1, 2. (a) Kɛzi yɛkola yɛnwu kɛ alesama kola fa Nyamenle agɔnwolɛ ɛ? (b) Duzu a yɛbazuzu nwo wɔ edwɛkɛ ɛhye anu a?

YƐHYIA ɛlɔlɛ nwo, ɔvi kenle mɔɔ bɛkɛwo yɛ kɔdwu kenle mɔɔ yɛbawu la. Alesama hyia agɔnwolɛvalɛ mɔɔ ɛlɔlɛ wɔ nu la, tɛ nrenyia nee raalɛ avinli ɛhulolɛ ala. Noko yɛhyia Gyihova ɛlɔlɛ ne yɛtɛla ɛlɔlɛ biala. Kɛ mɔɔ Nyamenle le tumivolɛ bedevinli na eza yɛnnwu ye la ati, menli dɔɔnwo ɛnlie ɛnli kɛ alesama bahola ava ye agɔnwolɛ. Noko yɛmɛ yɛze nɔhalɛ ne!

² Yɛnwu ye wɔ Baebolo ne anu kɛ alesama bie mɔ vale Nyamenle agɔnwolɛ. Ɔwɔ kɛ yɛsukoa bɛ neazo ne. Duzu ati ɔ? Ɔluakɛ Nyamenle mɔɔ yɛbava ye agɔnwolɛ la a hyia kpalɛ wɔ yɛ ɛbɛlabɔlɛ nu a. Yemɔti bɛmaa yɛzuzu Ebileham neazo ne anwo. (Kenga Gyemise 2:23.) Kɛzi ɔrayɛle Nyamenle agɔnwo ɛ? Diedi a maanle Ebileham rayɛle Nyamenle agɔnwo kpalɛ a, ɔti a bɛfɛlɛ ye ‘bɛdabɛ mɔɔ  bɛdie Nyamenle bɛdi la bɛ ze’ la. (Wulomuma 4:11) Mekɛ mɔɔ ɛlɛsuzu ye neazo ne anwo la, biza ɛ nwo kɛ, ‘Kɛ ɔkɛyɛ na meazukoa Ebileham diedi ne na meamaa agɔnwolɛvalɛ mɔɔ me nee Gyihova lɛ la anu amia ɛ?’

3, 4. (a) Ka debie mɔɔ ɔbayɛ kɛ ɔzɔle Ebileham diedi ɔnleanle kpole kpalɛ la. (b) Duzu ati a Ebileham nyianle ɛhulolɛ kɛ ɔbava Ayezeke yeabɔ afɔle a?

³ Fa ɛ nye bu Ebileham mɔɔ ɛli ɛvolɛ kɛyɛ 125 mɔɔ ɔlɛfo boka la. ^[1] (Nea awieleɛ edwɛkɛ ne.) Ɔ ra Ayezeke mɔɔ ɛli ɛvolɛ kɛyɛ 25 la li ɔ nzi. Ayezeke zo ɛyɛne yɛɛ Ebileham lɛ dadeɛ nee ninyɛne mɔɔ bɛfa bɛsɔ senle la. Ɔbayɛ kɛ ɛnee zɔhane adendulɛ ne a yɛ se kpalɛ wɔ Ebileham ɛbɛlabɔlɛ nu a. Noko tɛ kɛ ɛnee yeyɛ ɛrelera la ati ɔ. Ɛnee ɔ nwo yɛ se kpalɛ. Ɛnee zɔhane adendulɛ ne yɛ se ɔluakɛ Gyihova hanle hilele ye kɛ ɔva ɔ ra ne ɔbɔ afɔle!​—Mɔlebɛbo 22:1-8.

⁴ Bie a ɛhye zɔle Ebileham diedi nleanle kpole kpalɛ. Menli bie mɔ ka kɛ Ebileham ara ne mɔɔ Nyamenle hanle kɛ ɔva ɔbɔ afɔle la kile kɛ Nyamenle ati yɛ se. Eza bie mɔ ka kɛ ɛnee Ebileham ɛngulo ɔ ra ne edwɛkɛ yemɔti a ɔliele ɔdole nuhua a. Menli ka edwɛkɛ ɛhye mɔ ɔluakɛ bɛnlɛ diedi, yɛɛ bɛnze nɔhalɛ diedi nee kɛzi ɔyɛ gyima la. (1 Kɔlentema 2:14-16) Ebileham diele Nyamenle, noko ɔngile kɛ yeandwenle mɔɔ ɔyɛle la anwo. Ɔyɛle tieyɛ ɔluakɛ ɛnee ɔlɛ nɔhalɛ diedi. Ɛnee ɔze kɛ Gyihova ɛnrɛmaa ɔnrɛyɛ debie mɔɔ ɔbagyegye ye dahuu la. Ɛnee Ebileham ze kɛ saa ɔyɛ tieyɛ a, Gyihova bayila ye nee ye kulovolɛ ralɛ ne. Duzu a bamaa Ebileham anyia diedi kpole zɛhae a? Ɛnee ɔhyia Nyamenle anwo nrɛlɛbɛ nee anwubielɛ.

5. Kɛzi Ebileham zukoale Gyihova anwo debie ɛ, na duzu a ɛhye maanle ɔyɛle a?

⁵ Nyamenle Anwo Nrɛlɛbɛ. Bɛwole Ebileham wɔ suakpole Yule azo. Ɛnee ye papa nee menli mɔɔ wɔ ɛkɛ la sonle awozonle. (Dwɔhyua 24:2) Yemɔti kɛzi  Ebileham zukoale Gyihova anwo debie ɛ? Baebolo ne se ɛnee Nowa ara Hyɛm le Ebileham busuanli. Na Ebileham nyianle ɛvolɛ kɛyɛ 150 kolaa na Hyɛm awu. Ɛnee Hyɛm lɛ diedi kpole, na ɔbayɛ kɛ ɔhanle Gyihova anwo edwɛkɛ ɔhilele ye mbusuafoɔ. Yɛngola yɛnzi ye pi, noko ɔbahola yeara ye kɛ adenle ɛhye azo a Ebileham luale zukoale Gyihova anwo debie a. Mɔɔ Ebileham zukoale la maanle ɔhulole Gyihova, na ɛhye maanle ɔnyianle diedi.

6, 7. Kɛzi anwubielɛ mɔɔ Ebileham nyianle la maanle ye diedi nu mianle ɛ?

⁶ Anwubielɛ. Kɛ ɔyɛle mɔɔ Ebileham nyianle anwubielɛ mɔɔ maanle ɔnyianle diedi kpole wɔ Gyihova anu ɛ? Menli bie mɔ se ninyɛne mɔɔ yɛdwenle nwolɛ la maa yɛte nganeɛ bie na zɔhane nganeɛdelɛ ne a kile yɛ mɔɔ ɔwɔ kɛ yɛyɛ a. Nyamenle anwo debie mɔɔ Ebileham zukoale la hanle ye ahonle, ɛhye maanle ɔnyianle ɛbulɛ kpole ɔmaanle Gyihova, “Anwuma Anwuma Nyamenle ne mɔɔ bɔle anwuma nee aze la.” (Mɔlebɛbo 14:22) Baebolo ne fɛlɛ ɛbulɛ ɛhye ‘Nyamenle ɛzulolɛ.’ (Hibuluma 5:7, NW) Ɔwɔ kɛ yɛsulo Nyamenle na yɛahola yɛ nee ye anyia agɔnwolɛvalɛ kpalɛ. (Edwɛndolɛ 25:14) Subane zɔhane a maanle Ebileham diele Gyihova a.

⁷ Nyamenle zele Ebileham nee Sɛla kɛ bɛvi bɛ sua zo Yule bɛdu bɛhɔ maanle mɔɔ bɛnze ɛkɛ la anu. Ɛnee bɛyɛ mgbanyinli, yɛɛ ɛnee ɔwɔ kɛ bɛtɛnla tɛnte nu wɔ bɛ ngoane mekɛ mɔɔ ɛha la anu. Ɛnee Ebileham ze kɛ ɔbayia ngyegyelɛ dɔɔnwo, noko ɛnee yezi kpɔkɛ kɛ ɔbadie Gyihova. Kɛmɔ ɔyɛle tieyɛ la ati, Nyamenle yilale ye na ɔbɔle ɔ nwo bane. Kɛ neazo la, mɔɔ bɛliele Ebileham aye Sɛla bɛvile ɔ sa nu na ɛnee ɔdaye Ebileham mumua ne ye ngoane la esiane nu la, Gyihova luale nwanwane adenle zo bɔle Ebileham nee Sɛla anwo bane fane dɔɔnwo. (Mɔlebɛbo 12:10-20; 20:2-7, 10-12, 17, 18) Anwubielɛ zɔhane mɔ mɔɔ Ebileham nyianle la maanle ye diedi nu mianle.

8. Kɛ ɔkɛyɛ na yɛanyia nrɛlɛbɛ nee anwubielɛ mɔɔ ɔbamaa agɔnwolɛvalɛ mɔɔ yɛ nee Gyihova lɛ la anu amia ɛ?

⁸ Asoo yɛbahola yɛava Gyihova agɔnwolɛ kpalɛ? Ɛhɛe! Ɔwɔ kɛ yɛsukoa Gyihova anwo debie kɛ mɔɔ Ebileham yɛle la. Yɛdayɛ noko yɛbahola yɛanyia Nyamenle anwo nrɛlɛbɛ nee anwubielɛ. Ɛnɛ, yɛlɛ ninyɛne mɔɔ ɔbaboa yɛ la dɔɔnwo yɛtɛla mɔɔ Ebileham  nyianle la. (Daneɛle 12:4; Wulomuma 11:33) “Anwuma nee aze Bɔvolɛ” ne anwo nrɛlɛbɛ ɛyi Baebolo ne anu. Mɔɔ yɛbazukoa la bamaa yɛahulo Gyihova na yeaboa yɛ yeamaa yɛabu ye kpalɛ. Saa yɛkulo Nyamenle na yɛbu ye a, ɔbamaa yɛadie ye. Saa yɛyɛ zɔ a, yɛbanwu kɛzi ɔbɔ yɛ nwo bane na ɔyila yɛ la, na ɛhye bamaa yɛanyia anwubielɛ mɔɔ ɔbamaa yɛ diedi nu amia la. Saa yɛfa yɛ ahonle muala yɛsonle Gyihova a, yɛbanyia anzodwolɛ nee anyelielɛ na yɛ kunlu adwo yɛ nwo. (Edwɛndolɛ 34:8; Mrɛlɛbulɛ 10:22) Saa yɛkɔ zo yɛsukoa Nyamenle anwo nrɛlɛbɛ na yɛnyia anwubielɛ dɔɔnwo a, yɛ nee ye agɔnwolɛvalɛ ne anu bamia.

9, 10. (a) Duzu a bamaa agɔnwolɛvalɛ bie anu ayɛ se a? (b) Duzu a kile kɛ Ebileham maanle agɔnwolɛvalɛ mɔɔ ɔ nee Gyihova lɛ la hyianle ye na ɔmaanle nuhua yɛle se ɛ?

⁹ Agɔnwolɛvalɛ kpalɛ le kɛ agudeɛ mɔɔ sonle bolɛ la. (Kenga Mrɛlɛbulɛ 17:17.) Ɔnle kɛ buakɛ mɔɔ ye bolɛ yɛ se mɔɔ bɛfa bɛsiezie sua nu ala la. Ɔle kɛ felawɔse kɛnlɛma mɔɔ ɔwɔ kɛ bɛgugua nzule zo na bɛnea ye amaa yeanyi la. Ebileham maanle agɔnwolɛvalɛ mɔɔ ɔ nee Gyihova lɛ la hyianle ye na ɔzɔle nu boɛ. Kɛzi ɔyɛle ye ɛ?

¹⁰ Ebileham zulole Nyamenle na ɔdiele ye dahuu. Kɛ neazo la, mekɛ mɔɔ ɔ nee ye abusua ne nee ye azonvolɛ kɔ Keena la, ɔmaanle Gyihova hɔle zo hilele ye adenle wɔ ye kpɔkɛzilɛ biala anu. Ɔka ɛvolɛ ko na bɛawo Ayezeke, mɔɔ ɛnee Ebileham ɛli ɛvolɛ 99 la, Gyihova hanle hilele Ebileham kɛ ɔpɛ mrenyia mɔɔ wɔ ye awuke nu la amuala mrenyia zo. Asoo mɔɔ Gyihova hanle la maanle Ebileham adwenle nu yɛle ye kesee anzɛɛ ɔkpondɛle edwɛkɛ bie ɔyele ɔ nloa amaa yeanyɛ mɔɔ Gyihova se ɔyɛ la ɔ? Kyɛkyɛ, ɔliele Gyihova ɔlile na ɔdiele ye “kenle ko ne ala.”​—Mɔlebɛbo 17:10-14, 23, 26.

11. Duzu ati a ɛnee Sodɔm nee Gomɔla edwɛkɛ ne gyegye Ebileham ɛ, na kɛzi Gyihova boale ye ɛ?

¹¹ Kɛmɔ Ebileham diele Gyihova wɔ ninyɛne ngyikyi bɔbɔ anu la ati, bɛ agɔnwolɛvalɛ ne anu yɛle se. Ɔnwunle kɛ ɔbahola yeaha debie biala anwo edwɛkɛ yeahile Gyihova, eza ɔbahola yeazɛlɛ kɛ Gyihova ɛboa ye ɔmaa ɔde ninyɛne mɔɔ kye ye adwenle la abo. Kɛ neazo la, mɔɔ Gyihova hanle kɛ ɔbazɛkye Sodɔm nee Gomɔla la, ɛnee ɔgyegye Ebileham. Duzu ati ɔ? Ɛnee ɔsulo kɛ kpalɛyɛlɛma nee ɛtanevolɛma amuala babɔ nu awu. Bie a ɛnee ɔlɛdwenle ye awozoa Lɔɔto mɔɔ ɔ nee ye abusua ne de Sodɔm la anwo. Ebileham nyianle Gyihova, “azɛlɛ ye amuala ndɛnebuavolɛ” ne anu anwodozo, yemɔti ɔhanle ye ngyegyelɛ ne anwo edwɛkɛ ɔhilele ye wɔ ɛbulɛ nu. Gyihova nyianle ɔ gɔnwo ne anwo abotane na ɔmaanle ɔnwunle  kɛ Ɔse anwunvɔne. Gyihova hilehilele nu hilele ye kɛ saa ɔlɛbua ndɛne a, ɔkpondɛ kpalɛyɛlɛma na ɔdie bɛ ngoane.​—Mɔlebɛbo 18:22-33.

12, 13. (a) Kɛzi nrɛlɛbɛ nee anwubielɛ boale Ebileham nzinlii ɛ? (b) Duzu a kile kɛ ɛnee Ebileham lɛ Gyihova anu anwodozo a?

¹² Ɔda ali kɛ Nyamenle anwo nrɛlɛbɛ nee anwubielɛ mɔɔ Ebileham nyianle la boale ye maanle ɔ nee Gyihova agɔnwolɛvalɛ ne anu hɔle zo mianle. Yemɔti nzinlii mɔɔ Gyihova hanle hilele Ebileham kɛ ɔva ɔ ra ne ɔbɔ afɔle la, ɛnee ɔze kɛ Gyihova si abotane, ɔse anwunvɔne, ɔdi nɔhalɛ, yɛɛ ɔbɔ menli nwo bane dahuu. Ɛnee Ebileham ze ye wienyi kɛ Gyihova ɛtɛkakyile! Duzu ati a yɛkola yɛka ye zɔ ɛ?

¹³ Kolaa na Ebileham avi ye sonvolɛma ne anwo ɛkɛ la, ɔhanle kɛ: “Bɛ nee asoaso ne ɛhendɛ ɛke, na me nee kpavolɛ ye yɛkɔ nehane yeahɔzonle na yɛara.” (Mɔlebɛbo 22:5) Duzu a ɛnee ɔlɛkile a? Asoo ɛnee ɔlɛbɔ adalɛ kɛ ɔ nee Ayezeke bazia ara wɔ mekɛ mɔɔ ɔze kɛ ɔkava ye yeabɔ afɔle la ɔ? Kyɛkyɛ. Baebolo ne se ɛnee Ebileham ze kɛ Gyihova bahola adwazo Ayezeke avi ewule nu. (Kenga Hibuluma 11:19.) Ɛnee Ebileham ze kɛ Gyihova ɛmaa ɔ nee Sɛla ɛhola ɛwo ɔnva nwo kɛ ɛnee bɛyɛ mrelera la. (Hibuluma 11:11, 12, 18) Yemɔti ɔnwunle ye wienyi kɛ Gyihova kola yɛ debie biala. Ɛnee Ebileham ɛnze mɔɔ bazi kenle zɔhane a. Noko ɛnee ɔlɛ diedi kɛ saa ɔhyia kɛ Gyihova dwazo ɔ ra ne a, ɔbayɛ zɔ amaa ɛwɔkɛ biala mɔɔ Nyamenle ɛbɔ la ara nu. Yemɔti a bɛfɛlɛ Ebileham kɛ ‘bɛdabɛ mɔɔ bɛdie Nyamenle bɛdi la bɛ ze’ la.

14. Ngyegyelɛ boni mɔ a ɛyia wɔ Gyihova ɛzonlenlɛ nu a, na kɛzi Ebileham neazo ne baboa wɔ ɛ?

¹⁴ Ɛnɛ, Gyihova ɛnga kɛ yɛva yɛ mra yɛbɔ afɔle, noko ɔse yɛli ye mɛla ne mɔ azo. Ɔdwu mekɛ ne bie a yɛnrɛde deɛmɔti Nyamenle ɛmaa yɛ mɛla ɛhye mɔ la abo anzɛɛ bie a ɔbayɛ se kɛ yɛbali zo. Zɔhane a ɛte nganeɛ ɔ? Wɔ bie mɔ afoa nu, edwɛkɛhanlɛ gyima ne yɛ se. Bie a bɛse nyiane na ɔyɛ se kɛ bɛ nee menli mɔɔ bɛnze bɛ la badendɛ. Bie mɔ sulo kɛ bɛbayɛ ngakyile wɔ bɛ gyima nu anzɛɛ sukulu nu. (Adendulɛ 23:2; 1 Tɛsalonaekama 2:2) Saa bɛka kɛ ɛyɛ debie mɔɔ ye ɛyɛlɛ yɛ se la a, kakye Ebileham diedi nee akɛnrasesebɛ nwo neazo kɛnlɛma ne. Saa yɛdwenledwenle neazo mɔɔ mrenyia nee mraalɛ nɔhavoma yɛle la anwo a, ɔbaha yɛ yeamaa yɛazukoa bɛ na yɛabikye yɛ Gɔnwo Gyihova.​—Hibuluma 12:1, 2.

15. Duzu ati a yɛkola yɛka kɛ Ebileham annu ɔ nwo kɛ ɔdiele Gyihova ɛ?

¹⁵ Asoo Ebileham nlunle ɔ nwo kɛ ɔdiele Gyihova la ɔ? Baebolo ne se  Ebileham “yɛle kpanyinli kpalɛ, ɔyɛle ɛrelera nwosonwoso na yeawu.” (Mɔlebɛbo 25:7, 8) Mɔɔ Ebileham lile ɛvolɛ 175 la, saa ɔnea mekɛ tendenle mɔɔ ɔdɛnlanle aze la a, ɔ kunlu dwo ɔ nwo. Duzu ati ɔ? Ɔluakɛ ɛnee agɔnwolɛvalɛ mɔɔ ɔ nee Gyihova lɛ la a hyia ye kpole kpalɛ a. Noko saa yɛkenga kɛ Ebileham yɛle “ɛrelera nwosonwoso” a, ɔngile kɛ ɛnee ɔngulo kɛ ɔtɛnla ngoane nu bieko.

16. Ninyɛne boni mɔ a bamaa Ebileham anye alie kpole wɔ Paladaese a?

¹⁶ Baebolo ne se “ɛnee Ebileham ɛlɛkendɛ Nyamenle ɔdaye ye Suakpole ne mɔɔ yehyehyɛ, yewula ye aze na yekyekye la.” (Hibuluma 11:10) Ɛnee Ebileham die di kɛ kenle bie ɔbanwu suakpole zɔhane, Nyamenle Belemgbunlililɛ ne, kɛ ɔlɛdi azɛlɛ ye amuala azo tumi. Na ɔbanwu ye noko! Nea kɛzi Ebileham anye balie kɛ ɔde paladaese na ɔlɛkɔ zo yeamia agɔnwolɛvalɛ mɔɔ ɔ nee Nyamenle lɛ la anu a. Ɔ nye balie kɛ ye diedi nwo neazo ne boale Nyamenle azonvolɛ wɔ ɛvolɛ apenle dɔɔnwo anu la! Wɔ Paladaese, ɔbanwu kɛ afɔle mɔɔ ɔbɔle wɔ Boka Molaya azo la ɛnee gyi ɛkɛ maa debie kpole mɔɔ ɔbazi kenle bie la. (Hibuluma 11:19) Eza ɔbanwu kɛzi nyane mɔɔ ɔdele wɔ mekɛ mɔɔ ɔzieziele ɔ nwo kɛ ɔfa ɔ ra Ayezeke yeabɔ afɔle la ɛboa nɔhavoma mgbe dɔɔnwo yemaa bɛde nyane mɔɔ Gyihova noko dele wɔ mekɛ mɔɔ ɔvale ɔ Ra Gyisɛse Kelaese ɔmaanle alesama kɛ ɛkpɔnedeɛ la abo la. (Dwɔn 3:16) Ebileham neazo ne ɛboa yɛ muala ɛmaa yɛhile ɛkpɔnedeɛ ne, ɛlɔlɛ kpole mɔɔ tɛla biala mɔɔ Nyamenle ɛla ye ali ɛmaa yɛ la, anwo anyezɔlɛ.

17. Duzu a wɔbɔ kpɔkɛ kɛ ɛbayɛ a, na duzu a yɛbazuzu nwo wɔ edwɛkɛ bieko anu a?

¹⁷ Bɛmaa yɛ nuhua ko biala ɛzi kpɔkɛ kɛ ɔbazukoa Ebileham diedi ne. Yɛhyia nrɛlɛbɛ nee anwubielɛ mɔɔ ɔnyianle la bie. Mekɛ mɔɔ yɛlɛsukoa Gyihova anwo debie na yɛadie ye la, yɛbanwu kɛzi ɔbayila yɛ na yeabɔ yɛ nwo bane la. (Kenga Hibuluma 6:10-12.) Ɔrɛla ye kɛ Gyihova bayɛ yɛ gɔnwo dahuu! Wɔ edwɛkɛ bieko anu, yɛbazuzu nɔhavoma nsa bieko mɔɔ bɛvale Nyamenle agɔnwolɛ kpalɛ la anwo.