BAEBOLO NGYINLAZO: ‘Bɛmmadwenle bɛ ngoane nwo.’​—Mateyu 6:25.

Ɔkile duzu? Gyisɛse hanle edwɛkɛ ɛhye wɔ ye Boka Zo Edwɛkɛhanlɛ ne anu. Kɛ mɔɔ Baebolo edwɛbohilelɛ buluku bie hanle la, Giliki yɛkpɔkɛ “bɛdwenle” kola kile “kɛzi sonla yɛ ye nyɛleɛ wɔ ehyia, ɛhɔne nee ngyegyelɛ gyɛne mɔɔ ɔto ye wɔ asetɛnla nu kenle ko biala anwo la.” Adwenleadwenle ta fale ninyɛne mɔɔ bazi kenle bie mɔɔ yɛdwenle nwolɛ la anwo. Ɔle kpalɛ kɛ yɛbadwenle yɛ nwonane afoa nu ngyianlɛ nee yɛ kulovolɛma boɛyɛlɛ nwo. (Felepaema 2:20) Noko mɔɔ Gyisɛse hanle kɛ “bɛmmadwenle” la, ɛnee ɔlɛtu ye ɛdoavolɛma ne folɛ kɛ bɛhoati adwenleadwenle dɔɔnwo. Saa yɛsulo mɔɔ bado yɛ ɛhyema la a ɔkola ɔsɛkye yɛ anyelielɛ ɛnɛ.​—Mateyu 6:31, 34.

Nvasoɛ wɔ zo ɛnɛ ɔ? Nrɛlɛbɛ wɔ nu kɛ yɛbadie Gyisɛse folɛdulɛ ne. Kɛmɔti ɛ? Buluku bie ka kɛ saa menli dwenle dɔɔnwo dɔɔnwo a, ɔka bɛ kpɔkɛdelɛ na ɔmaa bɛnyia ewule le kɛ bɛ kunlu nganlɛ, ahonle ewule nee ndehyee.”

Gyisɛse hanle edwɛkɛ bie mɔɔ maa yɛnwu deɛmɔti ɔnle kɛ yɛdwenle dɔɔnwo la: Nwolɛ ɛngyia. Gyisɛse bizale kɛ, “Bɛ nuhua boni yɛɛ kɛhola kɛlua ye adwenleadwenle zo kɛva mekɛ ekyi kɛboka ye mekɛ nwo a?” (Mateyu 6:27) Saa yɛdwenle dɔɔnwo a, yemɔ ɛnrɛva kɛkɛ ekyii ɛnrɛboka yɛ ngoane mekɛ nwo na bɔbɔ yeayɛ boɛ. Ɛye yemɔ ɛsie ahane a, ninyɛne mɔɔ yɛsulo nwolɛ la ɛnda ɛnyɛ zɔ. Nwomanli ko hanle ye zɛhae: “Yɛdwenle kenle bie nwo a ɔle mekɛ ɛzɛkyelɛ mgbane, na kenle bie ta yɛ kpalɛ tɛla kɛzi yɛsuzu kɛ ɔbayɛ la.”

Kɛ ɔkɛyɛ na yɛahoati adwenleadwenle ɛ? Mɔɔ limoa, fa ɛ nwo to Nyamenle anwo zo. Saa Nyamenle maa nloma aleɛ na ɔkeda felawɔse ɛdanlɛ ɔmaa bɛ nwo yɛ fɛ a, asoo ɔnrɛva menli mɔɔ bɛfa ye ɛzonlenlɛ bɛdimoa wɔ bɛ ɛbɛlabɔlɛ nu la ngyianlɛ ɔnrɛmaa bɛ ɔ? (Mateyu 6:25, 26, 28-30) Mɔɔ tɔ zo nwiɔ, dwenle ɛnɛ angome anwo. Gyisɛse hanle kɛ, “Bɛmmadwenle ɛhyema anwo” ɔluakɛ “ɛhyema ɔdaye ɔ nee ɔ ti anwo adwenleadwenle ɛdeɛ lua.” Asoo ɛnlie ɛndo nu kɛ ‘ɔngyia kɛ ɛkɛva kenle ko anwo adwenleadwenle ɛdeɛ ɛkɛboka ko ɛdeɛ nwo’ ɔ?​—Mateyu 6:34.

Saa yɛtie Gyisɛse folɛdulɛ ne mɔɔ nrɛlɛbɛ wɔ nu la a, yɛnrɛva yɛ nwo yɛnrɛdo esiane nu. Mɔɔ hyia kpalɛ la, yɛbanyia mɔɔ Baebolo ne fɛlɛ ye “Nyamenle anzondwolɛ ne” la.​—Felepaema 4:6, 7.