‘Gyihova Yɛ Nyamenle Ne Le Gyihova Kokye Ala’
“Yizilayɛma, bɛdie, [Gyihova] yɛ Nyamenle ne le [Gyihova] kokye ala.”—MƐLA 6:4.
1, 2. (a) Duzu ati a menli dɔɔnwo ze edwɛkɛ mɔɔ wɔ Mɛla ne 6:4 la ɛ? (b) Duzu ati a Mosisi hanle zɔhane edwɛkɛ ne a?
WƆ ƐVOYA dɔɔnwo anu, ɛnee menli mɔɔ wɔ Dwuu ɛzonlenlɛ nu la ka edwɛkɛ agbɔkɛ nsia mɔɔ wɔ Mɛla ne 6:4 la wɔ bɛ asɔneyɛlɛ nu. Bɛka ye dahuu, nwonlomɔ nee nɔsolɛ. Bɛvale edwɛkɛkpɔkɛ mɔɔ limoa la bɛdole asɔneyɛlɛ ɛhye, na ɛnee bɛfɛlɛ ye Shema. Dwuuma mɔɔ bɛkulo Nyamenle ɛzonlenlɛ kpalɛ la dua asɔneyɛlɛ ɛhye azo kile kɛ bɛfi bɛ ahonle nu bɛsonle Nyamenle.
2 Zɔhane edwɛkɛ ne mɔ le edwɛkɛ mɔɔ Mosisi hanle hilele Yizilayɛma mɔɔ ɛnee bɛyia Mowabe fienemgbole ne azo wɔ 1473 K.Y.M. kolaa na yeawu la bie. Ɛnee maanle ne ɛlɛkɔ ahɔpɛ azule Dwɔdan ne na bɛava Ɛwɔkɛ Azɛlɛ ne. (Mɛla 6:1) Ɛnee Mosisi mɔɔ lile bɛ ti ɛvolɛ 40 la kulo kɛ bɛfa akɛnrasesebɛ bɛdi ngyegyelɛ mɔɔ la bɛ nyunlu la anwo gyima. Ɛnee ɔwɔ kɛ bɛnyia Gyihova anu anwodozo na bɛdi nɔhalɛ bɛmaa ye. Mosisi edwɛkɛ mɔɔ li awieleɛ la banyia menli ne anwo zo tumi kpole. Mosisi hanle Mɛla Bulu ne nee mɛla gyɛne mɔɔ Gyihova ɛva ɛmaa maanle ne anwo edwɛkɛ wiele la yɛɛ ɔhanle edwɛkɛ mɔɔ wɔ Mɛla ne 6:4, 5 la a. (Kenga.)
3. Kpuya boni mɔ a yɛbazuzu nwo wɔ edwɛkɛ ɛhye anu a?
3 Asoo ɛnee Yizilayɛma mɔɔ wɔ Mosisi anwo ɛkɛ la ɛnze kɛ Gyihova bɛ Nyamenle ne le ‘Gyihova kokye ala’ ɔ? Ɛnee bɛze. Yizilayɛma mɔɔ di nɔhalɛ la zonlenle Nyamenle kokye ala—bɛ nlenyia Ebileham, Ayezeke nee Gyekɔbo Nyamenle ne. Saa zɔhane a ɔde a, ɛnee kɛmɔti a Mosisi hanle hilele bɛ kɛ Gyihova bɛ Nyamenle ne le ‘Gyihova kokye ala’ ɛ? Asoo Gyihova mɔɔ le kokye la kile kɛ ɔwɔ kɛ awie fa ye ahonle muala, ye ɛkɛla muala nee ye anwosesebɛ muala kulo ye kɛ mɔɔ bɛha ye wɔ ngyɛnu 5 ne anu la ɔ? Na kɛzi edwɛkɛ mɔɔ wɔ Mɛla ne 6:4, 5 la fale yɛ nwo ɛnɛ ɛ?
GYIHOVA LE KOKYE
4, 5. (a) Duzu a edwɛkɛ ‘Gyihova kokye ala’ kile a? (b) Kɛzi Gyihova le ngakyile fi maanle maanle ne mɔ awozonle ne mɔ anwo ɛ?
4 Ɔnlɛ Ye Ɛsaso. Wɔ Hibulu nee aneɛ ngakyile dɔɔnwo anu, edwɛkɛkpɔkɛ “kokye” ɛngile nɔma bie ala. Ɔkola ɔkile debie mɔɔ ɛnlɛ ye ɛsaso. Tɛ adalɛ ɛzonlenlɛ nsa-ko nyamenle ngilehilelɛ ne a ɛnee Mosisi ɛlɛbɔ agua a. Gyihova a bɔle anwuma nee aze a, ɔle aleɛabo Belemgbunli. Nyamenle bieko ɛnle ɛkɛ kɛ ɔdaye ala; yɛɛ biala nee ye ɛnzɛ. (2 Sa. 7:22) Ɛnee Mosisi ɛlɛkakye bɛ kɛ ɔwɔ kɛ bɛsonle Gyihova angomekye. Ɔnle kɛ bɛdi menli mɔɔ ɛbɔ bɛ ɛyia mɔɔ sonle awozonle ngakyile la anzi. Ɛnee bɛdie bɛdi kɛ awozonle ɛhye mɔ lɛ tumi wɔ abɔdeɛ bie mɔ azo. Ɛnee eza bɛbu bie mɔ noko kɛ bɛboka awozonle titili bie mɔ anwo.
5 Kɛ neazo la, ɛnee Yigyibitima sonle ewia bozonle Ra, anwomanyunlu bozonle raalɛ Nut, azɛlɛ bozonle Geb, azule Naele bozonle Hapi nee nane ngakyile dɔɔnwo. Gyihova luale Ngyegyelɛ Bulu ne azo hanle awozonle ɛhye mɔ bie senle dwɛɛ zɛhae. Ɛnee Keenama bu bɛ bozonle titili Beeyale kɛ ɔle awolɛ, anwomanyunlu, ezule nee ahumu nyamenle. Wɔ ɛleka ngakyile noko, ɛnee Beeyale a le bɛ nyamenle titili a. (Ɛdi. 25:3) Ɛnee ɔwɔ kɛ Yizilayɛma kakye kɛ bɛ Nyamenle ne, ‘nɔhalɛ Nyamenle’ ne, le ‘Gyihova kokye ala.’—Mɛla 4:35, 39.
6, 7. Eza edwɛkɛkpɔkɛ “kokye” abo kile duzu, na kɛzi Gyihova hilele kɛ ɔle “kokye” ɛ?
6 Ɔngakyi Yɛɛ Ɔdi Nɔhalɛ. Edwɛkɛkpɔkɛ “kokye” noko kile koyɛlɛ nee bodane ko mɔɔ bɛfa bɛyɛ gyima la. Gyihova Nyamenle ɛngakyihakyi. Emomu, ɔdi nɔhalɛ dahuu. Ɔbɔle Ebileham ɛwɔkɛ kɛ ɔ bo zo amra bava Ɛwɔkɛ Azɛlɛ ne, na Gyihova yɛle ninyɛne mgbole maanle zɔhane ɛwɔkɛ ne rale nu. Ɛvolɛ 430 mɔɔ guale nu la ammaa kpɔkɛ mɔɔ Gyihova bɔle la angakyi.—Mɔl. 12:1, 2, 7; Ade. 12:40, 41.
7 Ɛvoya dɔɔnwo anzi, mɔɔ ɛnee Gyihova ɛlɛmaa Yizilayɛma anwu kɛ bɛle ye alasevolɛ la, ɔzele bɛ kɛ: “Ɛye me a, nyamenle biala ɛnle ɛkɛ mɔɔ li me nyunlu, yɛɛ bie vi me nzi ɛnrɛra.” Amaa bɛanwu kɛ ɔtɛkakyile ye adwenle la, ɔdoale zolɛ kɛ: “Ɔvi ɛnɛ mɔɔ kɔ la medame a mele Nyamenle a anzɛɛ mengakyi ɛlɛ.” (Aye. 43:10, 13; 44:6; 48:12) Nea nwolɛ adenle kpole mɔɔ Yizilayɛma nyianle, na yɛdayɛ noko yɛnyia kɛ yɛle Gyihova, Nyamenle ne mɔɔ ɔngakyi na ɔdi nɔhalɛ wɔ ye ndenle kɔsɔɔti anu la azonvolɛ a!—Mal. 3:6; Gye. 1:17.
8, 9. (a) Duzu a Gyihova kpondɛ kɛ ye azonvolɛ yɛ a? (b) Kɛzi Gyisɛse zile Mosisi edwɛkɛ ne azo ɛ?
8 Mosisi hakyele menli ne kɛ Gyihova ɛngakyihakyi wɔ kɛzi ɔkulo bɛ na ɔnea bɛ la anu. Saa zɔhane a ɔde ɛdeɛ a, ɛnee ɔwɔ kɛ bɛdabɛ noko bɛsonle Gyihova angomekye, bɛfi bɛ ahonle muala, bɛ ɛkɛla muala nee bɛ anwosesebɛ muala anu bɛkulo ye. Kɛmɔ awovolɛ bava ninyɛne ɛhye mɔ ahilehile bɛ mra la ati, ɛnee ngakula ne mɔ noko bali neazo ɛhye anzi na bɛazonle Gyihova angomekye.—9 Kɛmɔ Gyihova ɛngakyihakyi la ati, ɛhye kile kɛ ɔkpondɛ kɛ ɛnɛ, nɔhalɛ azonvolɛ sonle ɔ ngomekye kɛ Yizilayɛma ne la. Saa Gyihova balie yɛ ɛzonlenlɛ ne ado nu a, ɔwɔ kɛ yɛdayɛ noko yɛfa yɛ ahonle muala, yɛ adwenle nee yɛ anwosesebɛ muala yɛsonle ɔ ngomekye. Zɔhane ala a Gyisɛse hanle hilele awie bie mɔɔ bizale ye edwɛkɛ bie la a. (Kenga Maake 12:28-31.) Akee bɛmaa yɛnlea kɛzi yɛbahola yɛava yɛ nyɛleɛ yɛahile kɛ amgba yɛte ɔ bo kɛ Gyihova yɛ Nyamenle ne le ‘Gyihova kokye la.’
SONLE GYIHOVA ANGOMEKYE
10, 11. (a) Adenle boni azo a yɛsonle Gyihova angomekye a? (b) Kɛzi Hibulu mgbavolɛ ne mɔ mɔɔ ɛnee bɛwɔ Babelɔn la lale ye ali kɛ bɛsonle Gyihova angomekye ɛ?
10 Saa Gyihova bayɛ yɛ Nyamenle kokye a, ɔwɔ kɛ yɛsonle ɔ ngomekye. Yɛnrɛhola yɛnrɛva ye ɛzonlenlɛ ne bie yɛnrɛmaa awozonle gyɛne anzɛɛ yɛnrɛmaa ɛzonlenlɛ nu adalɛ ninyɛne bie mɔ ɛnrɛgua nwolɛ evinli. Ɔwɔ kɛ yɛkakye kɛ tɛ kɛ Gyihova le ngakyile wɔ awozonle ne mɔ avinli ala; anzɛɛ ɔle kpole ɔtɛla bɛ ala. Emomu, Gyihova angomekye a ɔwɔ kɛ yɛsonle ye a.—Kenga Yekile 4:11.
11 Hibulu mgbavolɛ ɛhye mɔ, Daneɛle, Hananaya, Maehyeeyɛle, yɛɛ Azalaya anwo edwɛkɛ wɔ Daneɛle buluku ne anu. Tɛ aleɛ mɔɔ anwo ɛnde la angomekye a bɛanli mɔɔ bɛvale bɛhilele kɛ bɛsonle Gyihova angomekye a, emomu, Nɛbukadenɛza mɔɔ bɛanzonle ye ezukoa nvutuke ananze ne la noko. Mɔɔ gyi bɛ nye zo la lale ali bɔkɔɔ; ɛnee bɛnrɛhola bɛnrɛva debie gyɛne bɛnrɛzie Gyihova ɛzonlenlɛ agyakɛ anu.—Dan. 1:1–3:30.
12. Saa yɛbahola yɛazonle Gyihova angomekye a, duzu a ɔwɔ kɛ yɛnea boɛ wɔ nwolɛ a?
12 Saa yɛbazonle Gyihova angomekye a, ɔnle kɛ yɛmaa debie gyɛne biala fa Gyihova abo zo ne wɔ yɛ ɛbɛlabɔlɛ nu. Ninyɛne ɛhye mɔ bie a le boni mɔ? Gyihova maanle ɔlale ali wienyi wɔ Mɛla Bulu ne anu kɛ ɔnle kɛ bɛsonle nyamenle gyɛne biala bɛboka ɔ nwo yɛɛ bɛmmasonle ananze. (Mɛla 5:6-10) Ɛnɛ, awozonlezonlenlɛ kola gua ye ngakyile, bie mɔ wɔ ɛkɛ a ɔbayɛ se kɛ yɛbanwu bɛ. Noko mɔɔ Gyihova kpondɛ kɛ yɛyɛ la ɛtɛkakyile—ɔtɛde ‘Gyihova kokye.’ Bɛmaa yɛnlea kɛzi zɔhane edwɛkɛ ne bahola aboa yɛ la.
13. Duzu a yɛbahola yɛahulo ye kpole yɛadɛla Gyihova a?
13 Wɔ Kɔlɔsaema 3:5 (kenga), bɛdu Kilisienema folɛ wɔ ninyɛne mɔɔ ɔnrɛmaa bɛnrɛhola Gyihova angomekye sonle la anwo. Yɛ ye nzonlɛ kɛ bɛvale anyebolo bɛdole awozonlezonlenlɛ nwo. Ɛhye le zɔ ɔluakɛ ninyɛne mɔɔ awie kulo, mɔɔ bie a le anwonyia anzɛɛ asetɛnla kpalɛ la bahola anyia ye ɛbɛlabɔlɛ zo tumi kpole mɔɔ ɔkola ɔyɛ kɛ bozonle bie mɔɔ lɛ tumi la. Noko saa yɛnea ngyɛnu ne amuala a, ɔnrɛyɛ se kɛ yɛbanwu kɛ nyɛleɛ gyɛne mɔɔ bɛhanle nwolɛ edwɛkɛ la nee anyebolo yɛɛ awozonlezonlenlɛ bɔ abusua wɔ adenle bie azo. Saa yɛmaa yɛ ti akunlu ba ninyɛne ɛhye mɔ azo a, ɔnrɛyɛ se kɛ yɛbava yemɔ yɛazie Nyamenle anwo ɛlɔlɛ mɔɔ yɛlɛ la agyakɛ anu. Asoo yɛbamaa ninyɛne ɛhye mɔ bie anyia yɛ nwo zo tumi mɔɔ yɛmbu Gyihova kɛ ɔle ‘Gyihova kokye ala’ la ɔ? Kyɛkyɛ.
14. Kɔkɔ boni a ɛzoanvolɛ Dwɔn bɔle yɛ a?
14 Ɛzoanvolɛ Dwɔn maanle edwɛkɛ ko ne ala anu lale ɛkɛ kpalɛ wɔ mekɛ mɔɔ ɔhanle kɛ saa awie kulo ewiade ninyɛne ne mɔ—“nwonane nu atiakunluwɔzo, anyebolo, nee ɛbɛlabɔlɛ nu adubɛnwo” a—ɛnee ɔnlɛ “Selɛ ne anwo ɛhulolɛ” la. (1 Dwɔn 2:15, 16) Ɛhye kile kɛ ɔwɔ kɛ yɛta yɛneɛnlea yɛ nu saa ewiade ne anu anyelielɛ ninyɛne, agɔnwolɛvalɛ, adɛladeɛ ɛwulalɛ nee anwoziezielɛ ɛlɛnyia yɛ ahonle ne azo tumi a. Ewiade ne anwo ɛhulolɛ bahola ayɛ mɔdenle mɔɔ awie babɔ kɛ ɔdua nwomazukoalɛ zo yeanyia “ninyɛne mgbole” la. (Gyɛ. 45:4, 5) Kɛkala yɛgyi ewiade fofolɛ ne ɛweɛne zo. Ɛhye ati nea kɛzi ɔhyia kɛ yɛbamaa Mosisi edwɛkɛ ne adɛnla yɛ adwenle nu a! Saa yɛte ɔ bo kpalɛ na yɛdie yɛdi kɛ “[Gyihova] yɛ Nyamenle ne le [Gyihova] kokye ala” a, ɔbamaa yɛabɔ mɔdenle yɛazonle ɔ ngomekye wɔ adenle mɔɔ ɔdie ɔto nu la azo.—Hib. 12:28, 29.
BƐMAA KOYƐLƐ ƐDƐNLA ASAFO NE ANU
15. Duzu ati a Pɔɔlo hakyele Kilisienema kɛ Nyamenle le ‘Gyihova kokye ala’ ɛ?
15 Eza kɛmɔ Gyihova le kokye la ati, ɔwɔ kɛ ye azonvolɛ yɛ ko na bɛnyia bodane ko. Ɛnee Dwuuma, Gilikima, Wulomuma nee menli mɔɔ vi maanle ngakyile nu la a wɔ alimoa Kilisiene asafo ne anu a. Ɛnee asolo ɛzonlenlɛ mɔɔ biala vi nu, bɛ amaamuo nee kɛzi bɛte nganeɛ wɔ ninyɛne nwo la. Ɛhye ati ɛnee ɔyɛ se ɔmaa bie mɔ kɛ bɛbalie ɛzonlenlɛ fofolɛ ɛhye bɛado nu anzɛɛ bɛbahakyi bɛ ɛbɛlabɔlɛ dɛba ne. Ɛzoanvolɛ Pɔɔlo nwunle kɛ 1 Kɔlentema 8:5, 6.
ɔfɛta kɛ ɔkakye bɛ kɛ Kilisienema sonle Nyamenle kokye, Gyihova.—Kenga16, 17. (a) Ngapezo boni a ɛlɛba nu wɔ yɛ mekɛ ye azo a, na duzu a ɛvi nu ɛra a? (b) Duzu a bahola azɛkye yɛ koyɛlɛ ne a?
16 Na ɛnɛ noko ɛ? Ayezaya hanle dole ɛkɛ ne kɛ wɔ “mekɛ ne mɔɔ li awieleɛ la” anu, menli mɔɔ vi maanle kɔsɔɔti anu la badu twi ara Gyihova nɔhalɛ ɛzonlenlɛ nu. Bɛbaha kɛ: ‘Gyihova bahilehile yɛ ye ndenle ne mɔ, na yɛalua ye ndenle ne mɔ anu.’ (Aye. 2:2, 3) Nea kɛzi yɛ nye die kɛ yɛnwu kɛ zɔhane ngapezo ne ɛlɛba nu wɔ yɛ mekɛ zo a! Ɛhye ati menli mɔɔ vi ɛleka ngakyile ngakyile la a wɔ asafo dɔɔnwo anu a, na bɛlɛye Gyihova ayɛlɛ. Yemɔti ɔwɔ kɛ menli ngakyile ɛhye mɔ maa yɛsuzu edwɛkɛ bie mɔ anwo kpalɛ.
Ɛlɛboa wɔamaa koyɛlɛ ara asafo ne anu ɔ? (Nea ɛdendɛkpunli 16-19)
17 Kɛ neazo la, kɛzi ɛbu mediema mɔɔ asolo bɛ amaamuo la ɛ? Bie a bɛ aneɛ, bɛ adɛladeɛ ɛwulalɛ, kɛzi bɛyɛ bɛ nyɛleɛ nee bɛ aleɛ nee wɔ ɛdeɛ ne ɛnle ko. Asoo ɛtwe ɛ nwo ɛfi bɛ nwo na ɛ nee menli mɔɔ ɛ nee bɛ vi ɛleka ko la ala a tu ɔ? Na saa ɛtɛla menli mɔɔ bɛkpa bɛ kɛ neavolɛma wɔ wɔ asafo ne anu, maangyebakyi ne anu nee Bɛtɛle la kpanyinli, anzɛɛ asolo bɛ amaamuo nee bɛ nwonane a, duzu a ɛbayɛ a? Asoo ɛmaa ninyɛne ɛhye mɔ sɛkye koyɛlɛ mɔɔ wɔ Gyihova menli avinli nee bodane ko mɔɔ bɛlɛ la ɔ?
18, 19. (a) Folɛdulɛ boni a wɔ Ɛfɛsɛsema 4:1-3 a? (b) Duzu a yɛbahola yɛayɛ amaa koyɛlɛ adɛnla asafo ne anu a?
18 Duzu a baboa yɛ yeamaa yɛahoati subane ɛhye a? Pɔɔlo dule Kilisienema mɔɔ wɔ Ɛfɛsɛse, sua bie mɔɔ ɛnee bɛdi boɛ na menli ngakyile wɔ zo la folɛ kɛnlɛma bie. (Kenga Ɛfɛsɛsema 4:1-3.) Yɛ ye nzonlɛ kɛ Pɔɔlo limoale hanle subane le kɛ mɛlɛbɛnwoaze, bɛtɛɛyɛlɛ, abotane nee ɛlɔlɛ nwo edwɛkɛ. Ɛhye le kɛ mpila mɔɔ sosɔ sua la. Noko tɛ mpila angome a sua hyia a, ɔwɔ kɛ bɛta bɛsiezie sua ne, tɛ zɔhane a ɔbabɔ ɔ bo yeazɛkye. Pɔɔlo zɛlɛle Ɛfɛsɛse Kilisienema ne kɛ bɛbɔ mɔdenle “bɛmaa koyɛlɛ ne mɔɔ Sunsum ne ɛva ɛmaa bɛ la ɛwoa ɛkɛ ne dahuu.”
19 Ɔwɔ kɛ yɛ nuhua ko biala fa yɛ ye gyima kɛ ɔbamaa koyɛlɛ mɔɔ wɔ asafo ne anu la adɛnla ɛkɛ. Duzu a yɛbahola yɛayɛ a? Mɔɔ limoa, nyia subane mɔɔ Pɔɔlo hanle nwolɛ edwɛkɛ la—mɛlɛbɛnwoaze, bɛtɛɛyɛlɛ, abotane nee ɛlɔlɛ—na da bɛ ali. Akee bɔ mɔdenle kɛ ɛ nee awie mɔ ‘kɛdɛnla anzodwolɛ nu.’ Ɔwɔ kɛ yɛdi subane ɛtane biala mɔɔ bala ali la anwo gyima. Yɛyɛ zɔ a, yɛbaboa yɛamaa bɛaziezie anzodwolɛ nee koyɛlɛ mɔɔ wɔ yɛ avinli la.
20. Kɛ ɔkɛyɛ na yɛala ye ali kɛ yɛte ɔ bo kɛ ‘Gyihova yɛ Nyamenle ne le Gyihova kokye ala’ ɛ?
20 ‘Gyihova yɛ Nyamenle ne le Gyihova kokye ala.’ Tumi wɔ edwɛkɛ ɛhye anu! Edwɛkɛ zɔhane maanle Yizilayɛma nyianle anwosesebɛ gyinlanle ngyegyelɛ mɔɔ ɛnee bɛlɛba barayia wɔ mekɛ mɔɔ bɛlɛkɔ Ɛwɔkɛ Azɛlɛ ne azo la anloa. Saa yɛmaa edwɛkɛ zɔhane tɛnla yɛ ahonle nu a, ɔbamaa yɛ anwosesebɛ yeamaa yɛagyinla kpundii wɔ anwongyelelɛ kpole ne anu na yɛaboa yɛamaa anzodwolɛ nee koyɛlɛ ara wɔ Paladaese ne mɔɔ badoa zo la anu. Bɛmaa yɛva yɛ ɛkɛla muala yɛhulo Gyihova na yɛzonle ɔ ngomekye na eza yɛbɔ mɔdenle yɛmaa koyɛlɛ mɔɔ wɔ yɛ Kilisiene mediemayɛlɛ ne anu la ɛdɛnla ɛkɛ. Saa yɛkɔ zo yɛyɛ zɔ a, yɛbahola yɛava anwodozo yɛamaa yɛ nye ala kɛ yɛbanwu kɛ Gyisɛse edwɛkɛ mɔɔ fale menli mɔɔ ɔbabua bɛ ndɛne kɛ bɛle mboane ne la ɛlɛba nu. Ɔse: “Bɛmɛ mɔɔ Egya ɛyila bɛ a, bɛrɛla! Bɛ nee me ɛrali belemgbunli. Egya hyehyɛle manle bɛ kolaa na bɛabɔ ewiade ye.”—Mat. 25:34.