Rose ka kɛ: “Bɛvale ewule bie mɔɔ maa mete nyane dahuu la bɛwole me. Me ɛbɛlabɔlɛ ne yɛle sesakaa.” Ninyɛne mɔɔ gyegye ye la anu ko a le kɛ ɔdwu mekɛ ne bie a, ɔngola ɔnva ye adwenle ɔnzie Baebolo ne nee sunsum nu ninyɛne mɔɔ ɔlɛsukoa la azo. Noko Gyisɛse edwɛkɛ mɔɔ wɔ Mateyu 19:26 mɔɔ se: “Nyamenle ɛdeɛ debie biala ɛnyɛ se ɛmmaa ye” la boale ye kpole. Rose nwunle kɛ ɔbahola yealua ndenle ngakyile zo yeazukoa debie. Kɛmɔ ye anwofofolɛ ne ɛmmaa ɔngola debie kenga la ati ɔbɔle ɔ bo ɔdiele Baebolo ne nee Baebolo nwo mbuluku mɔɔ le ɔdio la. * Ɔka kɛ: “Saa ɛhye mɔ ɛnle nu a, anrɛɛ menrɛnwu kɛzi me sunsum nu gyinlabelɛ ne bayɛ a.”

Saa Rose ɛlɛdi nyane wɔ mɔɔ ɛnee ɔkola ye yɛ la anwo a, ɔnyia arɛlekyekyelɛ ɔfi 2 Kɔlentema 8:12: “Saa ɛhulolɛ ne wɔ ɛkɛ a, mɔɔ awie lɛ la a sɔ ɛnyelɛ a, na tɛ mɔɔ ɔnlɛ la ɔ.” Edwɛkɛ zɔhane hakyele Rose kɛ Nyamenle anye sɔ mɔɔ ɔyɛ la ɔluakɛ mɔɔ ɔbahola ye yɛ la amuala a ɔlɛyɛ la.

Delphine mɔɔ yɛlimoa yɛha ɔ nwo edwɛkɛ la hanle kɛ: “Mɔɔ me ra raalɛ ne mɔɔ ɛnyia ɛvolɛ 18 la wule la me nyanelilɛ ne yɛle kpole somaa mɔɔ menzuzule kɛ menrɛhola aze tɛnla a. Debie biala ɛnrɛyɛ boɛ bieko.” Ɔnyianle arɛlekyekyelɛ wɔ edwɛkɛ mɔɔ wɔ Edwɛndolɛ 94:19 la anu. Edwɛndolɛnli ne hanle hilele Nyamenle kɛ: “Saa adwenleadwenle bo me nwo zo a, ɛkyekye me rɛle ɛmaa medi fɛlɛko.” Ɔka kɛ, “Menzɛlɛle Gyihova kɛ ɔboa me ɔmaa menyia debie mɔɔ mebayɛ amaa meande nyane ne la.”

Ɔvale ɔ nwo ɔwulale tunwomaa gyima bie anu. Nzinlii, ɔvale ɔ nwo ɔtotole ngakula crayon nwo​—mɔɔ ɛbubu bɔbɔ la ɛfa ɛpenti debie a, ɔyɛ boɛ. Zɔhane ala a ɔdele nganeɛ kɛ yebubu bɔkɔɔ ɛdeɛ, noko ɔbahola yeaboa awie mɔ a. Ɔka kɛ: “Menwunle kɛ saa mefa Baebolo nu ngyinlazo nee Ngɛlɛlera ne mekyekye me sukoavoma arɛle a, ɔle adenle mɔɔ Gyihova noko ɛlɛdua zo akyekye me rɛle yeamaa meali fɛlɛko a.” Ɔhɛlɛle Baebolo nu menli mɔɔ lile alɔbɔlɛ kpole la aluma ɔdole ɛkɛ. Ɔka kɛ: “Ɛnee bɛ muala bɛyɛ asɔne. Saa ɛto wɔ Baebolo ne anu a, ɛnrɛnyia moalɛ biala.”

Baebolo ne ɛzukoalɛ ɛhile Delphine debie fofolɛ​—kɛ ɔva ye adwenle ɔzie kenle bie azo na tɛ mɔɔ ɛze ɛhɔ la. Anyelazo mɔɔ wɔ Gyima ne 24:15 la kyekye ɔ rɛle: “Bɛbadwazo tenlenema nee bɛdabɛ mɔɔ bɛnle tenlenema la bɛavi ewule nu.” Kɛzi ɔkola ɔnwu kɛ amgba Gyihova badwazo ɔ ra raalɛ ne ɛ? Bɛmaa Delphine mumua ne ɛye ɔ nloa: “Menwu me ra ne wɔ kenle bie. Ɔle kɛ asɛɛ me nee me ra ne ɛyɛ ngyehyɛleɛ mɔɔ yɛbava yɛavinde bieko la wɔ kalenda zo. Le kɛ mɔɔ menwole ye na ɛnee mekulo ye la, menwu kɛ me nee ye gyi yɛ tola ne anu.”