Bɛwole me wɔ 1934. Me awovolɛ vi Switzerland na bɛhɔdɛnlanle Timmins, sua bie mɔɔ ɛnee bɛtu agudeɛ wɔ zo mɔɔ wɔ Ontario, Canada la azo. Wɔ 1939 ne anu, me mame bɔle ɔ bo kɛ ɔkenga Ɛzinzalɛ Arane magazine ne yɛɛ ɛnee ɔkɔ Gyihova Alasevolɛ debiezukoalɛ ne mɔ bie. Ɛnee ɔfa me nee me mediema nsia ne ɔkɔ. Yeangyɛ, ɔrayɛle Gyihova Dasevolɛ.

Yɛ papa anye anlie ye kpɔkɛzilɛ ne anwo, noko ɛnee yɛ mame anye die nɔhalɛ ne anwo kpalɛ na ɔbɔle kpɔkɛ kɛ ɔnrɛgyakyi nuhua. Ɔyɛle ye zɔ bɔbɔ wɔ 1940 ne anu wɔ mekɛ mɔɔ bɛvale bɛ sa bɛdole Gyihova Alasevolɛ gyima ne azo wɔ Canada la. Ɛnee me papa ɛndendɛ kɛnlɛma ɛngile yɛ mame ɛdeɛ, noko ɔ nee ye lile wɔ atiakunlukɛnlɛma nu yɛɛ ɛnee ɔbu ye. Ye neazo kɛnlɛma ne boale me nee me mediema ne mɔ ɔmaanle yɛdayɛ noko yɛzɔle nɔhalɛ ne anu. Mɔɔ yɛ anyelielɛ la a le kɛ me papa subane bɔle ɔ bo kɛ ɔkakyi, na akee ɔ nee ye abusua ne lile ye kɛnlɛma.

Wɔ wawaa mekɛ nu wɔ 1950, mengɔle Theocracy’s Increase Assembly ne bie wɔ New York City. Mɔɔ menyiale mediema mrenyia nee mraalɛ mɔɔ bɛvi ewiade ɛleka ngakyile na mendiele mediema mɔɔ hɔle Geleade Sukulu ne bie la edwɛkɛbizebizalɛ ngɛnlɛma ne mɔ la, ɔmaanle menyianle ɛhulolɛ kɛ mebayɛ dɔɔnwo wɔ Gyihova ɛzonlenlɛ nu! Membɔle kpɔkɛ bɔkɔɔ kɛ mebayɛ dahuu ɛzonlenlɛ gyima ne bie. Mɔɔ mendwule sua nu ala la, mengɛlɛle kɛlata mengɔle Canada Bɛtɛle kɛ mekulo kɛ meyɛ dahuu adekpakyelɛnli. Bɛdabɛ noko bɛhɛlɛle me na bɛhanle kɛ kyesɛ bɛdimoa bɛsɔne me. Ɔti memaanle bɛzɔnenle me wɔ October 1, 1950. Siane ko anzi, menyɛle dahuu adekpakyelɛnli na bɛmaanle me gyimalilɛ mɔɔ limoa la wɔ Kapuskasing. Ɛnee ɔvi ɛleka mɔɔ yɛde mɔɔ kɔ zɔhane sua ne azo la wale kpalɛ.

 Wɔ 1951, Bɛtɛle hanle hilele Alasevolɛ mɔɔ bɛkola bɛka Fenlanze la kɛ bɛsuzu nwo saa bɛbahola bɛadu bɛahɔ Quebec maanzinli ne mɔɔ bɛka Fenlanze la anu a. Ɛnee bɛhyia moalɛ kpole wɔ ɛkɛ. Ɛnee mekola meka Fenlanze nee Nrelenza ɔti menliele ɛsalɛdolɛ ne mendole nu na bɛhanle kɛ mengɔ Rouyn. Ɛnee menze awie biala wɔ ɛkɛ. Debie mɔɔ ɛnee melɛ la ala a le sua bie adelɛse kɛ mɔɔ menlimoale menganle la. Noko ninyɛne hɔle boɛ. Marcel rayɛle me gɔnwo kpalɛ, na menvale anyelielɛ menzonlenle wɔ Quebec too ɛvolɛ nna, membanyɛle adekpakyelɛ titili bɔbɔ.

Mɔɔ mewɔ Quebec la, me nye liele kɛ bɛdole ɛsalɛ bɛvɛlɛle me kɛ membɛla Geleade Sukulu ne mɔɔ tɔ zo 26 la bie wɔ South Lansing, New York la. Menwiele sukulu ne wɔ February 12, 1956, na bɛmaanle mengɔle maanle mɔɔ ɛnɛ bɛfɛlɛ ye Ghana, b mɔɔ wɔ West Africa la. Noko kolaa na meahɔ la, ɛnee ɔwɔ kɛ mesia mekɔ Canada kɔkpula kɛ me adendulɛ ngɛlata ne mɔ bɛali munli. Ɛnee mesuzu kɛ mebali dapɛne nwiɔ anzɛɛ nsa ala.

Noko mengendɛle too siane nsuu wɔ Toronto amaa me sa aha ngɛlata zɔhane mɔ. Wɔ zɔhane mekɛ ne, Cripps abusua ne maanle me sua wɔ bɛ awuke ne anu, na bɛ ra raalɛ Sheila rayɛle me gɔnwo na yɛ nye raliele yɛ nwo. Mɔɔ menyianle nwolɛ kɛ meka meahile ye kɛ mebagya ye la yɛɛ me sa hanle me adendulɛ ngɛlata ne a. Me nee Sheila yɛle nwolɛ asɔne na menzile kpɔkɛ kɛ ɔwɔ kɛ mekɔyɛ me gyimalilɛ ne. Noko yɛhanle kɛ yɛbahɔ zo yɛahɛlɛ yɛ nwo ngɛlata na yɛanlea saa yɛbahola yɛagya kenle bie a. Ɛnee ɔnla aze kɛ yɛbazi kpɔkɛ zɔhane, noko nzinlii yɛnwunle kɛ ɔle kpɔkɛzilɛ kpalɛ.

Menvale keteke, gualilɛ meli nee alopile mempɛle adenle siane ko mengɔndwule Accra, Ghana. Wɔ ɛkɛ ne, bɛmaanle menyɛle maanzinli zo neavolɛ. Ɛhye kile kɛ mebakpɔsa Ghana amuala, Ivory Coast (kɛkala bɛfɛlɛ ye Côte d’Ivoire) yɛɛ Togoland (kɛkala bɛfɛlɛ ye Togo). Fane dɔɔnwo ne ala saa melɛtu adenle bie a, me ngomekye a mede kale ne mɔɔ Bɛtɛle vale maanle me la anu a. Melɛkɔ  meahɔkpɔla mediema ne mɔ biala a, me nye die kpalɛ!

Ɔdwu dapɛne awieleɛ a, menea maangyebakyi nyianu zo. Ɛnee yɛnlɛ Nyianu Asalo. Ɔti mediema ne mɔ fa kɛnlampone bo kpɔda na bɛapepɛ arɛlɛ mrɛlakɛ bɛagua zo amaa ewia ketekete ne ambɔ yɛ. Kɛmɔ ɛnee bɛnlɛ felegye wɔ ɛleka mɔɔ bɛto aleɛ ne la ati, ɛnee mediema ne mɔ kendɛhenda nane ne mɔ wɔ ɛkɛ na saa bɛhyia bie a bɛahu ye bɛado aleɛ bɛamaa nyianuma ne.

Yɛnyianle anwubielɛ bie mɔ mɔɔ yɛ ɛzelekɛ la wɔ zɔhane nyianu ne mɔ abo. Kenle ko bie ɛnee Herb Jennings, c mɔɔ ɔdaye noko ɔle edwɛkpatɛlɛvolɛ la ɛlɛmaa ɛdendɛlɛ na ɛnlankɛ nyinli kpole ko vi ɛleka mɔɔ bɛto aleɛ ne la vindele. Ɔnriandile ɔhɔgyinlanle bama ne nee tievolɛma ne avinli ɛkɛ. Herb gyakyile ɛdendɛlɛ ne ɛmaanlɛ na akee nane ne anye zo danle ye. Noko mediema mrenyia nna mɔɔ bɛ nwo yɛ se la holale zɔle ye na bɛvale ye bɛziale bɛhɔle ɛleka mɔɔ bɛto aleɛ ne la, na mediema ne mɔ amuala bɔle liele bɛ zo.

Saa yɛlɛyɛ nyianu a, meye yɛ vidio, The New World Society in Action ne wɔ namunamu mɔɔ zuozua ɛkɛ la azo wɔ dapɛne ne anu. Amaa meahola meaye vidio ne la, mekpɔnla mbaka nwiɔ mefa ɛdanlɛ fufule mekenda bɛ avinli anzɛɛ mekenda ɛdanlɛ ne wɔ egyane nwiɔ avinli na meaye vidio ne meagua zo. Menli mɔɔ wɔ namunamu ne mɔ azo la anye liele nwolɛ! Wɔ bɛ nuhua dɔɔnwo afoa nu, yemɔ a le vidio mɔɔ bɛlimoale bɛnleanle wɔ bɛ ɛbɛlabɔlɛ nu a. Mɔɔ bɛnwunle menli mɔɔ bɛlɛsɔne bɛ la, bɛbɔle bɛ sa nu kpole kpalɛ. Zɔhane vidio ne boale menli mɔɔ bɛnleanle la ɔmaanle bɛnwunle kɛ yɛle ewiade amuala ahyehyɛdeɛ ko mɔɔ koyɛlɛ wɔ yɛ nu a.

Mɔɔ menlile ɛvolɛ nwiɔ wɔ Africa la, me nye liele kɛ mengɔle 1958 maanle maanle avinli nyianu ne bie wɔ New York City la. Me nye liele kpole kpalɛ kɛ menwunle Sheila wɔ nyianu ne abo la, ɔvi Quebec, ɛleka mɔɔ ɛnee ɔlɛyɛ adekpakyelɛ titili gyima ne bie la a ɔrale a. Ɛnee yɛkɛlɛ yɛ nwo ngɛlata, noko mɔɔ yɛ mu nwiɔ yɛyiale la, menganle mengilele ye kɛ mekulo kɛ megya ye, na ɔliele ɔdole nu. Mengɛlɛle Adiema Knorr d kɛlata membizale ye kɛ saa bɛbahola bɛamaa Sheila ahɔ Geleade Sukulu ne bie na yearaboka me nwo wɔ Africa a. Ɔliele ɔdole nu. Nzinlii, Sheila radwule Ghana. Yɛgyale wɔ Accra, wɔ October 3, 1959. Yɛdele nganeɛ kɛ amgba Gyihova ɛyila yɛ kɛ yɛvale ye yɛlimoale yɛ ɛbɛlabɔlɛ nu la.

Wɔ 1961, bɛmaanle yɛhɔle Cameroon. Kɛmɔ bɛhanle bɛhilele me kɛ menea memaa bɛbuke Bɛtɛle fofolɛ wɔ ɛkɛ ne la ati, ɛnee menlɛ alagye fee. Kɛmɔ ɛnee mele sonla fofolɛ mɔɔ menea gyima mɔɔ bɛyɛ ye wɔ Cameroon azo la ati, ɛnee melɛ ninyɛne dɔɔnwo mesukoa. Noko wɔ 1965 ne anu, yɛnwunle kɛ Sheila ɛlɛnrenzɛ. Nɔhalɛ nu, ɛnee ɔnla aze kɛ yɛbalie yɛado nu kɛ yɛbayɛ awovolɛ. Noko mekɛ mɔɔ yɛ adwenle ɛlɛgyinla na yɛlɛboɔboa yɛ nwo yɛazia yɛahɔ Canada la, edwɛkɛ nyane bie zile.

Sheila ako kpɔnenle. Dɔketa ne hanle kɛ kakula ne mɔɔ anrɛɛ ɔbawo ye la le nrenyia. Ɛhye zile la, kɛyɛ ɛvolɛ 50 ɛne, noko yɛ rɛle ɛtɛfile ye ɛlɛ. Ɛhye maanle yɛlile nyane kpole ɛdeɛ, noko yɛhɔle zo yɛyɛle yɛ gyima ne wɔ Cameroon na ɛnee yɛ nye die nwo kpalɛ.

Kɛmɔ mediema mɔɔ wɔ Cameroon la ɛngyinla afoa biala wɔ maanyɛlɛ nu la ati, ɛnee bɛta bɛyɛ bɛ kpɔdekpɔde. Ɛnee saa ɔdwu ɛradolɛ mekɛ a, kpɔdekpɔdeyɛlɛ ne anloa yɛ se kpalɛ. Wɔ May 13, 1970, debie mɔɔ ɛnee yɛ nye ɛnla la zile. Bɛvale bɛ sa bɛdole Gyihova Alasevolɛ ɛzonlenlɛ zo. Arane ne zale yɛ liele yɛ Bɛtɛle sua kɛnlɛma ne mɔɔ ɛnee yɛdɛnla nu siane nnu ala la. Wɔ dapɛne ko ala anu, bɛhanle kɛ edwɛkpatɛlɛvolɛma—mɔɔ me nee Sheila boka nwo la—ɛvi maanle ne anu. Ɛnee ɔnla aze kɛ yɛbagyakyi mediema ne mɔ ɛkɛ yɛahɔ ɔluakɛ yɛdwenle bɛ nwo yɛɛ kɛ ɔkɛyɛ na bɛagyinla mɔɔ bado bɛ la anloa la yɛle yɛ adwenleadwenle.

Yɛhɔyɛle gyima wɔ France Bɛtɛle siane nsia. Mɔɔ mewɔ ɛkɛ ne la, mengɔle zo menyɛle biala mɔɔ mebahola la menlile yɛ mediema mɔɔ wɔ Cameroon la ngyianlɛ nwo gyima memaanle bɛ. Wɔ December, wɔ zɔhane ɛvolɛ ne ala anu, bɛmaanle yɛhɔle Nigeria Bɛtɛle, na bɛbɔle ɔ bo kɛ bɛnea gyima mɔɔ bɛyɛ ye wɔ Cameroon la azo. Mediema mɔɔ wɔ Nigeria la liele yɛ kɛnlɛma na yɛ nye liele kpalɛ wɔ ɛvolɛ dɔɔnwo mɔɔ yɛvale yɛyɛle gyima wɔ ɛkɛ ne la anu.

Wɔ 1973 ɛnee ɔwɔ kɛ yɛsi kpɔkɛ bie mɔɔ yɛ se la. Ɛnee Sheila ɛnde kpɔkɛ fee. Mɔɔ yɛhɔle nyianu bie wɔ New York la, Sheila bɔle ɔ bo kɛ ɔsu na ɔhanle ɔhilele me kɛ: “Menrɛhola gyima ɛhye yɛ bieko! Mewie fɛ yɛɛ dahuu mende kpɔkɛ.” Ɔ nee me vale ɛvolɛ mɔɔ bo 14 la zonlenle wɔ West Africa. Ɛnee me nye sɔ kɛzi ɔvale nɔhalɛlilɛ ɔyɛle ɛzonlenlɛ gyima ne la, noko ɛnee ɔhyia kɛ yɛyɛ nzenzaleɛ bie mɔ. Mɔɔ yɛzuzule yɛ tɛnlabelɛ ne anwo na yɛvale mekɛ tendenle yɛyɛle nwolɛ asɔne ɛsesebɛ yɛwiele la, yɛzile kpɔkɛ kɛ ɔwɔ kɛ yɛsia yɛkɔ Canada, ɛleka mɔɔ ɔbanyia ye anwodolɛ ne anwo ayileyɛlɛ kpalɛ la. Debie mɔɔ ɛnee ɔyɛ se ɔmaa yɛ kɛ yɛbayɛ na ɔmaanle yɛlile nyane kpalɛ la a le kpɔkɛ mɔɔ yɛzile kɛ yɛbagyakyi yɛ edwɛkpatɛlɛvolɛ gyimalilɛ ne nee dahuu ɛzonlenlɛ gyima ne la.

Mɔɔ yɛhɔdwule Canada la, me gɔnwo dɛba bie mɔɔ ɛnee tɔne kale wɔ sua bie mɔɔ wɔ Toronto sɔlɔ la maanle me gyima. Yɛhayele sua, yɛtotɔle awie mɔ sua nu ninyɛne mɔɔ ɛnee bɛlɛtɔne bɛ la bie na yɛbɔle ɛbɛlabɔlɛ fofolɛ bo mɔɔ yɛandwe kakɛ biala yɛando yɛ nwo a. Ɛnee yɛkulo kɛ yɛtete ninyɛne zo wɔ ɛbɛlabɔlɛ nu na ɛnee yɛlɛ anyelazo ko kɛ kenle ko dedee yɛbazia yɛahɔyɛ dahuu ɛzonlenlɛ gyima ne bieko. Mɔɔ si yɛ nwo la a le kɛ, yɛ anyelazo  zɔhane rale nu ndɛndɛ dɛlale kɛzi ɛnee yɛsuzu bɔbɔ la.

Membɔle ɔ bo kɛ meyɛ gyima Folɛ biala meaboa Nyianu Asalo fofolɛ bie mɔɔ ɛnee bɛlɛsi ye wɔ Norval, Ontario la. Nzinlii bɛhanle kɛ menyɛ Nyianu Asalo zo neavolɛ. Ɛnee Sheila anwodolɛ ne ɛlɛkɔ ngyikyi ngyikyi na ɛnee yɛdwenle kɛ ɔbahola yeayɛ gyimalilɛ fofolɛ ɛhye. Ɔti yɛdule yɛhɔle sua ne mɔɔ wɔ Nyianu Asalo ɛkɛ ne la anu wɔ June, 1974. Yɛ nye liele kɛ yɛzia yɛra dahuu ɛzonlenlɛ gyima ne anu la!

Anyelielɛ edwɛkɛ ne a le kɛ, ɛnee Sheila kpɔkɛdelɛ ne tɛkɔ zo tɛyɛ kpalɛ. Ɛvolɛ nwiɔ anzi, yɛholale yɛhɔyɛle maangyebakyi zo neavolɛ gyima ne bie. Ɛnee maangyebakyi ne wɔ Manitoba, ɔwɔ Canada maanzinli bie mɔɔ ɛkɛ ne yɛ ɛyɛlɛ kpalɛ la anu. Noko mediema mɔɔ wɔ ɛkɛ la maanle yɛ nye liele kpalɛ, ɛnee bɛlɛ ɛlɔlɛ. Yɛnwunle kɛ ɛleka mɔɔ yɛbadɛnla yɛazonle Gyihova la ɛngyia—mɔɔ hyia kpalɛ la a le kɛ yɛbahɔ zo yɛazonle Gyihova wɔ ɛleka biala mɔɔ yɛwɔ la.

Mɔɔ yɛyɛle maangyebakyi zo neavolɛ gyima ne wɔ ɛvolɛ dɔɔnwo anu la, bɛdole ɛsalɛ bɛvɛlɛle yɛ wɔ 1978 kɛ yɛhɔyɛ gyima wɔ Canada Bɛtɛle. Yɛhɔdwule ɛkɛ ne la, yeangyɛ menyianle ɛzukoalɛdeɛ bie mɔɔ yɛ nyane noko ɔboale me la. Bɛmaanle me gyimalilɛ kɛ memaa dɔnehwele ko nee foa ɛdendɛlɛ wɔ Fenlanze nu wɔ ayia titili bie mɔɔ yɛyɛle ye wɔ Montreal la abo. Mɔɔ ɔyɛ alɔbɔlɛ la a le kɛ, tievolɛma ne anye anlie me ɛdendɛlɛ ne anwo, ɔti adiema bie mɔɔ yɛ gyima wɔ Ɛzonlenlɛ Nwo Gyimalilɛleka ne la dule me folɛ wɔ nwolɛ. Nɔhalɛ nu, meranwu ye kɛ menle tendɛvolɛ mɔɔ mebɔ mɔdenle kpole kpalɛ a, na anrɛɛ ɛnee ɔwɔ kɛ menwu ye zɔ wɔ zɔhane mekɛ ne. Noko meanlie folɛdulɛ ne meando nu. Yɛ nloa anzɛ yɛ nwo fee. Mendele nganeɛ kɛ ɔle kyengye somaa na yeanganvo me ekyi bɔbɔ wɔ me mɔdenlebɔlɛ ne anwo. Menyɛle nvonleɛ kɛ mengyinlanle kɛzi adiema ne dule me folɛ nee adwenle mɔɔ menyianle ye wɔ ɔ nwo la azo la memkpole ye folɛdulɛ ne la.

Kenle ekyii pɛle nu la, Ɔfese Kɔmatii ne anu sonla ko nee me hanle nwolɛ edwɛkɛ. Menliele mendole nu kɛ mɔɔ menyɛle ye wɔ folɛdulɛ ne anwo la ɛnle kpalɛ ɔti menunle me nwo. Akee me nee adiema ne mɔɔ dule me folɛ ne la dendɛle. Na ɔvale ɔhyɛle me. Anwubielɛ zɔhane maanle menzukoale mɛlɛbɛnwoaze nwo debie mɔɔ me rɛle ɛnrɛvi ye ɛlɛ a. (Mrɛ. 16:18) Meha ɛhye anwo edwɛkɛ fane dɔɔnwo mehile Gyihova wɔ asɔneyɛlɛ nu, na mebɔ kpɔkɛ kɛ menrɛnyia folɛdulɛ biala anwo adwenle ɛtane bieko ɛlɛ.

Meyɛ gyima ɛvolɛ mɔɔ bo 40 la wɔ Canada Bɛtɛle yɛɛ menyia nwolɛ adenle me nee Ɔfese Kɔmatii ne ɛyɛ gyima ɔvi 1985. Wɔ February 2021, me kulovolɛ Sheila lale wɔ ewule nu. Ɛye ye ewule ne anwo nyane mɔɔ melɛdi la ɛsie ahane a, eza mende kpɔkɛ kpalɛ. Noko Gyihova ɛzonlenlɛ maa menyia gyima dɔɔnwo meyɛ na me nye die ɔti mennwu kɛ “mekɛ ɛlɛse ahɔ.” (Nol. 5:20) Meyia ngyegyelɛ dɔɔnwo wɔ ɛbɛlabɔlɛ nu ɛdeɛ, noko ninyɛne mɔɔ maanle me nye liele la zonle tɛla ngyegyelɛ ne. Gyihova mɔɔ menvale ye menlimoale me ɛbɛlabɔlɛ nu nee ɛvolɛ 70 mɔɔ meva meyɛ dahuu ɛzonlenlɛ gyima ne la ɛmaa me kunlu ɛdwo me nwo kpalɛ. Me asɔneyɛlɛ a le kɛ yɛ mediema mgbavolɛ nee mbɛlɛra bahɔ zo ava Gyihova alimoa bɛ ɛbɛlabɔlɛ nu, ɔluakɛ medie medi kɛ bɛdabɛ noko bɛbanyia ɛbɛlabɔlɛ mɔɔ yɛ ahunlundwolɛ nee anyelielɛ mɔɔ Gyihova ɛzonlenlɛ ala a maa bɛnyia la bie.