1, 2. Duzu ati a ɛnee ‘Nyamenle kulo’ Daneɛle kpole ɛ, na kɛ ɔkɛyɛ na yɛayɛ tieyɛ kɛ Daneɛle ɛ?

MƆƆ bɛvale Dwuuma bɛhɔle nlɔnu wɔ Babelɔn la, bɛnwunle kɛ ananze ɛyi sua ne azo yɛɛ sunsum evinli ɛva menli ɛyɛ bɛ ngɛkɛlɛ. Noko Dwuuma mɔɔ bɛdi nɔhalɛ mɔɔ le kɛ Daneɛle nee ɔ gɔnwo mɔ nsa ne kpole kɛ bɛbamaa Babelɔn ewiade ne anwo bɛ. (Dan. 1:6, 8, 12; 3:16-18) Daneɛle nee ɔ gɔnwo mɔ bɔle kpɔkɛ kɛ bɛbazonle Gyihova mɔɔ le bɛ Nwovolɛ la angomekye. Na bɛholale bɛyɛle ye zɔ! Asɛɛ Daneɛle vale ye ngoane mekɛ mɔɔ hale la kɔsɔɔti dɛnlanle Babelɔn; noko Nyamenle anwumabɔvolɛ ne hanle kɛ ‘Nyamenle kulo ye kpole.’​—Dan. 10:11, 19.

² Wɔ tete ne, bie a nwovolɛ ne bava ndɛtɛlɛ ne ayɛ deɛ ne mɔɔ ɔkpondɛ la. Ɛnɛ, nɔhalɛ azonvolɛ bu Gyihova kɛ ɔle Anwuma nee Aze Belemgbunli, ahenle mɔɔ lɛ tumi ɔkola ɔnwo menli nee maanle maanle la. (Kenga Gyɛlɛmaya 18:6.) Eza Nyamenle lɛ tumi nwo yɛ nuhua ko biala. Noko ɔze kɛ yɛlɛ adenle yɛkpa mɔɔ yɛkulo la, yemɔti ɔkpondɛ kɛ yɛfi yɛ ɛhulolɛ nu yɛbɛlɛ yɛ nwo aze yɛmaa ye. Bɛmaa yɛva yɛ adwenle yɛzie kɛzi yɛbahola yɛayɛ kɛ ndɛtɛlɛ mɔɔ le bɛtɛɛ wɔ Nyamenle asa anu la azo. Yɛbazuzu ninyɛne nsa ɛhye mɔ anwo: (1) Kɛ ɔkɛyɛ na yɛahoati subane mɔɔ bahola amaa yɛ nzo ayɛ se wɔ Gyihova folɛdulɛ nwo la ɛ? (2) Kɛ ɔkɛyɛ na yɛanyia subane mɔɔ baboa yɛ yeamaa yɛayɛ bɛtɛɛ na yɛabɛlɛ yɛ nwo aze la ɛ?  (3) Kɛ ɔkɛyɛ na awovolɛ mɔɔ bɛle Kilisienema la abɛlɛ bɛ nwo aze amaa Nyamenle wɔ mekɛ mɔɔ bɛlɛnwo bɛ mra la ɛ?

3. Subane boni mɔ a bahola amaa yɛ ahonle asolo a? Maa neazo.

³ Mrɛlɛbulɛ 4:23 ka kɛ, “Nea kɛ ɛsi ɛdwenle la boɛ, [anzɛɛ “bɔ wɔ ahonle nwo bane,” NW] ɔluakɛ nuhua yɛɛ wɔ ngoane vi ba a.” Ninyɛne mɔɔ bahola amaa yɛ ahonle asolo la boni mɔ a ɔwɔ kɛ yɛnea boɛ wɔ nwo a? Bie mɔ a le anwomemaazo, ɛtaneyɛlɛ mɔɔ bɛnlu bɛ nwo nee diedi mɔɔ yɛnlɛ la. Ninyɛne ɛhye mɔ kola maa yɛnyia anzosesebɛ nee atuadelɛ sunsum. (Dan. 5:1, 20; Hib. 3:13, 18, 19) Dwuda Belemgbunli Ɛzaya yɛle anwomemaazo. (Kenga 2 Edwɛkɛsisilɛ 26:3-5, 16-21.) Mɔlebɛbo ne, Ɛzaya bɔle “ɛbɛla kpalɛ ɔmanle ɔzɔle [Gyihova] anye” yɛɛ ɔvale ɔziele “ɔ nyunlu ɔzonlenle [Gyihova].” Noko ‘mɔɔ ye tumi ne wiele kpole yɛ la, ɔmemanle ɔ nwo zo,’ ɔnva nwo kɛ Gyihova a maanle ye anwosesebɛ la! Ɔbɔle mɔdenle bɔbɔ kɛ ɔkpu ɛyɛlɛ wɔ ɛzonlenlɛ sua ne anu​—gyima mɔɔ Aalɔn abusua ne anu ɛsɔfoma ala a ɔwɔ kɛ bɛyɛ la. Noko mɔɔ ɛsɔfoma ne hanle nwolɛ edwɛkɛ hilele ye la, Ɛzaya mɔɔ memaa ɔ nwo zo la vale ɛya! Boni a vile nuhua rale a? ‘Ɔzɛkyele’ ɔ nwo wɔ Nyamenle anyunlu na ɔkawu la ɛnee kokobɛ ɛgua ye.​—Mrɛ. 16:18.

4, 5. Saa yɛmaa anwomemaazo nyia yɛ nwo zo tumi a, duzu a bahola azi a? Maa neazo.

⁴ Saa yɛannea boɛ a, yɛdayɛ noko yɛbahola ‘yɛamemaa yɛ nwo zo’ na bie a yɛnrɛdie Ngɛlɛlera ne anu folɛdulɛ. (Wlo. 12:3; Mrɛ. 29:1) Suzu asafo nu kpanyinli bie mɔɔ bɛfɛlɛ ye Jim mɔɔ ɔ nee ɔ gɔnwo mɔ mgbanyima anyɛ adwenle wɔ asafo ne anu edwɛkɛ bie anwo la anwo. Jim hanle kɛ: “Menganle mengilele mediema ne mɔ kɛ bɛnlɛ ɛlɔlɛ na menvile ayia ne abo mengɔle.” Siane nsia anzi, ɔdule ɔhɔle asafo fofolɛ nu, noko bɛamkpa ye kɛ kpanyinli. Ɔhanle kɛ: “Me nwo bubule me. Me nwo tenlene mɔɔ menyɛle ye somasoma la amboa me yemɔti menvile asafo ne anu.” Jim dele hɔle too ɛvolɛ bulu. Ɔhanle kɛ: “Mendele nganeɛ kɛ bɛambu me na membɔle ɔ bo kɛ mebɔ Gyihova somolɛ wɔ mɔɔ hɔle zo la anwo. Mekɛ hɔle bie la, mediema rale me ɛkɛ na bɛbɔle mɔdenle kɛ bɛ nee me suzu edwɛkɛ nwo, noko meandie bɛ.”

⁵ Jim anwubielɛ ne maa yɛnwu kɛzi anwomemaazo kola maa yɛbua yɛ nwo benle na yɛyɛ menli mɔɔ bɛngola yɛ nwo a. (Gyɛ. 17:9) Jim se: “Ɛnee mengola menye me adwenle menvi kɛzi mesuzu kɛ awie mɔ gyɛne anyɛ ye boɛ la azo.” Asoo Kilisienenli bie anzɛɛ nwolɛ adenle bie mɔɔ ɛvi ɛ sa la ɛmaa wɔli nyane ɛlɛ ɔ? Saa ɔle zɔ a, duzu a ɛyɛle a? Asoo ɛmemaanle ɛ nwo zo? Anzɛɛ ɛ diema ne mɔɔ ɛ nee ye siezie bɛ avinli na wɔali nɔhalɛ wɔamaa Gyihova la a ɛnee hyia wɔ a?​—Kenga Edwɛndolɛ 119:165; Kɔlɔsaema 3:13.

6. Saa yɛyɛ ɛtane na yɛanlu yɛ nwo a, duzu a fi nu ba a?

⁶ Ɛtaneyɛlɛ mɔɔ bɛnlu bɛ nwo, bie a ɛtane mɔɔ bɛfea bɛ nwo bɛyɛ la, noko bahola amaa yeayɛ se kɛ awie badie Nyamenle folɛdulɛ. Ɛhye ɛnrɛmaa ɔnrɛyɛ se kɛ awie bahɔ zo ayɛ ɛtane. Adiema ko hanle kɛ ɛnee akee ye subane ɛtane ne ɛngyegye ye bieko. (Nol. 8:11) Adiema gyɛne mɔɔ ɛnee nlanwonvoninli ɛnleanlɛ ɛyɛ ye subane la hanle kɛ: “Akee mgbanyima ne mɔ anwo rayɛle me ahyi.” Ɛnee ye subane ne ɛlɛboda ye wɔ sunsum nu. Ngyikyingyikyi ye subane ne lale ali na bɛboale ye. Nɔhalɛ, yɛ muala yɛnli munli.  Noko saa yɛmaa awie mɔ anwo yɛ yɛ ahyi anzɛɛ yɛfa edwɛkɛ yɛyeye yɛ nyɛleɛ ɛtane ne mɔ anloa na yɛanzɛlɛ ɛtanefakyɛ nee moalɛ yɛanvi Nyamenle ɛkɛ a, bie a ɛnee yɛ ahonle ɛsolo.

7, 8. (a) Kɛzi tete Yizilayɛma maa yɛnwu kɛ saa awie ɛnlɛ diedi a ɔmaa ye ahonle solo ɛ? (b) Duzu a yɛsukoa yɛfi nu a?

⁷ Yizilayɛma mɔɔ Gyihova liele bɛ vile Yigyibiti la edwɛkɛ ne maa yɛnwu kɛzi diedi mɔɔ awie ɛnlɛ la kola maa ye ahonle solo la. Maanle zɔhane nwunle nwanwane ninyɛne mgbole mɔɔ Nyamenle yɛle maanle bɛ la! Noko mɔɔ bɛbikyele Ɛwɔkɛ Azɛlɛ ne la, bɛanla diedi ali. Kɛ anrɛɛ bɛbava bɛ nwo bɛado Gyihova anwo zo la, bɛ ahonle dule na bɛdendɛle bɛ nzo abo bɛtiale Mosisi. Bɛhanle bɔbɔ kɛ bɛsia bɛahɔ akɛlɛzonlenlɛ nu wɔ Yigyibiti! Ɛhye yɛle Gyihova nyane kpalɛ. Ɔhanle kɛ, “Fane nyɛ yɛɛ menli ɛhye mɔ kɛkpo me a?” (Ɛdi. 14:1-4, 11; Edw. 78:40, 41) Kɛmɔ bɛ ahonle solole na bɛanla diedi ali la ati, awolɛndoazo zɔhane amuala wule wɔ ɛsɛlɛ ne azo.

⁸ Kɛmɔ yɛlɛbikye ewiade fofolɛ ne la ati, yɛyia yɛ diedi ne anwo sɔnea ɛnɛ. Ɔwɔ kɛ yɛnea kɛzi yɛ diedi ne gyi ye kpundii la boɛ. Kɛ neazo la, bie a yɛbanleɛnlea adwenle mɔɔ yɛlɛ wɔ Gyisɛse edwɛkɛ mɔɔ wɔ Mateyu 6:33 anwo la anu. Biza ɛ nwo kɛ: ‘Asoo ninyɛne mɔɔ mefa medimoa wɔ me ɛbɛlabɔlɛ nu nee me kpɔkɛzilɛ kile kɛ medie Gyisɛse edwɛkɛ ne medi? Asoo mebatoto debiezukoalɛ nee daselɛlilɛ ɛhɔlɛ nu amaa meanyia ezukoa ɔ? Saa me gyima die me mekɛ dɔɔnwo a, duzu a mebayɛ a? Asoo mebamaa ewiade ne anwo me na bie a meavi nɔhalɛ ne anu ɔ?’

9. Duzu ati a ɔwɔ kɛ ‘yɛneɛnlea’ yɛ nu saa yɛtɛbɔ diedi ne anu a, na kɛ ɔkɛyɛ na yɛahola yɛayɛ zɔ ɛ?

⁹ Fa Kilisienenli bie mɔɔ ɔtwehwenle ɔ bo aze kɛ ɔbava Baebolo ngyinlazo mɔɔ fale agɔnwolɛvalɛ, awie mɔɔ bɛdu ye, anzɛɛ anyelielɛ ninyɛne nwo yeali gyima la noko kɛ neazo. Biza ɛ nwo kɛ: ‘Asoo zɔhane a medame noko meyɛ ɔ?’ Saa yɛnwu kɛ yɛlɛnyia anzosesebɛ subane ɛhye bie a, ɔwɔ kɛ yɛneɛnlea yɛ diedi ne anu ndɛndɛ! Baebolo ne se: “Bɛnleɛnlea bɛ ahonle nu, na bɛnlea kɛ bɛtɛdɛ bɛ diedi ne anu. Bɛzɔ bɛ nwo bɛnlea.” (2 Kɔl. 13:5) Ɔwɔ kɛ dahuu yɛfa Nyamenle Edwɛkɛ ne yɛneɛnlea yɛ nu kpalɛ.

10. Duzu a baboa yɛ yeamaa yɛayɛ bɛtɛɛ wɔ Gyihova asa nu a?

¹⁰ Nyamenle dua ye Edwɛkɛ, Kilisiene asafo ne nee daselɛlilɛ ɛhɔlɛ zo boa yɛ maa yɛyɛ kɛ ndɛtɛlɛ bɛtɛɛ la. Kɛ mɔɔ nzule maa ndɛtɛlɛ yɛ bɛtɛɛ la, zɔhane ala a Baebolo ne mɔɔ yɛbagenga ye dahuu na yɛadwenledwenle nwolɛ la baboa yɛ yeamaa yɛayɛ bɛtɛɛ wɔ Gyihova asa nu a. Gyihova hanle kɛ ɔwɔ kɛ Yizilayɛ arelemgbunli ne mɔ mumua ne kɛlɛ Nyamenle Mɛla ne bie na bɛkenga ye dahuu. (Mɛla 17:18, 19) Ɛzoanvolɛ ne mɔ nwunle kɛ saa bɛkenga Ngɛlɛlera ne na bɛdwenledwenle nwo a, ɔbaboa bɛ wɔ bɛ ɛzonlenlɛ gyima ne anu. Bɛhwenle adwenle bɛhɔle Hibulu Ngɛlɛlera ne azo fane dɔɔnwo wɔ bɛ ngɛlɛlera ne mɔ anu na bɛmaanle menli mɔɔ bɛka edwɛkɛ ne bɛkile bɛ la anwosesebɛ kɛ bɛdabɛ noko bɛyɛ zɔ. (Gyi. 17:11) Ɛnɛ, yɛdayɛ noko yɛnwu kɛzi ɔhyia kɛ yɛbagenga Baebolo ne dahuu na yɛadwenledwenle nwo la. (1 Tem. 4:15) Yɛyɛ zɔ a ɔbamaa yɛabɛlɛ yɛ nwo aze na yɛayɛ bɛtɛɛ wɔ Gyihova asa nu.

11, 12. Kɛzi Gyihova dua Kilisiene asafo ne azo nwo yɛ kɛ mɔɔ yɛ ngyianlɛ ne mɔ de la ɛ? Maa neazo.

¹¹ Gyihova kola dua Kilisiene asafo ne azo nwo yɛ kɛ mɔɔ yɛ ngyianlɛ ne mɔ de  la. Jim mɔɔ yɛlimoa yɛha ɔ nwo edwɛkɛ la bɔle ɔ bo kɛ ɔkakyi ye subane wɔ mekɛ mɔɔ asafo nu kpanyinli bie hilele ɔ nwo anyelielɛ la. Jim hanle kɛ, “Yeanga ye ɛlɛ kɛ nvonleɛ ne vi medame yɛɛ yeandea me ɛlɛ. Emomu ɔhanle edwɛkɛ kpalɛ na ɔlale ye ali nɔhalɛ nu kɛ ɔkulo kɛ ɔboa me.” Kɛyɛ siane nsa anzi, ɔdole ɔ sa ɔvɛlɛle Jim kɛ ɔrɛla debiezukoalɛ. Jim ka kɛ, “Mediema ne mɔ liele me kɛnlɛma, na ɛlɔlɛ ɛhye maanle menyɛle nzenzaleɛ. Menwunle kɛ tɛ kɛzi mete nganeɛ la a le edwɛkɛ ne a. Ɔlua mediema ne mɔ nee me ye mɔɔ gyinlanle kpundii wɔ sunsum nu la moalɛ zo, ngyikyingyikyi menyianle anwosesebɛ wɔ sunsum nu bieko. Eza edwɛkɛ ‘Jehovah Is Not to Blame’ nee ‘Serve Jehovah Loyally,’ mɔɔ wɔ November 15, 1992, The Watchtower ne anu la maanle me anwosesebɛ.”

¹² Nzinlii bɛkpale Jim kɛ asafo nu kpanyinli bieko. Ɔvi mekɛ zɔhane, yeboa mediema gyɛne yemaa bɛli sɔnea zɔhane mɔ bie azo konim na bɛgyinla kpundii wɔ sunsum nu. Ɔdwula ye kɛ: “Menzuzule kɛ me nee Gyihova lɛ agɔnwolɛvalɛ kyengye noko ɛnee ɔnle zɔ! Menlu me nwo kɛ anwomemaazo ammaa meannwu ninyɛne mɔɔ anwo hyia kpalɛ la na ɔmaanle menvale me adwenle amuala menziele awie mɔ nvonleɛ zo la.”​—1 Kɔl. 10:12.

13. Subane boni mɔ a daselɛlilɛ ɛhɔlɛ maa yɛnyia a, na kɛzi ɔboa ɛ?

¹³ Kɛzi daselɛlilɛ bahola anwo yɛ kpalɛ ɛ? Edwɛkpa ne ɛhanlɛ maa yɛbɛlɛ yɛ nwo aze na yɛso Nyamenle sunsum nu ma ne. (Gal. 5:22, 23) Dwenle subane ngɛnlɛma mɔɔ daselɛlilɛ ɛhɔlɛ ɛmaa wɔnyia la anwo. Mɔɔ tɛla biala la, kɛmɔ yɛda Kelaese subane ne bie ali la ati, ɔmaa yɛ  edwɛkɛ ne yɛ fɛ na ɛhye kola ka suamenle bie mɔ subane. Kɛ neazo la, mediema nwiɔ bie mɔɔ wɔ Australia la vile ɛbulɛ nu diele raalɛ bie mɔɔ dendɛle ɛtane hilele bɛ la. Noko nzinlii raalɛ ne nlunle ɔ nwo na ɔhɛlɛle ɔhɔle Bɛtɛle. Ye edwɛkɛ ne foa bie se: “Mesɛlɛ menli nwiɔ zɔhane mɔɔ lɛ abotane na bɛbɛlɛ bɛ nwo aze la kɛ, bɛva bɛhyɛ me kɛ membule me nwo tenlenenli somasoma la. Menyɛle koasea kɛ menvoanle menli nwiɔ zɔhane mɔɔ bɛlɛbɔ Nyamenle Edwɛkɛ ne nolo la.” Saa nolobɔlɛma ne vale ɛya ekyi bɔbɔ a, asoo anrɛɛ raalɛ ne bahɛlɛ kɛlata zɔhane? Kyɛkyɛ. Nea kɛzi daselɛlilɛ boa yɛdayɛ mumua ne nee awie mɔ a!

14. Saa awovolɛ bahola anwo bɛ mra ne mɔ kpalɛ a, duzu a ɔwɔ kɛ bɛyɛ a?

¹⁴ Ngakula dɔɔnwo anye bolo debiezukoalɛ, yɛɛ bɛbɛlɛ bɛ nwo aze. (Mat. 18:1-4) Awovolɛ mɔɔ bɛze nrɛlɛbɛ noko la bahola abɔ mɔdenle ava nɔhalɛ ne anwo nrɛlɛbɛ awula bɛ mra adwenle nee bɛ ahonle nu wɔ bɛ ngakula nu. (2 Tem. 3:14, 15) Noko saa ɛhye bayɛ boɛ a, ɔwɔ kɛ awovolɛ ne mɔ mumua ne dimoa maa edwɛkɛ ne tɛnla bɛ ahonle nu na bɛfa bɛbɔ bɛ ɛbɛla. Saa awovolɛ yɛ ɛhye a, ngakula ne mɔ bɛazukoa nɔhalɛ ne na bɛava bɛabɔ bɛ ɛbɛla. Eza bɛbanwu ndeanlɛ mɔɔ bɛ awovolɛ fa maa bɛ la kɛ ɔkile kɛ Gyihova kulo bɛ.

15, 16. Saa bɛtu awovolɛ bie ara a, kɛzi ɔwɔ kɛ bɛkile kɛ bɛlɛ Nyamenle anu diedi ɛ?

¹⁵ Ɔnva nwo mɔdenle mɔɔ awovolɛ bɔ tete bɛ mra wɔ Gyihova sua nu la, ɔyɛ a bie mɔ fi nɔhalɛ ne anu anzɛɛ bɛtu bɛ na bɛmaa abusua ne di nyane kpole. Adiema raalɛ bie mɔɔ wɔ South Africa la hanle kɛ, “Mɔɔ bɛdule me diema nrenyia ne la, ɛnee ɔle kɛ asɛɛ yewu la. Ɔdele yɛ ahonle kpole!” Duzu a ɔ nee ye awovolɛ yɛle a? Bɛlile adehilelɛ mɔɔ wɔ Baebolo ne anu la azo. (Kenga 1 Kɔlentema 5:11, 13.) Awovolɛ ne mɔ se: “Yɛzile kpɔkɛ kɛ yɛbali Baebolo ngyinlazo zo, ɔluakɛ saa yɛyɛ ninyɛne mɔɔ Nyamenle kpondɛ la a, debie kpalɛ bɛavi nu ara. Yɛnwunle ɛdulɛ ne kɛ ɔle Gyihova ndeanlɛ yɛɛ ɛnee yɛlɛ anwodozo kɛ ɛlɔlɛ ti a Gyihova tea awie a yɛɛ ɔndea ye ɔmmaa ɔmbo zo. Yemɔti yɛ nee yɛ ra ne anyɛ debie biala ambɔ nu kyesɛ abusua ne anu debie mɔɔ anwo hyia kpalɛ kpalɛ mɔɔ kɛ ɔde ye biala la ɔwɔ kɛ ɔboka nwo la.

¹⁶ Kɛzi ɔhanle bɛ ra ne ɛ? Ɔhanle kɛ: “Ɛnee meze kɛ me abusua ne ɛmkpɔ me, bɛlɛdi Gyihova nee ye ahyehyɛdeɛ ne adehilelɛ zo.” Eza ɔhanle kɛ: “Saa ɔba ye kɛ ɔwɔ kɛ ɛsɛlɛ Gyihova kɛ ɔboa wɔ na ɔva wɔ ɛtane ɔhyɛ wɔ a, ɔmaa ɛnwu kɛzi ɛhyia ɔ nwo la.” Mɔɔ bɛliele kpavolɛ ɛhye la nea kɛzi ye abusua ne anye liele a! Nɔhalɛ, saa yɛnwu Nyamenle wɔ yɛ ɛbɛlabɔlɛ muala anu a, ɔbamaa yeawie yɛ boɛ bɔkɔɔ.​—Mrɛ. 3:5, 6; 28:26.

17. Duzu ati a ɔwɔ kɛ yɛbɛlɛ yɛ nwo aze yɛmaa Gyihova dahuu a, na kɛzi ɛhye baboa yɛ ɛ?

¹⁷ Ayezaya hanle kɛ saa Dwuuma nlɔnu ɛhɔlɛ ne ɛlɛba awieleɛ a bɛbaha kɛ: “O [Gyihova], wɔmɔ a ɛle yɛ ze a; yɛmɛ, yɛle ndɛtɛlɛ, yɛɛ wɔmɔ a ɛle nwovolɛ ne a; yɛ muala yɛle ɛ sa anloa gyima.” Akee bɛbazɛlɛ kɛ: “Mmakakye yɛ amumuyɛ ne mɔ dahuu. Nea na dwenle nwolɛ, yɛ muala yɛle wɔ menli.” (Aye. 64:8, 9) Saa yɛdayɛ noko yɛbɛlɛ yɛ nwo aze yɛmaa Gyihova a, ɔbanwu yɛ kɛ yɛsonle bolɛ, kɛ mɔɔ ɔbule ngapezonli Daneɛle la. Eza Gyihova bahɔ zo alua ye Edwɛkɛ, sunsum nwuanzanwuanza ne nee ye ahyehyɛdeɛ ne azo anwo yɛ dahuu amaa yɛahola yɛagyinla ɔ nyunlu kenle bie kɛ “Nyamenle amra.”​—Wlo. 8:21.