahye sisile la. Mɔɔ Belemgbunli Gyɛhowahye le kakula la, ɔzile kpɔkɛ kpalɛ bie. Kɛmɔ ɛnee ye papa ɛnde aze la ati, ɔlile adehilelɛ mɔɔ Ɛsɔfo Kpanyinli Gyɛhɔyada mɔɔ di nɔhalɛ la vale maanle ye la azo. Ɛsɔfo zɔhane hilehilele ye kɛ asɛɛ ɔdaye mumua ne ɔ ra la. Ɛhye ati, Gyɛhowahye zile kpɔkɛ kpalɛ kɛ ɔbali nɔhalɛ ɛzonlenlɛ nyunlu na yeazonle Gyihova. Gyɛhowahye yɛle ngyehyɛleɛ bɔbɔ maanle bɛyɛle ɛzonlenlɛsua ne boɛ.—2 Ek. 24:​1, 2, 4, 13, 14.

4. Saa yɛ nye die Gyihova mɛla ne mɔ anwo na yɛdi zo a, kɛzi ɔboa yɛ ɛ? (Mrɛlɛbulɛ 2:​1, 10-12)

⁴ Saa bɛlɛkilehile wɔ bɛamaa wɔahulo Gyihova na wɔava ye  ngyinlazo ne mɔ wɔabɔ wɔ ɛbɛla a, ɛnee bɛlɛmaa wɔ ahyɛlɛdeɛ mɔɔ sonle bolɛ kpalɛ. (Kenga Mrɛlɛbulɛ 2:​1, 10-12.) Awovolɛ bahola alua ndenle dɔɔnwo azo ahilehile. Nea kɛzi adiema raalɛ bie mɔɔ bɛfɛlɛ ye Katya la ɛ papa boale ye maanle ɔsisile kpɔkɛ kpalɛ la. Nwonlomɔ biala saa ye papa nee ye ɛlɛkɔ sukulu a, ɔ nee ye suzu alehyenlɛ ne anu tɛkese ne anwo. Ɔhanle kɛ: “Ɛhye boale me maanle menlile ngyegyelɛ mɔɔ meyia wɔ alehyenlɛ ne anu la anwo gyima.” Na saa ɛte nganeɛ kɛ Baebolo nu ngilehilelɛ mɔɔ wɔ awovolɛ fa maa wɔ la ɛmmaa ɛngola ɛnyɛ ninyɛne mɔɔ ɛkulo la ɛ? Duzu a baboa wɔ yeamaa wɔali bɛ adehilelɛ zo a? Adiema raalɛ Anastasia kakye kɛ ye awovolɛ hilehilele deɛmɔti bɛdi mɛla bie mɔ la anu hilele ye. Ɔhanle kɛ: “Yemɔ boale me maanle mendele ɔ bo kɛ bɛ mɛla ne mɔ ɛntietia me fanwodi zo, emomu bɛbɔ me nwo bane ɔluakɛ bɛkulo me.”

5. Kɛzi wɔ nyɛleɛ bahola aha wɔ awovolɛ nee Gyihova ɛ? (Mrɛlɛbulɛ 22:6; 23:​15, 24, 25)

⁵ Saa ɛfa Ngɛlɛlera ne anu folɛdulɛ mɔɔ ɛnyia la ɛdi gyima a, ɔbamaa wɔ awovolɛ anye alie. Mɔɔ tɛla biala la, ɛbamaa Nyamenle anye alie na ɛ nee ye ava agɔnwolɛ dahuu. (Kenga Mrɛlɛbulɛ 22:6; 23:​15, 24, 25.) Asoo ɛhye ɛmmaa ɛnnwu deɛmɔti ɔhyia kɛ ɛsukoa neazo mɔɔ Gyɛhowahye yɛle wɔ ye ngakula nu la ɔ?

6. Nwane mɔ folɛdulɛ a Gyɛhowahye bɔle ɔ bo diele a, na duzu a vile nu rale a? (2 Edwɛkɛsisilɛ 24:​17, 18)

⁶ Sukoa debie fi kpɔkɛ ɛtane mɔɔ Gyɛhowahye sisile la anu. Mɔɔ Gyɛhɔyada wule la, Gyɛhowahye vale agɔnwolɛ ɛtane. (Kenga 2 Edwɛkɛsisilɛ 24:​17, 18.) Ɔkpale kɛ ɔbadie Dwuda mgbanyima mɔɔ bɛngulo Gyihova la. Ɛze kɛ anrɛɛ ɔwɔ kɛ Gyɛhowahye twe ɔ nwo fi gyegyeravolɛma zɔhane mɔ anwo. (Mrɛ. 1:10) Noko ɔdiele menli ɛhye mɔ mɔɔ bɛfɛlɛ bɛ nwo agɔnwolɛma la. Mɔɔ Gyɛhɔyada ara Zɛkalaya bɔle mɔdenle kɛ ɔtenrɛ ye la, Gyɛhowahye maanle bɛhunle ye. (2 Ek. 24:​20, 21; Mat. 23:35) Alɔbɔlɛ edwɛkɛ nee ngoaseade boni ɛne! Gyɛhowahye bɔle ɔ bo kɛnlɛma, noko ɔyɛ alɔbɔlɛ kɛ ɔrayɛle kpɔkyevolɛ yɛɛ kodiawu la. Awieleɛ bɔkɔɔ ne, ɔdaye mumua ne ye azonvolɛ hunle ye. (2 Ek. 24:​22-25) Saa ɔhɔle zo ɔdiele Gyihova nee menli mɔɔ kulo Ye la a, nea kɛzi anrɛɛ ye ɛbɛlabɔlɛ bawie ye a! Duzu a ɛkulo kɛ ɛsukoa ɛfi neazo zɔhane anu a?

7. Nwane mɔ a ɔwɔ kɛ ɛfa bɛ agɔnwolɛ a? (Eza nea nvoninli ne.)

⁷ Debie ko mɔɔ yɛbahola yɛazukoa yɛavi Gyɛhowahye kpɔkɛzilɛ ɛtane ne anu la a le kɛ ɔhyia kɛ yɛkpa agɔnwolɛma mɔɔ bɛbamaa yɛayɛ mɔɔ le kpalɛ la—agɔnwolɛma mɔɔ kulo Gyihova na bɛkpondɛ kɛ bɛmaa ɔ nye die la. Ɔngyia kɛ yɛfa yɛ tipɛnema ala agɔnwolɛ.  Kakye kɛ, ɛnee Gyɛhowahye agɔnwo Gyɛhɔyada le kpanyinli tɛla ye kolaa. Biza ɛ nwo kɛ: ‘Asoo me gɔnwo mɔ boa me maa menyia diedi kpole wɔ Gyihova anu ɔ? Asoo bɛlɛmaa me anwosesebɛ kɛ menva Nyamenle ngyinlazo ne mɔ membɔ me ɛbɛla ɔ? Asoo bɛka Gyihova nee ye nɔhalɛ ne mɔɔ sonle bolɛ la anwo edwɛkɛ? Asoo bɛbu Nyamenle ngyinlazo ne mɔ ɔ? Asoo mɔɔ mekulo kɛ mete la ala a bɛka bɛkile me ɔ, anzɛɛ saa meyɛ mɔɔ ɔnle kpalɛ la a bɛnyia akɛnrasesebɛ bɛka bɛkile me?’ (Mrɛ. 27:​5, 6, 17) Nɔhalɛ nu, saa ɛ gɔnwo mɔ ɛngulo Gyihova a, ɛnee ɛngyia bɛ nwo. Noko saa ɛ gɔnwo mɔ kulo Gyihova a, ɛnee sɔ bɛ nu boɛ—bɛbaboa wɔ dahuu!—Mrɛ. 13:20.

8. Saa yɛfa sohyia media yɛdi gyima a, duzu a ɔwɔ kɛ yɛsuzu nwo a?

⁸ Sohyia media bahola ayɛ adenle kpalɛ ko mɔɔ yɛdua zo yɛ nee yɛ mbusuafoɔ nee yɛ gɔnwo mɔ di adwelie a. Noko menli dɔɔnwo dua zo yɛ ninyɛne mɔɔ ɔbamaa awie mɔ anye alie bɛ nwo la; bɛfa ninyɛne mɔɔ bɛtotɔ anzɛɛ bɛyɛ la anwo nvoninli nee vidio bɛgua ɛkɛ. Saa ɛfa sohyia media ɛdi gyima a, biza ɛ nwo kɛ: ‘Asoo adwenle mɔɔ melɛ la a le kɛ memaa awie mɔ anye alie me nwo? Asoo me bodane a le kɛ memaa awie mɔ anwosesebɛ anzɛɛ memaa bɛahanvo me? Asoo melɛmaa menli mɔɔ fa sohyia media di gyima la anyia me nzuzulɛ, me ɛdendɛlɛ nee me nyɛleɛ zo tumi wɔ adenle ɛtane zo?’ Adiema Nathan Knorr mɔɔ ɛnee boka neazo eku ne anwo la dule folɛ ɛhye: “Mmabɔ mɔdenle kɛ ɛsɔ menli nye. Saa ɛyɛ zɔ a, akee ɛnrɛhola ɛnrɛzɔ awie biala anye. Yɛ mɔɔ sɔ Gyihova anye la, na ɛbazɔ awie biala mɔɔ kulo Gyihova la anye.”

9. Duzu a Gyihova boale Yuzaya maanle ɔyɛle a? (2 Edwɛkɛsisilɛ 26:​1-5)

⁹ Sukoa kpɔkɛ kpalɛ mɔɔ Yuzaya sisile la. Mɔɔ Belemgbunli Yuzaya le kakula la, ɔbɛlɛle ɔ nwo aze. “Ɔzulole nɔhalɛ Nyamenle ne.” Ɔlile ɛvolɛ 68 na Gyihova yilale ye fane dɔɔnwo wɔ ye ɛbɛlabɔlɛ nu. (Kenga 2 Edwɛkɛsisilɛ 26:​1-5.) Yuzaya lile maanle ne agbɔvolɛ dɔɔnwo anwo zo konim na ɔnleanle kɛ Gyɛlusalɛm banyia banebɔlɛ kpalɛ. (2 Ek. 26:​6-15) Yuzaya anye liele kpalɛ wɔ debie biala mɔɔ Nyamenle boale ye maanle ɔholale ɔyɛle la anwo.—Nol. 3:​12, 13.

10. Duzu a dole Yuzaya a?

¹⁰ Sukoa debie fi kpɔkɛ ɛtane mɔɔ Yuzaya sisile la anu. Ɛnee dahuu Belemgbunli Yuzaya ka edwɛkɛ a menli di zolɛ. Asoo yemɔ maanle ɔnyianle adwenle kɛ ɔkola ɔyɛ debie biala mɔɔ ɔkulo la ɔ? Ɔyɛ, kenle ko bie, Yuzaya zile kpɔkɛ kɛ ɔkɔ Gyihova ɛzonlenlɛsua ne anu. Na kɛmɔ ɛnee ɔlɛmemaa ɔ nwo zo la ati, ɔbɔle mɔdenle kɛ ɔyela ayilevuanlɛ wɔ afɔlemokyea ne azo, debie mɔɔ ɛnee arelemgbunli ɛnlɛ nwolɛ adenle kɛ bɛbayɛ la. (2 Ek. 26:​16-18) Ɛsɔfo Kpanyinli Azalaya bɔle mɔdenle kɛ ɔmaa Yuzaya agyakyi, noko ɔvale ɛya kpole. Ɔyɛ alɔbɔlɛ kɛ, Yuzaya angɔ zo anli nɔhalɛ la, na Gyihova maanle kokobɛ guale ye ɔvale ɔhwenle ɔ nzo. (2 Ek. 26:​19-21) Saa ɔhɔle zo ɔbɛlɛle ɔ nwo aze a, anrɛɛ nea kɛzi ye ɛbɛlabɔlɛ bawie ye boɛ a!

11. Ninyɛne boni mɔ a yɛyɛ a ɔbahile kɛ yɛbɛlɛ yɛ nwo aze a? (Eza nea nvoninli ne.)

¹¹ Mɔɔ Yuzaya nyianle tumi kpole la, ɔ rɛle vile kɛ Gyihova a maanle ye anwosesebɛ na ɔmaanle ɔwiele ye boɛ a. Duzu a yɛsukoa yɛfi nu a? Ɔwɔ kɛ yɛkakye kɛ nyilalɛ nee nwolɛ adenle mɔɔ yɛnyia la vi Gyihova ɛkɛ. Ɔnle kɛ yɛfa mɔɔ yɛhola yɛyɛ la yɛtu yɛ nloa anu, emomu ɔwɔ kɛ yɛfa nwolɛ nganvolɛ ne yɛmaa Gyihova. b (1 Kɔl. 4:7) Ɔwɔ kɛ yɛbɛlɛ yɛ nwo  aze yɛdie yɛto nu kɛ yɛnli munli na yɛhyia ɛdenrɛdenrɛlɛ. Adiema nrenyia bie mɔɔ ɛli kɛyɛ ɛvolɛ 60 la hɛlɛle kɛ: “Mezukoa kɛ saa awie mɔ ka me nvonleɛ nwo edwɛkɛ a menrɛva nwolɛ ɛya anzɛɛ menrɛmaa me sa nu ɛnrɛdo. Saa ɔyɛ na meyɛ ngoaseade na bɛtenrɛ me a, mebɔ mɔdenle kɛ mebayɛ nzenzaleɛ na meahɔ me nyunlu.” Nɔhalɛ nu, saa yɛsulo Gyihova na yɛkɔ zo yɛbɛlɛ yɛ nwo aze a, ɔbamaa yɛ ɛbɛlabɔlɛ awie yɛ boɛ.—Mrɛ. 22:4.

12. Mɔɔ Dwosaya le kakula kpavolɛ la kɛzi ɔkpondɛle Gyihova ɛ? (2 Edwɛkɛsisilɛ 34:​1-3)

¹² Sukoa kpɔkɛ kpalɛ mɔɔ Dwosaya sisile la. Mɔɔ Dwosaya le kakula kpavolɛ la yɛɛ ɔbɔle ɔ bo kɛ ɔkpondɛ Gyihova a. Ɛnee ɔkulo kɛ ɔsukoa Gyihova anwo debie na ɔyɛ Ye ɛhulolɛdeɛ. Noko ɛnee ɛbɛlabɔlɛ ɛnla aze ɛmmaa belemgbunli kakula ɛhye. Ɛnee ɔwɔ kɛ ɔgyinla nɔhalɛ ɛzonlenlɛ nzi wɔ mekɛ mɔɔ adalɛ ɛzonlenlɛ ɛlie ebia kpole la. Na amgba ɔyɛle ye zɔ! Mɔɔ ɔtɛdile ɛvolɛ 20 bɔbɔ la, ɔbɔle ɔ bo kɛ ɔtu adalɛ ɛzonlenlɛ bo yeavi maanle ne anu.—Kenga 2 Edwɛkɛsisilɛ 34:​1-3.

13. Saa ɛyila ɛ nwo zo ɛmaa Gyihova a, kɛzi ɔbaha wɔ ɛbɛlabɔlɛ ɛ?

¹³ Saa ɛle kakula ekyi bɔbɔ a, ɛbahola wɔazi kpɔkɛ kɛ ɛbazukoa Dwosaya ɔlua Gyihova mɔɔ ɛbakpondɛ ye na wɔazukoa Ye subane ne mɔ anwo debie la azo. Saa ɛyɛ ye zɔ a, ɔbamaa wɔanyia ɛhulolɛ kɛ ɛbayila ɛ nwo zo wɔamaa ye. Kɛzi ɛnwozoyilalɛ ne baha wɔ ɛbɛlabɔlɛ kenle ko biala ɛ? Luke mɔɔ bɛzɔnenle ye la ɛnee yeli ɛvolɛ 14 la hanle kɛ: “Ɔvi ɛnɛ mɔɔ kɔ la mebava Gyihova ɛzonlenlɛ mealimoa me ɛbɛlabɔlɛ nu na meabɔ mɔdenle kɛ mebamaa ɔ nye alie.” (Maake 12:30) Saa ɛdawɔ noko ɛnyia ɛhulolɛ kɛ ɛbayɛ mɔɔ ɔyɛle la bie a, nea nyilalɛ mɔɔ ɛbanyia a!

14. Maa kɛzi ngakula bie mɔ ɛlɛsukoa Belemgbunli Dwosaya la anwo neazo.

¹⁴ Kɛ kakula mɔɔ ɛlɛsonle Gyihova la, ngyegyelɛ boni mɔ a ɛbahola wɔayia a? Johan mɔɔ bɛzɔnenle ye la ɛnee yeli ɛvolɛ 12 la hanle kɛ ɔ gɔnwo mɔ sukuluma mɔɔ ɔ nee bɛ gyi kelase ko la tinlitinlinle ɔ nwo zo kɛ ɔnlo sigalɛte bie mɔɔ ɛdwu zo mɔɔ bɛfɛlɛ ye vaping la bie. Debie mɔɔ yeammaa Johan anlie ando nu la a le kɛ, ɔhakyele ɔ nwo kɛ vaping bahola  azɛkye ye kpɔkɛdelɛ yɛɛ agɔnwolɛvalɛ mɔɔ ɔ nee Gyihova lɛ la. Rachel mɔɔ bɛzɔnenle ye la ɛnee yeli ɛvolɛ 14 la hilehilele debie mɔɔ boa ye maa ɔgyinla ngyegyelɛ nloa wɔ sukulu la anu. Ɔhanle kɛ: “Mebɔ mɔdenle kɛ mebakpondɛ debie mɔɔ ɔbamaa me adwenle ahɔ Baebolo ne nee Gyihova anwo zo la. Kɛ neazo la, saa yɛlɛsukoa tetedwɛkɛ a, bie a ɔmaa mekakye Baebolo nu edwɛkɛ anzɛɛ ngapezo bie. Anzɛɛ bie a adawubɔlɛ bie bamaa meahakye ngɛlɛlera mɔɔ mebahola meaha nwolɛ edwɛkɛ meahile awie la.” Bie a ngyegyelɛ mɔɔ ɛbayia la bayɛ ngakyile avi Belemgbunli Dwosaya ɛdeɛ ne anwo, noko ɛbahola wɔanwu nrɛlɛbɛ na wɔali nɔhalɛ kɛ ɔdaye la. Saa ɛkola ɛdi sɔnea mɔɔ ɛyia wɔ wɔ ngakula nu la azo a, ɔbaziezie wɔ yeamaa ngyegyelɛ gyɛne mɔɔ ɛbayia ye kenle bie la.

15. Duzu a boale Dwosaya maanle ɔzonlenle Gyihova nɔhalɛ nu a? (2 Edwɛkɛsisilɛ 34:​14, 18-21)

¹⁵ Belemgbunli Dwosaya lile ɛvolɛ 26 la, ɔmaanle bɛyɛle ɛzonlenlɛsua ne boɛ. Bɛyɛ zɔhane gyima ne la, bɛnwunle “buluku ne mɔɔ Gyihova Mɛla ne mɔɔ ɔluale Mosisi anwo zo ɔvale ɔmaanle la” wɔ nu la. Mɔɔ bɛgengale bɛhilele belemgbunli ne la, ɔhanle ye ɔmaanle ɔlile edwɛkɛ mɔɔ wɔ nu la azo. (Kenga 2 Edwɛkɛsisilɛ 34:​14, 18-21.) Ɛkulo kɛ ɛkenga Baebolo ne dahuu ɔ? Saa ɛlɛyɛ ye zɔ a, kɛzi ɔlɛkɔ ye ɛ? Asoo ɛyɛ ngyehyɛnu mɔɔ ɔbaboa ɛdawɔ mumua ne la nzonlɛ ɔ? Luke mɔɔ yɛhanle ɔ nwo edwɛkɛ la kɛlɛ ninyɛne mɔɔ yɛ anyelielɛ mɔɔ ɔnwu ye la wɔ buluku nu. Saa ɛyɛ bie a, ɔbaboa wɔ yeamaa wɔahakye ngyehyɛnu anzɛɛ ninyɛne mɔɔ ɛ nye liele nwolɛ la. Saa ɛ nye die Baebolo ne anwo na ɛnwu nuhua kpalɛ a, ɔbamaa wɔanyia ɛhulolɛ kpole kɛ ɛbazonle Gyihova. Na kɛ mɔɔ Belemgbunli Dwosaya yɛle la, Nyamenle Edwɛkɛ ne baha wɔ yeamaa wɔayɛ mɔɔ le kpalɛ la.

16. Duzu ati a Dwosaya yɛle nvonleɛ kpole bie a, na duzu a yɛsukoa yɛfi nu a?

¹⁶ Sukoa debie fi kpɔkɛ ɛtane mɔɔ Dwosaya zile la anu. Mɔɔ Dwosaya lile kɛyɛ ɛvolɛ 39 la,  ɔyɛle nvonleɛ bie mɔɔ maanle ye ngoane vile ɔ sa a. Ɔliele ɔ nwo ɔlile na yeambiza adehilelɛ yeanvi Gyihova ɛkɛ. (2 Ek. 35:​20-25) Yɛbahola yɛazukoa debie yɛavi nu. Ɔnva nwo ɛvolɛ mɔɔ yɛli anzɛɛ mekɛ tendenle mɔɔ yɛva yɛzukoa Baebolo ne la, ɔwɔ kɛ yɛkɔ zo yɛkpondɛ Gyihova. Ɛhye kile kɛ ɔwɔ kɛ yɛyɛ asɔne dahuu yɛkpondɛ ye adehilelɛ, yɛsukoa ye Edwɛkɛ ne na yɛtie Kilisienema mɔɔ bɛnyi sunsum nu la folɛdulɛ amaa yeaboa yɛ. Yemɔ ɛnrɛmaa yɛnrɛda yɛnrɛyɛ nvonleɛ mgbole na yɛ nye balie kpalɛ.—Gye. 1:25.

17. Duzu a yɛbahola yɛazukoa yɛavi Dwuda arelemgbunli nsa ne edwɛkɛ ne anu a?

¹⁷ Saa ɛle kakula a, ninyɛne mɔɔ yɛ anyelielɛ la dɔɔnwo wɔ ɛkɛ mɔɔ ɛbahola wɔayɛ a. Gyɛhowahye, Yuzaya nee Dwosaya edwɛkɛ ne maa yɛnwu kɛ, ngakula bahola asisi kpɔkɛ mɔɔ nrɛlɛbɛ wɔ nu na bɛabɔ ɛbɛla mɔɔ sɔ Gyihova anye la. Kɛ mɔɔ yɛnwunle ye la, ɛhye ɛngile kɛ dahuu ninyɛne bahɔ ye boɛ. Noko yɛbahola yɛazukoa ninyɛne mgbalɛ mɔɔ arelemgbunli ɛhye mɔ yɛle la, na yɛahoati nvonleɛ mɔɔ bɛyɛle la. Akee yɛ nye bahola ala kɛ ɔbawie yɛ boɛ.

18. Ngɛlɛlera ne anu neazo boni mɔ a maa ɛnwu kɛ wɔ ɛbɛlabɔlɛ bahola awie wɔ boɛ a? (Eza nea nvoninli ne.)

¹⁸ Ngakula gyɛne mɔɔ bɛbikyele Gyihova, bɛnyianle ɔ nyunlu ɛlolɛ na bɛ ɛbɛlabɔlɛ wiele bɛ boɛ la anwo edwɛkɛ wɔ Ngɛlɛlera ne anu. Ɛnee Devidi boka bɛ. Mɔɔ ɔle kakula la, ɔkpale kɛ ɔbahɔ Nyamenle afoa, na nzinlii ɔrayɛle belemgbunli mɔɔ di nɔhalɛ. Ɔyɛ a ɔyɛ nvonleɛ, noko Nyamenle anye liele ɔ nwo. (1 Arl. 3:6; 9:​4, 5; 14:8) Ɛsukoa Devidi ɛbɛlabɔlɛ nee ye nɔhalɛlilɛ nwo debie a, ɔbamaa wɔ anwosesebɛ. Anzɛɛ ɛbahola wɔazukoa Maake nee Timote neazo ne anwo debie. Ɛbanwu ye kɛ, bɛbɔle ɔ bo kɛ bɛsonle Gyihova wɔ bɛ ngakula nu na bɛnyianle Nyamenle anyunlu ɛlolɛ dahuu; yemɔ maanle ɔwiele bɛ boɛ.

19. Ɛbɛlabɔlɛ boni a ɛbahola wɔanyia a?

¹⁹ Kɛzi ɛbabɔ wɔ ɛbɛla kɛkala la a bahile kɛzi wɔ ɛbɛlabɔlɛ bayɛ la a. Ɛfa ɛ nwo ɛto Gyihova anwo zo na wɔanva ɛ nwo wɔando ɛdawɔ mumua ne wɔ ndelebɛbo zo a, ɛbamaa yeahile wɔ ɛbɛlabɔlɛ adenle. (Mrɛ. 20:24) Ɛbahola wɔanyia ɛbɛlabɔlɛ mɔɔ yɛ anyelielɛ. Kakye kɛ, Gyihova bu mɔɔ ɛyɛ ɛmaa ye la kɛ ɔsonle bolɛ. Saa wɔanva wɔ ɛbɛlabɔlɛ wɔanzonle yɛ anwuma Selɛ ne mɔɔ lɛ ɛlɔlɛ la a, debie kpalɛ boni bieko a ɛbahola wɔava wɔayɛ a?