1, 2. Ngyegyelɛ mɔɔ alesama yia la boni a bɛha nwolɛ edwɛkɛ wɔ Mɔlebɛbo buluku ne anu a, na duzu ati a ɛhye baboa yɛ ɛ?

ASOO wɔzuzu akɛsakɛsa mɔɔ dɔle menli bie mɔ avinli mɔɔ bɛha nwolɛ edwɛkɛ wɔ Baebolo ne anu la anwo ɛlɛ? Wɔ Mɔlebɛbo adile ne mɔɔ limoa la ala anu, yɛnwunle kɛ Keen hunle ɔ diema Ebɛle (Mɔlebɛbo 4:3-8); Leemɛke hunle kpavolɛ bie mɔɔ bodale ye la (Mɔlebɛbo 4:23); Kpolera dɔle Ebileham nee Lɔɔto mboaneneavolɛ ne mɔ avinli (Mɔlebɛbo 13:5-7); Heega dele nganeɛ kɛ ɔsonle bolɛ ɔtɛla Sɛla, yɛɛ Sɛla vale Ebileham anwo ɛya (Mɔlebɛbo 16:3-6); Ɛnee Yehyemeeyɛle kyi awie biala, yɛɛ awie biala kyi ye.​—Mɔlebɛbo 16:12.

² Duzu ati a bɛha edwɛkɛ ɛhye mɔ wɔ Baebolo ne anu a? Ɔluakɛ yɛbahola yɛazukoa debie yɛavi mɔɔ dole menli ɛhye mɔ mɔɔ bɛnli munli la anu. Yɛdayɛ noko yɛnli munli, yemɔti saa yɛlɛ ngyegyelɛ ko ne ala bie wɔ yɛ ɛbɛlabɔlɛ nu a, yɛbahola yɛazukoa Baebolo ne anu neazo kpalɛ ne mɔ na yɛahoati ɛtane ne. (Wulomuma 15:4) Ɛhye bamaa yɛanwu kɛzi yɛ nee awie mɔ badɛnla anzodwolɛ nu la.

3. Duzu a edwɛkɛ ɛhye bahilehile nu a?

 ³ Yɛbanwu deɛmɔti ɔwɔ kɛ yɛsiezie yɛ avinli nee kɛzi yɛbayɛ ye la wɔ edwɛkɛ ɛhye anu. Eza yɛbanwu Baebolo nu ngyinlazo mɔɔ baboa yɛ yeamaa yɛaziezie edwɛkɛ na yɛ nee Gyihova nee awie mɔ anyia agɔnwolɛvalɛ kpalɛ la.

4. Subane boni a ɛbu ewiade a, na boni a ɛvi nuhua ɛra a?

⁴ Seetan a ɛmaa menli nu ɛkpakyekpakye na bɛ nloa ɛnzɛ bɛ nwo a. Duzu ati a yɛka ye zɔ a? Seetan hanle ye wɔ Yidɛn tola ne anu kɛ ɔwɔ kɛ awie biala suhu Nyamenle sie ahane na ɔsi ɔ ti anwo kpɔkɛ. (Mɔlebɛbo 3:1-5) Noko saa yɛnea ewiade ne anu ɛnɛ a, yɛkola yɛnwu kɛ ngyegyelɛ ala a subane ɛhye fa ba a. Menli dɔɔnwo te nganeɛ kɛ bɛlɛ adenle bɛsi bɛ ti anwo kpɔkɛ wɔ mɔɔ le kpalɛ nee ɛtane la anwo. Bɛlɛ anwomemaazo, angomedi yɛɛ ɛzulɛ subane, na saa bɛ kpɔkɛzilɛ bagyegye awie mɔ bɔbɔ a, ɔnvale bɛ nwo. Subane zɛhae mɔ fa akɛsakɛsa a ba a. Baebolo ne kakye yɛ kɛ saa yɛfa ɛya ndɛndɛ a, yɛbada yɛ nee awie mɔ anyia edwɛkɛ na yɛayɛ ɛtane dɔɔnwo.​—Mrɛlɛbulɛ 29:22.

5. Duzu a Gyisɛse hilehilele menli kɛ bɛyɛ wɔ akɛsakɛsa nwo a?

⁵ Gyisɛse hilehilele ye ɛdoavolɛma ne wɔ ye Boka Zo Ɛdendɛlɛ ne anu kɛ bɛ nee awie mɔ ɛdɛnla anzodwolɛ nu na bɛhoati akɛsakɛsa, saa yɛyɛ ye zɔ a ɔbagyegye yɛ bɔbɔ a. Kɛ neazo la, ɔzele bɛ kɛ bɛyɛ nyele, bɛ nee awie mɔ ɛdɛnla anzodwolɛ nu, bɛye ɛya bɛvi bɛ nu, bɛziezie edwɛkɛ ndɛndɛ na bɛhulo bɛ agbɔvolɛ.​—Mateyu 5:5, 9, 22, 25, 44.

6, 7. (a) Duzu ati a ɔhyia kɛ yɛbaziezie edwɛkɛ bie ndɛndɛ ɛ? (b) Kpuya boni mɔ a ɔwɔ kɛ Gyihova menli kɔsɔɔti biza bɛ nwo a?

⁶ Ɛnɛ, yɛsonle Gyihova wɔ mekɛ mɔɔ yɛbayɛ asɔne, yɛaha edwɛkpa ne na yɛahɔ debiezukoalɛ la. Saa yɛ nee yɛ mediema andɛnla anzodwolɛ nu a, Gyihova ɛnrɛlie yɛ ɛzonlenlɛ ne ɛnrɛdo nu. (Maake 11:25) Saa yɛbayɛ Gyihova agɔnwo mɔ a, ɔwɔ kɛ awie mɔ fo yɛ a yɛfa yɛkyɛ bɛ.​—Kenga Luku 11:4; Ɛfɛsɛsema 4:32.

⁷ Gyihova anye la kɛ ye azonvolɛ kɔsɔɔti bava awie mɔ ɛtane ahyɛ bɛ na bɛ nee bɛ adɛnla anzodwolɛ nu. Yɛbahola yɛabiza yɛ nwo kɛ: ‘Asoo mefa me mediema ɛtane mekyɛ bɛ ndɛndɛ ɔ? Me nye die nwo kɛ me nee bɛ badɛnla ɔ?’ Saa ɛnwu kɛ ɔwɔ kɛ ɛbɔ mɔdenle ɛfa awie mɔ ɛtane ɛkyɛ bɛ a, sɛlɛ Gyihova kɛ ɔboa wɔ. Yɛ anwuma Selɛ Gyihova badie asɔneyɛlɛ zɛhae na yeabua.​—1 Dwɔn 5:14, 15.

8, 9. Saa awie fo yɛ a, duzu a ɔwɔ kɛ yɛyɛ a?

⁸ Yɛ muala yɛnli munli, yemɔti yɛbahola yɛamaa yɛ nye ala kɛ awie mɔ baha anzɛɛ bayɛ ninyɛne mɔɔ bagyegye yɛ a. (Nolobɔvo ne 7:20; Mateyu 18:7) Kɛzi ɛbayɛ wɔ nyɛleɛ ɛ? Yɛbahola yɛazukoa debie yɛavi anwubielɛ mɔɔ doa zo la anu: Adiema raalɛ bie bizale mediema mrenyia nwiɔ ahye wɔ ayia bie abo. Noko kɛzi ɔbizale bɛ ahye la gyegyele mediema  mrenyia ne mɔ ko. Mɔɔ ɔhale mediema mrenyia nwiɔ ne ala la, mɔɔ edwɛkɛ ne gyegyele ye la bɔle ɔ bo kɛ ɔtendɛ yeatia adiema raalɛ ne. Noko adiema nrenyia ɛhendeɛ ne hanle kɛ adiema raalɛ ne ɛva ɛvolɛ 40 ɛzonle Gyihova nɔhalɛ nu ɔnva nwo ngyegyelɛ dɔɔnwo mɔɔ ɔyiale la. Ɔdie ɔdi kɛ tɛ adiema raalɛ ne adwenle a le kɛ ɔyɛ debie yeamaa yeagyegye ye. Kɛzi adiema nrenyia ne mɔɔ limoa la yɛle ye ninyɛne ɛ? Ɔhanle kɛ, “Mɔɔ wɔha la le nɔhalɛ.” Akee ɔyele ye adwenle ɔvile mɔɔ zile la azo.

⁹ Duzu a anwubielɛ ɛhye maa yɛnwu ye a? Saa awie fo yɛ a, mɔɔ yɛbayɛ la gyi yɛ nwo zo. Sonla mɔɔ lɛ ɛlɔlɛ la fa ɛtane kyɛ. (Kenga Mrɛlɛbulɛ 10:12; 1 Pita 4:8.) Saa ‘yɛbu yɛ nye yɛgua nvonleɛ zo’ a, Gyihova anye die nwo. (Mrɛlɛbulɛ 19:11; Nolobɔvo ne 7:9) Yemɔti saa awie ka anzɛɛ yɛ debie bieko mɔɔ gyegye wɔ la a, biza ɛ nwo kɛ: ‘Mebahola meabu me nye meagua zo ɔ? Asoo ɔwɔ kɛ mekɔ zo medwenledwenle nwolɛ?’

10. (a) Mɔlebɛbo ne, kɛzi adiema raalɛ bie yɛle ye nyɛleɛ wɔ tendɛtia nwo ɛ? (b) Ngɛlɛlera boni a boale ye ɔmaanle ɔnyianle anzodwolɛ a?

¹⁰ Saa awie ka yɛ nwo edwɛkɛ ɛtane a, bie a ɔbayɛ se kɛ yɛbabu yɛ nye yɛagua zo. Suzu mɔɔ dole adekpakyelɛnli bie mɔɔ yɛbavɛlɛ ye Lucy la anwo nea. Asafo ne anu amra bie mɔ hanle ye daselɛlilɛ ɛhɔlɛ nee kɛzi ɔfa ye mekɛ ɔdi gyima la nwo edwɛkɛ ɛtane. Ɔgyegyele ye kpalɛ na ɔhɔle mediema mrenyia mɔɔ bɛnyi sunsum nu la ɛkɛ ɔmaanle bɛboale ye. Boni a vile nuhua rale a? Ɔse bɛvale Baebolo ne bɛboale ye bɛmaanle ɔgyakyile kɛ ɔbadwenle edwɛkɛ ɛtane ne mɔɔ awie mɔ ka la anwo na yeadwenle Gyihova anwo dɔɔnwo. Mɔɔ ɔgengale Mateyu 6:1-4 la, ɔmaanle ye anwosesebɛ. (Kenga.) Zɔhane ngɛlɛlera ne hakyele ye kɛ Gyihova mɔɔ ɔmaa ɔ nye alie la a hyia kpalɛ kpalɛ a. Yemɔti ɔbule ɔ nye ɔguale ɔ nwo edwɛkɛ ɛtane ne mɔɔ bɛka la azo. Kɛkala, saa awie mɔ ka ye daselɛlilɛ ne anwo edwɛkɛ ɛtane bɔbɔ a, ɔ nye die ɔluakɛ ɔze kɛ ɔlɛbɔ mɔdenle yeayɛ mɔɔ sɔ Gyihova anye la.

11, 12. (a) Saa Kilisienenli bie die di kɛ ɔ nee ɔ “diema bie lɛ edwɛkɛ” a, duzu a ɔwɔ kɛ ɔyɛ a? (b) Duzu a yɛbahola yɛazukoa yɛavi adenle mɔɔ Ebileham luale zo zieziele akɛsakɛsa la anu a? (Nea mɔlebɛbo nvoninli ne.)

¹¹ “Yɛ muala yɛfo wɔ ninyɛne dɔɔnwo anu.” (Gye. 3:2) Fa ye kɛ wɔnwu kɛ edwɛkɛ bie mɔɔ wɔha anzɛɛ debie bie mɔɔ wɔyɛ la ɛgyegye adiema bie. Duzu a ɔwɔ kɛ ɛyɛ a? Gyisɛse hanle kɛ ‘saa ɛkɔ kɛ ɛkabɔ afɔle na ɛkakye ye wɔ afɔlemokyea ne anyunlu ɛkɛ ne kɛ ɛ nee ɛ diema bie lɛ edwɛkɛ a, gyakyi wɔ afɔlebɔlɛ ne wɔ afɔlemokyea ne anyunlu ɛkɛ ne; dumua kɔ ɛ nee ɛ diema ne bɛbɔ bɛ avinli, na akee sia babɔ wɔ afɔle ne maa Nyamenle.’ (Mateyu 5:23, 24) Yemɔti ɛ nee ɛ diema ne ɛdendɛ. Saa bɛlɛtendɛ a, ɔwɔ kɛ ɛfa ɛyɛ wɔ bodane kɛ ɛkpondɛ anzodwolɛ. Ɔwɔ kɛ ɛdie wɔ nvonleɛ ɛto nu na mmatendɛ ɛtia ɛ diema ne. Yɛ nee yɛ  mediema avinli anzodwolɛ ne a hyia kpalɛ kpalɛ a.

¹² Baebolo ne kile kɛzi Nyamenle azonvolɛ bahola aziezie akɛsakɛsa na bɛamaa anzodwolɛ adɛnla bɛ avinli la. Kɛ neazo la, ɛnee Ebileham nee ye awozoa Lɔɔto amuala lɛ nyɛmoa dɔɔnwo, na kɛmɔ azɛlɛ ne le ekyi maa bɛ la ati, akɛsakɛsa bɔle ɔ bo kɛ ɔba bɛ mboaneneavolɛma ne avinli. Kɛmɔ Ebileham kpondɛ anzodwolɛ la ati, ɔmaanle Lɔɔto kpale ɛleka mɔɔ ɔkulo la. (Mɔlebɛbo 13:1, 2, 5-9) Neazo kɛnlɛma boni ɛne! Asoo kpalɛ zɔhane mɔɔ Ebileham yɛle la maanle ɔ nwo hyelele ye bɔkɔɔ? Kyɛkyɛ. Ɛhye anzi, yeangyɛ biala Gyihova bɔle Ebileham ɛwɔkɛ kɛ ɔbayila ye yeadɛla mɔɔ yeminli ye la. (Mɔlebɛbo 13:14-17) Duzu a yɛsukoa yɛfi nu a? Saa akɛsakɛsa ba, yɛfa ɛlɔlɛ yɛsiezie na yemɔ bɔbɔ maa yɛminli debie a, Gyihova bayila yɛ. ^[1]—Nea awieleɛ edwɛkɛ ne.

13. Kɛzi neavolɛ bie yɛle ye nyɛleɛ wɔ edwɛkɛ ɛtane nwo ɛ, na duzu a yɛbahola yɛazukoa yɛavi ye neazo ne anu a?

¹³ Suzu kenlensa ye ala neazo bie anwo. Nyianu gyimalilɛleka bie azo neavolɛ fofolɛ bie vɛlɛle adiema nrenyia bie bizale ye saa ɔbahola yeaboa ye wɔ nyianu ne anu a. Adiema ne hanle edwɛkɛ mɔɔ ɛnle kpalɛ la hilele gyimalilɛleka zo neavolɛ ne ɔluakɛ ɛnee neavolɛ dɛba ne anwo ɛya tɛbɔ ye nu. Neavolɛ fofolɛ ne anva ɛya noko yeambu ɔ nye yeangua mɔɔ zile la azo. Dɔnehwele ko anzi, ɔvɛlɛle adiema nrenyia ne bieko na ɔhanle kɛ ɔmaa bɛyia. Dapɛne ko anzi, bɛyiale wɔ Belemgbunlililɛ Asalo ɛkɛ, na bɛzɛlɛle Gyihova bɛwiele la, akee bɛvale dɔnehwele ko bɛdendɛle. Adiema nrenyia ne hilehilele mɔɔ zile ɔ nee neavolɛ dɛba ne avinli la anu. Neavolɛ fofolɛ ne diele ye kpalɛ na ɔ nee ye zuzule ngɛlɛlera bie mɔ anwo. Yemɔ maanle anzodwolɛ rale bɛ avinli na bɛbɔle nu bɛyɛle gyima wɔ nyianu ne abo. Adiema nrenyia ne anye liele kɛ neavolɛ ne dendɛle kɛnlɛma hilele ye la.

14, 15. (a) Mekɛ boni a ɔwɔ kɛ yɛfa folɛdulɛ mɔɔ wɔ Mateyu 18:15-17 la yɛdi gyima a? (b) Ndenle nsa boni a Gyisɛse hanle kɛ yɛva zo a, na saa yɛlɛfa yɛali gyima a, duzu a ɔwɔ kɛ yɛfa yɛyɛ yɛ bodane a?

¹⁴ Saa edwɛkɛ wɔ Kilisienema nwiɔ avinli a, ɔwɔ kɛ bɛdabɛ mumua ne bɛsiezie. Noko ɔyɛ a ɛhye ɛnyɛ boɛ. Kɛ mɔɔ Mateyu 18:15-17 ka la, bie a ɔbahyia kɛ awie mɔ boa wɔ tɛnlabelɛ bie mɔ anu. (Kenga.) ‘Nvonleɛ’ ne anzɛɛ ɛtane ne mɔɔ Gyisɛse hanle nwolɛ edwɛkɛ la ɛnle akɛsakɛsa ekyi bie mɔɔ wɔ Kilisienema avinli la. Kɛzi yɛkola yɛnwu ye ɛ? Gyisɛse hanle kɛ saa ɛtanevolɛ ne annu ɔ nwo wɔ mekɛ mɔɔ ɔ nee ɔ diema ne, alasevolɛ nee mgbanyima ɛdendɛ ɛwie la a, ɔwɔ kɛ bɛbu ye kɛ “ɔnze Nyamenle anzɛɛ ɔle kɛ adwuledievolɛ.” Ɛnɛ, ɛhye kile kɛ ɔwɔ kɛ bɛtu ye. ‘Nvonleɛ’ ne anzɛɛ ɛtane ne bahola ayɛ ndunlumililɛ anzɛɛ duma ɛzɛkyelɛ, na tɛ agyalɛzɛkyelɛ, menli mɔɔ bɛ awodeɛ le ko nla, ɛkpɔkyelɛ anzɛɛ awozonlezonlenlɛ ɔ. Ɔwɔ kɛ asafo nu mgbanyima a di ɛtane ɛhye mɔ anwo gyima a.

¹⁵ Bodane mɔɔ ɔti Gyisɛse dule folɛ ɛhye la a le kɛ ɔmaa yɛanwu kɛzi yɛbaboa adiema bie la ɔluakɛ yɛkulo ye. (Mateyu 18:12-14) Kɛ ɔkɛyɛ na yɛava folɛdulɛ ɛhye yɛali gyima ɛ? (1) Ɔwɔ kɛ yɛbɔ  mɔdenle kɛ yɛbaziezie yɛ nee yɛ mediema avinli mɔɔ ɔngyia kɛ yɛbabɔ awie mɔ gyɛne amaneɛ. Bie a ɔbahyia kɛ yɛ nee ye badendɛ fane dɔɔnwo. Noko saa ɛhye mɔ amuala anzi anzodwolɛ ɛmba ɛ? (2) Ɔwɔ kɛ yɛ nee awie mɔɔ ze edwɛkɛ ne anwo bie anzɛɛ ɔbahola yeanwu edwɛkɛ ne anye zo kpalɛ la kɔ adiema ne ɛkɛ. Saa ngyegyelɛ ne abo pɛ a, “ɛnee ɛ sa ɛha ɛ diema ne.” Noko saa ɛkɔ ye ɛkɛ fane dɔɔnwo na anzodwolɛ amba a, yɛɛ (3) ɛbaha edwɛkɛ ne wɔahile mgbanyima ne mɔ a.

16. Duzu a kile kɛ Gyisɛse folɛdulɛ ne mɔɔ yɛbali zo la boa yɛɛ ɔkile ɛlɔlɛ a?

¹⁶ Ɔyɛ a ndenle nsa ne mɔɔ wɔ Mateyu 18:15-17 la amuala anwo ɛngyia wɔ tɛnlabelɛ bie mɔ anu. Ɛhye maa anwosesebɛ. Duzu ati a yɛka ye zɔ a? Fane dɔɔnwo ne ala ɛtanevolɛ ne nwu ye nvonleɛ na ɔdi nwolɛ gyima yemɔti ɔnrɛhyia kɛ bɛbadu ye bɛavi asafo ne anu. Akee ɔwɔ kɛ ahenle mɔɔ bɛvo ye la fa ɔ diema ne ɛtane kyɛ ye amaa yeanyia anzodwolɛ. Yemɔti ɔda ali wɔ Gyisɛse folɛdulɛ ne anu kɛ ɔnle kɛ yɛpele yɛ nwo yɛkɔ mgbanyima ne mɔ ɛkɛ. Mekɛ mɔɔ yɛva ndenle nwiɔ ne mɔɔ limoa la yɛli gyima na yɛnwu ye wienyi kɛ ahenle ne ɛtɛkakyile ye adwenle la a akee yɛbaha yɛahile mgbanyima ne mɔ a.

17. Saa yɛmaa ‘anzodwolɛ’ tɛnla yɛ avinli a, duzu nyilalɛ a yɛbanyia a?

¹⁷ Ɛnyia yɛnli munli la, yɛbavo awie mɔ dahuu. Ɛdoavolɛ Gyemise hɛlɛle kɛ: “Sonla mɔɔ ɛnvo wɔ ye edwɛkɛ ɛhanlɛ nu la di munli na ɔkola ɔsɔ ɔ nwo.” (Gyemise 3:2) Saa yɛbahola yɛaziezie akɛsakɛsa a, ɔwɔ kɛ yɛbɔ mɔdenle biala ‘yɛkpondɛ anzodwolɛ na yɛdi ɔ nzi.’ (Edwɛndolɛ 34:14) Saa yɛmaa anzodwolɛ tɛnla yɛ nee yɛ mediema avinli dahuu a, yɛ nee bɛ banyia agɔnwolɛvalɛ kpalɛ, na ɛhye bamaa yɛadɛnla koyɛlɛ nu. (Edwɛndolɛ 133:1-3) Mɔɔ tɛla biala la, yɛ nee Gyihova, “Nyamenle mɔɔ maa anzonudwolɛ la” banyia agɔnwolɛvalɛ kpalɛ. (Wulomuma 15:33) Saa yɛfa ɛlɔlɛ yɛsiezie akɛsakɛsa a, yɛbanyia nyilalɛ ɛhye mɔ amuala.