1, 2. Kɛzi Devidi hilele kɛ ɔdi nɔhalɛ ɔmaa Nyamenle ɛ? (Nea mɔlebɛbo nvoninli ne.)

ƐNEE Sɔɔlo nee ye sogyama 3,000 ne ɛlɛkpondɛ Devidi wɔ Dwuda fienemgbole ne anu ahu ye. Noko kenle ko nɔɔzo, Devidi nee ye menli ne nwunle ɛleka mɔɔ Sɔɔlo nee ye sogyama ne wɔ la. Ɛnee bɛ muala bɛlafe, yemɔti Devidi nee Abehyae yɛle nyaa vale bɛ avinli na bɛnwunle ɛleka mɔɔ Sɔɔlo la la. Abehyae hanle ye bɛtɛɛ hilele Devidi kɛ: “Maa menwɔ ye atwɛ na membɔ ye pemgbɛne azɛlɛ ne anwo; mewɔ ye kokye ala, menrɛdia zolɛ nwiɔ.” Noko Devidi ammaa yeangu Sɔɔlo. Ɔhanle ɔhilele Abehyae kɛ: “Mmafa ɛ sa ɛka ye, ɔluakɛ awie biala mɔɔ kɛva ɔ sa kɛha sonla mɔɔ [Gyihova] ɛzie ye belemgbunli la ɛnrɛva ɔ nwo dwɔɔ.” Akee Devidi hanle kɛ: “[Gyihova] ɛkpa ɛgua kɛ menwɔva me sa menwɔha sonla mɔɔ ɔdaye yeye ye yezie ye belemgbunli la.”​—1 Samoɛle 26:8-12.

² Ɛnee Devidi ze mɔɔ ɔwɔ kɛ ɔyɛ amaa yeali nɔhalɛ yeamaa Gyihova la. Ɛnee ɔze kɛ ɔwɔ kɛ ɔbu Sɔɔlo, na yeandwenle  nwo bɔbɔ kɛ ɔyɛ debie yeaboda ye. Duzu ati ɔ? Ɔluakɛ ɛnee Nyamenle ɛkpa Sɔɔlo kɛ Yizilayɛ belemgbunli. Ɛnɛ, Gyihova kpondɛ kɛ ye azonvolɛ kɔsɔɔti di nɔhalɛ maa ye na bɛbu menli mɔɔ yɛmaa bɛ tumi la kɔsɔɔti kɛ mɔɔ ɛnee ɔde wɔ tete ne la.​—Kenga Edwɛndolɛ 18:25.

3. Kɛzi Abehyae lile nɔhalɛ maanle Devidi ɛ?

³ Abehyae bule Devidi ɔluakɛ ɛnee ɔze kɛ Nyamenle ɛkpa Devidi kɛ ɔli belemgbunli. Noko bɛziele Devidi belemgbunli la anzi, ɔyɛle ɛtane mgbole. Ɔ nee Yulaya aye ne lale na ɔhanle ɔhilele Dwowabe kɛ ɔnlea kɛ Yulaya bawu wɔ konle ne anu. (2 Samoɛle 11:2-4, 14, 15; 1 Edwɛkɛsisilɛ 2:16) Abehyae adiema a le Dwowabe, yemɔti bie a Abehyae dele mɔɔ Devidi yɛle la, noko ɔbule Devidi dahuu. Eza ɛnee Abehyae le sogya kpanyinli, yemɔti anrɛɛ ɔbahola yeava ye tumi ne yeazie ɔ nwo belemgbunli, noko yeanyɛ zɔ. Emomu ɔzonlenle Devidi na ɔbɔle ɔ nwo bane ɔvile ye agbɔvolɛ asa anu.​—2 Samoɛle 10:10; 20:6; 21:15-17.

4. (a) Kɛzi Devidi yɛle nɔhalɛ mɔɔ yɛdi yɛamaa Nyamenle la anwo neazo ɛ? (b) Neazo boni mɔ a yɛbazuzu nwo a?

⁴ Devidi lile nɔhalɛ maanle Gyihova wɔ ye ngoane mekɛ kɔsɔɔti anu. Devidi le kakula la, ɔhunle Golayate mɔɔ ɛnee ɔlɛbɔ Gyihova nee Yizilayɛma aholoba la. (1 Samoɛle 17:23, 26, 48-51) Bɛziele Devidi belemgbunli la, ɛnee ɔwɔ kɛ Gyihova ngapezonli Neetan tenrɛdenrɛ ye wɔ ɛtane mɔɔ ɔyɛle la anwo. Devidi liele dole nu ɛkɛ ne ala kɛ yeyɛ ɛtane na ɔnlunle ɔ nwo. (2 Samoɛle 12:1-5, 13) Mɔɔ Devidi yɛle ɛrelera la, ɔboɔboale ninyɛne dɔɔnwo mɔɔ bɛbava bɛazi Gyihova ɛzonlenlɛ sua ne la anloa. (1 Edwɛkɛsisilɛ 29:1-5) Devidi yɛle nvonleɛ mgbole wɔ ye ɛbɛlabɔlɛ nu, noko ɔlile nɔhalɛ ɔmaanle Nyamenle dahuu. (Edwɛndolɛ 51:4, 10; 86:2) Wɔ edwɛkɛ ɛhye anu, yɛbazuzu Devidi nee menli gyɛne mɔɔ dɛnlanle aze wɔ ye mekɛ zo la neazo ne nee kɛzi yɛbahola yɛali nɔhalɛ yɛamaa Gyihova angomekye la anwo. Eza yɛbazuzu subane ngakyile mɔɔ ɔbaboa yɛ yeamaa yɛayɛ zɔ la anwo.

5. Duzu a yɛsukoa yɛfi Abehyae nvonleɛ ne anu a?

⁵ Kɛmɔ ɛnee Abehyae kulo kɛ ɔdi nɔhalɛ ɔmaa Devidi la ati a ɛnee ɔkulo kɛ ɔku Sɔɔlo la. Noko kɛmɔ ɛnee Devidi ze kɛ ɔnle kpalɛ kɛ bɛbaboda awie mɔɔ Gyihova “ɔdaye yeye ye yezie ye belemgbunli la” ati, yeammaa Abehyae angu belemgbunli ne. (1 Samoɛle 26:8-11) Ɛhye maa yɛsukoa debie titili bie: Saa ɔwɔ kɛ yɛsi awie mɔɔ yɛbali nɔhalɛ yɛamaa ye la anwo kpɔkɛ a, ɔwɔ kɛ yɛdwenle Baebolo nu ngyinlazo mɔɔ ɔbahola yeaboa yɛ wɔ yɛ tɛnlabelɛ ne anu la anwo.

6. Ɔnva nwo kɛ yɛkulo kɛ yɛdi nɔhalɛ yɛmaa yɛ abusua ne nee yɛ gɔnwo mɔ la, duzu ati a ɔwɔ kɛ yɛnea boɛ a?

⁶ Yɛ muala yɛkulo kɛ yɛdi nɔhalɛ yɛmaa yɛ gɔnwo anzɛɛ yɛ busuanli bie mɔɔ yɛkulo ye edwɛkɛ la. Noko kɛmɔ yɛnli munli la ati, yɛ nganeɛdelɛ bahola abɛlɛbɛla yɛ. (Gyɛlɛmaya 17:9) Yemɔti saa awie mɔɔ yɛkulo ye edwɛkɛ la ɛlɛyɛ ninyɛndane na ɔfi nɔhalɛ ne anu a, ɔwɔ  kɛ yɛkakye kɛ ɔhyia kɛ yɛdi nɔhalɛ yɛmaa Gyihova yɛtɛla awie gyɛne biala.​—Kenga Mateyu 22:37.

7. Kɛzi adiema raalɛ ko lile nɔhalɛ maanle Nyamenle wɔ tɛnlabelɛ mɔɔ anu yɛ se la anu ɛ?

⁷ Saa bɛdu wɔ busuanli bie a, ɛbahola wɔamaa Gyihova anwu kɛ ɛdi nɔhalɛ ɛmaa Ye. Kɛ neazo la, kenle ko Anne mame mɔɔ bɛdu ye la vɛlɛle ye na ɔhanle kɛ ɔkpondɛ kɛ ɔbakpɔla Anne. ^[1] (Nea awieleɛ edwɛkɛ ne.) Anne mame hanle kɛ ɔ nye ɛnlie ɔluakɛ abusua ne amuala nee ye ɛndendɛ. Ɛhye maanle Anne lile nyane na ɔhanle kɛ ɔbahɛlɛ ye kɛlata yeabua ye. Kolaa na Anne ahɛlɛ kɛlata ne la, ɔdwenledwenlenle Baebolo nu ngyinlazo bie mɔ anwo. (1 Kɔlentema 5:11; 2 Dwɔn 9-11) Akee ɔvile atiakunlukɛnlɛma nu ɔhilehilele nu wɔ kɛlata ne anu kɛ ye mame a kpole abusua ne a, wɔ mekɛ mɔɔ ɔyɛle ɛtane na yeannu ɔ nwo la. Anne hanle hilele ye mame kɛ saa ɔ nye balie bieko a kyesɛ ɔsia ɔba Gyihova ɛkɛ.​—Gyemise 4:8.

8. Subane boni mɔ a baboa yɛ yeamaa yɛali nɔhalɛ yɛamaa Nyamenle a?

⁸ Ɛnee nɔhavoma mɔɔ de aze wɔ Devidi mekɛ zo la noko bɛlɛ bɛ nwo aze, bɛle atiakunlukɛnlɛma yɛɛ bɛlɛ akɛnrasesebɛ. Bɛmaa yɛnlea kɛzi subane ɛhye mɔ baboa yɛ yeamaa yɛali nɔhalɛ yɛamaa Gyihova la.

9. Duzu ati a anrɛɛ Abenɛɛ ku Devidi ɛ?

⁹ Mɔɔ Devidi vale Golayate ati rɛlɛle Belemgbunli Sɔɔlo la, Dwɔnatan nee Yizilayɛ sogyama kpanyinli Abenɛɛ nwunle ye. Dwɔnatan vale Devidi agɔnwolɛ na ɔlile nɔhalɛ ɔmaanle ye. (1 Samoɛle 17:57–18:3) Noko Abenɛɛ anyɛ zɔ. Nzinlii ɔboale Sɔɔlo bɔbɔ wɔ mekɛ mɔɔ ɛnee ɔkpondɛ kɛ ɔku Devidi la. (1 Samoɛle 26:1-5; Edwɛndolɛ 54:3) Ɛnee Dwɔnatan nee Abenɛɛ ze kɛ Nyamenle kpondɛ kɛ Devidi di Yizilayɛ belemgbunli. Noko Sɔɔlo wule la anzi, Abenɛɛ angyinla Devidi anzi. Emomu ɔbɔle mɔdenle kɛ ɔsie Sɔɔlo ara Yehyebɔhyɛte belemgbunli. Nzinlii, ɛnee Abenɛɛ kpondɛ kɛ ɔdi belemgbunli, na bie a yemɔti a ɔ nee Belemgbunli Sɔɔlo aye bie lale la. (2 Samoɛle 2:8-10; 3:6-11) Duzu ati a ɛnee  asolo kɛzi Dwɔnatan nee Abenɛɛ bu Devidi la ɛ? Ɔluakɛ ɛnee Dwɔnatan di nɔhalɛ maa Gyihova na ɔbɛlɛ ɔ nwo aze, noko ɛnee Abenɛɛ ɛnle zɔ.

10. Duzu ati a Abesalɛm anli nɔhalɛ ammaa Nyamenle ɛ?

¹⁰ Ɛnee Belemgbunli Devidi ara Abesalɛm ɛnli nɔhalɛ ɛmmaa Nyamenle ɔluakɛ ɛnee ɔmbɛlɛ ɔ nwo aze. Ɛnee ɔkpondɛ kɛ ɔdi belemgbunli, yemɔti ɔnyianle “ye konle ehwili nee nwolɛ mgbɔnwɔ yɛɛ sinzavolɛma abulanlu.” (2 Samoɛle 15:1) Eza ɔlile Yizilayɛma dɔɔnwo adwenle ɔmaanle bɛlile ɔ nzi. Ɔbɔle mɔdenle bɔbɔ kɛ ɔku ye papa Devidi ɔnva nwo kɛ ɛnee Gyihova ɛzie Devidi Yizilayɛ belemgbunli la.​—2 Samoɛle 15:13, 14; 17:1-4.

11. Kɛzi Abenɛɛ, Abesalɛm, nee Bɛlɛke edwɛkɛ ne baboa yɛ ɛ?

¹¹ Saa awie ɛmbɛlɛ ɔ nwo aze na ɔkulo kɛ ɔnyia tumi kpole a, ɔbayɛ se kɛ ɔbali nɔhalɛ yeamaa Nyamenle. Yɛkulo Gyihova, yɛɛ yɛmkpondɛ kɛ yɛyɛ angomedi nee amumuyɛ kɛ Abenɛɛ nee Abesalɛm la. Noko ɔwɔ kɛ yɛnea boɛ na yɛannyia ɛhulolɛ kɛ yɛkpondɛ ezukoa dɔɔnwo anzɛɛ gyima mɔɔ ɔbamaa yɛade nganeɛ kɛ yɛ nwo hyia la. Ɛhye bazɛkye yɛ nee Gyihova agɔnwolɛvalɛ ne. Mekɛ bie, ɛnee Gyɛlɛmaya kɛlɛhɛlɛvolɛ Bɛlɛke kpondɛ kɛ ɔnyia debie mɔɔ ɔnlɛ bie la, yemɔti ɛnee akee ɔ nye ɛnlie wɔ Nyamenle ɛzonlenlɛ nu. Gyihova hanle hilele Bɛlɛke kɛ: “Nea, melɛbubu mɔɔ mezi la meagua, yɛɛ mɔɔ melua la, melɛtudu meagua. Mebayɛ ɛhye wɔ aleɛabo ɛleka biala. Na wɔmɔ, ɛkpondɛ ninyɛne mgbole ɔ? Mmakpondɛ bɛ bo zo.” (Gyɛlɛmaya 45:4, 5) Bɛlɛke diele Gyihova. Na ɔwɔ kɛ yɛdayɛ noko yɛtie ye, ɔluakɛ ɔnrɛhyɛ ɔbazɛkye ɛtane ewiade ɛhye.

12. Duzu ati a saa yɛle angomedi a yɛnrɛhola yɛnrɛli nɔhalɛ yɛnrɛmaa Nyamenle a?

¹² Ɛnee ɔwɔ kɛ adiema Daniel mɔɔ wɔ Mexico la si awie mɔɔ ɔbali nɔhalɛ yeamaa ye la anwo kpɔkɛ. Ɛnee ɔkpondɛ kɛ ɔgya bɛlɛra bie mɔɔ ɔnzonle Gyihova la. Daniel hanle kɛ: “Membɔle dahuu adekpakyelɛ gyima ne abo bɔbɔ la, ɛnee mekɛlɛ ye ngɛlata.” Noko ɔnwunle kɛ ɛnee ɔlɛyɛ angomedi ɔluakɛ ɛnee mɔɔ ɔkulo la ala ɔyɛ a. Ɛnee ɔnli nɔhalɛ ɔmmaa  Gyihova yɛɛ ɔwɔ kɛ ɔbɛlɛ ɔ nwo aze. Yemɔti ɔhanle bɛlɛra ne anwo edwɛkɛ ɔhilele asafo nu kpanyinli bie. Daniel hanle kɛ: “Ɔboale me ɔmaanle menwunle kɛ, saa mebali nɔhalɛ meamaa Nyamenle a, ɔnle kɛ mekɛlɛ bɛlɛra ne bieko. Ɛnee ɔyɛ me nyane noko menyɛle asɔne na mengyakyile kɛ mebahɛlɛ ye. Akee me nye liele kpole wɔ daselɛlilɛ nu.” Kɛkala, Daniel ɛgya raalɛ mɔɔ kulo Gyihova a, na ɔsonle kɛ maangyebakyi zo neavolɛ.

13. Kɛzi Neetan lile nɔhalɛ maanle Gyihova nee Devidi wɔ mekɛ mɔɔ Devidi yɛle ɛtane la ɛ?

¹³ Saa yɛdi nɔhalɛ yɛmaa Gyihova a, ɔbamaa yɛali nɔhalɛ yɛamaa awie mɔ na yɛaboa bɛ kɛ mɔɔ yɛbahola biala la. Ngapezonli Neetan lile nɔhalɛ maanle Gyihova nee Devidi. Mɔɔ Devidi vale awie aye na eza ɔhunle ɔ hu la, Gyihova maanle Neetan dule Devidi folɛ. Ɛnee Neetan lɛ akɛnrasesebɛ yɛɛ ɔdiele Gyihova. Noko ɔyɛle ye debie nrɛlɛbɛ nu, na ɔ nee Devidi dendɛle wɔ adenle kɛnlɛma zo. Ɛnee ɔkpondɛ kɛ ɔboa Devidi ɔmaa ɔnwu anyebolo mɔɔ wɔ ye ɛtane ne anu la. Yemɔti ɔhanle sukoavolɛ bie mɔɔ ɔwuale nrenyia ehyianli bie boaneralɛ la anwo edwɛkɛ ɔhilele ye. Mɔɔ Devidi dele edwɛkɛ ne la, ɔvale sukoavolɛ ne anwo ɛya kpole. Akee Neetan hanle kɛ: “Sonla zɔhane, yemɔ a le ɛdawɔ.” Yemɔti Devidi nwunle kɛ yeyɛ ɛtane yetia Gyihova.​—2 Samoɛle 12:1-7, 13.

14. Kɛ ɔkɛyɛ na wɔali nɔhalɛ wɔamaa Gyihova nee ɛ gɔnwo anzɛɛ wɔ busuanli bie ɛ?

¹⁴ Ɛdawɔ noko ɛbahola wɔalimoa wɔali nɔhalɛ wɔamaa Gyihova na wɔali nɔhalɛ wɔamaa awie mɔ ɔlua atiakunlukɛnlɛma mɔɔ ɛbala ye ali wɔahile bɛ la azo. Kɛ neazo la, bie a ɛdi daselɛ kɛ adiema bie ɛyɛ ɛtane kpole bie. Bie a ɛkpondɛ kɛ ɛdi nɔhalɛ ɛmaa ye, titili saa ɔle ɛ gɔnwo kpalɛ anzɛɛ wɔ busuanli a. Noko ɛze kɛ ɔhyia kɛ ɛdi nɔhalɛ ɛmaa Gyihova. Yemɔti kɛ mɔɔ Neetan yɛle la, di nɔhalɛ maa Gyihova na da atiakunlukɛnlɛma ali kile ɛ diema ne. Ka kile ye kɛ ɔhɔbɔ mgbanyima ne mɔ amaneɛ ndɛndɛ ɔmaa bɛboa ye. Saa yeanyɛ a, ɛdawɔ mumua ne ka kile mgbanyima ne mɔ. Saa ɛyɛ ɛhye a, ɛnee ɛlɛdi nɔhalɛ wɔamaa Gyihova. Mekɛ ko ne ala, ɛnee ɛlɛda atiakunlukɛnlɛma ali wɔahile ɛ diema ne ɔluakɛ mgbanyima ne mɔ bahola aboa ye bɛamaa ɔ nee Gyihova anyia agɔnwolɛvalɛ bieko. Bɛbadenrɛdenrɛ ye wɔ adenle kɛnlɛma zo.​—Kenga Sɛlɛvolɛma 5:1; Galeehyeama 6:1.

15, 16. Duzu ati a ɛnee Huhyae hyia akɛnrasesebɛ na yeali nɔhalɛ yeamaa Nyamenle a?

¹⁵ Huhyae boka Belemgbunli Devidi agɔnwo mɔ mɔɔ bɛdi nɔhalɛ la anwo. Mɔɔ ɛnee awie mɔ kulo kɛ bɛsie Abesalɛm belemgbunli la, ɛnee ɔwɔ kɛ Huhyae si ɔ kɛnra na yeahola yeali nɔhalɛ yeamaa  Devidi nee Nyamenle. Ɛnee ɔze kɛ Abesalɛm nee ye sogyama ɛra Gyɛlusalɛm yɛɛ Devidi ɛnriandi. (2 Samoɛle 15:13; 16:15) Noko duzu a Huhyae yɛle a? Asoo ɔkpole Devidi na ɔdoale Abesalɛm? Kyɛkyɛ. Ɛnee Devidi ɛyɛ kpanyinli yɛɛ menli dɔɔnwo kulo kɛ bɛku ye, noko Huhyae lile nɔhalɛ maanle ye ɔluakɛ Gyihova ɛkpa Devidi kɛ ɔli belemgbunli. Ɔti Huhyae hɔyiale Devidi wɔ Ɔlivi Boka ne azo.​—2 Samoɛle 15:30, 32.

¹⁶ Devidi zele Huhyae kɛ ɔzia ɔhɔ Gyɛlusalɛm na ɔyɛ ɔ nwo kɛ asɛɛ ɔkulo Abesalɛm edwɛkɛ la amaa yeahola yeali Abesalɛm adwenle yeamaa yeadie ye folɛdulɛ ɛdeɛ ne na yeagyakyi Ahetɔfɛle ɛdeɛ ne. Huhyae lale akɛnrasesebɛ ali vale ye ngoane dole esiane nu yɛle mɔɔ Devidi hanle la na ɔlile nɔhalɛ ɔmaanle Gyihova. Devidi zɛlɛle Gyihova kɛ ɔboa Huhyae, na zɔhane a ɔyɛle a. Abesalɛm diele Huhyae na yeandie Ahetɔfɛle.​—2 Samoɛle 15:31; 17:14.

17. Duzu ati a ɔwɔ kɛ yɛnyia akɛnrasesebɛ na yɛali nɔhalɛ a?

¹⁷ Kɛ anrɛɛ yɛbayɛ mɔɔ yɛ mbusuafoɔ, yɛ gɔnwo mɔ gyimayɛvoma anzɛɛ maanle mgbanyima baha kɛ yɛyɛ la, ɔwɔ kɛ yɛsi yɛ kɛnra yɛdi nɔhalɛ yɛmaa Gyihova na yɛtie ye. Kɛ neazo la, Taro mɔɔ wɔ Japan la bɔle mɔdenle kɛ ɔvi ye ngakula nu, ɔbamaa ye awovolɛ anye alie. Ɔdiele bɛ yɛɛ ɔlile nɔhalɛ ɔmaanle bɛ, ɔluakɛ ɛnee ɔkulo bɛ, tɛ kɛ ɔwɔ kɛ ɔyɛ zɔ la ati ɔ. Noko mɔɔ ɔbɔle ɔ bo kɛ ɔ nee Gyihova Alasevolɛ sukoa Baebolo ne la, ɛnee ye awovolɛ kulo kɛ ɔgyakyi. Ɛhye yɛle ye nyane, na ɔyɛle se kɛ ɔbaha yeahile bɛ kɛ ɔkulo kɛ ɔkɔ debiezukoalɛ. Taro se: “Bɛvale ɛya na bɛduale me kɛ memmaba sua nu kɛ meba mearakpɔla bɛ wɔ ɛvolɛ dɔɔnwo anu. Menzɛlɛle akɛnrasesebɛ amaa meahola meali kpɔkɛ mɔɔ mebɔ la azo. Kɛkala bɛ ɛya ne ɛha aze, na mekola mekpɔla bɛ dahuu.”​—Kenga Mrɛlɛbulɛ 29:25.

18. Kɛzi debiezukoalɛ ɛhye ɛboa wɔ ɛ?

¹⁸ Bɛmaa yɛdayɛ noko yɛli nɔhalɛ yɛmaa Gyihova, kɛ mɔɔ Devidi, Dwɔnatan, Neetan nee Huhyae yɛle la amaa yɛ kunlu adwo yɛ nwo. Yɛngulo kɛ yɛyɛ kɛ Abenɛɛ nee Abesalɛm mɔɔ bɛanli nɔhalɛ la. Yɛnli munli yɛɛ yɛfo. Noko bɛmaa yɛmaa Gyihova ɛnwu ye kɛ nɔhalɛ mɔɔ yɛkpondɛ kɛ yɛdi yɛmaa ye la a hyia yɛ kpalɛ a.