1. Ndɛnebualɛ boni a ɔnrɛhyɛ ɔbahɔ zo a?

 YƐDE mekɛ mɔɔ ninyɛne mgbole ɛlɛsisi la anu! Ɔnrɛhyɛ Gyisɛse babua awie biala mɔɔ de aze la ndɛne. Gyisɛse hilehilele “sɛkɛlɛneɛ” mɔɔ bazi amaa ye ɛdoavolɛma anwu kɛ ye ndɛnebualɛ ne ɛdwu na “mekɛ ɛhye ɛlɛkɔ awieleɛ” la anu hilele bɛ. (Mat. 24:3) Bɛhɛlɛ ngapezo ɛhye mɔ wɔ Mateyu tile 24 nee 25 yɛɛ ɛbanwu bie noko wɔ Maake tile 13 nee Luku tile 21.

2. Duzu a yɛbava yɛ adwenle yɛazie zo a, na kɛzi ɛhye baboa yɛ ɛ?

² Gyisɛse luale ndonwo nsa ɛhye azo vale kɔkɔbɔlɛ mɔɔ baboa yɛ la maanle. Bɛmɛ a le mboane nee mbɔnkye, mbɛlɛra badwema nee ahoasea ne mɔ nee talɛnte nwo ndonwo ne mɔ. Ndonwo ɛhye mɔ anu ko biala baboa yɛ yeamaa yɛanwu kɛ awie subane a bɛbagyinla zo babua ye ndɛne a. Wɔ mekɛ mɔɔ yɛlɛsuzu ndonwo ɛhye mɔ anwo la, bɔ mɔdenle kɛ ɛbanwu ɛzukoalɛdeɛ mɔɔ wɔ nu nee kɛzi ɛbava wɔali gyima la. Bɛmaa yɛva mboane nee mbɔnkye ne mɔ anwo ndonwo ne yɛbɔ ɔ bo.

MBOANE NEE MBƆNKYE NE MƆ

3. Mekɛ boni a Gyisɛse babua menli ndɛne a?

³ Wɔ mboane nee mbɔnkye nwo ndonwo ne anu, Gyisɛse hanle kɛ ɔbagyinla kɛzi menli diele edwɛkpa ne nee kɛzi bɛboale ɔ mediema ne mɔ mɔɔ bɛkpokpa bɛ la azo a yeabua bɛ ndɛne a. (Mat. 25:​31-46) Wɔ “anwongyelelɛ kpole” ne anu, ɔbabua ndɛne ɛhye kolaa na Amagɛdɔn azi. (Mat. 24:21) Kɛ mɔɔ mboaneneavolɛ ye mboane fi mbɔnkye nu la, Gyisɛse noko baye menli mɔɔ bɛfa nɔhalɛlilɛ bɛboa ye ɛdoavolɛma mɔɔ bɛkpokpa bɛ la avi menli mɔɔ bɛnyɛ zɔ la anu.

4. Kɛ mɔɔ Ayezaya 11:​3, 4 kile la, duzu ati a yɛbahola yɛalie yɛali kɛ Gyisɛse babua menli ndɛne pɛlepɛle nu a? (Eza nea nvoninli ne.)

⁴ Baebolo ngapezo maa ɔda ali kɛ kɛmɔ Gyisɛse le ndɛnebuavolɛ mɔɔ Gyihova a ɛkpa ye la ati, ɔbabua ndɛne mɔɔ le tenlene. (Kenga Ayezaya 11:​3, 4.) Ɔgua ɔ nye aze ɔnea menli  subane, bɛ nyɛleɛ nee kɛzi bɛtendɛ la—subane mɔɔ bɛda ye ali bɛkile ɔ mediema mɔɔ bɛkpokpa bɛ la noko boka nwo. (Mat. 12:​36, 37; 25:40) Gyisɛse banwu menli mɔɔ bɛboale ɔ mediema mɔɔ bɛkpokpa bɛ nee gyima mɔɔ bɛyɛle la. a Adenle titili ko mɔɔ menli mɔɔ bɛle kɛ mboane la dua zo boa Kelaese amediema ne mɔ la a le kɛ yɛbaboa bɛ wɔ edwɛkɛhanlɛ gyima ne anu. Bɛbabua menli mɔɔ bɛboa wɔ adenle ɛhye azo la ndɛne kɛ bɛle “tenlenema” na bɛbanyia “dahuu ngoane” nwo adenle wɔ azɛlɛ ye azo. (Mat. 25:46; Yek. 7:​16, 17) Ɛhye le ahatualɛ kɛnlɛma maa bɛdabɛ mɔɔ bɛbahɔ zo bɛali nɔhalɛ la! Saa bɛdi nɔhalɛ wɔ anwongyelelɛ kpole ne anu na bɛkɔ zo bɛyɛ ye zɔ wɔ yemɔ anzi a, bɛ aluma baha “ngoane buluku ne anu.”—Yek. 20:15.

5. Ɛzukoalɛdeɛ boni a a wɔ mboane nee mbɔnkye nwo ndonwo ne anu a, na nwane mɔ a bahola anyia zolɛ nvasoɛ a?

⁵ Kile kɛ ɛdi nɔhalɛ. Gyisɛse mboane nee mbɔnkye nwo ndonwo ne fale menli mɔɔ lɛ anyelazo kɛ bɛbadɛnla azɛlɛ ye azo la anwo titili. Tɛ edwɛkɛhanlɛ gyima ne mɔɔ bɛyɛ bɛboa Kelaese amediema ne mɔ la angomekye a bɛdua zo bɛda bɛ diedi ne ali a, emomu, eza bɛfa nɔhalɛlilɛ bɛdie adehilelɛ mɔɔ vi mediema mrenyia ekpunli ekyi mɔɔ bɛkpokpa bɛ mɔɔ Gyisɛse ɛkpa bɛ kɛ bɛli yɛ nyunlu la adehilelɛ bɛto nu. (Mat. 24:45) Ɔwɔ kɛ menli mɔɔ lɛ anwuma anyelazo la noko tie kɔkɔbɔlɛ mɔɔ wɔ ndonwo ne anu la. Duzu ati ɔ? Ɔluakɛ Gyisɛse nea bɛ subane, bɛ nyɛleɛ nee kɛzi bɛtendɛ la. Ɔwɔ kɛ bɛdabɛ noko bɛdi nɔhalɛ. Gyisɛse yɛle ndonwo nwiɔ bieko mɔɔ nuhua kɔkɔbɔlɛ ne kɔ maa menli mɔɔ bɛkpokpa bɛ la a. Eza yɛnwu ndonwo ɛhye mɔ wɔ Mateyu tile 25. Akee maa yɛzuzu mbɛlɛra badwema nee ahoasea ne mɔ anwo ndonwo ne anwo.

MBƐLƐRA BADWEMA NEE AHOASEA NE MƆ

6. Kɛzi mbɛlɛra ne mɔ anu nnu hilele kɛ bɛle badwema ɛ? (Mateyu 25:​6-10)

⁶ Wɔ ndonwo ne anu, Gyisɛse hanle mbɛlɛra bulu mɔɔ bɛhɔle kɛ bɛkayia atɔfolɛ nrenyia bie la anwo edwɛkɛ. (Mat. 25:​1-4) Ɛnee bɛ muala bɛlɛ anyelazo kɛ bɛ nee atɔfolɛ nrenyia ne bahɔ ɛkponledolɛ ne abo. Gyisɛse hanle bɛ nuhua nnu anwo edwɛkɛ kɛ bɛle “badwema” yɛɛ nnu ne mɔɔ ɛha la le “ahoasea.” Ɛnee mbɛlɛra nnu ne mɔɔ bɛle badwema la ɛziezie bɛ nwo yɛɛ bɛ nye la ɛkɛ. Bɛzieziele bɛ nwo mɔɔ saa atɔfolɛ nrenyia ne kyɛ a, bɛbahendɛ ye, saa bɔbɔ ɔba nɔɔzo a. Ɛhye ati, bɛvale ahɛnlaneɛ mɔɔ bɛfa nwole bɛgua nu amaa bɛanwu aze wɔ nɔe ne la. Eza bɛvale nwole mɔɔ saa atɔfolɛ nrenyia ne amba ndɛ a bɛbava bɛagua bɛ ahɛnlaneɛ ne mɔ anu la bɛziale bɛ nwo. Ɔti ɛnee bɛziezie bɛ nwo kɛ bɛnrɛmaa bɛ ahɛnlaneɛ ne mɔ ɛnrɛnlu. (Kenga Mateyu 25:​6-10.) Mɔɔ atɔfolɛ nrenyia ne radwule la, mbɛlɛra badwema nnu ne nee ye hɔle ɛkponledolɛ ne abo. Zɔhane ala a bɛbabua Kilisienema mɔɔ bɛkpokpa bɛ mɔɔ bɛbahɔ zo bɛamaa bɛ nye ala ɛkɛ na bɛali nɔhalɛ bɛahɔdwu mekɛ mɔɔ Kelaese bara la ndɛne kɛ bɛfɛta kɛ bɛkɔboka Atɔfolɛ Nrenyia ne, Gyisɛse anwo wɔ ye anwuma Belemgbunlililɛ ne anu a. b (Yek. 7:​1-3) Na mbɛlɛra ahoasea nnu ne mɔɔ bɛha la ɛ?

7. Duzu a dole mbɛlɛra ahoasea nnu ne a, na duzu ati ɔ?

⁷ Ɛnee mbɛlɛra ahoasea nnu ne ɛtɛsieziele bɛ nwo kɛ bɛkayia atɔfolɛ nrenyia ne kɛ mɔɔ mbɛlɛra badwema ne mɔ yɛle la. Ɛnee  bɛ ahɛnlaneɛ ne mɔ ɛlɛnu yɛɛ bɛanva nwole bɛanzia bɛ nwo. Mɔɔ bɛdele kɛ ɔnrɛhyɛ na atɔfolɛ nrenyia ne ara la, ɛnee akee ɔwɔ kɛ bɛkɔtɔ nwole. Mɔɔ atɔfolɛ nrenyia ne rale la, ɛnee bɛtɛbale. Wɔ zɔhane mekɛ ne, “mbɛlɛra ne mɔ mɔɔ bɛnyia nwolɛ la nee ye hɔle atɔfolɛlielɛ ne abo, na bɛdole anlenkɛ ne anu.” (Mat. 25:10) Nzinlii mɔɔ mbɛlɛra ahoasea ne mɔ rale na bɛkulo kɛ bɛwolo sua ne anu la, atɔfolɛ nrenyia ne hanle hilele bɛ kɛ: “Menze bɛ.” (Mat. 25:​11, 12) Mbɛlɛra zɔhane mɔ anziezie bɛ nwo kɛ saa atɔfolɛ nrenyia ne kyɛ a bɛbahendɛ ye. Duzu a menli mɔɔ bɛkpokpa bɛ la sukoa fi ɛhye anu a?

8-9. Duzu a menli mɔɔ bɛkpokpa bɛ la bahola azukoa avi mbɛlɛra ne mɔ anwo ndonwo ne anu a? (Eza nea nvoninli ne.)

⁸ Kile kɛ wɔziezie ɛ nwo yɛɛ ɛ nye la ɛkɛ. Tɛ mɔɔ ɛnee Gyisɛse ɛlɛka la a le kɛ yɛbanyia menli ekpunli nwiɔ mɔɔ bɛkpokpa bɛ a—nuhua ko banyia ɛhulolɛ kɛ ɔbahendɛ kɔkpula kɛ ewiade ɛhye bara awieleɛ yɛɛ nuhua ko mɔɔ ɔnrɛnyia ɛhulolɛ kɛ ɔbahendɛ. Emomu ɛnee ɔlɛkilehile mɔɔ menli mɔɔ bɛkpokpa bɛ la anli nɔhalɛ angɔ awieleɛ a ɔbado bɛ la anu. Ɔba ye zɔ a bɛ sa ɛnrɛha bɛ ahatualɛ ne. (Dwɔn 14:​3, 4) Ɛhye le anyebolo edwɛkɛ o! Saa yɛ anyelazo a le kɛ yɛbadɛnla anwuma o, anzɛɛ azɛlɛ ye azo o, ɔwɔ kɛ yɛ muala yɛtie kɔkɔbɔlɛ mɔɔ wɔ mbɛlɛra ne mɔ anwo ndonwo ne anu la. Ɔwɔ kɛ yɛ nuhua ko biala kɔ zo sinza na ɔsiezie ɔ nwo, ɔnyia ɛhulolɛ kɛ ɔbagyinla kpundii yeahɔ awieleɛ.—Mat. 24:13.

⁹ Mɔɔ Gyisɛse yɛle mbɛlɛra ne mɔ anwo ndonwo ne vale zile kɛzi ɔhyia kɛ yɛsiezie yɛ nwo na yɛmaa yɛ nye da ɛkɛ la wiele la, eza ɔyɛle talɛnte nwo ndonwo ne. Zɔhane ndonwo ne si kɛzi ɔhyia kɛ yɛyɛ gyima ɛsesebɛ la azo.

TALƐNTE NE

10. Kɛzi ngɛkɛlɛ nwiɔ ne hilele kɛ bɛdi nɔhalɛ ɛ? (Mateyu 25:​19-23)

¹⁰ Wɔ talɛnte nwo ndonwo ne anu, Gyisɛse hanle ngɛkɛlɛ nwiɔ mɔɔ bɛlile nɔhalɛ bɛmaanle bɛ menle ne yɛɛ akɛlɛ ko mɔɔ anli nɔhalɛ la anwo edwɛkɛ. (Mat. 25:​14-18) Ngɛkɛlɛ  nwiɔ ne lile nɔhalɛ ɔluakɛ bɛyɛle gyima ɛsesebɛ bɛmaanle bɛ menle ne nyianle nvasoɛ. Kolaa na bɛ menle ne adu adenle ne la, ɔvale talɛnte—mɔɔ le ezukoa kpole kpalɛ la ɔmaanle bɛ. Ngɛkɛlɛ nwiɔ ne anye bolole bɛ gyima nwo ɔti bɛanzɛkye ezukoa ne. Boni a vile nu rale a? Mɔɔ bɛ menle ne kara la, ɛnee bɛva ezukoa ne bɛyɛ gyima bɛnyia ye mɔnwo nwiɔ. Bɛ menle ne hanvole bɛ—bɛnyianle bɛ “menle anyelielɛ ne bie.” (Kenga Mateyu 25:​19-23.) Na akɛlɛ ne mɔɔ tɔ zolɛ nsa la ɛ? Duzu a ɔvale ezukoa ne mɔɔ ɔ menle ne vale maanle ye la ɔyɛle a?

11. Duzu a dole akɛlɛ “mgbovonle” ne a, na duzu ati ɔ?

¹¹ Akɛlɛ ne mɔɔ tɔ zo nsa la nyianle talɛnte ko noko ɛnee ɔle “mgbovonle.” Ɛnee ɔ menle ne kulo kɛ ɔfa talɛnte ne ɔdi gyima kpalɛ. Noko akee ɔvunle ɔveale azɛlɛ bo. Mɔɔ bɛ menle ne rale la, talɛnte mɔɔ ɔvale ɔmaanle akɛlɛ zɔhane la ala a ɔziale ɔvale ɔmaanle ɔ menle ne a. Ɛnee akɛlɛ ne ɛnlɛ subane kpalɛ. Kɛ anrɛɛ ɔbakpa ɔ menle ne kyɛlɛ kɛ yeannyia nvasoɛ biala wɔ mɔɔ ɔvale ɔmaanle ye la azo la, ɔbɔle ɔ menle ne somolɛ kɛ ye “edwɛkɛ yɛ se.” Akɛlɛ ɛhye annyia ɔ menle ne anyunlu ɛlolɛ. Eza ɔ menle ne liele talɛnte ne mɔɔ ɔvale ɔmaanle ye la na ɔvoanle ye ɔvile ye sua nu ɛkɛ.—Mat. 25:​24, 26-30.

12. Nwane mɔ a ngɛkɛlɛ nɔhavoma nwiɔ ne gyi ɛkɛ ne maa bɛ ɛnɛ a?

¹² Ngɛkɛlɛ nɔhavoma nwiɔ ne gyi ɛkɛ ne maa Kilisienema mɔɔ bɛkpokpa bɛ mɔɔ bɛdi nɔhalɛ la. Bɛ Menle Gyisɛse ɛvɛlɛ bɛ kɛ ‘bɛnyia bɛ menle anyelielɛ ne bie.’ Bɛnyia bɛ anwuma ahatualɛ ne, ewudwazo mɔɔ limoa. (Mat. 25:​21, 23; Yek. 20:5b) Noko akɛlɛ mgbovonle ne neazo ɛtane ne le kɔkɔbɔlɛ maa bɛdabɛ mɔɔ bɛkpokpa bɛ la. Wɔ adenle boni azo?

13-14. Duzu a menli mɔɔ bɛkpokpa bɛ la sukoa fi talɛnte nwo ndonwo ne anu a? (Eza nea nvoninli ne.)

¹³ Kile kɛ ɛ nye bolo gyima ɛsesebɛ ɛyɛlɛ nwo. Kɛ mɔɔ ɛnee ɔde wɔ mbɛlɛra ne mɔ anwo ndonwo ne anu la, zɔhane ala a wɔ talɛnte nwo ndonwo ne anu, tɛ mɔɔ ɛnee Gyisɛse ɛlɛkile la a le kɛ menli mɔɔ bɛkpokpa bɛ la bayɛ mgbovonle kenle bie. Emomu ɛnee  ɔlɛkilehile mɔɔ saa bɛangɔ zo bɛanyɛ gyima ɛsesebɛ a ɔbado bɛ la anu. Bɛnrɛmaa “bɛ ɛvɛlɛlɛ nee bɛ ɛkpalɛ ne [ɛnrɛli] munli,” na bɛnrɛmaa bɛ adenle kɛ bɛhɔ anwuma Belemgbunlililɛ ne anu.—2 Pita 1:10.

¹⁴ Gyisɛse mbɛlɛra nee talɛnte ne anwo ndonwo ne mɔ maa ɔda ali wienyi kɛ ɔwɔ kɛ Kilisienema amuala siezie bɛ nwo na bɛmaa bɛ nye da ɛkɛ, yɛɛ ɔwɔ kɛ bɛmaa bɛ nye bolo bɛyɛ gyima ɛsesebɛ. Noko asoo Gyisɛse hanle debie gyɛne mɔɔ le kɔkɔbɔlɛ maa bɛdabɛ mɔɔ bɛkpokpa bɛ la ɔ? Ɛhɛe! Edwɛkɛ mɔɔ Gyisɛse hanle wɔ Mateyu 24:​40, 41 la noko fale menli mɔɔ bɛkpokpa bɛ la ndɛnebualɛ mɔɔ li awieleɛ la anwo.

NWANE MƆ A ‘BƐBAVA BƐ BƐAHƆ’ A?

15-16. Kɛzi Mateyu 24:​40, 41 maa yɛnwu deɛmɔti ɔhyia kɛ menli mɔɔ bɛkpokpa bɛ la maa bɛ nye da ɛkɛ la ɛ?

¹⁵ Kolaa na Gyisɛse ayɛ ndonwo nsa ne la, ɔhanle ndɛne mɔɔ li awieleɛ mɔɔ bɛbabua menli mɔɔ bɛkpokpa bɛ, mɔɔ ɔbamaa bɛanwu bɛdabɛ mɔɔ bɛlie bɛ bɛdo nu la anwo edwɛkɛ la. Ɔhanle mrenyia nwiɔ mɔɔ bɛlɛyɛ gyima wɔ ɛya nu nee mraalɛ nwiɔ mɔɔ bɛlɛti debie wɔ ɛdibolɛ zo la anwo edwɛkɛ. Wɔ biala anu, ɔzɔho kɛ bɛ munwiɔ bɛlɛyɛ gyima ko ne ala, noko Gyisɛse hanle kɛ “bɛbava ko bɛahɔ na bɛagyakyi ko.” (Kenga Mateyu 24:​40, 41.) Akee ɔmaanle ye ɛdoavolɛma ne anwosesebɛ kɛ: “Yemɔti bɛhɔ zo bɛzinza, ɔboalekɛ bɛnze kenle mɔɔ bɛ Menle ne bara a.” (Mat. 24:42) Gyisɛse hanle edwɛkɛ zɔhane bie wɔ mekɛ mɔɔ ɔyɛle mbɛlɛra ne mɔ ndonwo ne ɔwiele la. (Mat. 25:13) Asoo edwɛkɛ ɛhye mɔ anu ko biala fale ɔ gɔnwo anwo ɔ? Ɔzɔho zɔ. Menli mɔɔ amgba bɛkpokpa bɛ na bɛdi nɔhalɛ la ala a ‘bɛbava bɛ bɛahɔ’ a, Gyisɛse bava bɛ ahɔ anwuma Belemgbunlililɛ ne anu.—Dwɔn 14:3.

¹⁶ Kile kɛ ɛlɛsinza. Bɛnrɛva awie biala mɔɔ bɛkpokpa ye mɔɔ yeangɔ zo yeanzinza wɔ sunsum nu la bɛnrɛboka “bɛdabɛ mɔɔ yekpa bɛ la” anwo. (Mat. 24:31) Saa yɛtɛlɛ nu a, ɔwɔ kɛ Nyamenle menli kɔsɔɔti, ɔnva anyelazo mɔɔ bɛlɛ la, bu Gyisɛse edwɛkɛ ne kɛ ɔlɛbɔ bɛ kɔkɔ kɛ bɛhɔ zo bɛzinza na bɛli nɔhalɛ dahuu.

17. Duzu ati a ɔnle kɛ yɛfa mekɛ mɔɔ Gyihova kpa kɛ ɔbava ye sunsum nwuanzanwuanza ne yeakpokpa awie la yegyegye yɛ nwo a?

¹⁷ Yɛranwu Gyihova kpalɛ ɔti yɛdie yɛdi kɛ ye ndɛnebualɛ le fɔɔnwo. Saa Gyihova ɛkpa kɛ ɔbakpokpa nɔhavoma bie mɔ kenlensa ye a, ɔngyegye yɛ. c Yɛkakye mɔɔ Gyisɛse hanle ye wɔ gyimayɛvoma ne mɔɔ bɛbɔle bɛ ɛkpa wɔ dɔne nnu la anwo wɔ ye vanye egyinli nwo ndonwo ne anu la. (Mat. 20:​1-16) Bɛdabɛ mɔɔ bɛmaanle bɛhɔyɛle gyima wɔ vanye egyinli ne anu nɔsolɛ nu la nee bɛdabɛ mɔɔ bɛbɔle ɔ bo kɛ bɛyɛ gyima ɔvi nwonlomɔ nu la amuala nyianle ahatualɛ ko. Zɔhane ala a ɔnva nwo mekɛ mɔɔ bɛbakpokpa awie la, saa bɛbua bɛ ndɛne kɛ bɛdi nɔhalɛ a, bɛ muala bɛbanyia anwuma ahatualɛ ne a.

TIE KƆKƆBƆLƐ NE MƆ

18-19. Ɛzukoalɛdeɛ nee kɔkɔbɔlɛ boni mɔ a yɛzuzu nwo a?

¹⁸ Duzu a yɛzuzu nwo a? Wɔ bɛdabɛ mɔɔ bɛlɛ anyelazo kɛ bɛbadɛnla azɛlɛ ye azo dahuu la afoa nu, mboane nee mbɔnkye nwo ndonwo ne maa yɛnwu kɛzi ɔhyia kɛ yɛbahɔ zo yɛali nɔhalɛ yɛamaa Gyihova la—ɛnɛ nee anwongyelelɛ kpole ne mɔɔ la yɛ nyunlu la anu. Wɔ mekɛ zɔhane mɔɔ la yɛ nyunlu la anu, Gyisɛse babua bɛdabɛ mɔɔ bɛdi nɔhalɛ la ndɛne kɛ bɛfɛta kɛ bɛkɔ “dahuu ngoane nu.”—Mat. 25:46.

¹⁹ Eza yɛzuzule ndonwo nwiɔ mɔɔ le kɔkɔbɔlɛ  maa menli mɔɔ bɛkpokpa bɛ la anwo. Wɔ Gyisɛse mbɛlɛra badwema nee ahoasea ne mɔ ndonwo ne anu, bɛ nuhua nnu lale ye ali kɛ bɛze nrɛlɛbɛ. Ɛnee bɛziezie bɛ nwo yɛɛ bɛ nye la ɛkɛ, bɛlɛ ɛhulolɛ kɛ bɛbahendɛ atɔfolɛ nrenyia ne ɔnva nwo mekɛ tendenle mɔɔ ɔbali la. Noko ɛnee mbɛlɛra ahoasea ne mɔ ɛtɛsieziele bɛ nwo. Ɔti atɔfolɛ nrenyia ne ammaa bɛamba agyalɛ ɛkponledolɛ ne abo. Ɔwɔ kɛ yɛdayɛ noko yɛsiezie yɛ nwo kɛ yɛbahendɛ kɔkpula kɛ Gyisɛse bava ewiade ɛhye ara awieleɛ la, ɔnva nwo mekɛ tendenle mɔɔ ɔbali la. Eza wɔ Gyisɛse talɛnte nwo ndonwo ne anu, yɛzuzule ngɛkɛlɛ nwiɔ mɔɔ ɛnee bɛ nye bolo gyima ɛsesebɛ ɛyɛlɛ nwo la anwo. Bɛyɛle gyima ɛsesebɛ bɛmaanle bɛ menle ne na bɛnyianle ɔ nyunlu ɛlolɛ. Noko akɛlɛ mgbovonle ne anyɛ zɔ. Duzu a yɛsukoa yɛfi nu a? Ɔwɔ kɛ yɛkɔ zo yɛyɛ gyima ɛsesebɛ wɔ Gyihova ɛzonlenlɛ nu kɔdwu awieleɛ ne. Mɔɔ li awieleɛ la, yɛzuzule kɛzi ɔwɔ kɛ bɛdabɛ mɔɔ bɛkpokpa bɛ la kɔ zo sinza amaa Gyisɛse ‘ava bɛ ahɔ’ anwuma Belemgbunlililɛ ne anu la anwo. Menli ɛhye mɔ anye la ye ɛsesebɛ kɛ ‘bɛbaboɔboa bɛ nloa’ bɛahɔ Gyisɛse anwo lɔ wɔ anwuma. Wɔ Amagɛdɔn konle ne anzi, bɛdabɛ a bɛbayɛ Gyisɛse atɔfolɛ raalɛ ne wɔ Boaneralɛ ne atɔfolɛlielɛ mekɛ ne a.—2 Tɛs. 2:1; Yek. 19:9.

20. Duzu a Gyihova bayɛ amaa bɛdabɛ mɔɔ bɛtie ye kɔkɔbɔlɛ ne mɔ la a?

²⁰ Ndɛnebualɛ ne ɛlɛbikye ndɛndɛ ɛdeɛ, noko ɔnle kɛ yɛmaa ɛzulolɛ ka yɛ. Saa yɛkɔ zo yɛdi nɔhalɛ a, yɛ anwuma Selɛ ne mɔɔ lɛ ɛlɔlɛ la bamaa yɛ “tumi bedevinli ne” amaa ‘yɛahola yɛagyinla sonla Ra ne anyunlu.’ (2 Kɔl. 4:7; Luku 21:36) Saa yɛlɛ anyelazo kɛ yɛbahɔ anwuma o, anzɛɛ yɛbadɛnla azɛlɛ ye azo o, saa yɛtie kɔkɔbɔlɛ mɔɔ wɔ Gyisɛse ndonwo ne mɔ anu la a, yɛbazɔ yɛ Ze ne anye. Ɔlua Gyihova ɛlolɛ kpole ne ati, bɛbanwu kɛ ‘bɛhɛlɛ yɛ duma’ wɔ ngoane buluku ne anu.—Dan. 12:1; Yek. 3:5.