MEKƐ boni a ɛ nye liele kpalɛ wɔ wɔ ɛbɛlabɔlɛ nu a? Asoo yemɔ a le mekɛ mɔɔ ɛgyale anzɛɛ ɛwole ɛ ra mɔɔ limoa la? Anzɛɛ mekɛ mɔɔ bɛzɔnenle wɔ la? Ɔbayɛ kɛ mekɛ zɔhane hyia wɔ na kenle zɔhane a ɛ nye liele kpalɛ wɔ wɔ ɛbɛlabɔlɛ nu a. Kenle zɔhane, nea kɛzi ɛ mediema anye liele kɛ amgba ɛfa wɔ ahonle muala, wɔ ɛkɛla muala, wɔ adwenle muala, nee wɔ anwosesebɛ muala ɛkulo Nyamenle a!​—Maake 12:30.

Ɔda ali kɛ, ɔvi mekɛ mɔɔ bɛzɔnenle wɔ la wɔnyia anyelielɛ dɔɔnwo wɔ Gyihova ɛzonlenlɛ nu. Noko nolobɔlɛma dɔɔnwo anyelielɛ ne ɛha aze. Duzu ati ɔ? Duzu ati a ɔwɔ kɛ yɛkɔ zo yɛfa anyelielɛ yɛsonle Gyihova a?

Belemgbunlililɛ edwɛkɛ ne maa yɛ nye die kpalɛ. Duzu ati ɔ? Ɔluakɛ Gyihova ɛbɔ ɛwɔkɛ kɛ ɔnrɛhyɛ Belemgbunlililɛ ne bazɛkye ɛtane ewiade ɛhye na yeamaa Nyamenle ewiade fofolɛ ne ara. Zɛfanaya 1:14 ka kile yɛ kɛ: “[Gyihova] kenle kpole ne ɛbikye. Ɔnrɛhyɛ biala, yebikye kpalɛ.” Noko saa yɛte nganeɛ kɛ yɛhendɛ yɛhyɛ noko awieleɛ ne ɛmba a, ɔbahola yeamaa yɛ rɛle abɔ. Ɛhye bahola amaa anyelielɛ mɔɔ yɛfa yɛsonle Nyamenle la aha aze.​—Mrɛlɛbulɛ 13:12.

Saa yɛ nee yɛ mediema tu a, ɔmaa yɛnyia anwosesebɛ yɛkɔ zo yɛsonle Gyihova wɔ anyelielɛ nu. Bie a subane kpalɛ mɔɔ Gyihova menli da ye ali la a maanle yɛvale yɛ nwo yɛwulale nɔhalɛ ɛzonlenlɛ nu a, na ɛhye ɛlɛmaa yɛava anyelielɛ yɛazonle Nyamenle. (1 Pita 2:12) Noko saa yɛ mediema ne mɔ bie anli Nyamenle mɛla zo na bɛtea ye a, duzu a bahola avi nuhua ara a? Wɔannea a ɛhye bamaa asafo ne anu amra bie mɔ asa anu ado na bɛ anyelielɛ ne aha aze.

Anwonyia ɛhulolɛ noko bahola amaa yɛ anyelielɛ aha aze. Wɔ adenle boni azo? Seetan ewiade ne bɔ mɔdenle kɛ ɔbamaa yɛatotɔ ninyɛne mɔɔ yɛngyia nwolɛ la. Ɔti bɛmaa yɛhakye Gyisɛse edwɛkɛ ɛhye: “Awie biala ɛnrɛhola ɛnrɛzonle menlenlɛ nwiɔ, ɔluakɛ saa ɔyɛ ye zɔhane a ɔbahulo ko na yeakpɔ ko, anzɛɛ ɔbali ko eni na yeakpo ko. Zɔhane ala yɛɛ bɛnrɛhola Nyamenle nee ezukoa sonle a.” (Mateyu 6:24) Saa yɛlɛbɔ mɔdenle kɛ yɛbanyia yɛ nwo wɔ ewiade ɛhye anu a, yɛnrɛhola yɛnrɛzonle Gyihova wɔ anyelielɛ nu.

Gyihova ɛzonlenlɛ ɛnle adesoa ɛmmaa menli mɔɔ bɛkulo ye la. (1 Dwɔn 5:3) Kakye kɛ Gyisɛse hanle kɛ: “Bɛdabɛ mɔɔ bɛzo ɛnlomboɛ na bɛvɛ la, bɛ muala bɛrɛla me nwo ɛke, na menwɔmaa bɛ ɛnwomenlelielɛ. Bɛva me gyɛnvayile ne bɛdo bɛ kɔme zo na bɛzukoa mɔɔ meyɛ la, ɔluakɛ mele bɛtɛɛ, yɛɛ memmemaa me nwo zo, na bɛ ɛkɛla ne mɔ anwo kɛdɔ bɛ. Ɔluakɛ me gyɛnvayile ne le felafela, yɛɛ bɔlɛ mɔɔ mebava meazoa bɛ la ɛnyɛ  ɛnlomboɛ.” (Mateyu 11:28-30) Saa ɛle nɔhalɛ Kilisienenli a ɔmaa ɛ nwo tɔ wɔ yɛɛ ɛ nye die. Ninyɛne dɔɔnwo wɔ ɛkɛ mɔɔ ɔwɔ kɛ ɔmaa yɛ nye die wɔ Gyihova ɛzonlenlɛ nu a. Akee bɛmaa yɛzuzu nuhua nsa anwo.​—Habakɛke 3:18.

Yɛsonle yɛ Ngoane Maavolɛ nee anyelielɛ Nyamenle ne. (Gyima ne 17:28; 1 Temɔte 1:11) Yɛze kɛ yɛ Bɔvolɛ ne a nea yɛ ngoane zo a. Yemɔti bɛmaa yɛhɔ zo yɛva anyelielɛ yɛzonle ye ɔnva nwo mekɛ tendenle mɔɔ ɛze ɛhɔ ɔvi mekɛ mɔɔ bɛzɔnenle yɛ la.

Fa Héctor mɔɔ ɔvale ɛvolɛ 40 ɔzonlenle Gyihova kɛ neavolɛ adenduvo la kɛ neazo. ‘Yeyɛ ɛrelera’ noko ɔ nye tɛdie wɔ Gyihova ɛzonlenlɛ nu. (Edwɛndolɛ 92:12-14) Ɔ ye anwodolɛ ne ɛha ye mɔdenlebɔlɛ ne, noko Héctor anyelielɛ ne ɛtɛkanle aze. Ɔse: “Me ye anwodolɛ ne mɔɔ ɛlɛyɛ kpole la yɛ me nyane na yemaa ye ɛnleanlɛ ɛrayɛ se, noko memmaa ɛhye ɛnzɛkye me anyelielɛ wɔ Nyamenle ɛzonlenlɛ nu. Kɛmɔ meze kɛ Gyihova a nea me ngoane zo na bodane bie ati a ɔbɔle sonla la ati, yemɔ angomekye bɔbɔ maa mekulo ye kpalɛ na mefi me ahonle muala anu mesonle ye. Mebɔ mɔdenle kɛ mebahɔ daselɛlilɛ dahuu na meamaa Belemgbunlililɛ ne anwo anyelazo ne adɛnla me adwenle nu amaa me anyelielɛ ne anga aze ɛlɛ.”

Gyihova ɛva ɛkpɔnedeɛ ne ɛmaa yɛ amaa yɛ nye alie wɔ ɛbɛlabɔlɛ nu. “Nyamenle hulole ewiade amra kpole kpalɛ la ati yɛɛ ɔvale Ɔ Ra kokye ne ɔmanle a, amaa awie biala mɔɔ kɛlie ye kɛli la anwu na yeanyia ngoane mɔɔ ɛnlɛ awieleɛ.” (Dwɔn 3:16) Saa yɛnyia ɛkpɔnenlɛ ahyɛlɛdeɛ ne mɔɔ Nyamenle ɛva ɛmaa yɛ la anu diedi a, yɛbahola yɛanyia ɛtanefakyɛ nee dahuu ngoane. Ɛhye le debie titili mɔɔ ɔti ɔwɔ kɛ yɛ nye die a! Anyezɔlɛ mɔɔ yɛlɛ yɛmaa ɛkpɔnedeɛ ne la bamaa yɛava anyelielɛ yɛazonle Gyihova.

Adiema Jesús mɔɔ ɛnee de Mexico la hanle kɛ: “Menyɛle akɛlɛ memaanle me gyima na ɛnee ɔdwu mekɛ ne bie a meyɛ gyima ngakyile nnu kenle ko biala ɔnva nwo kɛ ɛnee ɔngyia kɛ meyɛ zɔ la. Menyɛle ɛhye amaa meanyia ezukoa dɔɔnwo. Menzukoale Gyihova nee kɛzi yeva ye kulovolɛ Ralɛ ne yemaa alesama la anwo debie na menyianle ɛhulolɛ kɛ mebazonle ye. Yemɔti menyilale me nwo zo memaanle Gyihova. Menyɛle gyima ɛvolɛ 28 la, menzile kpɔkɛ kɛ megyakyi na meava me nwo meawula dahuu ɛzonlenlɛ gyima ne anu.” Kɛzi Jesús bɔle ɔ bo kɛ ɔsonle Gyihova wɔ anyelielɛ nu la ɛne.

Yɛbɔ ɛbɛla kpalɛ, na yemɔ maa yɛ nye die. Asoo ɛkakye kɛzi ɛnee wɔ ɛbɛlabɔlɛ ne de kolaa na wɔaranwu Gyihova la ɔ? Ɛzoanvolɛ Pɔɔlo hakyele Kilisienema mɔɔ bɛwɔ Wulomu la kɛ mekɛ bie “ɛnee bɛle ahanra bɛmaa ɛtane” noko “bɛyɛ bɛ  nwo ahanra bɔkɔɔ bɛmaa tenleneyɛlɛ.” Ɔluakɛ ɛnee bɛlɛbɔ ɛbɛla kpalɛ la ati, bɛbahola bɛanyia anyelazo kɛ bɛbanyia dahuu ngoane. (Wulomuma 6:17-22) Yɛdayɛ noko yɛfa Gyihova ngyinlazo yɛyɛ gyima, yemɔti yɛmbɔ ɛbɛlatane yɛɛ yɛnyɛ basabasa na yeamaa yɛali nyane. Nea kɛzi ɛhye maa yɛ nye die a!

Suzu Jaime mɔɔ ɛnee ɔnlie ɔnli kɛ Nyamenle wɔ ɛkɛ, ɔdie ngakyihakyililɛ ɔdi na eza ɔbɔ boxing la anwo nea. Jaime bɔle ɔ bo kɛ ɔkɔ debiezukoalɛ na ɛlɔlɛ mɔɔ bɛda ye ali wɔ ɛkɛ la hanle ye ahonle. Amaa Jaime agyakyi ye ɛbɛlabɔlɛ dɛba ne la, ɔzɛlɛle Gyihova kɛ ɔmaa ɔnyia diedi wɔ ye nu. Jaime ka kɛ: “Ngyikyi ngyikyi, menwunle kɛ Selɛ mɔɔ lɛ ɛlɔlɛ nee Nyamenle mɔɔ se anwunvɔne la wɔ ɛkɛ. Gyihova tenlene ngyinlazo ne mɔ mɔɔ mefa mebɔ me ɛbɛla la ɛbɔ me nwo bane. Saa meangakyi me ɛbɛlabɔlɛ a, anrɛɛ bɛhu me kɛ mɔɔ bɛhu me gɔnwo mɔ bie mɔ mɔɔ bɛbɔ boxing la. Ɛvolɛ dodo mɔɔ meva mezonle Gyihova la a le mekɛ mɔɔ me nye ɛlie kpalɛ wɔ ɛbɛlabɔlɛ nu a.”

Mekɛ mɔɔ yɛlɛkendɛ ɛtane ewiade ɛhye ɛzɛkyelɛ ne la, duzu subane a ɔwɔ kɛ yɛnyia a? Kakye kɛ yɛlɛyɛ Nyamenle ɛhulolɛdeɛ na yɛ nye la dahuu ngoane ade. Yemɔti “bɛmaa yɛhɔ zolɛ yɛyɛ kpalɛ; ɔluakɛ saa yɛangyakyi nyele ɛyɛlɛ a, kenle bie yɛbanwu ɔ bo aleɛ.” (Galeehyeama 6:8, 9) Ɔlua Gyihova moalɛ zo, bɛmaa yɛgyinla kpundii na yɛnyia subane mɔɔ bamaa yɛahola yɛapɛ ‘anwongyelelɛ kpole’ ne na yɛahɔ zo yɛava anyelielɛ yɛazonle Gyihova la.​—Yekile 7:9, 13, 14; Gyemise 1:2-4.

Yɛlɛ anwodozo kɛ saa yɛgyinla kpundii a, Gyihova bayila yɛ ɔluakɛ ɔ rɛle ɛnvi gyima mɔɔ yɛyɛ nee ɛlɔlɛ mɔɔ yɛla ye ali yɛhile ye la. Saa yɛkɔ zo yɛsonle ye wɔ anyelielɛ nu a, yɛbayɛ kɛ edwɛndolɛnli Devidi mɔɔ ɔhanle kɛ: “Mefa [Gyihova] mesie me nyunlu dahuu; ɔboalekɛ ɔgyi me sa fema zo, ɛhwee ɛngola me bo tu. Yemɔti medi fɛlɛko na me nye die, mede, me nwo kɔlɔnwo” la.​—Edwɛndolɛ 16:8, 9.