Bɛgyi ɛkɛ ne bɛmaa anwuma ɛlɔnema mɔɔ bɛboka nwo a bɛzɛkyele Gyɛlusalɛm na eza bɛbazɛkye Seetan ɛtane ewiade ɛhye wɔ Amagɛdɔn la. Duzu ati a nrɛlɛbɛ wɔ ndelebɛbo fofolɛ ɛhye anu a?

Yizikeɛle nyianle ninyɛndane mɔɔ ɛnee Gyɛlusalɛmma mɔɔ ɛkpɔkye ɛlɛyɛ nee ninyɛne mɔɔ ɔbasisi kolaa na bɛazɛkye suakpole ne wɔ 607 K.Y.M. la anwo yekile. Ɔnwunle mrenyia nsia mɔɔ dedɛ konle ninyɛne. Eza ɔnwunle nrenyia bie mɔɔ “wula lenen tɛladeɛ” na “ngɛlata kodoku” (debie mɔɔ bɛgua ɛnke nu) zia ye foa ko la. (Yiz. 8:6-12; 9:2, 3) Bɛhanle bɛhilele nrenyia ne kɛ: “Kɔ . . . suakpole ne azo amuala na fa sɛkɛlɛneɛ to awie biala mɔɔ ɛlɛdi nyane wɔ munzule ɛbɛla mɔ bɛbɔ wɔ zolɛ la anwo la anwoma azo.” Akee bɛzele mrenyia ne mɔ mɔɔ dedɛ konle ninyɛne ne la kɛ bɛhu menli mɔɔ wɔ suakpole ne azo mɔɔ bɛanyɛ bɛ nzonlɛ la. (Yiz. 9:4-7) Duzu a yekile ɛhye maa yɛnwu ye a, na nwane a le nrenyia ne mɔɔ ɛnke ne zia ye foa ko la?

Bɛhanle ngapezo ɛhye wɔ 612 K.Y.M., na ɔlimoale ɔrale nu wɔ mekɛ mɔ Babelɔn sogyama ne zɛkyele Gyɛlusalɛm la​—ɛhye zile wɔ ɛvolɛ nnu anzi. Ɔwɔ nu kɛ Babelɔnma a zɛkyele Gyɛlusalɛm a, noko Gyihova a maanle bɛ adenle a. (Gyɛ. 25:9, 15-18) Ɔluale bɛ nwo zo ɔdeanle ye menli ne mɔɔ bɛkpɔkye la. Noko yeanva tenlenema yeamboka ɛtanevolɛma anwo yeanzɛkye bɛ. Gyihova vile ɛlɔlɛ nu yɛle nziezielɛ amaa yealie Dwuuma mɔɔ anye ɛnlie ninyɛndane mɔɔ bɛlɛyɛ wɔ suakpole ne azo anwo la ngoane.

Ɛnee Yizikeɛle ɛmboka nzonlɛyɛlɛ gyima ne anzɛɛ sua ne ɛzɛkyelɛ ne anwo. Anwumabɔvolɛma a banlea bɛamaa bɛazɛkye sua ne a. Yemɔti yekile ɛhye maa yɛnyia nwolɛ adenle yɛnwu mɔɔ zile anwuma la. Gyihova maanle ye anwumabɔvolɛma ne gyima kɛ bɛyɛ ngyehyɛleɛ mɔɔ bɛbava bɛazɛkye ɛtanevolɛma nee mɔɔ bɛbava bɛalie tenlenema ngoane la. *

Yɛhilele nu dɛba kɛ nrenyia ne mɔɔ ɛnke ne zia ye foa ko la gyi ɛkɛ ne maa menli mɔɔ bɛkpokpa bɛ la mɔhama ne. Yɛnyianle adwenle kɛ menli mɔɔ bɛtie yɛ edwɛkɛ ne la a bɛyɛ bɛ nzonlɛ kɛ bɛbanyia ngoane a. Noko yerala ali wienyi kɛ ɔwɔ kɛ yɛyɛ nzenzaleɛ wɔ ngilenu ɛhye anu. Kɛ mɔɔ Mateyu 25:31-33 kile la, Gyisɛse a bua menli ndɛne a. Ɔbabua ye ndɛne mɔɔ li awieleɛ la wɔ anwongyelelɛ kpole ne anu na yeakpa menli mɔɔ bɛle kɛ mboane mɔɔ bɛbanyia ngoane la yeavi mɔɔ bɛle kɛ mbɔnkye mɔɔ bɛbazɛkye bɛ la anu.

Ɔlua ndelebɛbo fofolɛ ɛhye mɔɔ yɛnyia la ati, duzu a yɛsukoa yɛfi Yizikeɛle yekile ne anu a? Ninyɛne kɛyɛ nnu:

1. Kolaa na bɛazɛkye Gyɛlusalɛm la, ɛnee Yizikeɛle nee Gyɛlɛmaya le sinzavolɛma kɛ mɔɔ ɛnee Ayezaya noko de la. Ɛnɛ, Gyihova ɛlɛdua ye azonvolɛ mɔɔ bɛkpokpa bɛ la anu ekpunli ekyi bie anwo zo amaa ye menli aleɛ na bɛabɔ awie mɔ kɔkɔ kolaa na anwongyelelɛ kpole ne ara. Yemɔti Kelaese azonvolɛ kɔsɔɔti ɛlɛbɔ menli kɔkɔ.​—Mat. 24:45-47.

2. Nyamenle azonvolɛ mɔɔ bɛwɔ ɛkɛ ɛnɛ la le kɛ Yizikeɛle la, tɛ bɛdabɛ a bɛlɛyɛ menli mɔɔ bɛbanyia ngoane la nzonlɛ a. Bɛ ɛdeɛ ne ala a le kɛ bɛbaha Gyihova edwɛkɛ ne mɔɔ anwumabɔvolɛma a kile ye adenle la.​—Yek. 14:6.

3.   Wɔ Yizikeɛle mekɛ zo la, bɛnva sɛkɛlɛneɛ kpalɛ bɛando awie biala anwoma zo. Zɔhane a ɔde ye ɛnɛ noko a. Duzu a ɔwɔ kɛ menli yɛ amaa bɛayɛ bɛ nzonlɛ wɔ sɛkɛlɛneɛ adenle zo kɛ bɛbanyia ngoane a? Ɔwɔ kɛ bɛdie edwɛkɛ ne mɔɔ bɛlɛbɔ ye nolo la bɛto nu, bɛwula Kilisiene su ne, bɛyila bɛ nwo zo bɛmaa Gyihova na bɛfa nɔhalɛlilɛ bɛboa Kelaese amediema ne mɔ. (Mat. 25:35-40) Menli mɔɔ yɛ ninyɛne ɛhye mɔ la bahola anyia ngoane wɔ anwongyelelɛ kpole ne mɔɔ ɛlɛba la anu.

4. Ɛnɛ, Gyisɛse Kelaese le kɛ nrenyia ne mɔɔ ɛnke ne zia ye foa ko la, ɔdaye a ɔlɛyɛ menli mɔɔ bɛbanyia ngoane la nzonlɛ a. Ekpunli kpole ne anu amra asa baha bɛ nzonlɛyɛlɛ ne wɔ mekɛ mɔɔ bɛbua bɛ ndɛne wɔ anwongyelelɛ kpole ne anu kɛ bɛle mboane la. Ɛhye bamaa bɛanyia ngoane wɔ azɛlɛ ye azo.​—Mat. 25:34, 46. *

5. Ɛnɛ, Gyisɛse Kelaese nee ye anwuma ɛlɔnema ne a le mrenyia nsia ne mɔɔ bɛlɛ konle ninyɛne ne la, na Gyisɛse a li bɛ ti a. ɔnrɛhyɛ, bɛbazɛkye maanle maanle ne mɔ na bɛaye ɛtanelilɛ kɔsɔɔti bɛavi ɛkɛ.​—Yiz. 9:2, 6, 7; Yek. 19:11-21.

Edwɛkɛ ɛhye mɔɔ yɛde ɔ bo la maa yɛnyia anwodozo kpole kɛ Gyihova ɛnzɛkye tenlenema ɛmboka ɛtanema anwo. (2 Pita 2:9; 3:9) Eza ɔmaa yɛnwu kɛzi edwɛkɛhanlɛ gyima ne hyia wɔ yɛ mekɛ ye anu la. Ɔwɔ kɛ awie biala te kɔkɔbɔlɛ ne kolaa na awieleɛ ne ara!​—Mat. 24:14.