“KALE ne bahola adu ahɔ, noko Chinanli kpavolɛ ne baha ɛke!” Ɛhye a raalɛ bie mɔɔ bɛfɛlɛ ye Alexandra dele ye wɔ kale ne anu a, wɔ mekɛ mɔɔ bɛlɛkendɛ bɛapɛ ɛweɛne mɔɔ la Ameleka Nyiakɛ maanle nwiɔ bie avinli la. Ɔdwule aze kɛ ɔkɛnlea mɔɔ ɔlɛsi la na ɔnwunle kɛ Chinanli kpavolɛ bie mɔɔ ɔnde Spain aneɛ ne kpalɛ la, ɛlɛbɔ mɔdenle ahilehile edwɛkɛ nu ahile kpanyinli ne mɔɔ sinza ɛweɛne ne azo la. Kɛmɔ Alexandra kɔ Gyihova Alasevolɛ debiezukoalɛ mɔɔ bɛyɛ ye wɔ China aneɛ nu la ati, ɔdule ɔ nwo ɔmaanle ɔhilele edwɛkɛ ne abo.

Kpavolɛ ne hanle kɛ ɔle ekulomeni na bɛwua ye adendulɛ ngɛlata nee ye ezukoa kɔsɔɔti. Mɔlebɛbo ne kpanyinli ne anlie edwɛkɛ ɛhye anli na ɔzuzule bɔbɔ kɛ Alexandra nee nrenyia ne ɛhyehyɛ. Awieleɛ ne, ɔliele mɔɔ Kpavolɛ ne hanle la ɔdole nu, noko ɛnee ɔwɔ kɛ Kpavolɛ ɛhye tua ezukoa bie ɔluakɛ ye ngɛlata ne mɔ ɛnli munli. Kɛmɔ ɔnlɛ ezukoa fee la ati, Alexandra bɔle ye bosea dɔla 20. Nrenyia ne lale ye ase somaa na ɔhanle kɛ ɔbadua mɔɔ tɛla ɛhye la. Alexandra zele ye kɛ ɔmkpondɛ ɔ nzi ahyɛlɛdeɛ; ɔ nye die kɛ ɔbaboa ye ɔluakɛ ɔnwunle kɛ ɔle debie kpalɛ mɔɔ ɔwɔ kɛ ɔyɛ a. Ɔmaanle ye Baebolo nwo mbuluku bie mɔ na ɔzele ye kɛ ɔ nee Alasevolɛ ne mɔ ɛzukoa Baebolo ne.

Ɔyɛ anyelielɛ kɛ ɛbade nyele mɔɔ bɛyɛ bɛmaa nyɛvolɛ la anwo edwɛkɛ, na ɔda ali kɛ menli mɔɔ wɔ asɔne ngakyile nu nee bɛdabɛ mɔɔ bɛngɔ asɔne la da nyeleyɛlɛ ali. Asoo ɛdawɔ a, anrɛɛ ɛbanyia ɛhulolɛ kɛ ɛboa awie wɔ adenle ɛhye azo ɔ? Kpuya ɛhye hyia ɔluakɛ Gyisɛse hanle kɛ: “Anyelielɛ dɔɔnwo wɔ ɛmaanlɛ nu tɛla ɛlielɛ.” (Gyima ne 20:35) Eza neɛnleanu mɔɔ abɔdeɛ nwo nrɛlɛbɛvolɛma ɛyɛ la ɛmaa bɛnwu kɛ ɛkyɛ debie a ɔboa wɔ. Maa yɛnlea kɛzi ɛhye le zɔ la.

Anwubielɛ ɛmaa yela ali kɛ ɛmaanlɛ maa bɛ nye die. Ɛzoanvolɛ Pɔɔlo hɛlɛle kɛ “Nyamenle kulo mɔɔ te ɔ nyunlu kyɛ debie la.” Ɛnee ɔlɛka Kilisienema mɔɔ vile bɛ ahonle nu yele ndoboa boale bɛ gɔnwo mɔ diedima mɔɔ anwo hyelele bɛ la anwo edwɛkɛ. (2 Kɔlentema 8:4; 9:7) Pɔɔlo anga kɛ bɛ nye liele la ati a bɛhyɛle debie a. Emomu bɛhyɛle debie la ati a bɛ nye liele a.

Neɛnleanu ko kile kɛ ɛmaanlɛ “maa adwenle ne anye die, ɔmaa yɛ nee menli avinli yɛ kpalɛ na bɛdie yɛ bɛdi na ɛhye maa yɛ ‘kunlu dwo yɛ nwo.’” Neɛnleanu bieko kile kɛ “saa yɛkyɛ awie ezukoa a ɔmaa yɛ nye die kpole tɛla kɛ yɛdayɛ mumua ne yɛbava yɛadɔ debie la.”

Asoo wɔ tɛnlabelɛ ne ati ɛsuzu kɛ ɛnrɛhola ɛnrɛhyɛ awie debie ɔ? Nɔhalɛ edwɛkɛ ne a le kɛ saa awie biala “te ɔ nyunlu kyɛ debie” a ɔ nye die. Adwenle kpalɛ a hyia a na tɛ deɛ ne kpole ɔ. Gyihova Dasevolɛ bie ye ndoboa ahɔmaa magazine ɛhye yɛvoma la, ɔhɛlɛle  ɔbokale nwolɛ kɛ: “Wɔ ɛvolɛ dɔɔnwo anu ezukoa ekyi bie ala a mefa meye ndoboa wɔ Belemgbunlililɛ Asalo a, noko Gyihova Nyamenle ɛmaa me dɔɔnwo ɛdɛla mɔɔ mefa memaa la. . . . Meda bɛ ase kɛ bɛmaa mehola meva ndoboa ɛhye menwa kɛ bɛva bɛboa Gyihova gyima ne la—ɔmaa me nye die.”

Nɔhalɛ nu, tɛ ezukoa ala a yɛkola yɛfa yɛkyɛ a. Yɛbahola yɛava ninyɛne dɔɔnwo yɛamaa.

Baebolo ne ka kɛ: “Sonla mɔɔ atiakunlu le kpalɛ la nyia ye kpalɛyɛlɛ ne azo nvasoɛ, na atisesebɛnli ne boda ɔ ngome ɔ nwo.” (Mrɛlɛbulɛ 11:17) Menli mɔɔ ati akunlu le kɛnlɛma la yɛ nyele; bɛfa bɛ mekɛ, bɛ anwosesebɛ nee bɛ ninyɛne bɛboa awie mɔ. Ɛhye boa bɛ wɔ ndenle ngakyile zo, bie a le kɛ ɔboa bɛ kpɔkɛdelɛ.

Neɛnleanu maa ɔda ali kɛ bɛdabɛ mɔɔ bɛtu bɛ nwo bɛmaa bɛboa awie mɔ la anwo ɛnda ɛndo bɛ yɛɛ bɛ adwenleadwenle zo te. Ɔmaa bɛnyia kpɔkɛdelɛ kpalɛ. Nyeleyɛlɛ maa bɛdabɛ mɔɔ bɛnyia ewule mɔɔ ɛnlɛ ye ayile le kɛ sclerosis anzɛɛ HIV la anwo tɔ bɛ. Eza bɛnwu kɛ bɛdabɛ mɔɔ bɛkulo kɛ bɛgyakyi nza ɛnlonlɛ mɔɔ bɛboa awie mɔ la adwenleadwenle zo te na ɔmmaa bɛnzia bɛnlo bieko.

Bɛsuzu kɛ deɛmɔti ɔle zɔ la a le kɛ “awie mɔɔ se anwunvɔne na ɔyɛ nyele la ɛnda ɛnnyia adwenle ɛtane.” Eza nyele kola te adwenleadwenle zo na ɔka mogya molozo aze. Saa awie ahu anzɛɛ ɔ ye wu na ɔtu ɔ nwo ɔboa awie mɔ a, ɔte ye nyanelilɛ ne azo ndɛndɛ.

Ɔda ali wienyi kɛ saa ɛkyɛ debie a ɔboa wɔ.

Gyisɛse dule ye ɛdoavolɛma folɛ kɛ: “Bɛhyɛ debie, na menli ahyɛ bɛ debie. Ɛzuzudeɛ mɔɔ bɛmia zo, bɛwoso ye, na yebu zo la yɛɛ bɛbawola bɛagua bɛ ɛdanlɛ nu a. Ɔluakɛ debie mɔɔ bɛfa bɛsuzu bɛmaa awie mɔ la yɛɛ bɛbava bɛazuzu bɛamaa bɛdabɛ noko a.” (Luku 6:38) Saa ɛkyɛ debie a ɔmaa menli kile wɔ nyeleyɛlɛ ne anwo anyezɔlɛ na bɛdabɛ noko bɛyɛ bie. Eza ɔfa koyɛlɛ nee agɔnwolɛvalɛ ɔba.

Bɛdabɛ mɔɔ bɛsukoa menli avinli ngitanwolilɛ nwo debie la ɛnwu kɛ “menli mɔɔ dahuu yɛ nyele la maa awie mɔ anwosesebɛ maa bɛyɛ bie.” Nɔhalɛ nu, “saa menli kenga nyele mɔɔ awie mɔ ɛyɛ la anwo debie bɔbɔ a, ɔka bɛ ɔmaa bɛyɛ nyele.” Ɔti kɛ mɔɔ neɛnleanu ko kile la, “sonla ko kola nyia menli dɔɔnwo anwo zo tumi bɔbɔ menli mɔɔ ɔnze bɛ la.” Ɛhye kile kɛ, nyele mɔɔ sonla ko bayɛ la kola ka sua bie azo amra ɔmaa bɛdabɛ noko bɛyɛ nyele. Ɔda ali kɛ ɛ nye balie kɛ ɛbadɛnla ɛleka zɛhae. Ɛhɛe, saa menli dɔɔnwo kyɛ debie a nvasoɛ dɔɔnwo fi nu ba.

Anwubielɛ ɛhye mɔɔ vi Florida, U.S.A. la maa yɛnwu nɔhalɛ mɔɔ wɔ edwɛkɛ ɛhye anu la. Gyihova Alasevolɛ ekpunli bie dule bɛ nwo maanle kɛ bɛkaboa  menli mɔɔ ahumuakyima ɛzɛkye bɛ ninyɛne la. Mekɛ mɔɔ bɛlɛkendɛ ninyɛne mɔɔ bɛbava bɛayɛ sua ne anwo gyima la, bɛnwunle kɛ awie bie mɔɔ bikye ɛkɛ la bane ne ɛde ɛgua aze na bɛhɔyɛle ye boɛ. Mekɛ ekyi anzi ahenle ne mɔɔ bɛliele ye bane ne la hɛlɛle kɛlata hɔmaanle Gyihova Alasevolɛ ewiade amuala gyima ne ati kɛ, “Meda bɛ ase somaa. Menwu kɛ menli ɛhye mɔ boka menli mgbalɛ mɔɔ meyia bɛ ɛlɛ la anwo.” Anyezɔlɛ hanle ye maanle ɔvile ye ahonle nu ɔyele ndoboa kɛ Alasevolɛ ne mɔ ɛva ɛboa gyima mɔɔ tɛla biala mɔɔ bɛlɛyɛ la.

Abɔdeɛ nwo nrɛlɛbɛvolɛma neɛnleanu mɔɔ bɛyɛ la ɛmaa bɛnwu ye kɛ “bɛvale ɛhulolɛ mɔɔ yɛlɛ kɛ yɛbaboa awie mɔ la bɛbɔle yɛ.” Neɛnlea nu kile kɛ, “ngakula bɔbɔ da atiakunlukɛnlɛma ali kolaa na bɛazukoa ɛdendɛlɛ.” Duzu ati ɔ? Baebolo ne bua kɛ bɛbɔle sonla kɛ “Nyamenle mumua ne ye ɛsaso,” kile kɛ, yɛlɛ Nyamenle subane titili ne bie.—Mɔlebɛbo 1:27.

Gyihova Nyamenle, yɛ Bɔvolɛ ne subane ngɛnlɛma ne mɔ bie noko a le ahunlunyele. Yemaa yɛ ngoane nee debie biala mɔɔ yɛhyia nwo amaa yɛ nye alie. (Gyima ne 14:17; 17:26-28) Yɛbahola yɛanwu yɛ anwuma Selɛ ne nee ye bodane mɔɔ ɛlɔlɛ wɔ nu mɔɔ ɔlɛ ɔmaa yɛ la kpalɛ ɔlua ye Edwɛkɛ, Baebolo ne mɔɔ yɛbazukoa la azo. Buluku zɔhane eza maa yɛnwu kɛ Nyamenle ɛyɛ nziezielɛ mɔɔ bamaa yɛ nye alie kenle bie a. * (1 Dwɔn 4:9, 10) Kɛ mɔɔ Gyihova Nyamenle a le nyeleyɛlɛ ɛvileka na bɛbɔle yɛ kɛ ye ɛsaso la ati, saa yɛkyɛ debie a ɛnee yɛlɛsukoa ye na ɔbaboa yɛ na yɛanyia ɔ nyunlu ɛlolɛ.—Hibuluma 13:16.

Ɛkakye Alexandra mɔɔ yɛhanle ɔ nwo edwɛkɛ wɔ mɔlebɛbo ne la ɔ? Kɛzi ye edwɛkɛ ne hɔwiele ye ɛ? Awie mɔɔ de bikye ye wɔ kale ne anu la hanle kɛ ɔ sa ɛnrɛha ye ezukoa ne bieko ɛdeɛ, noko kpavolɛ ne mɔɔ ɔboale ye la vɛlɛle ɔ gɔnwo mɔ wɔ ɛleka mɔɔ kale ne kagyinla la na ɔduale $20 ne ɔmaanle ye ɛkɛ ne ala. Bieko, kpavolɛ ne diele Alexandra edwɛkɛ na ɔbɔle ɔbo ɔzukoale Baebolo ne. Alexandra anye liele kɛ ɔyiale ye bieko wɔ siane nsa anzi, mekɛ mɔɔ Gyihova Alasevolɛ ɛlɛyɛ nyianu wɔ China aneɛ nu wɔ Peru la. Amaa yeahile kɛ ɔ nye sɔ mɔɔ Alexandra ɛyɛ ɛmaa ye la, kpavolɛ ne vɛlɛle ye nee bɛdabɛ mɔɔ ɔ nee bɛ rale nyianu ne la ɔmaanle bɛrale ye aleɛlilɛleka ne.

Saa yɛkyɛ debie na yɛboa awie mɔ a ɔmaa yɛ nye die kpole. Mɔɔ tɛla biala la a le kɛ yɛbaboa menli yeamaa bɛanwu Gyihova Nyamenle—ahyɛlɛdeɛ kpalɛ biala Amenle ne! (Gyemise 1:17) Wɔnwu deɛmɔti ɔwɔ kɛ ɛkyɛ debie la ɔ?