1, 2. Duzu ati a Dwɔnatan nee Devidi agɔnwolɛvalɛ ne le nɔhalɛlilɛ nwo neazo kɛnlɛma ɛ?

BIE a akɛnrasesebɛ mɔɔ Devidi lale ye ali la zinle Dwɔnatan anwo. Devidi hunle Golayate kakanyinli ne na ɔvale “Filisitianli ne ati” ɔrɛlɛle Yizilayɛ Belemgbunli Sɔɔlo, Dwɔnatan papa. (1 Samoɛle 17:57) Dwɔnatan nwunle ye wienyi kɛ Nyamenle nee Devidi lua, na ɔvi mekɛ zɔhane mɔɔ kɔ la, ɔ nee Devidi yɛle agɔnwolɛma kpalɛ. Bɛbɔle ɛwɔkɛ kɛ bɛbali nɔhalɛ bɛamaa bɛ nwo dahuu. (1 Samoɛle 18:1-3) Dwɔnatan lile nɔhalɛ maanle Devidi wɔ ye ngoane mekɛ kɔsɔɔti anu.

² Dwɔnatan lile nɔhalɛ maanle Devidi ɔnva nwo kɛ Gyihova amkpa ye kɛ ɔli Yizilayɛ belemgbunli na ɔkpale Devidi la. Mɔɔ Sɔɔlo bɔle mɔdenle kɛ ɔku Devidi la, edwɛkɛ ne gyegyele Dwɔnatan. Ɛnee Dwɔnatan ze kɛ Devidi wɔ Hɔlɛhye fienemgbole ne anu, yemɔti ɔhɔmaanle ye anwosesebɛ kɛ ɔhɔ zo ɔva ɔ nwo ɔdo Gyihova anwo zo. Dwɔnatan zele Devidi kɛ: “Mmasulo, ɔluakɛ egya Sɔɔlo asa ɛnrɛha wɔ ɛnrɛhu wɔ ɛlɛ. Ɔze ye wienyi kɛ ɛbali Yizilayɛ belemgbunli na medame noko meadɛnla ɛ sa fema zo.”​—1 Samoɛle 23:16, 17.

3. Duzu a ɛnee hyia Dwɔnatan tɛla nɔhalɛ mɔɔ ɔdi yeamaa Devidi la ɛ, na kɛzi yɛkola yɛnwu ɛhye ɛ? (Nea mɔlebɛbo nvoninli ne.)

 ³ Yɛ nye ta die menli mɔɔ di nɔhalɛ la anwo. Noko asoo nɔhalɛ mɔɔ Dwɔnatan lile maanle Devidi la ati a yɛ nye die ɔ nwo a? Kyɛkyɛ, ɛnee nɔhalɛ mɔɔ Dwɔnatan di amaa Nyamenle la a hyia ye wɔ ye ɛbɛlabɔlɛ nu a. Ɛhye ati a ɔnva nwo kɛ Devidi a bali belemgbunli la, yeammaa ɔ nye ambolo ye na ɔlile nɔhalɛ ɔmaanle ye la. Eza Dwɔnatan boale Devidi maanle ɔvale ɔ nwo ɔdole Gyihova anwo zo. Bɛ mu nwiɔ bɛlile nɔhalɛ bɛmaanle Gyihova nee bɛ nwo. Bɛlile bɛ ɛwɔkɛ ɛhye azo: “[Gyihova] ɔdaye ɔbanlea kɛ ɛdawɔ nee medame, ɛ bo zo amra nee me bo zo amra bali ɛwɔkɛ ne azo dahuu.”​—1 Samoɛle 20:42.

4. (a) Duzu a bamaa yɛ nye alie kpalɛ na yɛ kunlu adwo yɛ nwo a? (b) Duzu a yɛbazuzu nwo wɔ edwɛkɛ ɛhye anu a?

⁴ Ɔwɔ kɛ yɛdayɛ noko yɛdi nɔhalɛ yɛmaa yɛ abusua ne, yɛ gɔnwo mɔ nee yɛ mediema mɔɔ bɛwɔ asafo ne anu la. (1 Tɛsalonaekama 2:10, 11) Noko mɔɔ hyia kpalɛ la, ɔwɔ kɛ yɛdi nɔhalɛ yɛmaa Gyihova. Ɔdaye a ɔmaanle yɛ ngoane a! (Yekile 4:11) Saa yɛdi nɔhalɛ yɛmaa ye a, yɛ nye die kpalɛ yɛɛ yɛ kunlu dwo yɛ nwo. Noko ɔwɔ kɛ yɛdi nɔhalɛ yɛmaa Nyamenle wɔ tɛnlabelɛ mɔɔ anu yɛ se bɔbɔ la anu. Wɔ edwɛkɛ ɛhye anu, yɛbazuzu kɛzi Dwɔnatan neazo ne baboa yɛ yeamaa yɛali nɔhalɛ yɛamaa Gyihova wɔ tɛnlabelɛ nna ɛhye mɔ anu la: (1) saa yɛte nganeɛ kɛ ɔnfɛta kɛ yɛbu awie bie mɔɔ lɛ tumi la a, (2) saa yɛkulo kɛ yɛnwu awie mɔɔ ɔwɔ kɛ yɛdi nɔhalɛ yemaa ye la a, (3) saa adiema bie mɔɔ lɛ tumi la ɛnde ye edwɛkɛ bo anzɛɛ ɔ nee yɛ ɛnli ye boɛ a, yɛɛ (4) saa ɔyɛ se kɛ yɛbali ɛwɔkɛ bie azo a.

5. Duzu ati a ɛnee ɔyɛ se kɛ Yizilayɛma bɛali nɔhalɛ amaa Nyamenle wɔ mekɛ mɔɔ Sɔɔlo le belemgbunli la ɛ?

⁵ Ɛnee Dwɔnatan nee Yizilayɛma wɔ tɛnlabelɛ mɔɔ anu yɛ se la anu. Belemgbunli Sɔɔlo, Dwɔnatan papa ɛyɛ Gyihova anwo anzosesebɛ na Gyihova ɛkpo ye. (1 Samoɛle 15:17-23) Noko Nyamenle maanle Sɔɔlo hɔle zo lile tumi wɔ ɛvolɛ dɔɔnwo anu. Yemɔti ɛnee ɔyɛ se kɛ menli ne bali nɔhalɛ amaa Nyamenle wɔ mekɛ mɔɔ ahenle mɔɔ de “belemgbunli ebia ne mɔɔ [Gyihova] ɔdaye yehyehyɛ la azo” la ɛlɛyɛ ninyɛndane la.​—1 Edwɛkɛsisilɛ 29:23.

6. Duzu a kile kɛ Dwɔnatan hɔle zo lile nɔhalɛ maanle Gyihova ɛ?

⁶ Dwɔnatan hɔle zo lile nɔhalɛ maanle Gyihova. Dwenle mɔɔ Dwɔnatan yɛle wɔ mekɛ mɔɔ Sɔɔlo andie Nyamenle la anwo nea. (1 Samoɛle 13:13, 14) Wɔ mekɛ zɔhane, Filisitia sogyama vale konle ehwili 30,000 rale kɛ bɛba bɛ nee Yizilayɛma araho. Ɛnee Sɔɔlo sogyama ne le 600 pɛ, yɛɛ ɔ nee Dwɔnatan ala a ɛnee lɛ konle ninyɛne a. Noko Dwɔnatan ahonle andu. Ɔhakyele ngapezonli Samoɛle edwɛkɛ ne: “Ɔlua ye duma kpole ne ati, [Gyihova] ɛnrɛkpo ye menli.” (1 Samoɛle 12:22) Dwɔnatan hanle hilele sogyanli ko kɛ: “Kanzɛ yɛanzo bɔbɔ a, debie biala ɛnle ɛkɛ mɔɔ kola tua [Gyihova] adenle mɔɔ ɔnrɛmaa ɔnrɛlie yɛ a.” Yemɔti ɔ nee sogyanli zɔhane hɔtetale Filisitiama ekpunli bie na bɛhunle bɛ nuhua kɛyɛ 20. Dwɔnatan nyianle Gyihova anu  diedi, na Gyihova yilale ye. Gyihova maanle azɛlɛ kpusule na Filisitiama ne ahonle dule. Akee bɛpɛle bɛ nwo bɛhuhunle bɛ nwo, na Yizilayɛma lile konim.​—1 Samoɛle 13:5, 15, 22; 14:1, 2, 6, 14, 15, 20.

7. Kɛzi Dwɔnatan nee ye papa lile ɛ?

⁷ Sɔɔlo yɛle Gyihova anwo anzosesebɛ dahuu, noko Dwɔnatan bule ye papa wɔ mekɛ mɔɔ ɔfɛta la anu. Kɛ neazo la, ɔ nee ye papa honle maanle Gyihova menli ne.​—1 Samoɛle 31:1, 2.

8, 9. Saa yɛbu menli mɔɔ lɛ tumi la a, kɛzi ɔkile kɛ yɛlɛdi nɔhalɛ yɛamaa Nyamenle ɛ?

⁸ Kɛ mɔɔ Dwɔnatan yɛle la, saa yɛda ɛbulɛ ali yɛkile maanle mɔɔ yɛde nu la arane ne wɔ mekɛ mɔɔ fɛta la anu a, ɛnee yɛlɛdi nɔhalɛ yɛamaa Gyihova. Gyihova ɛmaa “mgbanyima mɔɔ ɛlɛbu maanle ne la” adenle kɛ bɛnlea yɛ nwo zo, na ɔkulo kɛ yɛbu bɛ. (Kenga Wulomuma 13:1, 2.) Ɛhye ati a ɔwɔ kɛ yɛbu arane nu mgbanyima ɔnva nwo kɛ bie a bɛnli nɔhalɛ na yɛte nganeɛ kɛ ɔnfɛta kɛ yɛbu la a. Ɔwɔ kɛ yɛbu menli mɔɔ Gyihova ɛmaa bɛ tumi la amuala.​—1 Kɔlentema 11:3; Hibuluma 13:17.

⁹ Ɛnee adiema raalɛ Olga mɔɔ wɔ South America la ahu kile ye atete, noko ɔlile nɔhalɛ ɔmaanle Gyihova ɔlua ɛbulɛ mɔɔ ɔlale ye ali ɔhilele ɔ hu la azo. ^[1] (Nea awieleɛ edwɛkɛ ne.) Kɛmɔ ɔle Gyihova Dasevolɛ la ati, ɔdwu mekɛ ne bie a ɔ hu  nee ye ɛndendɛ yɛɛ ɔtendɛ ɛtane ɛtane ɔkile ye. Ɔzele yɛ diema raalɛ ne kɛ ɔbabɔ ye ewole na yeaza ye yealie ngakula ne mɔ. Noko Olga anli “ye nzenralɛ.” Ɔbɔle mɔdenle ɔyɛle yɛle kpalɛ. Ɔto aleɛ ɔmaa ɔ hu, ɔkpo ye ninyɛne yɛɛ ɔnleanle ɔ hu abusua ne anu amra gyɛne noko. (Wulomuma 12:17) Saa ɔnyia alagye noko a, ɔ nee ɔ hu kɔkpɔla ye abusua ne nee ɔ gɔnwo mɔ. Kɛ neazo la, mekɛ mɔɔ ɔ hu ɛlɛkɔ ye papa ɛzɛne wɔ sua bie azo la, Olga zieziele debie biala mɔɔ bɛbava bɛahɔ la. Mɔɔ bɛhɔle asɔne sua ne anu la, Olga dɛnlanle alie nwo hendɛle bɛ. Wɔ ɛvolɛ dɔɔnwo anzi, Olga ahu bɔle ɔ bo kɛ ɔ nee ye di ye boɛ ɔluakɛ ɔzile abotane na ɔlale ɛbulɛ ali ɔhilele ye dahuu. Kɛkala ɔmaa Olga anwosesebɛ kɛ ɔhɔ debiezukoalɛ yɛɛ ɔdaye mumua ne ɔfa ye ɔkɔ. Ɔdwu mekɛ ne bie a ɔ nee Olga kɔ debiezukoalɛ.​—1 Pita 3:1.

10. Kɛ ɔyɛle mɔɔ Dwɔnatan nwunle ahenle mɔɔ ɔwɔ kɛ ɔdi nɔhalɛ ɔmaa ye la ɛ?

¹⁰ Mɔɔ Sɔɔlo hanle kɛ ɔku Devidi la, ɛnee ɔwɔ kɛ Dwɔnatan si kpɔkɛ mɔɔ anu yɛ se la. Ɛnee ɔkulo kɛ ɔdi nɔhalɛ ɔmaa ye papa, noko ɛnee eza ɔkpondɛ kɛ ɔdi nɔhalɛ ɔmaa Devidi. Ɛnee Dwɔnatan ze kɛ Nyamenle nee Devidi lua na tɛ Sɔɔlo ɔ, yemɔti ɔkpale kɛ ɔbali nɔhalɛ yeamaa Devidi. Ɔbɔle Devidi kɔkɔ kɛ ɔhɔvea, akee ɔhanle deɛmɔti ɔnle kɛ Sɔɔlo ku Devidi la ɔhilele Sɔɔlo.​—Kenga 1 Samoɛle 19:1-6.

11, 12. Kɛzi ɛlɔlɛ mɔɔ yɛlɛ yɛmaa Nyamenle la boa yɛ maa yɛdi nɔhalɛ yɛmaa ye ɛ?

¹¹ Ɛnee ɔwɔ kɛ adiema raalɛ Alice mɔɔ wɔ Australia la kpa awie mɔɔ ɔbali nɔhalɛ yeamaa ye la. Mekɛ mɔɔ ɔlɛsukoa Baebolo ne la, ɛnee ɔka mɔɔ ɔlɛsukoa la bie ɔkile ye abusua ne. Eza ɔhanle ɔhilele bɛ kɛ ɔ nee bɛ ɛnrɛli Bolonyia bieko, na ɔhilehile deɛmɔti ɔnrɛyɛ zɔ la anu ɔhilele bɛ. Alimoa ne, edwɛkɛ ne zinle ye abusua ne anwo, na nzinlii akee bɛvale ɔ nwo ɛya kpole. Bɛdele nganeɛ kɛ Alice ɛndwenle bɛ nwo bieko. Akee ye mame hanle hilele ye kɛ ɔngulo kɛ ɔnwu ye bieko. Alice hanle kɛ: “Edwɛkɛ ne zinle me nwo na ɔgyegyele me ɔluakɛ ɛnee mekulo me abusua ne kpalɛ. Noko akee menzile kpɔkɛ kɛ mebava Gyihova nee ɔ Ra ne mealimoa me ɛbɛlabɔlɛ nu, na akee memaanle bɛzɔnenle me.”​—Mateyu 10:37.

¹² Ɔnle kɛ yɛmaa nɔhalɛ mɔɔ yɛdi yɛamaa nwɔhoalilɛ ekpunli bie, sukulu anzɛɛ maanle bie la kyia yɛ tɛla nɔhalɛ mɔɔ yɛdi yɛamaa Gyihova la. Kɛ neazo la, ɛnee Henry anye die kɛ ɔ nee ye sukulu ekpunli ne bado chess (nwɔhoa bie mɔɔ le kɛ dame la), na ɛnee ɔkpondɛ kɛ ye sukulu ne die duma wɔ nwɔhoalilɛ ne anu. Noko kɛmɔ ɛnee ɔfa ɔ nwo ɔwula nwɔhoalilɛ ne anu dapɛne awieleɛ biala la ati, ɛnee ɔnnyia alagye ɔngɔ daselɛlilɛ anzɛɛ debiezukoalɛ. Henry hanle kɛ nɔhalɛ mɔɔ ɔdi yeamaa sukulu ne la rahyianle ye dɛlale Nyamenle. Yemɔti ɔzile kpɔkɛ kɛ ɔnrɛva ɔ nwo ɔnrɛwula nwɔhoalilɛ ne anu bieko ɔnrɛmaa ye sukulu ne.​—Mateyu 6:33.

13. Saa yɛdi nɔhalɛ yɛmaa Nyamenle a, kɛzi ɔbaboa yɛ yeamaa yɛagyinla abusua nu ngyegyelɛ nloa ɛ?

¹³ Ɔdwu mekɛ ne bie a ɔbahola yeayɛ se kɛ yɛbali nɔhalɛ yɛamaa yɛ mbusuafoɔ  bie mɔ wɔ mekɛ ko ne ala anu. Kɛ neazo la, Ken se: “Ɛnee mekulo kɛ meta mekpɔla me mame mɔɔ ɛyɛ kpanyinli la yɛɛ ɔyɛ a mekulo kɛ ɔbatɛnla yɛ nwo ɛkɛ ekyii. Noko ɛnee ɔ nee me ye anloa ɛnzɛ bɛ nwo.” Ɔtoa zo kɛ: “Mengola menyɛ mɔɔ ko kulo la mengyakyi ko.” Ken dwenlenle mɔɔ Baebolo ne ka wɔ tɛnlabelɛ ne anwo la anwo, na ɔnwunle kɛ wɔ mekɛ ɛhye anu, ɔwɔ kɛ ɔyɛ mɔɔ ɔ ye kulo la na ɔdi nɔhalɛ ɔmaa ye. Ɔti ɔnyianle edwɛkɛ ne anwo sɔbelɛ bie mɔɔ ɔ ye anye liele nwo la. Akee ɔmaanle ɔ ye nwunle deɛmɔti ɔwɔ kɛ ɔda atiakunlukɛnlɛma ali ɔkile ye mame la. Eza ɔmaanle ye mame nwunle deɛmɔti ɔwɔ kɛ ɔbu ɔ ye la.​—Kenga Mɔlebɛbo 2:24; 1 Kɔlentema 13:4, 5.

14. Kɛzi Sɔɔlo nee Dwɔnatan anli ye boɛ ɛ?

¹⁴ Eza yɛbahola yɛali nɔhalɛ yɛamaa Gyihova wɔ mekɛ mɔɔ adiema bie mɔɔ lɛ tumi la nee yɛ ɛnli ye boɛ la. Nyamenle a kpale Belemgbunli Sɔɔlo a, noko Sɔɔlo nee ɔdaye mumua ne ɔ ra anli ye boɛ. Yeande deɛmɔti Dwɔnatan hulole Devidi edwɛkɛ la abo. Yemɔti mekɛ mɔɔ Dwɔnatan bɔle mɔdenle kɛ ɔboa Devidi la, Sɔɔlo vale ɛya na ɔguale ɔ ra ne anyunlu aze wɔ menli dɔɔnwo anyunlu. Noko Dwɔnatan lale ɛbulɛ ali hilele ye papa. Eza ɔlile nɔhalɛ ɔmaanle Gyihova nee Devidi mɔɔ Nyamenle ɛkpa ye kɛ ɔyɛ Yizilayɛ belemgbunli la wɔ mekɛ ko ne ala anu.​—1 Samoɛle 20:30-41.

15. Saa adiema bie nee yɛ anli ye boɛ a, duzu a ɔwɔ kɛ yɛyɛ a?

 ¹⁵ Mediema mɔɔ li asafo ne anyunlu ɛnɛ la bɔ mɔdenle kɛ bɛ nee awie biala bali ye boɛ. Noko mediema ɛhye mɔ ɛnli munli. Ɛhye ati, bie a bɛnrɛde deɛmɔti yɛyɛle debie bie la abo. (1 Samoɛle 1:13-17) Yemɔti saa bɛ nee yɛ anli ye boɛ anzɛɛ bɛande yɛ edwɛkɛ bo a, bɛmaa yɛli nɔhalɛ yɛmaa Gyihova dahuu.

16. Tɛnlabelɛ boni mɔ anu a ɔwɔ kɛ yɛdi nɔhalɛ yɛmaa Nyamenle mɔɔ ɔnle kɛ yɛyɛ angomedi a?

¹⁶ Ɛnee Sɔɔlo kpondɛ kɛ Dwɔnatan yɛ belemgbunli na tɛ Devidi ɔ. (1 Samoɛle 20:31) Noko ɛnee Dwɔnatan kulo Gyihova yɛɛ ɔdi nɔhalɛ ɔmaa ye. Yemɔti kɛ anrɛɛ Dwɔnatan bayɛ angomedi la, ɔvale Devidi agɔnwolɛ na ɔlile ɛwɔkɛ mɔɔ ɔbɔle Devidi la azo. Nɔhalɛ nu, awie biala mɔɔ kulo Gyihova na ɔdi nɔhalɛ ɔmaa ye la bayɛ awie mɔɔ “ɔbɔ ɛwɔkɛ a ɔdi zolɛ yɛɛ ɔngakyi ɔ nloa.” (Edwɛndolɛ 15:4) Kɛmɔ yɛdi nɔhalɛ yɛmaa Nyamenle la ati, yɛbali yɛ ɛwɔkɛ zo. Kɛ neazo la, saa yɛ nee awie yɛ gyima nwo ngyehyɛleɛ bie a, yɛbayɛ mɔɔ ɔwɔ kɛ yɛyɛ la saa bɔbɔ ɔyɛ se a. Eza saa yɛlɛ ngyegyelɛ wɔ yɛ agyalɛ nu a, yɛbali nɔhalɛ yɛamaa yɛ ye anzɛɛ yɛ hu yɛava yɛahile kɛ yɛkulo Gyihova.​—Kenga Malakae 2:13-16.

17. Kɛzi debiezukoalɛ ɛhye ɛboa wɔ ɛ?

¹⁷ Yɛkpondɛ kɛ yɛdi nɔhalɛ yɛmaa Nyamenle wɔ tɛnlabelɛ mɔɔ anu yɛ se bɔbɔ la anu, kɛ mɔɔ Dwɔnatan yɛle la. Ɔti saa yɛ mediema ye yɛ rɛle to yɛ sa nu a, bɛmaa yɛli nɔhalɛ yɛmaa bɛ. Yɛyɛ ɛhye a, yɛbamaa Gyihova anye alie na yɛdayɛ noko yɛ nye alie kpalɛ. (Mrɛlɛbulɛ 27:11) Yɛbahola yɛanyia anwodozo kɛ ɔbayɛ mɔɔ le kpalɛ la yeamaa yɛ dahuu na yeanlea yɛ. Wɔ edwɛkɛ bieko anu, yɛbanwu ninyɛne mɔɔ yɛbahola yɛazukoa yɛavi Devidi mekɛ zo amra bie mɔ mɔɔ bɛlile nɔhalɛ nee mɔɔ bɛanli nɔhalɛ ɛkɛ la.