1, 2. Ɔlua Gyisɛse edwɛkɛ mɔɔ wɔ Mateyu 24:14 la ati, kpuya boni a yɛbabiza a?

GYISƐSE hanle kɛ bɛbaha edwɛkpa ne bɛahile menli kɔsɔɔti wɔ awieleɛ mekɛ ne anu. (Mateyu 24:14) Kɛ Gyihova Alasevolɛ la, yɛ daselɛlilɛ gyima ne a bɛfa bɛnwu yɛ wɔ ewiade ɛleka biala a. Bie mɔ anye die yɛ edwɛkɛ ne anwo yɛɛ bie mɔ noko ɛngulo. Noko menli mɔɔ bɛngulo yɛ edwɛkɛ ne la bie mɔ bɔbɔ bu yɛ wɔ yɛ gyima ne anwo. Yɛse yɛdayɛ a yɛlɛyɛ gyima mɔɔ Gyisɛse hanle nwolɛ edwɛkɛ la. Asoo yɛkola yɛka ye zɔ? Kɛ ɔkɛyɛ na yɛanwu kɛ gyima mɔɔ Gyisɛse hanle nwolɛ edwɛkɛ la a yɛlɛyɛ la ɛ?

² Ɛzonlenlɛ dɔɔnwo se bɛlɛka Gyisɛse edwɛkɛ ne bie. Noko asɔne sua nu, TV anzɛɛ Yintanɛte zo ala a bɛka bɛ edwɛkɛ ne a, anzɛɛ kɛzi bɛzukoale Gyisɛse anwo debie la anwo edwɛkɛ sikalɛ a bɛka a. Bie mɔ te nganeɛ kɛ saa bɛboa menli mɔɔ bɛhyia anzɛɛ bɛyɛ gyima le kɛ dɔketa,  nɛɛse anzɛɛ kilehilevolɛ bɛboa awie mɔ a, ɛnee bɛlɛka edwɛkɛ ne bie. Noko asoo ɛhye mɔ a le edwɛkɛhanlɛ gyima ne mɔɔ Gyisɛse hanle nwolɛ edwɛkɛ la?

3. Kɛ mɔɔ Mateyu 28:19, 20 kile la, ninyɛne nna boni a ɔwɔ kɛ Gyisɛse ɛdoavolɛma yɛ a?

³ Asoo ɛnee Gyisɛse kpondɛ kɛ ye ɛdoavolɛma ne kendɛ maa awie mɔ ba bɛ ɛkɛ ɔ? Kyɛkyɛ! Wɔ ye ewudwazo ne anzi, ɔzele ye ɛdoavolɛma dɔɔnwo kɛ: “Yemɔti bɛhɔ maanle ti nee maanle bo, bɛmaa menli ɛrayɛ me ɛdoavolɛma; bɛzɔne bɛ . . .  na bɛhilehile bɛ bɛmaa bɛli debie biala mɔɔ meha mehile bɛ la azo.” (Mateyu 28:19, 20) Yemɔti kɛ Gyisɛse ɛdoavolɛma la, ɔwɔ kɛ yɛyɛ ninyɛne nna bie. Ɔwɔ kɛ yɛyɛ menli ɛdoavolɛma, yɛsɔne bɛ na yɛkilehile bɛ. Noko mɔɔ limoa la, ɔwɔ kɛ yɛkɔ menli ne ɛkɛ. Baebolo nwo abɔlɔba bie hanle kɛ: “Ɔle diedinli biala gyima kɛ ‘ɔbahɔ,’ kɛ ɔdua gua zo anzɛɛ ɔpɛ nyevile ne.”​—Mateyu 10:7; Luku 10:3.

4. Duzu a hyia na “bɛahye menli kɛ bɛkye fɛlɛ la” ɛ?

⁴ Duzu a ɛnee Gyisɛse anye la kɛ ye ɛdoavolɛma ne bayɛ a? Asoo ɛnee ɔkulo kɛ bɛdabɛ mumua ne bɛyɛ gyima ne anzɛɛ ɔkulo kɛ bɛhyehyɛ bɛ kɛ ekpunli? Kɛmɔ sonla ko ɛnrɛhola ɛnrɛha edwɛkɛ ne wɔ “maanle ti nee maanle bo” la ati, ɔwɔ kɛ bɛhyehyɛ ye ɛdoavolɛma ne. Mɔɔ ɛnee Gyisɛse ɛlɛkile wɔ mekɛ mɔɔ ɔhanle kɛ ‘bɛbahye menli kɛ bɛkye fɛlɛ la’ ɛne. (Kenga Mateyu 4:18-22.) Tɛ mɔɔ ɛnee Gyisɛse ɛlɛka la a le fɛlɛkyevolɛ ko mɔɔ ɔfa koba yeahye fɛlɛ la. Emomu ɛnee ɔlɛka avonle mɔɔ bɛfa bɛkye fɛlɛ la. Avonle ɛhwenlɛ hyia gyima ɛsesebɛ, ngyehyɛleɛ nee menli dɔɔnwo.​—Luku 5:1-11.

5. Kpuya nna boni mɔ a ɔwɔ kɛ yɛbua a, na duzu ati ɔ?

⁵ Amaa yɛanwu menli mɔɔ ɛlɛbɔ edwɛkpa ne nolo ɛnɛ la, ɔwɔ kɛ yɛbua kpuya nna ɛhye mɔ:

• Edwɛkɛ boni a ɔwɔ kɛ Gyisɛse ɛdoavolɛma ka a?

• Adwenle boni a ɔwɔ kɛ bɛfa bɛyɛ gyima ne a?

• Ndenle boni mɔ a ɔwɔ kɛ bɛdua zo bɛyɛ gyima ne a?

• Nienwu a ɔwɔ kɛ bɛyɛ gyima ne bɛkɔdwu a, na ɔwɔ kɛ bɛyɛ ye mekɛ tendenle nyɛ?

Mualɛ ne mɔ baboa yɛ yeamaa yɛanwu menli mɔɔ ɛlɛyɛ ngoanelielɛ gyima ɛhye la na yeaboa yɛ yeamaa yɛadoa zo yɛaha edwɛkɛ ne.​—1 Temɔte 4:16.

6. Duzu ati a ɛdie ɛdi kɛ Gyihova Alasevolɛ a ɛlɛbɔ edwɛkpa ne nolo a?

⁶ Kenga Luku 4:43. Gyisɛse bɔle “Edwɛkpa ne mɔɔ fane Nyamenle Belemgbunlililɛ  ne anwo la nolo,” na ɔkulo kɛ ye ɛdoavolɛma yɛ zɔhane ala. Menli ekpunli boni a ɛlɛbɔ zɔhane edwɛkɛ ne nolo a? Gyihova Alasevolɛ ala! Menli mɔɔ bɛngulo yɛ edwɛkɛ la bɔbɔ ɛnwu ye zɔ. Kɛ neazo la, tie edwɛkɛ bie mɔɔ ɛsɔfo bie mɔɔ ɛyɛ gyima wɔ maanle ngakyile zo la hanle hilele adiema bie la. Wɔ maanle biala anu, ɛsɔfo ne bizale Alasevolɛ ne mɔ kɛ, duzu edwɛkɛ a bɛlɛbɔ ye nolo a? Ɔhanle kɛ, “Bɛ muala bɛle ahoasea la ati mualɛ ko ne ala a bɛmaa a: ‘Nyamenle Belemgbunlililɛ ne anwo edwɛkpa ne.’” Ɛsɔfo ne maanle ɔlale ali kɛ yɛnle ahoasea, emomu yɛle nɔhalɛ Kilisienema mɔɔ koyɛlɛ wɔ yɛ nu. (1 Kɔlentema 1:10) Ɛzinzalɛ Arane Ɔbɔ Gyihova Belemgbunlililɛ Nolo ne edwɛkɛtitili a le Nyamenle Belemgbunlililɛ ne. Bɛyɛ magazine ɛhye wɔ aneɛ 254 anu, bɛpelente ko biala asɛɛ 59,000,000 yɛɛ bɛkyɛ ye dɔɔnwo bɛtɛla magazine biala wɔ ewiade!

7. Kɛzi yɛkola yɛnwu kɛ tɛ edwɛkpa ne a ɛsɔfo ne mɔ ɛlɛbɔ ye nolo ɛ?

⁷ Ɛsɔfoma ɛmbɔ Nyamenle Belemgbunlililɛ ne nolo. Bɛ nuhua dɔɔnwo ka kɛ Belemgbunlililɛ ne le debie mɔɔ wɔ awie ahonle nu. (Luku 17:21) Bɛmmaa menli ɛnnwu kɛ ɔle anwuma arane mɔɔ wɔ ɛkɛ mɔɔ Gyisɛse a nea zo a. Emomu bɛta bɛka Gyisɛse anwo edwɛkɛ wɔ Bolonyia anzɛɛ Easter nu. Bɛngile menli kɛ Belemgbunlililɛ ne bali alesama ngyegyelɛ kɔsɔɔti anwo gyima na ɔnrɛhyɛ ɔbaye ɛtanelilɛ kɔsɔɔti yeavi azɛlɛ ye azo. (Yekile 19:11-21) Ɔda ali wienyi kɛ ɛsɔfo ne mɔ ɛnze mɔɔ Gyisɛse bayɛ kɛ Belemgbunlililɛ ne azo Belemgbunli la. Na kɛmɔ bɛnde Gyisɛse edwɛkɛ ne abo la ati, bɛnnwu deɛmɔti ɔwɔ kɛ bɛbɔ ye nolo a.

8. Adwenle mɔɔ ɛndenrɛ la boni a ɔnle kɛ yɛfa yɛyɛ edwɛkɛhanlɛ gyima ne a?

⁸ Ɔnle kɛ Gyisɛse ɛdoavolɛma fa edwɛkɛhanlɛ gyima ne kpondɛ ezukoa anzɛɛ sisi azua mgbole. Gyisɛse hanle kɛ: ‘Bɛnyia tumi ɛhye mgbane, yemɔti bɛva bɛmaa mgbane.’ (Mateyu 10:8) Yemɔti ɔnle kɛ yɛfa yɛsi kongo. (2 Kɔlentema 2:17) Ɔnle kɛ Gyisɛse ɛdoavolɛma ka kɛ bɛdua bɛ kakɛ wɔ bɛ edwɛkɛhanlɛ gyima ne anwo. (Kenga Gyima ne 20:33-35.) Gyisɛse adehilelɛ ne anu la ɛkɛ ɛdeɛ, noko ezukoa mɔɔ bɛdielie amaa bɛ asɔne ne mɔ angu na bɛava bie bɛadua bɛ ɛsɔfo ne mɔ nee awie mɔ gyɛne kakɛ la a hyia bɛ a. Ɛhye ati, ɛsɔfoma dɔɔnwo ɛnyia bɛ nwo.​—Yekile 17:4, 5.

9. Kɛzi Gyihova Alasevolɛ ɛla ye ali kɛ adwenle kpalɛ a bɛfa bɛyɛ edwɛkɛhanlɛ gyima ne ɛ?

⁹ Asoo Gyihova Alasevolɛ to collection? Kyɛkyɛ! Bɛfi bɛ ɛhulolɛ nu a bɛye ndoboa bɛboa bɛ gyima ne a. (2 Kɔlentema 9:7) Ɛkenle ɛvolɛ ne, bɛvale dɔnehwele kɛyɛ mgbe mgbe nwiɔ bɛbɔle  edwɛkpa ne nolo, na bɛyɛle Baebolo ɛzukoalɛ mɔɔ bo mgbe ngɔnla siane biala. Bɛndua bɛ kakɛ, noko bɛ nye die kɛ bɛbava bɛ kodoku nu ezukoa bɛayɛ gyima ɛhye. Abɔlɔba bie hanle kɛ: “Bɛ bodane titili a le edwɛkɛhanlɛ nee ngilehilelɛ gyima ne.” Eza ɔhanle kɛ Gyihova Alasevolɛ ɛnlɛ ɛsɔfoma mɔɔ bɛtua bɛ kakɛ a. Yemɔti saa tɛ ezukoa ti a yɛka edwɛkɛ ne a, ɛnee duzu ati ɔ? Kɛmɔ yɛkulo Gyihova nee menli la ati ɔ. Ɛhye maa ngapezo mɔɔ wɔ Edwɛndolɛ 110:3 la ba nu. (Kenga.)

10. Ndenle boni mɔ a Gyisɛse nee ye ɛdoavolɛma ne luale zo hanle edwɛkɛ ne a?

¹⁰ Ndenle boni mɔ a Gyisɛse nee ye ɛdoavolɛma ne luale zo hanle edwɛkɛ ne a? Bɛhɔle ɛleka biala mɔɔ menli wɔ la. Kɛ neazo la, bɛhɔle awɔdenle ne mɔ azo nee gua nu. Eza bɛhɔle menli azua nu. (Mateyu 10:11; Luku 8:1; Gyima ne 5:42; 20:20) Azua nu daselɛlilɛ ne maanle bɛhanle edwɛkɛ ne bɛhilele menli ngakyile.

11, 12. Saa ɛfa Kilisienemaanle ne edwɛkɛhanlɛ gyima ne ɛtoto Gyihova menli nwo a, kɛzi ɔde ɛ?

¹¹ Asoo asɔne asɔne ne mɔ bɔ edwɛkpa ne nolo kɛ mɔɔ Gyisɛse yɛle la ɔ? Ɛsɔfoma mɔɔ bɛtua bɛ kakɛ la tendɛ kile bɛ asɔne ne anu amra ala. Bɛmkpondɛ menli fofolɛ, emomu bɛbɔ mɔdenle kɛ bɛbamaa menli mɔɔ wɔ asɔne ne anu dɛba la aha nu. Ɔyɛ a bɛka kɛ bɛ asɔnema ɛhɔha edwɛkɛ ne.  Kɛ neazo la, wɔ ɛvolɛ 2001 ne anu, Pope John Paul II hanle wɔ kɛlata bie anu kɛ, ɔwɔ kɛ asɔnema ne kɔbɔ Edwɛkpa ne nolo kɛ Pɔɔlo mɔɔ hanle kɛ, “Saa meambɔ Edwɛkpa ne nolo a, me gyakɔ” la. Akee pope ne hanle kɛ tɛ menli ekyi bie mɔɔ bɛtete bɛ la ala a ɔwɔ kɛ bɛka edwɛkɛ ne a, emomu asɔnema amuala. Noko menli ekyi bie a lile ye edwɛkɛ ne azo a.

¹² Na Gyihova Alasevolɛ noko ɛ? Bɛdabɛ ala a bɛbɔ ye nolo kɛ Gyisɛse ɛlɛdi Belemgbunli ɔvi 1914 a. Bɛtie Gyisɛse na bɛfa edwɛkɛhanlɛ gyima ne bɛdimoa bɛ ɛbɛlabɔlɛ nu. (Maake 13:10) Pillars of Faith​—American Congregations and Their Partners buluku ne hanle kɛ, edwɛkɛhanlɛ gyima ne a hyia Gyihova Alasevolɛ kpalɛ a. Eza ɔhanle kɛ saa bɛnwu menli mɔɔ ɛhɔne ɛlɛku bɛ, bɛ nwo ɛyɛ bɛ koonwu, anzɛɛ bɛnde kpɔkɛ la a, bɛbɔ mɔdenle bɛboa bɛ, noko bɛ rɛle ɛnvi kɛ bɛ bodane a le kɛ bɛbɔ ewiade ɛhye awieleɛ ne anwo nolo na bɛahilehile menli ngoanelielɛ nwo debie. Gyihova Alasevolɛ kɔ zo bɔ edwɛkɛ zɔhane nolo na bɛsukoa ndenle mɔɔ Gyisɛse nee ye ɛdoavolɛma ne luale zo yɛle edwɛkɛhanlɛ gyima ne la.

13. Nienwu a ɔwɔ kɛ yɛka edwɛkpa ne yɛkɔdwu a?

¹³ Gyisɛse hanle kɛ ye ɛdoavolɛma baha edwɛkɛ ne na bɛahilehile awie mɔ “wɔ aleɛabo amuala.” Ɔhanle kɛ bɛhɔ “maanle ti nee maanle bo” bɛmaa menli ɛrayɛ ye ɛdoavolɛma. (Mateyu 24:14; 28:19, 20) Ɛhye kile kɛ ɔwɔ kɛ bɛka edwɛkpa ne wɔ ewiade amuala.

14, 15. Duzu a kile kɛ Gyihova Alasevolɛ a ɛlɛmaa Gyisɛse ngapezo mɔɔ fane ɛleka mɔɔ bɛbayɛ gyima ne bɛadwu anwo la ara nu a? (Nea mɔlebɛbo nvoninli ne.)

¹⁴ Gyihova Alasevolɛ angomekye a ɛmaa Gyisɛse edwɛkɛ ne mɔɔ se bɛbabɔ edwɛkpa ne nolo wɔ ewiade amuala la ɛra nu a? Duzu a ati yɛka ye zɔ a? Bɛlɛ ɛsɔfoma kɛyɛ 600,000 wɔ United States, noko Gyihova Alasevolɛ le kɛyɛ 1,200,000. Kateleke ɛsɔfoma kɛyɛ 400,000 a wɔ ewiade amuala a, noko Gyihova Alasevolɛ mɔɔ bo mgbe 8 la ɛlɛka edwɛkpa ne wɔ maanle 240 azo. Ɔda ali kɛ Gyihova Alasevolɛ ɛlɛbɔ edwɛkpa ne nolo wɔ ewiade amuala, na ɛhye maa enililɛ nee ayɛlɛyelɛ ka Gyihova!​—Edwɛndolɛ 34:1; 51:15.

¹⁵ Kɛ Gyihova Alasevolɛ la, yɛ bodane a le kɛ yɛbɔ edwɛkpa ne nolo yɛahile menli dodo biala mɔɔ yɛbahola la kolaa na awieleɛ ne ara. Amaa yɛahola yɛayɛ gyima ɛhye la, yɛyɛ mbuluku dɔɔnwo yɛɛ yɛhile magazine, trate, nyianu nee Ngakyelɛlilɛ ɛsalɛdolɛ ne mɔ abo yɛhɔ aneɛ mɔɔ bo 700 la anu. Yɛfa yɛmaa mgbane. Ɛkenle ɛvolɛ ne angomekye, yɛyɛle Baebolo nwo mbuluku kɛyɛ mgbe mgbe nna mgbe ɛya nnu. Eza yɛyɛ New World Translation of the Holy Scriptures mɔɔ bo mgbe 200 la wɔ aneɛ mɔɔ bo 130 la anu. Bɛyɛ yɛ wɛbsaete ne azo ninyɛne ne wɔ aneɛ mɔɔ bo 750 la anu. Gyihova Alasevolɛ angomekye a ɛlɛyɛ gyima kpole ɛhye a.

16. Kɛzi yɛkola yɛnwu kɛ Nyamenle sunsum ne ɛlɛboa Gyihova Alasevolɛ ɛ?

 ¹⁶ Mekɛ tendenle nyɛ a bɛfa bɛaha edwɛkpa ne a? Gyisɛse hanle kɛ bɛbabɔ edwɛkpa ne nolo bɛahɔdwu ewiade ne awieleɛ. Yemɔti kɛmɔ Gyihova sunsum nwuanzanwuanza ne boka yɛ nwo la ati, yɛlɛka edwɛkɛ ne wɔ awieleɛ mekɛ ɛhye anu. (Gyima ne 1:8; 1 Pita 4:14) Bie a ɛzonlenlɛ nu amra bie mɔ baha kɛ, “Sunsum nwuanzanwuanza ne wɔ yɛ nwo zo.” Noko asoo bɛkola bɛyɛ gyima mɔɔ Gyihova Alasevolɛ ɛlɛyɛ wɔ awieleɛ mekɛ ɛhye anu la bie? Bie mɔ ɛbɔ mɔdenle kɛ bɛka edwɛkɛ ne kɛ yɛdayɛ la, noko bɛangola. Bie mɔ noko ɛha bie wɔ mekɛ ezinra bie ala anu. Bie mɔ noko kɔ azua nu kɔka edwɛkɛ ne, noko tɛ Belemgbunlililɛ ne anwo edwɛkpa ɔ. Yemɔti bɛnrɛhola gyima mɔɔ Gyisɛse bɔle ɔ bo la yɛ.

17, 18. (a) Duzu ati a yɛdie yɛdi bɔkɔɔ kɛ Gyihova Alasevolɛ a ɛlɛbɔ Belemgbunlililɛ ne anwo edwɛkpa ne nolo ɛnɛ ɛ? (b) Duzu a maa yɛkola yɛka edwɛkɛ ne dahuu a?

¹⁷ Yemɔti nwane mɔ a ɛlɛka Belemgbunlililɛ ne anwo edwɛkpa ne ɛnɛ a? Gyihova Alasevolɛ angomekye! Kɛzi yɛnwu ɛhye ɛ? Ɔluakɛ edwɛkɛ kpalɛ ne a yɛlɛka a, Belemgbunlililɛ ne anwo edwɛkpa ne. Yɛlɛkpondɛ menli wɔ yɛ ɛzonlenlɛ gyima ne anu yemɔti yɛlɛdua adenle kpalɛ ne azo. Yɛfa adwenle kpalɛ a yɛka edwɛkɛ ne a, yemɔ a le kɛ yɛkulo Gyihova nee menli. Yɛ edwɛkɛhanlɛ gyima ne ɛdɛlɛ ɛleka biala ɔluakɛ yɛka yɛkile menli mɔɔ wɔ maanle nee aneɛ ngakyile kɔsɔɔti anu la. Yɛbahɔ zo yɛaha Belemgbunlililɛ ne anwo edwɛkpa ne kɔkpula kɛ awieleɛ ne bara la!

¹⁸ Gyima mɔɔ Gyihova menli ɛlɛyɛ aha edwɛkpa ne wɔ awieleɛ mekɛ ye anu la yɛ nwanwane. Noko kɛzi yɛkola yɛyɛ gyima ɛhye ɛ? Ɛzoanvolɛ Pɔɔlo hilehilele nuhua kɛ: “Nyamenle ɛlɛdi gyima wɔ bɛ nu dahuu, amaa bɛanyia ɛhulolɛ na bɛahola bɛayɛ mɔɔ ɔkpondɛ la.” (Felepaema 2:13) Yɛlɛsɛlɛ kɛ Gyihova ɛmaa yɛ anwosesebɛ mɔɔ yɛhyia la dahuu amaa yɛahola yɛayɛ yɛ afoa nu ɛdeɛ yɛaha edwɛkpa ne!​—2 Temɔte 4:5.